MediaPunjab
ਮੀਡੀਆ ਪੰਜਾਬ ਦੀਆਂ ਖ਼ਬਰਾਂ

ਭਾਰਤ ਅਤੇ ਜਪਾਨੀ ਸਮੁੰਦਰੀ ਸਵੈ-ਰੱਖਿਆ ਬਲਾਂ ਨੇ ਹਿੰਦ ਮਹਾਸਾਗਰ 'ਚ ਕੀਤਾ ਸੰਯੁਕਤ ਅਭਿਆਸ

ਨਵੀਂ ਦਿੱਲੀ 29 ਜੂਨ (ਮਪ) ਚੀਨ ਅਪਣੇ ਗੁਆਢੀਆਂ 'ਤੇ ਧੌਂਸ ਜਮਾਉਣ ਦੀ ਨੀਤੀ ਤਹਿਤ ਸਭ ਲਈ ਪ੍ਰੇਸ਼ਾਨੀਆਂ ਖੜ੍ਹੀਆਂ ਕਰ ਰਿਹਾ ਹੈ। ਚੀਨ ਦਾ ਅਪਣੇ ਜ਼ਿਆਦਾਤਰ ਗੁਆਢੀ ਮੁਲਕਾਂ ਨਾਲ ਸਰਹੱਦੀ ਵਿਵਾਦ ਚੱਲ ਰਿਹਾ ਹੈ। ਪਿਛਲੇ ਦਿਨਾਂ ਦੌਰਾਨ ਭਾਰਤ ਨਾਲ ਸਰਹੱਦ 'ਤੇ ਵਧੇ ਤਣਾਅ ਦਰਮਿਆਨ ਚੀਨ ਦੇ ਬਾਕੀ ਗੁਆਢੀ ਮੁਲਕਾਂ ਨੇ ਵੀ ਸੁਰੱਖਿਆ ਪ੍ਰਬੰਧਾਂ 'ਚ ਇਜ਼ਾਫ਼ਾ ਕਰਨਾ ਸ਼ੁਰੂ ਕਰ ਦਿਤਾ ਹੈ। ਇਸੇ ਦਰਮਿਆਨ ਭਾਰਤੀ ਅਤੇ ਜਾਪਾਨੀ ਸਮੁੰਦਰੀ ਸਵੈ-ਰੱਖਿਆ ਬਲਾਂ ਨੇ ਹਿੰਦ ਮਹਾਸਾਗਰ 'ਚ ਇਕ ਸਾਂਝਾ ਅਭਿਆਸ ਕੀਤਾ ਹੈ। ਸ਼ਨੀਵਾਰ ਨੂੰ ਇਹ ਅਭਿਆਸ ਜਾਪਾਨ ਦੇ ਰੱਖਿਆ ਮੰਤਰੀ ਤਾਰੋ ਕੋਨੋ ਦੇ ਇਕ ਬਿਆਨ ਤੋਂ ਬਾਅਦ ਹੋਇਆ, ਜਿਸ ਵਿਚ ਨਾ ਸਿਰਫ ਚੀਨ ਦੀ ਰੱਖਿਆ ਸਮਰੱਥਾ ਬਲਕਿ ਭਾਰਤ-ਪ੍ਰਸ਼ਾਂਤ ਖੇਤਰ ਵਿਚ ਚੀਨ ਦੇ ਇਰਾਦਿਆਂ 'ਤੇ ਵੀ ਚਿੰਤਾ ਜ਼ਾਹਰ ਕੀਤੀ ਗਈ। ਪਿਛਲੇ ਕੁਝ ਮਹੀਨਿਆਂ ਵਿੱਚ ਏਸ਼ੀਆ ਦੇ ਕੁਝ ਹਿੱਸਿਆਂ ਵਿਚ ਬੀਜਿੰਗ ਦੇ ਹਮਲਾਵਰ ਰਵਈਏ ਤੋਂ ਬਾਅਦ ਜਾਪਾਨ ਦਾ ਇਹ ਪਹਿਲਾ ਬਿਆਨ ਸੀ।
ਭਾਰਤ-ਜਾਪਾਨ ਰੱਖਿਆ ਅਭਿਆਸ ਮੁਤਾਬਕ, ਐਸੋਸੀਏਸ਼ਨ ਆਫ ਸਾਊਥ ਈਸਟ ਏਸ਼ੀਅਨ ਨੇਸ਼ਨਜ਼ (ਏਸੀਆਨ) ਨੇ ਇਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਦੱਖਣੀ ਚੀਨ ਸਾਗਰ ਵਿਵਾਦ ਨੂੰ ਅੰਤਰਰਾਸ਼ਟਰੀ ਕਾਨੂੰਨਾਂ ਦੇ ਅਨੁਸਾਰ ਹੱਲ ਕੀਤਾ ਜਾਣਾ ਚਾਹੀਦਾ ਹੈ। ਰੱਖਿਆ ਭਾਈਵਾਲੀ ਨੂੰ ਵਧਾਉਣ ਦਿੱਲੀ ਅਤੇ ਟੋਕਿਓ ਦੀ ਕੋਸ਼ਿਸ਼ਾਂ ਤੋਂ ਬਾਅਦ ਪਿਛਲੇ ਤਿੰਨ ਸਾਲਾਂ ਦੌਰਾਨ ਜੇਐਮਐਸਡੀਐਫ ਅਤੇ ਇੰਡੀਅਨ ਨੇਵੀ ਵਿਚਕਾਰ ਇਹ 15ਵਾਂ ਸਿਖਲਾਈ ਅਭਿਆਸ ਸੀ। ਅਭਿਆਸ ਵਿਚ ਚਾਰ ਜੰਗੀ ਜਹਾਜ਼ ਸ਼ਾਮਲ ਸਨ। ਇਨ੍ਹਾਂ ਵਿਚ  ਦੋ ਜੰਗੀ ਜਹਾਜ਼ ਭਾਰਤ ਅਤੇ ਦੋ ਜਾਪਾਨ ਦੇ ਸਨ। ਇੰਡੀਅਨ ਨੇਵੀ ਟ੍ਰੇਨਿੰਗ ਸਮੁੰਦਰੀ ਜਹਾਜ਼-ਆਈਐਨਐਸ ਰਾਣਾ ਅਤੇ ਆਈਐਨਐਸ ਕੁਲੁਸ਼, ਜਾਪਾਨੀ ਨੇਵੀ ਜੇਐਸ ਕਸ਼ਿਮਾ ਅਤੇ ਜੇਐਸ ਸ਼ਿਮਾਯੁਕੀ ਦੇ ਨਾਲ ਅਭਿਆਸ ਵਿਚ ਸ਼ਾਮਲ ਸਨ। ਸਾਲ 2000 ਤੋਂ ਜੇਐਮਐਸਡੀਐਫ ਦੁਨੀਆ ਦੀ ਚੌਥੀ ਵੱਡੀ ਜਲ ਸੈਨਾ ਹੈ। ਜਾਪਾਨ ਦੇ ਪਾਣੀਆਂ ਵਿਚ ਚੀਨ ਦੇ ਖੇਤਰੀ ਦਾਅਵਿਆਂ ਦੇ ਵਿਚਕਾਰ ਜਾਪਾਨ ਪਿਛਲੇ ਕੁੱਝ ਸਾਲਾਂ ਵਿਚ ਅਪਣੇ ਬੇੜੇ ਵਿਚ ਲਗਾਤਾਰ ਵਾਧਾ ਕਰ ਰਿਹਾ ਹੈ। ਇਕ ਸਮੁੰਦਰੀ ਟਾਪੂ ਨੂੰ ਲੈ ਕੇ ਵੀ ਦੋਵਾਂ ਦੇਸ਼ਾਂ ਵਿਚਾਲੇ ਖਿਚੋਤਾਣ ਚੱਲ ਰਿਹਾ ਹੈ। ਭਾਰਤ ਅਤੇ ਚੀਨ ਦਰਮਿਆਨ ਸਰਹੱਦੀ ਤਣਾਅ ਇਸ ਸਮੇਂ ਅਪਣੀ ਚਰਮ-ਸੀਮਾ 'ਤੇ ਹੈ। ਅਜਿਹੇ ਵਿਚ ਜਾਪਾਨ ਅਤੇ ਭਾਰਤ ਦੇ ਜੰਗੀ ਜਹਾਜ਼ਾਂ ਵਲੋਂ ਕੀਤੇ ਗਏ ਸਾਝੇ ਅਭਿਆਸ ਦੀ ਮਹੱਤਤਾ ਹੋਰ ਵੀ ਵੱਧ ਜਾਂਦੀ ਹੈ।