ਸਾਂਈ ਜੇ.ਬੀ. ਜਗਤਾਰ ਸਾਬਰੀ ਨੇ ਫੇਸਬੁੱਕ "ਤੇ ਗਲਤ ਪੋਸਟ ਪਾਉਣ ਵਾਲੇ ਖਿਲਾਫ ਕੀਤੀ ਕਾਰਵਾਈ ਦੀ ਮੰਗ

* ਪੜਤਾਲ ਤੋਂ ਬਾਅਦ ਹੋਵੇਗੀ ਸਖ਼ਤ ਕਾਰਵਾਈ - ਐਸ.ਪੀ. ਬਾਹੀਆ

ਫਗਵਾੜਾ 22 ਸਤੰਬਰ (ਅਸ਼ੋਕ ਸ਼ਰਮਾ-ਚੇਤਨ ਸ਼ਰਮਾ) ਦਰਬਾਰ ਮਾਈ ਭੁੱਲੀ ਘੁਮਾਰੀ ਸਾਬਰੀ ਨਜਦੀਕ ਸਰਕਾਰੀ ਹਸਪਤਾਲ ਪਿੰਡ ਪਾਂਛਟ ਦੇ ਗੱਦੀ ਨਸ਼ੀਨ ਸਾਂਈ ਜੇ.ਬੀ. ਜਗਤਾਰ ਸਾਬਰੀ ਨੇ ਐਸ.ਪੀ. ਫਗਵਾੜਾ ਸਰਬਜੀਤ ਸਿੰਘ ਬਾਹੀਆ ਨੂੰ ਇਕ ਦਰਖਾਸਤ ਦਿੰਦਿਆਂ ਦੱਸਿਆ ਕਿ ਉਸ ਸਮੇਤ ਉਸਦੇ ਪਰਿਵਾਰ ਦੇ ਖਿਲਾਫ ਕਿਸੇ ਵਿਅਕਤੀ ਵਲੋਂ ਸੋਸ਼ਲ ਮੀਡੀਆ ਉਪਰ ਗਲਤ ਪ੍ਰਚਾਰ ਕੀਤਾ ਜਾ ਰਿਹਾ ਹੈ ਜਿਸ ਨਾਲ ਉਸਦੇ ਪਰਿਵਾਰ ਦੇ ਸਮਾਜਿਕ ਰਸੂਖ ਨੂੰ ਸੱਟ ਵੱਜੀ ਹੈ ਤੇ ਨਾਲ ਹੀ ਦਰਬਾਰ ਦੇ ਸ਼ਰਧਾਲੂਆਂ ਵਿਚ ਵੀ ਗਲਤ ਸੰਦੇਸ਼ ਜਾ ਰਿਹਾ ਹੈ। ਜੇ.ਬੀ.ਜਗਤਾਰ ਅਨੁਸਾਰ ਉਹ ਪਿਛਲੇ ਕਰੀਬ 10 ਸਾਲ ਤੋਂ ਦਰਬਾਰ ਦੀ ਸੇਵਾ ਕਰ ਰਿਹਾ ਹੈ। ਪਰ ਉਸਨੂੰ ਪਤਾ ਲੱਗਾ ਹੈ ਕਿ ਫੇਸਬੁੱਕ ਦੇ ਇਕ ਗਰੁੱਪ ਵਿਚ ਉਸਨੂੰ ਸਮੇਤ ਪਰਿਵਾਰ ਵਿਦੇਸ਼ ਭੇਜਣ ਦੇ ਨਾਮ ਤੇ ਠੱਗੀ ਕਰਨ ਦੀ ਗਲਤ ਪੋਸਟ ਪਾ ਕੇ ਬਦਨਾਮ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਐਸ.ਪੀ. ਸਰਬਜੀਤ ਸਿੰਘ ਬਾਹੀਆ ਨੇ ਦੱਸਿਆ ਕਿ ਥਾਣਾ ਰਾਵਲਪਿੰਡੀ ਨੂੰ ਦਰਖਾਸਤ ਮਾਰਕ ਕਰ ਦਿੱਤੀ ਗਈ ਹੈ। ਮਾਮਲੇ ਦੀ ਪੜਤਾਲ ਤੋਂ ਬਾਅਦ ਬਣਦੀ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।