19 ਜੂਨ 2023

ਹਰਿਆਣਾ ਗੁਰਦੁਆਰਾ ਕਮੇਟੀ ਦੇ ਅਹੁਦੇਦਾਰਾਂ ਨੂੰ ਖੱਟਰ ਨੇ ਪੜ੍ਹਾਇਆ ਏਕਤਾ ਦਾ ਸਬਕ- ਇਕ ਖ਼ਬਰ

ਜਦੋਂ ਲੂੰਬੜੀ ਉਪਦੇਸ਼ ਦੇਵੇ ਉਦੋਂ ਆਪਣੀਆਂ ਬੱਤਖ਼ਾਂ ਨੂੰ ਬਚਾਅ ਕੇ ਰੱਖੋ।

ਕਿਸ ਨੂੰ ਪੁੱਛ ਕੇ ਬੁਲਾਇਆ ਸੈਸ਼ਨ? ਰਾਜਪਾਲ ਨੇ ਸਪੀਕਰ ਸੰਧਵਾਂ ਨੂੰ ਖ਼ਤ ਲਿਖ ਕੇ ਪੁੱਛਿਆ- ਇਕ ਖ਼ਬਰ

ਹੱਥ ਸੋਚ ਕੇ ਗੰਦਲ ਨੂੰ ਪਾਈਂ, ਨੀਂ ਕਿਹੜੀ ਏਂ ਤੂੰ ਸਾਗ ਤੋੜਦੀ।

ਕੀ ਪੰਥਕ ਸਿਆਸਤ ਵਿਚ ਧਿਆਨ ਸਿੰਘ ਮੰਡ ਕਰਨਗੇ ਕੋਈ ਧਮਾਕਾ?- ਇਕ ਖ਼ਬਰ

ਨਾ ਖੰਜਰ ਉਠੇਗਾ ਨਾ ਤਲਵਾਰ ਹੀ ਉਠੇਗੀ, ਯੇਹ ਬਾਜ਼ੂ ਮਿਰੇ ਆਜ਼ਮਾਏ ਹੂਏ ਹੈਂ।

ਗਿਆਨੀ ਹਰਪ੍ਰੀਤ ਸਿੰਘ ਨੇ ਆਪਣੀ ਮਰਜ਼ੀ ਨਾਲ ਜਥੇਦਾਰੀ ਦਾ ਅਹੁਦਾ ਛੱਡਿਆ- ਹਰਜਿੰਦਰ ਸਿੰਘ ਧਾਮੀ

ਧਾਮੀ ਸਾਹਿਬ ‘ਯੇਹ ਜੋ ਪਬਲਿਕ ਹੇ ਯੇਹ ਸਭ ਜਾਨਤੀ ਹੈ’।

ਨਵੇਂ ਬਣੇ ਜਥੇਦਾਰ ਗਿਆਨੀ ਰਘਬੀਰ ਸਿੰਘ ਨੇ ਕਿਹਾ,’ ਪੰਥ ਦੇ ਵਿਸ਼ਵਾਸ ਨੂੰ ਬਣਾਈ ਰੱਖਾਂਗਾ’- ਇਕ ਖ਼ਬਰ

ਫਿਕਰ ਕਰੀਂ ਨਾ ਪੰਥ ਖਾਲਸੇ ਦਾ, ਵਿਸ਼ਵਾਸ ਤੋੜੀਂ ਨਾ ਆਪਣੇ ‘ਮਾਲਕਾਂ’ ਦਾ।

ਜਥੇਦਾਰ ਨੂੰ ਅਹੁਦੇ ਤੋਂ ਲਾਂਭੇ ਕਰਨ ਲਈ ਪਾਇਆ ਗਿਆ ਸਿਆਸੀ ਦਬਾਅ-ਬੀਬੀ ਜਗੀਰ ਕੌਰ

ਧਾਮੀ:- ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਬਾਦਲਾਂ ਵਿਰੁੱਧ ਬੋਲਣਾ ਮਹਿੰਗਾ ਪੈ ਗਿਆ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੂੰ- ਇਕ ਖ਼ਬਰ

ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

ਪ੍ਰਿਅੰਕਾ ਗਾਂਧੀ ਨੇ ਮੱਧ ਪ੍ਰਦੇਸ਼ ਵਿਚ ਚੋਣਾਂ ਦਾ ਬਿਗਲ ਵਜਾਇਆ-ਇਕ ਖ਼ਬਰ

ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ, ਵਿਹੜੇ ਲਾ ਤ੍ਰਿਵੈਣੀ।

ਰਾਜਪਾਲ ਜੀ ਆਪਣੇ ਅਹੁਦੇ ਦੀ ਗਰਿਮਾ ਦਾ ਖ਼ਿਆਲ ਰੱਖ ਕੇ ਹੀ ਬੋਲੋ- ਹਰਪਾਲ ਚੀਮਾ

ਨ੍ਹਾਉਂਦੀ ਫਿਰੇਂ ਤੀਰਥਾਂ ‘ਤੇ, ਤੇਰੇ ਅੰਦਰੋਂ ਮੈਲ਼ ਨਾ ਜਾਵੇ।

ਰਾਜਪਾਲ ਨਾਲ ਸਬੰਧਾਂ ਦੇ ਸਾਰੇ ਤੱਥ ਅਸੀਂ ਜਨਤਾ ਦੇ ਸਾਹਮਣੇ ਰੱਖ ਦਿਤੇ ਹਨ- ਮਾਲਵਿੰਦਰ ਸਿੰਘ ਕੰਗ

ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਪੰਜਾਬ ਵਿਧਾਨ ਸਭਾ ਦਾ ਸੈਸ਼ਨ ਰਹੇਗਾ ਹੰਗਾਮਿਆਂ ਭਰਿਆ- ਇਕ ਖ਼ਬਰ

ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ। 

ਭਗਵੰਤ ਮਾਨ ਅਤੇ ਸੁਖਬੀਰ ਬਾਦਲ ਹੋਏ ਟਵੀਟੋ- ਟਵੀਟੀ- ਇਕ ਖ਼ਬਰ

ਡੱਡੂਆਂ ਨੇ ਪਾਇਆ ਭੰਗੜਾ, ਕਾਟੋ ਸਾਜ਼ ਵਜਾਵੇ।

ਭਗਵੰਤ ਮਾਨ ਸੁਪਰੀਮ ਕੋਰਟ ਦਾ ਹੁਕਮ ਵੀ ਨਹੀਂ ਮੰਨ ਰਹੇ- ਰਾਜਪਾਲ ਪੁਰੋਹਿਤ

ਉੱਜੜੀਆਂ ਭਰਜਾਈਆਂ, ਵਲੀ ਜਿਨ੍ਹਾਂ ਦੇ ਜੇਠ।

ਗਿਆਨੀ ਰਘਬੀਰ ਸਿੰਘ ਦੀ ਨਿਯੁਕਤੀ ਸੰਗਤ ਤੋਂ ਚੋਰੀਂ ਕੀਤੀ ਗਈ- ਪੰਜੋਲੀ

ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰ ਵਾਰ ਉਨ੍ਹਾਂ ਪੱਛੋਤਾਵਣਾ ਈ।

11 ਜੂਨ 2023

ਸੱਤਾ ਵਿਹੂਣੇ ਸਿਆਸਤਦਾਨਾਂ ਦੀਆਂ ਜੱਫੀਆਂ ਸਿਆਸੀ ਤਾਕਤ ਵਾਸਤੇ ਨਾ ਕਿ ਪੰਜਾਬ ਦੇ ਮਸਲਿਆਂ ਬਾਰੇ- ਇਕ ਖ਼ਬਰ

ਰੋਂਦੀ ਯਾਰਾਂ ਨੂੰ, ਨਾਂ ਲੈ ਲੈ ਕੇ ਭਰਾਵਾਂ ਦਾ।

ਪਿਉ ਨੇ ਦੇਸ਼ ਲਈ ਦਿਤੀ ਜਾਨ ਪਰ ਪੁੱਤਰ ਨੂੰ ਕੁਝ ਨਹੀਂ ਮਿਲਿਆ- ਇਕ ਖ਼ਬਰ

ਖਾਣ ਪੀਣ ਨੂੰ ਬਾਂਦਰੀ, ਡੰਡੇ ਖਾਣ ਨੂੰ ਰਿੱਛ।

ਮੁੱਖ ਮੰਤਰੀ ਮਾਨ ਸੂਬੇ ਦੇ ਹਿਤਾਂ ਦੀ ਰਖਵਾਲੀ ਕਰਨ ਦੇ ਯੋਗ ਨਹੀਂ- ਚੰਦੂਮਾਜਰਾ

ਜਿਹੜੇ ਬਿਨਾਂ ਸ਼ਰਤੋਂ ਸਮਝੌਤੇ ਕਰ ਕੇ ਪੰਜਾਬ ਨੂੰ ਦਾਅ ‘ਤੇ ਲਾਉਂਦੇ ਰਹੇ, ਉਨ੍ਹਾਂ ਬਾਰੇ ਕੀ ਖ਼ਿਆਲ ਐ?

ਕੈਨੇਡਾ ਤੋਂ ਜਬਰੀ ਵਤਨ ਵਾਪਸੀ ਦਾ ਸਾਹਮਣਾ ਕਰ ਰਹੇ ਵਿਦਿਆਰਥੀਆਂ ਨੂੰ ਕਾਨੂੰਨੀ ਸਹਾਇਤਾ ਦੇਵਾਂਗੇ- ਕੁਲਦੀਪ ਸਿੰਘ ਧਾਲੀਵਾਲ

ਧਾਲੀਵਾਲ ਸਾਹਿਬ, ਠੱਗ ਏਜੰਟ ਮਿਸ਼ਰੇ ਬਾਰੇ ਕੀ ਕਰ ਰਹੇ ਹੋ?

ਕੇਂਦਰ ਦੀਆਂ ਕਟੌਤੀਆਂ ਕਾਰਨ ਪੰਜਾਬ ਦੀ ਵਿਤੀ ਦਸ਼ਾ ਡਗਮਗਾਈ- ਇਕ ਖ਼ਬਰ

ਸੁਣਿਐ ਬਈ ਮੋਦੀ ਸਾਹਿਬ ਕਹਿੰਦੇ ਐ ਕਿ ਪੰਜਾਬ ਨੂੰ ਨੰਬਰ ਇਕ ਸੂਬਾ ਬਣਾਉਣੈ।

ਮੁੱਖ ਮੰਤਰੀ ਪੰਜਾਬ ਯੂਨੀਵਰਸਿਟੀ ਦੇ ਮਾਮਲੇ ‘ਚ ਸਰਦਾਰ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਬਦਨਾਮ ਨਾ ਕਰਨ- ਦਲਜੀਤ ਸਿੰਘ ਚੀਮਾ

ਜਦੋਂ ਸੱਚੀਆਂ ਸੁਣਾਈਆਂ ਨੀਂ, ਬੜਾ ਦੁਖ ਲੱਗਿਆ, ਬੜਾ ਦੁਖ ਲੱਗਿਆ।

ਅਮਰੀਕਾ ‘ਤੇ ਨਜ਼ਰ ਰੱਖਣ ਲਈ ਚੀਨ ਕਿਊਬਾ ‘ਚ ਬਣਾਵੇਗਾ ਖੁਫ਼ੀਆ ਅੱਡਾ- ਅਮਰੀਕੀ ਮੀਡੀਆ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਪੰਜਾਬ ਯੂਨੀਵਰਸਟੀ ਦੇ ਮੁੱਦੇ ‘ਤੇ ਭਗਵੰਤ ਮਾਨ ਵਲੋਂ ਮੁੱਖ ਮੰਤਰੀ ਖੱਟਰ ਨੂੰ ਕੋਰੀ ਨਾਂਹ- ਇਕ ਖ਼ਬਰ

ਅਸਾਂ ਨਹੀਂ ਜਾਣਾ ਸਹੁਰੇ, ਤੂੰ ਲੈ ਜਾ ਗੱਡੀ ਮੋੜ ਕੇ।

ਹਰਿਆਣਾ ‘ਚ ਜੇ.ਜੇ.ਪੀ. ਨਾਲ ਗੱਠਜੋੜ ਨੂੰ ਕੋਈ ਖ਼ਤਰਾ ਨਹੀਂ- ਖੱਟਰ

ਅੰਦਰੋਂ ਡਰ ਲਗਦਾ, ਬੁਰਛਾ ਦਿਉਰ ਕੁਆਰਾ।

‘ਸਰਕਾਰ ਤੁਹਾਡੇ ਦੁਆਰ’ ਦਾ ਮੰਤਵ ਆਮ ਆਦਮੀ ਨੂੰ ਅਸਲ ਮਾਅਨਿਆਂ ‘ਚ ਅਖ਼ਤਿਆਰ ਦੇਣਾ- ਭਗਵੰਤ ਮਾਨ

ਏਹੀ ਗੱਲ ਤਾਂ ਭਗਵੰਤ ਮਾਨਾ ‘ਉਹਨਾਂ’ ਦੇ ਸੰਘੋਂ ਹੇਠਾਂ ਨਹੀਂ ਉੱਤਰਦੀ। ਇਸੇ ਲਈ ਤਾਂ ਸ਼ਬਦ ‘ਮਟੀਰੀਅਲ’ ਵਰਤਿਆ ਬਾਜਵੇ ਨੇ।

ਵਿਰੋਧੀ ਧਿਰਾਂ ਦੇ ਆਗੂ ਪੰਜਾਬੀਆਂ ਦੇ ਮਨੋਂ ਉੱਤਰ ਚੁੱਕੇ ਲੋਕਾਂ ਦੀ ਜੁੰਡਲੀ- ਭਗਵੰਤ ਮਾਨ

ਗਿੱਦੜਾਂ ਦੀ ਜੰਨ ਚੜ੍ਹਦੀ, ਜਿੱਥੇ ਸੈਹਾ ਬੋਲੀਆਂ ਪਾਵੇ।

ਕੇਂਦਰ ਦੇ ਆਰਡੀਨੈਂਸ ਸਬੰਧੀ ਕੇਜਰੀਵਾਲ ਨੂੰ ਮਿਲਿਆ ਅਖਿਲੇਸ਼ ਦਾ ਸਾਥ- ਇਕ ਖ਼ਬਰ

ਪਾਰ ਲੰਘਾ ਦੇ ਵੇ, ਤੂੰ ਨਦੀਆਂ ਦਾ ਭੇਤੀ।

ਕਿਸਾਨਾਂ ‘ਤੇ ਕੀਤੇ ਲਾਠੀਚਾਰਜ ਦੀ ਕੀਮਤ ਖੱਟਰ ਸਰਕਾਰ ਨੂੰ ਚੁਕਾਉਣੀ ਪਵੇਗੀ- ਬੀਬੀ ਰਾਜੂ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਅਕਾਲੀ ਦਲ ਪੰਥ ਦੀ ਪਾਰਟੀ, ਜੰਨਤਾ ਦੀ ਸੋਚ ਪੰਥ ਦੀ ਫੌਜ- ਸੁਖਬੀਰ ਬਾਦਲ

ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ, ਜੇ ਮਨ ਰੰਗਿਆ ਨਾ ਜਾਵੇ।

ਮੂਲ ਨਾਨਕਸ਼ਾਹੀ ਕੈਲੰਡਰ ਦੇ ਮੁੱਦੇ ‘ਤੇ ਮੇਰਾ ਅੱਜ ਵੀ ਪਹਿਲਾਂ ਵਾਲ਼ਾ ਸਪਸ਼ਟ ਸਟੈਂਡ- ਬੀਬੀ ਜਾਗੀਰ ਕੌਰ

ਤੀਆਂ ਨੂੰ ਹਟਾਉਣ ਵਾਲ਼ਿਆ, ਤੇਰਾ ਹੋਵੇ ਨਰਕਾਂ ਵਿਚ ਵਾਸਾ।

5 ਜੂਨ 2023

ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਹੋਣ ਦੀ ਸੰਭਾਵਨਾ ਬਣੀ- ਇਕ ਖ਼ਬਰ

ਚੰਦ ਚੰਦਾਂ ਦੇ ਮਾਮਲੇ, ਚੜ੍ਹਨ ਕਿ ਨਾ ਹੀ ਚੜ੍ਹਨ।

 
ਗਹਿਲੋਤ ਅਤੇ ਪਾਇਲਟ ਰਾਜਸਥਾਨ ‘ਚ ਇਕੱਠਿਆਂ ਚੋਣਾਂ ਲੜਨ ਲਈ ਸਹਿਮਤ- ਇਕ ਖ਼ਬਰ

ਅਲ਼ਕ ਵਹਿੜਾ ਤੇ ਬੁੱਢਾ ਬਲਦ ਕਿੰਨਾ ਕੁ ਚਿਰ ਨਰੜ ਕੱਢਣਗੇ।

ਬਰਤਾਨੀਆ ਨੇ ਮੰਨ ਲਿਆ ਕਿ ਉਹ ਕੋਹਿਨੂਰ ਜ਼ਬਰਦਸਤੀ ਲੈ ਗਏ ਸਨ- ਇਕ ਖ਼ਬਰ

ਕੂੜ ਨਿਖੁਟੈ ਨਾਨਕਾ, ਓੜਕ ਸਚੁ ਰਹੀ।

 

ਸਰਕਾਰ ਦੇ 9 ਸਾਲ ਪੂਰੇ ਹੋਣ ਤੇ ਮੋਦੀ ਨੇ ਕਿਹਾ,” ਧੰਨਵਾਦੀ ਹਾਂ, ਹੋਰ ਮਿਹਨਤ ਕਰਦੇ ਰਹਾਂਗੇ- ਇਕ ਖ਼ਬਰ

ਸਭ ਨੂੰ ਟਿੱਚ ਕਰ ਕੇ ਜਾਣਦੇ ਹਾਂ, ਕਰਦੇ ਰਹਾਂਗੇ ਜੋ ਹੁਣ ਕਰਦੇ ਹਾਂ।

 

ਰਾਸ਼ਟਰਪਤੀ ਟਰੰਪ ਜਾਣ ਬੁੱਝ ਕੇ ਗੁਪਤ ਫ਼ਾਈਲਾਂ ਆਪਣੇ ਨਾਲ ਹੀ ਲੈ ਗਏ- ਇਕ ਖ਼ਬਰ

ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਵਿਰੋਧੀ ਧਿਰ ਦੇ ਬਾਈਕਾਟ ਕਾਰਨ ਭਾਰਤ ਦੀ ਨਵੀਂ ਸੰਸਦ ਦੀ ਇਮਾਰਤ ਚਰਚਾ ਵਿਚ- ਇਕ ਖ਼ਬਰ

ਟੁੱਟ ਪੈਣੇ ਬਚਨੇ ਨੇ, ਕੰਧ ਢਾ ਕੇ ਚੁਬਾਰਾ ਪਾਇਆ।
                                                                          

ਅਕਾਲੀ ਦਲ ਆਪਣੇ ਮਕਸਦ ਤੋਂ ਭਟਕਿਆ- ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ

ਸੱਸੀ ਥਲਾਂ ‘ਚ ਆਵਾਜ਼ਾਂ ਮਾਰੇ, ਮੁੜ ਆ ਬਲੋਚ ਪੁੰਨਣਾਂ।

ਦਰਬਾਰਾ ਸਿੰਘ ਗੁਰੂ ਮੁੜ ਅਕਾਲੀ ਦਲ ਬਾਦਲ ‘ਚ ਸ਼ਾਮਲ- ਇਕ ਖ਼ਬਰ

ਮੁੜ ਆਇਆਂ ਦਰਬਾਰ ਤੇਰੇ, ਭੁੱਲ-ਚੁੱਕ ਮਾਫ਼ ਕਰੀਂ।
                                                                          

ਪਹਿਲਵਾਨਾਂ ਨੂੰ ਹੁਣ ਜੰਤਰ-ਮੰਤਰ ‘ਤੇ ਧਰਨੇ ਦੀ ਮੰਨਜ਼ੂਰੀ ਨਹੀਂ ਦਿਤੀ ਜਾਵੇਗੀ- ਦਿੱਲੀ ਪੁਲਿਸ

ਰਾਹੀਆਂ ਨੇ ਰਾਤ ਕੱਟਣੀ, ਤੇਰੀ ਚੁੱਕ ਨਾ ਮਸੀਤ ਲਿਜਾਣੀ।

ਮੋਦੀ ਸਰਕਾਰ ਦੇ ਨੌਂ ਸਾਲਾਂ ‘ਚ ਜਾਨ-ਲੇਵਾ ਮਹਿੰਗਾਈ, ਲੁੱਟੀ ਗਈ ਜਨਤਾ ਦੀ ਕਮਾਈ- ਕਾਂਗਰਸ

ਗੋਰੀਏ ਛਾਂ ਕਰ ਦੇ, ਰਾਂਝਾ ਸੁੱਕ ਗਿਆ ਧੁੱਪੇ।

ਸਿੱਖ ਇਕਜੁੱਟ ਹੋ ਕੇ ਸਰਕਾਰ ਦੇ ਨਾਦਰਸ਼ਾਹੀ ਰਵੱਈਏ ਦੀ ਵਿਰੋਧਤਾ ਕਰਨ- ਬਾਬਾ ਅਵਤਾਰ ਸਿੰਘ

ਬਾਬਾ ਜੀ, ਡੁੱਬੀ ਤਾਂ ਜਦ ਸਾਹ ਨਾ ਆਇਆ।

ਸ਼੍ਰੋਮਣੀ ਕਮੇਟੀ ‘ਚ ਅਕਾਲੀ ਦਲ ਦੀ ਵਧੇਰੇ ਦਖ਼ਲਅੰਦਾਜ਼ੀ ਕਾਰਨ ਧਰਮ ਪ੍ਰਚਾਰ ‘ਚ ਗਿਰਾਵਟ ਆਈ- ਬੀਬੀ ਜਾਗੀਰ ਕੌਰ

ਕੱਚੀਆਂ ਕਲੀਆਂ ਦਾ, ਕੌਣ ਭਰੂ ਹਰਜਾਨਾ।

ਦਿੱਲੀ ਆਰਡੀਨੈਂਸ: ਸੀ.ਪੀ.ਆਈ (ਐੱਮ.) ਨੇ ‘ਆਪ’ ਨੂੰ ਸਮਰਥਨ ਦੇਣ ਦਾ ਕੀਤਾ ਐਲਾਨ- ਇਕ ਖ਼ਬਰ

ਹਾਕਾਂ ਮਾਰਦੇ ਬੱਕਰੀਆਂ ਵਾਲੇ, ਦੁੱਧ ਪੀ ਕੇ ਜਾਈਂ ਬੱਲੀਏ।

ਸ਼੍ਰੋਮਣੀ ਕਮੇਟੀ ‘ਤੋਂ ਇਕ ਪਰਵਾਰ ਦਾ ਕਬਜ਼ਾ ਹਟਾਉਣ ਵਾਲਿਆਂ ਦਾ ਸਮਰਥਨ ਕਰਾਂਗਾ- ਬਲਜੀਤ ਸਿੰਘ ਦਾਦੂਵਾਲ

ਸੱਸ ਮਰੀ ‘ਤੇ ਚੁਬਾਰਾ ਪਾਉਣਾ, ਔਖੀ ਸੌਖੀ ਦਿਨ ਕੱਟਦੀ।

ਕੇਂਦਰ ਸਰਕਾਰ ਵਲੋਂ ਦਿਤੀ ਜ਼ੈੱਡ ਸੁਰੱਖਿਆ ਮੁੱਖ ਮੰਤਰੀ ਭਗਵੰਤ ਮਾਨ ਨਹੀਂ ਲੈਣਗੇ- ਇਕ ਖ਼ਬਰ

ਭੱਠ ਪਿਆ ਸੋਨਾ ਜਿਹੜਾ ਕੰਨਾਂ ਨੂੰ ਖਾਵੇ।

28 ਮਈ 2023

ਨਿਤੀਸ਼ ਨੇ ਖੜਗੇ ਅਤੇ ਰਾਹੁਲ ਗਾਂਧੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਸੰਸਦ ਭਵਨ ਦਾ ਉਦਘਾਟਨ ਪ੍ਰਧਾਨ ਮੰਤਰੀ ਕਰੇ ਜਾਂ ਰਾਸ਼ਟਰਪਤੀ, ਲੋਕਾਂ ਨੂੰ ਕੀ ਫ਼ਰਕ ਪਵੇਗਾ- ਗੁਲਾਮ ਨਬੀ ਆਜ਼ਾਦ

ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਪੰਜਾਬ ਦੇ ਕਾਂਗਰਸੀਆਂ ਨੇ ਰੈਲੀ ਕੀਤੀ ਰਾਹੁਲ ਗਾਂਧੀ ਲਈ ਤੇ ਬਿੱਲ ਆ ਗਿਆ ਮਾਨ ਸਰਕਾਰ ਨੂੰ- ਇਕ ਖ਼ਬਰ

ਨਾਨੀ ਖਸਮ ਕਰੇ, ਦੋਹਤਾ ਚੱਟੀ ਭਰੇ।

ਸ਼ਰਾਬ ਨਾਲ ਡੱਕੇ ਬਿਹਾਰੀ ਨੇ ਸਿੱਖ ਵਿਅਕਤੀ ਦੇ ਰੋਮਾਂ ਦੀ ਕੀਤੀ ਬੇਅਦਬੀ- ਇਕ ਖ਼ਬਰ

ਦੇਖਤੇ ਜਾਉ, ਅਬੀ ਤੋ ਪਾਰਟੀ ਸ਼ੁਰੂ ਹੋਈ ਹੈ।

ਵਿਰੋਧੀ ਪਾਰਟੀਆਂ ਤੋਂ ਕਿਨਾਰਾ ਕਰ ਕੇ ਅਕਾਲੀ ਦਲ ਬਾਦਲ ਸੰਸਦ ਬਿਲਡਿੰਗ ਦੇ ਉਦਘਾਟਨ ‘ਚ ਸ਼ਾਮਲ  ਹੋਵੇਗਾ- ਇਕ ਖ਼ਬਰ

ਭੇਡਾਂ ਵਾਲਿਆਂ ਦੀ ਬੁੱਢੀ ਵਾਂਗ ਭਾਜਪਾ ‘ਚ ਮੁੜ ਵੜਨ ਦੀ ਕੋਸ਼ਿਸ਼ ਹੈ।

ਗੁਰਬਾਣੀ ਦੇ ਪ੍ਰਸਾਰਣ ਲਈ ਸ਼੍ਰੋਮਣੀ ਕਮੇਟੀ ਵਲੋਂ ਜਲਦੀ ਹੀ ਟੈਂਡਰ ਮੰਗੇ ਜਾਣਗੇ- ਧਾਮੀ

ਪਰ ਠੇਕਾ ਬਾਦਲਾਂ ਨੂੰ ਹੀ ਮਿਲੇਗਾ ਕਿਉਂਕਿ ਟੈਂਡਰ ਦੀਆਂ ਸ਼ਰਤਾਂ ਵੀ ਉਹੀ ਲਿਖਣਗੇ ।

ਸ਼੍ਰੋਮਣੀ ਕਮੇਟੀ ਦੇ ਮਸਲਿਆਂ ‘ਚ ਮੁੱਖ ਮੰਤਰੀ ਦੀ ਦਖ਼ਲਅੰਦਾਜ਼ੀ ਬਿਲਕੁਲ ਨਾਜਾਇਜ਼- ਮਹੇਸ਼ਇੰਦਰ ਗਰੇਵਾਲ

ਬਿਲਕੁਲ ਠੀਕ ਜੀ, ਦਖ਼ਲਅੰਦਾਜ਼ੀ ਦਾ ਅਧਿਕਾਰ ਸਿਰਫ਼ ਇਕੋ ਪਰਵਾਰ ਨੂੰ ਹੈ ਜੀ।

ਨਿਗਮ ਚੋਣਾਂ ਕਰ ਕੇ ਸਾਬਕਾ ਕੌਂਸਲਰ ਲੋਕਾਂ ਦੀਆਂ ਸਮੱਸਿਆਵਾਂ ਵਲ ਧਿਆਨ ਦੇ ਰਹੇ ਹਨ- ਇਕ ਖ਼ਬਰ

ਲੱਕ ਲੱਕ ਹੋ ਗਏ ਬਾਜਰੇ, ਰੁੱਤ ਯਾਰੀਆਂ ਲਾਉਣ ਦੀ ਆਈ।

ਰਾਜਸਥਾਨ  ਨੂੰ ਹੋਰ ਵਾਧੂ ਪਾਣੀ ਨਹੀਂ ਦਿਤਾ ਜਾ ਸਕਦਾ- ਮੁੱਖ ਮੰਤਰੀ ਭਗਵੰਤ ਮਾਨ

ਸਰ ਸੁੱਕ ਨਖਰੋ ਨੀਂ, ਮੈਂ ਕਿੱਥੋਂ ਲਿਆਵਾਂ ਆੜੂ।

ਮਮਤਾ ਵਲੋਂ ਕੇਂਦਰ ਦੇ ਆਰਡੀਨੈਂਸ ਵਿਰੁੱਧ ਕੇਜਰੀਵਾਲ ਨੁੰ ਸਮਰਥਨ ਦਾ ਭਰੋਸਾ- ਇਕ ਖ਼ਬਰ

ਮੈਨੂੰ ਬਗਲੀ ਸਿਖਾ ਦੇ ਗਲ਼ ਪਾਉਣੀ, ਚੱਲੂੰਗੀ ਤੇਰੇ ਨਾਲ ਜੋਗੀਆ।

ਸੁਪਰੀਮ ਕੋਰਟ ਪੁੱਜਿਆ ਨਵੀਂ ਸੰਸਦ ਦੇ ਉਦਘਾਟਨ ਦਾ ਮਸਲਾ- ਇਕ ਖ਼ਬਰ

ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਮੋਦੀ ਸਰਕਾਰ ਦੇ ‘ਹੰਕਾਰ’ ਨੇ ਸੰਸਦੀ ਪ੍ਰਣਾਲੀ ਨੂੰ ਕੀਤਾ ‘ਤਬਾਹ’- ਕਾਂਗਰਸ

ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਕਾਂਗਰਸ ਹਾਈ ਕਮਾਨ ਦੀ ‘ਆਪ’ ਨਾਲ ਇਕਜੁਟਤਾ ਤੋਂ ਪੰਜਾਬ ਕਾਂਗਰਸ ਔਖੀ- ਇਕ ਖ਼ਬਰ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਵਿਆਜ ਦਰਾਂ ਦੇ ਵਾਧੇ ਨੂੰ ਰੋਕਣਾ ਮੇਰੇ ਵੱਸ ‘ਚ ਨਹੀਂ- ਰੀਜ਼ਰਵ ਬੈਂਕ ਗਵਰਨਰ

ਬਿਗਾਨੇ ਹੱਥਾਂ ਵਿਚ ਚਾਬੀ ਮੇਰੀ, ਕਿੰਜ ਮੈਂ ਜਿੰਦਰੇ ਖੋਲ੍ਹਾਂ।

ਲੋਕਤੰਤਰ ਸਿਰਫ਼ ਇਮਾਰਤਾਂ ਨਾਲ਼ ਨਹੀਂ, ਲੋਕਾਂ ਦੀ ਆਵਾਜ਼ ਨਾਲ਼ ਚਲਦਾ ਹੈ- ਖੜਗੇ

ਬੀਜ ਰਹੀ ਤੂੰ ਬੀਜ ਅੱਕਾਂ ਦੇ, ਵੱਢ ਚੰਦਨ ਦਾ ਟਹਿਣਾ।

15 ਮਈ 2023

ਕਰਨਾਟਕ ਦਾ ਮੁੱਖ ਮੰਤਰੀ ਚੁਣਨ ਦੇ ਅਧਿਕਾਰ ਖੜਗੇ ਨੂੰ ਦਿਤੇ- ਇਕ ਖ਼ਬਰ

ਚਾਹੇ ਸੁੱਥਣ ਸੰਵਾ ਦੇ ਚਾਹੇ ਲਹਿੰਗਾ, ਤੇਰੇ ਅੱਗੇ ਥਾਨ ਸੁੱਟਿਆ।

ਜਥੇਦਾਰ ਦੀ ਰਾਘਵ ਚੱਢਾ ਤੇ ਪ੍ਰਨੀਤੀ ਚੋਪੜਾ ਦੀ ਮੰਗਣੀ ‘ਚ ਸ਼ਮੂਲੀਅਤ ਬਣੀ ਚਰਚਾ ਦਾ ਵਿਸ਼ਾ- ਇਕ ਖ਼ਬਰ

ਅੱਡੀ ਮਾਰ ਕੇ ਨੱਚੀ ਜਦੋਂ ਬੰਤੋ, ਪਿੰਡ ‘ਚ ਭੂਚਾਲ ਆ ਗਿਆ।

 

ਐੱਲ.ਆਈ. ਸੀ. ਦੇ ਡੀਵੈਲਪਮੈਂਟ ਅਫ਼ਸਰ ਵਲੋਂ 4 ਕਰੋੜ 30 ਲੱਖ ਤੋਂ ਵੱਧ ਦੀ ਧੋਖਾਧੜੀ- ਇਕ ਖ਼ਬਰ

ਤਾਏ ਦੀ ਧੀ ਚੱਲੀ ਤਾਂ ਮੈਂ ਕਿਉਂ ਰਹਾਂ ‘ਕੱਲੀ।

 

ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਪ੍ਰਧਾਨ ਮੰਤਰੀ ਮੋਦੀ ਨੂੰ ਜੱਫੀ ਪਾ ਕੇ ਮਿਲੇ- ਇਕ ਖ਼ਬਰ

ਤੇਰੀ ਸੱਜਰੀ ਪੈੜ ਦਾ ਰੇਤਾ, ਚੁੱਕ ਚੁੱਕ ਲਾਵਾਂ ਹਿੱਕ ਨੂੰ।

 

ਮੋਦੀ ਨੇ ਕਾਨੂੰਨ ਮੰਤਰੀ ਰੀਜੀਜੂ ਨੂੰ ਉਸ ਦੇ ਬਿਆਨਾਂ ਕਰ ਕੇ ਅਹੁਦੇ ਤੋਂ ਹਟਾਇਆ- ਇਕ ਖ਼ਬਰ

ਭੱਠ ਪਿਆ ਸੋਨਾ ਜਿਹੜਾ ਕੰਨਾਂ ਨੂੰ ਖਾਵੇ।

ਨਗਰ ਨਿਗਮ ਚੋਣਾਂ ਜਲਦੀ ਕਰਵਾਏ ਜਾਣ ਦੀ ਸੰਭਾਵਨਾ- ਇਕ ਖ਼਼ਬਰ

ਹਾਂ ਜੀ! ਤਵਾ ਗਰਮ ਐ, ਦੋ ਮੰਨੀਆਂ ਰਾੜ੍ਹ ਲਉ ਜਲਦੀ।

ਕੇਂਦਰ ਦੇ ‘ਏਜੰਸੀ ਰਾਜ’ ਨੇ ਸਾਡਾ ਕੰਮ ਚੁਣੌਤੀਪੂਰਨ ਬਣਾ ਦਿਤਾ- ਮਮਤਾ

ਸਉਣ ਦਿਆ ਬੱਦਲਾ ਵੇ, ਹੀਰ ਭਿਉਂ ‘ਤੀ ਮਿਜਾਜ਼ਾਂ ਵਾਲ਼ੀ।

ਸਾਫ਼- ਸੁਥਰੀ ਪੰਥਕ ਲੀਡਰਸ਼ਿੱਪ ਦੀ ਉਡੀਕ ‘ਚ ਹਨ ਸਿੱਖ ਸੰਸਥਾਵਾਂ- ਇਕ ਖ਼ਬਰ

ਸਉਣ ਵਿਚ ਆ ਜਾ ਮਿੱਤਰਾ, ਗੁੜ ਵੰਡਦੀ ਪੀਰ ਦੇ ਜਾਵਾਂ।

ਸਿਸੋਦੀਆਂ ਨੇ ਜੇਲ੍ਹ ‘ਚੋਂ ਲਿਖੀ ਚਿੱਠੀ, ਕਵਿਤਾ ਰਾਹੀਂ ਕੇਂਦਰ ਸਰਕਾਰ ‘ਤੇ ਸਾਧੇ ਨਿਸ਼ਾਨੇ- ਇਕ ਖ਼ਬਰ

ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ, ਜੱਗ ਭਾਵੇਂ ਕਰੇ ਨਿੰਦਿਆ।

ਨਾਜਾਇਜ਼ ਉਸਾਰੀਆਂ ਖਿਲਾਫ਼ ਕਾਰਵਾਈ ਕਰਨ ਵਾਲੇ ਅਫ਼ਸਰ ਦੀ ਕਮਿਸ਼ਨਰ ਨੇ ਕੀਤੀ ਬਦਲੀ- ਇਕ ਖਬਰ

ਓਏ ਸਹੁਰੀ ਦਿਆ ਸਾਡੇ ਢਿੱਡ ‘ਤੇ ਕਾਹਨੂੰ ਲੱਤ ਮਾਰਦੈਂ, ਦਫ਼ਾ ਹੋ ਏਥੋਂ।

ਕਿਸਮਤ ਦੇ ਧਨੀ ਨਿਕਲੇ ‘ਜਥੇਦਾਰ’, ਆਈ ਸੁਨਾਮੀ ਫ਼ਿਲਹਾਲ ਟਲ ਗਈ- ਇਕ ਖ਼ਬਰ

ਬੱਕਰੇ ਦੀ ਮਾਂ ਕਿੰਨਾ ਕੁ ਚਿਰ ਖ਼ੈਰ ਮਨਾਏਗੀ।

ਕੇਂਦਰ ਨੇ ਆਰਡੀਨੈਂਸ ਜਾਰੀ ਕਰ ਕੇ ਦੱਸ ਦਿਤਾ ਕਿ ਅੰਤਮ ਫ਼ੈਸਲਾ ਉਸ ਦਾ ਹੀ ਹੋਵੇਗਾ- ਕਪਿਲ ਸਿੱਬਲ

ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।
                                                                        

ਅਮਰੀਕੀਆਂ ‘ਤੇ ਰੂਸ ‘ਚ ਦਾਖ਼ਲੇ ‘ਤੇ ਪਾਬੰਦੀ- ਇਕ ਖ਼ਬਰ

ਡੇਕ ਦਾ ਗੁਮਾਨ ਕਰਦੀ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

ਨੱਢਾ ਜਿੱਥੇ ਵੀ ਜਾਂਦੇ ਹਨ, ਭਾਜਪਾ ਹਾਰ ਜਾਂਦੀ ਹੈ- ਸੰਜੇ ਰਾਊਤ

ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।

ਸੁਪਰੀਮ ਕੋਰਟ ’ਚ ਖੁਲਾਸਾ: ਅਡਾਨੀ ਦੀਆਂ ਕੰਪਨੀਆ ਦੀ ਜਾਂਚ ਸੇਬੀ ਨੇ 2016 ਤੋਂ ਹੀ ਨਹੀਂ ਕੀਤੀ-ਇਕ ਖ਼ਬਰ

ਮਿੱਤਰਾਂ ਦੇ ਫੁਲਕੇ ਨੂੰ, ਨੀਂ ਮੈਂ ਖੰਡ ਦਾ ਪਲੇਥਣ ਲਾਵਾਂ।

14 ਮਈ 2023

ਮਜੀਠੀਆ ਨੇ ਇਨਸਾਫ਼ ਮੰਗ ਰਹੀਆਂ ਕੁੜੀਆਂ ਨੂੰ ਆਪਣੇ ਗੁੰਡਿਆਂ ਤੋਂ ਕੁਟਵਾਇਆ- ਹਰਪਾਲ ਚੀਮਾ

ਗੁੰਡਿਆਂ ਤੋਂ ਕੁਟਵਾਉਣ ਦੀ ਕੀ ਲੋੜ ਸੀ, ਆਪ ਹੀ ਕੁੱਟ ਲੈਂਦੇ।

ਆਮ ਆਦਮੀ ਪਾਰਟੀ ਵਲੋਂ ਚੋਣਾਂ ‘ਚ ਅਫਸਰਸ਼ਾਹੀ ਦੀ ਦੁਰਵਰਤੋਂ ਦਾ ਖ਼ਦਸ਼ਾ- ਚੰਦੂਮਾਜਰਾ

ਪਿੰਡ ਪਏ ਨਹੀਂ ਉਚੱਕੇ ਪਹਿਲਾਂ ਹੀ ਪਹੁੰਚੇ।

 

ਅਕਾਲੀ-ਬਸਪਾ ਸਰਕਾਰ ਬਣਨ ’ਤੇ ਸਿੱਧੂ ਮੂਸੇਵਾਲਾ ਦੇ ਕਤਲ ਲਈ ਜ਼ਿੰਮੇਵਾਰ ਲੋਕਾਂ ਖ਼ਿਲਾਫ਼ ਕਾਰਵਾਈ ਕਰਾਂਗੇ- ਸੁਖਬੀਰ ਬਾਦਲ

ਜਿਹੋ ਜਿਹੀ ਕਾਰਵਾਈ ਤੁਸੀਂ ਬੇਅਦਬੀ ਦੇ ਦੋਸ਼ੀਆਂ ਖ਼ਿਲਾਫ਼ ਕੀਤੀ ਸੀ!

ਵੱਡੇ ਕਰਜ਼ੇ ‘ਚ ਡੁੱਬਿਆ ਅਮਰੀਕਾ, ਡੀਫਾਲਟਰ ਹੋਣ ਦਾ ਖ਼ਤਰਾ- ਅਮਰੀਕਨ ਵਿਤ ਮੰਤਰੀ

ਉੱਚੀਆ ਇਮਾਰਤਾਂ ਦੇ ਸੁਫ਼ਨੇ ਨਾ ਵੇਖ, ਇਹ ਗਿਰ ਜਾਂਦੀਆਂ।
                                                                                                                 

ਅੰਮ੍ਰਿਤਸਰ ਧਮਾਕਿਆਂ ਤੋਂ ਬਾਅਦ ਭਗਵੰਤ ਮਾਨ ਨੂੰ ਅਹੁਦੇ ‘ਤੇ ਬਣੇ ਰਹਿਣ ਦਾ ਹੱਕ ਨਹੀਂ- ਸੁਖਬੀਰ

ਆਪ ਤਾਂ ਤੁਸੀਂ ਨਿਰਦੋਸ਼ ਬੰਦੇ ਮਾਰ ਕੇ ਵੀ ਢੀਠ ਬਣ ਕੇ ਕੁਰਸੀਆਂ ਨੂੰ ਚੁੰਬੜੇ ਰਹੇ ਸੀ।

ਪਾਕਿਸਤਾਨੀ ਅਦਾਕਾਰਾ ਮੋਦੀ ‘ਤੇ ਕੇਸ ਕਰਨਾ ਚਾਹੁੰਦੀ ਹੈ- ਇਕ ਖ਼ਬਰ

ਬੀਬੀ ਸਿਧੀ ਸਿਧੀ ਗੱਲ ਕਰ, ਗੱਲ ਕੁਝ ਹੋਰ ਐ ਤੇ ਕੇਸ ਤਾਂ ਐਵੇਂ ਬਹਾਨਾ ਈ ਐ।   
                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                 

ਸਹਾਇਕ ਲਾਈਨਮੈਨਾਂ ਦੀ ਭਰਤੀ ਲਈ ਬਾਹਰੀ ਰਾਜਾਂ ਦੇ ਨੌਜਵਾਨਾਂ ਨੂੰ ਖੁੱਲ੍ਹ- ਇਕ ਖ਼ਬਰ

ਹੌਲੀ ਹੌਲੀ ਜਹਾਜ਼ੇ ਸਭ ਚਾੜ੍ਹ ਦੇਣੇ, ਮੁੰਡਾ ਕੋਈ ਨਹੀਂ ਪੰਜਾਬ ‘ਚ ਰਹਿਣ ਦੇਣਾ।

ਸਰਕਾਰ- ਕਿਸਾਨ ਮਿਲਣੀ ‘ਚ ਕਿਸਾਨਾਂ ਦੀ ਤਾਂ ਗੱਲ ਹੀ ਨਹੀਂ ਸੁਣੀ ਗਈ- ਇਕ ਖ਼ਬਰ

ਸਰਕਾਰਾਂ ਗੱਲਾਂ ਸੁਣਾਉਂਦੀਆਂ ਨੇ ਸੁਣਦੀਆਂ ਨਹੀ। ਮਨ ਕੀ ਬਾਤ ਸੁਣਿਆਂ ਕਰੋ।

ਭਾਜਪਾ ਨੇ ‘ਆਪ’ ਖ਼ਿਲਾਫ਼ ਚੋਣ ਕਮਿਸ਼ਨ ਕੋਲ ਸ਼ਿਕਾਇਤ ਕੀਤੀ- ਇਕ ਖ਼ਬਰ

ਕਾਹਨੂੰ ਅੱਗ ਉੱਤੇ ਲਿਟੀ ਜਾਂਦੇ ਹੋ, ਸੱਪ ਲੰਘ ਗਿਆ ਲਕੀਰ ਪਿੱਟੀ ਜਾਂਦੇ ਹੋ।

ਸ਼੍ਰੋਮਣੀ ਅਕਾਲੀ ਦਲ ਦੀ ਪੁਨਰ ਸੁਰਜੀਤੀ ਲਈ ਨਵੀਂ ਲੀਡਰਸ਼ਿੱਪ ਦੀ ਲੋੜ- ਇਕ ਖ਼ਬਰ

ਇਕ ਰਾਂਝਣ ਸਾਨੂੰ ਲੋੜੀਦਾ, ਨੀਂ ਇਕ ਰਾਂਝਣ ਸਾਨੂੰ ਲੋੜੀਦਾ।

ਕਰਨਾਟਕ ਵਿਚ ‘ਕਾਂਗਰਸ ਮੁਕਤ ਭਾਰਤ’ ਦਾ ਭਾਜਪਾ ਦਾ ਸੁਪਨਾ ਹੋਇਆ ਚੂਰ ਚੂਰ- ਇਕ ਖ਼ਬਰ

ਵੈਰੀ ਤੇਰੇ ਐਬ ਬੰਦਿਆ, ਹੁੰਦਾ ਰੱਬ ਨਹੀਂ ਕਿਸੇ ਦਾ ਵੈਰੀ।

ਜਾਖੜ ਨੇ ਸਾਰੀ ਉਮਰ ਕਾਂਗਰਸ ਦੇ ਨਾਂ ‘ਤੇ ਖਾਧਾ, ਹੁਣ ਕਾਂਗਰਸ ਨੂੰ ਭੰਡਣਾ ਠੀਕ ਨਹੀਂ- ਰਾਜਾ ਵੜਿੰਗ

ਮਿੱਤਰਾਂ ਨੂੰ ਦਗ਼ਾ ਦੇਣੀਏਂ, ਕੀੜੇ ਪੈਣਗੇ, ਮਰੇਂਗੀ ਸੱਪ ਲੜ ਕੇ।

ਸੁਪਰੀਮ ਕੋਰਟ ਵਲੋਂ ਆਪਣੇ ‘ਲਾਡਲੇ’ ਇਮਰਾਨ ਖ਼ਾਨ ਦਾ ਪੱਖ ਲੈਣਾ ਜਾਰੀ- ਸ਼ਾਹਬਾਜ਼ ਸ਼ਰੀਫ਼

ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਜਿਣਸੀ ਸ਼ੋਸ਼ਣ ਅਤੇ ਮਾਣਹਾਨੀ ਕੇਸ ‘ਚ ਟਰੰਪ ਨੂੰ 50 ਲੱਖ ਡਾਲਰ ਜ਼ੁਰਮਾਨਾ-ਇਕ ਖ਼ਬਰ

ਔਖੀ ਹੋ ਜਾਊ ਕੈਦ ਕੱਟਣੀ, ਕਾਹਨੂੰ ਮਾਰਦੈਂ ਵੇ ਗੋਰਿਆ ਡਾਕੇ।

ਅਸਥਿਰ ਪਾਕਿਸਤਾਨ ਸਾਰੇ ਦੇਸ਼ਾਂ ਲਈ ਖ਼ਤਰਾ- ਫ਼ਾਰੁਕ ਅਬਦੁੱਲਾ

ਚੰਦ ਕੌਰ ਚੱਕਵਾਂ ਚੁੱਲ੍ਹਾ, ਕਿਤੇ ਯਾਰਾਂ ਨੂੰ ਭਿੜਾ ਕੇ ਮਾਰੂ।

• ਭਾਜਪਾ ਦਾ ਅਕਾਲੀ ਦਲ ਨਾਲ ਗੱਠਜੋੜ ਕਿਸੇ ਵੀ ਕੀਮਤ ‘ਤੇ ਨਹੀਂ ਹੋਵੇਗਾ- ਅਸ਼ਵਨੀ ਕੁਮਾਰ

+ ਤੇਰੀ ਮੇਰੀ, ਮੇਰੀ ਤੇਰੀ ਨਹੀਂ ਨਿਭਣੀ, ਤੂੰ ਤੇਲਣ ਮੈਂ ਸੁਨਿਆਰਾ।

• ਬੀਬੀ ਜਗੀਰ ਕੌਰ ਵਲੋਂ ਭਾਜਪਾ ਨੂੰ ਸਮਰਥਨ ਦੇਣ ਤੋਂ ਪਹਿਲਾਂ ਸ਼ਰਤਾਂ ਦਾ ਚਿੱਠਾ ਦੇਣ ਦੇ ਸੰਕੇਤ-ਇਕ ਖ਼ਬਰ

+ ਸਾਨੂੰ ਜੇ ਤੂੰ ਲੈ ਕੇ ਦੇਵੇਂ ਕੱਚ ਦੀਆਂ ਚੂੜੀਆਂ, ਤਾਂ ਹੀ ਗੱਲਾਂ ਹੋਣਗੀਆਂ ਤੇਰੇ ਨਾਲ਼ ਗੂੜ੍ਹੀਆਂ।

• ਅਕਾਲੀ ਧੜਿਆਂ ‘ਚ ਏਕਤਾ ਲਈ ਜਥੇਦਾਰ ਸਾਰੇ ਧੜਿਆਂ ਦੇ ਪ੍ਰਧਾਨਾਂ ਦੇ ਅਸਤੀਫ਼ੇ ਲੈ ਕੇ ਇਕ ਕਮੇਟੀ ਬਣਾਉਣ-ਢੀਂਡਸਾ

+ ਢੀਂਡਸਾ ਸਾਬ੍ਹ, ਪ੍ਰੋ. ਮਨਜੀਤ ਸਿੰਘ ਜਥੇਦਾਰ ਬਾਥਰੂਮ ‘ਚ ਲੁਕ ਕੇ ‘ਬਾਦਲ ਬਰੀਗੇਡ’ ਤੋਂ ਬਚਿਆ ਸੀ।

• ‘ਆਪ’ ਝੂਠ ਤੇ ਫਰੇਬ ਦੀ ਰਾਜਨੀਤੀ ਕਰ ਰਹੀ ਹੈ- ਸੇਖੋਂ, ਗਿੱਲ

+ ਉਸ ਪਾਰਟੀ ਦਾ ਨਾਮ ਦੱਸੋ ਜਿਹੜੀ ਅਜਿਹੀ ਰਾਜਨੀਤੀ ਨਹੀਂ ਕਰਦੀ।

• ਬਾਦਲ ਦੇ ਭੋਗ ਮੌਕੇ ਪੰਥਕ ਏਕਤਾ ਦੇ ਨਾਲ ਨਾਲ ਭਾਜਪਾ ਨਾਲ ਗੱਠਜੋੜ ਦੀ ਗੱਲ ਚੱਲੀ-ਇਕ ਖ਼ਬਰ

+ ਪੱਲਾ ਮਾਰ ਕੇ ਬੁਝਾ ਗਈ ਦੀਵਾ, ਅੱਖ ਨਾਲ ਗੱਲ ਕਰ ਗਈ।

• ‘ਆਪ’ ਤੇ ਭਾਜਪਾ ਇਕੋ ਸਿੱਕੇ ਦੇ ਦੋ ਪਹਿਲੂ ਹਨ- ਰਾਜਾ ਵੜਿੰਗ

+ ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

• ਭਾਰਤ ਦੇ ਸਰਬਪੱਖੀ ਵਿਕਾਸ ਲਈ ਭਾਜਪਾ ਦਾ ਸੱਤਾ ‘ਚ ਰਹਿਣਾ ਜ਼ਰੂਰੀ- ਕੈਪਟਨ ਅਮਰਿੰਦਰ ਸਿੰਘ

+ ਆਪਣੀ ਖੱਲ ਬਚਾਉਣ ਲਈ ਕੁਝ ਲੋਕਾਂ ਦਾ ਭਾਜਪਾ ‘ਚ ਜਾਣਾ ਵੀ ਜ਼ਰੂਰੀ।

• ਕਾਂਗਰਸ ਅਤੇ ‘ਆਪ’ ਪਾਰਟੀ ਦੀਆਂ ਗ਼ਲਤ ਨੀਤੀਆਂ ਕਰਕੇ ਪੰਜਾਬ ਨਸ਼ਿਆਂ ਦੀ ਗ੍ਰਿਫ਼ਤ ਵਿਚ-ਅਨੁਰਾਗ ਠਾਕੁਰ

+ ਲਗਦੈ ਅਕਾਲੀਆਂ ਨਾਲ ਗੰਢਤੁੱਪ ਦੀ ਝਾਕ ਹੈਗੀ ਅਜੇ, ਤਾਂ ਹੀ ਉਨ੍ਹਾਂ ਦਾ ਨਾਮ ਨਹੀਂ ਲਿਆ।

• ਕੌਮ ਦੀ ਚੜ੍ਹਦੀ ਕਲਾ ਲਈ ਆਪਸੀ ਮੱਤਭੇਦਾਂ ਅਤੇ ਮੁਫ਼ਾਦਾਂ ਨੂੰ ਤਿਆਗਣਾ ਪਵੇਗਾ- ਜਥੇਦਾਰ ਹਰਪ੍ਰੀਤ ਸਿੰਘ

+ ਨਾ ਨੌਂ ਮਣ ਤੇਲ ਹੋਵੇਗਾ, ਨਾ ਰਾਧਾ ਨੱਚੇਗੀ।

• ਅਖੀਰ ਤੱਕ ਭਾਜਪਾ ਨੇ ਵੱਡੇ ਬਾਦਲ ਨਾਲ ਨਿਭਾਈ ਯਾਰੀ-ਇਕ ਖ਼ਬਰ

+ ਮਿੱਤਰਾਂ ਦਾ ਨਾਂ ਸੁਣ ਕੇ, ਮੈਂ ਧਰਤੀ ਪੈਰ ਨਾ ਲਾਵਾਂ।

• ਦੁਨੀਆ ਦੀ ਮਹਾਂਸ਼ਕਤੀ ਅਮਰੀਕਾ ’ਤੇ ਮੰਡਰਾ ਰਿਹਾ ਹੈ ਆਰਥਕ ਮੰਦੀ ਦਾ ਖ਼ਤਰਾ- ਇਕ ਖ਼ਬਰ

+ ਰੰਗ ਪੈ ਗਿਆ ਕਿਉਂ ਤੇਰਾ ਪੀਲਾ, ਭਾਬੋ ਮੈਨੂੰ ਰੋਜ਼ ਪੁੱਛਦੀ।

• ਮੋਦੀ ਉਪਨਾਮ ਮਾਮਲਾ: ਗੁਜਰਾਤ ਹਾਈ ਕੋਰਟ ਨੇ ਰਾਹੁਲ ਗਾਂਧੀ ਨੂੰ ਨਹੀਂ ਦਿਤੀ ਰਾਹਤ- ਇਕ ਖ਼ਬਰ

08 ਮਈ 2023

+ ਡੇਕ ਦਾ ਗੁਮਾਨ ਕਰਦੀ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

• ਆਪਸੀ ਵਿਵਾਦ ਨਹੀਂ ਸੁਲਝਦੇ ਤਾਂ ਵਿਆਹ ਖਤਮ ਕੀਤਾ ਜਾ ਸਕਦਾ ਹੈ, ਛੇ ਮਹੀਨੇ ਉਡੀਕ ਕਰਨ ਦੀ ਲੋੜ ਨਹੀਂ- ਸੁਪਰੀਮ ਕੋਰਟ

+ ਭੱਠ ਪਿਆ ਸੋਨਾ, ਜਿਹੜਾ ਕੰਨਾਂ ਨੂੰ ਖਾਵੇ।

• ਪ੍ਰੈੱਸ ਦੀ ਆਜ਼ਾਦੀ ਨੂੰ ਬਚਾਉਣ ਲਈ ਪੱਤਰਕਾਰ ਭਾਈਚਾਰੇ ਨੂੰ ਇਕਜੁੱਟ ਹੋਣ ਦੀ ਲੋੜ-ਇਕ ਖ਼ਬਰ

+ ਲੋਕੋ ਜਾਗਦੇ ਰਹਿਣਾ, ਗੱਡੀ ਜ਼ਾਲਮਾਂ ਦੀ ਆਈ।

• ਅਜੈਪਾਲ ਸਿੰਘ ਬੰਗਾ ਬਣੇ ਵਿਸ਼ਵ ਬੈਂਕ ਦੇ ਨਵੇਂ ਚੇਅਰਮੈਨ- ਇਕ ਖ਼ਬਰ

+ ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।

30 ਅਪ੍ਰੈਲ 2023

ਨਿਤੀਸ਼- ਮਮਤਾ ਮੁਲਾਕਾਤ- ਵਿਰੋਧੀ ਦਲਾਂ ਨੂੰ ਇਕ ਜੁੱਟ ਹੋ ਕੇ ਰਣਨੀਤੀ ਬਣਾਉਣ ਦੀ ਵਕਾਲਤ- ਇਕ ਖ਼ਬਰ

ਸਉਣ ਵਿਚ ਆ ਜਾ ਮਿੱਤਰਾ, ਗੁੜ ਵੰਡਦੀ ਪੀਰ ਦੇ ਜਾਵਾਂ।

ਅੰਮ੍ਰਿਤਪਾਲ ਨੂੰ ਪਹਿਲਾਂ ਹੀ ਗ੍ਰਿਫ਼ਤਾਰ ਕਰ ਲੈਣਾ ਚਾਹੀਦਾ ਸੀ- ਕੈਪਟਨ ਅਮਰਿੰਦਰ ਸਿੰਘ

ਕੈਪਟਨ ਸਾਬ ਤੁਹਾਨੂੰ ਵੀ ਪਹਿਲਾਂ ਹੀ ਭਾਜਪਾ ‘ਚ ਚਲੇ ਜਾਣਾ ਚਾਹੀਦਾ ਸੀ।

ਭਗਵੰਤ ਮਾਨ ਨੂੰ ਸਰਕਾਰ ਚਲਾਉਣ ਦੀ ਸਮਝ ਨਹੀਂ- ਕੈਪਟਨ

ਐਵੇਂ ਹੀ ਭੱਜਿਆ ਫਿਰਦੈ, ਮਹਿਲਾਂ ‘ਚ ਬੈਠ ਕੇ ਮੌਜ ਨਾਲ ਚੀਕੂ ਤੇ ਸੀਤਾਫ਼ਲ ਖਾਵੇ।

ਕੋਤਵਾਲੀ ਗੁਰਦੁਆਰੇ ਦੀ ਘਟਨਾ ਨਾਲ ਸਿੱਖ ਸੰਗਤਾਂ ਦੇ ਮਨ ਵਲੂੰਧਰੇ ਗਏ- ਸੁਖਬੀਰ ਬਾਦਲ

ਤੁਹਾਡੇ ਤਾਂ ਉਦੋਂ ਵੀ ਨਾ ਵਲੂੰਧਰੇ ਗਏ ਜਦੋਂ ਬਰਗਾੜੀ ‘ਚ ਗੁਰੂ ਸਾਹਿਬ ਦੇ ਅੰਗ ਖਿਲਾਰੇ ਗਏ ਸੀ।

2024 ਤੇ 2027 ਦੀਆਂ ਚੋਣਾਂ ਭਾਜਪਾ ਇਕੱਲਿਆਂ ਹੀ ਲੜੇਗੀ- ਆਰ.ਪੀ.ਸਿੰਘ

ਘੜਾ ਚੁੱਕ ਲਉਂ ਪੱਟਾਂ ‘ਤੇ ਹੱਥ ਧਰ ਕੇ, ਖ਼ਸਮਾਂ ਨੂੰ ਖਾਣ ਕੁੜੀਆਂ।

ਬੰਦੀ ਸਿੰਘਾਂ ਦੀ ਰਿਹਾਈ ਦੇ ਮੁੱਦੇ ‘ਤੇ ਅਕਾਲੀ ਦਲ ਨੇ ‘ਆਪ’ ਦੇ ਬਾਈਕਾਟ ਦਾ ਸੱਦਾ ਦਿਤਾ- ਇਕ ਖ਼ਬਰ

ਅਕਾਲੀਉ! ਤਾਕਤ ‘ਚ ਹੁੰਦਿਆਂ ਤੁਸੀਂ ਬੰਦੀ ਸਿੰਘ ਕਿਉਂ ਨਾ ਰਿਹਾ ਕੀਤੇ?

ਕਾਂਗਰਸ ਨੇ ਸੱਤਾ ‘ਚ ਆਉਣ ਲਈ ‘ਧਰਮ’ ਦਾ ਇਸਤੇਮਾਲ ਕੀਤਾ- ਰਾਜਨਾਥ ਸਿੰਘ

ਪੀੜ੍ਹੀ ਆਪਣੀ ਹੇਠ ਸੋਟਾ ਫੇਰ ਲਈਏ, ਉਂਗਲ ਫੇਰ ਕਿਸੇ ਵਲ ਚੁੱਕੀਏ ਜੀ।

ਕੇਜਰੀਵਾਲ ਨੇ ਬੰਗਲੇ ਦੀ ਸਜਾਵਟ ‘ਤੇ ਖਰਚੇ 45 ਕਰੋੜ- ਭਾਜਪਾ

ਪਤਾ ਲੱਗਿਐ ਜੀ ਕਿ ਪ੍ਰਧਾਨ ਮੰਤਰੀ ਲਈ 500 ਕਰੋੜ ਦਾ ਘਰ ਬਣ ਰਿਹੈ।

ਪੰਜਾਬ ‘ਚ ਭ੍ਰਿਸ਼ਟਾਚਾਰ ਦਾ ਪੂਰੀ ਤਰ੍ਹਾਂ ਖਾਤਮਾ ਕਰ ਦਿਤਾ- ਮੁੱਖ ਮੰਤਰੀ

ਮਾਨ ਸਾਬ੍ਹ ਗੱਪਾਂ ਮਾਰਨ ਲਈ ਹੋਰ ਬੰਦਾ ਹੈਗਾ, ਤੁਸੀਂ ਨਾ ਇਹ ਕੰਮ ਕਰੋ।

‘ਆਪ’ ਸਰਕਾਰ ਨੂੰ ਟਿੱਚ ਜਾਣਦੇ ਨੇ ਪ੍ਰਾਈਵੇਟ ਸਕੂਲ- ਇਕ ਖ਼ਬਰ

ਕਿੱਥੋਂ ਨੀ ਤੂੰ ਆਈ ਸ਼ੂਕਰੇ, ਸਾਨੂੰ ਟਿੱਚ ਕਰ ਕੇ ਤੂੰ ਜਾਣੇ।

ਖਾਸ ਲੋਕਾਂ ਦੀ ਬਣ ਕੇ ਰਹਿ ਗਈ ਹੈ ਆਮ ਆਦਮੀ ਪਾਰਟੀ- ਪ੍ਰਤਾਪ ਸਿੰਘ ਬਾਜਵਾ

ਹੋਕਾ ਵੰਙਾਂ ਦਾ, ਕੱਢ ਦਿਖਾਇਆ ਚੱਕੀਰਾਹਾ।

ਜਿੰਨੇ ਮਰਜ਼ੀ ਪਰਚੇ ਕਰ ਲਵੋ, ਡਟ ਕੇ ਵਿਰੋਧ ਕਰਦਾ ਰਹਾਂਗਾ- ਖਹਿਰਾ

ਗੱਲ ਸੋਚ ਕੇ ਕਰੀਂ ਠਾਣੇਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।

ਭਲਵਾਨਾਂ ਦੇ ਹੱਕ’ਚ ਆਏ ਹਾਕੀ ਟੀਮ ਦੇ ਸਾਬਕਾ ਕਪਤਾਨ ਪਰਗਟ ਸਿੰਘ- ਇਕ ਖ਼ਬਰ

ਚਰਖ਼ੇ ਦੀ ਘੂਕ ਸੁਣ ਕੇ, ਜੋਗੀ ਉੱਤਰ ਪਹਾੜੋਂ ਆਇਆ।

ਮਾਨ ਸਰਕਾਰ ਨੇ ਲੋਕਾਂ ਦਾ ਭਰੋਸਾ ਤੋੜਿਆ- ਪਵਨ ਟੀਨੂੰ

ਲਾਰਾ ਲਾ ਕੇ ਨੱਤੀਆਂ ਦਾ, ਨੀਂ ਮਾਹੀ ਮੇਰਾ ਮੁਕਰ ਗਿਆ।

ਹੁਣ ਪਿੰਡਾਂ ਤੇ ਕਸਬਿਆਂ ‘ਚ ਵੀ ਮੰਤਰੀ ਮੰਡਲ ਦੀਆਂ ਹੋਣਗੀਆਂ ਮੀਟਿੰਗਾਂ- ਭਗਵੰਤ ਮਾਨ

ਵਿਹੜੇ ਲਾ ਤ੍ਰਿਵੈਣੀ, ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ।

23 ਅਪ੍ਰੈਲ 2023

ਪੰਜਾਬ ਦੇ ਚੰਗੇ ਭਵਿੱਖ ਅਤੇ ਵਿਕਾਸ ਲਈ ਲੋਕਾਂ ਨੂੰ ਭਾਜਪਾ ਤੋਂ ਆਸਾਂ- ਹੰਸ ਰਾਜ ਹੰਸ

ਬਿਲਕੁਲ ਸਹੀ ਜਨਾਬ ਤੁਹਾਡਾ ਵਿਕਾਸ ਵੀ ਇਥੇ ਜਾ ਕੇ ਹੀ ਹੋਇਆ ਸੀ।

ਸਾਡੇ ‘ਤੇ ‘ਆਪ’ ‘ਚ ਸ਼ਾਮਲ ਹੋਣ ਲਈ ਦਬਾਅ ਬਣਾਇਆ ਜਾ ਰਿਹੈ-ਕਾਂਗਰਸੀ ਸਰਪੰਚ

ਸਾਡੀ ਧਾਰ ਕੱਢ ਜਾ ਭਰਜਾਈਏ, ਛੜਾ ਜੇਠ ਮਾਰੇ ਬੋਲੀਆਂ।

‘ਆਪ’ ਤੇ ਕਾਂਗਰਸ ਤੋਂ ਪੰਜਾਬ ਦੇ ਲੋਕ ਪੂਰੀ ਤਰ੍ਹਾਂ ਅੱਕ ਚੁੱਕੇ ਹਨ- ਸਿਕੰਦਰ ਸਿੰਘ ਮਲੂਕਾ

ਤੁਹਾਡੇ ਕੋਲੋਂ ਵੀ ਅੱਕੇ ਹੋਏ ਲੋਕਾਂ ਨੇ ਹੀ ਤੁਹਾਨੂੰ ਤਿੰਨ ਸੀਟਾਂ ਤੱਕ ਲੈ ਆਂਦਾ ਸੀ।

ਅੰਸਾਰੀ ਦੀ ਪੰਜਾਬ ‘ਚ ਹੋਈ ਸ਼ਾਹੀ ਮਹਿਮਾਨ ਨਿਵਾਜ਼ੀ ਦੀ ਪੜਤਾਲ ਕਰੇ ਪੰਜਾਬ ਸਰਕਾਰ- ਬੀਰ ਦਵਿੰਦਰ ਸਿੰਘ

ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।               
                             

ਜਲੰਧਰ ਜ਼ਿਮਨੀ ਚੋਣ ਵਿਚ ਸ਼੍ਰੋਮਣੀ ਅਕਾਲੀ ਦਲ(ਸੰਯੁਕਤ) ਵਲੋਂ ਭਾਜਪਾ ਦੇ ਸਮਰਥਨ ਦਾ ਐਲਾਨ- ਇਕ ਖ਼ਬਰ

ਮੁੰਡਾ (ਸੁਖਦੇਵ ਸਿੰਘ ਢੀਂਡਸਾ) ਮੋਹ ਲਿਆ ਤਵੀਤਾਂ ਵਾਲ਼ਾ, ਦਮੜੀ ਦਾ ਸੱਕ ਮਲ਼ ਕੇ।

ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ  ਕਮੇਟੀ ਦਾ ਪ੍ਰਧਾਨ ਨਸ਼ਈ-ਦਾਦੂਵਾਲ

ਨਸ਼ਾ ਤਾਂ ਕੁਰਸੀ ਦਾ ਵੀ ਬਹੁਤ ਮਾੜਾ ਹੁੰਦੈ ਦਾਦੂਵਾਲ ਸਾਹਿਬ ਜੀ।

 ‘ਆਪ’ ਨੇ ਲੋਕਾਂ ਨਾਲ ਝੂਠੇ ਵਾਅਦੇ ਕਰ ਕੇ ਸੂਬੇ ‘ਚ ਸਰਕਾਰ ਬਣਾਈ- ਡਿੰਪਾ

ਹੱਥ ‘ਚ ਗੁਟਕਾ ਫੜ ਕੇ ਤੇ ਦਮਦਮਾ ਸਾਹਿਬ ਵਲ ਮੂੰਹ ਕਰ ਕੇ ਕਸਮਾਂ ਤਾਂ ਨਹੀਂ ਨਾ ਖਾਧੀਆਂ।

ਦਾਦੂਵਾਲ ਦੀ ਨਜ਼ਰ ਸਿਰਫ਼ ਪ੍ਰਧਾਨਗੀ ਦੀ ਕੁਰਸੀ ਉਪਰ ਹੈ- ਮਹੰਤ ਕਰਮਜੀਤ ਸਿੰਘ

ਕੰਢੇ ਕੰਢੇ ਹੀਰ ਭਾਲਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਐਮ.ਐਸ.ਪੀ.ਨਾਲ ਜੁੜੀ ਕਮੇਟੀ ਕਮਜ਼ੋਰ, ਸਰਕਾਰ ਦੀ ਨੀਅਤ ‘ਤੇ ਸ਼ੱਕ- ਕਾਂਗਰਸ

ਮਾਂਏਂ ਕਿਵੇਂ ਮੈਂ ਯਕੀਨ ਕਰ ਲਾਂ, ਮੁੰਡਾ ਰੱਖਦਾ ਦਿਲੇ ‘ਚ ਬੇਈਮਾਨੀ।

ਜੂਨ 2023 ਤੱਕ ਚੀਨ ਨੂੰ ਪਛਾੜ ਕੇ ਭਾਰਤ ਬਣ ਜਾਵੇਗਾ ਸਭ ਤੋਂ ਵੱਧ ਆਬਾਦੀ ਵਾਲਾ ਦੇਸ਼-ਇਕ ਖ਼ਬਰ

ਸਾਨੂੰ ਦਿਉ ਵਧਾਈਆਂ ਜੀ, ਬਣ ਜਾਣਾ ਵਿਸ਼ਵ ਗੁਰੂ ਅਸੀਂ।

ਕੇਂਦਰ ਸਰਕਾਰ ਜਾਂਚ ਏਜੰਸੀਆਂ ਦੀ ਦੁਰਵਰਤੋਂ ਕਰ ਰਹੀ ਹੈ-ਹਰਪਾਲ ਚੀਮਾ

ਆ ਵੇ ਮਾਹੀ ਬਹਿ ਵੇ ਮਾਹੀ, ਦਿਲ ਦਾ ਹਾਲ ਸੁਣਾਵਾਂ।

ਸੀ.ਬੀ.ਆਈ. ਤੇ ਈ.ਡੀ. ਵਰਗੀਆਂ ਏਜੰਸੀਆਂ ਤੱਥਾਂ ਦੇ ਆਧਾਰ ‘ਤੇ ਕੰਮ ਕਰਦੀਆਂ ਹਨ-ਸੰਬਿਤ ਪਾਤਰਾ

ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਪੰਜਾਬ ‘ਤੇ ਰਾਜ ਕਰਨ ਵਾਲੀਆਂ ਸਿਆਸੀ ਪਾਰਟੀਆਂ ਨੇ ਹੀ ਪੰਜਾਬ ਦੇ ਹਿਤਾਂ ਦਾ ਘਾਣ ਕੀਤਾ-ਡਾ.ਗੁਰਮੇਜ ਸਿੰਘ ਮਠਾੜੂ

ਫਕਰਦੀਨਾ ਕੀ ਦੱਸਾਂ ਹਾਲ ਤੈਨੂੰ, ਚੰਦਰੀ ਵਾੜ ਹੀ ਖਾ ਗਈ ਏ ਖੇਤ ਸਾਰਾ। 

ਆਸਟਰੇਲੀਆ ਦੀਆਂ 5 ਯੂਨੀਵਰਸਿਟੀਆਂ ਨੇ ਭਾਰਤੀ ਵਿਦਿਆਰਥੀਆਂ ਦਾ ਕੀਤਾ ਦਾਖ਼ਲਾ ਬੰਦ-ਇਕ ਖ਼ਬਰ

ਕੀਤੀਆਂ ਲੱਧੀ ਦੀਆਂ, ਪੇਸ਼ ਦੁੱਲੇ ਦੇ ਆਈਆਂ।

ਸਾਬਕਾ ਮੰਤਰੀ ਮਦਨ ਮੋਹਨ ਮਿੱਤਲ ਅਕਾਲੀ ਦਲ ਛੱਡ ਮੁੜ ਭਾਜਪਾ ‘ਚ ਜਾਣ ਲਈ ਤਿਆਰ- ਇਕ ਖ਼ਬਰ

ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਸਾਬਕਾ ਮੁੱਖ ਮੰਤਰੀ ਵਿਜੇ ਰੁਪਾਨੀ ਤੇ ਲਾਲਪੁਰਾ ਵਲੋਂ ਬੀਬੀ ਜਗੀਰ ਕੌਰ ਨਾਲ ਮੁਲਾਕਾਤ- ਇਕ ਖ਼ਬਰ

ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

17 ਅਪ੍ਰੈਲ 2023

ਡਾ. ਹਮਦਰਦ ਵਲੋਂ ਜੰਗੇ-ਆਜ਼ਾਦੀ ਯਾਦਗਾਰ ਦੇ ਸਾਰੇ ਅਹੁਦਿਆਂ ਤੋਂ ਅਸਤੀਫ਼ਾ- ਇਕ ਖ਼ਬਰ

ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲਾ ਤਿਲਕ ਪਿਆ।

ਕਿਸਾਨਾਂ ਦੀਆਂ ਮੰਗਾਂ ਨੂੰ ਲਾਗੂ ਕਰਨ ਤੋਂ ਮੁੱਕਰੀ ਪੰਜਾਬ ਸਰਕਾਰ-ਡੱਲੇਵਾਲ

ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦੇ ਹੱਕ ਮਾਰ ਕੇ।

ਸੁਰਿੰਦਰ ਚੌਧਰੀ ਪੰਜਾਂ ਦਿਨਾਂ ਬਾਅਦ ਹੀ ‘ਆਪ’ ਨੂੰ ਛੱਡ ਕੇ ਕਾਂਗਰਸ ‘ਚ ਮੁੜ ਗਿਆ- ਇਕ ਖ਼ਬਰ

ਘਰਾਂ ਵਾਲਿਓ ਅਪਣੇ ਘਰ ਅੰਦਰ, ਅਸੀਂ ਆਏ ਹਾਂ ਵਾਂਗ ਪ੍ਰਾਹੁਣਿਆਂ ਦੇ।

ਪੰਜਾਬ ‘ਚ ਆਮ ਆਦਮੀ ਲਈ ਮੁਗ਼ਲਾਂ ਦੀ ਸਰਕਾਰ- ਚਰਨਜੀਤ ਸਿੰਘ ਚੰਨੀ

ਟੁੱਟ ਪੈਣੇ ਛੜੇ ਜੇਠ ਨੇ, ਮੇਰੇ ਮੂੰਹ ‘ਤੇ ਬੈਟਰੀ ਮਾਰੀ।

ਪੰਜਾਬੀ ਸਮੇਤ 13 ਖੇਤਰੀ ਭਾਸ਼ਾਵਾਂ ‘ਚ ਸੀ.ਪੀ.ਏ.ਐਫ. ਦੀਆਂ ਪ੍ਰੀਖਿਆਵਾਂ ਹੋਣਗੀਆਂ- ਇਕ ਖ਼ਬਰ

ਰੋਏ ਬਿਨਾਂ ਤਾਂ ਮਾਂ ਵੀ ਦੁੱਧ ਨਹੀਂ ਦਿੰਦੀ।

ਸੰਤ ਮਾਨ ਸਿੰਘ ਦੇ ਲੋਕ ਭਲਾਈ ਦੇ ਕਾਰਜਾਂ ਨੂੰ ਭੁਲਾਇਆ ਨਹੀਂ ਜਾ ਸਕਦਾ- ਬਾਬਾ ਸ਼ਿਕਾਗੋ ਵਾਲਾ

ਭੈੜੇ ਭੈੜੇ ਯਾਰ ਮੇਰੀ ਫੱਤੋ ਦੇ।

ਸੁਖਬੀਰ ਬਾਦਲ ਨੇ ਪ੍ਰਧਾਨ ਮੰਤਰੀ ਨੂੰ ਅਪੀਲ ਕੀਤੀ ਕਿ ਕਾਲੇ ਕਾਨੂੰਨ ਤੁਰੰਤ ਰੱਦ ਕੀਤੇ ਜਾਣ-ਇਕ ਖ਼ਬਰ

ਗਿੱਦੜਾਂ ਦੀ ਜੰਨ ਚੜ੍ਹਦੀ, ਜਿੱਥੇ ਸੈਹਾ ਬੋਲੀਆਂ ਪਾਵੇ।

ਬਾਦਲਾਂ ਨੇ ਸੂਬੇ ਅਤੇ ਆਮ ਲੋਕਾਂ ਨਾਲੋਂ ਵੱਧ ਆਪਣੇ ਸਵਾਰਥਾਂ ਨੂੰ ਅਹਿਮੀਅਤ ਦਿਤੀ-ਭਗਵੰਤ ਮਾਨ

ਤੇਰੇ ਲਾ ਕੇ ਦੰਦਾਂ ਵਿਚ ਮੇਖਾਂ, ਮੌਜ ਸੁਨਿਆਰਾ ਲੈ ਗਿਆ।

ਸਾਬਕਾ ਮੁੱਖ ਮੰਤਰੀ ਚੰਨੀ ਨੂੰ ਵਿਜੀਲੈਂਸ ਨੇ ਭੇਜਿਆ ਸੰਮਨ-ਇਕ ਖ਼ਬਰ

ਸਹੁਰਿਆਂ ਦਾ ਪਿੰਡ ਆ ਗਿਆ, ਘੁੰਡ ਕੱਢ ਲੈ ਪਤਲੀਏ ਨਾਰੇ।

ਸਾਬਕਾ ਮੇਅਰ ਜਗਦੀਸ਼ ਰਾਜਾ ਨੂੰ ਮਨਾਉਣ ਲਈ ਪਹੁੰਚੇ ਪ੍ਰਤਾਪ ਸਿੰਘ ਬਾਜਵਾ-ਇਕ ਖ਼ਬਰ

ਅੜੀ ਵੇ ਅੜੀ ਨਾ ਕਰ ਬਹੁਤੀ ਤੂੰ ਅੜੀ, ਚੋਣ ਸਿਰ ‘ਤੇ ਖੜ੍ਹੀ।

ਬੀ.ਬੀ.ਸੀ. ਖ਼ਿਲਾਫ਼ ਹੁਣ ਈ.ਡੀ. ਕਰੇਗੀ ਫੇਮਾ ਦੀ ਉਲੰਘਣਾ ਦੀ ਜਾਂਚ-ਇਕ ਖ਼ਬਰ

ਕੁੜਤੀ ਦਾ ਰੰਗ ਵੇਖ ਕੇ, ਪੁੱਛਦੇ ਫਿਰ ਲਲਾਰੀ।

ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਵਲੋਂ ਜਲੰਧਰ ਜਿਮਨੀ ਚੋਣ ਨਾ ਲੜਨ ਦਾ ਫ਼ੈਸਲਾ- ਇਕ ਖ਼ਬਰ

ਜਿਗਰੀ ਯਾਰ ਬਿਨਾਂ, ਕੋਈ ਨਾ ਦਿਲਾਂ ਦਾ ਜਾਨੀ।

ਰਾਹੁਲ,ਖੜਗੇ ਅਤੇ ਨਿਤੀਸ਼ ਨੇ ਵਿਰੋਧੀ ਪਾਰਟੀਆਂ ਨੂੰ ਇਕ ਜੁੱਟ ਕਰਨ ਦਾ ਸੰਕਲਪ ਲਿਆ- ਇਕ ਖ਼ਬਰ

ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।

ਦੇਸ਼ ਦੇ 29 ਮੌਜੂਦਾ ਮੁੱਖ ਮੰਤਰੀ ਹਨ ਕਰੋੜਪਤੀ- ਇਕ ਰਿਪੋਰਟ

ਇਕ ਤੇਰਾ ਰੰਗ ਮੁਸ਼ਕੀ, ਦੂਜੇ ਡਾਹ ਲਿਆ ਗਲ਼ੀ ਦੇ ਵਿਚ ਚਰਖ਼ਾ।

ਭਾਰਤ ਹੁਣ ਪਾਕਿਸਤਾਨ ਅਤੇ ਚੀਨ ਨਾਲ਼ ਨਜਿੱਠ ਸਕਦਾ ਹੈ- ਜੈਸ਼ੰਕਰ

ਜਿਹੜੀਆਂ ਲੈਣ ਉਡਾਰੀਆਂ ਨਾਲ਼ ਬਾਜ਼ਾਂ, ਉਹ ਬੁਲਬੁਲਾਂ ਠੀਕ ਮਰੀਂਦੀਂਆਂ ਨੇ।