30 Aug. 2021

ਹਰਿਆਣਾ ਵਿਧਾਨ ਸਭਾ ‘ਚ ਕਿਸਾਨ ਅੰਦੋਲਨ ਦੀ ਗੂੰਜ- ਇਕ ਖ਼ਬਰ

ਮੁੰਨੀਆਂ ਰੰਗੀਨ ਗੱਡੀਆਂ, ਬੋਤਾ ਬੰਨ੍ਹ ਦੇ ਸਰਵਣਾ ਵੀਰਾ।

ਕਿਸਾਨਾਂ ਦੇ ‘ਸਿਰ ਫੋੜਨ’ ਦਾ ਬਿਆਨ ਦੇਣ ਵਾਲੇ ਐਸ.ਡੀ.ਐਮ. ਦੀ ਵੀਡੀਓ ਹੋਈ ਵਾਇਰਲ- ਇਕ ਖ਼ਬਰ

ਚੁੱਕੀ ਹੋਈ ਪੰਚਾਂ ਦੀ ਗਾਲ਼ ਬਿਨਾਂ ਨਾ ਬੋਲੇ।

ਪ੍ਰੈੱਸ ਸਿਆਸੀ ਤੇ ਆਰਥਿਕ ਪਰਭਾਵ ਤੋਂ ਮੁਕਤ ਹੋਵੇ- ਸੁਪਰੀਮ ਕੋਰਟ ਜੱਜ ਚੰਦਰਚੂੜ

ਜੱਜ ਸਾਹਿਬ ਤੁਸੀਂ ਹੀ ਬੰਨ੍ਹੋ ਫਿਰ ਬਿੱਲੀ ਦੇ ਗਲ਼ ਟੱਲੀ।

ਸਿੱਧੂ ਦੇ ਸਲਾਹਕਾਰ ਮਾਲਵਿੰਦਰ ਸਿੰਘ ਮਾਲੀ ਨੇ ਅਹੁਦਾ ਛੱਡਿਆ- ਇਕ ਖ਼ਬਰ

ਕੀ ਖੱਟਿਆ ਮੈਂ ਤੇਰੀ ਹੀਰ ਬਣ ਕੇ!

ਟਕਸਾਲੀ ਆਗੂ ਸੇਵਾ ਸਿੰਘ ਸੇਖਵਾਂ ਨੇ ‘ਆਪ’ ਦਾ ਲੜ ਫੜਿਆ- ਇਕ ਖ਼ਬਰ

ਮੇਰੀ ਬਾਂਹੇਂ ਨਾ ਛੋੜੀਂ ਜੀ, ਮੈਂ ਲੜ ਲਾਗੀ ਤੇਰੇ।

ਨਵਜੋਤ ਸਿੱਧੂ ਨੇ ਇੱਟ ਨਾਲ ਇੱਟ ਖੜਕਾਉਣ ਦੀ ਦਿਤੀ ਧਮਕੀ-ਇਕ ਖ਼ਬਰ

ਜੇ ਕੋਈ ਹੋਰ ਲੈ ਆਇਆ ਤੇਰੀ ਜੰਞ ਨੀਂ, ਬਣੂੰ ਜੰਗ ਦਾ ਮੈਦਾਨ ਬੇਲਾ ਝੰਗ ਨੀਂ।

ਗੁਰਦਾਸ ਮਾਨ ਦੇ ਹੱਕ ਵਿਚ ਆਏ ਰਾਜਾ ਵੜਿੰਗ- ਇਕ ਖ਼ਬਰ

ਖ਼ਵਾਜੇ ਦਾ ਗਵਾਹ ਡੱਡੂ।

ਰੱਬ ਦੇ ਕੰਪਿਊਟਰ ‘ਤੇ ਬਣਿਆਂ ਕੋਰੋਨਾ, ਰੱਬ ਨੇ ਹੀ ਮਰਨ ਵਾਲਿਆਂ ਦੀ ਲਿਸਟ ਬਣਾਈ- ਭਾਜਪਾ ਮੰਤਰੀ

ਰੱਬ ਦੇ ਕੰਪਿਊਟਰ ਦਾ ਉਪਰੇਟਰ ਵੀ ਇਹੋ ਮੰਤਰੀ ਹੀ ਸੀ।

ਕੈਪਟਨ ਧੜੇ ਵਲੋਂ ‘ਰਾਤਰੀ ਦਾਅਵਤ’ ਸਮੇਂ ਸ਼ਕਤੀ ਪ੍ਰਦਰਸ਼ਨ- ਇਕ ਖ਼ਬਰ

ਲੱਕ ਲੱਕ ਹੋ ਗਏ ਬਾਜਰੇ, ਰੁੱਤ ਯਾਰੀਆਂ ਲਾਉਣ ਦੀ ਆਈ।

ਚੰਡੀਗੜ੍ਹ ‘ਚ ਤੇਜ਼ ਰਫ਼ਤਾਰ ਐਂਬੂਲੈਂਸ ਪਲਟੀ, ਵਿਚੋਂ ਢਾਈ ਪੇਟੀਆਂ ਸ਼ਰਾਬ ਬਰਾਮਦ- ਇਕ ਖ਼ਬਰ

ਜ਼ਖ਼ਮੀ ਬੋਤਲਾਂ ਨੂੰ ਸਥਾਨਕ ਹਸਪਤਾਲ ਪਹੁੰਚਾਇਆ ਗਿਆ।

ਕੈਪਟਨ ਅਤੇ ਬਾਦਲ ਸੁਮੇਧ ਸੈਣੀ ਨੂੰ ਬਚਾਉਣ ਲਈ ਯਤਨਸ਼ੀਲ- ‘ਆਪ’ ਵਿਧਾਇਕ ਸੰਦੋਆ

ਤੈਨੂੰ ਤਾਪ ਚੜ੍ਹੇ ਮੈਂ ਹੂੰਗਾਂ।

ਦਿੱਲੀ ਗੁਰਦੁਆਰਾ ਕਮੇਟੀ ਦੀਆਂ ਚੋਣਾਂ ਵਿਚ ਵੋਟਰਾਂ ਨੇ ਬਹੁਤਾ ਉਤਸ਼ਾਹ ਨਹੀਂ ਦਿਖਾਇਆ- ਇਕ ਖ਼ਬਰ

ਗੱਡੀ ਬਾਬਲਾ ਪਿਛਾਂਹ ਮੋੜ ਲੈ, ਮੇਰੇ ਹਾਣ ਦਾ ਮੁੰਡਾ ਨਾ ਕੋਈ।

ਚਾਰ ਮੰਤਰੀਆਂ ਤੇ ਸਿੱਧੂ ਪੱਖੀ ਵਿਧਾਇਕਾਂ ਨੇ ਕੈਪਟਨ ਵਿਰੁੱਧ ਕੀਤੀ ਬਗ਼ਾਵਤ-ਇਕ ਖ਼ਬਰ

ਪੂਰਨਾ ਪੂਰਨਾ, ਨਾਈਆਂ ਨੇ ਵੱਢ ਸੁਟਣਾ ਜੱਗਾ ਸੂਰਮਾ।

ਖੇਤੀ ਕਾਨੂੰਨਾਂ ਖ਼ਿਲਾਫ਼ ਤਾਮਿਲ ਨਾਡੂ ਵਿਧਾਨ ਸਭਾ ‘ਚ ਮਤਾ ਪਾਸ- ਇਕ ਖ਼ਬਰ

ਨਦੀਉਂ ਪਾਰ ਰਾਂਝਣ ਦਾ ਠਾਣਾ, ਕੀਤੇ ਕੌਲ ਜ਼ਰੂਰੀ ਜਾਣਾ।

ਭਾਜਪਾ ਨੂੰ ਮਾਤ ਦੇਣ ਲਈ ਠੋਸ ਰਣਨੀਤੀ ਦੀ ਲੋੜ-ਸ਼ਿਵ ਸੈਨਾ

ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ। 

23 Aug. 2021

ਵਾਅਦੇ ਮੁਤਾਬਕ ਸਿੱਧੂ ਨੇ ਕਾਂਗਰਸ ਭਵਨ ਵਿਚ ਡੇਰਾ ਲਗਾ ਲਿਆ- ਇਕ ਖ਼ਬਰ

ਅੱਲਾ ਹੂ ਦਾ ਆਵਾਜ਼ਾ ਆਵੇ, ਕੁੱਲੀ ਨੀ ਫ਼ਕੀਰ ਦੀ ਵਿਚੋਂ।

ਅਕਾਲੀ ਦਲ ਦਾ ਮੁੱਖ ਮੰਤਵ ਗੁਰੂ ਘਰਾਂ ਦੀ ਤੇ ਸੰਗਤਾਂ ਦੀ ਸੇਵਾ ਹੈ, ਰਾਜਨੀਤੀ ਨਹੀਂ- ਸਿਰਸਾ

ਹੋਕਾ ਵੰਙਾਂ ਦਾ, ਕੱਢ ਦਿਖਾਉਂਦੇ ਚੱਕੀ ਰਾਹੇ।

ਕਿਸਾਨਾਂ ਵਲੋਂ ਹਰਸਿਮਰਤ ਬਾਦਲ ਦਾ ਵਿਰੋਧ- ਇਕ ਖ਼ਬਰ

ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਲੋਕਾਂ ਦੇ ਅਸਲ ਮੁੱਦੇ ਰਵਾਇਤੀ ਪਾਰਟੀਆਂ ਦੇ ਏਜੰਡੇ ‘ਤੇ ਨਹੀਂ- ਸਿਮਰਨਜੀਤ ਸਿੰਘ ਮਾਨ

ਚਰਖੇ ਦੀ ਘੂਕ ਨਾ ਸੁਣੇ, ਸੁੰਞੇ ਪਏ ਨੇ ਤ੍ਰਿੰਞਣਾਂ ਦੇ ਵਿਹੜੇ।

ਕੈਪਟਨ ਤੇ ਸਿੱਧੂ ਨੇ ਮਿਲਕੇ ਬਣਾਈ ਇਕ 10 ਮੈਂਬਰੀ ਕਮੇਟੀ- ਇਕ ਖ਼ਬਰ

ਇਕ ਮੰਜੇ ਹੋ ਚਲੀਏ, ਚੰਨ ਛੁਪਿਆ ਟਹਿਕਦੇ ਤਾਰੇ।

ਸੁਖਬੀਰ ਬਾਦਲ ਨੇ ਮੇਰੇ ਨਾਲ਼ ਧੋਖਾ ਕੀਤਾ- ਸਰਬਜੀਤ ਸਿੰਘ ਮੱਕੜ

ਸਿਅਸਤ ਹੁੰਦੀ ਬੜੀ ਬੇਦਰਦ ਯਾਰੋ, ਏਥੇ ਕੋਈ ਕਿਸੇ ਦਾ ਯਾਰ ਨਾਹੀਂ।

ਸਾਬਕਾ ਡੀ.ਜੀ.ਪੀ. ਸੁਮੇਧ ਸੈਣੀ ਗ੍ਰਿਫ਼ਤਾਰ- ਇਕ ਖ਼ਬਰ

ਭੋਲ਼ੇ ਲੋਕਾਂ ਨੂੰ ਸਮਝ ਨਾ ਆਈ, ਡਰਾਮਾ ਇਕ ਹੋਰ ਹੋ ਗਿਆ।

ਤਾਲਿਬਾਨ ਸਰਕਾਰ ਨੂੰ ਮਾਨਤਾ ਦੇਣ ਲਈ ਰਾਜ਼ੀ ਹੋਇਆ ਚੀਨ- ਇਕ ਖ਼ਬਰ

ਗਲੀਆਂ ਹੋ ਜਾਣ ਸੁੰਞੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਬਾਈਡੇਨ ਨੇ ਅਫ਼ਗਾਨਿਸਤਾਨ ਨਾਲ ਹਥਿਆਰਾਂ ਦੇ ਸਾਰੇ ਸੌਦੇ ਕੀਤੇ ਰੱਦ- ਇਕ ਖ਼ਬਰ

ਉਂਜ ਵੇਖਣ ਨੂੰ ਅਸੀਂ ਦੋ, ਤੇਰੀ ਮੇਰੀ ਇਕ ਜਿੰਦੜੀ।

ਭਾਜਪਾ ਵਰਕਰਾਂ ਨਾਲ਼ ਇਕੱਲੀ ਭਿੜ ਗਈ ਕਿਸਾਨ ਬੀਬੀ- ਇਕ ਖ਼ਬਰ

ਬੱਲੇ ਨੀਂ ਪੰਜਾਬ ਦੀਏ ਸ਼ੇਰ ਬੱਚੀਏ।

ਗੁਆਚੀ ਸਾਖ ਬਹਾਲ ਕਰਨ ਲਈ ਸੁਖਬੀਰ ਯਾਤਰਾ ਦਾ ਨਾਟਕ ਕਰ ਰਿਹਾ ਹੈ- ਪ੍ਰਮਿੰਦਰ ਢੀਂਡਸਾ

ਮੁੰਡਾ ਉੱਠ ਗਿਆ ਪੈਂਦ ‘ਤੇ ਬਹਿ ਕੇ, ਆਪਣਾ ਕੀ ਲੈ ਗਿਆ ਨਣਦੇ।

ਕਿਸਾਨਾਂ ਨਾਲ਼ ਗੱਲਬਾਤ ਕਰਨ ਲਈ ਤਿਆਰ ਹੈ ਸਰਕਾਰ- ਰਾਜਨਾਥ ਸਿੰਘ

ਸਰਕਾਰ ਜੀ ਕੀ ਗੱਲ ਹੋਈ ਘੋੜੇ ਬਦਲ ਲਏ?

ਨਾ ਕੋਈ ਚੀਜ਼ ਭਾਰਤ ਤੋਂ ਖ਼ਰੀਦਾਂਗੇ ਤੇ ਨਾ ਹੀ ਉਸ ਨੂੰ ਵੇਚਾਂਗੇ- ਤਾਲਿਬਾਨ ਆਗੂ

ਹੁਣ ਤੇਰੀ ਸਾਡੀ ਬਸ ਵੇ, ਦੱਸ ਕਿੱਥੇ ਗਿਆ ਸੈਂ।

ਸੁਖਬੀਰ ਦਾ ‘ਗੱਲ ਪੰਜਾਬ ਦੀ’ ਪ੍ਰੋਗਰਾਮ ‘ਗੱਪ ਪੰਜਾਬ ਦੀ’ ਕਰਾਰ- ਅਮਨ ਅਰੋੜਾ

ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਅਕਾਲੀ ਦਲ ਸੰਯੁਕਤ ਵਿਚ ਬਾਗ਼ੀ ਸੁਰਾਂ ਉੱਭਰੀਆਂ- ਇਕ ਖ਼ਬਰ

ਕੋਹ ਤੁਰੀ ਨਾ, ਅਖੇ ਬਾਬਾ ਤ੍ਰਿਹਾਈ।

ਖੰਭੇ ਰਾਹ ‘ਚੋ ਹਟਾਏ ਬਿਨਾਂ ਹੀ ਸੜਕ ਬਣਾ ਦਿਤੀ- ਇਕ ਖ਼ਬਰ

ਬਈ ਹਾਦਸੇ ਹੋਣਗੇ ਤਾਂ ਹੀ ਬੇਰੁਜ਼ਗਾਰਾਂ ਨੂੰ ਕੰਮ ਮਿਲੇਗਾ।

15 Aug. 2021

ਖੇਤੀ ਕਾਨੂੰਨਾਂ ‘ਤੇ ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਉਂ ਇਕ ਵਾਰੀ ਵੀ ਮੋਦੀ ਨਾਲ ਮੁਲਾਕਾਤ ਨਹੀਂ ਕੀਤੀ?- ਕੁਲਤਾਰ ਸਿੰਘ ਸੰਧਵਾਂ

ਕਿਉਂਕਿ ਬਾਦਲ ਵਿਉਪਾਰੀ ਹਨ, ਕਿਸਾਨ ਨਹੀਂ। ਹਾਂ, ਬੱਸਾਂ, ਹੋਟਲਾਂ ਦਾ ਰੇੜਕਾ ਹੁੰਦਾ ਤਾਂ ਵੀਹ ਵਾਰੀ ਜਾਂਦੇ।

ਜਲੰਧਰ ਤੇ ਚੰਡੀਗੜ੍ਹ ‘ਚ ਪਟਵਾਰੀਆਂ ਦੇ ਇਮਤਿਹਾਨ ਵੇਲੇ ਗੁਰਸਿੱਖ ਵਿਦਿਆਰਥੀਆਂ ਦੇ ਕਕਾਰ ਲੁਹਾਏ ਗਏ- ਇਕ ਖ਼ਬਰ
ਤੁਹਾਨੂੰ ਦੱਸਿਆ ਜਾ ਰਿਹੈ ਕਿ ਜਿੰਨਾ ਮਰਜ਼ੀ ਤਿਰੰਗਾ ਚੁੱਕੀ ਫਿਰੋ, ਤੁਸੀਂ ਅਜੇ ਵੀ ਗੁਲਾਮ ਹੋ।

ਚੌਟਾਲਾ ਵਲੋਂ ਦੇਵੇਗੌੜਾ ਅਤੇ ਮੁਲਾਇਮ ਸਿੰਘ ਯਾਦਵ ਨਾਲ਼ ਮੁਲਾਕਾਤ- ਇਕ ਖ਼ਬਰ

ਜੋੜ ਕੇ ਨਿੱਕੀਆਂ ਨਿੱਕੀਆਂ ਬੇੜੀਆਂ ਜੀ, ਆ ਜਾਉ ਬੇੜਾ ਇਕ ਤਿਆਰ ਕਰੀਏ।

ਕੈਪਟਨ ਅਮਰਿੰਦਰ ਸਿੰਘ ਅੱਜ ਕਰਨਗੇ ਸੋਨੀਆ ਗਾਂਧੀ ਨਾਲ ਮੁਲਾਕਾਤ-ਇਕ ਖ਼ਬਰ

ਮੈਂ ਕਰ ਡੰਡੌਤਾਂ ਆਇਆ, ਮਈਆ ਜੀ ਤੇਰੇ ਦੁਆਰੇ ‘ਤੇ।

ਕੰਮ ਸਹੀ ਨਾ ਕਰਨ ਵਾਲੇ ਠੇਕੇਦਾਰ ਦੀ ਅਦਾਇਗੀ ਰੋਕ ਲਈ ਜਾਵੇ- ਵਿਧਾਇਕ

ਜਿਹੜੇ ਠੇਕੇਦਾਰ ਦੇ ਗਲ਼ ਅੰਗੂਠਾ ਦੇਕੇ ਹਿੱਸਾ-ਪੱਤੀ ਲੈਂਦੇ ਹਨ, ਉਨ੍ਹਾਂ ਬਾਰੇ ਕੀ ਖਿਆਲ ਐ?

ਵਿਦੇਸ਼ਾਂ ਵਿਚ ਜਾਣ ਵਾਲੇ ਸੰਤ, ਬਾਬੇ ਤੇ ਪ੍ਰਚਾਰਕ ਪਹਿਲਾਂ ਪੰਜਾਬ ‘ਚ ਸਿੱਖੀ ਨੂੰ ਮਜਬੂਤ ਕਰਨ- ਸਿਮਰਨਜੀਤ ਸਿੰਘ ਮਾਨ

ਪਹਿਲਾਂ ਪੰਜਾਬ ‘ਚ ਡਾਲਰ, ਪੌਂਡ ਛਾਪਣੇ ਸ਼ੁਰੂ ਕਰੋ ਮਾਨ ਸਾਹਿਬ।

ਪੈਗਾਸਸ ਜਾਸੂਸੀ ਮਾਮਲੇ ‘ਤੇ ਪ੍ਰਧਾਨ ਮੰਤਰੀ ਚੁੱਪ ਕਿਉਂ ਹਨ?- ਚਿਦੰਬਰਮ

ਚੋਰ ਦੀ ਮਾਂ ਕੋਠੀ ‘ਚ ਮੂੰਹ।

ਪੰਜਾਬ ਸਰਕਾਰ ਨੇ ਆਰ.ਟੀ.ਆਈ.ਐਕਟ ਦੀ ਸੰਘੀ ਘੁੱਟੀ- ਇਕ ਖ਼ਬਰ

ਉੱਪਰ ਢੱਕਣ ਦੇ ਦਿਉ, ਭਾਫ਼ ਨਾ ਨਿਕਲੇ ਬਾਹਰ।

ਸਰਕਾਰ ਖੇਤੀ ਕਾਨੂੰਨਾਂ ‘ਤੇ ਚਰਚਾ ਤੋਂ ਮੁੜ ਭੱਜੀ- ਇਕ ਖਬਰ

ਨੱਚਣ ਦੇਵੇ ਨਾ ਚੰਨਣ ਦੀ ਮਾਤਾ, ਨੱਚਣਾ ਬਥੇਰਾ ਜਾਣਦੀ।

ਜਲੰਧਰ ‘ਚ ਮਾਈਨਿੰਗ ਮਾਫ਼ੀਆ ਅੱਗੇ ਗੋਡੇ ਟੇਕੇ ਪ੍ਰਸ਼ਾਸਨ ਨੇ, ਟਿੱਪਰਾਂ ਨੇ ਭੰਨੀਆਂ ਸੜਕਾਂ- ਇਕ ਖ਼ਬਰ

ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਭਾਜਪਾ ਨਾਲ਼ ਰਲੀ ਹੋਈ ਹੈ ਕਾਂਗਰਸ-ਹਰਸਿਮਰਤ ਬਾਦਲ

ਤਾਲੋਂ ਘੁੱਥੀ ਡੂਮਣੀ, ਬੋਲੇ ਆਲ ਪਤਾਲ।

ਸਰਕਾਰ ਦੀਆਂ ਪ੍ਰਾਪਤੀਆਂ ਨੂੰ ਸੋਸ਼ਲ ਮੀਡੀਆ ਰਾਹੀਂ ਪ੍ਰਚਾਰਨ ਦੀ ਲੋੜ- ਡਾਇਰੈਕਟਰ ਲੋਕ ਸੰਪਰਕ ਵਿਭਾਗ

ਕਿਹੜੀਆਂ ਪ੍ਰਾਪਤੀਆਂ ਬਈ?

ਨਾ ਮੈਂ ਪੰਜਾਬ ‘ਚ ਚੋਣ ਲੜਨੀ ਹੈ ਤੇ ਨਾ ਮੁੱਖ ਮੰਤਰੀ ਬਣਨ ਦਾ ਚਾਹਵਾਨ ਹਾਂ- ਚੜੂਨੀ

ਚੰਗਾ ਹੋਇਆ ਚੜੂਨੀ ਸਾਹਿਬ ਜਲਦੀ ਚੋਣ ਬੁਖਾਰ ਉਤਰ ਗਿਆ।

ਸਾਨੂੰ ਚੁੱਪ ਕਰਾ ਕੇ ਡਰਾਇਆ ਨਹੀਂ ਜਾ ਸਕਦਾ- ਪਰਤਾਪ ਸਿੰਘ ਬਾਜਵਾ

ਤਾਰਾਂ ਖੜਕ ਗਈਆਂ, ਜੱਗੇ ਮਾਰਿਆ ਲਾਇਲਪੁਰ ਡਾਕਾ।

ਅਮਰੀਕਾ ਦੇ ਰਾਸ਼ਟਰਪਤੀ ਨਿਕਸਨ ਨੂੰ ਵੀ ਪੈਗਾਸਸ ਵਰਗੀ ਗਲਤੀ ਕਰ ਕੇ ਅਸਤੀਫ਼ਾ ਦੇਣਾ ਪਿਆ ਸੀ- ਇਕ ਖ਼ਬਰ

ਨਿਕਸਨ ‘ਚ ਤਾਂ ਫੇਰ ਵੀ ਸ਼ਰਮ ਦਾ ਥੋੜ੍ਹਾ ਬਹੁਤ ਮਾਦਾ ਸੀ ਪਰ ਏਥੇ ਤਾਂ.............................

ਦੇਸ਼ ਦੇ ਸਿਆਸੀ ਅਮਲ ’ਚ ਦਖ਼ਲ ਦੇ ਰਿਹੈ ਟਵਿਟਰ- ਰਾਹੁਲ ਗਾਂਧੀ

ਨਿੰਮ ਨਾਲ਼ ਝੂਟਦੀਏ, ਤੇਰੀ ਸਿਖਰੋਂ ਪੀਂਘ ਟੁੱਟ ਜਾਵੇ।

10 Aug. 2021

ਸਰਹਿੰਦ ਸ਼ਹਿਰ ਦੇ ਮੁਹੱਲਾ ਜੱਟਪੁਰਾ ਦੀ ਨਵੀਂ ਬਣੀ ਸੜਕ ਧਸੀ- ਇਕ ਖ਼ਬਰ

ਸ਼ੁਕਰ ਐ ਬਣ ਕੇ ਧਸੀ ਐ, ਇੱਥੇ ਤਾਂ ਬਿਨਾਂ ਬਣਨ ਤੋਂ ਹੀ ਧਸ ਜਾਂਦੀਆਂ।

ਕੋਈ ਵੀ ਗੁਆਂਢੀ ਮੁਲਕ ਅੱਜ ਭਾਰਤ ਦੀ ਇੱਜ਼ਤ ਨਹੀਂ ਕਰਦਾ- ਸੁਬਰਾਮਨੀਅਮ ਸੁਆਮੀ

ਤੇਰੀ ਹਰ ਮੱਸਿਆ ਬਦਨਾਮੀ, ਨੀ ਸੋਨੇ ਦੇ ਤਵੀਤ ਵਾਲੀਏ।

ਸੁਖਬੀਰ ਵਲੋਂ ਐਲਾਨੇ 13 ਨੁਕਾਤੀ ਏਜੰਡੇ ਨਾਲ਼ ਲੋਕਾਂ ਨੂੰ ਰਾਹਤ ਮਿਲੇਗੀ- ਅਕਾਲੀ ਆਗੂ

ਹਾਂ ਜੀ ਜ਼ਰੂਰ ਮਿਲੇਗੀ, ਬਿਜਲੀ ਸਮਝੌਤੇ ਹੋਰ ਕੀਤੇ ਜਾਣਗੇ।

ਛੋਟਾ ਥਾਣੇਦਾਰ ਸਾਢੇ ਤਿੰਨ ਕਵਿੰਟਲ ਭੁੱਕੀ ਸਣੇ ਕਾਬੂ- ਇਕ ਖ਼ਬਰ

ਸੁਣ ਲੈ ਨਿਹਾਲੀਏ ਚੋਰਾਂ ਦੀਆਂ ਗੱਲਾਂ।

ਸਰਕਾਰ ਵਲੋਂ ਭਰਿਆ ਆਮਦਨ ਟੈਕਸ ਵਿਧਾਇਕ ਵਾਪਸ ਕਰਨ- ਪੰਜਾਬ ਵਿਚਾਰ ਮੰਚ

ਫ਼ਲ ਟੁੱਟਿਆ ਨਾ ਜੁੜਦਾ ਨਾਲ਼ ਡਾਲੀ, ਗੰਗਾ ਗਈਆਂ ਨਾ ਹੱਡੀਆਂ ਮੁੜਦੀਆਂ ਨੇ।

ਪ੍ਰਧਾਨਗੀ ਮਿਲਣ ਮਗਰੋਂ ਨਵਜੋਤ ਸਿੱਧੂ ਦਾ ਸਟੈਂਡ ਬਦਲ ਗਿਆ- ਹਰਪਾਲ ਚੀਮਾ

ਲਾਰਾ ਲਾਈਏ ਨਾ ਬਿਗਾਨੇ ਪੁੱਤ ਨੂੰ, ਤੋੜ ਕੇ ਜਵਾਬ ਦੇ ਦੇਈਏ।

ਪੰਜਾਬ ‘ਚ ਭਾਜਪਾ ਸਰਕਾਰ ਆਉਣ ‘ਤੇ ਮਿਲੇਗੀ ਸਸਤੀ ਬਿਜਲੀ- ਅਸ਼ਵਨੀ ਕੁਮਾਰ

ਜਨਾਬ ਨੂੰ ਮਿਰਾਸੀ ਦੀ ਮਾਂ ਵਲੋਂ ਪੁੱਤ ਨੂੰ ਲੰਬੜਦਾਰ ਬਣਨ ਵਾਲੀ ਗੱਲ ਦੱਸੋ ਕੋਈ ਜਣਾ।

ਭਾਜਪਾ ਵੰਡਣ ਲੱਗੀ ਮੋਦੀ ਦੇ ਸਿੱਖਾਂ ਨਾਲ ਰਿਸ਼ਤੇ ਬਾਰੇ ਕਿਤਾਬ- ਇਕ ਖ਼ਬਰ

ਰਿਸ਼ਤੇਦਾਰੀ ਕਰ ਕੇ ਹੀ ਮੋਦੀ ਸਾਹਿਬ ਗੁਜਰਾਤ ਦੇ ਸਿੱਖਾਂ ਖ਼ਿਲਾਫ਼ ਸੁਪਰੀਮ ਕੋਰਟ ‘ਚ ਗਏ ਸੀ।

ਗੁਪਕਾਰ ਗੱਠਜੋੜ ਨੇ ਸੰਘਰਸ਼ ਜਾਰੀ ਰੱਖਣ ਦਾ ਅਹਿਦ ਦੁਹਰਾਇਆ- ਇਕ ਖ਼ਬਰ

ਖੇ ਖ਼ੂਬ ਹੁਸ਼ਿਆਰੀ ਨੇ ਨਾਲ਼ ਯਾਰੋ, ਲੱਗੇ ਕਰਨ ਅਫਗਾਨ ਤਿਆਰੀ ਯਾਰੋ।

ਜਥੇਦਾਰ ਸਾਹਿਬ ਭਖਦੇ ਸਿੱਖ ਮਸਲਿਆਂ ਦੇ ਫ਼ੈਸਲੇ ਨਿਰਪੱਖਤਾ ਨਾਲ਼ ਲੈਣ- ਰਵੀਇੰਦਰ ਸਿੰਘ

ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ।

ਵਿਰੋਧੀ ਧਿਰਾਂ ਦਾ ਰਵੱਈਆ ਸੰਸਦ ਦਾ ਅਪਮਾਨ- ਮੋਦੀ

ਧੱਕੇ ਨਾਲ ਬਿੱਲ ਪਾਸ ਕਰਵਾਉਣ ਨੂੰ ਕਿਹੜਾ ਨਾਮ ਦਿਉਗੇ ਜੀ?

ਸੁਖਬੀਰ ਬਾਦਲ ਵਲੋਂ ਕੀਤੇ ਗਏ ਐਲਾਨ ਤੋਂ ਸਾਰੇ ਵਰਗਾਂ ‘ਚ ਖ਼ੁਸ਼ੀ ਦੀ ਲਹਿਰ- ਇਕ ਅਕਾਲੀ ਕਾਰਕੁਨ

ਜਿਹੜੇ ਵਾਅਦਿਆਂ ਦੀ ਲਹਿਰ ‘ਚ ਵਹਿ ਜਾਂਦੇ, ਅੰਤ ਟੱਕਰਾਂ ਕੰਧਾਂ ਨਾਲ਼ ਮਾਰਦੇ ਨੇ।

ਨਿਤੀਸ਼ ਨੇ ਪੈਗਾਸਸ ਮਾਮਲੇ ਦੀ ਜਾਂਚ ਦਾ ਪੱਖ ਪੂਰਿਆ- ਇਕ ਖ਼ਬਰ

ਅੱਧੀ ਤੇਰੀ ਆਂ ਮੁਲਾਹਜ਼ੇਦਾਰਾ, ਅੱਧੀ ਆਂ ਗ਼ਰੀਬ ਜੱਟ ਦੀ।

ਦੁਨੀਆ ਨੂੰ ਨਵੀਂ ਸੇਧ ਦੇਵੇਗਾ ਕਿਸਾਨ ਅੰਦੋਲਨ- ਪੀ.ਸਾਈਂਨਾਥ

ਗਲ਼ੀ ਗਲ਼ੀ ਵਣਜਾਰਾ ਫਿਰਦਾ, ਵੰਙਾਂ ਲੈ ਲਉ ਵੰਙਾਂ।

3 Aug. 2021

ਨਵਜੋਤ ਸਿੱਧੂ ਨੇ ਪੰਜਾਬ ਲਈ ਕੈਪਟਨ ਅੱਗੇ ਰੱਖੇ ਪੰਜ ਨੁਕਤੇ- ਇਕ ਖ਼ਬਰ

ਵਿਹੜੇ ਲਾ ਤ੍ਰਿਵੈਣੀ, ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ।

ਦਿੱਲੀ ਪੁਲਿਸ ਵਲੋਂ ਰਾਜਸਥਾਨ ਦੀ ਲੇਡੀ ਡੌਨ ਗ੍ਰਿਫ਼ਤਾਰ- ਇਕ ਖ਼ਬਰ

ਸੀਟੀ ‘ਤੇ ਸੀਟੀ ਵੱਜਦੀ, ਜਦੋਂ ਮੈਂ ਗਿੱਧੇ ਵਿਚ ਆਈ।

ਐਨ.ਜੀ.ਟੀ.ਵਲੋਂ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਨੂੰ ਇਕ ਲੱਖ ਦਾ ਜ਼ੁਰਮਾਨਾ- ਇਕ ਖ਼ਬਰ

ਬੋਰਡ ਨੂੰ ਕਾਹਦਾ ਜ਼ੁਰਮਾਨਾ, ‘ਟੀਕਾ’ ਤਾਂ ਲੋਕਾਂ ਨੂੰ ਲੱਗਿਐ।

ਬਸਪਾ ਪੰਜਾਬ ਪ੍ਰਧਾਨ ਨੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲ ਕੀਤੀ ਮੁਲਾਕਾਤ-ਇਕ ਖ਼ਬਰ

ਸਿੱਖ ਲਉ ਬਾਬੇ ਤੋਂ ਕੋਈ ਤਿਕੜਮਬਾਜ਼ੀ, ਬੜਾ ਤਜਰਬੈ ਉਸ ਨੂੰ ਏਸ ਲਾਈਨ ਦਾ।

ਲੋਕ ਸਭਾ ‘ਚ ਹੰਗਾਮੇ ਦੌਰਾਨ ਸਰਕਾਰ ਨੇ ਬਿਨਾਂ ਬਹਿਸ ਹੀ ਕਰਵਾਏ ਦੋ ਬਿੱਲ ਪਾਸ-ਇਕ ਖ਼ਬਰ

ਜਿੱਥੇ ਮਰਜ਼ੀ ਨਿਸ਼ਾਨੇ ਲਾ, ਹੁਣ ਤੇਰੇ ਦਿਨ ਬੱਲੀਏ।

ਗੋਲਕ ਦੁਰਵਰਤੋਂ ਮਾਮਲੇ ‘ਚ ਬਾਦਲ ਸਿੱਖਾਂ ਦੀ ਬਦਨਾਮੀ ਕਿਉਂ ਕਰਵਾ ਰਹੇ ਹਨ? –ਸਰਬਜੀਤ ਸਿੰਘ ਭੂਟਾਨੀ

ਕਿਉਂਕਿ ਬਾਦਲਾਂ ਦਾ ਮਾਟੋ ਹੈ”: ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਕਿਸਾਨ ਅੰਨਦਾਤਾ ਹੈ, ਭਾਜਪਾ ਉਸ ਪ੍ਰਤੀ ਵਫ਼ਾਦਾਰੀ ਵਿਖਾਵੇ- ਸੰਜੇ ਸਿੰਘ

ਵਫ਼ਾਦਾਰੀ ਹੈ ਕੁਰਸੀ ਨਾਲ ਸਾਡੀ, ਵਫ਼ਾਦਾਰੀ ਹੋਰ ਅਸੀਂ ਜਾਣਦੇ ਨਹੀਂ।

‘ਆਪ’ ਕੋਲ ਗੱਠਜੋੜ ਦੀ ਪੇਸ਼ਕਸ਼ ਲੈ ਕੇ ਜਾਣ ਦੀ ਗੱਲ ਕੋਰੀ ਅਫ਼ਵਾਹ- ਸੁਖਦੇਵ ਸਿੰਘ ਢੀਂਡਸਾ

ਐਵੇਂ ਰੌਲ਼ਾ ਪੈ ਗਿਆ, ਬਸ ਐਵੇਂ ਰੌਲਾ ਪੈ ਗਿਆ।

ਸੰਨ 2030 ਤੱਕ ਸਥਾਈ ਵਿਕਾਸ ਦੇ ਟੀਚੇ ਹਾਸਲ ਕਰਨ ਲਈ ਖੇਤੀ ਸੈਕਟਰ ਜ਼ਰੀਆ- ਤੋਮਰ

ਇਸੇ ਲਈ ਤਾਂ ਇਹਨੂੰ ਕਿਸਾਨਾਂ ਤੋਂ ਖੋਹ ਕੇ ਤੁਸੀਂ ਕਾਰਪੋਰੇਟਾਂ ਨੂੰ ਸੌਂਪਣਾ ਚਾਹੁੰਦੇ ਹੋ।

ਕਰਤਾਰ ਪੁਰ ਲਾਂਘਾ ਮੁੜ ਖੋਲ੍ਹਿਆ ਜਾਵੇ- ਕੈਪਟਨ ਅਮਰਿੰਦਰ ਸਿੰਘ

ਸੋਚ ਲਉ ਕੈਪਟਨ ਸਾਹਿਬ, ਤੁਹਾਨੂੰ ਉਧਰਲੇ ਪਾਸਿਓਂ ਖ਼ਤਰੇ ਦਾ ਡਰ ਰਹਿੰਦੈ।

ਅਮਰੀਕਾ ਨੇ ਅਫ਼ਗਾਨਿਸਤਾਨ ਦੀ ਸਥਿਤੀ ਨੂੰ ਬੇਹੱਦ ਗੰਭੀਰ ਬਣਾਇਆ- ਇਮਰਾਨ ਖ਼ਾਨ

‘ਸਰਦਾਰੀਆਂ’ ਇੰਜ ਹੀ ਕਾਇਮ ਰੱਖਣੀਆਂ ਪੈਂਦੀਆਂ, ਖ਼ਾਨ ਸਾਹਿਬ।

 ਮੇਘਾਲਿਆ ਦੇ ਭਾਜਪਾ ਮੰਤਰੀ ਵਲੋਂ ਲੋਕਾਂ ਨੂੰ ਹੋਰ ਵਧੇਰੇ ਗਊ ਮਾਸ ਖਾਣ ਦੀ ਸਲਾਹ- ਇਕ ਖ਼ਬਰ

ਸ਼ੁਕਰ ਐ ਕਿਤੇ ਗੋਬਰ ਨੂੰ ਤੜਕਾ ਲਗਾਉਣ ਦੀ ਸਲਾਹ ਨਹੀਂ ਦਿੱਤੀ।

ਦਲਿਤ ਨੂੰ ਡਿਪਟੀ ਮੁੱਖ ਮੰਤਰੀ ਬਣਾਉਣ ਦਾ ਦਸ ਸਾਲ ਬਾਦਲਾਂ ਨੂੰ ਚੇਤਾ ਕਿਉਂ ਨਾ ਆਇਆ?- ਡੈਨੀ

ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਪੈਗਾਸਸ ਮੁੱਦੇ ‘ਤੇ ਸਰਕਾਰ ਕਦੋਂ ਤੱਕ ਸੱਚ ਲੁਕਾਉਂਦੀ ਰਹੇਗੀ?- ਚਿਦੰਬਰਮ

ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਮੇਰੇ ਅਤੇ ਮੁੱਖ ਮੰਤਰੀ ਦੇ ਸਬੰਧ ਸੁਖਾਵੇਂ- ਅਨਿਲ ਵਿਜ

ਭਾਈ ਮੰਜਾ ਕੱਸ ਕੇ ਬੁਣੀਂ, ਅਸਾਂ ਦੋਂਹ ਜਣਿਆਂ ਨੇ ਸੌਣਾ।

ਬੇਅਦਬੀ ਕਾਂਡ: ਚਾਰ ਡੇਰਾ ਪ੍ਰੇਮੀਆਂ ਨੂੰ ਇਕ ਤੋਂ ਬਾਅਦ ਦੂਜੇ ਕੇਸ ਵਿਚ ਵੀ ਮਿਲੀ ਜ਼ਮਾਨਤ- ਇਕ ਖ਼ਬਰ

ਸਾਡੇ ਰਾਖੇ ਨੀਲੀਆਂ ਵਾਲੇ, ਅਸੀਂ ਫ਼ਿਕਰ ਕੋਈ ਨਾ ਕਰਦੇ।

27 July 2021

ਸਿੱਧੂ ਦੇ ਤਾਜਪੋਸ਼ੀ ਸਮਾਗਮ ‘ਚ ਕੈਪਟਨ ਦੇ ਪੁੱਜਣ ਬਾਰੇ ਸ਼ਸ਼ੋਪੰਜ ਕਾਇਮ- ਇਕ ਖ਼ਬਰ

ਸੱਪ ਦੇ ਮੂੰਹ ‘ਚ ਕਿਰਲੀ। 

ਸਿੱਖਿਆ ਵਿਭਾਗ ਦਾ ਜੂਨੀਅਰ ਸਹਾਇਕ ਇਕ ਲੱਖ ਰੁਪਏ ਦੀ ਰਿਸ਼ਵਤ ਲੈਂਦਾ ਕਾਬੂ- ਇਕ ਖ਼ਬਰ

ਇਹਨੇ ਵੀ ਸੌਂਹ ਖਾਧੀ ਹੋਣੀ ਐ ਕਿ ਇਕ ਲੱਖ ਤੋਂ ਘੱਟ ਨਹੀਂ ਲੈਣੇ। 

ਸੰਸਦ ਭਵਨ ਨੇੜੇ ਕਿਸਾਨ ਮੋਰਚੇ ਨੇ ਆਪਣੀ ਸੰਸਦ ਦਾ ਇਜਲਾਸ ਕੀਤਾ ਸ਼ੁਰੂ- ਇਕ ਖ਼ਬਰ

ਤੇਰੇ ਸਾਹਮਣੇ ਸਿਆਪਾ ਕਰਨਾ, ਵਾਰ ਵਾਰ ਦੁਖ ਦੱਸਣਾ।

ਲਾੜੇ ਨੂੰ 4 ਕਿਲੋਮੀਟਰ ਤੱਕ ਆਪਣੇ ਨਾਲ ਭਜਾ ਕੇ ਲੈ ਗਈ ਘੋੜੀ- ਇਕ ਖ਼ਬਰ

ਘੋੜੀ ਨੇ ਤਾਂ ਮੁੰਡੇ ਨੂੰ ਮੌਕਾ ਦਿਤਾ ਕਿ ਜੇ ਬਚ ਸਕਦੈਂ ਤਾਂ ਬਚ ਜਾ ਮੱਖਣਾ।

ਸੁਖਬੀਰ ਬਾਦਲ ਵਲੋਂ ਮੀਡੀਆ ਅਦਾਰਿਆਂ ‘ਤੇ ਆਮਦਨ ਕਰ ਵਿਭਾਗ ਦੇ ਛਾਪਿਆਂ ਦੀ ਨਿਖੇਧੀ-ਇਕ ਖ਼ਬਰ

ਹਾਇ ਓਏ ਕਿਤੇ ਇਹ ਬਲਾ ਸਾਡੇ ਵਲ ਨਾ ਆ ਜਾਵੇ।

ਖੇਤੀ ਕਾਨੂੰਨ ਲਾਗੂ ਕਰਵਾਉਣ ਵਿਚ ਬਾਦਲ ਪਰਵਾਰ ਦਾ ਵੱਡਾ ਹਿੱਸਾ- ਸਿਮਰਜੀਤ ਸਿੰਘ ਬੈਂਸ

 ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਸਿੱਧੂ ਨੇ ਸ੍ਰੀ ਦਰਬਾਰ ਸਾਹਿਬ ਆ ਕੇ ਸ਼ਕਤੀ ਪ੍ਰਦਰਸ਼ਨ ਕੀਤਾ- ਬੀਬੀ ਜਗੀਰ ਕੌਰ

ਬੀਬੀ ਜਦੋਂ ਬਾਦਲ ਆਪਣੇ ਨਾਲ ‘ਫੌਜ’ ਲੈ ਕੇ ਆਉਂਦੇ ਆ, ਉਹ ਨਹੀਂ ਦਿਸਦੇ?

ਸੁਖਬੀਰ ਬਾਦਲ ਨੇ ਮਟਕਾ ਚੌਂਕ ‘ਚ ਬੈਠੇ ਬਾਬਾ ਲਾਭ ਸਿੰਘ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਰੱਬਾ! ਕੀ ਕੀ ਡਰਾਮੇ ਕਰਵਾਏਂਗਾ ਸਾਡੇ ਕੋਲੋਂ।

ਆਪ ਦੇ ਤਿੰਨ ਵਿਧਾਇਕ ਪਹਿਲਾਂ ‘ਕੈਪਟਨ ਦਰ” ਅਤੇ ਹੁਣ ‘ਸਿੱਧੂ ਦਰ”  ‘ਤੇ ਭਟਕ ਰਹੇ ਹਨ- ਆਪ ਆਗੂ

ਫਰੀਦਾ ਬਾਰਿ ਪਰਾਇਐ ਬੈਸਣਾ ਸਾਈ ਮੁਝੇ ਨਾ ਦੇ।

ਸਭ ਵਿਰੋਧੀ ਮੈਂਬਰਾਂ ਉੱਤੇ ਕਿਸਾਨ ਮੋਰਚੇ ਦੀ ਪੂਰੀ ਨਜ਼ਰ- ਰਾਜੇਵਾਲ

ਚੌਕੀਦਾਰੀ ਲੈ ਲੈ ਮਿੱਤਰਾ, ਤੇਰੇ ਲਗਦੇ ਨੇ ਬੋਲ ਪਿਆਰੇ।

ਭਾਰਤ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਪਾਰਲੀਮੈਂਟ ਦੇ ਬਰਾਬਰ ਕਿਸਾਨਾਂ ਨੇ ਸੰਸਦ ਚਲਾਈ-ਇਕ ਖ਼ਬਰ

ਮੈਨੂੰ ਬਗਲੀ ਸਿਖਾ ਦੇ ਗਲ਼ ਪਾਉਣੀ, ਚੱਲੂੰਗੀ ਤੇਰੇ ਨਾਲ ਜੋਗੀਆ।

 ਦੇਸ਼ ਦੀ ਅਰਥਵਿਵਸਥਾ ਲਈ ਅੱਗੋਂ ਰਾਹ ਹੋਰ ਵੀ ਚੁਣੌਤੀ ਭਰਿਆ- ਡਾ. ਮਨਮੋਹਨ ਸਿੰਘ

ਅੱਜ ਕੌਣ ਪੁੱਛੇ ਰਾਂਝੇ ਚਾਕ ਤਾਈਂ, ਬੇਗ਼ਮ ਹੀਰ ਤੇ ਸੈਦਾ ਨਵਾਬ ਹੋਇਆ।

ਸੜਕ ‘ਤੇ ਬੈਠਦੇ ਲਾਵਾਰਿਸ ਪਸ਼ੂਆਂ ਤੋਂ ਰਾਹਗੀਰ ਪ੍ਰੇਸ਼ਾਨ- ਇਕ ਖ਼ਬਰ

ਕਰੋੜਾਂ ਰੁਪਏ ਦਾ ‘ਗਊ ਟੈਕਸ’ ਕਿੱਥੇ ਜਾਂਦੈ ਬਈ? ਸਰਕਾਰ ਦੱਸੇ ਲੋਕਾਂ ਨੂੰ।

ਕਿਸਾਨ ਕਿਸੇ ਸਖ਼ਤੀ ਤੋਂ ਡਰਨ ਵਾਲ਼ੇ ਨਹੀਂ- ਟਿਕੈਤ

ਭੂਰਾ ਬੋਤਾ ਮੇਰੇ ਵੀਰ ਦਾ, ਰੇਲ ਦੇ ਬਰਾਬਰ ਜਾਂਦਾ।

19 July 2021

ਸ਼ਤਰੂਘਨ ਸਿਨਹਾ ਦੇ ਤ੍ਰਿਣਮੂਲ ਕਾਂਗਰਸ ‘ਚ ਜਾਣ ਦੇ ਚਰਚੇ- ਇਕ ਖ਼ਬਰ

ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

 ਕਿਸਾਨਾਂ ਦੀਆਂ ਗ੍ਰਿਫ਼ਤਾਰੀਆ ਨਾਲ ਕਿਸਾਨ ਅੰਦੋਲਨ ਹੋਵੇਗਾ ਹੋਰ ਤਿੱਖਾ- ਟਿਕੈਤ

ਜਿਉਂ ਜਿਉਂ ਮੰਨੂੰ ਵੱਢਦਾ, ਅਸੀਂ ਦੂਣ ਸਵਾਏ ਹੋਏ।

ਭਾਜਪਾ ਦੇ ਅੰਤ ਦਾ ਕਾਰਨ ਬਣੇਗਾ ਕਿਸਾਨ ਅੰਦੋਲਨ- ਕਿਸਾਨ ਮੋਰਚਾ

ਇਨ੍ਹਾਂ ਸੁਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਸਿੱਧੂ ਹੱਥ ਪੰਜਾਬ ਕਾਂਗਰਸ ਦੀ ਵਾਗਡੋਰ ਦੇਣ ਨਾਲ਼ ਕਾਂਗਰਸ ਦਮ ਤੋੜ ਦੇਵੇਗੀ- ਕੈਪਟਨ

ਦਾਖੇ ਹੱਥ ਨਾ ਅੱਪੜੇ, ਆਖੇ ਥੂ ਕੌੜੀ।

ਕਿਸਾਨਾਂ ਦੀ ਆਵਾਜ਼ ਬਣਨਾ ਸੰਸਦ ਮੈਂਬਰਾਂ ਦੀ ਜ਼ਿੰਮੇਵਾਰੀ ਅਤੇ ਧਰਮ- ਭਗਵੰਤ ਮਾਨ

ਸਿਆਸਤ ਖੇਡ ਹੈ ਗਿਣਤੀਆਂ ਮਿਣਤੀਆਂ ਦੀ, ਧਰਮ ਤੇ ਫ਼ਰਜ਼ ਨੂੰ ਕੌਣ ਪਛਾਣਦਾ ਏ।

ਭਾਜਪਾ ਤੋਂ ਡਰਨ ਵਾਲੇ ਕਾਂਗਰਸ ਛੱਡ ਕੇ ਚਲੇ ਜਾਣ- ਰਾਹੁਲ ਗਾਂਧੀ

ਸੁੱਤੀ ਨਾ ਜਗਾਈਂ ਮਿੱਤਰਾ, ਸਾਨੂੰ ਲੱਡੂਆਂ ਤੋਂ ਨੀਂਦ ਪਿਆਰੀ।

ਡੇਰਾ ਮੁਖੀ ਨੂੰ ਬਚਾਉਣ ਦੇ ਯਤਨ ਨਾ ਕਰੇ ਪੰਜਾਬ ਸਰਕਾਰ- ਸ਼੍ਰੋਮਣੀ ਕਮੇਟੀ

ਉਲਟਾ ਚੋਰ ਕੋਤਵਾਲ ਕੋ ਡਾਂਟੇ।

ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਨੇ ‘ਹਿੰਦੂ’ ਪੱਤਾ ਖੇਡਣ ਦਾ ਫ਼ੈਸਲਾ ਕੀਤਾ- ਇਕ ਖ਼ਬਰ

ਜਿਨ੍ਹਾਂ ਰਾਹਾਂ ਦੀ ਮੈਂ ਸਾਰ ਨਾ ਜਾਣਾਂ, ਉਹਨੀਂ ਰਾਹੀਂ ਵੇ ਮੈਨੂੰ ਤੁਰਨਾ ਪਿਆ।

ਕਾਂਗਰਸ ਜਾਣ ਬੁਝ ਕੇ ਡੇਰਾ ਸਿਰਸਾ ਮੁਖੀ ਖ਼ਿਲਾਫ਼ ਕਾਰਵਾਈ ਨਹੀਂ ਕਰ ਰਹੀ- ਬਾਦਲ ਅਕਾਲੀ ਦਲ

ਨਿੱਕਾ ਦਿਉਰ ਮੇਰਾ ਖੰਡ ਦਾ ਖਿਡੌਣਾ, ਮੈਂ ਸਾਂਭ ਸਾਂਭ ਰੱਖਦੀ ਫਿਰਾਂ।

ਭਾਜਪਾ ਵਰਕਰ ਚੋਣਾਂ ਲਈ ਕਮਰਕੱਸੇ ਕਰਨ- ਅਸ਼ਵਨੀ ਕੁਮਾਰ

ਚੜ੍ਹ ਜਾਉ ਬੱਚਿਓ ਸੂਲ਼ੀ, ਰਾਮ ਭਲੀ ਕਰੇਗਾ।

ਵੋਟਾਂ ਲਈ ਸੌਦਾ ਸਾਧ ਦਾ ਨਾਮ ਸਰਕਾਰ ਅਤੇ ਸਿਆਸਤਦਾਨਾਂ ਨੇ ਕੇਸ ‘ਚੋਂ ਕਢਵਾਇਆ- ਜਥੇਦਾਰ

ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਸੰਸਦ ਭਵਨ ਦੇ ਬਾਹਰ ਕਿਸਾਨ ਚਲਾਉਣਗੇ ਆਪਣੀ ਸੰਸਦ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਸਰਕਾਰ ਬਦਲਣ ਨਾਲ਼ ਸਿਰਫ਼ ਪੱਗਾਂ ਦੇ ਰੰਗ ਬਦਲੇ- ਭਗਵੰਤ ਮਾਨ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਪੰਜਾਬ ‘ਚ ਰਾਸ਼ਟਰਪਤੀ ਰਾਜ ਲਾਗੂ ਕਰ ਕੇ ਕੇਂਦਰੀ ਫੋਰਸ ਤੈਨਾਤ ਕੀਤੀ ਜਾਵੇ- ਮਦਨ ਮੋਹਨ ਮਿੱਤਲ

ਤੇਰੇ ਵਿਚ ਸਾਰਾ ਬੰਦਿਆ ਕਸੂਰ ਸੀ, ਬੀਜ ਕੇ ਤੇ ਅੱਕ ਭਾਲ਼ਦਾ ਖਜੂਰ ਜੀ।

13 July 2021

ਪਟਰੌਲ ਡੀਜ਼ਲ ਦੀਆਂ ਵਧੀਆਂ ਕੀਮਤਾਂ ਨੇ ਹਰ ਵਰਗ ਦਾ ਬਜਟ ਵਿਗਾੜਿਆ-ਯਸ਼ਪਾਲ ਰਾਣਾ ਬੇ.ਕੇ.ਯੂ

ਰਾਣਾ ਜੀ ਹਰ ਕਿਸੇ ਦਾ ਨਹੀਂ, ਕਈਆਂ ਦੇ ਤਾਂ ਵਾਰੇ ਨਿਆਰੇ ਹੋ ਰਹੇ ਐ।

ਪ੍ਰਾਈਵੇਟ ਥਰਮਲ ਪਾਰਟੀਆਂ ਨਾਲ ਕੀਤੇ ਬਿਜਲੀ ਸਮਝੌਤੇ ਜਾਇਜ਼ ਹਨ- ਸੁਖਬੀਰ ਬਾਦਲ

ਗੀਤਾਂ ਨੂੰ ਜ਼ਹਿਰ ਪਿਲਾਉਂਦੇ ਨੇ, ਸਾਡੇ ਲਹੂ ਦੇ ਵਿਚ ਨਹਾਉਂਦੇ ਨੇ।

ਭਾਜਪਾ ਨੇ ਸਾਬਕਾ ਮੰਤਰੀ ਅਨਿਲ ਜੋਸ਼ੀ ਨੂੰ ਪਾਰਟੀ’ਚੋਂ ਬਾਹਰ ਦਾ ਰਾਸਤਾ ਦਿਖਾਇਆ- ਇਕ ਖ਼ਬਰ

ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਮੁੱਖ ਮੰਤਰੀ ਕਿਸਾਨਾਂ ਦੀ ਭਲਾਈ ਲਈ ਹਮੇਸ਼ਾ ਵਚਨਬੱਧ- ਕੈਪਟਨ ਸੰਦੀਪ ਸੰਧੂ

ਏਸੇ ਲਈ ਤਾਂ ਮੁੱਖ ਮੰਤਰੀ ਸਾਹਿਬ ਅੰਬਾਨੀਆਂ ਅਡਾਨੀਆਂ ਨਾਲ ਮੀਟਿੰਗਾਂ ਕਰਦੇ ਰਹੇ ਐ।

ਚੰਡੀਗੜ੍ਹ ‘ਚ ਗੁਜ਼ਾਰੇ ਜੋਗੀ ਤਨਖ਼ਾਹ ਮੰਗਦੇ ਅਧਿਆਪਕਾਂ ਤੇ ਵਰ੍ਹੀਆਂ ਡਾਂਗਾਂ-ਇਕ ਖ਼ਬਰ

ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦੇ ਹੱਕ ਮਾਰ ਕੇ।

ਮੁੱਖ ਮੰਤਰੀ ਦੀ ਨਾਕਾਮੀ ਲਈ ਅਫ਼ਸਰਾਂ ਨੂੰ ਨਿਸ਼ਾਨਾਂ ਬਣਾਉਣਾ ਗ਼ਲਤ- ਮਲੂਕਾ

ਕੀ ਲਗਦੇ ਸੰਤੀਏ ਤੇਰੇ, ਜਿਹਨਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਕਰਤਾਰ ਪੁਰ ਲਾਂਘਾ ਨਾ ਖੋਲ੍ਹਣ ਪਿੱਛੇ ਕੇਂਦਰ ਦੀ ਨੀਅਤ ਸ਼ੱਕੀ- ਜਥੇਦਾਰ ਹਰਪ੍ਰੀਤ ਸਿੰਘ

ਉੱਤੋਂ ਮੁੰਡਾ ਹੱਸ ਬੋਲਦਾ ਪਰ ਦਿਲ ‘ਚ ਰੱਖੇ ਬੇਈਮਾਨੀ।

ਮਮਤਾ ਨੇ ਕਿਹਾ ਕਿ ਪੱਛਮੀ ਬੰਗਾਲ ‘ਚ ਮਨਾਇਆ ਜਾਵੇਗਾ ‘ਖੇਲਾ ਹੋਬੇ ਦਿਵਸ’-ਇਕ ਖ਼ਬਰ

ਮੁੰਡੇ ਮੈਨੂੰ ਸਾਰੇ ਪੁੱਛਦੇ, ਇਹ ਪੰਜੇਬਾਂ ਵਾਲ਼ੀ ਕੌਣ ਏ।

ਅਕਾਲੀਆਂ ਤੇ ਕਾਂਗਰਸੀਆਂ ਨੇ ਮਹਿੰਗੀ ਬਿਜਲੀ ਖ਼ਰੀਦ ਕੇ ਲੋਕ ਲੁੱਟੇ- ਅਮਨ ਅਰੋੜਾ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ। 

ਵਜ਼ਾਰਤੀ ਵਾਧਾ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਨੂੰ ਨਹੀਂ ਢੱਕ ਸਕਦਾ- ਮਾਇਆਵਤੀ

ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ ‘ਤੇ।

ਪੀ.ਟੀ.ਆਈ. ਵਲੋਂ ਨਵੇਂ ਆਈ.ਟੀ.ਨੇਮਾਂ ਨੂੰ ਹਾਈਕੋਰਟ ਵਿਚ ਚੁਣੌਤੀ- ਇਕ ਖ਼ਬਰ

ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

 ਸੰਘ ਦੀ ਵਿਚਾਰਧਾਰਾ ਹਮੇਸ਼ਾ ਤੋਂ ਸ਼ਾਂਤੀ ਅਤੇ ਭਾਈਚਾਰੇ ਨਾਲ਼ ਭਰਪੂਰ- ਕੇਂਦਰੀ ਮੰਤਰੀ ਮੁਖ਼ਤਾਰ ਨਕਵੀ

ਤਾਬੇਦਾਰ ਆਂ ਧੁਰੋਂ ਅਸੀਂ ਤੇਰੇ, ਜਿੱਥੇ ਮਰਜ਼ੀ ਲੁਆ ਲੈ ਅੰਗੂਠਾ।

ਲਾਲੂ ਪ੍ਰਸਾਦ ਯਾਦਵ ਨੇ ਨਿਤੀਸ਼ ਅਤੇ ਮੋਦੀ ‘ਤੇ ਨਿਸ਼ਾਨਾ ਸਾਧਿਆ-ਇਕ ਖ਼ਬਰ

ਤੂੰ ਹੋਰ ਨਾ ਮਾਰੀਂ ਮਿਰਜ਼ਿਆ, ਤੇਰੇ ਬੜੇ ਗ਼ਜ਼ਬ ਦੇ ਤੀਰ।

 ਸ਼ਰਾਬ ਦੀਆਂ ਬੰਦ 12 ਬੋਤਲਾਂ ਖੋਲ੍ਹ ਕੇ ਚੂਹੇ ਪੀ ਗਏ-ਇਕ ਖ਼ਬਰ

ਕੁਝ ਸਾਲ ਹੋਏ ਬਿਹਾਰ ਵਿਚ ਚੂਹਿਆਂ ਨੇ ਸ਼ਰਾਬ ਦਾ ਸਾਰਾ ਗੁਦਾਮ ਪੀ ਲਿਆ ਸੀ।

ਸੁਪਰੀਮ ਕੋਰਟ ਹੈਰਾਨ ਹੈ ਕਿ ਆਈ.ਟੀ. ਐਕਟ ਦੀ ਇਕ ਧਾਰਾ ਖਤਮ ਕੀਤੇ ਜਾਣ ਦੇ ਬਾਵਜੂਦ ਪੁਲਿਸ ਕੇਸ ਦਰਜ ਕਰ ਰਹੀ ਹੈ-ਇਕ ਖ਼ਬਰ

ਜੇ ਚੂਹੇ ਬੰਦ ਬੋਤਲਾਂ ਖੋਲ੍ਹ ਕੇ ਦਾਰੂ ਪੀ ਸਕਦੇ ਐ ਤਾਂ ਕੇਸ ਰਜਿਸਟਰ ਕਰਨੇ ਤਾਂ ਬਹੁਤ ਸੌਖਾ ਕੰਮ ਐ।

ਬਾਦਲ ਸਰਕਾਰ ਬੇਅਦਬੀ ਕਾਂਡ ਦੀ ਜਾਂਚ ਲਈ ਗੰਭੀਰ ਨਹੀਂ ਸੀ- ਜਸਟਿਸ ਜ਼ੋਰਾ ਸਿੰਘ

ਮਰਦ ਬੇਦਰਦਾਂ ਦਾ, ਮੈਨੂੰ ਲਗਦਾ ਬੁਰਾ ਪ੍ਰਛਾਵਾਂ।

04 July 2021

ਅਕਾਲੀ ਦਲ ਅਤੇ ਬਸਪਾ ਵਰਕਰਾਂ ਵਲੋਂ ਸੂਬੇ ਭਰ ‘ਚ ਬਿਜਲੀ ਦਫ਼ਤਰਾਂ ਅੱਗੇ ਰੋਸ ਮੁਜਾਹਰੇ-ਇਕ ਖ਼ਬਰ

ਸੁਖਬੀਰ ਸਿਆਂ ਕਿਹੜੇ ਪੰਗੇ ‘ਚ ਪੈ ਗਿਐਂ, ਇਹ ਧਰਨੇ, ਮੁਜਾਹਰੇ ਤਾਂ ਵਿਹਲੇ ਬੰਦਿਆਂ ਦਾ ਕੰਮ ਹੁੰਦੈ। 

 ਵਿਤ ਮੰਤਰੀ ਨੂੰ ਅਰਥਚਾਰੇ ਦੀ ਕੋਈ ਸਮਝ ਨਹੀਂ, ਫਿਰ ਦਿਤੀ ‘ਕਰਜ਼ੇ ਦੀ ਖ਼ੁਰਾਕ’-ਕਾਂਗਰਸ

ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਸਿੱਖ ਲੜਕੀਆਂ ਨੂੰ ਧਰਮ ‘ਚ ਪਰਿਪੱਕ ਕਰਨ ਲਈ ਲਗਾਏ ਜਾਣਗੇ ਗੁਰਮਤਿ ਕੈਂਪ-ਜਥੇਦਾਰ

ਜਥੇਦਾਰ ਜੀ, ਬੀਬੀ ਜਗੀਰ ਕੌਰ ਨੂੰ ਸੰਭਾਲੋ ਇਹ ਜ਼ਿੰਮੇਵਾਰੀ।

ਸੁਖਬੀਰ ਬਾਦਲ ਵਲੋਂ ਨਾਜਾਇਜ਼ ਖਣਨ ਖੇਤਰ ਦਾ ਦੌਰਾ- ਇਕ ਖ਼ਬਰ

ਬਈ ਲੋਕ ਕਹਿੰਦੇ ਆ ਕਿ ਸੁਖਬੀਰ ਦੇਖਣ ਜਾਂਦਾ ਕਿ ਰਾਜੇ ਨੇ ਉਹਦੇ ਜੋਗੀ ਰੇਤਾ ਛੱਡੀ ਕਿ ਨਹੀਂ।

ਅਕਾਲੀ-ਭਾਜਪਾ ਸਰਕਾਰ ਦੇ ਬਿਜਲੀ ਖ਼ਰੀਦ ਸਮਝੌਤੇ ਸਮੀਖਿਆ ਅਧੀਨ- ਕੈਪਟਨ

ਬੜੀ ਦੇਰ ਕਰ ਦੀ ਮਿਹਰਬਾਂ ਆਤੇ ਆਤੇ।

ਡਾ. ਨਵਜੋਤ ਕੌਰ ਸਿੱਧੂ ਨੇ ਸੁਖਬੀਰ ਬਾਦਲ ਨੂੰ ਲਿਆ ਕਰੜੇ ਹੱਥੀਂ-ਇਕ ਖ਼ਬਰ

ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਬਿਹਾਰ ’ਚ ਅਫ਼ਸਰਸ਼ਾਹੀ ਤੋਂ ਤੰਗ ਮੰਤਰੀ ਨੇ ਕੀਤੀ ਅਸਤੀਫ਼ੇ ਦੀ ਪੇਸ਼ਕਸ਼- ਇਕ ਖ਼ਬਰ

 ਭੱਠ ਪਿਆ ਸੋਨਾ, ਜਿਹੜਾ ਕੰਨਾਂ ਨੂੰ ਖਾਵੇ।

ਅੰਦੋਲਨ ਕਰ ਰਹੇ ਲੋਕ ਅਸਲ ਵਿਚ ਕਿਸਾਨ ਨਹੀਂ ਹਨ- ਖੱਟਰ

ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਨਵਜੋਤ ਸਿੱਧੂ ‘ਦਿਸ਼ਾਹੀਣ ਮਿਜ਼ਾਈਲ’ ਕਿਤੇ ਵੀ ਡਿਗ ਸਕਦੀ ਹੈ- ਸੁਖਬੀਰ ਬਾਦਲ

ਰਾਤ ਹਨੇਰੀ ਮਾਏਂ ਨੀਂ ਬੀਂਡੇ ਬੋਲਦੇ, ਮੈਨੂੰ ਡਰ ‘ਕੱਲੀ ਨੂੰ ਆਵੇ।

ਕੈਪਟਨ ਅਮਰਿੰਦਰ ਸਿੰਘ ਅੱਜ ਕੁਝ ਹੋਰ ਕਾਂਗਰਸੀ ਆਗੂਆਂ ਨਾਲ਼ ਲੰਚ ਕਰਨਗੇ- ਇਕ ਖ਼ਬਰ

ਹਾਏ ਓਏ ਕੈਪਟਨ ਦੀਆਂ ਮਜਬੂਰੀਆਂ, ਖੁਆਉਣੀਆਂ ਪੈ ਗਈਆਂ ਨੇ ਚੂਰੀਆਂ।

ਉੱਤਰਾਖੰਡ ਦੇ ਮੁੱਖ ਮੰਤਰੀ ਤੀਰਥ ਸਿੰਘ ਰਾਵਤ ਨੇ ਦਿਤਾ ਅਸਤੀਫ਼ਾ- ਇਕ ਖ਼ਬਰ

ਆਹ ਲੈ ਸਾਂਭ ਲੈ ਸੈਦੇ ਦੀਏ ਨਾਰੇ, ਮੈਥੋਂ ਨਹੀਂ ਮੱਝਾਂ ਚਾਰ ਹੁੰਦੀਆਂ।

ਪੁਲਿਸ ਵਿਭਾਗ ਵਿਚ 10500 ਕਰਮਚਾਰੀ ਜਲਦੀ ਭਰਤੀ ਕੀਤੇ ਜਾਣਗੇ-ਡੀ.ਜੀ.ਪੀ.

ਵੀ.ਆਈ. ਪੀ. ਲੋਕਾਂ ਦੀ ਰਾਖੀ ਕਰਨ ਤੇ ਬੇਰੋਜ਼ਗਾਰਾਂ ਦੇ ਡਾਂਗ ਫੇਰਨ ਲਈ।

ਕੋਟਕਪੂਰਾ ਗੋਲੀਕਾਂਡ ‘ਚ ਬਾਦਲ ਅਤੇ ਸੁਖਬੀਰ ਨੂੰ ਘਸੀਟਣਾ ਠੀਕ ਨਹੀਂ- ਮਿੱਤਲ

ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।

ਸਾਥੋਂ ਪਹਿਲਾਂ ਹੀ ਹਫ਼ੜਾ ਦਫ਼ੜੀ ‘ਚ ਕੇਜਰੀਵਾਲ ਨੇ ਬਿਜਲੀ ਦਾ ਐਲਾਨ ਕਰ ਦਿਤਾ- ਚਰਨਜੀਤ ਚੰਨੀ

ਚੰਨੀ ਜੀ, ਲੜਾਈ ਦੇ ਢਾਈ ਫੱਟ ਹੁੰਦੇ ਐ, ਜਿਹੜਾ ਪਹਿਲਾਂ ਮਾਰ ਗਿਆ ਉਹ ਜੇਤੂ।

ਨਕਲੀ ਟੀਕਾਕਰਨ ਦੇ ਕੇਸਾਂ ਵਿਚ ‘ਵੱਡੀਆਂ ਮੱਛੀਆਂ’ ਨੂੰ ਫੜਿਆ ਜਾਵੇ- ਹਾਈ ਕੋਰਟ

ਹਾਈ ਕੋਰਟ ਜੀ, ਜਾਲ਼ ‘ਚ ਮਘੋਰੇ ਬਹੁਤ ਵੱਡੇ ਵੱਡੇ ਐ, ਵੱਡੀ ਮੱਛੀ ਨਹੀਂ ਹੱਥ ਆਉਂਦੀ।

ਪੰਜਾਬ ਨੂੰ ਕੰਗਾਲ ਕਰ ਰਹੇ ਹਨ ਬਿਜਲੀ ਸਮਝੌਤੇ-ਭਗਵੰਤ ਮਾਨ

ਮੈਂ ਤਾਂ ਹੋ ਗਈ ਹਕੀਮ ਜੀ , ਅੱਗੇ ਨਾਲ਼ੋਂ ਤੰਗ।

28 June 2021

ਕੋਰੋਨਾ ਮਿਰਤਕਾਂ ਦੇ ਪਰਵਾਰਾਂ ਨੂੰ ਮੁਆਵਜ਼ਾ ਦੇਣ ਤੋਂ ਮੁਕਰੀ ਕੇਂਦਰ ਸਰਕਾਰ- ਇਕ ਖ਼ਬਰ

ਕਸਮੇਂ, ਵਾਅਦੇ, ਪ੍ਰਣ ਔਰ ਵਚਨ.......ਜੁਮਲੇ ਹੈਂ ਜੁਮਲੋਂ ਕਾ ਕਿਆ। 

ਪੰਜਾਬ ਕਾਂਗਰਸ ਦਾ ਰੇੜਕਾ ਹਾਲੇ ਵੀ ਨਹੀਂ ਮੁੱਕਿਆ- ਇਕ ਖ਼ਬਰ

ਮੋੜੀਂ ਮੋੜੀਂ ਵੇ ਗੁਲਜ਼ਾਰੀ, ਭੇਡਾਂ ਦੂਰ ਗਈਆਂ। 

ਬਿਜਲੀ ਦੇ ਗ਼ਲਤ ਸਮਝੌਤੇ ਕਰਨ ਵਾਲਿਆਂ ਦੇ ਖ਼ਿਲਾਫ਼ ਫੌਜਦਾਰੀ ਕਾਰਵਾਈ ਹੋਵੇ- ਜਾਖੜ

ਤੁਸੀਂ ਵਾਅਦਾ ਕਰ ਕੇ ਸਮਝੌਤੇ ਕੈਂਸਲ ਕਿਉਂ ਨਾ ਕੀਤੇ ਜਾਖੜ ਸਾਬ? 

ਪਾਣੀ ਦੀਆਂ ਬੁਛਾੜਾਂ ਵੀ ਨਾ ਰੋਕ ਸਕੀਆਂ ਕਿਸਾਨਾਂ ਦਾ ਰਾਹ-ਇਕ ਖ਼ਬਰ

ਪਾਣੀ ਵਾਰ ਬੰਨੇ ਦੀਏ ਮਾਏਂ, ਬੰਨਾ ਤੇਰਾ ਬਾਹਰ ਖੜ੍ਹਾ।

ਟਰੰਪ ਨੇ ਮੁੜ ਚੋਣਾਂ ‘ਚ ਹੇਰਾ ਫੇਰੀ ਹੋਣ ਦਾ ਰੋਣਾ ਰੋਇਆ- ਇਕ ਖ਼ਬਰ

ਟੁੱਟ ਪੈਣੇ ਦਰਜੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਨਵਜੋਤ ਸਿੱਧੂ ਨੂੰ ਉੱਪ ਮੁੱਖ ਮੰਤਰੀ ਬਣਾਉਣ ਲਈ ਰਾਜ਼ੀ ਨਹੀਂ ਕੈਪਟਨ- ਇਕ ਖ਼ਬਰ

ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।

ਅਕਾਲੀ-ਬਸਪਾ ਗੱਠਜੋੜ ਵਲੋਂ ਕਾਂਗਰਸ ਸਰਕਾਰ ਵਿਰੁੱਧ ਘੜਾ ਭੰਨ ਪ੍ਰਦਰਸ਼ਨ- ਇਕ ਖ਼ਬਰ

ਗੁੱਸਾ ਨਾ ਕਰ ਨੀਂ, ਗੁੱਸਾ ਸਿਹਤ ਲਈ ਮਾੜਾ।

ਐੱਸ.ਆਈ.ਟੀ. ਜਾਂਚ: ਕੇਸ ਪੁਰਾਣਾ ਹੈ, ਹੁਣ ਉਮਰ ਹੋ ਗਈ ਹੈ ਕੁਝ ਯਾਦ ਨਹੀਂ –ਬਾਦਲ

 ਨਰਮ ਸਰੀਰਾਂ ਨੂੰ, ਪੈ ਗਏ ਮਾਮਲੇ ਭਾਰੀ।

ਰਾਹੁਲ ਤੇ ਸੋਨੀਆ ਗਾਂਧੀ ਨੂੰ ਮਿਲੇ ਬਿਨਾਂ ਹੀ ਕੈਪਟਨ ਨੂੰ ਵਾਪਸ ਪਰਤਣਾ ਪਿਆ- ਇਕ ਖ਼ਬਰ

ਬੜੇ ਬੇਆਬਰੂ ਹੋ ਕਰ ਤਿਰੇ ਕੂਚੇ ਸੇ ਹਮ ਨਿਕਲੇ।

ਮੈਨੂੰ ਨਜ਼ਰ ਅੰਦਾਜ਼ ਨਹੀਂ ਦਰਕਿਨਾਰ ਕੀਤਾ ਗਿਆ- ਮਾਸਟਰ ਮੋਹਨ ਲਾਲ

ਅੱਖਾਂ ਗਹਿਰੀਆਂ ਤੇ ਮੁੱਖ ਕੁਮਲਾਏ, ਜਿਹਨਾਂ ਦੇ ਰਾਤੀਂ ਯਾਰ ਵਿਛੜੇ।

ਕੀ ਅਕਾਲੀ ਦਲ ਸੰਯੁਕਤ ਲਈ ‘ਆਪ’ ਨਾਲ ਗੱਠਜੋੜ ਕਰਨਾ ਮਜਬੂਰੀ ਬਣ ਗਈ ਹੈ?- ਇਕ ਖ਼ਬਰ

ਪਾਰ ਪੱਤਣੋਂ ਯਾਰ ਨੂੰ ਮਿਲਣਾ, ਪਾਰ ਲੰਘਾ ਦੇ ਘੜਿਆ।

ਅੰਦੋਲਨ ਦੀ ਥਾਂ ਕਿਸਾਨ ਖੇਤੀ ਕਾਨੂੰਨਾਂ ਬਾਰੇ ਜਾਣਕਾਰੀ ਹਾਸਲ ਕਰਨ- ਖੱਟਰ

ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।

ਪ੍ਰਿਯੰਕਾ ਗਾਂਧੀ ਯੂ.ਪੀ. ਵਿਧਾਨ ਸਭਾ ਚੋਣਾਂ ਲਈ ਇਕ ਵੱਡਾ ਚਿਹਰਾ- ਸਲਮਾਨ ਖ਼ੁਰਸ਼ੀਦ

ਜੀ ਰੰਗ ਬਰਸ ਰਿਹਾ, ਮਾਤਾ ਦੇ ਦਰਬਾਰ।

ਸਿੱਖ ਕਤਲੇਆਮ ਪੀੜਤਾਂ ਵਲੋਂ ਸੁਖਬੀਰ ਬਾਦਲ ਨਾਲ ਮੁਲਾਕਾਤ- ਇਕ ਖ਼ਬਰ

ਵਿਹੜੇ ਖੇੜਿਆਂ ਦੇ ਤਿਲਕਣਬਾਜ਼ੀਆਂ ਨੇ, ਜ਼ਰਾ ਸੋਚ ਕੇ ਕਦਮ ਉਠਾਇਉ ਜੀ।

ਕਾਂਗਰਸ ਹਾਈ ਕਮਾਨ ਨੇ ਕੈਪਟਨ ਨੂੰ ਦਿੱਲੀ ਸੱਦਿਆ- ਇਕ ਖ਼ਬਰ

ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਦਰਬਾਰ ‘ਚ ਪੇਸ਼ ਹੋ ਬਈ ਓ!

ਕੇਜਰੀਵਾਲ ਨੇ ਖੁਦ ਅੰਮ੍ਰਿਤਸਰ ਆ ਕੇ ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਨੂੰ ਪਾਰਟੀ ‘ਚ ਸ਼ਾਮਲ ਕੀਤਾ- ਇਕ ਖ਼ਬਰ

ਨੀ ਮੈਂ ਤਲ਼ੀਆਂ ‘ਤੇ ਚੋਗ ਚੁਗਾਵਾਂ, ਮਿੱਤਰਾਂ ਦੇ ਤਿੱਤਰਾਂ ਨੂੰ।