ਚੁੰਝਾਂ-ਪ੍ਹੌਂਚੇ

08.09.2026

ਐਸ.ਆਈ.ਆਰ. ਦਾ ਉਦੇਸ਼ ਵੋਟਰ ਸੂਚੀ ‘ਚ ਹੇਰਾਫੇਰੀ ਕਰਨਾ ਹੈ- ਕਪਿਲ ਸਿੱਬਲ

ਉੱਚਾ ਹੋ ਗਿਆ ਅੰਬਰ ਦਾ ਤਾਰਾ, ਜਲ ਵਿਚ ਰੋਣ ਮੱਛੀਆਂ।

ਪੰਜਾਬ ਕੈਬਨਿਟ ਵਲੋਂ ਹਾਈ ਕੋਰਟ ਦੇ ਨਵੇਂ ਚੀਫ਼ ਜਸਟਿਸ ਦੀ ਨਿਯੁਕਤੀ ਵਿਰੁੱਧ ਮਤਾ ਪਾਸ- ਇਕ ਖ਼ਬਰ

ਵਰ ਹਾਣ ਦਾ ਜਿਹਨੇ ਨਾ ਲੱਭਿਆ, ਸਬਰ ਵਿਚੋਲੇ ‘ਤੇ।

ਕਾਂਗਰਸ ਹਾਈ ਕਮਾਂਡ ਨੇ ਬਘੇਲ ਦੀ ਥਾਂ ਪਾਇਲਟ ਨੂੰ ਪੰਜਾਬ ਦੀ ਕਮਾਂਡ ਸੰਭਾਲੀ- ਇਕ ਖ਼ਬਰ

ਮੁੰਡੇ ਗੱਭਰੂ ਸ਼ੁਕੀਨ ਬਥੇਰੇ, ਤੇਰੇ ਉੱਤੇ ਡੋਰ ਮਿੱਤਰਾ।

ਇਰਾਨ ਨਾਲ ਵਪਾਰ ਕਾਰਨ ਅਮਰੀਕਾ ਨੇ ਭਾਰਤ ਦੀਆਂ ਚਾਰ ਕੰਪਨੀਆਂ ‘ਤੇ ਪਾਬੰਦੀਆਂ ਲਾਈਆਂ- ਇਕ ਖ਼ਬਰ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਕਾਕਰੋਚ ਪਾਰਟੀ ਤੋਂ ਵੱਖ ਹੋਏ ਧੜੇ ਨੇ ਬਣਾਈ ਸੀ.ਜੇ.ਪੀ. ਜਮਹੂਰੀ ਪਾਰਟੀ- ਇਕ ਖ਼ਬਰ

ਕੋਹ ਤੁਰੀ ਨਾ ਅਖੇ ਬਾਬਾ ਤ੍ਰਿਹਾਈ।

ਯੋਗੀ ਨੇ ਚੋਣਾਂ ਮੌਕੇ ਮਥੁਰਾ-ਵ੍ਰਿੰਦਾਬਨ ਦਾ ਰਾਗ਼ ਛੇੜਿਆ- ਇਕ ਖ਼ਬਰ

ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਮੁਲਾਜ਼ਮਾਂ ਤੇ ਪੈਨਸ਼ਨਰਾਂ ਵਲੋਂ ਸਰਕਾਰ ਵਿਰੁੱਧ ਆਰ-ਪਾਰ ਦੀ ਲੜਾਈ ਦਾ ਐਲਾਨ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਸਰਕਾਰੀ ਵਿਭਾਗਾਂ ਵਿਰੁੱਧ 2025 ‘ਚ ਭ੍ਰਿਸ਼ਟਾਚਾਰ ਦੀਆਂ 70584 ਸ਼ਿਕਾਇਤਾਂ ਮਿਲੀਆਂ- ਇਕ ਖ਼ਬਰ

ਜਿਨ੍ਹਾਂ ਲੋਕਾਂ ਨੇ ਸ਼ਿਕਾਇਤ ਨਹੀਂ ਕੀਤੀ ਉਨ੍ਹਾਂ ਦੀ ਗਿਣਤੀ ਕਿੰਨੀ ਹੋਵੇਗੀ?

ਅਕਾਲੀ ਦਲ ਹੁਣ ਭਾਜਪਾ ਦੇ ਸਹਾਰੇ ਆਪਣਾ ਵਜੂਦ ਬਚਾਅ ਰਿਹੈ- ਇਕ ਖ਼ਬਰ

ਜਿੰਦ ਯਾਰ ਦੀ ਬੁੱਕਲ ਵਿਚ ਨਿਕਲੇ, ਸੁਰਗਾਂ ਨੂੰ ਜਾਣ ਹੱਡੀਆਂ।

ਪੰਥਕ ਹੋਣ ਦਾ ਦਾਅਵਾ ਕਰਨ ਵਾਲੇ ਅਕਾਲੀ ਦਲ ਦਾ ਪੀ.ਯੂ. ਚੋਣਾਂ ‘ਚ ਚਿਹਰਾ ਬੇਨਿਕਾਬ- ਇਆਲੀ

ਬਗ਼ਲ ਮੇਂ ਛੁਰੀ, ਮੂੰਹ ਮੇਂ ਰਾਮ ਰਾਮ।

ਟਰੰਪ ਨੇ ਤੀਸਰੇ ਕਾਰਜਕਾਲ ਲਈ ਚੋਣ ਲੜਨ ਦੀ ਇੱਛਾ ਪ੍ਰਗਟਾਈ- ਇਕ ਖ਼ਬਰ

ਯਾਰਾ ਮੋਦੀਆ ਕੋਈ ਢੰਗ ਦੱਸ ਦੇ, ਮਾਰ ਛੜੱਪਾ ਮੈਂ ਗੱਦੀ ਨੂੰ ਹੱਥ ਪਾਵਾਂ।

ਈ.ਡੀ. ਸਬੂਤ ਦੇਣ ਦੀ ਥਾਂ ‘ਆਪ’ ਨੂੰ ਬਦਨਾਮ ਕਰ ਰਹੀ ਹੈ- ਅਮਨ ਅਰੋੜਾ

ਪਾਣੀ ਡੋਲ੍ਹਗੀ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲ਼ਾ ਤਿਲਕ ਪਿਆ।

‘ਛਾਤਰੋਂ ਕੀ ਗੂੰਜ’ ਪ੍ਰੋਗਰਾਮ ਲਈ ਇੰਦੌਰ ‘ਚ ਰਾਹੁਲ ਗਾਂਧੀ ਨੂੰ ਸਟੇਡੀਅਮ ਨਹੀਂ ਮਿਲਿਆ- ਇਕ ਖ਼ਬਰ

ਨਿੰਮ ਦਾ ਤੂੰ ਮਾਣ ਨਾ ਕਰੀਂ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

ਭਗਵੰਤ ਮਾਨ ਨੇ ਲੋਕ ਮਿਲਣੀ ਦੌਰਾਨ ਵਿਰੋਧੀ ਪਾਰਟੀਆਂ ‘ਤੇ ਸਾਧਿਆ ਨਿਸ਼ਾਨਾ- ਇਕ ਖ਼ਬਰ

ਪੱਲਾ ਮਾਰ ਕੇ ਬੁਝਾ ਗਈ, ਅੱਖ ਨਾਲ ਗੱਲ ਕਰ ਗਈ।

ਮੋਹਾਲੀ ‘ਚ ਚਾਰ ਘੰਟੇ ਦਾ ਪਾਵਰ ਕੱਟ ਦੱਸ ਕੇ ਲੋਕਾਂ ਨੂੰ ਬਾਰਾਂ ਘੰਟੇ ਸੁੱਕਣੇ ਪਾਇਆ- ਇਕ ਖ਼ਬਰ

ਹੋਕਾ ਵੰਙਾਂ ਦਾ, ਕੱਢ ਦਿਖਾਇਆ ਚੱਕੀਰਾਹਾ।

==================================================================