09 ਜਨਵਰੀ 2023

ਲੰਮੇ ਸਮੇਂ ਤੋਂ ਆਪਣੇ ਬੈਂਕ ਖਾਤਿਆਂ ’ਚੋਂ ਤਨਖਾਹਾਂ ਨਾ ਕਢਵਾਉਣ ਵਾਲੇ ਅਫ਼ਸਰਾਂ ‘ਤੇ ਸਰਕਾਰ ਦੀ ਨਜ਼ਰ-ਇਕ ਖ਼ਬਰ

ਆਉਣ ਜਾਣ ਲਈ ਤਾਂ ਕਾਰ ਰੱਖੀ ਐ, ਬੁਲੇਟ ਤਾਂ ਰੱਖਿਐ ਪਟਾਕੇ ਪਾਉਣ ਨੂੰ।

 ਪਾਰਟੀ ਦੇ ਹਰ ਵਰਕਰ ਦੀ ਰਾਇ ਲਵਾਂਗੇ-ਸੁਖਬੀਰ ਬਾਦਲ

ਪਰ ਹੋਊਗਾ ਉਹੀ ਜੋ ਅਸੀਂ ਚਾਹਾਂਗੇ।

2047 ਤੱਕ ਭਾਰਤ ‘ਚ ਪ੍ਰਤੀ ਵਿਅਕਤੀ ਆਮਦਨ 10,000 ਡਾਲਰ ਹੋ ਜਾਵੇਗੀ- ਭਾਰਤੀ ਆਰਥਿਕ ਸਲਾਹਕਾਰ

ਜਿਵੇਂ ਕਿਸਾਨਾਂ ਦੀ ਆਮਦਨ ਦੁੱਗਣੀ ਹੋ ਗਈ ਬਈ।

ਮੀਡੀਆ ਨੂੰ ਮੇਰੀ ਟੀ-ਸ਼ਰਟ ਦਿਖਦੀ ਹੈ, ਗ਼ਰੀਬਾਂ ਦੇ ਪਾਟੇ ਕੱਪੜੇ ਨਹੀਂ- ਰਾਹੁਲ ਗਾਂਧੀ

ਗ਼ਰੀਬ! ਕਿੱਥੇ ਨੇ ਗ਼ਰੀਬ? 32 ਰੁਪਏ ਰੋਜ਼ਾਨਾ ‘ਚ ਐਸ਼ਾਂ ਕਰ ਰਹੇ ਨੇ ਲੋਕ।

ਅਕਾਲੀ ਦਲ ਨੂੰ ਕਿਸਾਨਾਂ ਲਈ ਕੀਤੀ ਕੁਰਬਾਨੀ ਮਹਿੰਗੀ ਪੈ ਗਈ-ਸੁਖਬੀਰ ਬਾਦਲ

ਲਉ ਜੀ, ਹੋਰ ਸੁਣੋ, ਕਿਸਾਨੀ ਬਿੱਲਾਂ ਦੇ ਹੱਕ ‘ਚ ਬੋਲਣ ਨੂੰ ਸਾਰਾ ਟੱਬਰ ਕੁਰਬਾਨੀ ਕਹੀ ਜਾਂਦੈ।

ਪਟਿਆਲਾ ਜੇਲ੍ਹ ‘ਚ ਬਿੱਟੂ ਵਲੋਂ ਆਸ਼ੂ ਨਾਲ ਮੁਲਾਕਾਤ- ਇਕ ਖ਼ਬਰ

ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ ਵੀ ਵਿੰਗਾ ਨਾ ਹੋਵੇ।

ਪਾਣੀਆਂ ਦੇ ਮੁੱਦੇ ‘ਤੇ ਸਹਿਯੋਗ ਕਰਨ ਸੂਬੇ- ਮੋਦੀ  

ਧੀਏ ਗੱਲ ਸੁਣ, ਨੂੰਹੇਂ ਕੰਨ ਕਰ।

ਗੁਲਾਮ ਨਬੀ ਆਜ਼ਾਦ ਦਾ ਸਾਥ ਛੱਡ ਕੇ 17 ਆਗੂ ਮੁੜ ਕਾਂਗਰਸ ‘ਚ ਸ਼ਾਮਲ ਹੋਏ- ਇਕ ਖ਼ਬਰ

ਜਾਨ ਬਚੀ ਔਰ ਲਾਖੋਂ ਪਾਏ, ਲੌਟ ਕੇ ਬੁੱ...ਘਰ ਕੋ ਆਏ।

ਕੈਨੇਡਾ ‘ਚ ਇਕ ਠੱਗ ਜੋੜੇ ਨੇ ਕਿਸੇ ਦਾ ਘਰ ਆਪਣਾ ਕਹਿ ਕੇ ਵੇਚ ਦਿਤਾ- ਇਕ ਖ਼ਬਰ

ਵੇਚਣ ਵਾਲਾ ਉਸ ਦੇਸ਼ ਤੋਂ ਆਇਆ ਲਗਦੈ ਜਿੱਥੇ ਇਕ ਪਲਾਟ ਚਾਰ ਚਾਰ ਵਾਰੀ ਵਿਕ ਜਾਂਦੈ।

ਮਲ਼ਾਈ ਖਾਣ ਵਾਲ਼ੇ ਲੀਡਰ ਵਿਦੇਸ਼ ਜਾਂ ਦੂਜੀਆਂ ਪਾਰਟੀਆਂ ‘ਚ ਚਲੇ ਗਏ- ਲਾਲ ਸਿੰਘ

ਖਾਏ ਪੀਏ ਯਹਾਂ ਸੇ ਖਿਸਕੇ, ਯੇਹ ਅੱਛੀ ਸੂਰਤ ਵਾਲੇ ਯਾਰ ਕਿਸ ਕੇ।

ਮੌਜੂਦਾ ਅਕਾਲੀ ਦਲ ਲੀਹਾਂ ਤੋਂ ਭਟਕ ਚੁੱਕਾ ਹੈ- ਹਰਭਜਨ ਸਿੰਘ ਤੁੜ

ਲੀਹਾਂ ਕਿੱਥੇ! ਹੁਣ ਤਾਂ ਲੀਹਾਂ ਦੀ ਧੂੜ ਵੀ ਨਹੀਂ ਲੱਭਦੀ।

ਭਾਰਤੀ ਵਪਾਰੀ ਆਸਟਰੇਲੀਆ ਨਾਲ ਮੁਕਤ ਵਪਾਰ ਸਮਝੌਤੇ ਦਾ ਲਾਭ ਲੈਣ- ਜੀ.ਟੀ.ਆਰ.ਆਈ.

ਭਰ ਲਉ ਝੋਲ਼ੀਆਂ ਮਿੱਤਰੋ ਕਿ ਲੱਡੂਆਂ ਦਾ ਮੀਂਹ ਵਰ੍ਹਦਾ।

ਮਾਨ ਸਰਕਾਰ ਤੋਂ ਲੋਕਾਂ ਦਾ ਵਿਸ਼ਵਾਸ ਉਠ ਚੁੱਕਾ ਹੈ- ਸੁਖਬੀਰ ਬਾਦਲ

ਤੁਸੀਂ ਕਿਤੇ ਇਸ ਭੁਲੇਖੇ ‘ਚ ਨਾ ਰਹਿਉ ਕਿ ਹੁਣ ਲੋਕਾਂ ਨੂੰ ਤੁਹਾਡੇ ‘ਤੇ ਵਿਸ਼ਵਾਸ ਹੈ।

ਕੈਨੇਡਾ ‘ਚ ਨਸ਼ੀਲਾ ਪਦਾਰਥ ਜੇਲ੍ਹ ‘ਚ ਲਿਜਾਂਦਾ ਇਕ ਕਬੂਤਰ ਫੜਿਆ ਗਿਆ-ਇਕ ਖ਼ਬਰ

ਕੈਨੇਡਾ ਸਰਕਾਰ ਸੋਚ ਰਹੀ ਹੈ ਕਬੂਤਰ ਦਾ ਰਿਮਾਂਡ ਪੰਜਾਬ ਪੁਲੀਸ ਨੂੰ ਦੇ ਦਿਤਾ ਜਾਵੇ।

ਪੰਜਾਬੀ ਭਾਸ਼ਾ ਦੇ ਠੇਠ ਸ਼ਬਦਾਂ ਨੂੰ ਹੁਣ ਪੰਜਾਬ ਵਾਸੀ ਵੀ ਨਹੀਂ ਸਮਝਦੇ- ਇਕ ਸਰਵੇਅ

ਆਪੇ ਫਾਥੜੀਏ ਤੈਨੂੰ ਕੌਣ ਛੂਡਾਵੇ।

03 ਜਨਵਰੀ 2023

ਮੂਲ ਨਾਨਕਸ਼ਾਹੀ ਕੈਲੰਡਰ ਜਾਰੀ ਕਰਨ ਦੀ ਮੰਗ ਕੀਤੀ ਬੀਬੀ ਜਗੀਰ ਕੌਰ ਨੇ-ਇਕ ਖ਼ਬਰ
ਬੀਬੀ ਜੀ, ਤੁਹਾਡੀ ਮੰਗ ਦੇ ਸਬੰਧ ਵਿਚ ਸ਼੍ਰੋਮਣੀ ਕਮੇਟੀ ਵਾਲ਼ੇ ਕੁਰਾਲ਼ੀ ਵਾਲੇ ਪੰਡਤਾਂ ਤੋਂ ਪੁੱਛਣ ਗਏ ਐ।   

ਦੋ ਨਾਬਾਲਗ਼ ਗੈਂਗਸਟਰਾਂ ਦੀ ਸਿਰਸਾ ਤੋਂ ਹੋਈ ਗ੍ਰਿਫ਼ਤਾਰੀ- ਇਕ ਖ਼ਬਰ
ਲਗਦੈ ਹੁਣ ਭਾਰਤ ਵਿਚ ਗੈਂਗਸਟਰ ਹੀ ਜੰਮਿਆਂ ਕਰਨਗੇ।

ਦਸਵੇਂ ਪਾਤਸ਼ਾਹ ਦਾ ਪ੍ਰਕਾਸ਼ ਦਿਹਾੜਾ 23 ਪੋਹ ਦੀ ਬਜਾਇ 14 ਨੂੰ ਕਿਉਂ ਮਨਾ ਰਹੀ ਹੈ ਸ਼੍ਰੋਮਣੀ ਕਮੇਟੀ-ਸੈਕਰਾਮੈਂਟੋ
ਸਿਰਦਾਰ ਜੀ, ਇਹ ਦੋ ਮਹਾਨ ‘ਤਾਰਾ ਵਿਗਿਆਨੀਆਂ’ ਵਲੋਂ ‘ਸੋਧੇ’ ਹੋਏ ਕੈਲੰਡਰ ਅਨੁਸਾਰ ਹੈ ਜੀ।

ਜ਼ੇਲੈਂਸਕੀ ਨੇ ਅਮਨ ਲਈ ਭਾਰਤ ਤੋਂ ਮਦਦ ਮੰਗੀ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਗੁਰੂ ਕੇ ਮਹਿਲ(ਸ੍ਰੀ ਅੰਮ੍ਰਿਤਸਰ) ਦਾ ਇਤਿਹਾਸਕ ਖੂਹ ਕਾਰਸੇਵਾ ਦੀ ਭੇਟ ਚੜ੍ਹਿਆ- ਇਕ ਖ਼ਬਰ
ਯਾਰ ਏਨਾ ਥੋੜ੍ਹੈ ਕਿ ਬਾਬੇ ਤੁਹਾਨੂੰ ਹੁਣ ਸੰਗਮਰਮਰੀ ਖੂਹ ਦਾ ਜਲ ਛਕਾਉਣਗੇ।

ਮੈਨੂੰ ਸਿਆਸੀ ਬਦਲਾਖੋਰੀ ਤਹਿਤ ਜੇਲ੍ਹ ਭੇਜਣ ਦੀ ਤਿਆਰੀ ‘ਚ ਸਰਕਾਰ- ਚੰਨੀ
ਚੰਨੀ ਸਾਬ ਇਹ ਜੁਮਲਾ ਪੁਰਾਣਾ ਹੋ ਗਿਐ, ਕੋਈ ਹੋਰ ਗੱਲ ਬਣਾਉ ਜੀ।

ਬਠਿੰਡੇ ‘ਚ ਰਾਜਾ ਵੜਿੰਗ ਅਤੇ ਮਨਪ੍ਰੀਤ ਬਾਦਲ ਧੜੇ ਦੀ ਸਿਆਸੀ ਸ਼ਰੀਕੇਬਾਜ਼ੀ ਸਿਖ਼ਰਾਂ ‘ਤੇ- ਇਕ ਖ਼ਬਰ
ਵਾਰਿਸਸ਼ਾਹ ਦੋ ਲੜਨ ਮਾਸ਼ੂਕ ਏਥੇ, ਮੇਰੀ ਸੰਗਲੀ ਸ਼ਗਨ ਵਿਚਾਰਦੀ ਏ।

ਚੀਨ ਸਬੰਧਾਂ ਦੀ ਮਜ਼ਬੂਤੀ ਲਈ ਭਾਰਤ ਨਾਲ਼ ਮਿਲਕੇ ਕੰਮ ਕਰਨ ਨੂੰ ਤਿਆਰ- ਵਾਂਗ ਯੀ
ਨੀਂ ਚਰਖ਼ਾ ਬੋਲ ਪਿਆ, ਹਰ ਗੱਲ ਨਾਲ਼ ਭਰਦਾ ਹੁੰਗਾਰੇ।

ਕੋਰੋਨਾ ਦੇ ਰੋਜ਼ ਆਉਣ ਵਾਲੇ ਅੰਕੜੇ ਜਾਰੀ ਨਹੀਂ ਕਰੇਗਾ ਚੀਨ- ਸਿਹਤ ਕਮਿਸ਼ਨ ਚੀਨ
ਨ੍ਹਾਉਂਦੀ ਫਿਰੇਂ ਤੀਰਥਾਂ ‘ਤੇ, ਤੇਰੇ ਅੰਦਰੋਂ ਮੈਲ਼ ਨਾ ਜਾਵੇ।

ਕਿਸਾਨ ਅੰਦੋਲਨ ਟੁੱਟ-ਭੱਜ ਤੋਂ ਬਾਅਦ ਮੁੜ ਏਕਤਾ ਵਲ......!-ਇਕ ਖ਼ਬਰ
ਭੱਜੀਆਂ ਬਾਹੀਂ ਗਲ਼ ਆ ਲੱਗਣ, ਝਗੜੇ ਝੇੜੇ ਸਭ ਮੁੱਕ ਜਾਂਦੇ।

ਕਾਂਗਰਸ ਨੇ ਸਰਕਾਰ ਤੋਂ ਕਿਸਾਨਾਂ ਦੀ ਆਮਦਨ ‘ਤੇ ‘ਵ੍ਹਾਈਟ ਪੇਪਰ’ ਲਿਆਉਣ ਦੀ ਕੀਤੀ ਮੰਗ- ਇਕ ਖ਼ਬਰ
ਕਾਂਗਰਸ ਨੇ ਆਪਣੀਆਂ ਕਰਤੂਤਾਂ ਦੇ ਕਿੰਨੇ ਕੁ ਵ੍ਹਾਈਟ ਪੇਪਰ ਲਿਆਂਦੇ ਬਈ।

ਭਾਜਪਾ ਨੇ ਸਿੱਖਾਂ ਨੂੰ ਪਤਿਆਉਣ ਲਈ ਰਣਨੀਤੀ ਉਲੀਕੀ- ਇਕ ਖ਼ਬਰ
ਸੀਤਾ ਦੇ ਛਲਣੇ ਨੂੰ, ਸੋਨੇ ਦਾ ਮਿਰਗ ਬਣਾਇਆ।

ਮੁੰਬਈ ਮਹਾਂਰਾਸ਼ਟਰ ਦੀ ਹੈ, ਕਿਸੇ ਦੇ ਪਿਉ ਦੀ ਨਹੀਂ- ਫੜਨਵੀਸ
ਨੱਚ ਲੈ ਸ਼ਾਮ ਕੁਰੇ, ਹੁਣ ਭੌਰ ਬੋਲੀਆਂ ਪਾਵੇ।

ਆਈ.ਐਮ.ਐਫ਼. ਦਾ ਪ੍ਰੋਗਰਾਮ ਲਾਗੂ ਕਰਨ ਤੋਂ ਸਿਵਾ ਹੋਰ ਕੋਈ ਬਦਲ ਨਹੀਂ ਸੀ- ਸ਼ਾਹਬਾਜ਼ ਸ਼ਰੀਫ਼
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

‘ਆਪ’ ਸਰਕਾਰ ਹਿਸਾਬ ਦੇਵੇ ਕਿ ਤੀਹ ਹਜ਼ਾਰ ਕਰੋੜ ਦਾ ਕਰਜ਼ਾ ਕਿੱਥੇ ਖਰਚਿਆ- ਬਾਜਵਾ
ਲਾਣੇਦਾਰਾ ਸੱਚ ਦੱਸ ਦੇ, ਮੇਰੇ ਗੋਖਰੂ ਕਿੰਨੇ ‘ਚ ਵੇਚ ਆਇਐਂ।

26 ਦਸੰਬਰ 2022

ਕੇਂਦਰ ਦੀ ਸਬਸਿਡੀ ਸਬਸਿਡੀ ਤੇ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੀਆਂ ਸਹੂਲਤਾਂ ‘ਮੁਫ਼ਤ ਰੇਵੜੀ’- ‘ਆਪ ਬੁਲਾਰਾ’

ਬਿਲਕੁਲ ਓਵੇਂ ਜੀ ਜਿਵੇਂ ਤੁਹਾਡਾ ਕੁੱਤਾ ਕੁੱਤਾ, ਸਾਡਾ ਕੁੱਤਾ ਟੌਮੀ।

ਚੰਨੀ ਨੇ ਵਿਦੇਸ਼ੋਂ ਪਰਤਦਿਆਂ ਹੀ ਖੜਗੇ ਤੇ ਪ੍ਰਿਅੰਕਾ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਸਾਨੂੰ ਪਾਰ ਲੰਘਾ ਦਿਉ ਜੀ, ਤੁਸੀਂ ਨਦੀਆਂ ਦੇ ਭੇਤੀ।

ਮਾਨਸਾ ‘ਚ ਵਾਪਰੀਆਂ ਸਾੜ-ਫੂਕ ਦੀਆਂ ਘਟਨਾਵਾਂ ‘ਚੋਂ 25 ਡੇਰਾ ਪ੍ਰੇਮੀ ਬਰੀ- ਇਕ ਖ਼ਬਰ

ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਸਮ੍ਰਿਤੀ ਈਰਾਨੀ ਅਮੇਠੀ ‘ਚ ‘ਲਟਕੇ ਝਟਕੇ’ ਦਿਖਾ ਕੇ ਚਲੀ ਜਾਂਦੀ ਹੈ- ਕਾਂਗਰਸੀ ਆਗੂ

ਝੁਮਕਾ ਗਿਰਾ ਰੇ ਅਮੇਠੀ ਕੇ ਬਾਜ਼ਾਰ ਮੇਂ।

ਪੰਜ ਸਾਲਾਂ ਵਿਚ 10.09 ਲੱਖ ਕਰੋੜ ਰੁਪਏ ਦਾ ਕਰਜ਼ਾ ਵੱਟੇ-ਖਾਤੇ ਪਾਇਆ- ਵਿਤ ਮੰਤਰੀ

ਅੰਨ੍ਹਾਂ ਵੰਡੇ ਸ਼ੀਰਨੀ, ਮੁੜ ਮੁੜ ਆਪਣਿਆਂ ਨੂੰ ਦੇਹ।

ਰਵਾਇਤੀ ਪਾਰਟੀਆਂ ‘ਤੇ ‘ਆਪ’ ਦੇ ਕੰਮਾਂ ਨੂੰ ਜਾਣ ਬੁਝ ਕੇ ਨਜ਼ਰ-ਅੰਦਾਜ਼ ਕਰਨ ਦੇ ਦੋਸ਼- ਮੁਲਾਜ਼ਮ ਆਗੂ

ਭੱਤਾ ਢੋਏ ਦੀ ਕਦਰ ਨਾ ਪਾਈ, ਡੰਡੀਆਂ ਤੋਂ ਮੁਕਰ ਗਇਓਂ।

ਬਿਹਾਰ ‘ਚ ਨਵਾਂ ਬਣਿਆ ਪੁਲ ਉਦਘਾਟਨ ਤੋਂ ਪਹਿਲਾਂ ਹੀ ਡਿਗ ਗਿਆ- ਇਕ ਖ਼ਬਰ

ਓ ਭਾਈ ਏਥੇ ਤਾਂ ਬਿਨਾਂ ਬਣਾਇਆਂ ਵੀ ਪੁਲ ਡਿਗ ਜਾਂਦੇ ਨੇ।

ਪੰਜਾਬ ਦਾ ਨਸ਼ਾ ਮਾਫ਼ੀਆ-ਸਿਆਸੀ ਗੱਠਜੋੜ ਪੂਰੇ ਦੇਸ਼ ਨੂੰ ਤਬਾਹ ਕਰਨ ਦੀ ਸਮਰੱਥਾ ਰੱਖਦੈ- ਹਰਸਿਮਰਤ

ਬੀਬੀ ਜੀ, ਇਸ ਗੱਠਜੋੜ ਦੀਆਂ ਨੀਹਾਂ ਰੱਖਣ ਵਾਲਿਆਂ ਬਾਰੇ ਵੀ ਜ਼ਰਾ ਚਾਨਣਾ ਪਾ ਦਿੰਦੇ।

ਅਕਾਲੀ ਦਲ ਦੀਆਂ ਕਮੀਆਂ ਦੂਰ ਕਰਨ ਲਈ ਪੰਥਕ ਏਕੇ ਦੀ ਲੋੜ-ਚੰਦੂਮਾਜਰਾ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਰਾਜਾ ਵੜਿੰਗ ਦੇ ਸਮਾਗਮ ‘ਚੋਂ ਗ਼ੈਰਹਾਜ਼ਰ ਰਹੇ ਸਥਾਨਕ ਆਗੂ- ਇਕ ਖ਼ਬਰ

ਮੋਤੀ ਖਿਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।

ਜੇਲ੍ਹ ‘ਚੋਂ ਨਵਜੋਤ ਸਿੱਧੂ ਦੀ ਸੰਭਾਵੀ ਰਿਹਾਈ ਤੋਂ ਸਿਆਸੀ ਹਲਚਲ- ਇਕ ਖ਼ਬਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਪਾਰਟੀ ਅਨੁਸ਼ਾਸਨ ਭੰਗ ਕਰਨ ਵਾਲ਼ਿਆਂ ਨੂੰ ਦਿਖਾਵਾਂਗਾ ਬਾਹਰ ਦਾ ਰਸਤਾ- ਰਾਜਾ ਵੜਿੰਗ

ਰੱਬ ਚਾੜ੍ਹ ਪਹਾੜ ਤੋਂ ਡੇਗ ਦਿੰਦਾ, ਗ਼ਰਬ ਕਰੀਏ ਨਾ ਵੱਡੇ ਇਕਬਾਲ ਦਾ ਜੀ।

ਬਾਇਡੇਨ ਨਾਲ਼ ਮੁਲਾਕਾਤ ਕਰਨਗੇ ਜ਼ੇਲੈਂਸਕੀ- ਇਕ ਖ਼ਬਰ

ਉੱਥੇ ਲੈ ਚਲ ਚਰਖ਼ਾ ਮੇਰਾ, ਜਿੱਥੇ ਤੇਰੇ ਹਲ਼ ਵਗਦੇ।

ਸ਼ਰਾਬ ਫ਼ੈਕਟਰੀ: ‘ਏਕਤਾ ਤੇ ਸਾਂਝੀਵਾਲਤਾ’ ਦਾ ਪ੍ਰਤੀਕ ਬਣਿਆ ਸੰਘਰਸ਼- ਇਕ ਖ਼ਬਰ

ਕਾਦਰਯਾਰ ਕੀ ਸਿੱਧਾਂ ਦੀ ਸਿਫ਼ਤ ਕਰੀਏ, ਜੁੜ ਬੈਠੇ ਨੇ ਕਈ ਜਮਾਇਤਾਂ ਦੇ।

ਕੋਈ ਵੀ ਮੁਆਵਜ਼ਾ ਗੰਭੀਰ ਹਾਦਸੇ ਦੇ ਪੀੜਿਤ ਦੇ ਦਰਦ ਨੂੰ ਦੂਰ ਨਹੀਂ ਕਰ ਸਕਦਾ- ਸੁਪਰੀਮ ਕੋਰਟ

ਵੇ ਮੁੰਦਰੀ ਸੋਨੇ ਦੀ, ਮੇਰਾ ਟੁੱਟਿਆ ਦਿਲ ਨਾ ਜੋੜੇ।

19 ਦਸੰਬਰ 2022

ਭਵਿੱਖ ‘ਚ ਅਕਾਲੀ ਦਲ ਨਾਲ ਭਾਜਪਾ ਦੇ ਗੱਠਜੋੜ ਦਾ ਸਵਾਲ ਹੀ ਨਹੀਂ-ਵਿਜੈ ਰੂਪਾਨੀ

ਤੇਰੀ ਮੇਰੀ, ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਭਰੇ ਬਾਜ਼ਾਰ ‘ਚ ਸ਼ਰੇਆਮ ਲੁਟੇਰਿਆਂ ਨੇ ਮੰਗਤੇ ਤੋਂ 300 ਰੁਪਏ ਲੁੱਟ ਲਏ- ਇਕ ਖ਼ਬਰ

ਭੁੱਖ ਨੰਗ ਦੀ ਏਥੇ ਪ੍ਰਵਾਹ ਨਾਹੀਂ, ਹੁਕਮ ਹੋਵੇ ਤਾਂ ਦੇਗ਼ਾਂ ਨੂੰ ਚੱਟੀਏ ਜੀ।

ਘਟੀਆ ਸੜਕ ਮਾਮਲਾ: ਨਾ ਠੇਕਾ ਰੱਦ ਹੋਇਆ ਤੇ ਨਾ ਕਿਸੇ ਅਧਿਕਾਰੀ ਖ਼ਿਲਾਫ਼ ਕਾਰਵਾਈ ਹੋਈ- ਇਕ ਖ਼ਬਰ

ਨਾ ਝੰਗ ਛੁੱਟਿਆ ਨਾ ਕੰਨ ਪਾਟੇ, ਝੁੰਡ ਲੰਘ ਗਿਆ ਇੰਜ ਹੀਰਾਂ ਦਾ।

ਆਪਸੀ ਫੁੱਟ ਨੇ ਕਾਂਗਰਸ ਨੂੰ 80 ਤੋਂ 18 ‘ਤੇ ਪਹੁੰਚਾਇਆ- ਰਾਜਾ ਵੜਿੰਗ

ਇਸ ਘਰ ਕੋ ਆਗ ਲੱਗ ਗਈ ਘਰ ਕੇ ਚਿਰਾਗ਼ ਸੇ।

ਮੁੱਖ ਮੰਤਰੀ ਤੇ ਰਾਜਪਾਲ ਦੀ ਆਪਸੀ ਖਹਿਬਾਜ਼ੀ ਦਾ ਨੁਕਸਾਨ ਪੰਜਾਬ ਭੁਗਤ ਰਿਹੈ- ਰਾਜਾ ਵੜਿੰਗ

ਦੋ ਹਾਥੀ ਲੜਨ ਤਾਂ ਵਿਚਾਰਾ ਘਾਹ ਹੀ ਮਿੱਧਿਆ ਜਾਂਦੈ।

ਪੰਜਾਬ ਭਰ ‘ਚ ਦੌਰੇ ਕਰਨਗੇ ਸੁਖਬੀਰ ਸਿੰਘ ਬਾਦਲ- ਇਕ ਖ਼ਬਰ

ਜਿਨ੍ਹਾਂ ਰਾਹਾਂ ਦੀ ਮੈਂ ਸਾਰ ਨਾ ਜਾਣਾ, ਉਨ੍ਹੀਂ ਰਾਹੀਂ ਵੇ ਮੈਨੂੰ ਤੁਰਨਾ ਪਿਆ।

ਅਰਥ ਵਿਵਸਥਾ ਨੂੰ ਵਧਦਾ ਦੇਖ ਕੇ ਕੁਝ ਲੋਕ ਸੜ ਰਹੇ ਹਨ- ਵਿੱਤ ਮੰਤਰੀ

ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

ਦਾਦੂਵਾਲ ਵਲੋਂ ਸੁਖਬੀਰ ਸਿੰਘ ਬਾਦਲ ਨੂੰ ਖੁੱਲ੍ਹੀ ਬਹਿਸ ਦੀ ਚੁਣੌਤੀ- ਇਕ ਖ਼ਬਰ

ਜੇ ਤੂੰ ਚੁੰਘੀਆਂ ਬੂਰੀਆਂ ਤਾਂ ਵਿਚ ਮੈਦਾਨੇ ਆ।

ਕੈਪਟਨ ਅਮਰਿੰਦਰ ਸਿੰਘ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਕੁਰਸੀ ਮੇਰੇ ਵੀਰ ਦੀ, ਠਾਣੇਦਾਰ ਦੇ ਬਰਾਬਰ ਡਹਿੰਦੀ।

ਮੌਜੂਦਾ ਸਿੱਖ ਮਸਲਿਆਂ ਸਬੰਧੀ ਸੇਧ ਦੇਣ ਜਥੇਦਾਰ- ਧਾਮੀ

ਵਾਇਆ ਬਠਿੰਡਾ ਨਾ ਜਾਉ ਧਾਮੀ ਸਾਹਿਬ, ਸਿੱਧੀ ‘ਮਾਲਕਾਂ’ ਤੋਂ ਹੀ ਸੇਧ ਮੰਗ ਲਵੋ।

ਬੇਅਦਬੀ ਮਾਮਲਿਆਂ ਪ੍ਰਤੀ ਗੰਭੀਰ ਹੈ ‘ਆਪ’ ਸਰਕਾਰ- ਮਾਲਵਿੰਦਰ ਸਿੰਘ ਕੰਗ

ਬਦਲ ਗਈਆਂ ਸ਼ਕਲਾਂ ਰਾਗ ਪੁਰਾਣੇ ਨੇ, ਸੱਦੇ ਸਿਰਫ਼ ਨਵੇਂ ਨੇ ਕਾਗ ਪੁਰਾਣੇ ਨੇ- (ਬਾਬਾ ਨਜਮੀ)

ਭਗਵੰਤ ਮਾਨ ਨੇ ‘ਆਪ’ ਦੀ ਮਸ਼ਹੂਰੀ ਲਈ ਪੰਜਾਬ ਦਾ ਪੈਸਾ ਗੁਜਰਾਤ ‘ਚ ਲੁਟਾਇਆ- ਭੁੱਲੇਵਾਲ ਰਾਠਾਂ

ਚੋਰਾਂ ਦੇ ਕੱਪੜੇ, ਡਾਂਗਾਂ ਦੇ ਗਜ਼।

ਚੀਨ ਹਮਲੇ ਵਧਾ ਰਿਹਾ ਹੈ ਤੇ ਸਰਕਾਰ ਦਰਾਮਦ- ਕੇਜਰੀਵਾਲ

ਵੇ ਮੈਂ ਚੋਰੀ ਚੋਰੀ ਲਾ ਲਈਆਂ, ਤੇਰੇ ਨਾਲ਼ ਅੱਖੀਆਂ।

ਸੂਬੇ ਦਾ ਮਾਹੌਲ ਖ਼ਰਾਬ ਕਰਨਾ ਚਾਹੁੰਦੀਆਂ ਹਨ ਪੰਜਾਬ ਵਿਰੋਧੀ ਤਾਕਤਾਂ- ਰਾਜਾ ਵੜਿੰਗ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਦਿੱਲੀ ਤੇ ਪੰਜਾਬ ‘ਚ ਕੀਤੇ ਕੰਮ ਲੈ ਕੇ ਜਾਵਾਂਗੇ ਦੇਸ਼ ਭਰ ਵਿਚ- ਭਗਵੰਤ ਮਾਨ

ਨੱਚਾਂ ਮੈਂ ਪਟਿਆਲੇ ਮੇਰੀ ਧਮਕ ਜਲੰਧਰ ਪੈਂਦੀ।

12 ਦਸੰਬਰ 2022

ਭਾਜਪਾ ਦੀਆਂ ਨਵਿਆਂ ਨੂੰ ਅਹੁਦੇਦਾਰੀਆਂ, ਪੁਰਾਣਿਆਂ ਨੂੰ ਦਿਖਾ ਰਹੀਆਂ ਬੂਹੇ ਬਾਰੀਆਂ- ਇਕ ਖ਼ਬਰ

ਨਵਿਆਂ ਦੇ ਸੰਗ ਲੱਗ ਕੇ, ਭੁੱਲ ਗਈ ਯਾਰ ਪੁਰਾਣੇ।

 

ਯਮੁਨਾ ਦਾ ਪਾਣੀ: ਪੰਜਾਬ ਨੂੰ ਦੇਣ ਤੋਂ ਕੇਂਦਰ ਦੀ ਕੋਰੀ ਨਾਂਹ-ਇਕ ਖ਼ਬਰ

ਉਹ ਫਿਰੇ ਨੱਥ ਘੜਾਉਣ ਨੂੰ, ਉਹ ਫਿਰੇ ਨੱਕ ਵਢਾਉਣ ਨੂੰ।

 

ਮੁੱਖ ਮੰਤਰੀ ਦਾ ਹਰਾ ਪੈੱਨ ਅਜੇ ਤੱਕ ਗ਼ਰੀਬਾਂ ਦੇ ਹੱਕ’ਚ ਨਹੀਂ ਚੱਲਿਆ- ਵੜੈਚ

ਅਜੇ ਦਿੱਲੀਉਂ ਹਰੀ ਸਿਆਹੀ ਨਹੀਂ ਆਈ ਬਈ।

ਗੁਜਰਾਤ ਵਿਚ ‘ਆਪ’ ਨੇ ਕਾਂਗਰਸ ਦੀ ਖੇਡ ਵਿਗਾੜੀ- ਚਿਦੰਬਰਮ

ਟੁੱਟ ਪੈਣੇ ਦਰਜੀ ਨੇ ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਪੰਜ ਪੰਜ ਮਰਲੇ ਦੇ ਸਰਕਾਰੀ ਪਲਾਟਾਂ ਦੀ ਉਮੀਦ ‘ਚ ਲੰਘ ਚੱਲੀ ਜ਼ਿੰਦਗੀ-ਇਕ ਖ਼ਬਰ

ਸਰਟੀਫ਼ੀਕੇਟ ਚੈੱਕ ਕਰ ਲਉ ਬਈ ਕਿਤੇ ਚੰਨ ਉੱਤੇ ਤਾਂ ਨਹੀਂ ਪਲਾਟ ਕੱਟੇ ਹੋਏ।

ਲੋਕਾਂ ਦੇ ਹੱਕਾਂ ਦੇ ਘਾਣ ਖ਼ਿਲਾਫ਼ ਹਮੇਸ਼ਾਂ ਲੜਦੀ ਰਹਾਂਗੀ- ਮਮਤਾ ਬੈਨਰਜੀ

ਉਹ ਘਰ ਰਤਨੀ ਦਾ, ਜਿੱਥੇ ਚੱਲਣ ਪੁਰਾਣੇ ਚਰਖ਼ੇ।

‘ਆਪ’ ਦੇ ਰਾਜ ‘ਚ ਪੰਜਾਬ ਦੇ ਲੋਕਾਂ ਦੀ ਲੁੱਟ- ਪ੍ਰਨੀਤ ਕੌਰ

ਬੀਬੀ ਜੀ ਜਿਹੜੇ ਸੁਰੱਖਿਅਤ ਘੁਰਨਿਆਂ ਵਲ ਨੂੰ ਭੱਜ ਰਹੇ ਐ, ਉਹ ਕੌਣ ਨੇ?

ਸ਼੍ਰੋਮਣੀ ਕਮੇਟੀ ਨੂੰ ਬਾਦਲਾਂ ਦੇ ਚੁੰਗਲ ‘ਚੋਂ ਛੁਡਵਾਉਣ ਲਈ ਯਤਨ ਜਾਰੀ- ਭਾਈ ਚੰਗਾਲ

ਸੱਸ ਮਰੀ ‘ਤੇ ਚੁਬਾਰਾ ਪਾਉਣਾ, ਔਖੀ ਸੌਖੀ ਦਿਨ ਕੱਟਦੀ।

ਬੀਬੀ ਜਾਗੀਰ ਕੌਰ ਅਤੇ ਜਗਮੀਤ ਸਿੰਘ ਬਰਾੜ ਦੀ ਬਾਦਲ ਦਲ ਤੇ ਬਾਦਲਾਂ ਨੂੰ ਸਿੱਧੀ ਚੁਣੌਤੀ-ਇਕ ਖ਼ਬਰ

ਜੱਟ ਸ਼ਾਹਾਂ ਨੂੰ ਖੰਘੂਰੇ ਮਾਰੇ, ਕਣਕਾਂ ਨਿਸਰ ਪਈਆਂ।

ਜੰਮੂ-ਕਸ਼ਮੀਰ ‘ਚ ਬੇਰੁਜ਼ਗਾਰੀ ‘ਚ ਰਿਕਾਰਡ ਤੋੜ ਵਾਧਾ- ਇਕ ਖ਼ਬਰ

ਬਹੁਤ ਸ਼ੋਰ ਸੁਨਤੇ ਥੇ ਪਹਿਲੂ ਮੇਂ ਦਿਲ ਕਾ, ਜੋ ਚੀਰਾ ਤੋ ਕਤਰਾ ਏ ਖੂੰ ਨਿਕਲਾ। (ਗ਼ਾਲਿਬ)

ਗੁਜਰਾਤ ਨੇ ਖੋਖਲੇ ਵਾਅਦੇ, ਰਿਉੜੀ ਅਤੇ ਮਾੜੀ ਸਿਆਸਤ ਨੂੰ ਨਕਾਰ ਦਿਤਾ- ਸ਼ਾਹ

ਸ਼ਾਹ ਜੀ ਕੀ ਇਹੀ ਫਾਰਮੂਲਾ ਹਿਮਾਚਲ ਪ੍ਰਦੇਸ਼ ‘ਤੇ ਲਾਗੂ ਨਹੀਂ ਹੁੰਦਾ?

ਭਾਜਪਾ ਖਿਲਾਫ਼ ਇਕਜੁੱਟ ਹੋਵੇ ਵਿਰੋਧੀ ਧਿਰ- ਨਿਤੀਸ਼

ਕਿਹੜੀ ਵਿਰੋਧੀ ਧਿਰ ਨਿਤੀਸ਼ ਸਾਹਿਬ?

ਸ਼੍ਰੋਮਣੀ ਅਕਾਲੀ ਦਲ ਨੇ ਜਗਮੀਤ ਬਰਾੜ ਨੂੰ ਪਾਰਟੀ ਦੀ ਮੁਢਲੀ ਮੈਂਬਰਸ਼ਿੱਪ ਤੋਂ ਕੱਢਿਆ- ਇਕ ਖ਼ਬਰ

ਕਿਉਂ ਕੀਤੀ ਅਸਾਂ ਨਾਲ ਬਸ ਵੇ, ਕੋਈ ਦੋਸ਼ ਅਸਾਡਾ ਦੱਸ ਵੇ।

ਭਾਜਪਾ ਨੇ ਕੈਪਟਨ ਨੂੰ ਵਫ਼ਾਦਾਰੀ ਦਾ ਤੋਹਫ਼ਾ ਦਿਤਾ- ‘ਆਪ’

ਸ਼ਾਹ ਮੁਹੰਮਦਾ ਆਖਦੇ ਲੋਕ ਸਿੰਘ ਜੀ, ਤੁਸੀਂ ਚੰਗੀਆਂ ਪੂਰੀਆਂ ਪਾ ਆਏ।

ਪ੍ਰਿਅੰਕਾ ਗਾਂਧੀ ਦੀ ਰਣਨੀਤੀ ਨਾਲ ਹਿਮਾਚਲ ‘ਚ ਹੋਈ ਕਾਂਗਰਸ ਦੀ ਜਿੱਤ- ਕਾਂਗਰਸ ਬੁਲਾਰਾ

ਤੀਲੀ ਵਾਲ਼ੀ ਖਾਲ ਟੱਪ ਗਈ, ਲੌਂਗ ਵਾਲ਼ੀ ਨੇ ਭਨਾ ਲਏ ਗੋਡੇ।

ਭਾਜਪਾ ਕੋਰ ਕਮੇਟੀ ਨੂੰ ਵੀ ਦਲ ਬਦਲੂਆਂ ਦਾ ਰੰਗ ਚੜ੍ਹਿਆ- ਇਕ ਖ਼ਬਰ

ਖ਼ਰਬੂਜ਼ੇ ਨੂੰ ਦੇਖ ਖ਼ਰਬੂਜਾ ਰੰਗ ਫੜਦੈ ਬਈ।

ਗੁਜਰਾਤ ਚੋਣਾਂ ਲਈ ਬਣਾਈ ਨੀਤੀ ਸਾਡੇ ਕੰਮ ਨਹੀਂ ਆਈ- ਕਾਂਗਰਸ

ਨੀ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

28 ਨਵੰਬਰ 2022

ਮੋਦੀ ਸਰਕਾਰ ਨੇ ਕਿਸਾਨਾਂ ਨਾਲ ਕੀਤੇ ਵਾਅਦੇ ਪੂਰੇ ਨਹੀਂ ਕੀਤੇ- ਖੜਗੇ

ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।

ਨਹਿਰੂ ਤੇ ਇੰਦਰਾ ਗਾਂਧੀ ਦੀ ਆਲੋਚਨਾ ਤੋਂ ਦੁਖੀ ਹਾਂ- ਫਾਰੂਕ ਅਬਦੁੱਲਾ

ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।

ਗੁਜਰਾਤ ਚੋਣਾਂ: ਭਾਜਪਾ ਵਲੋਂ ਵਾਅਦਿਆਂ ਦੀ ਝੜੀ- ਇਕ ਖ਼ਬਰ

ਯਾਨੀ ਕਿ ਭਾਜਪਾ ਨੇ ਰਿਉੜੀਆਂ ਵਾਲ਼ਾ ਲਿਫ਼ਾਫ਼ਾ ਢੇਰੀ ਕਰ ਦਿਤਾ।

ਬਾਈਡੇਨ ਨੇ ਹਥਿਆਰਾਂ ‘ਤੇ ਪਾਬੰਦੀ ਲਗਾਉਣ ਦਾ ਫ਼ੈਸਲਾ ਮੁੜ ਦੁਹਰਾਇਆ- ਇਕ ਖ਼ਬਰ

ਹਾਥੀ ਕੇ ਦਾਂਤ ਖਾਨੇ ਕੇ ਔਰ, ਦਿਖਾਨੇ ਕੇ ਔਰ।

ਸੰਯੁਕਤ ਰਾਸ਼ਟਰ ‘ਚ ਇਰਾਨ ਵਿਰੁੱਧ ਮਤੇ ਦੌਰਾਨ ਭਾਰਤ ਰਿਹਾ ਗ਼ੈਰਹਾਜ਼ਰ- ਇਕ ਖ਼ਬਰ

ਅੱਧੀ ਤੇਰੀ ਆਂ ਮੁਲਾਹਜ਼ੇਦਾਰਾ, ਅੱਧੀ ਆਂ ਗ਼ਰੀਬ ਜੱਟ ਦੀ।

ਹਰਿਆਣਾ ਦੇ ਗ੍ਰਹਿ ਮੰਤਰੀ ਨੇ ਜ਼ੀਰਕ ਪੁਰ ਸੜਕ ਚਾਰ ਮਾਰਗੀ ਕਰਨ ਲਈ ਭਗਵੰਤ ਮਾਨ ਨੂੰ ਚਿੱਠੀ ਲਿਖੀ- ਇਕ ਖ਼ਬਰ

ਧਰਤੀ ਨੂੰ ਕਲੀ ਕਰਾ ਦੇ ਵੇ, ਨੱਚੂੰਗੀ ਸਾਰੀ ਰਾਤ।

ਸਨਅਤੀ ਪਲਾਟ ਅਲਾਟਮੈਂਟ ਘੁਟਾਲੇ ਦੀ ਜਾਂਚ ਵਾਲ਼ੀ ਫ਼ਾਈਲ ਗੁਆਚੀ-ਇਕ ਖ਼ਬਰ

ਸਾਰੇ ਡੈਸਕ ਫੋਲਦਾ ਆਈਂ ਵੇ, ਸਾਡੀ ਫ਼ਾਈਲ ਗੁਆਚੀ।

ਕਾਂਗਰਸ ਨੂੰ ਗੁਜਰਾਤ ‘ਚ ਵੋਟਾਂ ਮੰਗਣ ਦਾ ਕੋਈ ਹੱਕ ਨਹੀਂ- ਮੋਦੀ

ਗਲੀਆ ਹੋ ਜਾਣ ਸੁੰਞੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਭਾਜਪਾ ਤੋਂ ਅਸੰਤੁਸ਼ਟ ਹੋਣ ਕਾਰਨ ਕਾਂਗਰਸ ਵਲ ਲੋਕਾਂ ਦਾ ਸਮਰਥਨ ਵਧਿਆ- ਸ਼ਮਸ਼ੇਰ ਗੋਗੀ

ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਹਰਿਆਣਾ ਵਿਧਾਨ ਸਭਾ ਲਈ ਚੰਡੀਗੜ੍ਹ ‘ਚ ਥਾਂ ਮੰਗਣੀ ਤਰਕਹੀਣ ਤੇ ਬੇਬੁਨਿਆਦ- ਜਾਖੜ

ਚੰਦ ਕੌਰ ਚੱਕਵਾਂ ਚੁੱਲ੍ਹਾ, ਕਿਤੇ ਯਾਰਾਂ ਨੂਂ ਭਿੜਾ ਕੇ ਮਾਰੂ।

ਸੱਤਾ ਤੋਂ ਲਾਂਭੇ ਹੋਏ ਲੋਕ ਯਾਤਰਾਵਾਂ ਕੱਢ ਰਹੇ ਹਨ- ਮੋਦੀ

ਰੱਥ ਯਾਤਰਾ ਕੀਹਨੇ ਸੀ ਸ਼ੁਰੂ ਕੀਤੀ, ਪਹਿਲਾਂ ਪੀੜ੍ਹੀ ਆਪਣੀ ਹੇਠ ਸੋਟਾ ਫੇਰਿਉ ਜੀ।

ਸ਼੍ਰੋਮਣੀ ਕਮੇਟੀ ਵਲੋਂ ਯੂਟਿਊਬ ਚੈਨਲ ਸ਼ੁਰੂ ਕਰਨ ਦਾ ਫ਼ੈਸਲਾ- ਧਾਮੀ

ਚੰਨ ਚੰਨਾਂ ਦੇ ਮਾਮਲੇ, ਚੜ੍ਹਨ ਕੇ ਨਾ ਹੀ ਚੜ੍ਹਨ।

ਕੇਂਦਰ ਨੇ ਚੋਣ ਕਮਿਸ਼ਨ ਨੂੰ ਕੀਤਾ ਕਮਜ਼ੋਰ- ਵਿਰੋਧੀ ਪਾਰਟੀਆਂ

ਰੰਗ ਪੀਲਾ ਕਿਉਂ ਪੈ ਗਿਆ, ਭਾਬੋ ਮੈਨੂੰ ਰੋਜ਼ ਪੁੱਛਦੀ।

ਮੁੱਖ ਮੰਤਰੀ ਦਫ਼ਤਰ ਅੱਗੇ ਪੱਕੇ ਮੋਰਚੇ ਦੀਆਂ ਤਿਆਰੀਆਂ ਜ਼ੋਰ ਨਾਲ਼ ਸ਼ੁਰੂ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਸ਼੍ਰੋਮਣੀ ਅਕਾਲੀ ਦਲ ਚੰਡੀਗੜ੍ਹ ਦਾ ਇਕ ਇੰਚ ਵੀ ਹਰਿਆਣੇ ਨੂੰ ਨਹੀਂ ਦੇਣ ਦੇਵੇਗਾ- ਇਕ ਖ਼ਬਰ

ਪੀ ਸ਼ਰਾਬਾਂ ਤਖ਼ਤੋਂ ਲੱਥੇ ਰਾਜੇ ਰਾਜ ਗਵਾ ਕੇ, ਤਾਜ ਲੁਹਾ ਕੇ।

20 ਨਵੰਬਰ 2022

ਸੰਯੁਕਤ ਕਿਸਾਨ ਮੋਰਚੇ ਦੇ ਪ੍ਰਮੁੱਖ ਆਗੂ ਮੁੜ ਸਿਰ ਜੋੜ ਕੇ ਬੈਠੇ- ਇਕ ਖ਼ਬਰ

ਸਉਣ ਵੀਰ ਕਰੇ ‘ਕੱਠੀਆਂ, ਭਾਦੋਂ ਚੰਦਰੀ ਵਿਛੋੜੇ ਪਾਵੇ।

ਸ਼੍ਰੋਮਣੀ ਅਕਾਲੀ ਦਲ ਥੱਕ ਹਾਰ ਕੇ ਬੀ.ਜੇ.ਪੀ. ਨਾਲ ਗੱਠਜੋੜ ਲਈ ਉਤਾਵਲਾ- ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਬਾਈਡੇਨ ਨੇ ਜੀ-20 ਸੰਮੇਲਨ ਤੋਂ ਬਾਅਦ ਚੀਨੀ ਹਮਰੁਤਬਾ ਨਾਲ ਕੀਤੀ ਵੱਖ ਮੁਲਾਕਾਤ-ਇਕ ਖ਼ਬਰ

ਇਕ ਤੈਨੂੰ ਗੱਲ ਪੁੱਛਣੀ, ਪਰ ਪੁੱਛਣੀ ਮੈਂ ਓਹਲੇ ਹੋ ਕੇ।

ਦਾਦੂਵਾਲ ਨੂੰ ਹਰਿਆਣਾ ਕਮੇਟੀ ਦੀ ਪ੍ਰਧਾਨਗੀ ਤੋਂ ਹਟਾਉਣ ਦੀ ਮੰਗ-ਇਕ ਖ਼ਬਰ

ਕਾਲ਼ੇ ਕੋਲ ਮੰਜਾ ਨਹੀਂ ਡਾਹੁਣਾ, ਲਿਸ਼ਕੇ ਤਾਂ ਪੈ ਜੂ ਬਿਜਲੀ।

ਭਾਜਪਾ ਨਾਲ ਸਮਝੌਤੇ ਬਿਨਾਂ ਸਾਡੀਆਂ ਬਾਹਵਾਂ ਨਹੀਂ ਆਕੜੀਆਂ- ਮਲੂਕਾ

ਘੜਾ ਚੁੱਕ ਲਊਂ ਪੱਟਾਂ ’ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਸਿੱਖ ਧਰਮ ਦੇ ਪ੍ਰਚਾਰ ਲਈ ਸ਼੍ਰੋਮਣੀ ਕਮੇਟੀ ਮੁਲਾਜ਼ਮ ਹਿੱਸਾ ਪਾਉਣ- ਧਾਮੀ

ਦਾਲ਼ ਮੰਗੇਂ ਛੜਿਆਂ ਤੋਂ, ਨਾ ਸ਼ਰਮ ਗੁਆਂਢਣੇ ਆਵੇ।

ਪੰਜਾਬ ‘ਚ ਬੀ.ਜੇ.ਪੀ. ਤੇ ਅਕਾਲੀ ਦਲ ਦੇ ਗੱਠਜੋੜ ਦੀ ਕੋਈ ਸੰਭਾਵਨਾ ਨਹੀਂ- ਅਸ਼ਵਨੀ ਸ਼ਰਮਾ

ਕਿਤੇ ‘ਕੱਲੀ ਬਹਿ ਕੇ ਸੋਚੀਂ ਨੀਂ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।

ਬੰਗਾਲ ਤੇ ਟੀ.ਐਮ.ਸੀ. ਖ਼ਿਲਾਫ਼ ਘੜੀ ਜਾ ਰਹੀ ਹੈ ਸਾਜ਼ਿਸ਼- ਮਮਤਾ ਬੈਨਰਜੀ

ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਡੋਨਾਲਡ ਟਰੰਪ ਵਲੋਂ ਰਾਸ਼ਟਰਪਤੀ ਚੋਣਾਂ ਲੜਨ ਦਾ ਐਲਾਨ- ਇਕ ਖ਼ਬਰ

ਮੂੰਹ ਉਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਕੇਂਦਰ ਦੀਆਂ ਨੀਤੀਆਂ ਨੇ ਅਰਥਿਕਤਾ ਤਬਾਹ ਕੀਤੀ, ਕਿਸਾਨੀ ਦਾ ਲੱਕ ਤੋੜਿਆ- ਰਾਹੁਲ ਗਾਂਧੀ

ਬਾਣੀਆ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।

ਜੇ ਕੇਂਦਰ ਰਾਜਾਂ ਦੇ ਬਕਾਏ ਨਹੀਂ ਦਿੰਦਾ ਤਾਂ ਅਸੀਂ ਵੀ ਜੀ.ਐਸ.ਟੀ. ਰੋਕ ਸਕਦੇ ਹਾਂ-ਮਮਤਾ

ਕੁਰਸੀ ‘ਤੇ ਬੈਠਦੀ ਲਗਾ ਕੇ ਮੇਜ਼ ਜੀ, ਬੀਬੀ ਦਾ ਸਰੂਪ ਬਿਜਲੀ ਤੋਂ ਤੇਜ਼ ਜੀ।

ਵੀਹ ਵੀਹ ਲੱਖ ‘ਚ ਵਿਕੀਆਂ ਨਾਇਬ ਤਹਿਸੀਲਦਾਰੀਆਂ- ਇਕ ਖ਼ਬਰ

ਟੁੱਟ ਪੈਣੇ ਦਰਜ਼ੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਏ.ਟੀ.ਐਮ. ਤੋੜਨ ਵਾਲਾ ਨਿਕਲਿਆ ਭਾਜਪਾ ਨੇਤਾ ਦਾ ਪੁੱਤਰ- ਇਕ ਖ਼ਬਰ

ਤੇਲੀ ਕਰ ਕੇ ਰੁੱਖਾ ਖਾਈਏ, ਇਹ ਨਹੀਂ ਸਾਥੋਂ ਹੋਣਾ।

ਬੀਮੇ ਦੇ ਦਸ ਲੱਖ ਰੁਪਏ ਲੈਣ ਲਈ ਪੁੱਤਰ ਨੇ ਸੁਪਾਰੀ ਦੇ ਕੇ ਮਰਵਾਇਆ ਪਿਉ- ਇਕ ਖ਼ਬਰ

ਚਿੱਟਾ ਹੋ ਗਿਆ ਲਹੂ ਭਰਾਵੋ ਚਿੱਟਾ ਹੋ ਗਿਆ ਲਹੂ।

ਭਾਜਪਾ ਨਾਲ ਗੱਠਜੋੜ ਹੋਣ ‘ਤੇ ਅਕਾਲੀ ਦਲ ਹੋਵੇਗਾ ਵੱਡਾ ਭਰਾ- ਮਲੂਕਾ

ਉਹ ਕਹੇ ਦੇਹ ਚੋਪੜੀਆਂ, ਉਹ ਕਹੇ ਹੋ ਬੂਹਿਓਂ ਬਾਹਰ।

ਪੰਜਾਬ ਦਾ ਖ਼ਜ਼ਾਨਾ ਲੁਟਾ ਰਹੀ ਹੈ ‘ਆਪ’ ਸਰਕਾਰ- ਪ੍ਰਨੀਤ ਕੌਰ

ਹਾਂ ਜੀ ਬੀਬੀ ਜੀ ਠੀਕ ਫੁਰਮਾਇਆ ਤੁਸੀਂ, ਕੁਝ ਲੁੱਟਦੇ ਐ ਤੇ ਕੁਝ ਲੁਟਾਉਂਦੇ ਐ।

ਆਰ.ਐਸ.ਐਸ. ਤੇ ਭਾਜਪਾ ਸਿੱਖ ਮਾਮਲਿਆਂ ਵਿਚ ਦਖ਼ਲ ਨਾ ਦੇਣ- ਸ਼੍ਰੋਮਣੀ ਕਮੇਟੀ

ਓ ਭਾਈ ਇਸ ਤਰ੍ਹਾਂ ਦੇ ਬਿਆਨ ਦੇਣ ਤੋਂ ਪਹਿਲਾਂ ‘ਮਾਲਕਾਂ’ ਨਾਲ ਤਾਂ ਸਲਾਹ ਕਰ ਲਿਆ ਕਰੋ।

ਸੰਯੁਕਤ ਕਿਸਾਨ ਮੋਰਚੇ ਵਲੋਂ ਸਰਕਾਰ ਖ਼ਿਲਾਫ਼ ਪੱਕੇ ਮੋਰਚੇ ਸ਼ੁਰੂ- ਇਕ ਖ਼ਬਰ

ਹਾਜੀ ਲੋਕ ਮੱਕੇ ਵਲ ਜਾਂਦੇ, ਅਸਾਂ ਜਾਣਾ ਤਖ਼ਤ ਹਜ਼ਾਰੇ।

14 ਨਵੰਬਰ 2022

ਦਿੱਲੀ ‘ਚ ਪ੍ਰਦੂਸ਼ਣ ਲਈ ਪੰਜਾਬ ਜ਼ਿੰਮੇਵਾਰ- ਕੇਂਦਰ ਸਰਕਾਰ

ਜੇਠ ਦੀ ਨਜ਼ਰ ਬੁਰੀ, ਟੁੱਟ ਗਿਆ ਮੇਰਾ ਗਿੱਟਾ।

ਬਰਤਾਨਵੀ ਹਾਈ ਕੋਰਟ ਨੇ ਨੀਰਵ ਮੋਦੀ ਨੂੰ ਭਾਰਤ ਹਵਾਲੇ ਕਰਨ ਦੇ ਦਿਤੇ ਹੁਕਮ- ਇਕ ਖ਼ਬਰ

ਬੜੀ ਮੌਜ ਉਡਾ ਲਈ ਬਈ ਹੁਣ ਚਲੋ ਆਪਣੇ ਡੇਰੇ।

ਗੁਜਰਾਤ ਦੇ ਲੋਕਾਂ ਨੂੰ ‘ਡਬਲ ਇੰਜਣ’ ਦੇ ਧੋਖੇ ਤੋਂ ਬਚਾਵਾਂਗੇ- ਰਾਹੁਲ

ਓਭਾ ਜੀ, ਪਹਿਲਾਂ ਆਪਣਾ ਆਪ ਤਾਂ ਬਚਾ ਲਉ।

ਮੈਨੂੰ ਲੋਕਾਂ ਤੋਂ ਮਿਲਦੇ ਪਿਆਰ ਕਾਰਨ ਭਾਜਪਾ ਪ੍ਰੇਸ਼ਾਨ- ਕੇਜਰੀਵਾਲ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਭਾਰਤ ਤੇ ਰੂਸ ਦੇ ਰਿਸ਼ਤੇ ਡੂੰਘੇ ਤੇ ਪਰਖ਼ੇ ਹੋਏ- ਜੈਸ਼ੰਕਰ

ਮਿੱਠੇ ਯਾਰ ਦੇ ਬਰੋਬਰ ਬਹਿ ਕੇ, ਮਿੱਠੇ ਮਿੱਠੇ ਬੇਰ ਚੁਗੀਏ।

ਅਕਾਲੀ ਦਲ ‘ਚੋਂ ਮੈਨੂੰ ਕੋਈ ਨਹੀਂ ਕੱਢ ਸਕਦਾ- ਬੀਬੀ ਜਗੀਰ ਕੌਰ

ਸੀਟੀ ਤੇ ਸੀਟੀ ਵੱਜੇ, ਜਦੋਂ ਮੈਂ ਗਿੱਧੇ ਵਿਚ ਆਈ।

ਪ੍ਰਧਾਨ ਮੰਤਰੀ ਨੇ ਅਜੇ ਤੱਕ ਨੋਟਬੰਦੀ ਦੀ ਆਪਣੀ ਅਸਫ਼ਲਤਾ ਨੂੰ ਸਵੀਕਾਰ ਨਹੀਂ ਕੀਤਾ- ਖੜਗੇ

ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਹੁਣ ਲੋਕਾਂ ਨੂੰ ‘ਜੀ ਆਇਆਂ ਨੂੰ’ ਕਹਿ ਕੇ ਸੰਬੋਧਨ ਕਰਨਗੇ ਪੁਲਿਸ ਕਰਮਚਾਰੀ- ਇਕ ਖ਼ਬਰ

ਘੋਟਾ ਫੇਰਨ ਵੇਲੇ ਕਿਹਾ ਕਰਨਗੇ ‘ ਹਮ ਘਰ ਸਾਜਨ ਆਏ’।

ਸਿੱਖਾਂ ਵਿਰੁੱਧ ਪ੍ਰਚਾਰ ਬਾਰੇ ਅਕਾਲ ਤਖ਼ਤ ਦੇ ਜਥੇਦਾਰ ਨੇ ਚਿੰਤਾ ਪ੍ਰਗਟਾਈ- ਇਕ ਖ਼ਬਰ

ਬਸ ਅਸੀਂ ਸਮੇਂ ਸਮੇਂ ‘ਤੇ ਚਿੰਤਾ ਪ੍ਰਗਟਾਅ ਕੇ ਸੁਰਖੁਰੂ ਹੋ ਜਾਂਦੇ ਹਾਂ।

ਭਾਜਪਾ ਤੇ ਆਮ ਆਦਮੀ ਪਾਰਟੀ ਇਕ ਹੀ ਟੀਮ- ਕਨ੍ਹੱਈਆ ਕੁਮਾਰ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਮੀਡੀਆ ਨੂੰ ਸਰਕਾਰ ਦੀਆਂ ਖ਼ਾਮੀਆਂ ਉਜਾਗਰ ਕਰਨ ਦੀ ਲੋੜ- ਮਨਮੋਹਨ ਸਿੰਘ

ਰਾਂਝਾ ਜੋੜ ਕੇ ਪਰ੍ਹੇ ਫਰਿਆਦ ਕਰਦਾ, ਵੇਖੋ ਖੁੱਸਦੇ ਸਾਕ ਬੇਦੋਸ਼ਿਆਂ ਦੇ।

ਹਿਮਾਚਲ ਦੀਆਂ ਸਾਰੀਆਂ 68 ਸੀਟਾਂ ‘ਤੇ ‘ਆਪ’ ਦੀ ਜ਼ਮਾਨਤ ਜ਼ਬਤ ਹੋਵੇਗੀ- ਨੱਢਾ

ਚੜ੍ਹੀ ਰੰਗਪੁਰੋਂ ਜੰਞ ਖੇੜਿਆਂ ਦੀ, ਢੁੱਕੀ ਸ਼ਹਿਰ ਸਿਆਲਾਂ ਨੂੰ ਆ ਮੀਆਂ।

‘ਸੱਤਾ ਦੀ ਦੁਰਵਰਤੋਂ’ ਖ਼ਿਲਾਫ਼ ਇਮਰਾਨ ਵਲੋਂ ਰਾਸ਼ਟਰਪਤੀ ਨੂੰ ਪੱਤਰ- ਇਕ ਖ਼ਬਰ

ਚਿੱਠੀਆਂ ਸਾਹਿਬਾਂ ਜੱਟੀ ਨੇ, ਲਿਖ ਮਿਰਜ਼ੇ ਵਲ ਪਾਈਆਂ।

ਟਰੱਕ ‘ਤੇ ਭੁੱਕੀ ਵੇਚਦਾ ਪੁਲਿਸ ਵਲੋਂ ਕਾਬੂ- ਇਕ ਖ਼ਬਰ

ਇਹੀ ਤਾਂ ਵਿਕਾਸ ਐ! ਰੇਹੜੀ ਤੋਂ ਟਰੱਕ ਹੋ ਗਿਆ।

ਬੀਬੀ ਜਗੀਰ ਕੌਰ ਨੂੰ ਪਾਰਟੀ ‘ਚੋਂ ਕੱਢਣਾ ਸੁਖਬੀਰ ਬਾਦਲ ਦੀ ਨੈਤਿਕ ਹਾਰ- ਸੁਰਜੀਤ ਸਿੰਘ ਕੋਹਲੀ

ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ। 

06 ਨਵੰਬਰ 2022

ਕੇਜਰੀਵਾਲ ਨੇ ਪਰਾਲੀ ਸਾੜਨ ਵਾਲੇ ਪੰਜਾਬ ਦੇ ਕਿਸਾਨਾਂ ਨੂੰ ਕੀਤਾ ਦੋਸ਼-ਮੁਕਤ-ਇਕ ਖ਼ਬਰ

ਵਾਹ ਬਈ ਵਾਹ! ਇੰਨੀ ਛੇਤੀ ਤਾਂ ਗਿਰਗਿਟ ਵੀ ਰੰਗ ਨਹੀਂ ਬਦਲਦਾ।

ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਬੀਬੀ ਜਗੀਰ ਕੌਰ ਦੀ ਹਮਾਇਤ-ਇਕ ਖ਼ਬਰ

ਦੁਸ਼ਮਨ ਦਾ ਦੁਸ਼ਮਨ ਸਾਡਾ ਦੋਸਤ।

ਹਰ ਹਾਲਤ ‘ਚ ਚੋਣ ਲੜਾਂਗੀ- ਬੀਬੀ ਜਗੀਰ ਕੌਰ

ਵਾਰਸ ਸ਼ਾਹ ਨਾ ਮੁੜਾਂ ਰੰਝੇਟੜੇ ਤੋਂ, ਭਾਵੇਂ ਬਾਪ ਦੇ ਬਾਪ ਦਾ ਬਾਪ ਆਵੇ।

ਆਈ.ਐਸ.ਆਈ. ਨਾਲ ਕੰਮ ਕਰਨ ਵਾਲੀ ਅਮਰੀਕਨ ਔਰਤ ਨੂੰ ਹੋਈ 20 ਸਾਲ ਦੀ ਸਜ਼ਾ-ਇਕ ਖ਼ਬਰ

ਆਈ.ਐਸ.ਆਈ. ਨਾਲ ਕੰਮ ਕਰਨ ਵਾਲੀ ਬਰਤਾਨਵੀ ਔਰਤ ਕਰ-ਦਾਤਾਵਾਂ ਦੇ ਪੈਸੇ ਨਾਲ ਉਡਾ ਰਹੀ ਹੈ ਗੁਲਛਰੇ।

ਸਰਕਾਰੀ ਫ਼ਾਰਮੂਲਾ: ਪਰਾਲ਼ੀ ਦਾ ਧੂੰਆਂ ਉੱਠਿਆਂ ਤਾਂ ਨੰਬਰਦਾਰਾਂ ਦੀ ਖੈਰ ਨਹੀਂ- ਇਕ ਖ਼ਬਰ

ਨਾਨੀ ਖਸਮ ਕਰੇ, ਦੋਹਤਾ ਚੱਟੀ ਭਰੇ।

ਬੀਬੀ ਜਗੀਰ ਕੌਰ ਦੇ ਮਾਮਲੇ ‘ਚ ਅਕਾਲੀ ਦਲ ਨੇ ਭਾਜਪਾ ਘੇਰੀ, ਲਾਲ ਪੁਰਾ ‘ਤੇ ਲਾਏ ਦੋਸ਼-ਇਕ ਖ਼ਬਰ

ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ ‘ਤੇ।

13 ਹਜ਼ਾਰ ਰੁਪਏ ਰਿਸ਼ਵਤ ਲੈਣ ਦੇ ਦੋਸ਼ ਵਿਚ ਮਾਲ ਪਟਵਾਰੀ ਗ੍ਰਿਫ਼ਤਾਰ-ਇਕ ਖ਼ਬਰ

ਛੂਟਤੀ ਨਹੀਂ ਹੈ ਕਾਫ਼ਰ, ਮੂੰਹ ਕੋ ਲਗੀ ਹੂਈ।

‘ਜਥੇਦਾਰ’ ਨੇ ਮੇਰੇ ਵਲੋਂ ਲਿਖੀ ਚਿੱਠੀ ਦਾ ਮੁੜ ਕੋਈ ਜਵਾਬ ਨਹੀਂ ਦਿਤਾ-ਪੰਜੋਲੀ

ਮੇਰੇ ਢੋਲ ਦੀ ਚਿੱਠੀ ਨਾ ਲਿਆਇਆ, ਮਰ ਜੇਂ ਤੂੰ ਡਾਕ ਵਾਲਿਆ।

ਕਾਂਗਰਸ ਡੁੱਬਦਾ ਜਹਾਜ਼, ਜਿਸ ਦਾ ਕੋਈ ਭਵਿੱਖ ਨਹੀਂ- ਅਮਿਤ ਸ਼ਾਹ

ਤੂੰ ਤਾਂ ਅਮਲੀ ਹੋ ਗਿਆ ਭਾਰਾ, ਘਰ ਤੇਰੇ ਨਹੀਉਂ ਵਸਣਾ।

ਬਾਦਲ ਅਕਾਲੀ ਦਲ ਵਲੋਂ ਬੀਬੀ ਜਗੀਰ ਕੌਰ ਨੂੰ ਮੁਅੱਤਲ ਕਰ ਦਿਤਾ ਗਿਆ- ਇਕ ਖ਼ਬਰ

ਕਾਹਨੂੰ ਮਾਰਦੈਂ ਜੱਟਾ ਲਲਕਾਰੇ, ਵੇ ਔਖੀ ਹੋ ਜੂ ਕੈਦ ਕੱਟਣੀ।

ਮੁਖ਼ਤਾਰ ਅੰਸਾਰੀ ਨੂੰ ਪੰਜਾਬ ‘ਚ ਰੱਖਣ ਲਈ ਵਕੀਲਾਂ ‘ਤੇ ਖਰਚੇ ਗਏ 55 ਲੱਖ ਰੁਪਏ- ਇਕ ਖ਼ਬਰ

ਐਰ ਗ਼ੈਰ ਨੂੰ ਸ਼ੱਕਰ ਦਾ ਦਾਣਾ, ਭਗਤੇ ਨੂੰ ਖੰਡ ਪਾ ਦਿਉ।

ਡੇਰਾ ਮੁਖੀ ਨੂੰ ਪੈਰੋਲ ਦਿਵਾਉਣ ਵਿਚ ਸਰਕਾਰ ਦਾ ਕੋਈ ਹੱਥ ਨਹੀਂ- ਖੱਟਰ

ਦੋ ਘੁੱਟ ਪੀ ਕੇ ਦਾਰੂ, ਪੈਰ ‘ਤੇ ਮੁਕਰ ਗਿਆ।

ਕੈਪਟਨ ਅਮਰਿੰਦਰ ਦਾ ਦੌਰ ਹੁਣ ਖ਼ਤਮ ਹੋ ਗਿਐ- ਰਾਜਾ ਵੜਿੰਗ

ਇਹ ਜੱਗ ਸਰਾਏ ਹਮੇਸ਼ਗੀ ਦਾ, ਕੀਹਨੇ ਰੱਖਿਆ ਏ ਤੰਬੂ ਤਾਣ ਯਾਰੋ। 

ਅਕਾਲੀ ਦਲ ਲਈ ਚੁਣੌਤੀ ਬਣਿਆ ਸ਼੍ਰੋਮਣੀ ਕਮੇਟੀ ਦਾ ਇਜਲਾਸ- ਇਕ ਖ਼ਬਰ

ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲੀ, ਕੈਂਠੇ ਵਾਲ਼ਾ ਤਿਲਕ ਪਿਆ।

ਅਕਾਲੀ ਆਗੂ ਡਾ.ਚੀਮਾ ਅਤੇ ਰੱਖੜਾ ਬੀਬੀ ਜਗੀਰ ਕੌਰ ਨੂੰ ਉਸਦੇ ਘਰ ਜਾ ਕੇ ਮਿਲੇ- ਇਕ ਖ਼ਬਰ

ਅਸੀਂ ਦਰ ਤੇਰੇ ‘ਤੇ ਆਏ, ਖ਼ੈਰ ਪਾ ਦੇ ਸਾਨੂੰ ਦਾਤੀਏ।

ਰਿਸ਼ਵਤ ਮੰਗਣ ਦੇ ਦੋਸ਼ ਵਿਚ ਵਿਜੀਲੈਂਸ ਇੰਸਪੈਕਟਰ ਗ੍ਰਿਫ਼ਤਾਰ-ਇਕ ਖ਼ਬਰ

ਕੀ ਭਾਲ਼ਦਾ ਏਂ ਉੱਥੋਂ ਫ਼ਕਰਦੀਨਾ, ਜਿੱਥੇ ਵਾੜ ਹੀ ਖੇਤ ਨੂੰ ਖਾਂਵਦੀ ਏ।

31 ਅਕਤੂਬਰ 2022

ਬੀਬੀ ਜਗੀਰ ਕੌਰ ਵਲੋਂ ਖੁੱਲ੍ਹੇ-ਆਮ ਸ਼੍ਰੋਮਣੀ ਕਮੇਟੀ ਦੀ ਪ੍ਰਧਾਨਗੀ ਮੰਗਣ ਨਾਲ ਸੁਖਬੀਰ ਦੀ ਚਿੰਤਾ ਵਧੀ- ਇਕ ਖ਼ਬਰ    

ਹੀਰਾ ਨਾ ਮੋਤੀ ਮਾਂਗੂੰ, ਨਾ ਕੰਗਨੋਂ ਕੀ ਜੋੜੀ ਮਾਗੂੰ, ਮੈਂ ਤੋਂ ਮਾਂਗੂੰ ਪ੍ਰਧਾਨਗੀ, ਬਸ ਪ੍ਰਧਾਨਗੀ।

ਪੰਥਕ ਇਕਜੁੱਟਤਾ ਲਈ ਸਿਰਫ਼ ਸਿਆਸੀ ਏਕਤਾ ਅਹਿਮ ਨਹੀਂ- ਜਥੇਦਾਰ ਹਰਪ੍ਰੀਤ ਸਿੰਘ

ਗੋਲਕਾਂ ਦੀ ਏਕਤਾ ਵੀ ਉਤਨੀ ਹੀ ਜ਼ਰੂਰੀ ਹੈ ਜਥੇਦਾਰ ਜੀ।

ਰਿਸ਼ੀ ਸੂਨਕ ਬਾਰੇ ਭਾਜਪਾ ਤੇ ਵਿਰੋਧੀ ਧਿਰਾਂ ਵਿਚਾਲੇ ਸ਼ਬਦੀ ਜੰਗ- ਇਕ ਖ਼ਬਰ

ਬੇਗਾਨੀ ਸ਼ਾਦੀ ਮੈਂ ਅਬਦੁੱਲੇ ਦੀਵਾਨੇ।

ਕੇਜਰੀਵਾਲ ਵਲੋਂ ਕਰੰਸੀ ਨੋਟਾਂ ‘ਤੇ ਲਕਸ਼ਮੀ ਅਤੇ ਗਣੇਸ਼ ਦੀ ਤਸਵੀਰ ਲਾਉਣ ਦੀ ਮੋਦੀ ਨੂੰ ਅਪੀਲ- ਇਕ ਖ਼ਬਰ

ਉਘਰਿ ਗਇਆ ਜੈਸਾ ਖੋਟਾ ਢਬੂਆ ਨਦਰਿ ਸਰਾਫਾ ਆਇਆ- (ਗੁਰਬਾਣੀ)

ਅਮੀਰਾਂ ਦਾ ਪੱਖ ਪੂਰਦੀ ਹੈ ਮੋਦੀ ਦੀ ਭਾਜਪਾ ਸਰਕਾਰ –ਰਾਹੁਲ ਗਾਂਧੀ

ਸੀਤਾ ਦੇ ਛਲਣੇ ਨੂੰ, ਸੋਨੇ ਦਾ ਮਿਰਗ ਬਣਾਇਆ।

ਸੌਦਾ ਸਾਧ ਅਤੇ ਬਿਲਕਿਸ ਬਾਨੋ ਦੇ ਦੋਸ਼ੀਆਂ ਨੂੰ ਜੇਹਲ ਭੇਜਿਆ ਜਾਵੇ- ਸਵਾਤੀ ਮਾਲੀਵਾਲ

ਵਾਹ ਨੀ! ਸ਼ੇਰ ਬੱਚੀਏ।

ਦਰਬਾਰ ਸਾਹਿਬ ਤੋਂ ਗੁਰਬਾਣੀ ਦਾ ਅਸ਼ੁੱਧ ਪ੍ਰਸਾਰਣ ਕਿਉਂ?- ਬੀਰ ਦਵਿੰਦਰ ਸਿੰਘ

ਪ੍ਰਬੰਧਕ ਵਿਚਾਰੇ ਬਾਦਲਾਂ ਦੀ ਪ੍ਰਧਾਨਗੀ ਬਚਾਉਣ ਕਿ ਗੁਰਬਾਣੀ ਦੀ ਸ਼ੁੱਧਤਾ ਅਸ਼ੁੱਧਤਾ ਪਰਖਣ !

ਕਰੰਸੀ ਨੋਟਾਂ ‘ਤੇ ਲਕਸ਼ਮੀ ਤੇ ਗਣੇਸ਼ ਦੀ ਤਸਵੀਰ ਲਗਾਉਣ ਨਾਲ ਦੇਸ਼ ਦਾ ਅਰਥਚਾਰਾ ਸੁਧਰੇਗਾ- ਕੇਜਰੀਵਾਲ

ਕੇਜਰੀਵਾਲ ਜੀ ਇਹ ਵੀ ਦੱਸ ਦਿੰਦੇ ਕਿ ਆਈ.ਆਈ.ਟੀ. ਦੇ ਸਿਲੇਬਸ ‘ਚ ਕਿਸ ਚੈਪਟਰ ‘ਚ ਦਰਜ ਹੈ ਇਹ ਨੁਸਖਾ।

ਸ਼ਸ਼ੀ ਥਰੂਰ ਵਲੋਂ ਖੜਗੇ ਨੂੰ ਪੂਰਾ ਸਮਰਥਨ ਅਤੇ ਸਹਿਯੋਗ ਦੇਣ ਦਾ ਵਾਅਦਾ- ਇਕ ਖ਼ਬਰ

ਜਿੱਥੇ ਚਲੇਂਗਾ ਚੱਲੂੰਗੀ ਨਾਲ ਤੇਰੇ, ਟਿਕਟਾਂ ਦੋ ਲੈ ਲਈਂ।

ਰਾਜਸਥਾਨ ‘ਚ ਕੁੜੀਆਂ ਦੀ ਸ਼ਰੇਆਮ ‘ਨੀਲਾਮੀ’, ਕੌਮੀ ਮਹਿਲਾ ਕਮਿਸ਼ਨ ਨੇ ਜਾਂਚ ਲਈ ਬਣਾਈ ਟੀਮ- ਇਕ ਖ਼ਬਰ

ਬੇਟੀ ਬਚਾਉ, ਬੇਟੀ ਪੜ੍ਹਾਉ ਵਾਲ਼ੇ ਕਿਧਰ ਗਏ ਬਈ।

ਭਗਵੰਤ ਮਾਨ ਨੇ ਕੇਂਦਰ ਅੱਗੇ ਗੋਡੇ ਟੇਕੇ- ਅਕਾਲੀ ਦਲ

ਤੁਸੀਂ ਵੀ ਤਾਂ ਭਾਜਪਾ ਨੂੰ ਬਿਨਾਂ ਸ਼ਰਤ ਹਮਾਇਤ ਦੇ ਕੇ ਗੋਡੇ ਟੇਕਦੇ ਰਹੇ ਹੋ।

ਰੂਸ ਦੇ ਭਾਰਤ ਨਾਲ ਰਿਸ਼ਤੇ ਬਹੁਤ ਅਹਿਮ ਤੇ ਖ਼ਾਸ- ਪੂਤਿਨ

ਡੋਰ ਵੱਟ ਕੇ ਗਲੇ ਦੇ ਵਿਚ ਪਾਵਾਂ, ਮਿੱਤਰਾ ਤਵੀਤ ਬਣ ਜਾ।

ਨਿਤੀਸ਼ ਕੁਮਾਰ ਨੇ ਗ੍ਰਹਿ ਮੰਤਰਾਲੇ ਵਲੋਂ ਸੱਦੀ ਮੀਟਿੰਗ ਤੋਂ ਬਣਾਈ ਦੂਰੀ- ਇਕ ਖ਼ਬਰ

ਟੁੱਟ ਜਾਊਗਾ ਬਿਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

ਸ਼੍ਰੋਮਣੀ ਕਮੇਟੀ ‘ਤੇ ਕੌਮ ਦਾ ਕਬਜ਼ਾ, ਕਿਸੇ ਦਾ ਨਿਜੀ ਨਹੀਂ-ਸੁਖਬੀਰ ਬਾਦਲ

ਕਾਹਨੂੰ ਛੱਡਦੈਂ ਗਪੌੜੇ ਏਡੇ, ਸਭ ਕੁਝ ਜਾਣੇ ਦੁਨੀਆਂ।

ਸਿਆਸੀ ਸਿੱਖ ਜਥੇਬੰਦੀਆਂ ਸੱਤਾ ਦਾ ਲਾਲਚ ਛੱਡਣ- ਜਥੇਦਾਰ ਅਕਾਲ ਤਖ਼ਤ

ਤੇਲੀ ਕਰ ਕੇ ਰੁੱਖਾ ਖਾਈਏ, ਇਹ ਨਾ ਪੁੱਗਦਾ ਸਾਨੂੰ।