ਗ਼ਜ਼ਲ - ਅਮਰਜੀਤ ਸਿੰਘ ਸਿੱਧੂ ਬੱਧਨੀ ਕਲਾਂ
ਦੁੱਖਾਂ ਤਕਲੀਫਾਂ ਤੋਂ ਜੇ ਤੁੰ ਘਬਰਾਵੇਂਗਾ। 
ਤਾਂ ਟੀਸੀ ਤੇ ਝੰਡਾ ਕਿੱਦਾਂ ਲਹਿਰਾਵੇਂਗਾ।
ਪੈਰ ਪਸਾਰੇਂਗਾ ਜੇ ਤੂੰ ਚਾਦਰ ਤੋਂ ਬਾਹਰ,
ਤਾਂ ਖਿੱਚਾ ਧੂਹੀ ਵਿੱਚ ਹੀ ਵਕਤ ਟਪਾਵੇਂਗਾ।
ਜੇ ਸੱਟਾਂ ਦੀ ਚੀਸ ਤੂੰ ਦੱਬੇਂਗਾ ਦਿਲ ਅੰਦਰ,
ਤਾਂ ਦਰਦਾਂ ਤੋਂ ਛੁਟਕਾਰਾ ਕਿੱਦਾਂ ਪਾਵੇਂਗਾ।
ਜੇ ਕਰਨੀ ਛੱਡ ਕਮਾਈ ਵਿਹਲਾ ਬੈਠ ਗਿਆ,
ਤਾਂ ਢਿੱਡ ਦੀ ਅੱਗ ਨੁੰ ਕਿੱਦਾਂ ਦੱਸ ਬੁਝਾਵੇਂਗਾ।
ਕੁੱਲੀ ਗੁੱਲੀ ਜੁੱਲੀ ਜੀਵਨ ਦਾ ਚੱਪੂ ਨੇ,
ਬਿਂਨ ਇੰਨਾਂ ਦੇ ਵਿਚਕਾਰੇ ਗੋਤੇ ਖਾਵੇਂਗਾ।
ਖੁਸ਼ ਰਹਿ ਕੇ ਜੇ ਤੂੰ ਖੁਸ਼ ਰੱਖੇਂਗਾ ਦੂਜੇ ਨੂੰ,
ਫਿਰ ਮਾਣ ਸਦਾ ਹੀ ਤੂੰ ਲੋਕਾਂ ਵਿੱਚ ਪਾਵੇਂਗਾ।
ਜੇ ਸਿਰ ਸਿੱਟ ਕੇ ਤੂੰ ਹਿੰਮਤ ਹਾਰ ਕੇ ਬੈਠ ਗਿਆ,
ਮੰਜਿਲ ਤੇ ਪਹੁੰਚਣ ਤੋ ਪਹਿਲਾਂ ਥੱਕ ਜਾਵੇਂਗਾ।
ਦੁੱਖ ਸੁੱਖ ਦੋਵੇਂ ਜਿੰਦਗੀ ਦਾ ਹਿੱਸਾ ਨੇ ਸਿੱਧੂ,
ਭਾਣੇ ਵਿੱਚ ਰਹਿ ਜੀਵਨ ਖੁਸ਼ੀਆਂ 'ਚ ਬਿਤਾਵੇਂਗਾ।
ਅਮਰਜੀਤ ਸਿੰਘ ਸਿੱਧੂ ਬੱਧਨੀ ਕਲਾਂ
+4917664197996
