ਡੰਗ ਅਤੇ ਚੋਭਾਂ - ਗੁਰਮੀਤ ਸਿੰਘ ਪਲਾਹੀ

ਕੌਣ ਪੁੱਛੇ ਅਤੇ ਕੌਣ ਦੱਸੇ
ਖ਼ਬਰ ਹੈ ਕਿ ਕਿਸੇ ਵੀ ਕਿਸਮ ਦੀ ਅਸਹਿਮਤੀ ਬਰਦਾਸ਼ਤ ਨਾ ਕਰਨ ਵਾਲੇ ਯੂ.ਪੀ. ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਦੀ ਪੁਲਸ ਨੇ ਗਣਤੰਤਰ ਦਿਵਸ ਤੇ ਡਿਫੈਂਸ ਐਕਸਪੋ ਦੇ ਨਾਮ ਤੇ ਦਫ਼ਾ 144 ਲਗਾਈ, ਪਰ ਵਰਤਿਆ ਇਸਨੂੰ ਸੀ.ਏ.ਏ. ਦਾ ਵਿਰੋਧ ਕਰ ਰਹੀਆਂ ਬੀਬੀਆਂ ਦੇ ਵਿਰੁੱਧ। ਪੁਲਸ ਲਖਨਊ 'ਚ ਪ੍ਰੋਟੈਸਟ ਕਰ ਰਹੀਆਂ ਬੀਬੀਆਂ ਦੇ ਕੰਬਲ ਤੇ ਖਾਣਾ ਚੁੱਕ ਕੇ ਲੈ ਗਈ, ਧੂਣੀ ਤੇ ਪਾਣੀ ਪਾ ਦਿੱਤਾ। ਇਹ ਬੀਬੀ ਮਹਾਤਮਾ ਗਾਂਧੀ, ਡਾ. ਅੰਬੇਦਕਰ, ਭਗਤ ਸਿੰਘ ਦੇ ਪੋਸਟਰ ਫੜੀ ਇਨਕਲਾਬ ਜ਼ਿੰਦਾਬਾਦ ਦੇ ਨਾਹਰੇ ਲਾ ਰਹੀਆਂ ਸਨ।
ਕੌਣ ਪੁੱਛੇ ਅਤੇ ਕੌਣ ਦੱਸੇ ਅਸਹਿਮਤੀ ਬਰਦਾਸ਼ਤ ਨਾ ਕਰਨ ਵਾਲਿਆਂ ਤੋਂ ਕਿ ਬਾਬਰ ਵੀ ਤੁਰ ਗਿਆ, ਨਾਦਰ ਵੀ ਤੁਰ ਗਿਆ। ਰਹੀ ਇੰਦਰਾ ਵੀ ਨਹੀਂ। ਰਿਹਾ ਸਿਕੰਦਰ ਵੀ ਨਹੀਂ, ਮਸੋਲੀਨੀ ਵੀ ਨਹੀਂ। ਹਿਟਲਰ ਕਿਹੜਾ ਬੈਠਾ ਰਿਹਾ?
ਕੌਣ ਪੁੱਛੇ ਅਤੇ ਕੌਣ ਦੱਸੇ ਅਸਹਿਮਤੀ ਬਰਦਾਸ਼ਤ ਨਾ ਕਰਨ ਵਾਲਿਆਂ ਨੂੰ ਕਿ ਇੱਕ ਵਿੱਚ ਲੱਖ ਵੱਸਦੇ ਹਨ, ਜਿਹੜੇ ਭਾਵੇਂ ਸੁੰਨ ਧਾਰ ਬੈਠੇ ਹੋਣ ਪਰ ਜਦੋਂ ਗੱਜਣਗੇ ਉਦੋਂ ਵਸਣਗੇ ਵੀ।
ਕੌਣ ਪੁੱਛੇ ਅਤੇ ਕੌਣ ਦੱਸੇ ਅਸਹਿਮਤੀ ਬਰਦਾਸ਼ਤ ਨਾ ਕਰਨ ਵਾਲਿਆਂ ਨੂੰ ਬੀਬੀਆਂ ਰੁੱਖ ਹੁੰਦੀਆਂ ਨੇ। ਛਾਂ ਵੀ ਦਿੰਦੀਆਂ ਨੇ। ਜ਼ਹਿਰ ਕੂੜ ਨੂੰ ਪੀਂਦੀਆਂ ਨੇ। ਅੰਮ੍ਰਿਤ ਦੀ ਵਰਖਾ ਕਰਦੀਆਂ ਨੇ। ਹਰੀਅਲ ਦੀਵੇ ਬਾਲਕੇ ਸਮਾਜ ਨੂੰ, ਜਦੋਂ ਆਈ ਤੇ ਆਉਣ, ਸੇਧ ਵੀ ਦਿੰਦੀਆਂ ਨੇ, ਜ਼ਾਬਰਾਂ ਨੂੰ ਸਬਕ ਵੀ ਸਿਖਾਉਂਦੀਆਂ ਨੇ।
 ਕੌਣ ਪੁੱਛੇ ਅਤੇ ਕੌਣ ਦੱਸੇ ਅਸਹਿਮਤੀ ਬਰਦਾਸ਼ਤ ਨਾ ਕਰਨ ਵਾਲਿਆਂ ਨੂੰ ਕਿ ਜਿਹੜੇ ਪਾਣੀ ਪੁਣਿਆ ਪੀਂਦੇ ਨੇ, ਆਪਣਾ ਕੀਤਾ ਪੁਣਦੇ ਨਹੀਂ,ਉਹ ਆਪਣਿਆਂ ਦੀ ਵੀ ਨਹੀਂ ਸੁਣਦੇ ਤਾਂ ਫਿਰ ਆਪਣੀ ਛੱਤਾਂ ਤੇ ਜਾ ਚੜ੍ਹਦੇ ਨੇ, ਕੁੱਦਕੇ ਸਿਆਸਤ ਦੇ ਅੰਦਰੀ ਜਾ ਵੜਦੇ ਨੇ ਅਤੇ ਅੰਤ ਨੂੰ ਹਿਟਲਰਾਂ, ਮਸੋਲੀਨੀਆਂ, ਬਾਬਰਾਂ, ਨਾਦਰਾਂ ਦਾ ਘਾਣ ਕਰਦੇ ਨੇ। ਹੈਂ ਜੀ!

ਸੌਦਾਗਰਾਂ ਦੇ ਹੱਥੋਂ ਏਨੇ ਲਚਾਰ ਹੋਏ।
ਖ਼ਬਰ ਹੈ ਕਿ ਭਾਜਪਾ ਦੇ ਉਘੇ ਨੇਤਾ ਮਾਸਟਰ ਮੋਹਨ ਲਾਲ ਨੇ ਪੰਜਾਬ ਦੀਆਂ ਆਉਂਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਸਾਰੀਆਂ 117 ਸੀਟਾਂ ਉਤੇ ਭਾਜਪਾ ਵਲੋਂ ਇੱਕਲਿਆਂ ਹੀ ਲੜਨ ਦੀ ਵਕਾਲਤ ਕੀਤੀ ਹੈ। ਇਸ ਨਾਲ ਅਕਾਲੀ ਦਲ ਬਾਦਲ ਵਿੱਚ ਬਹੁਤ ਰੋਹ ਹੈ। ਅਕਾਲੀ ਦਲ ਦੇ ਜਿਲਾ ਜੱਥੇਦਾਰ ਪਠਾਨਕੋਟ ਸੁਰਿੰਦਰ ਕੰਵਰ ਸਿੰਘ ਮਿੰਟੂ ਨੇ ਕਿਹਾ ਕਿ ਅਕਾਲੀ-ਭਾਜਪਾ ਕੇਵਲ ਸਿਆਸੀ ਪਾਰਟੀਆਂ ਦਾ ਗੱਠਜੋੜ ਨਹੀਂ ਬਲਕਿ ਹਿੰਦੂ-ਸਿੱਖ ਭਾਈਚਾਰੇ ਦਾ ਪ੍ਰਤੀਕ ਹੈ। ਉਹਨਾ ਨੇ ਕਿਹਾ ਕਿ ਭਾਜਪਾ ਪ੍ਰਧਾਨ ਅਸ਼ਵਨੀ ਸ਼ਰਮਾ ਮਾਸਟਰ ਮੋਹਨ ਲਾਲ ਦੇ ਬਿਆਨ ਦੀ ਨਿੰਦਿਆ ਕਰਨਗੇ। ਉਧਰ ਮਾਸਟਰ ਮੋਹਨ ਲਾਲ ਨੇ ਕਿਹਾ ਹੈ ਕਿ ਉਹ ਆਪਣੇ ਬਿਆਨ ਤੇ ਅਡਿੱਗ ਹਨ। ਉਧਰ ਦਿੱਲੀ 'ਚ ਅਕਾਲੀਆਂ, ਭਾਜਪਾ ਦੇ ਰਵੱਈਏ ਤੋਂ ਦੁੱਖੀ ਹੋਕੇ ਦਿੱਲੀ 'ਚ ਵਿਧਾਨ ਸਭਾ ਚੋਣਾਂ ਭਾਜਪਾ ਨਾਲ ਇੱਕਠਿਆਂ ਹੋਕੇ ਨਾ ਲੜਨ ਦਾ ਫ਼ੈਸਲਾ ਕੀਤਾ ਹੈ। ਹਰਿਆਣੇ ਵਿੱਛ ਵੀ ਅਕਾਲੀ ਦਲ ਅਲੱਗ ਲੜਿਆ ਸੀ।
ਕੁਰਸੀਆਂ ਦਾ ਲਾਲਚ ਬੁਰਾ! ਉਸ ਤੋਂ ਵੀ ਬੁਰਾ ਘਰ 'ਚ ਹੀ ਕੁਰਸੀਆਂ ਦਾ ਲਾਲਚ! ਵੱਡੇ ਬਾਦਲ ਕੁਰਸੀ ਦਾ ਪੰਜ ਵੇਰ ਲਾਲਚ ਕੀਤਾ। ਪੰਜੇ ਵੇਰ, ਆਪਣੇ ਸਾਥੀਆਂ ਨੂੰ ਖੂੰਜੇ ਲਾਇਆ, ਜਿਹੜੇ ਵੱਡੀਆਂ ਢੁੱਠਾਂ ਵਾਲੇ ਸਨ, ਉਹਨਾ ਨੂੰ ਬਹੁਤਾ ਉਚੇ ਜਾਣ ਦਾ ਸਬਕ ਸਿਖਾਇਆ। ਬਾਜਪਾਈਆਂ, ਭਾਜਪਾਈਆਂ, ਅਡਵਾਨੀਆਂ ਨਾਲ ਦੋਸਤੀ ਪਾਕੇ ਆਪਣਿਆਂ ਨੂੰ ਰੁਸਾਇਆ।
ਆਪ ਥੱਕਿਆ ਤਾਂ ਕੁਰਸੀ ਤੇ ਪੁੱਤਰ ਨੂੰ ਬਿਠਾਇਆ, ਅਤੇ ਉਪਰੋਂ ਮੋਦੀ-ਸ਼ਾਹ ਪੱਲੇ ਆਪਣੇ ਘਰ ਦੇ ਜੀਅ ਨੂੰ ਸਿੰਘਾਸਨ ਤੇ ਬੈਠਾਇਆ। ਆਪਣੇ ਕਿਸੇ ਸੀਨੀਅਰ ਸਾਥੀ ਦਾ ਵੱਡੇ ਬਾਦਲ ਨੂੰ ਚੇਤਾ ਹੀ ਨਾ ਆਇਆ।
 ਵੇਖੋ ਨਾ ਜੀ, ਟੌਹੜਾ ਰੁਸਿਆ, ਤਲਵੰਡੀ, ਲੌਂਗੇਵਾਲ ਰੁਸਾਏ। ਮਾਝੇ ਦਾ ਜਰਨੈਲ, ਦੁਆਬੇ ਦਾ ਜਰਨੈਲ ਅਤੇ ਫਿਰ ਢੀਂਡਸੇ ਬਾਦਲਾਂ ਨੂੰ ਰਾਸ ਹੀ ਨਾ ਆਏ। ਜਿਹੜੇ  ਭਾਜਪਾਈਏਂ ਰਾਸ ਆਏ, ਉਹਨਾ ਪਹਿਲਾਂ ਹਰਿਆਣੇ 'ਚ ਅਤੇ ਹੁਣ ਦਿੱਲੀ 'ਚ ਬਾਦਲਾਂ ਨੂੰ ਗੂਠੇ ਦਿਖਾਏ। ਤੇ ਵਿਚਾਰੇ ਬਾਦਲ ਹੁਣ ''ਸੌਦਾਗਰਾਂ ਦੇ ਹੱਥੋਂ ਏਨੇ ਲਚਾਰ ਹੋਏ, ਰੌਣਕੀਲੇ ਰਸਤੇ ਆਖ਼ਰ ਬਜ਼ਾਰ ਹੋਏ'' ਗਾਉਂਦੇ ਫਿਰਦੇ ਹਨ।

ਰੁੱਤਾਂ ਆਉਂਦੀਆਂ ਤੇ ਰੁੱਤਾਂ ਜਾਂਦੀਆਂ ਨੇ,
ਐਪਰ ਚੱਜ ਦੀ ਨਹੀਂ ਸਰਕਾਰ ਮਿਲਦੀ!!
ਖ਼ਬਰ ਹੈ ਕਿ ਪੰਜਾਬ ਵਿਧਾਇਕਾਂ ਨਾਲ ਹੋਈ ਪ੍ਰੀ-ਬਜ਼ਟ ਮੀਟਿੰਗ 'ਚ ਪੰਜਾਬ ਕਾਂਗਰਸ ਪ੍ਰਧਾਨ ਸੁਨੀਲ ਜਾਖੜ ਮੁੜ ਕਾਫੀ ਨਾਰਾਜ਼ ਦਿਖੇ। ਉਹਨਾ ਕੈਪਟਨ ਸਾਹਮਣੇ ਨਾਰਾਜ਼ਗੀ ਪ੍ਰਗਟਾਈ। ਵਿਧਾਇਕਾਂ ਜਦੋਂ ਪਟਿਆਲੇ ਜ਼ਿਲੇ ਦੇ ਪੁਲਿਸ ਅਫ਼ਸਰਾਂ ਦੇ ਦੁਰਵਿਵਹਾਰ ਦੀਆਂ ਸ਼ਕਾਇਤਾਂ ਰੱਖੀਆਂ। ਸ਼ਿਕਾਇਤਾਂ ਦੇ ਅੰਬਾਰ ਨੇ ਜਾਖੜ ਦਾ ਪਾਰਾ ਚੜ੍ਹਾ ਦਿੱਤਾ। ਉਹਨਾ ਕਿਹਾ ਕਿ ਫ਼ਿਰੋਜ਼ਪੁਰ ਦਾ ਆਈ.ਜੀ. ਉਹਨਾ ਦੀ ਸੁਣਵਾਈ ਨਹੀਂ ਕਰਦਾ। ਜਿਸ ਹਲਕੇ ਦੀ ਜਨਤਾ ਨੇ ਸੁਖਬੀਰ ਬਾਦਲ ਦੀ ਜਿੱਤੀ ਹੋਈ ਸੀਟ ਭਾਰੀ ਫ਼ਰਕ ਨਾਲ ਜਿਤਵਾਕੇ ਸਾਡੇ ਤੇ ਭਰੋਸਾ ਪ੍ਰਗਟਾਇਆ, ਕੀ ਉਹਨਾ ਨੇ ਗਲਤੀ ਕਰ ਲਈ ਹੈ? ਜਾਖੜ ਨੇ ਮੁੱਖ ਮੰਤਰੀ ਨੂੰ ਕਿਹਾ ਕਿ ਜਾਂ ਤਾਂ ਅਫ਼ਸਰ ਤੁਹਾਡੇ ਹੁਕਮ ਨੂੰ ਕੁਝ ਸਮਝਦੇ ਹੀ ਨਹੀਂ ਜਾਂ ਫਿਰ ਤੁਸੀਂ ਉਹਨਾ ਨੂੰ ਕੁਝ ਜਿਆਦਾ ਹੀ ਛੋਟ ਦਿੱਤੀ ਹੋਈ ਹੈ।
ਜਾਖੜ ਜੀ, ਕੋਈ ਦਿੱਲੀ ਤੋਂ ਸਫਰੀ ਆਇਆ, ਤੁਹਾਨੂੰ ਹਰਾਕੇ ਬੰਬੇ ਦੀਆਂ ਰੌਣਕਾਂ ਵਾਲੇ ਥਾਂ ਜਾਕੇ ਮੁੜ ਬਿਰਾਜਮਾਨ ਹੋ ਗਿਆ। ਲੋਕ ਗੁੰਮਸ਼ੁਦਾ ਦੀ ਤਲਾਸ਼ ਦੇ ਨਾਹਰੇ ਲਾ ਰਹੇ ਹਨ ਅਤੇ ਆਪਣੇ ਪਿਆਰੇ ਧਰਮਿੰਦਰ ਦੇ ਬੇਟੇ ''ਸੰਨੀ ਦਿਓਲ'' ਨੂੰ ਤਲਾਸ਼ ਰਹੇ ਹਨ।
ਜਾਖੜ ਜੀ, ਤਿੰਨ ਵਰ੍ਹੇ ਪਹਿਲਾਂ ਕੈਪਟਨ ਆਏ। ਉਹਨਾ ਲੋਕਾਂ ਦੇ ਜੱਸ ਗਾਏ। ਸਟੇਜਾਂ ਤੇ ਨਾਹਰੇ ਲਾਏ। ਖੁਦਕੁਸ਼ੀਆਂ, ਬੇਰੁਜ਼ਗਾਰੀ ਨੂੰ ਖਤਮ ਕਰਨ ਦੇ ਵਾਅਦੇ ਸੁਣਾਏ, ਪਰ ਫਿਰ ਲੋਕਾਂ ਦੇ ਦਰ ਉਹ ਨਜ਼ਰ ਹੀ ਨਾ ਆਏ!
ਜਾਖੜ ਜੀ, ਦਸ ਸਾਲ ''ਬਾਦਲਾਂ'' ਪੰਜਾਬ ਦੇ ਲੋਕਾਂ ਦੇ ਵਖੀਏ ਉਧੇੜੇ। ਮਾਫ਼ੀਏ, ਅਫ਼ਸਰਸ਼ਾਹੀ ਦੀ ਯਾਰੀ ਨਾਲ ਆਪਣੇ ਚੰਮ ਦੇ ਸਿੱਕੇ ਚਲਾਏ ਤੇ ਉਹੀ ਸਿੱਕੇ, ਸੁਣਿਆ, ਕੈਪਟਨ ਦੇ ਵੀ ਕੰਮ ਆਏ। ਹੁਣ ਰਾਜ ਅਫ਼ਸਰਾਂ ਦਾ, ਭਾਗ ਅਫ਼ਸਰਾਂ ਦੇ, ਰਾਗ ਅਫ਼ਸਰਾਂ ਦੇ। ਇਹ ਪਹਿਲਾਂ ਵੀ ਸੀ, ਤੇ ਹੁਣ ਵੀ ਹੈ। ਉਪਰ ਵੀ ਹੈ ਮੋਦੀ ਦੁਆਰੇ, ਥੱਲੇ ਵੀ ਹੈ ਕੈਪਟਨ ਦੁਆਰੇ ਤੇ ਆਹ ਜਾਖੜ ਜੀ, ਸਿਆਸਤਦਾਨ, ਸਮਾਜ ਸੇਵਕ ਤਾਂ ਹਨ ਵਿਚਾਰੇ, ਕਰਮਾਂ ਦੇ ਮਾਰੇ, ਦੁਖਿਆਰੇ। ਹੈ ਕਿ ਨਾ? ਤਦੇ ਆਹਦੇ ਆ ਜਾਖੜ ਜੀ, ''ਰੁੱਤਾਂ ਆਉਂਦੀਆਂ ਤੇ ਰੁੱਤਾਂ ਜਾਂਦੀਆਂ ਨੇ, ਐਪਰ ਚੱਜ ਦੀ ਨਹੀਂ ਸਰਕਾਰ ਮਿਲਦੀ''!!

ਨਹੀਂ ਰੀਸਾਂ ਦੇਸ਼ ਮਹਾਨ ਦੀਆਂ
ਸਾਲ 2018-19 ਦੌਰਾਨ ਦੇਸ਼ ਵਿੱਚ 12 ਕਰੋੜ 42 ਲੱਖ ਪਾਸਪੋਰਟ ਜਾਰੀ ਕੀਤੇ, ਜਦਕਿ ਸਾਲ 1978-80 ਵਿੱਚ ਸਿਰਫ਼ 8 ਲੱਖ 51 ਹਜ਼ਾਰ ਪਾਸਪੋਰਟ ਜਾਰੀ ਕਿਤੇ ਗਏ ਸਨ।


ਇੱਕ ਵਿਚਾਰ
ਨਾ-ਕਾਮਯਾਬੀ ਮੈਨੂੰ ਕਦੇ ਪਛਾੜ ਨਹੀਂ ਸਕਦੀ, ਕਿਉਂਕਿ ਮੇਰੀ ਕਾਮਯਾਬੀ ਦੀ ਪ੍ਰੀਭਾਸ਼ਾ ਬਹੁਤ ਮਜ਼ਬੂਤ ਹੈ।
.............ਏ.ਪੀ.ਜੇ. ਅਬਦੂਲ ਕਲਾਮ

-ਗੁਰਮੀਤ ਸਿੰਘ ਪਲਾਹੀ
-98158-02070
-(ਪੰਜਾਬੀ ਫੀਚਰ ਏਜੰਸੀ ਵਲੋਂ ਜਾਰੀ)