ਆਲ ਪੰਜਾਬ ਟਰੱਕ ਏਕਤਾ ਦੇ ਅਹੁਦੇਦਾਰਾਂ ਨੇ ਟਰੱਕ ਯੂਨੀਅਨ ਤਲਵੰਡੀ ਸਾਬੋ ਦੇ ਅਪਰੇਟਰਾਂ ਨਾਲ ਕੀਤੀ ਮੀਟਿੰਗ।

* ਟਰੱਕ ਯੂਨੀਅਨਾਂ ਦੀ ਬਹਾਲੀ ਲਈ ਸੰਘਰਸ਼ ਤਿੱਖਾ ਕਰਨ ਦਾ ਲਿਆ ਅਹਿਦ।

ਤਲਵੰਡੀ ਸਾਬੋ 22 ਦਸੰਬਰ (ਗੁਰਜੰਟ ਸਿੰਘ ਨਥੇਹਾ)- ਕੈਪਟਨ ਅਮਰਿੰਦਰ ਸਿੰਘ ਸਰਕਾਰ ਵੇਲੇ ਮਨਸੂਖ ਕੀਤੀਆਂ ਗਈਆਂ ਟਰੱਕ ਯੂਨੀਅਨਾਂ ਦੀ ਮੁੜ ਬਹਾਲੀ ਅਤੇ ਟਰੱਕ ਆਪਰੇਟਰਾਂ ਦੀਆਂ ਹੋਰ ਹੱਕੀ ਮੰਗਾਂ ਪ੍ਰਵਾਨ ਕਰਵਾਉਣ ਲਈ ਸਮੁੱਚੇ ਸੂਬੇ ਵਿੱਚ ਮਾਲ ਦੀ ਢੋਆ ਢੁਆਈ ਬੰਦ ਕਰਕੇ ਸੰਘਰਸ਼ ਦੇ ਰਾਹ ਪਈ ਜਥੇਬੰਦੀ ‘ਆਲ ਪੰਜਾਬ ਟਰੱਕ ਏਕਤਾ’ ਦੇ ਅਹੁਦੇਦਾਰਾਂ ਵੱਲੋਂ ਹੁਣ ਸਮੁੱਚੇ ਪੰਜਾਬ ਦੀਆਂ ਟਰੱਕ ਯੂਨੀਅਨਾਂ ਵਿੱਚ ਮੀਟਿੰਗਾਂ ਕਰਕੇ ਟਰੱਕ ਆਪਰੇਟਰਾਂ ਨੂੰ ਲਾਮਬੰਦ ਕਰਨ ਦੇ ਉਪਰਾਲੇ ਤਹਿਤ ਅੱਜ ਉਨਾਂ ਨੇ ਦਮਦਮਾ ਸਾਹਿਬ ਪੁੱਜ ਕੇ ਸਥਾਨਕ ਯੂਨੀਅਨ ਦੇ ਆਪਰੇਟਰਾਂ ਨਾਲ ਮੀਟਿੰਗ ਕੀਤੀ।
ਉਕਤ ਮੀਟਿੰਗ ਵਿੱਚ ਵਿਸ਼ੇਸ ਤੌਰ ਤੇ ਪੁੱਜੇ ਆਲ ਪੰਜਾਬ ਟਰੱਕ ਏਕਤਾ ਦੇ ਮੋਹਰੀ ਆਗੂ ਸੁਖਵਿੰਦਰ ਸਿੰਘ ਬਰਾੜ ਨੇ ਟਰੱਕ ਆਪਰੇਟਰਾਂ ਨੂੰ ਪੰਜਾਬ ਦੇ ਟਰੱਕ ਆਪਰੇਟਰਾਂ ਦੇ ਮੌਜੂਦਾ ਹਾਲਾਤਾਂ ਤੋਂ ਜਾਣੂੰ ਕਰਵਾਉਦਿਆਂ ਦੱਸਿਆ ਕਿ ਟਰੱਕ ਯੂਨੀਅਨਾਂ ਨੂੰ ਖਤਮ ਕਰਨ ਉਪਰੰਤ ਪੰਜਾਬ ਦੇ ਟਰੱਕ ਆਪਰੇਟਰਾਂ ਨੂੰ ਅਤਿ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ ਅਤੇ ਰਹਿੰਦੀ ਕਸਰ ਕੋਰੋਨਾ ਨੇ ਪੂਰੀ ਕਰ ਦਿੱਤੀ।ਉਨਾਂ ਕਿਹਾ ਕਿ ਸਮੁੱਚੇ ਸੂਬੇ ਦੇ ਟਰੱਕ ਆਪਰੇਟਰਾਂ ਦੇ ਬਿਹਤਰ ਭਵਿੱਖ ਲਈ ਹੁਣ ਟਰੱਕ ਯੂਨੀਅਨਾਂ ਦੀ ਦੁਬਾਰਾ ਬਹਾਲੀ ਲਈ ਚਰਨਜੀਤ ਸਿੰਘ ਚੰਨੀ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਤੇ ਦਬਾਅ ਬਣਾਇਆ ਜਾ ਰਿਹਾ ਹੈ।ਉਨਾਂ ਦੱਸਿਆ ਕਿ ਜੇ ਸਰਕਾਰ ਨੇ ਉਨਾਂ ਦੀ ਮੰਗ ਜਲਦ ਨਾ ਮੰਨੀ ਤਾਂ ਸਾਰੇ ਪੰਜਾਬ ਨਾਲ ਦੂਜੇ ਸੂਬਿਆਂ ਦੀਆਂ ਲੱਗਦੀਆਂ ਹੱਦਾਂ ਤੇ ਟਰੱਕ ਖੜੇ ਕਰਕੇ ਨਾਂ ਤਾਂ ਕਿਸੇ ਮਾਲ ਨੂੰ ਸੂਬੇ ਵਿੱਚ ਦਾਖਿਲ ਹੋਣ ਦੇਵਾਂਗੇ ਅਤੇ ਨਾਂ ਹੀ ਬਾਹਰ ਜਾਣ ਦੇਵਾਂਗੇ।ਇਸ ਮੌਕੇ ਤਲਵੰਡੀ ਸਾਬੋ ਟਰੱਕ ਯੂਨੀਅਨ ਦੇ ਆਪਰੇਟਰਾਂ ਨੇ ਜਥੇਬੰਦੀ ਦੇ ਪੁੱਜੇ ਆਗੂਆਂ ਨੂੰ ਭਰੋਸਾ ਦਵਾਇਆ ਕਿ ਟਰੱਕ ਆਪਰੇਟਰਾਂ ਦੀ ਬਿਹਤਰੀ ਲਈ ਆਰੰਭੇ ਸੰਘਰਸ਼ ਵਿੱਚ ਉਹ ਪੂਰੀ ਤਨਦੇਹੀ ਨਾਲ ਹਿੱਸਾ ਪਾਉਣਗੇ ਅਤੇ ਅੱਗੇ ਵੀ ਜਥੇਬੰਦੀ ਜੋ ਪ੍ਰੋਗਰਾਮ ਉਲੀਕੇਗੀ ਉਸਤੇ ਫੁੱਲ ਚੜਾਏ ਜਾਣਗੇ।
ਇਸ ਮੌਕੇ ਟਰੱਕ ਯੂਨੀਅਨ ਦੇ ਸਾਬਕਾ ਪ੍ਰਧਾਨ ਅਵਤਾਰ ਸਿੰਘ ਮੈਨੂੰਆਣਾ, ਸਾਬਕਾ ਪ੍ਰਬੰਧਕੀ ਮੈਂਬਰ ਜਸਵੀਰ ਸਿੰਘ ਸੰਧੂ ਅਤੇ ਜਸਪਾਲ ਭਗਵਾਨਪੁਰਾ, ਹਰਜੀਤ ਲਹਿਰੀ, ਜਸਪਾਲ ਸਿੰਘ ਕਾਕਾ, ਰੇਸ਼ਮ ਸਿੰਘ ਭਾਗੀਵਾਂਦਰ,ਪ ਲਵਿੰਦਰ ਸਿੰਘ ਜਗਾ ਰਾਮ ਤੀਰਥ, ਰੇਸ਼ਮ ਚਹਿਲ ਜਗਾ ਰਾਮ ਤੀਰਥ ਆਦਿ ਟਰੱਕ ਅਪਰੇਟਰ ਮੌਜੂਦ ਸਨ।