Chunjhan Ponche

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

09 Aug. 2020

ਆਰ.ਐਸ.ਐਸ. ਦੀ ਸਿਫ਼ਤ ਕਰਨ ਵਾਲੇ ਢੀਂਡਸਾ ਦੀ ਮਨਸ਼ਾ ਹੋਈ ਸਪਸ਼ਟ- ਲੌਂਗੋਵਾਲ
ਲੌਂਗੋਵਾਲ ਸਾਬ ਤੁਹਾਡੀ ਤੇ ਤੁਹਾਡੇ ਆਕਾਵਾਂ ਦੀ ਮਨਸ਼ਾ ਕਿਹੜਾ ਕਿਸੇ ਤੋਂ ਗੁੱਝੀ ਐ।

ਜ਼ਹਿਰੀਲੀ ਸ਼ਰਾਬ ਦੇ ਮੁੱਖ ਮੁਲਜ਼ਮ ਦੀ ਬਟਾਲਾ ਭਾਜਪਾ ਦੇ ਪ੍ਰਧਾਨ ਨਾਲ਼ ਸਾਂਝ-ਇਕ ਖ਼ਬਰ
ਇਕ ਨੂੰ ਕੀ ਰੋਨੀ ਏਂ, ਊਤ ਗਿਆ ਈ ਆਵਾ।    

ਪੰਜਾਬ ਕਾਂਗਰਸ ਦੇ ਵੱਡੇ ਆਗੂਆਂ ‘ਚ ਕਾਟੋ ਕਲੇਸ਼ ਵਧਿਆ-ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਪੰਜਾਬ ਦੇ ਥਾਣੇ ਕਾਂਗਰਸੀ ਵਿਧਾਇਕਾਂ ਦੇ ਇਸ਼ਾਰੇ ‘ਤੇ ਚਲ ਰਹੇ ਹਨ- ਭਗਵੰਤ ਮਾਨ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

ਜ਼ਹਿਰੀਲੀ ਸ਼ਰਾਬ ਦੇ ਧੰਦੇ ਦੀ ਸਰਪ੍ਰਸਤੀ ਕਰਨ ਵਾਲੇ ਕਾਂਗਰਸੀ ਵਿਧਾਇਕਾਂ ਵਿਰੁਧ ਕਾਰਵਾਈ ਹੋਵੇ-ਮਜੀਠੀਆ
ਜਿਸ ਤਰ੍ਹਾਂ ਦੀ ਕਾਰਵਾਈ ਤੁਸੀਂ ਕਰਦੇ ਰਹੇ ਹੋ, ਉਸੇ ਤਰ੍ਹਾਂ ਦੀ ਹੁਣ ਹੋਊ।

ਲੌਂਗੋਵਾਲ ਨੇ ਹਰ ਤਰ੍ਹਾਂ ਦੇ ਨਸ਼ਿਆਂ ‘ਤੇ ਮੁਕੰਮਲ ਪਾਬੰਦੀ ਦੀ ਕੀਤੀ ਮੰਗ- ਇਕ ਖ਼ਬਰ   
ਲੌਂਗੋਵਾਲ ਸਾਬ ਫੇਰ ਸ਼੍ਰੋਮਣੀ ਕਮੇਟੀ ਦੇ ਮੈਂਬਰਾਂ ਦੀ ਭਰਤੀ ਕਿਵੇਂ ਹੋਵੇਗੀ?

ਕਿਸੇ ਵੀ ਕਿਸਮ ਦਾ ਭ੍ਰਿਸ਼ਟਾਚਾਰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ- ਮੰਤਰੀ ਆਸ਼ੂ
ਪੌਣੀ ਸਦੀ ਬੀਤ ਗਈ ਇਹ ਜੁਮਲੇ ਸੁਣਦਿਆਂ, ਰਹਿਮ ਕਰੋ ਕੁਝ ਹੁਣ ਲੋਕਾਂ ‘ਤੇ।

ਪੁਲਿਸ ਤੇ ਆਬਕਾਰੀ ਵਿਭਾਗ ਦੀ ਸ਼ਹਿ ਤੋਂ ਬਿਨਾਂ ਸ਼ਰਾਬ ਦੀ ਤਸਕਰੀ ਨਹੀਂ ਹੋ ਸਕਦੀ- ਦੂਲੋਂ
ਦੂਲੋਂ ਸਾਬ ਸਿਆਸਤਦਾਨਾਂ ਨੁੰ ਕਿਉਂ ਬਰੀ ਕਰੀ ਜਾਂਦੇ ਹੋ।

ਹਰ ਮਾਮਲੇ ‘ਤੇ ਸਿੱਟ ਪ੍ਰੰਤੂ ਨਤੀਜਾ ਜ਼ੀਰੋ ਦਾ ਜ਼ੀਰੋ- ਹਰਪਾਲ ਚੀਮਾ
ਬੇਰੀਆਂ ਨੂੰ ਬੇਰ ਲੱਗ ਗਏ, ਤੈਨੂੰ ਕੁਝ ਨਾ ਲੱਗਾ ਮੁਟਿਆਰੇ।

ਜ਼ਹਿਰੀਲੀ ਸ਼ਰਾਬ ਮਾਮਲੇ ‘ਚ ਕੈਪਟਨ ਸਰਕਾਰ ਨੇ ਤੁਰੰਤ ਕਾਰਵਾਈ ਕੀਤੀ- ਧਰਮਸੋਤ
ਵਾਹ ਬਈ ਵਾਹ! ਸਵਾ ਸੌ ਬੰਦਾ ਮਰਨ ਤੋਂ ਬਾਅਦ ਕੀਤੀ ਕਾਰਵਾਈ ਤੁਰੰਤ ਕਿਵੇਂ ਹੋ ਗਈ ਬਈ।

ਪੰਜਾਬ ਕਾਂਗਰਸ ‘ਚ ਬਗਾਵਤੀ ਸੁਰਾਂ ਤੋਂ ਨਵਾਂ ਵਿਵਾਦ- ਇਕ ਖ਼ਬਰ
ਬਾਲਣ ਹੱਡੀਆਂ ਦਾ, ਰੋਟੀ ਇਸ਼ਕੇ ਦੀ ਲਾਈ ਹੋਈ ਏ। 

ਬਾਜਵਾ-ਕੈਪਟਨ ਵਿਵਾਦ: ਮਨਪ੍ਰੀਤ ਬਾਦਲ ਖੁੱਲ੍ਹ ਕੇ ਕੈਪਟਨ ਦੇ ਹੱਕ ‘ਚ ਡਟੇ- ਇਕ ਖ਼ਬਰ
ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੇ ਭਾਵੇਂ ਜਿੰਦ ਕੱਢ ਲੈ।

ਭਾਜਪਾ ਦੀਆਂ ਪ੍ਰਤਾਪ ਸਿੰਘ ਬਾਜਵਾ ‘ਤੇ ਡੋਰੇ ਪਾਉਣ ਦੀਆਂ ਕੋਸ਼ਿਸ਼ਾਂ ਜ਼ੋਰਾਂ ‘ਤੇ-ਇਕ ਖ਼ਬਰ
ਪਿੰਡ ਪਏ ਨਹੀਂ ਉਚੱਕੇ ਪਹਿਲਾਂ ਹੀ ਸੂਹਾਂ ਲੈਂਦੇ ਫਿਰਦੇ।

ਪਟਿਆਲੇ ‘ਚ ਚੋਰੀ ਹੋਏ ਸਰੂਪ ਲਈ ਸੁਖਬੀਰ ਬਾਦਲ ਨੇ ਸਰਕਾਰ ਵਿਰੁੱਧ ਧਰਨਾ ਦਿੱਤਾ-ਇਕ ਖ਼ਬਰ
ਮੇਰਾ ਕੰਮ ਨਾ ਪਟਿਆਲੇ ਵਿਚ ਕੋਈ, ਆਵਾਂ ਜਾਵਾਂ ਵੋਟਾਂ ਬਦਲੇ। 

ਲੋਕ ਗ਼ੈਰਕਾਨੂੰਨੀ ਨਸ਼ਿਆਂ ਅਤੇ ਸ਼ਰਾਬ ਦੇ ਤਸਕਰਾਂ ਸਬੰਧੀ ਪੁਲਿਸ ਨੂੰ ਸੂਚਨਾ ਦੇਣ- ਪੁਲਿਸ ਅਫ਼ਸਰ
ਤਾਂ ਕਿ ਪੁਲਿਸ ਦੇ ‘ਮਹੀਨੇ’ ‘ਚ ਹੋਰ ਵਾਧਾ ਹੋ ਸਕੇ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

02 Aug. 2020

ਰਾਜਸਥਾਨ ਮਾਮਲਾ: ਰਾਜਪਾਲ ਨੇ ਤੀਜੀ ਵਾਰੀ ਮੋੜੀ ਫ਼ਾਈਲ- ਇਕ ਖ਼ਬਰ
ਉੱਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਪੰਜਾਬ ‘ਚ ਭਾਜਪਾ ਅਕਾਲੀ ਦਲ ਬਾਦਲ ਤੋਂ ਪੱਲਾ ਛੁਡਾਉਣ ਲਈ ਪਰ ਤੋਲਣ ਲੱਗੀ- ਇਕ ਖ਼ਬਰ
ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

ਰਾਜਸਥਾਨ ‘ਚ ਹੋ ਰਹੇ ਤਮਾਸ਼ੇ ਨੂੰ ਬੰਦ ਕਰਵਾਉਣ ਪ੍ਰਧਾਨ ਮੰਤਰੀ ਮੋਦੀ- ਗਹਿਲੋਤ
ਹਮ ਕੋ ਉਨ ਸੇ ਹੈ ਵਫ਼ਾ ਕੀ ਉਮੀਦ, ਜੋ ਨਹੀਂ ਜਾਨਤੇ ਵਫ਼ਾ ਕਿਆ ਹੈ।

ਨਕਲੀ ਸ਼ਰਾਬ ਕਾਰਨ ਹੋਈਆਂ ਮੌਤਾਂ ਲਈ ਜ਼ਿੰਮੇਵਾਰਾਂ ਵਿਰੁੱਧ ਹੋਵੇ ਸਖ਼ਤ ਕਾਰਵਾਈ- ਜਾਖੜ
ਜਾਖੜ ਸਾਹਿਬ ਛੋਟੀਆਂ ਮੱਛੀਆਂ ਹੀ ਫੜ ਹੋਣੀਆਂ, ਮਗਰਮੱਛ ਨਹੀਂ ਫੜਨੇ ਕਿਸੇ ਨੇ।

ਡੇਢ ਕਿੱਲੋ ਅਫ਼ੀਮ ਸਮੇਤ ਸਾਬਕਾ ਪੁਲਿਸ ਮੁਲਾਜ਼ਮ ਗ੍ਰਿਫ਼ਤਾਰ- ਇਕ ਖ਼ਬਰ
ਪਹਿਲਾਂ ਸਟਾਰਾਂ ਤੇ ਫੀਤੀਆਂ ਸਦਕਾ ਬਚਦਾ ਰਿਹੈਂ ਪੁੱਤਰਾ।

ਸ਼੍ਰੋਮਣੀ ਅਕਾਲੀ ਦਲ ਦੇ ਨਿਘਾਰ ਲਈ ਸੁਖਬੀਰ ਬਾਦਲ ਜ਼ਿੰਮੇਵਾਰ-ਦੇਸਰਾਜ ਸਿੰਘ ਧੁੱਗਾ
ਡੁੱਬਦੀ ਬੇੜੀ ‘ਚੋਂ ਮਾਰ ਕੇ ਛਾਲ ਮਿੱਤਰੋ, ਘਰ ਨਵਾਂ ਹੋਰ ਕੋਈ ਲੱਭੀਏ ਜੀ।

ਜ਼ਹਿਰੀਲੀ ਸ਼ਰਾਬ ਪੀਣ ਕਾਰਨ ਮਰਨ ਵਾਲਿਆਂ ਦੇ ਵਾਰਸਾਂ ਨੇ ਸੁਣਾਏ ਆਪਣੇ ਦੁਖੜੇ- ਇਕ ਖ਼ਬਰ
ਸਭ ਲੱਭਦੇ ਵੋਟਾਂ ਜੀ, ਇੱਥੇ ਕੋਈ ਨਹੀਂ ਕਿਸੇ ਦਾ ਦਰਦੀ।

ਪੰਜਾਬ ਸਰਕਾਰ ਨੇ ਕੁੱਤਿਆਂ ਦੀ ਨਸਬੰਦੀ ਕੀਤੀ ਸ਼ੁਰੂ-ਇਕ ਖ਼ਬਰ
ਚਲੋ ਕੁਝ ਤਾਂ ਕਾਰਗੁਜ਼ਾਰੀ ਪਈ ਕੈਪਟਨ ਸਰਕਾਰ ਦੀ।

ਸਹੀ ਸਮੇਂ ‘ਤੇ ਸਹੀ ਫ਼ੈਸਲੇ ਲੈਣ ਨਾਲ਼ ਦੇਸ਼ ਦੇ ਹਾਲਾਤ ਬਿਹਤਰ- ਮੋਦੀ
ਬਿਲਕੁਲ ਜੀ ਤਾਹੀਂਉਂ ਹੁਣ ਦੂਜੇ ਨੰਬਰ ‘ਤੇ ਆਉਣ ਵਾਲੇ ਹਾਂ।

ਯੂ.ਪੀ. ‘ਚ ਮਾਸਕ ਨਾ ਪਾਉਣ ਕਰ ਕੇ ਬੱਕਰੀ ਗ੍ਰਿਫ਼ਤਾਰ- ਇਕ ਖ਼ਬਰ
ਬੰਦੇ ਭਾਵੇਂ ਕੋਈ ਸਾਡੇ ਅੱਠ ਮਾਰ ਜਾਵੇ ਪਰ ਬੱਕਰੀ ਸੁੱਕੀ ਨਹੀਂ ਜਾਣ ਦੇਣੀ।

ਅਮਰੀਕੀ ਜੰਗੀ ਜਹਾਜ਼ ਦੇ ਸ਼ੰਘਾਈ ਨੇੜੇ ਗੇੜੇ ਨੇ ਵਧਾਇਆ ਤਣਾਅ- ਇਕ ਖ਼ਬਰ
ਨਿੱਤ ਮਾਰਦੇ ਗਲੀ ਦੇ ਵਿਚ ਗੇੜੇ, ਛੜਿਆਂ ਦੀ ਨੀਤ ਬੁਰੀ।

ਸ਼੍ਰੋਮਣੀ ਅਕਾਲੀ ਦਲ ਟਕਸਾਲੀ ਦੇ ਮੁੱਖ ਦਫ਼ਤਰ ਦਾ ਉਦਘਾਟਨ ਹੋਇਆ- ਇਕ ਖ਼ਬਰ
ਅੱਧ ਪਾ ਖਿਚੜੀ, ਚੁਬਾਰੇ ਰਸੋਈ।

ਸੁਖਬੀਰ ਬਾਦਲ ਆਪਣੀ ਦੋਗਲੀ ਨੀਤੀ ਛੱਡੇ- ਚੰਦੂਰਾਈਆਂ
ਵਾਦੜੀਆਂ ਸਜਾਦੜੀਆਂ, ਨਿਭਣ ਸਿਰਾਂ ਦੇ ਨਾਲ਼।

ਸਰਕਾਰਾਂ ਸਿੱਖਾਂ ਦੇ ਸਬਰ ਦਾ ਇਮਤਿਹਾਨ ਲੈ ਰਹੀਆਂ ਹਨ- ਭਾਈ ਮੰਡ
ਤੁਹਾਡੇ ਸਬਰ ਨੂੰ ਵੀ ਨਮਸਕਾਰ ਐ ‘ਜਥੇਦਾਰ’ ਜੀ।

ਕਾਂਗਰਸ ਅਤੇ ਗਹਿਲੋਤ ਨੂੰ ਸਬਕ ਸਿਖਾਉਣ ਦੀ ਲੋੜ- ਮਾਇਆਵਤੀ
ਨੀਂ ਮੈਂ ਚੋਰੀ ਚੋਰੀ ਲਾ ਲਈਆਂ ਅੱਖੀਆਂ, ਨੀਂ ਮੈਂ ਚੋਰੀ ਚੋਰੀ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

27 July 2020

ਗਰਭਵਤੀ ਔਰਤ ਨੂੰ ਹੋਇਆ ਕਰੋਨਾ, ਪਤੀ ਨੇ ਪਛਾਨਣ ਤੋਂ ਕੀਤਾ ਇਨਕਾਰ- ਇਕ ਖ਼ਬਰ
ਸੁਖ ਮੇਂ ਬਹੁ ਸੰਗੀ ਭਏ, ਦੁਖ ਮੇਂ ਸੰਗ ਨਾ ਕੋਇ ।

ਮੂਸੇਵਾਲਾ ਦੇ ਨਿੱਤ ਪੁਆੜੇ: ਮੁਹਾਲੀ ਪੁਲਿਸ ਵਲੋਂ ਨਵਾਂ ਕੇਸ ਦਰਜ- ਇਕ ਖ਼ਬਰ
ਨਿੱਤ ਨਵੇਂ ਪੁਆੜੇ ਪਾਉਂਦਾ ਨੀ ਮਰ ਜਾਣਾ ਅਮਲੀ।

ਕਰੋਨਾ ‘ਤੇ ਕੀਤੇ ਖ਼ਰਚਿਆਂ ਬਾਰੇ ਵਾਈਟ ਪੇਪਰ ਜਾਰੀ ਕਰੇ ਸਰਕਾਰ- ਆਪ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਪ੍ਰਕਾਸ਼ ਸਿੰਘ ਬਾਦਲ ਦੀ ਸਿਹਤ ਢਿੱਲੀ, ਬਠਿੰਡਾ ਹਸਪਤਾਲ ‘ਚ ਚੈੱਕ-ਅੱਪ ਹੋਇਆ- ਇਕ ਖ਼ਬਰ
ਹਾਇ ਓਏ ਕਿਤੇ ਆਪਣੀ ਸਰਕਾਰ ਹੁੰਦੀ, ਫੁਰਨ ਕਰ ਕੇ ਮੈਂ ਅਮਰੀਕਾ ਨੂੰ ਉਡ ਜਾਣਾ ਸੀ।

 ਆਮ ਆਦਮੀ ਪਾਰਟੀ: ਮੁੱਖ ਮੰਤਰੀ ਦੇ ਚਿਹਰੇ ਲਈ ਹੁਣ ਤੋਂ ਹੀ ਲੱਗੀ ਦੌੜ- ਇਕ ਖ਼ਬਰ
ਇਕ ਅਨਾਰ, ਸੌ ਬਿਮਾਰ।

ਸਾਰੀਆਂ ਸਿਆਸੀ ਧਿਰਾਂ ਵਲੋਂ ਸੁਖਬੀਰ ਬਾਦਲ ਦੀ ਘੇਰਾਬੰਦੀ, ਵੱਡਾ ਬਾਦਲ ਬੇਵੱਸ- ਇਕ ਖ਼ਬਰ
ਬਾਝ ਭਰਾਵਾਂ ਮਾਰਿਆ, ਕੋਈ ਨਾ ਮਿਰਜ਼ੇ ਸੰਗ।

ਹਰਿਆਣਾ ‘ਚ ਗੁਰਦੁਆਰਾ ਕਮੇਟੀਆਂ ਪੰਜਾਬੀ ਭਾਸ਼ਾ ਵਲ ਕੋਈ ਧਿਆਨ ਨਹੀਂ ਦੇ ਰਹੀਆਂ- ਸਿਕੰਦਰ ਸਿੰਘ ਸਿੱਧੂ
ਰੱਖਦੇ ਧਿਆਨ ਸਦਾ ਬਾਬੇ ਦੀਆਂ ਗੋਲਕਾਂ ‘ਤੇ, ਸਮਾਧੀ ਉੱਤੇ ਬੈਠਾ ਹੋਵੇ ਜਿਵੇਂ ਕੋਈ ਸੰਤ ਜੀ।

ਮੇਰੀ ਸਰਕਾਰ ਨੂੰ ਡੇਗਣ ਦੀ ਕੋਸ਼ਿਸ ਹੋ ਰਹੀ ਹੈ, ਗਹਿਲੋਤ ਨੇ ਮੋਦੀ ਨੂੰ ਪੱਤਰ ਲਿਖਿਆ- ਇਕ ਖ਼ਬਰ
ਚਿੱਠੀ ਰੋ ਕੇ ਨਹੀਂ ਲਿਖੀਦੀ ਸ਼ੁਦੈਣੇ, ਥੋੜ੍ਹਾ ਜਿਹਾ ਰੱਖ ਹੌਸਲਾ।

ਹਾਂਗਕਾਂਗ ਮਾਮਲੇ ‘ਚ ਬਰਤਾਨੀਆ ਦਾ ਦਖ਼ਲ ਬਰਦਾਸ਼ਤ ਨਹੀਂ- ਚੀਨ
ਨਾਰ ਬਿਗਾਨੀ ਦੀ, ਬਾਂਹ ਨਾ ਮੂਰਖਾ ਫੜੀਏ।

 ਅਮਰੀਕਾ ’ਚ ਚੀਨ ਦੇ ਰਾਜਦੂਤ ਨੇ ਮਾਰੀ ਘੁਰਕੀ- ਇਕ ਖ਼ਬਰ
ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।

ਜਥੇਦਾਰ ਕਹਿੰਦੈ ਕਿ ਸੌਦਾ ਸਾਧ ਨੂੰ ਪੁਸ਼ਾਕ ਕਿਸ ਨੇ ਦਿੱਤੀ ਆਦਿਕ ਗੱਲਾਂ ‘ਫਾਲਤੂ’ ਹਨ- ਇਕ ਖ਼ਬਰ
ਲੈ ਲਈਓ ਜਥੇਦਾਰ ਕੋਲੋਂ ਛੁਣਛੁਣਾ।

ਸੁਖਬੀਰ ਬਾਦਲ ਦਾ ਘਰ ਘੇਰਨ ਗਏ ਕਿਸਾਨਾਂ ‘ਤੇ ਪੁਲਿਸ ਨੇ ਵਰ੍ਹਾਇਆ ਡੰਡਾ- ਇਕ ਖਬਰ
ਓਏ ਕਿਸਾਨੋਂ ਮੇਰੇ ਭਤੀਜੇ ਦੇ ਘਰ ਨੂੰ ਘੇਰਨ ਦੀ ਜੁਰਅਤ ਕਿਵੇਂ ਕੀਤੀ ਤੁਸੀਂ!

ਬਾਦਲ ਦੇ ਕਹਿਣ ‘ਤੇ ਮੈਂ ਆਪਣੀ ਲੋਕ ਭਲਾਈ ਪਾਰਟੀ ਭੰਗ ਕਰ ਕੇ ਗ਼ਲਤੀ ਕੀਤੀ- ਰਾਮੂਵਾਲੀਆ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

21 July 2020

ਘਪਲੇ ਨੰਗੇ ਕਰਨ ਵਾਲੇ ਅਧਿਕਾਰੀਆਂ ਦੇ ਸ਼੍ਰੋਮਣੀ ਕਮੇਟੀ ਨੇ ਕੀਤੇ ਤਬਾਦਲੇ- ਇਕ ਖ਼ਬਰ
ਬੱਕਰੇ ਦੀ ਮਾਂ ਕਦ ਤੱਕ ਖੈਰ ਮਨਾਏਗੀ।

29 ਦਿਨਾਂ ਬਾਅਦ ਹੀ ਢਹਿ ਢੇਰੀ ਹੋ ਗਿਆ 264 ਕਰੋੜ ਦਾ ਨਵਾਂ ਪੁਲ਼- ਇਕ ਖ਼ਬਰ
ਸ਼ੁਕਰ ਕਰੋ ਬਣਾਇਆ ਹੋਇਐ ਰੁੜ੍ਹਿਐ, ਏਥੇ ਤਾਂ ਬਿਨਾਂ ਬਣਾਇਆਂ ਵੀ ਰੁੜ੍ਹ ਜਾਂਦੇ ਐ।

ਪੁਸ਼ਾਕ ਮਾਮਲੇ ‘ਚ ਅਵਤਾਰ ਸਿੰਘ ਹਿਤ ਵਲੋਂ ਸੁਖਬੀਰ ਬਾਦਲ ਦੀ ਹਮਾਇਤ- ਇਕ ਖ਼ਬਰ
ਭੈੜੇ ਭੈੜੇ ਯਾਰ ਮੇਰੀ ਫੱਤੋ ਦੇ।

ਗੁਰਦੁਆਰਾ ਬੰਗਲਾ ਸਾਹਿਬ ਦੇ ਲੰਗਰ ਦਾ ਆਟਾ ਦੁਕਾਨ ‘ਤੇ ਵਿਕਦਾ ਫੜਿਆ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਸੁਖਬੀਰ ਬਾਦਲ ਨੂੰ ਵਿਰੋਧੀ ਬਦਨਾਮ ਕਰ ਰਹੇ ਹਨ- ਬੰਟੀ ਰੋਮਾਣਾ
ਤੇਰੀ ਹਰ ਮੱਸਿਆ ਬਦਨਾਮੀ, ਨੀ ਸੋਨੇ ਦੇ ਤਵੀਤ ਵਾਲੀਏ।

ਬੀਰ ਦਵਿੰਦਰ ਸਿੰਘ ਨੂੰ ਪਾਰਟੀ ‘ਚ ਸ਼ਾਮਲ ਕਰ ਕੇ ਬਹੁਤ ਵੱਡੀ ਗ਼ਲਤੀ ਕੀਤੀ- ਟਕਸਾਲੀ ਅਕਾਲੀ ਦਲ
ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।

ਚੀਨ ਦੀਆਂ ਚੁਨੌਤੀਆਂ ਦਾ ਜਵਾਬ ਦੇਣ ਦਾ ਸਮਾਂ ਆ ਗਿਐ- ਪੌਂਪੀਓ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਅਕਾਲੀ ਦਲ ਟਕਸਾਲੀ ਨੇ ਸੇਖਵਾਂ ਤੇ ਬੀਰ ਦਵਿੰਦਰ ਸਿੰਘ ਨੂੰ ਪਾਰਟੀ ‘ਚੋਂ ਕੱਢਿਆ- ਇਕ ਖ਼ਬਰ
ਨੰਗੀ ਕੀ ਨਹਾਊ ਤੇ ਕੀ ਨਿਚੋੜੂ।

ਸਚਿਨ ਪਾਇਲਟ ਨੂੰ ਮਨਾਉਣ ਦੀਆਂ ਕੋਸ਼ਿਸ਼ਾਂ ਤੇਜ਼, ਰਾਹੁਲ ਤੇ ਪ੍ਰਿਅੰਕਾ ਨੇ ਵੀ ਗੱਲਬਾਤ ਕੀਤੀ-ਇਕ ਖ਼ਬਰ
ਅੜੀ ਵੇ ਅੜੀ  ਨਾ ਕਰ ਬਹੁਤੀ ਤੂੰ ਅੜੀ, ਵੇ ਮੈਂ ਕਦੋਂ ਦੀ ਖੜ੍ਹੀ।

ਬੇਅਦਬੀ ਮਾਮਲਾ: ਡੇਰੇ ਨੇ ਲਾਇਆ ਸਿੱਟ ‘ਤੇ ਡੇਰੇ ਨੂੰ ਬਦਨਾਮ ਕਰਨ ਦਾ ਦੋਸ਼-ਇਕ ਖਬਰ
ਸੁਣ ਲੈ ਨਿਹਾਲੀਏ ਚੋਰਾਂ ਦੀਆ ਗੱਲਾਂ।

ਅਕਾਲੀ ਦਲ ਬਾਦਲ ਦਾ ਪੰਥ ਵਿਰੋਧੀ ਚਿਹਰਾ ਡੇਰੇ ਨੇ ਬੇਨਕਾਬ ਕੀਤਾ- ਜਾਖੜ
ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲਾ ਤਿਲਕ ਪਿਆ।

ਕਾਂਗਰਸ ਨੇ ਕੇਂਦਰੀ ਮੰਤਰੀ ‘ਤੇ ਲਗਾਏ ਵਿਧਾਇਕਾਂ ਨੂੰ ਖ਼ਰੀਦਣ ਦੇ ਦੋਸ਼- ਇਕ ਖ਼ਬਰ
ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਭਾਰਤ ਅਤੇ ਚੀਨ ‘ਚ ਸ਼ਾਂਤੀ ਲਈ ਹਰ ਸੰਭਵ ਕਦਮ ਚੁੱਕਣਾ ਚਾਹੁੰਦਾ ਹਾਂ- ਟਰੰਪ
ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

ਕਾਂਗਰਸ ਸਰਕਾਰ ਨੂੰ ਡੇਗਣ ਦੀ ਸਾਜ਼ਿਸ਼ ‘ਚ ਸਚਿਨ ਪਾਇਲਟ ਸ਼ਾਮਲ ਸੀ- ਸੁਰਜੇਵਾਲਾ
ਘਰ ਕਾ ਭੇਤੀ ਲੰਕਾ ਢਾਏ।

ਮੋਦੀ ਸਰਕਾਰ ਪੰਜਾਬ ‘ਚ ਵੀ ਚੌਧਰ ਲਈ ਯਤਨਸ਼ੀਲ-ਇਕ ਖ਼ਬਰ
ਰਾਂਝਾ ਰਾਂਝਾ ਕਰਦੀ, ਲੱਗ ਕੇ ਨਾਲ਼ ਦੀਵਾਰਾਂ ਦੇ।

ਪੁਸ਼ਾਕ ਮਾਮਲਾ: ਸੁਖਬੀਰ ਬਾਦਲ ਦੇ ਬਚਾਉ ਲਈ ਸ਼੍ਰੋਮਣੀ ਕਮੇਟੀ ਦਾ ਪ੍ਰਧਾਨ ਉੱਤਰਿਆ ਮੈਦਾਨ ’ਚ- ਇਕ ਖ਼ਬਰ
ਨੌਕਰ ਕੀ ਤੇ ਨਖ਼ਰਾ ਕੀ! 

ਪੰਥਕ ਧਿਰਾਂ ਵਲੋਂ ਬਰਗਾੜੀ ‘ਚ ਮੁੜ ਰੋਸ ਪ੍ਰਦਰਸ਼ਨ ਕਰਨ ਦਾ ਐਲਾਨ- ਭਾਈ ਗੁਰਦੀਪ ਸਿੰਘ
ਆਰੀ ਆਰੀ ਆਰੀ, ਰਸਤਾ ਛੋੜ ਦਿਓ, ਲੰਘਣੀ ਮੇਮ ਕੁਆਰੀ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

12 July 2020

ਅਮਰਿੰਦਰ ਤੇ ਸੁਖਬੀਰ ਦੇ ਗੱਠਜੋੜ ਕਰ ਕੇ ਚਲਦੇ ਨੇ ਬਾਦਲਾਂ ਦੇ ਧੰਦੇ- ਢੀਂਡਸਾ
ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਡ ਦ ਸੇਮ ਥਿੰਗ।

ਵਿਕਾਸ ਦੂਬੇ ਦੇ ਸਬੰਧ ‘ਚ ਐੱਸ. ਆਈ. ਟੀ. ਦਾ ਗਠਨ- ਇਕ ਖ਼ਬਰ
ਸੱਪ ਮਰੇ ‘ਤੇ ਕੁੱਟਦੇ ਲਕੀਰ ਨੂੰ, ਬੱਲੇ ਓਏ ਨਿਆਂਕਾਰੀਓ।

ਟਰੰਪ ਵਲੋਂ ਚੀਨ ਨਾਲ ਦੂਜੇ ਪੜਾਅ ਦੇ ਵਪਾਰ ਸਮਝੌਤੇ ਤੋਂ ਇਨਕਾਰ- ਇਕ ਖ਼ਬਰ
ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।

ਅਰਥਚਾਰਾ ਆਮ ਵਰਗੀ ਹਾਲਤ ਵਲ ਵਾਪਸੀ ਦੇ ਸੰਕੇਤ ਦੇਣ ਲੱਗਾ-ਆਰ.ਬੀ.ਆਈ. ਗਵਰਨਰ
ਨੀ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਪੰਜਾਬ ਦੇ ਆੜ੍ਹਤੀਏ ਵੀ ਕੇਂਦਰ ਦੇ ਖੇਤੀ ਆਰਡੀਨੈਂਸਾਂ ਖ਼ਿਲਾਫ਼ ਅੰਦੋਲਨ ਕਰਨਗੇ -ਇਕ ਖ਼ਬਰ
ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ।

ਸਾਜ਼ਿਸ਼ਕਰਤਾ ਦਾ ਨਾਮ ਸਾਹਮਣੇ ਆਉਣ ਦੇ ਬਾਵਜੂਦ ਬਾਦਲਾਂ ਦੀ ਚੁੱਪ ਤੋਂ ਪੰਥਕ ਹਲਕੇ ਹੈਰਾਨ-ਇਕ ਖ਼ਬਰ
ਚੋਰ ਦੀ ਮਾਂ, ਕੋਠੀ ‘ਚ ਮੂੰਹ।

ਪੰਜਾਬ ਭਾਜਪਾ ਦੀ ਮੀਟਿੰਗ ‘ਚ ਇਸ ਵਾਰ ਇਕੱਲਿਆਂ ਚੋਣ ਲੜਨ ਦੀ ਮੰਗ ਉੱਠੀ-ਇਕ ਖ਼ਬਰ
ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਮੇਰੀ ਸਰਕਾਰ ਡੇਗਣ ਦੀਆਂ ਕੋਸ਼ਿਸ਼ਾਂ ਕਰ ਰਹੀ ਹੈ ਭਾਜਪਾ- ਗਹਿਲੋਤ
ਜਦੋਂ ਜਾਲ਼ ਫਾਂਧੀਆਂ ਨੇ ਪਾਇਆ, ਨੈਣ ਭਰ ਰੋਈ ਮਛਲੀ।

ਕੋਈ ਗਾਰੰਟੀ ਨਹੀਂ ਕਿ ਚੀਨ-ਭਾਰਤ ਤਣਾਅ ਵਧਣ ‘ਤੇ ਟਰੰਪ ਭਾਰਤ ਦਾ ਸਾਥ ਦੇਵੇਗਾ- ਅਮਰੀਕੀ ਸੁਰੱਖਿਆ ਮਾਹਰ
ਡਰਿਉ ਲੋਕੋ ਡਰਿਉ ਵੇ, ਲੰਬੜਾਂ ਦੀ ਸੇਪ ਨਾ ਕਰਿਉ ਵੇ।

ਬਾਦਲ ਪਰਵਾਰ ਕੇਂਦਰ ਦੀ ਮਦਦ ਨਾਲ ਖੁਦ ਨੂੰ ਤੇ ਸੌਦਾ ਸਾਧ ਨੂੰ ਬਚਾਉਣਾ ਚਾਹੁੰਦਾ- ਹਰਜਿੰਦਰ ਸਿੰਘ ਮਾਝੀ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਨਵਾਂ ਅਕਾਲੀ ਦਲ ਬਣਦਿਆਂ ਹੀ ਢੀਂਡਸਾ ਤੇ ਬ੍ਰਹਮਪੁਰਾ ‘ਚ ਦੂਸ਼ਣਬਾਜ਼ੀ ਛਿੜੀ- ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਨਿਹੰਗ ਲੜ ਪਏ।

ਵਿਸ਼ਵ ਸਿਹਤ ਸੰਗਠਨ ਤੋਂ ਅਲੱਗ ਹੋਇਆ ਅਮਰੀਕਾ- ਇਕ ਖ਼ਬਰ
ਆਹ ਚੁੱਕ ਲੈ ਯੱਕੇ ਦਾ ਭਾੜਾ, ਤੁਰ ਜਾਹ ਪੇਕਿਆਂ ਨੂੰ।

ਸੇਖਵਾਂ ਤੇ ਬੀਰ ਦਵਿੰਦਰ ਸਿੰਘ ਵਲੋਂ ਟਕਸਾਲੀ ਅਕਾਲੀ ਦਲ ਤੋਂ ਦਿੱਤੇ ਅਸਤੀਫ਼ੇ- ਇਕ ਖ਼ਬਰ
ਜਿੰਨਾ ਨ੍ਹਾਤੀ, ਓਨਾ ਈ ਪੁੰਨ।

ਢੀਂਡਸਾ ਨੇ ਕਾਂਗਰਸ ਦੇ ਕਹਿਣ ‘ਤੇ ਨਵਾਂ ਅਕਾਲੀ ਦਲ ਬਣਾਇਆ- ਦਲਜੀਤ ਸਿੰਘ ਚੀਮਾ
ਪਰ੍ਹੇ ਵਿਚ ਆ ਕੇ ਕੈਦੋ ਨੇ ਮੱਗ ਮਾਰੀ, ਚਲੋ ਵੇਖ ਲਉ ਗੱਲਾਂ ਅੱਲ ਵਲੱਲੀਆਂ ਨੇ।

ਭਾਰਤ ਨਾਲ ਪਿਆਰ ਕਰਦੈ ਅਮਰੀਕਾ- ਟਰੰਪ
ਤੇਰਾ ਕਿਸੇ ਦੇ ਨਾਲ ਪਿਆਰ ਨਾਹੀਂ, ਨਿਰਾ ਮਤਲਬ ਆਪਣੇ ਦਾ ਯਾਰ ਐ ਤੂੰ।

ਥਾਣਿਆਂ ‘ਚ ਨਫ਼ਰੀ ਘੱਟ ਹੋਣ ਕਰ ਕੇ ਜ਼ੁਰਮਾਂ ਨੂੰ ਨੱਥ ਪਾਉਣੀ ਔਖੀ-ਇਕ ਖਬਰ
ਪੁਲਿਸ ਦੀਆਂ ਧਾੜਾਂ ਤਾਂ ਗੁੰਡਿਆਂ ਦੀ ਰਾਖੀ ‘ਤੇ ਲਾਈਆਂ ਹੋਈਆਂ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

5 July 2020

ਚੀਨ ਦੇ ਹਮਲਾਵਰ ਰੁਖ਼ ਦੇ ਬਾਵਜੂਦ ਭਾਰਤ ਪਿੱਛੇ ਨਹੀਂ ਹਟੇਗਾ- ਨਿੱਕੀ ਹੇਲੀ
ਚੜ੍ਹ ਜਾ ਬੱਚਾ ਸੂਲੀ, ਰਾਮ ਭਲੀ ਕਰੇਗਾ।

ਰੂਸ ਵਿਚ ਪੂਤਿਨ 2036 ਤੱਕ ਰਾਸ਼ਟਰਪਤੀ ਬਣਿਆਂ ਰਹੇਗਾ- ਇਕ ਖ਼ਬਰ
ਲੋਕਾਂ ਦਾ ਦੁੱਧ ਵਿਕਦਾ, ਤੇਰਾ ਵਿਕਦਾ ਗੁਜਰੀਏ ਪਾਣੀ।

ਪ੍ਰਧਾਨ ਮੰਤਰੀ ਦਾ ਲੱਦਾਖ ਦੌਰਾ ਚੀਨ ਨੂੰ ਸਪੱਸ਼ਟ ਸੁਨੇਹਾ- ਕੂਟਨੀਤਕ ਮਾਹਿਰ
ਸ਼ੀ ਸਾਹਿਬ ਜੀ ਝੂਲਾ ਤਿਆਰ ਹੈ, ਕਦੋਂ ਆ ਰਹੇ ਹੋ ਜੀ?

ਢੀਂਡਸਾ ਪਿਉ ਪੁੱਤਰ 7 ਜੁਲਾਈ ਦੀ ਲੁਧਿਆਣਾ ਮੀਟਿੰਗ ਤੋਂ ਬਾਅਦ ਖੋਲ੍ਹਣਗੇ ਆਪਣੇ ਸਿਆਸੀ ਪੱਤੇ-ਇਕ ਖ਼ਬਰ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਖੇਤੀ ਆਰਡੀਨੈਂਸਾਂ ਦੇ ਮੁੱਦੇ ‘ਤੇ ਬਾਦਲ ਜੋੜਾ ਢਕਵੰਜ ਨਾ ਕਰੇ- ਕੈਪਟਨ
ਅੰਨ੍ਹਿਆਂ ਦੀ ਮੰਡੀ ਦਾ, ਛੱਡ ਦਿਓ ਸਾਕ ਕੁਸੰਗਾ।

ਸ਼ੌਕ ਨਾਲ਼ ਬਣਾਈਆਂ ਕੋਠੀਆਂ ਤੇ ਜ਼ਮੀਨਾਂ ਵੇਚਣ ਲਈ ਪੰਜਾਬੀ ਹੋਏ ਮਜਬੂਰ- ਇਕ ਖ਼ਬਰ
ਤੇਰੀ ਦੁਨੀਆਂ ਸੇ ਦੂਰ, ਚੱਲੇ ਹੋ ਕੇ ਮਜਬੂਰ।

ਨਿਊਯਾਰਕ ‘ਚ ਭਾਰਤੀ,ਤਿੱਬਤੀ ਅਤੇ ਤਾਇਵਾਨ ਭਾਈਚਾਰੇ ਵਲੋਂ ਚੀਨ ਖਿਲਾਫ਼ ਪ੍ਰਦਰਸ਼ਨ-ਇਕ ਖ਼ਬਰ
ਕੀੜੇ ਪੈਣਗੇ ਮਰੇਂਗੀ ਸੱਪ ਲੜ ਕੇ, ਨੀਂ ਮਿੱਤਰਾਂ ਨੂੰ ਦਗ਼ਾ ਦੇਣੀਏਂ।

ਭਾਰਤ ਚੀਨ ਸਰਹੱਦੀ ਵਿਵਾਦ ‘ਚ ਜਾਪਾਨ ਨੇ ਦਿਤੀ ਭਾਰਤ ਨੂੰ ਹਮਾਇਤ-ਇਕ ਖ਼ਬਰ
ਆ ਵੇ ਨਾਜਰਾ ਜਾਹ ਵੇ ਨਾਜਰਾ, ਬੋਤਾ ਬੰਨ੍ਹ ਦਰਵਾਜ਼ੇ।

ਖ਼ਤਰਨਾਕ ਅਪਰਾਧੀ ਨੇ ਡੀ.ਐਸ.ਪੀ. ਸਮੇਤ 8 ਪੁਲਿਸ ਕਰਮੀ ਗੋਲੀਆਂ ਨਾਲ਼ ਕੀਤੇ ਹਲਾਕ- ਇਕ ਖ਼ਬਰ
ਕਮਾਲ ਐ ਬਈ ਅੱਠ ਪੁਲਸੀਆਂ ਨੂੰ ਮਾਰਨ ਵਾਲੇ ਬ੍ਰਾਹਮਣ ਨੂੰ ਭਾਰਤੀ ਮੀਡੀਆ ਨੇ ਆਤੰਕਵਾਦੀ ਨਹੀਂ ਕਿਹਾ।
 
ਖੇਤੀ ਆਰਡੀਨੈਂਸਾਂ ‘ਤੇ ਕੇਂਦਰ ਨਾਲ ਲੜਾਈ ਲਈ ਤਿਆਰ ਹਾਂ- ਕੈਪਟਨ
ਬੰਤੋ ਨਾਰ ਬਦਲੇ, ਜੱਗੇ ਜੱਟ ਦੀ ਗੰਡਾਸੀ ਖੜਕੇ।

ਮੋਦੀ ਅਤੇ ਪੂਤਿਨ ਵਲੋਂ ਦੁਵੱਲੇ ਸਬੰਧਾਂ ਨੂੰ ਮਜਬੂਤ ਕਰਨ ਦਾ ਅਹਿਦ- ਇਕ ਖ਼ਬਰ
ਚੰਨ ਚੜ੍ਹਿਆ ਟਹਿਕਦੇ ਤਾਰੇ, ਇੱਕੋ ਮੰਜੇ ਹੋ ਚਲੀਏ।

ਕੇਸਗੜ੍ਹ ਸਾਹਿਬ ਦੇ ਲੰਗਰ ‘ਚ ਲਾਕਡਾਊਨ ਦੌਰਾਨ ਲੱਖਾਂ ਰੁਪਏ ਦਾ ਘਪਲਾ-ਇਕ ਖ਼ਬਰ
ਚੋਰ ਚੌਧਰੀ ਯਾਰ ਨਾਪਾਕ ਦਾਮਨ, ਭੂਤ ਮੰਡਲੀ ਇਕ ਦੂੰ ਚਾਰ ਹੋਈ।

ਭਾਜਪਾ ਦੇ ਰੁਖ਼ ਨੂੰ ਵੇਖਦਿਆਂ ਬਾਦਲ ਦਲ ਬੀ.ਐਸ.ਪੀ. ਨਾਲ਼ ਗੋਟੀਆਂ ਫਿੱਟ ਕਰਨ ਲੱਗਾ- ਇਕ ਖ਼ਬਰ
ਮਰਦੀ ਨੇ ਅੱਕ ਚੱਬਿਆ, ਨੀਂ ਮੈਂ ਹਾਰ ਕੇ ਜੇਠ ਨਾਲ਼ ਲਾਈਆਂ।

ਗੁਰੂ ਗ੍ਰੰਥ ਸਾਹਿਬ ਜੀ ਦੇ 267 ਸਰੂਪਾਂ ਦੇ ਗੁੰਮ ਹੋਣ ਬਾਰੇ ਲੌਂਗੋਵਾਲ ਵਲੋਂ ਛੇ ਮੈਂਬਰੀ ਕਮੇਟੀ ਦਾ ਗਠਨ-ਇਕ ਖ਼ਬਰ
ਕਮੇਟੀ ਇਕ ਹੋਰ ਬਣਾਵਾਂਗੇ, ਮਿੱਟੀ ਗੋਂਗਲੂਆਂ ਤੋਂ ਝਾੜਾਂਗੇ।

ਅਮਰੀਕਾ ਨੇ ਭਾਰਤ ਵਲੋਂ ਚੀਨੀ ਐਪਸ ‘ਤੇ ਲਗਾਈ ਪਾਬੰਦੀ ਦੀ ਕੀਤੀ ਹਮਾਇਤ- ਇਕ ਖ਼ਬਰ
ਜਿਹੜੀਆਂ ਲੈਣ ਉਡਾਰੀਆਂ ਨਾਲ਼ ਬਾਜ਼ਾਂ, ਉਹ ਬੁਲਬੁਲਾਂ ਠੀਕ ਮਰੀਂਦੀਆਂ ਨੇ। 

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

29 June 2020

ਕੀ ਅਸੀਂ ਚੀਨ ਤੋਂ ਮੰਗਵਾਈਆਂ ਜਾਣ ਵਾਲੀਆਂ ਗਣੇਸ਼ ਦੀਆਂ ਮੂਰਤੀਆਂ ਵੀ ਆਪ ਨਹੀਂ ਬਣਾ ਸਕਦੇ?-ਨਿਰਮਲਾ ਸੀਤਾਰਮਨ
ਵਪਾਰੀ ਮੰਗਵਾਉਣਗੇ, ਮੋਟਾ ਮਾਲ ਕਮਾਉਣਗੇ, ਪਾਰਟੀ ਫੰਡ ਦੇਣਗੇ। ਬੀਬੀ ਜੀ, ਏਨੀ ਗੱਲ ਵੀ ਨਹੀਂ ਸਮਝਦੇ ਤੁਸੀਂ।

ਸਰਕਾਰ ਧਰਮ, ਜਾਤ, ਨਸਲ, ਲਿੰਗ ਜਾਂ ਭਾਸ਼ਾ ਦੇ ਆਧਾਰ ‘ਤੇ ਕਿਸੇ ਨਾਲ਼ ਵਿਤਕਰਾ ਨਹੀਂ ਕਰਦੀ- ਮੋਦੀ
ਸਹੁੰ ਰੱਬ ਦੀ ਝੂਠ ਨਾ ਬੋਲਾਂ, ਬੱਕਰੀ ਨੂੰ ਊਠ ਜੰਮਿਆਂ।

ਮਿੱਤਲ ਦਾ ਬਿਆਨ ਅਕਾਲੀ-ਭਾਜਪਾ ਗੱਠਜੋੜ ‘ਚ ਲਿਆਵੇਗਾ ਤੂਫਾਨ- ਇਕ ਖ਼ਬਰ
ਅੱਡੀ ਮਾਰ ਕੇ ਨੱਚੀ ਜਦ ਬੰਤੋ, ਵਿਹੜੇ ‘ਚ ਭੂਚਾਲ਼ ਆ ਗਿਆ।

ਰਾਹੁਲ ਗਾਂਧੀ ਨੂੰ ਹੁਣ ਪਾਰਟੀ ਦੀ ਜ਼ਿੰਮੇਵਾਰੀ ਲੈ ਲੈਣੀ ਚਾਹੀਦੀ ਹੈ- ਸਚਿਨ ਪਾਇਲਟ
ਪਾਣੀ ਵਾਰ ਬੰਨੇ ਦੀਏਂ ਮਾਏਂ, ਬੰਨਾ ਤੇਰਾ ਬਾਹਰ ਖੜ੍ਹਾ।

ਭਾਰਤ ਦੇ ਸਮਰਥਨ ‘ਚ ਆਇਆ ਅਮਰੀਕਾ- ਇਕ ਖ਼ਬਰ
ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਹੁਣ ਨਿਜੀ ਖੇਤਰ ਵਾਲ਼ੇ ਵੀ ਰਾਕੇਟਾਂ ਦਾ ਨਿਰਮਾਣ ਕਰ ਸਕਣਗੇ- ਰਾਕੇਟ ਇੰਜਨੀਅਰ ਸਿਵਨ
ਯਾਨੀ ਕਿ ਹੁਣ ਕਾਰਪੋਰੇਟ ਘਰਾਣਿਆਂ ਨੂੰ ਰਾਕੇਟ ਬਣਾਉਣ ਦੇ ਸਰਕਾਰੀ ਠੇਕੇ ਮਿਲਿਆ ਕਰਨਗੇ।

ਕੌਮ ਦੀ ਤਬਾਹੀ ਲਈ ਸਿੱਖ ਕੌਮ ਅੱਜ ਇਹਦੇ ਲੀਡਰਾਂ ਤੋਂ ਜਵਾਬ ਮੰਗਦੀ ਹੈ- ਸਾਬਕਾ ਸਕੱਤਰ ਹਰਚਰਨ ਸਿੰਘ
ਜੇਠ ਬੋਲੀਆਂ ਮਾਰੇ ਹੁਣ ਤੂੰ ਕਿਧਰ ਗਿਆ।

ਬਠਿੰਡਾ ਥਰਮਲ ਪਲਾਂਟ ਦੇ ਕੂਲਿੰਗ ਟਾਵਰ ਨਹੀਂ ਢਾਏ ਜਾਣਗੇ- ਸਰਕਾਰੀ ਬੁਲਾਰਾ
ਬੇਰੋਜ਼ਗਾਰ ਮੁਲਾਜ਼ਮਾਂ ਨੂੰ ਟਾਵਰਾਂ ‘ਤੇ ਚੜ੍ਹ ਕੇ ਮੁਜ਼ਾਹਰੇ ਕਰਨ ਦੀ ਸਹੂਲਤ ਦਿਤੀ ਜਾਵੇਗੀ।

ਨਿਪਾਲ ਹੁਣ ਭਾਰਤ ਨਾਲ ਸਭਿਆਚਾਰਕ ਸਾਂਝ ਤੋੜਨ ਲਈ ਤਤਪਰ- ਇਕ ਖ਼ਬਰ
ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਸੰਕਟ ਸਮੇਂ ਵੀ ਲੋਕਾਂ ਦੀਆਂ ਜੇਬਾਂ ਕੱਟਣ ਲੱਗੀ ਹੋਈ ਹੈ ਭਾਜਪਾ ਸਰਕਾਰ- ਪ੍ਰਿਅੰਕਾ ਗਾਂਧੀ
ਸਰਕਾਰ ਜਾਣਦੀ ਐ ਕਿ ਟੋਏ ‘ਚ ਡਿਗਿਆ ਢੱਠਾ ਖੱਸੀ ਕਰਨਾ ਸੌਖਾ ਹੁੰਦੈ।

ਆਯੁਰਵੈਦਿਕ ਅਤੇ ਹੋਮਿਉਪੈਥਿਕ ਕੰਪਨੀਅਆਂ ਦੇ ਕੋਵਿਡ-19 ਦੇ ਇਲਾਜ ਦੇ 50 ਇਸ਼ਤਿਹਾਰ ਗੁੰਮਰਾਹਕੁੰਨ-ਇਕ ਖ਼ਬਰ
ਪਿੰਡ ਪਏ ਨਹੀਂ, ਉਚੱਕੇ ਮੂਹਰੇ।

ਰੂਸ ਵਲੋਂ ਭਾਰਤ ਅਤੇ ਚੀਨ ਵਿਚਾਲੇ ਵਿਚੋਲਗੀ ਤੋਂ ਇਨਕਾਰ- ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨਾਂ ਚੱਪਣੀ ਭੁਆਂ ਕੇ ਮਾਰੀ।

ਬੇਅਦਬੀ ਕਾਂਡ ‘ਚ ਪੁਲਿਸ ਨਾਲ ਲਿਹਾਜ਼ਦਾਰੀਆਂ ਮਹਿੰਗੀਆਂ ਪਈਆਂ ਪੰਕਜ ਬਾਂਸਲ ਨੂੰ- ਇਕ ਖਬਰ
ਇਨ ਸੇ ਫਕਤ ਦੂਰ ਕੀ ਸਾਹਬ ਸਲਾਮਤ ਅੱਛੀ, ਨਾ ਇਨ ਕੀ ਦੋਸਤੀ ਅੱਛੀ ਨਾ ਇਨ ਕੀ ਦੁਸ਼ਮਨੀ ਅੱਛੀ।   

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

23 June 2020

ਪ੍ਰਧਾਨ ਮੰਤਰੀ ਸਾਹਮਣੇ ਆਉਣ ਤੇ ਦੇਸ਼ ਨੂੰ ਭਰੋਸੇ ‘ਚ ਲੈਣ- ਸੋਨੀਆ ਗਾਂਧੀ
ਭੀੜੀ ਗਲੀ ਵਿਚ ਹੋ ਗਏ ਟਾਕਰੇ, ਬਹਿ ਕੇ ਗੱਲਾਂ ਕਰੀਏ।

ਅਦਾਲਤ ਵਲੋਂ ਭਗੌੜਾ ਕਰਾਰ ਦਿਤਾ ਗਿਆ ਵਿਅਕਤੀ ਬੀ.ਡੀ.ਓ. ਦੀ ਪਦਵੀ ‘ਤੇ- ਇਕ ਖ਼ਬਰ
ਜਿੱਥੇ ਨਿੰਮ ਨੂੰ ਪਤਾਸੇ ਲਗਦੇ, ਉਹ ਮੇਰਾ ਦੇਸ਼ ਬੇਲੀਓ।

ਭਾਜਪਾ ਵਲੋਂ ਸੰਘੀ ਢਾਂਚੇ ਦਾ ਗਲ਼ ਘੁੱਟਣ ਵਿਚ ਬਾਦਲ ਬਰਾਬਰ ਦੇ ਭਾਈਵਾਲ- ਕਾਂਗਰਸੀ ਮੰਤਰੀ
ਤਰਫ਼ ਕੌਮ ਦੇ ਨਹੀਂ ਖਿਆਲ ਤੇਰਾ, ਮਤਲਬ ਆਪਣੇ ਦਾ ਨਿਰਾ ਯਾਰ ਏਂ ਤੂੰ।

ਨਵਜੋਤ ਸਿੱਧੂ ਦੀ ਕੋਠੀ ਅੱਗੇ ਲਾਏ ਬਿਹਾਰ ਪੁਲਿਸ ਨੇ ਡੇਰੇ-ਇਕ ਖ਼ਬਰ
ਪੁਲਿਸ ਨੂੰ ਮਾਰ ਗਿਆ, ਤੇਰਾ ਮੁੜ ਕੇ ਆਉਣ ਦਾ ਲਾਰਾ।

ਕਿਸਾਨੀ ਮੁੱਦਿਆਂ ‘ਤੇ ਕੈਪਟਨ ਨੇ ਸੱਦੀ ਕੇਂਦਰ ਵਿਰੋਧੀ ਸਰਬ ਪਾਰਟੀ ਮੀਟਿੰਗ: ਅਕਾਲੀ ਦਲ ਮੁਸ਼ਕਿਲ ‘ਚ-ਇਕ ਖ਼ਬਰ
ਸੱਪ ਦੇ ਮੂੰਹ ‘ਚ ਕਿਰਲੀ, ਖਾਵੇ ਤਾਂ ਕੋਹੜੀ ਛੱਡੇ ਤਾਂ ਕਲੰਕੀ।

ਬੇਅਦਬੀ ਕੇਸਾਂ ‘ਚ ਬਾਦਲਾਂ ਨੂੰ ਸ਼ਰੇਆਮ ਬਚਾਅ ਰਹੀ ਹੈ ਕੈਪਟਨ ਸਰਕਾਰ- ਹਰਪਾਲ ਚੀਮਾ
ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ।

ਕੇਂਦਰ ਦੇ ਕਾਲੇ ਕਾਨੂੰਨ ਕਿਸਾਨੀ ਨੂੰ ਤਬਾਹ ਕਰ ਦੇਣਗੇ- ਜਾਖੜ
ਰਾਤੀਂ ਰੋਂਦੀ ਦਾ, ਭਿੱਜ ਗਿਆ ਲਾਲ ਪੰਘੂੜਾ।

ਦਿੱਲੀ ਦੇ ਸਿੱਖ ਆਗੂਆਂ ਨੂੰ ਉੱਤਰ ਪ੍ਰਦੇਸ਼ ਦੇ ਸਿੱਖਾਂ ਦੀ ਆਈ ਯਾਦ- ਇਕ ਖ਼ਬਰ
ਬੋਤਾ ਵੀਰ ਦਾ ਨਜ਼ਰ ਨਾ ਆਵੇ, ਉਡਦੀ ਧੂੜ ਦਿਸੇ।

ਅਕਾਲੀ ਦਲ ਇਕ ਦੇਸ਼ ਇਕ ਮੰਡੀ ਦਾ ਧੱਕਾ ਕਦੇ ਵੀ ਬਰਦਾਸ਼ਤ ਨਹੀਂ ਕਰੇਗਾ-ਸੁਖਬੀਰ ਬਾਦਲ
ਬੱਲੇ ਬਈ ਬਾਦਲੋ! ਦਿੱਲੀ ਇਹਦੇ ਹੱਕ ‘ਚ ਵੋਟਾਂ ਤੇ ਪੰਜਾਬ ‘ਚ ਵਿਰੋਧ।

ਸਰਹੱਦ ਰੇਖਾ ਵਧਾਉਣ ਲਈ ਨਿਪਾਲ ਨੂੰ ਚੀਨ ਕਰ ਰਿਹਾ ਹੈ ਪ੍ਰੇਰਿਤ- ਸੁਰੱਖਿਆ ਮਾਹਿਰ
ਚੁੱਕੀ ਹੋਈ ਪੰਚਾਂ ਦੀ, ਗਾਲ਼ ਬਿਨਾਂ ਨਾ ਬੋਲੇ।

ਕੋਰੋਨਾ ਦੇ ਕਹਿਰ ਦੇ ਬਾਵਜੂਦ ਸਿਆਸੀ ਏਜੰਡਾ ਤੋਰਨ ‘ਚ ਰੁੱਝੀ ਭਾਜਪਾ-ਇਕ ਖ਼ਬਰ
ਰੋਮ ਸਾਰਾ ਪਿਆ ਜਲ਼ਦਾ, ਨੀਰੋ ਆਪਣੀ ਹੀ ਬੰਸਰੀ ਵਜਾਵੇ।

ਭਾਰਤ-ਚੀਨ ਤਣਾਅ ‘ਤੇ ਸਾਡੀ ਨੇੜਿਉਂ ਨਜ਼ਰ-ਟਰੰਪ
ਸਭ ਜਾਣਦੇ ਐ ਕਿ ਇੱਲ ਦੀ ਨਿਗਾਹ ਕਾਹਦੇ ‘ਤੇ ਹੁੰਦੀ ਐ।

ਸਕੂਲ ਦੇ ਕਲਰਕ ਨੇ ਹੈੱਡਮਾਸਟਰ ਨਾਲ ਮਿਲ ਕੇ ਸਰਕਾਰ ਨੂੰ ਇਕ ਕਰੋੜ ਦਾ ਚੂਨਾ ਲਾਇਆ-ਇਕ ਖ਼ਬਰ
ਗੁਰੂ ਜਿਹਨਾਂ ਦੇ ਟੱਪਣੇ, ਚੇਲੇ ਜਾਣ ਛੜੱਪ।

ਸ਼ਹੀਦ ਜਵਾਨਾਂ ‘ਚ ਸਭ ਤੋਂ ਵੱਧ 12 ਬਿਹਾਰ ਰੈਜਮੈਂਟ ਦੇ- ਇਕ ਖ਼ਬਰ
56 ਇੰਚ ਸੀਨੇ ਵਾਲੇ ਕਿਧਰ ਗਏ ਬਈ।  

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

15 June 2020

ਖਾਲਿਸਤਾਨ ਦਾ ਬਿਆਨ ਜਥੇਦਾਰ ਨੇ ਬਾਦਲਾਂ ਦੇ ਕਹਿਣ ‘ਤੇ ਦਿਤਾ-ਅੰਗਰੇਜ਼ ਸਿੰਘ ਪੰਨੂੰ
ਤੂੰ ਨੀਂ ਬੋਲਦੀ ਰਕਾਨੇ ਤੂੰ ਨੀਂ ਬੋਲਦੀ, ਤੇਰੇ ‘ਚ ਤੇਰਾ ਯਾਰ ਬੋਲਦਾ।

ਸੁਖਬੀਰ ਸਿੰਘ ਬਾਦਲ ਨੇ ਲੌਂਗੋਵਾਲ ਨੂੰ ਕੋਰ ਕਮੇਟੀ ‘ਚ ਲਿਆ-ਇਕ ਖ਼ਬਰ
ਸਰ ਸੁੱਕ ‘ਗੇ ਨਖ਼ਰੋ ਨੀਂ, ਮੈਂ ਕਿੱਥੋਂ ਲਿਆਵਾਂ ਪਾਣੀ।

ਬੀਬੀ ਜਗੀਰ ਕੌਰ ਨੂੰ ਇਸਤਰੀ ਅਕਾਲੀ ਦਲ ਦੀ ਪ੍ਰਧਾਨ ਬਣਾਇਆ-ਇਕ ਖਬਰ
ਪੈੜ ਜਗੀਰੋ ਦੀ, ਪਿੱਪਲਾਂ ਹੇਠ ਦੀ ਜਾਵੇ।

ਫ਼ਸਲਾਂ ਦੇ ਸਮਰਥਨ ਮੁੱਲ ਤੋਂ ਨਹੀਂ ਸਗੋਂ ਭਾਜਪਾ ਤੋਂ ਦੇਸ਼ ਦੀ ਆਰਥਿਕਤਾ ਨੂੰ ਖ਼ਤਰਾ-ਜਾਖੜ
ਰਾਤ ਹਨੇਰੀ ਮਾਂਏਂ ਨੀਂ ਬੀਂਡੇ ਬੋਲਦੇ, ਮੈਨੂੰ ਭੈਅ ਨੀਂ ਕੱਲੀ ਨੂੰ ਆਵੇ।

ਲੁਟੇਰਿਆਂ ਨੇ 16 ਲੱਖ ਦੀ ਨਗਦੀ ਸਮੇਤ ਏ.ਟੀ.ਐਮ. ਹੀ ਪੁੱਟ ਲਿਆ- ਇਕ ਖਬਰ
ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਫ਼ਸਲਾਂ ਦੇ ਸਮਰਥਨ ਮੁੱਲ ਤੋਂ ਅਰਥਚਾਰੇ ਨੂੰ ਖ਼ਤਰਾ- ਗਡਕਰੀ
ਕਿਉਂ ਬਈ ਸੱਜਣੋਂ ਆ ਗਈ ਨਾ ਬਿੱਲੀ ਥੈਲਿਉਂ ਬਾਹਰ।

ਅੱਡੀਆਂ ਚੁੱਕ ਚੁੱਕ ਕੇ ਪਰਵਾਸੀਆਂ ਨੂੰ ਉਡੀਕਣ ਲੱਗੇ ਪੰਜਾਬੀ ਕਿਸਾਨ-ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਵੇਦਨ ਭਾਰੀ ਜੀ।

ਡੇਰਿਆਂ ਵਿਚ ਵੀ ਸ੍ਰੀ ਅਕਾਲ ਤਖ਼ਤ ਦੀ ਮਰਯਾਦਾ ਲਾਗੂ ਕੀਤੀ ਜਾਵੇਗੀ- ਜਥੇਦਾਰ ਰਘਬੀਰ ਸਿੰਘ
ਆਪੇ ਤੇਰਾ ਰਾਮ ਰੱਖ ਲਊ, ਪਾ ਲੈ ਤੱਤਿਆਂ ਥੰਮ੍ਹਾਂ ਨੂੰ ਜੱਫੀਆਂ।

ਮੁੱਖ ਮੰਤਰੀ ਵਲੋਂ ਵਿਭਾਗਾਂ ਨੂੰ ਖ਼ਰਚੇ ਘਟਾਉਣ ਦੇ ਹੁਕਮ- ਇਕ ਖ਼ਬਰ
ਬਾਂਕਾਂ ਨਾ ਜੁੜੀਆਂ, ਰੰਨ ਅੱਡੀਆਂ ਕੂਚਦੀ ਮਰ ਗਈ।

ਰਾਜਸਥਾਨ ‘ਚ ਭਾਜਪਾ ਵਲੋਂ ਕਾਂਗਰਸੀ ਵਿਧਾਇਕਾਂ ਨੂੰ 25-25 ਕਰੋੜ ਦੀ ਪੇਸ਼ਕਸ਼- ਗਹਿਲੋਤ
ਨੰਗੇ ਮੂੰਹ ਦਾ ਮੁੱਲ ਪੁੱਛਦਾ, ਮੁੰਡਾ ਬਟੂਆ ਹੱਥਾਂ ਵਿਚ ਫੜ ਕੇ।

‘ਆਪ’ ਦੀ ਸਰਕਾਰ ਬਣਨ ‘ਤੇ ਪੰਜਾਬ ‘ਚੋਂ ਮਾਫੀਆ ਰਾਜ ਖਤਮ ਕੀਤਾ ਜਾਵੇਗਾ- ਸੰਧਵਾਂ
ਉੱਤੇ ਪਾ ਦੇ ਫੁੱਲ ਕਲੀਆਂ, ਮੰਜਾ ਬੁਣ ਦੇ ਜੁਗਿੰਦਰਾ ਯਾਰਾ।

ਪਾਕਿਸਤਾਨ ‘ਚ ਜੂਆ ਖੇਡਣ ਦੇ ਦੋਸ਼ ‘ਚ ਇਕ ਗਧਾ ਗ੍ਰਿਫ਼ਤਾਰ-ਇਕ ਖ਼ਬਰ
ਰੱਬਾ ਤੇਰੇ ਰੰਗ ਨਿਆਰੇ, ਜੂਆ ਖੇਲੇ ਕੋਈ ਸਜਾ ਭੁਗਤਣ ਗਧੇ ਵਿਚਾਰੇ।  

ਹੱਥ ਚੁੰਮ ਕੇ ਕਰੋਨਾ ਦਾ ਇਲਾਜ ਕਰਨ ਵਾਲਾ ਬਾਬਾ ਆਪ ਕਰੋਨਾ ਨਾਲ਼ ਮਰਿਆ-ਇਕ ਖ਼ਬਰ
ਮੰਡੀ ਮੂਰਖਾਂ ਦੀ, ਸੁਰਮਾਂ ਵੇਚਣ ਅੰਨ੍ਹੇ।

ਤੀਜੇ ਬਦਲ ਦੀ ਉਸਾਰੀ ਲਈ ਅਕਾਲੀ ਦਲ (ਟਕਸਾਲੀ) ਪੰਥਕ ਧਿਰਾਂ ਨੂੰ ਇਕਜੁਟ ਕਰੇਗਾ- ਇਕ ਖ਼ਬਰ
ਰੁਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪਕ ਗਏ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

8 June 2020

ਭਾਰਤ ਦੇ ਇਤਰਾਜ਼ ਦੇ ਬਾਵਜੂਦ ਚੀਨ ਮਕਬੂਜ਼ਾ ਕਸ਼ਮੀਰ 'ਚ ਬਿਜਲੀ ਪ੍ਰਾਜੈਕਟ ਲਗਾਏਗਾ- ਇਕ ਖ਼ਬਰ
ਘੁੰਡ ਕੱਢਣਾ ਤਵੀਤ ਨੰਗਾ ਰੱਖਣਾ, ਛੜਿਆਂ ਦੀ ਹਿੱਕ ਲੂਹਣ ਨੂੰ।

ਅੰਮ੍ਰਿਤਸਰ ਲਈ ਨਵੇਂ 'ਐਕਸਪ੍ਰੈਸ ਵੇਅ' ਦਾ ਐਲਾਨ- ਇਕ ਖ਼ਬਰ
ਚੰਨ ਚੰਨਾਂ ਦੇ ਮਾਮਲੇ, ਖਵਰੇ ਚੜ੍ਹਨ ਕਿ ਨਾ ਹੀ ਚੜ੍ਹਨ।

ਸਿੱਧੂ ਮੂਸੇ ਵਾਲ਼ੇ ਨੂੰ ਕਾਨੂੰਨ ਦਾ ਕੋਈ ਡਰ ਨਹੀਂ-ਇਕ ਖ਼ਬਰ
ਸਈਆਂ ਭਏ ਕੋਤਵਾਲ, ਅਬ ਡਰ ਕਾਹੇ ਕਾ।

ਪੰਜਾਬ ਦੇਸ਼ ਦੇ ਦੂਜੇ ਸੂਬਿਆਂ ਲਈ ਬਣੇਗਾ ਚਾਨਣ ਮੁਨਾਰਾ- ਮਨਪ੍ਰੀਤ ਸਿੰਘ ਬਾਦਲ
ਪੱਲੇ ਨਹੀਂ ਧੇਲਾ, ਕਰਦੀ ਮੇਲਾ ਮੇਲਾ।

ਬਾਦਲ ਦਲ 'ਚ ਵਾਪਸ ਜਾਣ ਦੀਆਂ ਅਫ਼ਵਾਹਾਂ ਦਾ ਜਥੇਦਾਰ ਬ੍ਰਹਮਪੁਰਾ ਵਲੋਂ ਖੰਡਨ- ਇਕ ਖ਼ਬਰ
ਐਵੇਂ ਹੀ ਰੌਲ਼ਾ ਪੈ ਗਿਆ, ਐਵੇਂ ਹੀ ਰੌਲ਼ਾ ਪੈ ਗਿਆ।

ਰਾਜਸਥਾਨ ਪੁਲਿਸ ਨੇ ਜਾਰਜ ਫਲਾਇਡ ਵਾਂਗ ਹੀ ਇਕ ਨੌਜਵਾਨ ਦੀ ਧੌਣ 'ਤੇ ਰੱਖਿਆ ਗੋਡਾ- ਇਕ ਖ਼ਬਰ
ਖ਼ਰਬੂਜ਼ੇ ਨੂੰ ਦੇਖ ਕੇ ਖ਼ਰਬੂਜ਼ਾ ਰੰਗ ਫੜਦੈ।

ਸਿੱਖ ਨੌਜਵਾਨਾਂ ਦੀ ਫੜੋ-ਫੜਾਈ 'ਤੇ ਅਕਾਲ ਤਖ਼ਤ ਦੇ ਜਥੇਦਾਰ ਨੇ ਧਾਰੀ ਚੁੱਪ- ਇਕ ਖ਼ਬਰ
ਹਿਜ਼ ਮਾਸਟਰਜ਼ ਵਾਇਸ। 

ਮਨਪ੍ਰੀਤ ਬਾਦਲ ਨੇ ਕੇਂਦਰ ਸਰਕਾਰ ਦੇ ਪੈਕੇਜ ਦੀ ਪੋਲ ਖੋਲ੍ਹੀ-ਇਕ ਖ਼ਬਰ
ਨਾਲ਼ੇ ਬਾਬਾ ਲੱਸੀ ਪੀ ਗਿਆ, ਨਾਲ਼ੇ ਦੇ ਗਿਆ ਦੁਆਨੀ ਖੋਟੀ।

ਕਾਂਗਰਸੀ ਆਗੂਆਂ ਦੀ ਸ਼ਮੂਲੀਅਤ ਨਾਲ ਹੋ ਰਹੇ ਹਨ ਵੱਡੇ ਘੁਟਾਲੇ-ਯੂਥ ਅਕਾਲੀ ਦਲ
ਬਈ ਸਿਆਣੇ ਕਹਿੰਦੇ ਹੁੰਦੇ ਆ ਕਿ 'ਕੱਲਾ ਇਕ ਤੇ ਦੋ ਗਿਆਰਾਂ'

ਟਰੰਪ ਦੀ ਬਿਆਨਬਾਜ਼ੀ ਨੇ ਬਲ਼ਦੀ ਉੱਪਰ ਤੇਲ ਪਾਇਆ- ਜੋਅ ਬਿਡੇਨ
ਨਿੱਤ ਨਵੇਂ ਪੁਆੜੇ ਪਾਉਂਦਾ ਨੀਂ, ਮਰ ਜਾਣਾ ਅਮਲੀ।

ਬੀਜ ਤੇ ਕੀੜੇਮਾਰ ਦਵਾਈਆਂ ਦੀਆਂ ਦੁਕਾਨਾਂ ਦੀ ਅਚਨਚੇਤ ਚੈਕਿੰਗ ਸ਼ੁਰੂ-ਇਕ ਖ਼ਬਰ
ਸੱਪ ਲੰਘੇ ਤੇ ਲਕੀਰ ਪਿੱਟਣੀ। ਬੜੀ ਪੁਰਾਣੀ ਆਦਤ ਹੈ ਇਹਨਾਂ ਦੀ।

ਦਿੱਲੀ ਦੇ ਸੀਨੀਅਰ ਅਕਾਲੀ ਨੇਤਾ ਹਰਮਨਜੀਤ ਸਿਘ ਨੇ ਅਕਾਲੀ ਦਲ ਤੋਂ ਦਿਤਾ ਅਸਤੀਫ਼ਾ- ਇਕ ਖ਼ਬਰ
ਆਹ ਲੈ ਫੜ ਚੁੱਕ ਮਿੱਤਰਾ, ਸਾਡੇ ਬਾਂਕਾਂ ਮੇਚ ਨਾ ਆਈਆਂ।

ਜੈਸਿਕਾ ਲਾਲ ਕਤਲ ਕਾਂਡ 'ਚ ਦੋਸ਼ੀ ਮਨੂ ਸ਼ਰਮਾ ਸਜ਼ਾ ਪੂਰੀ ਹੋਣ ਤੋਂ ਪਹਿਲਾਂ ਹੀ ਰਿਹਾਅ- ਇਕ ਖ਼ਬਰ
ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਵੀ ਜੇਲ੍ਹਾਂ 'ਚ ਰੱਖਣ ਦੀ 'ਸਹੂਲਤ' ਤਾਂ ਸਿਰਫ਼ ਸਿੱਖਾਂ ਨੂੰ ਹੀ ਮਿਲਦੀ ਐ।
 
ਮੰਤਰੀਆਂ ਤੇ ਵਿਧਾਇਕਾਂ ਲਈ ਲੱਖਾਂ ਦੇ ਭੱਤਿਆਂ ਦਾ ਮੀਟਰ ਚਾਲੂ-ਇਕ ਖ਼ਬਰ
ਭਰ ਲਉ ਝੋਲ਼ੀਆਂ ਮਿੱਤਰੋ ਕਿ ਲੱਡੂਆਂ ਦਾ ਮੀਂਹ ਵਰ੍ਹਦਾ।

ਨਿਕੰਮੇ ਅਧਿਕਾਰੀਆਂ ਤੇ ਕਰਮਚਾਰੀਆਂ ਦੀ ਕਰੇਗੀ ਛੁੱਟੀ ਪੰਜਾਬ ਸਰਕਾਰ- ਇਕ ਖ਼ਬਰ
ਜੇ ਇਹ ਨਿਕੰਮੇ ਸੀ ਤਾਂ ਹੁਣ ਤਾਈਂ ਤੁਸੀਂ ਛੁਣਛੁਣੇ ਵਜਾਉਂਦੇ ਸੀ, ਸਰਕਾਰ ਜੀ।

ਜੇ ਚੀਨ ਹਾਂਗਕਾਂਗ ਦੇ ਲੋਕਾਂ ਨੂੰ ਡਰਾਏਗਾ ਤਾਂ ਬ੍ਰਿਟੇਨ ਚੁੱਪ ਕਰ ਕੇ ਨਹੀਂ ਬੈਠੇਗਾ- ਬੋਰਿਸ ਜਾਨਸਨ
ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ।

ਸਿੱਧੂ ਮੂਸੇਵਾਲ਼ਾ ਨਾਭਾ ਪੁਲਿਸ ਦੀਆਂ ਅੱਖਾਂ 'ਚ ਘੱਟਾ ਪਾ ਕੇ ਥਾਣੇ 'ਚੋਂ ਚਲਾ ਗਿਆ- ਇਕ ਖ਼ਬਰ
ਨਹੀਂ ਭਾਈ ਇੰਜ ਨਹੀਂ, ਪੁਲਿਸ ਨੇ ਆਪਣੀਆਂ ਅੱਖਾਂ 'ਚ ਘੱਟਾ ਆਪ ਪਾਇਐ।