ਚੁੰਝਾਂ-ਪ੍ਹੌਂਚੇ

25.05.2026

ਮੋਦੀ-ਮੇਲੋਨੀ ਨੇ ਕੀਤੀ ਰੋਮ ਦੀ ਸੈਰ- ਇਕ ਖ਼ਬਰ

ਕਿਸੇ ਜ਼ਮਾਨੇ ‘ਚ ਨੀਰੋ ਬੰਸਰੀ ਵਜਾਉਂਦਾ ਸੀ ਅੱਜ ਕੱਲ ਰੋਮ ਦੀ ਸੈਰ ਕਰਦੈ।

ਇਰਾਨ ਵਲੋਂ ਅਮਰੀਕਾ ਨੂੰ ਬੰਦਰਗਾਹ ਤੋਂ ਫ਼ੌਜਾਂ ਹਟਾਉਣ ਦੀ ਚੇਤਾਵਨੀ- ਇਕ ਖ਼ਬਰ

ਚੁੱਕ ਚਰਖ਼ਾ ਪਰ੍ਹਾਂ ਕਰ ਪੀਹੜੀ, ਛੜਿਆਂ ਨੇ ਬੋਕ ਬੰਨ੍ਹਣਾ।

ਸੁਪਰੀਮ ਕੋਰਟ ਨੇ ਚੋਣ ਕਮਿਸ਼ਨਰਾਂ ਦੀ ਨਿਯੁਕਤੀ ‘ਤੇ ਉਠਾਏ ਸਵਾਲ- ਇਕ ਖ਼ਬਰ

ਅਸੀਂ ਬਸ ਸਵਾਲ ਉਠਾਉਣ ਜੋਗੇ ਹੀ ਹਾਂ, ਕਰਨ ਜੋਗੇ ਕੁਝ ਨਹੀਂ।

ਅਕਾਲੀ ਦਲ ਵਾਰਸ ਪੰਜਾਬ ਦੇ ਅਤੇ ਅਕਾਲੀ ਦਲ ਪੁਨਰ ਸੁਰਜੀਤ ਦਾ ਤਾਲਮੇਲ ਟੁੱਟਿਆ- ਇਕ ਖ਼ਬਰ

ਕੋਹ ਤੁਰੀ ਨਾ ਅਖੇ ਬਾਬਾ ਤ੍ਰਿਹਾਈ।

ਜੰਗ ਕਾਰਨ 63 ਫ਼ੀਸਦੀ ਅਮਰੀਕਨ ਟਰੰਪ ਤੋਂ ਨਾਰਾਜ਼- ਇਕ ਖ਼ਬਰ

ਪਿੰਡ ‘ਚ ਪੁਆੜੇ ਪਾਉਂਦਾ ਨੀਂ, ਮਰ ਜਾਣਾ ਅਮਲੀ।

ਟਰੰਪ ਤੇ ਨੇਤਨਯਾਹੂ ਵਿਚਕਾਰ ਗਰਮਾ-ਗਰਮ ਬਹਿਸ- ਇਕ ਖ਼ਬਰ

ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਭਾਰਤ ਦੀ ਤਰਜ਼ ‘ਤੇ ਪਾਕਿਸਤਾਨ ‘ਚ ਵੀ ਬਣੀ ‘ਕਾਕਰੋਚ ਅਵਾਮੀ ਪਾਰਟੀ’- ਇਕ ਖ਼ਬਰ

ਤਾਏ ਦੀ ਧੀ ਚੱਲੀ ਤਾਂ ਮੈਂ ਕਿਉਂ ਰਹਾਂ ‘ਕੱਲੀ।

ਸ਼ੀ ਜਿਨਪਿੰਗ ਵਲੋਂ ਜੰਗ ਤੁਰਤ ਖ਼ਤਮ ਕਰਨ ਦੀ ਅਪੀਲ- ਇਕ ਖ਼ਬਰ

ਜ਼ਖ਼ਮ ਮਿਲਾਉਣਾ ਔਖਾ ਤੇ ਤਲਵਾਰ ਚਲਾਉਣੀ ਸੌਖੀ ਆ।

ਮੋਦੀ ਸਰਕਾਰ ਆਰ.ਬੀ.ਆਈ. ਨੂੰ ਨਿੱਜੀ ਖ਼ਜ਼ਾਨੇ ਵਾਂਗ ਵਰਤ ਰਹੀ ਹੈ- ਖ਼ਜ਼ਾਨਾ ਮੰਤਰੀ ਚੀਮਾ

ਕੋਈ ਊਠਾਂ ਵਾਲੇ ਨੀਂ, ਲੁੱਟ ਕੇ ਸੇਜ ਸੱਸੀ ਦੀ ਲੈ ਗਏ।

ਕਾਕਰੋਚ ਜੰਨਤਾ ਪਾਰਟੀ ਨੇ ਕੁਝ ਘੰਟਿਆਂ ਬਾਅਦ ਹੀ ਆਪਣਾ ਨਵਾਂ ਖਾਤਾ ਖੋਲ੍ਹ ਲਿਆ- ਇਕ ਖ਼ਬਰ

ਆ ਵੇ ਨਾਜਰਾ, ਜਾਹ ਵੇ ਨਾਜਰਾ ਬੋਤਾ ਬੰਨ੍ਹ ਦਰਵਾਜ਼ੇ।

ਭਾਜਪਾ ‘ਚ ਦੂਰਅੰਦੇਸ਼ੀ ਅਤੇ ਲੀਡਰਸ਼ਿੱਪ ਦੀ ਘਾਟ- ਖੜਗੇ

ਜਿਹੜਾ ਮੇਰੇ ਪੱਲੇ ਪੈ ਗਿਆ, ਉਹਨੂੰ ਪੱਗ ਬੰਨ੍ਹਣੀਂ ਨਾ ਆਵੇ।

ਟਰੰਪ ਨੇ ਅਰਬ ਦੇਸ਼ਾਂ ਦੇ ਆਗੂਆਂ ਦੀ ਬੇਨਤੀ ਉੱਤੇ ਇਰਾਨ ‘ਤੇ ਹਮਲਾ ਟਾਲਿਆ- ਇਕ ਖ਼ਬਰ

ਝੂਠੀ ਸ਼ਾਨ ਬਣਾਵਣ ਖਾਤਰ, ਝੂਠ ਹੀ ਬਣੇ ਸਹਾਰਾ।

2 ਦਸੰਬਰ 2024 ਦੇ ਫ਼ੈਸਲੇ ਨਾਲ ਜੁੜੇ ਲੀਡਰ ਸੱਤਾ ਲਈ ਅਕਾਲ ਤਖ਼ਤ ਨੂੰ ਪਿੱਠ ਦੇ ਕੇ ਖਿਸਕਣ ਲੱਗੇ- ਇਕ ਖ਼ਬਰ

ਮੋੜੀਂ ਮੋੜੀਂ ਵੇ ਗੁਲਜ਼ਾਰੀ, ਭੇਡਾਂ ਖਿਸਕ ਗਈਆਂ।

ਦੇਸ਼ ਵਿਚ ਆਰਥਕ ਤੂਫ਼ਾਨ ਆਉਣ ਵਾਲਾ ਹੈ- ਰਾਹੁਲ ਗਾਂਧੀ

ਚੋਰ ਚੌਧਰੀ ਯਾਰ ਨਾਪਾਕ ਦਾਮਨ, ਭੂਤ ਮੰਡਲੀ ਇਕ ਦੂੰ ਚਾਰ ਹੋਈ।

ਦੇਸ਼ ‘ਚ ਪੈਦਾ ਹੋਏ ਆਰਥਕ ਸੰਕਟ ਲਈ ਕੇਂਦਰ ਸਰਕਾਰ ਜ਼ਿੰਮੇਵਾਰ- ਸੁਖਜਿੰਦਰ ਰੰਧਾਵਾ

ਹੁੰਦਾ ਰੱਬ ਨਹੀਂ ਕਿਸੇ ਦਾ ਵੈਰੀ, ਵੈਰੀ ਤੇਰੇ ਐਬ ਬੰਦਿਆ।

===================================================================