03 Nov. 2019

ਪਾਕਿਸਤਾਨ ਵਲੋਂ ਮੋਦੀ ਦੇ ਜਹਾਜ਼ ਨੂੰ ਲਾਂਘਾ ਦੇਣ ਤੋਂ ਨਾਂਹ- ਇਕ ਖ਼ਬਰ
ਅਸਾਂ ਜੇਠ ਨੂੰ ਲੱਸੀ ਨਹੀਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਸਿੱਖਾਂ ਦੇ ਯੋਗਦਾਨ ਸਬੰਧੀ ਅਮਰੀਕੀ ਸੰਸਦ 'ਚ ਮਤਾ ਪੇਸ਼-ਇਕ ਖ਼ਬਰ
ਪੰਥ ਤੇਰੇ ਦੀਆਂ ਗੂੰਜਾਂ, ਦਿਨੋਂ ਦਿਨ ਪੈਣਗੀਆਂ।

ਕਰਤਾਰ ਪੁਰ ਲਾਂਘੇ ਦੇ ਨਾਇਕ ਇਮਰਾਨ ਖ਼ਾਨ 'ਤੇ ਨਵਜੋਤ ਸਿੱਧੂ ਹਨ- ਹਰਪਾਲ ਸਿੰਘ ਵੇਰਕਾ
ਕਾਦਰਯਾਰ ਕੀ ਸਿੱਧਾਂ ਦੀ ਸਿਫ਼ਤ ਕਰੀਏ, ਬਣ ਬੈਠੇ ਨੇ ਕਈ ਜਮਾਇਤਾਂ ਦੇ।

ਅਯੁੱਧਿਆ ਕੇਸ: ਮੁਸਲਮਾਨਾਂ ਨੂੰ ਸੰਵਿਧਾਨ ਅਤੇ ਨਿਆਂਪਾਲਿਕਾ 'ਚ ਭਰੋਸਾ ਰੱਖਣ ਦਾ ਸੱਦਾ-ਇਕ ਖ਼ਬਰ
ਜੇ ਮਾਏਂ ਕੁਝ ਦਿਸਦਾ ਹੋਵੇ, ਥੋੜ੍ਹਾ ਕਰਾਂ ਅੰਦੇਸਾ।

ਕੇਂਦਰ ਸਰਕਾਰ ਦੇ ਵਿਉਪਾਰ ਸਬੰਧੀ ਨਵੇਂ ਸਮਝੌਤੇ ਨਾਲ਼ ਸੂਬਾ ਤਬਾਹ ਹੋ ਜਾਏਗਾ-ਇਕ ਖ਼ਬਰ
ਕੰਚਨ ਕਾਇਆ ਜੇਹੀ ਖੂਬ ਸੁਹਣੀ, ਲੱਗ ਜਾਣਗੇ ਇਸ ਨੂੰ ਰੋਗ ਬੱਚਾ।

ਅਕਾਲੀ ਦਲ ਨਾਲ਼ ਭਾਜਪਾ ਦਾ ਰਿਸ਼ਤਾ 'ਪਵਿੱਤਰ'- ਪ੍ਰਕਾਸ਼ ਸਿੰਘ ਬਾਦਲ
ਬਾਦਲ ਸਾਬ੍ਹ ਪਤੀ ਪਤਨੀ ਦੇ ਰਿਸ਼ਤੇ ਦਾ ਕੀ ਬਣਿਆ?

ਬਰਤਾਨੀਆ ਦੇ ਯੂਰਪ ਤੋਂ ਤੋੜ ਵਿਛੋੜੇ ਦੀ ਮਿਆਦ 'ਚ 31 ਜਨਵਰੀ ਤੱਕ ਵਾਧਾ- ਇਕ ਖ਼ਬਰ
ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲੀ, ਕੈਂਠੇ ਵਾਲ਼ਾ ਤਿਲਕ ਪਿਆ।

ਕੈਪਟਨ ਸਰਕਾਰ ਵਲੋਂ ਨੌਜਵਾਨਾਂ ਨੂੰ ਦੀਵਾਲੀ 'ਤੇ ਸਮਾਰਟ ਫੋਨ ਦੇਣ ਦਾ ਵਾਅਦਾ ਹੋਇਆ ਠੁੱਸ- ਇਕ ਖ਼ਬਰ
ਹਾਇ ਓਏ ਕੈਪਟਨਾ ਤੇਰੇ ਲਾਰੇ, ਮੁੰਡੇ ਰਹਿ ਗਏ ਫੇਰ ਕੁਆਰੇ।

ਸੱਤਾ ਨੂੰ ਲੈ ਕੇ ਮਹਾਂਰਾਸ਼ਟਰ 'ਚ ਭਾਜਪਾ ਤੇ ਸ਼ਿਵ ਸੈਨਾ ਦਾ ਝਗੜਾ ਵਧਿਆ- ਇਕ ਖ਼ਬਰ
ਕੁੰਢੀਆਂ ਦੇ ਸਿੰਗ ਫ਼ਸ ਗਏ, ਕੋਈ ਨਿੱਤਰੂ ਵੜੇਂਵੇਂ ਖਾਣੀ।

ਵਿਜੀਲੈਂਸ ਅਧਿਕਾਰੀਆਂ ਨੇ ਲਿਆ ਭ੍ਰਿਸ਼ਟਾਚਾਰ ਦੇ ਖਾਤਮੇ ਦਾ ਅਹਿਦ- ਇਕ ਖ਼ਬਰ
ਕੈਪਟਨ ਵਾਲ਼ਾ ਗੁਟਕਾ ਸਾਹਿਬ ਹੱਥਾਂ 'ਚ ਫੜ ਕੇ ਅਹਿਦ ਲੈਣਾ ਸੀ।

ਮਹਿਲਾ ਏ.ਐਸ.ਆਈ ਨੂੰ 50 ਗ੍ਰਾਮ ਹੈਰੋਇਨ ਤੇ ਤੱਕੜੀ ਸਣੇ ਕੀਤਾ ਗ੍ਰਿਫ਼ਤਾਰ- ਇਕ ਖ਼ਬਰ
ਕੀ ਕਰੇਂਗਾ ਏਥੇ ਰੁਕਨਦੀਨਾ, ਜਦ ਵਾੜ ਹੀ ਖੇਤ ਨੂੰ ਖਾਣ ਲੱਗ ਪਈ।

ਫੂਲਕਾ ਨੇ ਸ਼੍ਰੋਮਣੀ ਕਮੇਟੀ ਦੀ ਮਿਆਦ ਨੂੰ ਲੈ ਕੇ ਸੁਖਬੀਰ ਬਾਦਲ ਨੂੰ ਵੰਗਾਰਿਆ-ਇਕ ਖ਼ਬਰ
ਚੁੱਕ ਚਰਖ਼ਾ ਪਰਾਂ੍ਹ ਕਰ ਪੀੜ੍ਹੀ, ਛੜਿਆਂ ਨੇ ਏਥੇ ਬੋਕ ਬੰਨ੍ਹਣਾਂ।

ਪੰਜਾਬ ਦੇ ਮੰਤਰੀਆਂ ਤੇ ਵਿਧਾਇਕਾਂ ਨੂੰ ਪਾਕਿਸਤਾਨ ਦੀ ਜਾਣ ਦੀ ਇਜਾਜ਼ਤ ਕੇਂਦਰ ਨੇ ਨਹੀਂ ਦਿਤੀ-ਇਕ ਖ਼ਬਰ
ਨਾ੍ਹਤੀ ਧੋਤੀ ਰਹਿ ਗਈ ਤੇ ਉੱਤੇ ਮੱਖੀ ਬਹਿ ਗਈ।

ਯੂਰਪੀਨ ਯੂਨੀਅਨ ਦੇ ਸਾਂਸਦਾਂ ਦੇ ਕਸ਼ਮੀਰ ਦੌਰੇ 'ਤੇ ਵਿਰੋਧੀ ਪਾਰਟੀਆਂ ਨੇ ਮੋਦੀ ਨੂੰ ਘੇਰਿਆ- ਇਕ ਖ਼ਬਰ
ਕੀ ਲਗਦੇ ਸੰਤੀਏ ਤੇਰੇ, ਜਿਹਨਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਪ੍ਰਕਾਸ਼ ਪੁਰਬ: ਬਾਦਲ ਵਿਰੋਧੀ ਧੜਿਆਂ ਵਲੋਂ ਵੱਖਰੇ 'ਸਮਾਰੋਹ' ਦਾ ਫ਼ੈਸਲਾ- ਇਕ ਖ਼ਬਰ
ਛੜਿਆਂ ਨੇ ਦਿੱਲੀ ਲੁੱਟੀ, ਦੁਪਹਿਰੇ ਦੀਵਾ ਬਾਲ਼ ਕੇ।

29 Oct. 2019

ਪੰਜਾਬ ਸਰਕਾਰ ਪਾਕਿ ਜਾਣ ਵਾਲੇ ਸ਼ਰਧਾਲੂਆਂ ਦਾ ਖਰਚਾ ਨਹੀਂ ਚੁੱਕ ਸਕੇਗੀ-ਮੰਤਰੀ ਰੰਧਾਵਾ
ਚੁਲ੍ਹੇ ਅੱਗ ਨਾ ਘੜੇ ਦੇ ਵਿਚ ਪਾਣੀ, ਛੜਿਆ ਦੋਜ਼ਖੀਆ।

ਮਹਾਂਰਾਸ਼ਟਰ 'ਚ ਸ਼ਿਵ ਸੈਨਾ ਨੇ ਮੁੱਖ ਮੰਤਰੀ ਦਾ ਅਹੁੱਦਾ ਮੰਗਿਆ- ਇਕ ਖ਼ਬਰ
ਛੜੇ ਜੇਠ ਦਾ ਬੋਕ ਟੁੱਟ ਪੈਣਾ, ਬੱਕਰੀ ਨੂੰ ਰਹੇ ਘੂਰਦਾ।

ਟਰੂਡੋ ਵਲੋਂ ਇਕੱਲਿਆਂ ਹੀ ਘੱਟ ਗਿਣਤੀ ਦੀ ਸਰਕਾਰ ਬਣਾਉਣ ਦੇ ਆਸਾਰ- ਇਕ ਖ਼ਬਰ
ਘੜਾ ਚੁੱਕ ਲਊਂ ਪੱਟਾਂ 'ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਟਰੂਡੋ ਮੁੜ ਕਾਮਯਾਬ, ਜਗਮੀਤ ਸਿੰਘ ਬਣਿਆ ਕਿੰਗ ਮੇਕਰ- ਇਕ ਖ਼ਬਰ
ਨੰਦ ਕੌਰ ਚੰਦ ਕੌਰ ਸਕੀਆਂ ਭੈਣਾਂ, ਬਹਿ ਗਈਆਂ ਪਲੰਘ 'ਤੇ ਚੜ੍ਹ ਕੇ।

ਜਲਾਲਾਬਾਦ ਫਤਿਹ ਕਰਨ ਮਗਰੋਂ ਸੁਖਬੀਰ ਬਾਦਲ ਨੂੰ ਹੱਤਕ ਦੇ ਕੇਸ 'ਚ ਘੇਰਿਆ-ਇਕ ਖ਼ਬਰ
ਮੈਂ ਜਿਹੜੀ ਗੱਲੋਂ ਡਰਦਾ ਸੀ, ਅੱਜ ਉਹੀ ਭਾਣਾ ਵਰਤ ਗਿਆ।

ਜਥੇਦਾਰ ਅਕਾਲ ਤਖ਼ਤ ਦਾ ਫੁਰਮਾਨ ਵਿਵਾਦਾਂ 'ਚ ਘਿਰਿਆ- ਇਕ ਖ਼ਬਰ
ਗਲੀ ਵਿਚੋਂ ਲੰਘੀ ਹੱਸ ਕੇ, ਪੈੜ ਨੱਪਦੇ ਫਿਰਨ ਪਟਵਾਰੀ।

ਸੁਖਪਾਲ ਖਹਿਰਾ ਨੇ ਆਪਣਾ ਅਸਤੀਫ਼ਾ ਵਾਪਸ ਲੈਣ ਨੂੰ ਜਾਇਜ਼ ਦੱਸਿਆ- ਇਕ ਖ਼ਬਰ
ਲੋਕਾਂ ਭਾਣੇ ਸੱਪ ਲੰਘਿਆ, ਤੰਬਾ ਯਾਰ ਦਾ ਫਰਾਟੇ ਮਾਰੇ।

ਕੈਨੇਡਾ ਦੀਆਂ ਚੋਣਾਂ ਵਿਚ ਅੱਧੀ ਦਰਜਨ ਪੰਜਾਬਣਾਂ ਨੇ ਵੀ ਦਿਖਾਇਆ 'ਜਲਵਾ'-ਇਕ ਖ਼ਬਰ
ਗੱਲਾਂ ਹੁੰਦੀਆਂ ਜਹਾਨ ਵਿਚ ਸਾਰੇ , ਨੀਂ ਕੁੜੀਏ ਪੰਜਾਬ ਦੀਏ।

ਯੋਗੀ ਦੇ ਯੂ.ਪੀ. ਵਿਚ ਅਪਰਾਧ ਦੀ ਝੰਡੀ - ਇਕ ਖ਼ਬਰ
ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਭਾਜਪਾ ਨੂੰ ਵੱਡਾ ਝਟਕਾ, ਪੰਜਾਬ 'ਚ ਵੱਡਾ ਭਰਾ ਬਣਨ ਦਾ ਸੁਪਨਾ ਚਕਨਾਚੂਰ- ਇਕ ਖ਼ਬਰ
ਛੜੇ ਬੈਠ ਕੇ ਗਿਣਤੀਆਂ ਕਰਦੇ, ਕੌਣ ਕੌਣ ਹੋਈਆਂ ਰੰਡੀਆਂ।

ਵਿਧਾਨ ਸਭਾ ਚੋਣਾਂ 'ਚ 'ਮੋਦੀ ਲਹਿਰ' ਨੂੰ ਮੋੜਾ- ਇਕ ਖ਼ਬਰ
ਹੱਸਦਿਆਂ ਰਾਤ ਲੰਘੇ, ਪਤਾ ਨਹੀਂ ਸਵੇਰ ਦਾ।

ਕੈਪਟਨ ਨੇ ਸਰਕਾਰੀ ਸ਼ਕਤੀ ਦੀ ਦੁਰਵਰਤੋਂ ਕੀਤੀ- ਸੁਖਬੀਰ ਬਾਦਲ
ਰਾਤੀਂ ਰੋਂਦੀ ਦਾ, ਭਿੱਜ ਗਿਆ ਲਾਲ ਪੰਘੂੜਾ।

'ਆਮ ਆਦਮੀ' ਪਾਰਟੀ ਦੀ ਲਗਾਤਾਰ ਚੌਥੀ ਵਾਰ ਜ਼ਮਾਨਤ ਜ਼ਬਤ-ਇਕ ਖ਼ਬਰ
ਇਸ ਘਰ ਕੋ ਆਗ ਲਗ ਗਈ, ਘਰ ਕੇ ਚਿਰਾਗ਼ ਸੇ।

ਜਲਾਲਾਬਾਦ: ਕਾਂਗਰਸੀਆਂ ਨੇ ਅਕਾਲੀਆਂ ਦੇ ਗੜ੍ਹ 'ਚ ਝੰਡਾ ਗੱਡਿਆ- ਇਕ ਖ਼ਬਰ
ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

21 Oct. 2019

ਮੋਦੀ ਨੂੰ ਅਰਥਚਾਰੇ ਦੀ ਕੋਈ ਸਮਝ ਨਹੀਂ- ਰਾਹੁਲ ਗਾਂਧੀ
ਉਹਦੇ ਨਾਲ ਕੀ ਬੋਲਣਾ ਜਿਹਨੂੰ ਪੱਗ ਬੰਨ੍ਹਣੀਂ ਨਾ ਆਵੇ।

ਕ੍ਰਿਕਟਰ ਭੱਜੀ ਨੇ ਮੋਦੀ ਅਤੇ ਅਮਿਤ ਸ਼ਾਹ ਦੀਆਂ ਸਿਫ਼ਤਾਂ ਦੇ ਪੁਲ਼ ਬੰਨ੍ਹੇ- ਇਕ ਖ਼ਬਰ
ਕਰ ਮੁੰਡਿਆ ਤਿਆਰੀਆਂ ਤੂੰ ਵੀ ਗੋਲ਼ ਬਿਲਡਿੰਗ 'ਚ ਬੈਠਣ ਦੀਆਂ।

ਆਰਥਕ ਘਾਟੇ ਦੇ ਕਾਰਨਾਂ ਲਈ ਪਿਛੋਕੜ 'ਤੇ ਝਾਤ ਜ਼ਰੂਰੀ- ਸੀਤਾਰਮਨ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਭਾਜਪਾ ਦੀ 'ਨਸ਼ੇ ਦੇ ਵਪਾਰੀ ਅਕਾਲੀਆਂ' ਨਾਲ ਪੁੱਗਣੀ ਔਖੀ: ਖੱਟਰ ਦੀ ਦੋ ਟੁੱਕ- ਇਕ ਖ਼ਬਰ
ਤੇਰੇ ਨਾਲ਼ ਨਹੀਂ ਨਿਭਣੀ, ਕਰ ਲੈ ਮੋੜ ਮੁੜਾਈਆਂ।

ਸੁਖਬੀਰ ਬਾਦਲ ਨੇ ਸਜ਼ਾ ਯਾਫ਼ਤਾ ਪੁਲਿਸ ਅਫ਼ਸਰਾਂ ਦੀ ਸਜ਼ਾ ਮੁਆਫ਼ੀ ਦਾ ਕੀਤਾ ਵਿਰੋਧ- ਇਕ ਖ਼ਬਰ
ਜਦੋਂ ਤੁਹਾਡੇ ਬਾਪੂ ਜੀ ਉਹਨਾਂ ਦੇ ਕੇਸ ਸਰਕਾਰੀ ਖ਼ਰਚੇ 'ਤੇ ਲੜਦੇ ਸੀ, ਉਦੋਂ ਕਿਉਂ ਨਾ ਬੋਲੇ?

ਦੋ ਭਾਰਤੀ ਆਰਥਕ ਮਾਹਰਾਂ ਨੂੰ ਨੋਬਲ ਸਨਮਾਨ ਪਰ ਭਾਰਤ ਸਰਕਾਰ ਖ਼ੁਸ਼ ਨਹੀਂ- ਇਕ ਖ਼ਬਰ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਰੌਲ਼ਾ ਗੁਰਬਾਣੀ ਦੇ ਪ੍ਰਸਾਰਨ ਦਾ ਤੇ ਪੀ.ਟੀ.ਸੀ. ਨੇ ਦਿਖਾਈ ਅਕਾਲੀਆਂ ਦੀ ਦਾਖਾ ਰੈਲੀ- ਇਕ ਖ਼ਬਰ
ਹੋਕਾ ਵੰਙਾਂ ਦਾ ਤੇ ਕੱਢ ਦਿਖਾਇਆ ਚੱਕੀਰਾਹਾ।

ਮਨਪ੍ਰੀਤ ਬਾਦਲ ਦਾ ਖ਼ਜ਼ਾਨਾ ਅਫ਼ਸਰਾਂ ਲਈ ਭਰਿਆ ਪਰ ਮੁਲਾਜ਼ਮਾਂ ਲਈ ਖ਼ਾਲੀ- ਇਕ ਖ਼ਬਰ
ਐਰ ਗ਼ੈਰ ਨੂੰ ਸ਼ੱਕਰ ਦਾ ਦਾਣਾ, ਭਗਤੇ ਨੂੰ ਖੰਡ ਪਾ ਦਿਉ।

ਪ੍ਰਕਾਸ਼ ਪੁਰਬ: ਮੁੱਖ ਮੰਤਰੀ ਨੇ ਸਮੁੱਚੇ ਫ਼ੈਸਲੇ ਅਕਾਲ ਤਖ਼ਤ 'ਤੇ ਛੱਡੇ- ਇਕ ਖ਼ਬਰ
ਤੇਰੇ ਅੱਗੇ ਥਾਨ ਸੁੱਟਿਆ, ਚਾਹੇ ਸੁੱਥਣ ਸੰਵਾ ਲੈ ਚਾਹੇ ਲਹਿੰਗਾ।

ਹਲਕਾ ਦਾਖਾ 'ਚ ਚੋਣ ਪ੍ਰਚਾਰ ਸਮੇਂ ਮੁੱਖ ਮੰਤਰੀ 'ਤੇ ਲੋਕਾਂ ਨੇ ਫੁੱਲ ਬਰਸਾਏ- ਇਕ ਖ਼ਬਰ
ਇਹ ਫੁੱਲ ਹੀ ਫਿਰ ਕੰਡੇ ਬਣ ਕੇ ਲੋਕਾਂ ਦੇ ਚੁੱਭਦੇ ਆ ਪਰ ਮਾਨਸਿਕ ਗੁਲਾਮੀ..।

ਬੱਚਿਆਂ ਨੂੰ ਪੇਟ ਭਰ ਰੋਟੀ ਦੇਣ ਦੇ ਮਾਮਲੇ 'ਚ ਭਾਰਤ ਪਾਕਿਸਤਾਨ ਨਾਲ਼ੋਂ ਵੀ ਪਛੜਿਆ-ਗਲੋਬਲ ਹੰਗਰ ਇੰਡੈਕਸ
ਹੋਰ ਅੱਛੇ ਦਿਨ ਕਿਸ ਤਰ੍ਹਾਂ ਦੇ ਹੁੰਦੇ ਐ!

ਬਾਗ਼ੀ ਵਿਧਾਇਕ ਮਾਸਟਰ ਬਲਦੇਵ ਸਿੰਘ ਮੁੜ 'ਆਪ' ਦੇ ਹੋਏ- ਇਕ ਖ਼ਬਰ
ਘਰ ਦੇ ਬੁ-ਘਰ ਨੂੰ ਆਏ।

ਭਾਜਪਾ ਹਰਿਆਣਾ ਚੋਣਾਂ ਜਿੱਤਦੀ ਹੈ ਤਾਂ ਮੈਨੂੰ ਖੁਸ਼ੀ ਹੋਵੇਗੀ-ਸੁਖਬੀਰ ਬਾਦਲ
ਯਾਰ! ਤੇਰਾ ਕੋਈ ਨਹੀਂ ਪਤਾ ਲਗਦਾ ਤੂੰ ਕਿਹੜੇ ਪਾਸੇ ਐਂ।

ਅਰਥਚਾਰੇ ਬਾਰੇ ਮੋਦੀ ਸਰਕਾਰ ਨੇ ਪੰਜ ਸਾਲ ਕੀ ਕੀਤਾ?- ਮਨਮੋਹਨ ਸਿੰਘ
ਮਿੱਟੀ ਨਾ ਫਰੋਲ ਜੋਗੀਆ, ਨਹੀਂ ਲੱਭਣੇ ਲਾਲ ਗੁਆਚੇ।

ਨਿਵੇਸ਼ ਲਈ ਭਾਰਤ ਤੋਂ ਚੰਗੀ ਹੋਰ ਕੋਈ ਥਾਂ ਨਹੀਂ-ਸੀਤਾਰਮਨ
ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜੀਣ।

14 Oct. 2019

ਭਾਰਤ ਨਾਲ ਗੱਲਬਾਤ ਦਾ ਫਿਲਹਾਲ ਸਵਾਲ ਹੀ ਨਹੀਂ- ਇਮਰਾਨ
ਮੈਨੂੰ ਨਾ ਬੁਲਾਇਓ ਕੁੜੀਓ, ਜੀਅ ਨਹੀਂ ਮੇਰਾ ਟਿਕਾਣੇ।

ਚਿਤਾਵਨੀ ਦੇ ਬਾਵਜੂਦ ਪਾਕਿਸਤਾਨ ਨੇ ਅਤਿਵਾਦੀਆਂ ਖ਼ਿਲਾਫ਼ ਕਾਰਵਾਈ ਨਹੀਂ ਕੀਤੀ-ਇਕ ਖ਼ਬਰ
ਸਿਰ ਫੌਜ ਦੇ ਰਿਹਾ ਨਾ ਕੋਈ ਕੁੰਡਾ, ਹੋਏ ਸ਼ੁਤਰ ਜਿਉਂ ਬਾਝ ਮੁਹਾਰ ਮੀਆਂ।

ਰਾਫੇਲ ਦੀ ਰਖਿਆ ਕਈ ਨਿੰਬੂ ਲਾਉਣਾ ਭਾਰਤੀ ਸਭਿਆਚਾਰ ਦਾ ਹਿੱਸਾ- ਸੀਤਾਰਮਨ
ਫਿਰ ਬਾਰਡਰ 'ਤੇ ਵੀ ਨਿੰਬੂਆਂ ਦੀ ਵਾੜ ਕਰ ਦਿਉ ਬੀਬੀ ਜੀ, ਅਰਬਾਂ ਦਾ ਬਜਟ ਬਚਾਉ।

ਪਾਨਾਮਾ ਪੇਪਰ: ਟੈਕਸ ਚੋਰਾਂ ਦੇ ਨਾਮ ਦੱਸਣ ਤੋਂ ਨਾਂਹ ਕਰ ਸਕਦਾ ਹੈ ਈ.ਡੀ.- ਸੂਚਨਾ ਕਮਿਸ਼ਨਰ ਜੁਲਕਾ
ਓਹੀ ਤੇਰੀ ਤੁਣਤੁਣੀ, ਉਹੀਓ ਤੇਰਾ ਰਾਗ।

ਭਾਰਤ 'ਤੇ ਸਭ ਤੋਂ ਜ਼ਿਆਦਾ ਗਲੋਬਲ ਮੰਦੀ ਦਾ ਅਸਰ ਦਿਖ਼ਾਈ ਦੇਣ ਲੱਗਾ- ਇਕ ਖ਼ਬਰ
ਰਾਤੀਂ ਧਾੜ ਪਈ, ਲੁੱਟਿਆ ਤਖ਼ਤ ਹਜ਼ਾਰਾ।

ਸਾਡੇ ਨੇਤਾ ਸਾਨੂੰ ਛੱਡ ਗਏ, ਕਾਂਗਰਸ ਮਾੜੇ ਦੌਰ 'ਚ- ਖ਼ੁਰਸ਼ੀਦ
ਕਾਫ਼ ਕਰਮ ਜਦ ਬੰਦੇ ਦੇ ਹੋਣ ਮਾੜੇ, ਭਾਵੇਂ ਸਿਰ 'ਤੇ ਲਾਲਾਂ ਦੀ ਪੰਡ ਹੋਵੇ।

ਚੀਨ ਅਤੇ ਪਾਕਿ ਦੀ ਦੋਸਤੀ ਅਟੁੱਟ ਅਤੇ ਚਟਾਨ ਵਰਗੀ ਮਜ਼ਬੂਤ- ਚੀਨੀ ਰਾਸ਼ਟਰਪਤੀ
ਕੁੜੀਏ ਹਾਣ ਦੀਏ, ਆ ਜਾ ਕਰੀਏ ਦਿਲਾਂ ਦੇ ਸੌਦੇ।

ਸਰਕਾਰੀ ਮਾਲੀਆ ਘਟਣ ਨਾਲ਼ 'ਮੋਤੀਆਂ ਵਾਲ਼ੀ' ਸਰਕਾਰ 'ਚ ਕੰਬਣੀ ਛਿੜੀ- ਇਕ ਖ਼ਬਰ
ਮੈਂ ਤਾਂ ਹੋ ਗਈ ਹਕੀਮ ਜੀ, ਅੱਗੇ ਨਾਲ਼ੋਂ ਤੰਗ।

ਡੈਨਮਾਰਕ ਜਾਣ ਲਈ ਕੇਂਦਰ ਸਰਕਾਰ ਨੇ ਕੇਜਰੀਵਾਲ ਨੂੰ ਇਜਾਜ਼ਤ ਨਹੀਂ ਦਿਤੀ-ਇਕ ਖ਼ਬਰ
ਹੁਣ ਰੱਬ ਡਾਢਾ ਵੀ ਡਰਿਆ, ਠਾਣੇਦਾਰਾਂ ਤੋਂ।

ਸ਼੍ਰੋਮਣੀ ਕਮੇਟੀ ਨੇ ਵੱਖਰੀ ਸਟੇਜ ਲਗਾਉਣ ਦਾ ਐਲਾਨ ਕਰ ਦਿਤਾ- ਇਕ ਖ਼ਬਰ
ਬਾਪੂ ਵੇ ਅੱਡ ਹੁੰਨੀ ਆਂ......................

ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਨੇ ਟਰੰਪ ਤੋਂ ਕੂਟਨੀਤਕ ਸਹਾਇਤਾ ਮੰਗੀ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਸ਼੍ਰੋਮਣੀ ਕਮੇਟੀ ਮੋਹਨ ਭਾਗਵਤ ਦੀ ਭਗਵਾਂਕਰਨ ਦੀ ਸੋਚ ਦਾ ਡਟ ਕੇ ਵਿਰੋਧਤਾ ਕਰੇਗੀ-ਲੌਂਗੋਵਾਲ
ਹੁਕਮ ਜੋ ਉੱਪਰੋਂ ਆਵੇਗਾ, ਉਸ 'ਤੇ ਫੁੱਲ ਚੜ੍ਹਾਵਾਂਗੇ।

ਮੰਦੀ ਦੇ ਸਵਾਲ 'ਤੇ ਵਿਤ ਮੰਤਰੀ ਸੀਤਾਰਮਨ ਨੇ ਚੁੱਪ ਧਾਰੀ- ਇਕ ਖ਼ਬਰ
ਚੋਰ ਦੀ ਮਾਂ, ਕੋਠੀ 'ਚ ਮੂੰਹ।

ਸ਼੍ਰੋਮਣੀ ਕਮੇਟੀ ਵੱਖਰੇ ਤੌਰ 'ਤੇ ਮਨਾਏਗੀ ਸ਼ਤਾਬਦੀ ਸਮਾਗਮ- ਜਗੀਰ ਕੌਰ
ਪਿੱਪਲਾਂ ਹੇਠ ਦੀ ਜਾਵੇ, ਪੈੜ ਜਗੀਰੋ ਦੀ।

ਰਾਜਨਾਥ ਵਲੋਂ ਫਰਾਂਸ ਫੇਰੀ ਲਾਹੇਵੰਦ ਕਰਾਰ-ਇਕ ਖਬਰ
ਫਰਾਂਸ ਆਪਣੇ ਜੰਗੀ ਜਹਾਜ਼ਾਂ ਲਈ ਭਾਰਤ ਤੋਂ ਮੰਤਰੇ ਹੋਏ ਨਿੰਬੂ ਮੰਗਵਾਏਗਾ।

07 Oct. 2019

ਹਿੰਦੀ ਭਾਸ਼ਾ ਵਿਵਾਦ ਮਗਰੋਂ ਮੋਦੀ ਵਲੋਂ ਤਾਮਿਲ ਭਾਸ਼ਾ ਦੀਆਂ ਸਿਫ਼ਤਾਂ- ਇਕ ਖ਼ਬਰ
ਗੰਗਾ ਗਏ ਗੰਗਾ ਰਾਮ, ਜਮਨਾ ਗਏ ਜਮਨਾ ਦਾਸ।

ਪ੍ਰਤਾਪ ਸਿੰਘ ਬਾਜਵਾ ਖ਼ਿਲਾਫ਼ ਲਾਮਬੰਦ ਹੋਣ ਲੱਗੇ ਕਾਂਗਰਸੀ ਆਗੂ- ਇਕ ਖ਼ਬਰ
ਗਿੱਟਿਆਂ ਤੋਂ ਛਾਂਗ ਸੁੱਟਣਾ, ਅਸੀਂ ਆਪਣੇ ਬਰੋਬਰ ਕਰਨਾ।

ਸ਼੍ਰੋਮਣੀ ਕਮੇਟੀ ਨਾਲ ਮੱਤਭੇਦ ਨਹੀਂ, ਅਕਾਲੀ ਦਲ ਨਾਲ਼ ਜ਼ਰੂਰ ਹਨ-ਸੁਖਜਿੰਦਰ ਸਿੰਘ ਰੰਧਾਵਾ
ਮੈਨੂੰ ਦਿਉਰ ਤੋਂ ਡਰ ਨਾ ਕੋਈ, ਜੇਠ ਭੈੜਾ ਰਹੇ ਘੂਰਦਾ।

ਬਾਬਾ ਨਾਨਕ ਜੀ ਦੇ ਪ੍ਰਕਾਸ਼ ਪੁਰਬ ਦੇ ਸਮਾਗਮ ਸਮੇਂ ਸਟੇਜ ਉੱਪਰ ਕੋਈ ਕੁਰਸੀ ਨਹੀਂ ਲੱਗੇਗੀ- ਲੌਂਗੋਵਾਲ
ਮੰਨਿਆਂ ਨਹੀਂ ਲੱਗਣਗੀਆਂ ਸਟੇਜ 'ਤੇ ਕੁਰਸੀਆਂ ਪਰ ਧੌਣਾਂ 'ਚ ਅੜੀਆਂ ਹੋਈਆਂ ਦਾ ਕੀ ਕਰੋਗੇ?

ਤਿਹਾੜ ਜੇਲ੍ਹ 'ਚ ਬੰਦ ਚਿਦੰਬਰਮ ਨੇ ਮੋਦੀ ਸਰਕਾਰ ਨੂੰ ਕੀਤਾ ਸਵਾਲ- ਇਕ ਖ਼ਬਰ
ਕਿਉਂ ਕਰਦਾਂ ਏਂ ਬਦੀਆਂ, ਕੈ ਦਿਨ ਦੀ ਜ਼ਿੰਦਗਾਨੀ?

ਸੰਗਤ ਦੀ ਕਚਹਿਰੀ ਵਿਚ ਬਾਦਲਾਂ ਦੇ ਪੋਤੜੇ ਫਰੋਲਾਂਗੇ-ਜੀ.ਕੇ.
ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

ਅਕਾਲੀ ਭਾਜਪਾ ਦਾ ਰਿਸ਼ਤਾ ਚੱਟਾਨ ਦੀ ਤਰ੍ਹਾਂ ਮਜਬੂਤ- ਸ਼ਵੇਤ ਮਲਿਕ
ਪੰਜਾਬ 'ਚ ਚੱਟਾਨ ਤੇ ਹਰਿਆਣੇ 'ਚ ਗੋਹਾ।

ਵੈਸ਼ਨੋ ਦੇਵੀ ਪਹੁੰਚੇ ਨਵਜੋਤ ਸਿੱਧੂ ਨਾਲ ਸ਼ਿਵ ਸੈਨਿਕਾਂ ਨੇ ਕੀਤੀ ਧੱਕਾ-ਮੁੱਕੀ- ਇਕ ਖ਼ਬਰ
ਰਾਹੀਆਂ ਨੇ ਰਾਤ ਕੱਟਣੀ, ਤੇਰੀ ਚੁੱਕ ਨਾ ਮਸੀਤ ਲਿਜਾਣੀ।

ਪੰਜਾਬ ਕਾਂਗਰਸ ਦੇ ਬਹੁਤੇ ਆਗੂ ਭਾਜਪਾ 'ਚ ਆਉਣ ਲਈ ਕਾਹਲ਼ੇ- ਸ਼ਵੇਤ ਮਲਿਕ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਹਰਿਆਣਾ 'ਚ ਅਕਾਲੀ ਦਲ ਨੇ ਬਲਕੌਰ ਸਿੰਘ ਦੇ ਬਦਲੇ ਭਾਜਪਾ ਦੇ ਹਲਕਾ ਇੰਚਾਰਜ ਨੂੰ ਪੱਟ ਲਿਆ-ਇਕ ਖ਼ਬਰ
ਮੁੰਡਾ ਕੱਚੀ ਉਮਰੇ ਕਮਾਲ ਕਰ ਗਿਆ ਨੀਂ, ਸੁੱਤੀ ਪਈ ਦੇ ਸਿਰ੍ਹਾਣੇ ਰੁਮਾਲ ਧਰ ਗਿਆ ਨੀਂ।

ਦੁਨੀਆਂ ਦੀ ਕੋਈ ਤਾਕਤ ਚੀਨ ਨੂੰ ਅੱਗੇ ਵਧਣ ਤੋਂ ਰੋਕ ਨਹੀਂ ਸਕਦੀ-ਜ਼ਿੰਨਪਿੰਗ
ਬੱਚੀਆਂ ਪਾਉਂਦਾ ਰਹਿੰਦਾ, ਨੀਂ ਮੁੰਡਾ ਮੁਟਿਆਰ ਦੀਆਂ।

ਹਰਿਆਣਾ ਵਿਚ ਅਕਾਲੀਆਂ ਨੇ ਇਨੈਲੋ ਨਾਲ਼ ਕੀਤਾ ਗੱਠਜੋੜ- ਇਕ ਖ਼ਬਰ
ਮਰਦੀ ਨੇ ਅੱਕ ਚੱਬਿਆ, ਹਾਰ ਕੇ ਜੇਠ ਨਾਲ਼ ਲਾਈਆਂ।

ਬਾਦਲਾਂ ਦੇ ਫ਼ੈਸਲੇ 'ਤੇ ਕੈਪਟਨ ਸਰਕਾਰ ਨੇ ਫੁੱਲ ਚੜ੍ਹਾਏ-ਇਕ ਖ਼ਬਰ
ਸੱਦੀ ਹੋਈ ਮਿੱਤਰਾਂ ਦੀ, ਨੀਂ ਮੈਂ ਪੈਰ ਜੁੱਤੀ ਨਾ ਪਾਵਾਂ।

ਰਾਹੁਲ ਦੇ ਹਟਣ ਨਾਲ ਯੂਥ ਕਾਂਗਰਸ ਦੀ ਬਹੁਤੀ ਪੁੱਛ ਨਾ ਰਹੀ-ਇਕ ਖ਼ਬਰ
ਚੁੱਕ ਚਾਦਰਾ ਚਰ੍ਹੀ ਵਿਚ ਚਲੀਏ, ਮੱਕੀ ਵਿਚ ਪੱਛ ਲੜਦੇ।

ਪੁਲਿਸ ਦਾ ਮੁਢਲਾ ਫਰਜ਼ ਜੰਨਤਾ ਨੂੰ ਇਨਸਾਫ਼ ਤੇ ਕਾਨੂੰਨੀ ਕਦਰਾਂ ਕੀਮਤਾਂ ਦੀ ਬਰਕਰਾਰੀ-ਪ੍ਰਕਾਸ਼ ਸਿੰਘ ਬਾਦਲ
ਨੌਂ ਸੌ ਚੂਹੇ ਖਾ ਕੇ ਬਿੱਲੀ ਹੱਜ ਨੂੰ ਚੱਲੀ। 

30 September 2019

ਟਰੰਪ ਨੇ ਭਾਰਤ ਪਾਕਿ ਵਿਚੋਲਗੀ ਦੇ ਮੁੱਦੇ 'ਤੇ ਕੱਟਿਆ ਕੂਹਣੀ ਮੋੜ-ਇਕ ਖ਼ਬਰ
ਯਾਰੀ ਲੱਗੀ 'ਤੇ ਲਵਾ 'ਤੇ ਤਖ਼ਤੇ, ਟੁੱਟੀ 'ਤੇ ਚੁਗਾਠ ਪੁੱਟ ਲਈ।

ਪ੍ਰਕਾਸ਼ ਪੁਰਬ ਸਾਂਝੇ ਤੌਰ'ਤੇ ਮਨਾਉਣ ਦੇ ਯਤਨਾਂ ਨੂੰ ਢਾਅ ਲੱਗੀ- ਇਕ ਖ਼ਬਰ
ਮੋੜੀਂ ਮੋੜੀਂ ਵੇ ਗੁਲਜ਼ਾਰੀ, ਭੇਡਾਂ ਦੂਰ ਗਈਆਂ।

ਬਾਦਲਾਂ ਨੂੰ ਬਚਾਉਣ ਲਈ ਕਿਸੇ ਹੱਦ ਤੱਕ ਵੀ ਜਾ ਸਕਦੇ ਹਨ ਕੈਪਟਨ- ਖਹਿਰਾ
ਕਾਲ਼ੀ ਗਾਨੀ ਮਿੱਤਰਾਂ ਦੀ, ਰਾਤੀਂ ਟੁੱਟ ਗਈ ਨੀਂਦ ਨਾ ਆਈ।

ਜੇ ਲੋੜ ਲਈ ਤਾਂ ਅਗਲੀਆਂ ਵਿਧਾਨ ਸਭਾ ਚੋਣਾਂ ਵੀ ਲੜਾਂਗਾ- ਕੈਪਟਨ
ਬਈ ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਕਸ਼ਮੀਰ ਮੁੱਦੇ 'ਤੇ ਭਾਰਤ ਨਾਲ਼ ਜੰਗ ਹੋ ਸਕਦੀ ਹੈ-ਇਮਰਾਨ
ਮੌਤੋਂ ਕੀ ਡਰਨਾ, ਬੋਤਾ ਪਾ ਲਿਆ ਚੁੜੇਲਾਂ ਵਾਲ਼ੀ ਸੜਕੇ।

ਹੈਰਾਨ ਹਾਂ ਬਾਦਲਕਿਆਂ ਨੇ ਦਸ ਸਾਲ ਸਰਕਾਰ ਕਿਵੇਂ ਚਲਾਈ-ਕੈਪਟਨ
ਸ਼ੌਂਕ ਗੱਭਰੂਆਂ ਦੇ, ਤੂੰ ਕੀ ਜਾਣਦੀ ਭੇਡੇ।

ਟਰੰਪ ਵਲੋਂ ਮੋਦੀ ਨੂੰ ਭਾਰਤ ਦਾ ਪਿਤਾ ਕਹਿਣ 'ਤੇ ਵਿਵਾਦ-ਇਕ ਖ਼ਬਰ
ਬੋਦੀ ਵਾਲ਼ਾ ਤਾਰਾ ਚੜ੍ਹਿਆ, ਘਰ ਘਰ ਹੋਣ ਵਿਚਾਰਾਂ।

ਦਿੱਲੀ ਤਖ਼ਤ ਅੱਗੇ ਨਹੀਂ ਝੁਕਾਂਗਾ- ਸ਼ਰਦ ਪਵਾਰ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਕਸ਼ਮੀਰ ਬਾਰੇ ਵਿਚੋਲਗੀ ਕਰ ਕੇ ਮੈਂ ਭਾਰਤ ਤੇ ਪਾਕਿ ਦੀ ਮਦਦ ਕਰਨੀ ਚਾਹੁੰਦਾ ਹਾਂ-ਟਰੰਪ
ਇਹ ਤਾਂ ਬਈ ਇੰਜ ਐ ਜਿਵੇਂ ਬਘਿਆੜ ਕਹੇ ਕਿ ਲੇਲਿਆਂ ਦਾ ਜਨਮ ਦਿਨ ਮੈਂ ਮਨਾਉਂ।

ਹਰਿਆਣਾ ਚੋਣਾਂ:ਅਕਾਲੀਆਂ ਤੇ ਭਾਜਪਾ ਦਾ ਗੱਠਜੋੜ ਟੁੱਟਿਆ ਤੜੱਕ ਕਰ ਕੇ- ਇਕ ਖ਼ਬਰ
ਮੇਰੀ ਲਗਦੀ ਕਿਸੇ ਨਾ ਦੇਖੀ ਕਿ ਟੁੱਟਦੀ ਨੂੰ ਜੱਗ ਜਾਣਦਾ।

ਦੇਸ਼ ਆਰਥਕ ਪੱਖੋਂ ਬੇਹਾਲ, ਸਰਕਾਰ ਤਮਾਸ਼ੇ ਵਿਚ ਮਸਤ-ਕਮਿਊਨਿਸਟ ਨੇਤਾ ਯੇਚੁਰੀ
ਸਿਆਲ਼ਾਂ ਦੇ ਵਿਹੜੇ ਨਿੰਮ ਜੋ, ਉਹਦੇ ਪੱਤ ਗਏ ਕੁਮਲਾਅ।

ਪੰਜਾਬ ਸਰਕਾਰ ਨੇ ਵਿਦਿਆਰਥੀਆਂ ਦੇ ਫੰਡ ਦੇ ਵਿਆਜ 'ਤੇ ਰੱਖੀ ਅੱਖ- ਇਕ ਖ਼ਬਰ
ਮੂੰਹ ਦਾ ਮਿੱਠੜਾ ਮੁੰਡਾ, ਦਿਲ 'ਚ ਰੱਖੇ ਬੇਈਮਾਨੀ।

ਭਾਜਪਾ ਨੇ ਗੱਠਜੋੜ ਦਾ ਧਰਮ ਤੋੜਿਆ ਅਤੇ ਵਿਸ਼ਵਾਸਘਾਤ ਕੀਤਾ-ਸੁਖਬੀਰ ਬਾਦਲ
ਲਾ ਕੇ ਦੋਸਤੀਆਂ, ਪਾ ਗਈ ਚੁੱਲ੍ਹੇ ਵਿਚ ਪਾਣੀ।

25 September 2019

ਹਰਿਆਣਾ 'ਚ ਅਕਾਲੀ ਤੇ ਭਾਜਪਾ ਮਿਲ ਕੇ ਚੋਣਾਂ ਲੜਨ- ਪ੍ਰਕਾਸ਼ ਸਿੰਘ ਬਾਦਲ
ਕਹੇ ਬਾਣੀਆ ਥੜ੍ਹੇ 'ਤੋਂ ਪਰੇ ਹੋ ਜਾ, ਜੱਟ ਕਹਿੰਦਾ ਘੱਟ ਤੋਲੀਂ ਨਾ।

ਹਿੰਦੀ ਦਿਵਸ 'ਤੇ ਡਾ. ਤੇਜਵੰਤ ਮਾਨ ਨਾਲ਼ ਬਦਕਲਾਮੀ ਕਰਨ ਵਾਲ਼ੇ ਲੇਖ਼ਕਾਂ ਨੇ ਮੰਗੀ ਮੁਆਫ਼ੀ- ਇਕ ਖ਼ਬਰ
ਬੜ੍ਹਕਾਂ ਮਾਰਦੇ ਓ, ਸਾਨ੍ਹ ਹੁੰਨੇ ਆ।ਹੁਣ ਮੋਕ ਮਾਰਦੇ ਓ, ਗਊ ਦੇ ਜਾਏ ਆਂ।

ਨਰਿੰਦਰ ਮੋਦੀ ਵਰਗਾ ਸਮਰੱਥ ਅਤੇ ਸੂਝਵਾਨ ਪ੍ਰਧਾਨ ਮੰਤਰੀ ਨਹੀਂ ਦੇਖਿਆ-ਪ੍ਰਕਾਸ਼ ਸਿੰਘ ਬਾਦਲ
ਤੁਹਾਡੇ ਵਰਗਾ ਵੀ ਲੂੰਬੜ ਮੁੱਖ ਮੰਤਰੀ ਨਹੀਂ ਦੇਖਿਆ ਬਾਦਲ ਸਾਹਿਬ।

ਵਿਤ ਮੰਤਰੀ ਸੀਤਾਰਮਨ ਵਲੋਂ ਕੰਪਨੀਆਂ ਨੂੰ ਡੇਢ ਲੱਖ ਕਰੋੜ ਰੁਪਏ ਦੀਆਂ ਰਿਆਇਤਾਂ- ਇਕ ਖ਼ਬਰ
ਅੰਨ੍ਹਾ ਵੰਡੇ ਰਿਉੜੀਆਂ.........................

'ਹਾਊਡੀ ਮੋਦੀ' ਪ੍ਰੋਗਰਾਮ ਦੇਸ਼ ਦੀ ਮੰਦੀ ਆਰਥਿਕ ਹਾਲਤ ਨੂੰ ਨਹੀਂ ਲੁਕਾ ਸਕਦਾ-ਰਾਹੁਲ ਗਾਂਧੀ
ਨਿੰਮ ਨਾਲ਼ ਝੂਟਦੀਏ, ਤੋਤਾ ਪੀ ਗਿਆ ਗੁਲਾਬੀ ਰੰਗ ਤੇਰਾ।

ਮਕਬੂਜ਼ਾ ਕਸ਼ਮੀਰ ਦੀ ਹੋਂਦ ਲਈ ਨਹਿਰੂ ਜ਼ਿੰਮੇਵਾਰ- ਅਮਿਤ ਸ਼ਾਹ
ਟੁੱਟ ਪੈਣੇ ਦਰਜੀ ਨੇ, ਫਿੱਟ ਸੂਟ ਨਾ ਸੀਤਾ।

80 ਰੁਪਏ ਕਿੱਲੋ ਤੱਕ ਪੁੱਜਿਆ ਗੰਢਿਆਂ ਦਾ ਭਾਅ-ਇਕ ਖ਼ਬਰ
ਮਾਰ ਲੈ ਪੁੱਠੀਆਂ ਛਾਲ਼ਾਂ, 'ਅੱਛੇ ਦਿਨ' ਆ ਗਏ ਮਿੱਤਰਾ।

ਲਿਬਰਲ ਪਾਰਟੀ ਨੂੰ ਜਗਮੀਤ ਸਿੰਘ ਦੀਆਂ ਸ਼ਰਤਾਂ ਪ੍ਰਵਾਨ- ਇਕ ਖ਼ਬਰ
ਤੇਰੀਆਂ ਮੈਂ ਲੱਖ ਮੰਨੀਆਂ, ਮੇਰੀ ਇਕ ਤੂੰ ਮੰਨੇ ਤਾਂ ਜਾਣਾ।

ਨੌਂ ਲੱਖ ਨੌਕਰੀਆਂ ਦੇਣ ਦੇ ਅੰਕੜੇ ਤੋਂ ਭੱਜਣ ਲੱਗੀ ਪੰਜਾਬ ਸਰਕਾਰ- ਇਕ ਖ਼ਬਰ
ਕਿੱਲੀ ਉੱਤੇ ਟੰਗਿਆ ਰਿਹਾ, ਜੱਗੇ ਜੱਟ ਦਾ ਜਾਂਘੀਆ ਪੱਟ ਦਾ।

ਪੰਜਾਬ ਨੂੰ ਬਚਾਉਣ ਲਈ ਲੋਕ ਹੱਕਾਂ ਨੂੰ ਬਚਾਉਣਾ ਜ਼ਰੂਰੀ- ਡਾ. ਜੌਹਲ
ਝਾਕਦੀ ਦੀ ਅੱਖ ਪੱਕ ਗਈ, ਕਦੀ ਪਾ ਵਤਨਾਂ ਵਲ ਫੇਰਾ।

ਉਧਾਰ ਲਏ ਜਹਾਜ਼ ਰਾਹੀਂ ਅਮਰੀਕਾ ਪਹੁੰਚੇ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ- ਇਕ ਖ਼ਬਰ
ਬਾਂਕਾਂ ਨਾ ਜੁੜੀਆਂ, ਰੰਨ ਅੱਡੀਆਂ ਕੂਚਦੀ ਮਰ ਗਈ।

ਭਗਵੇਂ ਕੱਪੜੇ ਪਾ ਕੇ ਲੋਕ ਜਬਰ ਜਨਾਹ ਕਰ ਰਹੇ ਹਨ- ਦਿੱਗਵਿਜੈ ਸਿੰਘ
ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ ,ਜੇ ਮਨ ਰੰਗਿਆ ਨਾ ਜਾਵੇ।

ਹਰਿਆਣਾ 'ਚ ਅਕਾਲੀ ਦਲ ਨਾਲ਼ ਗੱਠਜੋੜ ਸਬੰਧੀ ਭਾਜਪਾ ਨੇ ਖ਼ਾਮੋਸ਼ੀ ਧਾਰੀ- ਇਕ ਖ਼ਬਰ
ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ, ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

ਡੀ.ਸੀ. ਨਾਲ ਮਾਮਲੇ 'ਚ ਬੈਂਸ ਨੂੰ ਰਾਹਤ ਨਹੀਂ, ਜ਼ਮਾਨਤ ਦੀ ਅਪੀਲ ਰੱਦ- ਇਕ ਖ਼ਬਰ
ਬੱਚੀਆਂ ਪਾਉਂਦਾ ਰਹਿੰਦਾ ਨੀਂ, ਮੁੰਡਾ ਮੁਟਿਆਰ ਦੀਆਂ।

ਮੋਦੀ ਲਈ ਹਵਾਈ ਲਾਂਘਾ ਖੋਲ੍ਹਣ ਲਈ ਭਾਰਤ ਦੀ ਅਪੀਲ ਪਾਕਿ ਵਲੋਂ ਰੱਦ- ਇਕ ਖ਼ਬਰ
ਹੱਟੀ ਖੋਲ੍ਹ ਹੱਟੀ ਵਾਲਿਆ, ਸਾਡੇ ਛੜੇ ਨੇ ਪਤਾਸੇ ਲੈੇਣੇ।

ਸਿੱਖ ਕੈਦੀਆਂ ਦੀ ਰਿਹਾਈ ਲਈ ਸੁਖਬੀਰ ਬਾਦਲ ਨੇ ਮੋਦੀ ਨੂੰ ਪੱਤਰ ਲਿਖਿਆ- ਇਕ ਖ਼ਬਰ
ਕਿਉਂ ਪਿਛਲੇ ਦਸ ਸਾਲ ਪੈੱਨ 'ਚੋਂ ਸਿਆਹੀ ਮੁੱਕੀ ਹੋਈ ਸੀ।

16 September 2019

ਆਗਾਮੀ ਚੋਣਾਂ ਵਿਚ ਮਨੋਹਰ ਲਾਲ ਖੱਟੜ ਦੀ ਛੁੱਟੀ ਕਰੇਗੀ ਜੰਤਾ- ਕੁਮਾਰੀ ਸ਼ੈਲਜਾ
ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਦੀ ਜ਼ਮਾਨਤ ਪਟੀਸ਼ਨ ਰੱਦ- ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨੀਂ ਚੱਪਣੀ ਵਗਾਹ ਕੇ ਮਾਰੀ।

ਮੈਨੂੰ ਅਰਥਚਾਰੇ ਦੀ ਚਿੰਤਾ, ਰੱਬ ਦੇਸ਼ ਦੀ ਰਾਖੀ ਕਰੇ- ਚਿਦੰਬਰਮ
ਨਿੱਤ ਖ਼ੈਰ ਮੰਗਾਂ ਸੋਹਣਿਆਂ ਮੈਂ ਤੇਰੀ, ਦੁਆ ਨਾ ਕੋਈ ਹੋਰ ਮੰਗਦੀ।

ਅਕਾਲ ਤਖ਼ਤ ਨੂੰ ਕਮਜ਼ੋਰ ਕਰਨ ਦੇ ਯਤਨ 'ਚ ਹੈ ਕੈਪਟਨ ਸਰਕਾਰ- ਹਰਸਿਮਰਤ ਬਾਦਲ
ਅਕਾਲ ਤਖ਼ਤ 'ਚ ਤਾਂ ਬੀਬੀ ਜੀ ਤੁਸੀਂ ਪਹਿਲਾਂ ਹੀ ਕੁਝ ਨਹੀਂ ਛੱਡਿਆ।

ਹੁੱਡਾ ਅਤੇ ਮਾਇਆਵਤੀ ਦੀ ਬੰਦ ਕਮਰਾ ਮੀਟਿੰਗ- ਇਕ ਖ਼ਬਰ
ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਸਿਹਤ ਖ਼ਰਾਬ ਹੋਣ ਕਾਰਨ ਹਨੀਪ੍ਰੀਤ ਅਦਾਲਤ 'ਚ ਹਾਜ਼ਰ ਨਹੀਂ ਹੋ ਸਕੀ- ਇਕ ਖ਼ਬਰ
ਮਾਏਂ ਮੇਰਾ ਢਿੱਡ ਦੁਖ਼ਦਾ, ਨਾਲ਼ੇ ਅੱਜ ਮੇਰਾ ਮੂਡ ਖ਼ਰਾਬ।

ਕੈਂਟਰਬਰੀ ਦੇ ਆਰਚਬਿਸ਼ਪ ਨੇ ਜੱਲ੍ਹਿਆਂਵਾਲ਼ਾ ਬਾਗ਼ ਦੇ ਸਾਕੇ ਲਈ ਮੰਗੀ ਮਾਫ਼ੀ-ਇਕ ਖ਼ਬਰ
ਨਹੀਉਂ ਲੱਭਣੇ ਲਾਲ ਗੁਆਚੇ, ਮਿੱਟੀ ਨਾ ਫ਼ਰੋਲ ਜੋਗੀਆ।

ਪੰਜਾਬ ਸਰਕਾਰ ਵਲੋਂ 550 ਸਾਲਾ ਪ੍ਰਕਾਸ਼ ਉਤਸਵ ਦੇ ਇਸ਼ਤਿਹਾਰ ਅੰਗਰੇਜ਼ੀ ਵਿਚ-ਇਕ ਖ਼ਬਰ
ਪੂਛ ਕੁੱਤੇ ਦੀ ਕਦੇ ਨਾ ਹੋਏ ਸਿੱਧੀ, ਸਾਲ ਬਾਰਾਂ ਚਾਹੇ ਰੱਖੀਏ ਵਿਚ ਨੌਲ਼ਕੇ ਜੀ।

ਕਾਨਪੁਰ ਸਿੱਖ ਕਤਲੇਆਮ ਕੇਸਾਂ ਦੀਆਂ ਅਹਿਮ ਫ਼ਾਈਲਾਂ ਗੁੰਮ-ਇਕ ਖ਼ਬਰ
ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਚੋਣਾਂ ਦਾ ਬਿਗਲ ਵੱਜਦਿਆਂ ਹੀ ਕੈਨੇਡਾ ਦੀ ਸਿਆਸਤ ਭਖਣ ਲੱਗੀ- ਇਕ ਖ਼ਬਰ
ਗਲ਼ੀ ਦੇ ਵਿਚੋਂ ਲੰਘੀ ਹੱਸ ਕੇ, ਪੈੜ ਨੱਪਦੇ ਫਿਰਨ ਪਟਵਾਰੀ।   

ਯੂ.ਕੇ. ਦੇ ਸਾਬਕਾ ਪ੍ਰਧਾਨ ਮੰਤਰੀ ਕੈਮਰਨ ਨੂੰ ਬ੍ਰੈਗਜ਼ਿੱਟ ਰੈਫ਼ਰੈਂਡਮ ਕਰਵਾਉਣ ਦਾ ਅਫ਼ਸੋਸ- ਇਕ ਖ਼ਬਰ
ਟੁੱਟ ਗਈ ਯਾਰੀ ਤੋਂ, ਰਹਿੰਦੀ ਉਮਰ ਦੇ ਹਾਵੇ।

ਸਰਕਾਰ ਨੂੰ ਆਰਥਿਕ ਮੰਦੀ ਦਾ ਅਹਿਸਾਸ ਹੀ ਨਹੀਂ- ਡਾ. ਮਨਮੋਹਨ ਸਿੰਘ
ਕੰਤ ਨਿਆਣੇ ਨੂੰ, ਦੱਸੋ ਕਿਵੇਂ ਸਮਝਾਵਾਂ।

ਅਕਾਲੀ ਦਲ ਅਤੇ ਭਾਜਪਾ 'ਚ ਮੈਂਬਰ ਬਣਾਉਣ ਦੀ ਦੌੜ- ਇਕ ਖ਼ਬਰ
ਦੁੱਧ ਰਿੜਕੇ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲ਼ਾ ਧਾਰ ਕੱਢਦਾ।

ਬੈਂਸ ਨੇ ਵਿਧਾਨ ਸਭਾ ਦੇ ਸਪੀਕਰ ਕੋਲ਼ ਕੀਤੀ ਡੀ.ਸੀ. ਦੀ ਸ਼ਿਕਾਇਤ- ਇਕ ਖ਼ਬਰ
ਤੈਨੂੰ ਨਜ਼ਰ ਨਹੀਂ ਆਉਂਦੀ ਫ਼ਕਰਦੀਨਾਂ, ਬੁਲਬੁਲ ਲੁੱਟ ਕੇ ਬਾਗ਼ ਨੂੰ ਖਾਂਵਦੀ ਏ।

ਸੰਸਦੀ ਰਵਾਇਤਾਂ ਸਿੱਖਣ ਲਈ ਵਿਧਾਇਕਾਂ ਨੂੰ ਵਿਦੇਸ਼ ਭੇਜਿਆ ਜਾਵੇਗਾ- ਇਕ ਖ਼ਬਰ
ਜਿੱਥੋਂ ਮਰਜ਼ੀ ਵੰਙਾਂ ਚੜ੍ਹਵਾ ਲੈ, ਮਿੱਤਰਾਂ ਦਾ ਨਾਂ ਚਲਦਾ।

10 September 2019

ਸਿੱਖ ਕੌਮ ਨਾ ਹੁੰਦੀ ਤਾਂ ਭਾਰਤ ਦਾ ਸਭਿਆਚਾਰ ਸੁਰੱਖਿਅਤ ਨਾ ਹੁੰਦਾ- ਰਾਜਨਾਥ ਸਿੰਘ
ਸਉਣ ਮਹੀਨੇ ਲੁੱਟਦੇ ਬਾਣੀਏ, ਨਵੀਆਂ ਹੱਟੀਆਂ ਪਾ ਕੇ।

ਬੇਅਦਬੀ ਦੇ ਦੋਸ਼ੀਆਂ ਨੂੰ ਬਚਾਉਣ ਲਈ ਬਾਦਲ ਪਰਵਾਰ ਜ਼ਿੰਮੇਵਾਰ- ਰਾਜ ਕੁਮਾਰ ਵੇਰਕਾ
ਨੀਂ ਛੜੇ ਅੱਜ ਭਜਨ ਕੁਰੇ, ਹੋ ਕੇ ਸ਼ਰਾਬੀ ਬੁੱਕਦੇ।

ਭਾਜਪਾ ਪ੍ਰਧਾਨ ਸ਼ਵੇਤ ਮਲਿਕ ਨੇ ਇਕੱਲਿਆਂ ਹੀ ਚੋਣਾਂ ਲੜਨ ਦੇ ਸੰਕੇਤ ਦਿਤੇ-ਇਕ ਖ਼ਬਰ
ਘੜਾ ਚੁੱਕ ਲਊਂ ਪੱਟਾਂ 'ਤੇ ਹੱਥ ਧਰ ਕੇ, ਖ਼ਸਮਾਂ ਨੂੰ ਖਾਣ ਕੁੜੀਆਂ।

ਹਨੀਪ੍ਰੀਤ ਦੀ ਜ਼ਮਾਨਤ ਅਰਜ਼ੀ ਹਾਈ ਕੋਰਟ ਵਲੋਂ ਖ਼ਾਰਜ-ਇਕ ਖ਼ਬਰ
ਮੈਂ ਤਾਂ ਹੋ ਗਈ ਹਕੀਮ ਜੀ ਅੱਗੇ ਨਾਲੋਂ ਤੰਗ।

ਟਰੰਪ ਨੇ ਰੱਦ ਕੀਤੀ ਤਾਲਿਬਾਨ ਨਾਲ਼ ਸ਼ਾਂਤੀ ਵਾਰਤਾ- ਇਕ ਖ਼ਬਰ
ਨਹੀਂ ਨਿਭਣੀ ਦਿਲਦਾਰਾ, ਕਰ ਲੈ ਮੋੜ ਮੁੜਾਈਆਂ।

ਕਿਧਰ ਜਾਣ ਕਾਮੇ: ਆਰਥਕ ਮੰਦੀ ਨੇ ਚਾਹ ਵੇਚਣ ਲਾਏ ਫੋਰਮੈਨ- ਇਕ ਖ਼ਬਰ
ਹੌਸਲਾ ਨਾ ਛੱਡਣ, ਕੀ ਪਤਾ ਕੱਲ੍ਹ ਕਲੋਤਰ ਨੂੰ ਪ੍ਰਧਾਨ ਮੰਤਰੀ ਹੀ ਬਣ ਜਾਣ।

ਮੰਦੀ ਬਾਰੇ ਸਰਕਾਰ ਦੀ ਖ਼ਾਮੋਸ਼ੀ ਖ਼ਤਰਨਾਕ- ਪ੍ਰਿਅੰਕਾ ਗਾਂਧੀ
ਕੁਝ ਬੋਲ ਵੇ ਦਿਲਾਂ ਦ ਘੁੰਡੀ ਖੋਲ੍ਹ ਵੇ ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

ਭਾਰਤ ਆਤਮ ਰੱਖਿਆ ਲਈ ਬਲ ਦਾ ਪ੍ਰਯੋਗ ਕਰਨ ਤੋਂ ਗੁਰੇਜ਼ ਨਹੀਂ ਕਰੇਗਾ- ਰਾਜਨਾਥ ਸਿੰਘ
ਬੰਤੋ ਨਾਰ ਬਦਲੇ, ਜੱਗੇ ਜੱਟ ਦੀ ਗੰਡਾਸੀ ਖੜਕੇ।

ਬ੍ਰੈਗਜ਼ਿੱਟ ਮੁੱਦਾ: ਬਰਤਾਨਵੀ ਪ੍ਰਧਾਨ ਮੰਤਰੀ ਨੂੰ ਸੰਸਦ ਵਿਚ ਦੂਜਾ ਝਟਕਾ-ਇਕ ਖ਼ਬਰ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਤਿਹਾੜ ਜੇਲ੍ਹ 'ਚ ਹਲਕੇ ਨਾਸ਼ਤੇ ਨਾਲ ਚਿਦੰਬਰਮ ਨੇ ਕੀਤੀ ਦਿਨ ਦੀ ਸ਼ੁਰੂਆਤ- ਇਕ ਖ਼ਬਰ
ਨਰਮ ਸਰੀਰਾਂ ਨੂੰ, ਪੈ ਗਏ ਮਾਮਲੇ ਭਾਰੀ।

ਅਲਕਾ ਲਾਂਬਾ ਮੁੜ ਕਾਂਗਰਸ ਦੀ ਝੋਲ਼ੀ 'ਚ ਪਹੁੰਚ ਗਈ - ਇਕ ਖ਼ਬਰ
ਰੋਹੀ ਵਾਲ਼ੀ ਜੰਡ ਵੱਢ ਕੇ, ਮੈਨੂੰ 'ਕੱਲੀ ਨੂੰ ਚੁਬਾਰਾ ਪਾ ਦੇ।

ਅਰਥਚਾਰੇ ਨੂੰ ਤਬਾਹ ਕਰ ਕੇ ਚੁੱਪ ਬੈਠੀ ਹੈ ਸਰਕਾਰ- ਪ੍ਰਿਯੰਕਾ ਗਾਂਧੀ
ਭਿੱਜ ਗਈਆਂ ਨਣਾਨੇ ਪੂਣੀਆਂ, ਰੰਗਲੇ ਭਿੱਜ ਗਏ ਚਰਖ਼ੇ।

ਸੁਨੀਲ ਜਾਖੜ ਬਣੇ ਰਹਿਣਗੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ- ਸੋਨੀਆ ਗਾਂਧੀ
ਭਗਤੇ ਨੂੰ ਖੰਡ ਪਾ ਦਿਓ, ਐਰ ਗ਼ੈਰ ਨੂੰ ਸ਼ੱਕਰ ਦਾ ਦਾਣਾ।

ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਸਬੰਧੀ ਜਾਂਚ ਸਬ-ਕਮੇਟੀ ਦੀ ਇਕੱਤ੍ਰਤਾ ਭਲਕੇ-ਇਕ ਖ਼ਬਰ
ਉਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਗਊ ਮੂਤਰ ਨਾਲ਼ ਬਣੀਆਂ ਦਵਾਈਆਂ ਨਾਲ਼ ਬੁੱਧੀਮਾਨ ਬੱਚੇ ਪੈਦਾ ਹੋਣਗੇ- ਭਾਜਪਾ ਨੇਤਾ
ਬੱਕਰੀ ਨੂੰ ਊਠ ਜੰਮਿਆਂ, ਸਹੁੰ ਰੱਬ ਦੀ ਝੂਠ ਨਾ ਬੋਲਾਂ।

ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਗੁਰਬਾਣੀ ਦੇ ਗੁਟਕਿਆਂ ਤੇ ਵਪਾਰਕ ਇਸ਼ਤਿਹਾਰ ਛਾਪ ਕੇ ਕੀਤੀ ਨਿਰਾਦਰੀ-ਇਕ ਖ਼ਬਰ
ਵਪਾਰੀਆਂ ਹੱਥ ਗੁਰਦੁਆਰੇ, ਜਿਹਨੀਂ ਸਾਰੇ ਅਸੂਲ ਵਿਸਾਰੇ।

02 September 2019

ਸੁਆਮੀ ਦੇ ਕਰਤਾਰ ਪੁਰ ਲਾਂਘੇ ਬਾਰੇ ਦਿਤੇ ਬਿਆਨ ਦੀ ਤਿੱਖੀ ਆਲੋਚਨਾ- ਇਕ ਖ਼ਬਰ
ਬਈ ਆਪਾਂ ਫਲੂਹਾ ਸੁੱਟਣਾ ਸੀ, ਸੁੱਟ ਦਿਤਾ। ਕਰੀ ਜਾਉ ਜੋ ਕਰਨਾ।

ਰਿਜ਼ਰਵ ਬੈਂਕ ਦਾ ਪੈਸਾ ਚੋਰੀ ਨਹੀਂ ਕੀਤਾ-ਸੀਤਾਰਮਨ
ਹੰਗਾਮਾ ਹੈ ਕਿਉਂ ਬਰਪਾ ਰਕਮ ਥੋੜ੍ਹੀ ਲੇ ਲੀ ਹੈ, ਡਾਕਾ ਹੀ ਤੋ ਡਾਲਾ, ਚੋਰੀ ਤੋ ਨਹੀਂ ਕੀ ਹੈ।

ਭਾਸ਼ਾ ਵਿਭਾਗ ਪੰਜਾਬ ਨੇ ਚੇਤੇ 'ਚੋਂ ਵਿਸਾਰਿਆ ਪੰਜਾਬੀ ਭਾਸ਼ਾ ਨੂੰ- ਇਕ ਖ਼ਬਰ
ਰੋਂਦੀ ਮਾਂ ਸੁੰਦਰ ਦੀ ਖੜ੍ਹ ਕੇ, ਕਿਹੜਾ ਦੇਵੇ ਧੀਰਾਂ।

ਹਵਾਈ ਅੱਡੇ 'ਤੇ ਲੋਡਰਾਂ ਨੂੰ ਦਸਤਾਰ ਉਤਾਰਨ ਲਈ ਮਜਬੂਰ ਕਰਨ 'ਤੇ ਲੌਂਗੋਵਾਲ ਵਲੋਂ ਨਿੰਦਾ-ਇਕ ਖ਼ਬਰ
ਕਦੀ ਨਿੰਦਾ ਤੋਂ ਅੱਗੇ ਵੀ ਵਧਿਆ ਕਰੋ ਕੌਮ ਦੇ ਪਹਿਰੇਦਾਰੋ।

ਸਰਕਾਰੀ ਕਾਲਜਾਂ ਵਿਚ ਪ੍ਰੋਫੈਸਰਾਂ ਦੀਆਂ 78% ਫ਼ੀਸਦੀ ਆਸਾਮੀਆਂ ਖ਼ਾਲੀ- ਇਕ ਖ਼ਬਰ
ਰਾਂਝਣਾਂ ਹੀਰ ਵੇ ਤੇਰੀ, ਵਿਚ ਖੇੜਿਆਂ ਦੇ ਰੁਲ਼ ਗਈ।

ਮਨੂੰਵਾਦੀਆਂ ਅਤੇ ਉਹਨਾਂ ਦੇ ਏਜੰਟਾਂ ਨੇ ਬਚਾਏ ਬੇਅਦਬੀਆਂ ਦੇ ਦੋਸ਼ੀ-ਖਾਲੜਾ ਮਿਸ਼ਨ
ਚੁੜੇਲਾਂ ਬਣ ਚੁੰਬੜ ਗਈਆਂ, ਮੈਨੂੰ ਸੱਸ ਤੇ ਨਨਾਣ ਚੰਨਾਂ ਦੋਵੇਂ।

ਤਿੰਨ ਦਹਾਕਿਆਂ ਬਾਅਦ ਵੀ ਪਰਨਾਲ਼ਾ ਉੱਤੇ ਦਾ ਉੱਥੇ- ਹੜ੍ਹਾਂ 'ਤੇ ਟਿੱਪਣੀ
ਹੁਣ ਤਾਂ ਪਰਨਾਲ਼ਾ ਚੋ ਕੇ ਸਿਰਾਂ 'ਚ ਪੈਂਦਾ ਬਈ।

ਪੰਜਾਬ ਅਤੇ ਹਰਿਆਣਾ ਕੋਲ ਉਹਨਾਂ ਦੀ ਰਾਜਧਾਨੀ ਹੋਣ ਦੇ ਨਹੀਂ ਹਨ ਕੋਈ ਸਬੂਤ-ਇਕ ਖ਼ਬਰ
ਯਾਨੀ ਕਿ ਦੋਵਾਂ ਬਿੱਲੀਆਂ ਦੀ ਰੋਟੀ ਹੁਣ ਬਾਂਦਰ ਖਾਵੇਗਾ।

ਮੋਦੀ ਦੀ ਸ਼ਲਾਘਾ ਕਰਨ ਲਈ ਕਾਂਗਰਸ ਨੇ ਸ਼ਸ਼ੀ ਥਰੂਰ ਤੋਂ ਸਪਸ਼ਟੀਕਰਨ ਮੰਗਿਆ- ਇਕ ਖ਼ਬਰ
ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਸੌਦਾ ਸਾਧ ਦੀ ਚੇਲੀ ਵਿਪਾਸਨਾ ਅਤਿ-ਲੋੜੀਂਦੇ ਅਪਰਾਧੀਆਂ ਦੀ ਸੂਚੀ 'ਚੋਂ ਬਾਹਰ- ਇਕ ਖ਼ਬਰ
ਕੌਣ ਕੱਤੇ ਮੇਰਾ ਚਰਖ਼ਾ ਨੀਂ ਮਾਏ, ਤ੍ਰਿੰਞਣਾਂ ਦਾ ਸਰਦਾਰ ਨੀਂ ਮਾਏਂ।

ਹਰੇਕ ਕੌਮਾਂਤਰੀ ਮੰਚ 'ਤੇ ਕਸ਼ਮੀਰ ਮਸਲਾ ਉਠਾਵਾਂਗੇ- ਇਮਰਾਨ ਖ਼ਾਨ
ਰਾਂਝਾ ਰਾਂਝਾ ਕਰਦੀ, ਲੱਗ ਕੇ ਨਾਲ਼ ਦੀਵਾਰਾਂ ਦੇ।

ਕਸ਼ਮੀਰ 'ਤੇ ਤੀਜੀ ਧਿਰ ਦੀ ਵਿਚੋਲਗੀ ਪਰਵਾਨ ਨਹੀਂ- ਮੋਦੀ
ਝਗੜਾ ਪੰਜ ਕਨਾਲ਼ਾਂ ਦਾ, ਮੈਨੂੰ ਛੜਾ ਜੇਠ ਤੰਗ ਕਰਦਾ।

ਬਰਗਾੜੀ ਕਾਂਡ ਦੀ ਸਮੁੱਚੀ ਪੜਤਾਲ ਸ਼ੱਕ ਦੇ ਘੇਰੇ 'ਚ ਆਈ- ਇਕ ਖ਼ਬਰ
ਦਾਲ਼ 'ਚ ਕਾਲ਼ਾ ਕਾਲ਼ਾ ਨਹੀਂ, ਸਾਰੀ ਦਾਲ਼ ਹੀ ਕਾਲ਼ੀ ਐ ਬਈ।

ਇਕ ਅਪੀਲ 'ਤੇ ਕਰੋੜਾਂ ਇਕੱਠੇ ਕਰਨ ਵਾਲੇ ਅਕਾਲੀ ਦਲ ਦੀ ਮਾਲੀ ਹਾਲਤ ਮਾੜੀ- ਇਕ ਖ਼ਬਰ
ਮੇਰੇ ਗਲ਼ ਵਿਚ ਖੁੱਲ੍ਹੀਆਂ ਮੀਢੀਆਂ, ਮੇਰਾ ਸਾਲੂ ਹੋਇਆ ਲੰਗਾਰ ਵੇ।

ਮੈਂ ਕਿਸੇ ਰਾਜਸੀ ਪਾਰਟੀ 'ਚ ਸ਼ਾਮਲ ਨਹੀਂ ਹੋ ਰਿਹਾ- ਅਦਾਕਾਰ ਸੰਜੇ ਦੱਤ
ਹੱਥ ਤਾਂ ਤੇਰਾ ਵੀ ਢਾਈ ਕਿੱਲੋ ਤੋਂ ਘੱਟ ਨਹੀਂ ਸੰਜੂ, ਚੁੱਕ ਲੈ ਕੋਈ ਨਲ਼ਕਾ ਨੁਲ਼ਕਾ ਤੂੰ ਵੀ।

ਮੰਤਰਾਲਿਆਂ 'ਚ ਆਪਣੇ ਰਿਸ਼ਤੇਦਾਰਾਂ ਦੀ ਨਿਯੁਕਤੀ ਨਾ ਕਰਨ ਮੰਤਰੀ- ਮੋਦੀ
ਕਰ ਕੇ ਤੇਲੀ ਰੁੱਖਾ ਖਾਈਏ, ਨਹੀਂ ਪੁੱਗਦਾ ਇਹ ਸਾਨੂੰ।