10-08-2026

ਹੋਂਦ ਚਿੱਲੜ ਮਾਮਲੇ ‘ਚ ਸਾਨੂੰ ਇਨਸਾਫ਼ ਨਹੀਂ ਤਰੀਕਾਂ ਹੀ ਮਿਲ ਰਹੀਆਂ ਹਨ- ਇੰਜ: ਗਿਆਸਪੁਰਾ

ਬੜੇ ਨਾਦਾਨ ਹੋ ਮਿੱਤਰੋ, ਮਾਸ ਇੱਲਾਂ ਦੇ ਆਲ੍ਹਣੇ ‘ਚੋਂ ਭਾਲ਼ਦੇ ਹੋ।

ਖੇਤਰੀ ਦਲਾਂ ਦਾ ਕਮਜ਼ੋਰ ਹੋਣਾ ਭਾਰਤੀ ਰਾਜਨੀਤੀ ਲਈ ਚਿੰਤਾਜਨਕ- ਇਕ ਲੇਖ

ਗਲ਼ੀਆਂ ਹੋ ਜਾਣ ਸੁੰਞੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਪੰਜਾਬ ਵਿਧਾਨ ਸਭਾ ਵਲੋਂ ਈਥਾਨੌਲ ਬਾਰੇ ਮਤਾ ਪਾਸ ਕਰਨਾ ਸਿਆਸਤ ਤੋਂ ਪ੍ਰੇਰਿਤ- ਕੇਵਲ ਢਿੱਲੋਂ

ਢਿੱਲੋਂ ਸਾਬ ਤੁਹਾਡਾ ਬਿਆਨ ਕਰੋੜਾਂ ਲੋਕਾਂ ਨਾਲ ਗ਼ਦਾਰੀ ਵਾਲਾ ਹੈ।

ਬਲਾਤਕਾਰੀ ਆਸਾ ਰਾਮ ਨੂੰ ਮਿਲੀ 20 ਦਿਨਾਂ ਦੀ ਪੈਰੋਲ- ਇਕ ਖ਼ਬਰ

ਲੌਢੇ ਵੇਲੇ ਮਾਹੀਏ ਆਉਣਾ, ਮੰਨ ਪਕਾਵਾਂ ਕਣਕ ਦਾ, ਅੰਦਰ ਜਾਵਾਂ ਬਾਹਰ ਜਾਵਾਂ ਲਾਲ ਚੂੜਾ ਛਣਕਦਾ।

ਪਹਿਲਾਂ ਪ੍ਰਧਾਨ ਮੰਤਰੀ ਆਪਣੀ ਡਿਗਰੀ ਦਿਖਾਉਣ, ਫਿਰ ਮੈਂ ਆਪਣਾ ਵਜ਼ੀਫ਼ਾ- ਪੱਤਰ ਜਨਤਕ ਕਰਾਂਗਾ- ਦੀਪਕੇ

ਤੂੰ ਡਾਲ ਡਾਲ, ਮੈਂ ਪਾਤ ਪਾਤ।

ਮੋਦੀ ਦੀ ਨੌਜਵਾਨਾਂ ‘ਚ ਮਕਬੂਲੀਅਤ ਤੋਂ ਘਬਰਾਏ ਹੋਏ ਨੇ ਰਾਹੁਲ ਗਾਂਧੀ- ਪੀਯੂਸ਼ ਗੋਇਲ

ਕੁਝ ਦਿਨ ਹੋਏ ਇਹ ਮਕਬੂਲੀਅਤ ਜੰਤਰ ਮੰਤਰ ‘ਤੇ ਆਪਣੀ ਚਰਮ ਸੀਮਾ ‘ਤੇ ਦੇਖੀ ਲੋਕਾਂ ਨੇ।

ਗੁਰੂ ਨਾਲ ਸਿੱਖ ਦੀ ਸ਼ਰਧਾ ਤੇ ਭਰੋਸੇ ਨੂੰ ਕੋਈ ਕਮਜ਼ੋਰ ਨਹੀਂ ਕਰ ਸਕਦਾ- ਗੜਗੱਜ

ਸਿਵਾਇ ਤੁਹਾਡੇ ਆਕਿਆਂ ਦੇ ਜੋ ਹਫ਼ਤੇ ਬਾਅਦ ਹੀ ਸ੍ਰੀ ਅਕਾਲ ਤਖ਼ਤ ਨੂੰ ਪਿੱਠ ਦੇ ਗਏ।
 

ਰਾਹੁਲ ਨੇ ਕੈਪਟਨ ਨੂੰ ਆਪਣਾ ਪਸੰਦੀਦਾ ਆਗੂ ਦੱਸਿਆ- ਇਕ ਖ਼ਬਰ

ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹ ਮੇਰਾ ਵੀਰ ਕੁੜੀਓ।

ਸੁਖਬੀਰ ਬਾਦਲ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਤੇਰੀ ਮੇਰੀ ਇਕ ਜਿੰਦੜੀ, ਐਵੇਂ ਦੋ ਕਲਬੂਤ ਬਣਾਏ।

ਗੱਠਜੋੜ ਦੇ ਲਾਲਚ ‘ਚ ਅਕਾਲੀ ਪਾਰਟੀ ਭਾਜਪਾ ਅੱਗੇ ਝੁਕਣ ਲੱਗੀ- ਇਕ ਖ਼ਬਰ

ਜਿੱਥੇ ਚੱਲੇਂਗਾ ਚੱਲੂੰਗੀ ਨਾਲ਼ ਤੇਰੇ, ਟਿਕਟਾਂ ਦੋ ਲੈ ਲਈਂ।

ਸੀ.ਜੇ.ਪੀ. ਨੇ ਆਪਣੀ ਰਾਸ਼ਟਰੀ ਕਾਰਜਕਾਰੀ ਕਮੇਟੀ ਬਣਾਈ- ਇਕ ਖ਼ਬਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਸਾਖ ਗੁਆ ਚੁੱਕੀ ਅਕਾਲੀ ਪਾਰਟੀ ਭਾਜਪਾ ਨਾਲ ਸਮਝੌਤੇ ਲਈ ਹੋ ਰਹੀ ਹੈ ਤਰਲੋ-ਮੱਛੀ- ਬਲਤੇਜ ਪੰਨੂੰ

ਮੈਂ ਮਰ ਗਈ ਪੁੰਨਣਾ ਵੇ, ਤੇਰੀ ਪੈੜ ਨਜ਼ਰ ਨਹੀਂ ਆਉਂਦੀ।

ਰਾਮ ਮੰਦਰ ਚੰਦਾ ਚੋਰੀ ਕੇਸ ਦੀ ਜਾਂਚ ਮੁਕੰਮਲ, ਅਗਲੇ ਮਹੀਨੇ ਦਾਖ਼ਲ ਹੋਵੇਗੀ ਚਾਰਜਸ਼ੀਟ-ਇਕ ਖ਼ਬਰ

ਫ਼ਸਣੀਆਂ ਛੋਟੀਆਂ ਮੱਛੀਆਂ, ਵੱਡੀਆਂ ਨੇ ਬਚ ਜਾਣਾ।

 ਪੰਜਾਬ ‘ਚ ਸਥਿਰਤਾ ਤੇ ਸੁਰੱਖਿਆ ਕੇਵਲ ਕਾਂਗਰਸ ਹੀ ਦੇ ਸਕਦੀ ਹੈ- ਬਘੇਲ

ਤੁਹਾਡੀ ਸਟੇਜ ਦੀ ਸਥਿਰਤਾ ਤੇ ਸੁਰੱਖਿਆ ਦੇਖ ਕੇ ਕੋਈ ਸ਼ੱਕ ਰਹਿ ਜਾਂਦੀ ਐ?

ਜਦ ਤੱਕ ਅਮਰੀਕਾ ਆਪਣਾ ਰਵੱਈਆ ਨਹੀਂ ਸੁਧਾਰਦਾ, ਹੋਰਮੁਜ਼ ਨਹੀਂ ਖੋਲ੍ਹਿਆ ਜਾਵੇਗਾ- ਇਰਾਨ

ਬੰਦੇ ਦਾ ਪੁੱਤ ਬਣ ਵੈਲੀਆ, ਨਹੀਂ ਖੋਲ੍ਹਣਾ ਮੈਂ ਦਰਵਾਜ਼ਾ।

ਪੰਜਾਬ ਸਰਕਾਰ ਜੈਨ-ਜ਼ੀ ਨਾਲ ਚੱਟਾਨ ਵਾਂਗ ਖੜ੍ਹੀ ਹੈ- ਭਗਵੰਤ ਮਾਨ

ਤੈਨੂੰ ਤਾਪ ਚੜ੍ਹੇ, ਮੈਂ ਹੂੰਗਾਂ।

03.08.2026

ਪੰਜਾਬ ਸਰਕਾਰ ਨੌਜਵਾਨਾਂ ਨਾਲ਼ ਕਰ ਰਹੀ ਹੈ ਧੋਖਾ- ਨਾਇਬ ਸਿੰਘ ਸੈਣੀ

ਬਿਲਕੁਲ ਠੀਕ ਸੈਣੀ ਸਾਹਿਬ, ਪੰਜਾਬ ਸਰਕਾਰ ਨੂੰ ਦਿੱਲੀ ਤੋਂ ਕੁਝ ਸਿੱਖਣਾ ਚਾਹੀਦੈ।

ਭਾਰਤੀ ਕੰਪਨੀਆਂ ਨੇ ਵੱਡੀ ਮਾਤਰਾ ‘ਚ ਇਜ਼ਰਾਇਲ ਨੂੰ ਹਥਿਆਰ ਭੇਜੇ- ਐਮਨੈਸਟੀ ਇੰਟਰਨੈਸ਼ਨਲ

ਅਸਾਂ ਜੇਠ ਨੂੰ ਲੱਸੀ ਨਹੀਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਹਲਕਾ ਘਨੌਰ ਤੋਂ ਸਾਬਕਾ ਵਿਧਾਇਕ ਮਦਨ ਲਾਲ ਜਲਾਲ ਪੁਰ ਕਾਂਗਰਸ ‘ਚੋਂ ਮੁਅੱਤਲ- ਇਕ ਖ਼ਬਰ

ਨਿੰਮ ਦਾ ਤੂੰ ਮਾਣ ਨਾ ਕਰੀਂ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

ਇਰਾਨ ਅਮਰੀਕਾ ਜੰਗ ‘ਚ ਸਾਊਦੀ ਅਰਬ ਦੀ ਐਂਟਰੀ- ਇਕ ਖ਼ਬਰ

ਮੈਂ ਜਾਣਾ ਜੋਗੀ ਦੇ ਨਾਲ਼, ਕੰਨੀਂ ਮੁੰਦਰਾਂ ਪਾ ਕੇ।

ਇਰਾਨ -ਅਮਰੀਕਾ ਵਿਚਾਲੇ ਜੰਗ ਵਿਚ ਯੂਕਰੇਨ ਨੇ ਵੀ ਲੱਤ ਫ਼ਸਾਈ- ਇਕ ਖ਼ਬਰ

ਤੂੰ ਕੌਣ ਬਈ? ਅਖੇ ਮੈਂ ਖਾਹ ਮਖਾਹ।

ਜਲਵਾਯੂ ਪਰਿਵਰਤਨ ਨਾਲ ਗ਼ਰੀਬਾਂ ‘ਚ ਮੌਤਾਂ ਅਤੇ ਅਮੀਰਾਂ ‘ਚ ਏ.ਸੀ. ਦੀ ਵਰਤੋਂ ਵਧੇਗੀ- ਇਕ ਰਿਪੋਰਟ

ਦੋ ਧੜਿਆਂ ਵਿਚ ਖ਼ਲਕਤ ਵੰਡੀ, ਇਕ ਲੋਕਾਂ ਦਾ ਇਕ ਜੋਕਾਂ ਦਾ।

ਕੌਮੀ ਏਕਤਾ ਹੀ ਸਾਡੀ ਸਭ ਤੋਂ ਵੱਡੀ ਤਾਕਤ- ਜਥੇਦਾਰ ਗੜਗੱਜ

ਪਰ ਏਕਤਾ ਸਿਰਫ਼ ਸੁਖਬੀਰ ਬਾਦਲ ਵਾਲੀ ਹੀ ਹੋਵੇ।

ਧਰਮੇਂਦਰ ਪ੍ਰਧਾਨ ਦੀ ਜਗ੍ਹਾ ਪ੍ਰਹਿਲਾਦ ਜੋਸ਼ੀ ਨੂੰ ਸਿੱਖਿਆ ਮੰਤਰੀ ਬਣਾਇਆ- ਇਕ ਖ਼ਬਰ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਕਿਸਾਨ ਅਤੇ ਕਾਕਰੋਚ ਪਾਰਟੀ ਦੇ ਸਾਂਝੇ ਮੁਹਾਜ਼ ਦੀ ਚਰਚਾ ਤੇਜ਼- ਇਕ ਖ਼ਬਰ

ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਬਰਤਾਨੀਆ ਦੇ 59ਵੇਂ ਪ੍ਰਧਾਨ ਮੰਤਰੀ ਦੇ ਅੱਗੇ ਬਹੁਤ ਚੁਣੌਤੀਆਂ- ਇਕ ਖ਼ਬਰ

ਕੋਠੀ ‘ਚ ਲਿਆ ਦੇ ਘੁੰਗਰੂ, ਬੱਗੇ ਬਲ਼ਦ ਖਰਾਸੇ ਜਾਣਾ।

ਚੰਨੀ ਦੀ ਅਗਵਾਈ ‘ਚ ਲੱਗੇ ਰੋਸ ਧਰਨੇ ‘ਚ ਵੜਿੰਗ ਧੜਾ ਰਿਹਾ ਦੂਰ- ਇਕ ਖ਼ਬਰ

ਮੱਝ ਲੈ ਦੇ ਬਾਪੂ ਵੇ, ਮੈਂ ਜੇਠ ਦੀ ਲੱਸੀ ਨਹੀਉਂ ਪੀਣੀ।

ਕੇਂਦਰ ਨੇ ਕਰਤਾਰਪੁਰ ਲਾਂਘਾ ਖੋਲ੍ਹਣ ਤੋਂ ਕੀਤਾ ਇਨਕਾਰ- ਇਕ ਖ਼ਬਰ

ਤੀਆਂ ਨੂੰ ਹਟਾਉਣ ਵਾਲ਼ਿਆ, ਤੇਰਾ ਹੋਵੇ ਨਰਕਾਂ ਵਿਚ ਵਾਸਾ।

ਕਾਕਰੋਚ ਪਾਰਟੀ ਨੇ ਮੁੜ ਸ਼ਾਂਤਮਈ ਅੰਦੋਲਨ ਕਰਨ ਦੀ ਦਿਤੀ ਧਮਕੀ- ਇਕ ਖ਼ਬਰ

ਟੋਲੀ ਆਉਂਦੀ ਛੜਿਆਂ ਦੀ, ਨਾਲ਼ਾ ਟੰਗ ਲੈ ਘੁੰਗਰੂਆਂ ਵਾਲ਼ਾ।

ਪ੍ਰਧਾਨ ਮੰਤਰੀ ਕੈਮਰੇ ਦਾ ਨਹੀਂ, ਆਪਣੇ ਦਿਲ ਦਾ ਐਂਗਲ ਬਦਲਣ- ਰਾਹੁਲ ਗਾਂਧੀ

ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ, ਜੇ ਮਨ ਰੰਗਿਆ ਨਾ ਜਾਵੇ।

ਟਰੰਪ ਨੇ ਇਰਾਨ ਉੱਤੇ ਹਮਲੇ ਰੋਕਣ ਦਾ ਕੀਤਾ ਐਲਾਨ- ਇਕ ਖ਼ਬਰ

ਵੇ ਤੂੰ ਲਾਟੂ ਵਾਂਗੂੰ ਘੁੰਮਦਾ, ਤੇਰਾ ਕੀ ਇਤਬਾਰ ਕਰਾਂ।

27.07.2026                         

 ਮੌਜੂਦਾ ਹਾਲਾਤ ਵਿਚ ਸਮੁੱਚੇ ਸਿੱਖ ਪੰਥ ਦਾ ਇਕੱਠੇ ਹੋਣਾ ਬਹੁਤ ਜ਼ਰੂਰੀ- ਗਿ.ਹਰਪ੍ਰੀਤ ਸਿੰਘ

ਸ਼ਾਹ ਮੁਹੰਮਦਾ ਆਖਦੇ ਲੋਕ ਸਿੰਘ ਜੀ, ਤੁਸੀਂ ਚੰਗੀਆਂ ਪੂਰੀਆਂ ਪਾ ਆਏ।

ਸੰਸਦ ਦੇ ਬਾਹਰ ਐਨ.ਡੀ.ਏ. ਅਤੇ ਇੰਡੀਆ ਬਲਾਕ ਆਹਮੋ-ਸਾਹਮਣੇ- ਇਕ ਖ਼ਬਰ

ਕੁੰਢੀਆਂ ਦੇ ਸਿੰਙ ਫ਼ਸ ਗਏ, ਕੋਈ ਨਿੱਤਰੂ ਵੜੇਵੇਂ ਖਾਣੀ।

ਪ੍ਰਧਾਨ ਮੰਤਰੀ ਮੋਦੀ ਦੇ ਨਿਵਾਸ ਅੱਗੇ ਕਾਂਗਰਸ ਦਾ ਪ੍ਰਦਰਸ਼ਨ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਝੂੰਦਾਂ ਤੇ ਉਮੈਦਪੁਰ ਸਮੇਤ ਕਈ ਆਗੂਆਂ ਵਲੋਂ ਵਾਰਸ ਪੰਜਾਬ ਦਾ ਸਮਰਥਨ- ਇਕ ਖ਼ਬਰ

ਛੱਡ ਗਈ ਯਾਰ ਪੁਰਾਣੇ, ਨਵਿਆਂ ਦੇ ਸੰਗ ਲੱਗ ਕੇ।

ਈਰਾਨ ਨਾਲ ਜੰਗ ਵਿਚ ਅਮਰੀਕਾ ਨੇ 37.5 ਅਰਬ ਡਾਲਰ ਕੀਤੇ ਸੁਆਹ- ਇਕ ਖ਼ਬਰ

ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

ਪਾਕਿਸਤਾਨ ਨੇ ਅਮਰੀਕਾ ਤੋਂ ਮੰਗੀ 10 ਅਰਬ ਡਾਲਰ ਦੀ ਮਦਦ- ਇਕ ਖ਼ਬਰ

ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਭਾਜਪਾ ਪੰਜਾਬ ਨੂੰ ਮੁੜ ਨੰਬਰ ਇਕ ‘ਤੇ ਲਿਆਵੇਗੀ- ਜਾਖੜ

ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਹਰਿਆਣੇ ਦੇ ਮੰਤਰੀ ਨਾਲ ਮੀਟਿੰਗ ਤੋਂ ਬਾਅਦ ਸ਼ੰਭੂ ਬਾਰਡਰ ‘ਤੇ ਕਿਸਾਨਾਂ ਦਾ ਧਰਨਾ ਸਮਾਪਤ- ਇਕ ਖ਼ਬਰ

ਮੇਰੇ ਜੇਠ ਦੇ ਪੁੱਠੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਪੰਜਾਬ ਕਾਂਗਰਸ ਦੇ ਸਾਰੇ ਆਗੂ ਹੁਣ ਇਕਜੁੱਟ- ਭੂਪੇਸ਼ ਪਟੇਲ

ਟੱਪ ਟੱਪ ਮਾਰਦੀ ਛੜੱਪੇ, ਪੰਸੇਰੀ ਡੱਡੂਆਂ ਦੀ।

ਜੰਤਰ ਮੰਤਰ ਦੇ ਪ੍ਰਦਰਸ਼ਨਕਾਰੀਆਂ ਲਈ ਖੁੱਲ੍ਹੇ ਬੰਗਲਾ ਸਾਹਿਬ ਗੁਰਦੁਆਰੇ ਦੇ ਦਰਵਾਜ਼ੇ- ਇਕ ਖ਼ਬਰ

ਗੁੜ੍ਹਤੀ ਗੁਰੂ ਨੇ ਸਿੱਖ ਨੂੰ ਦਿਤੀ ਐਸੀ, ਵਿਚ ਜੰਗ ਦੇ ਵੀ ਵੈਰੀ ਨੂੰ ਪਿਆਏ ਪਾਣੀ।

ਇਰਾਨ ਦੀ ਯੂ.ਏ.ਈ. ਨੂੰ ਧਮਕੀ, ਅਮਰੀਕਾ ਦਾ ਸਾਥ ਨਾ ਛੱਡਣ ‘ਤੇ ਹੋਵੇਗਾ ਭਾਰੀ ਨੁਕਸਾਨ- ਇਕ ਖ਼ਬਰ

ਦਾਲ ਦਗ਼ਾ ਫਿਰੰਗੀਆਂ ਵਿਚ ਭਾਰਾ, ਆਕਲ ਆਖਦੇ ਆਦਿ ਜੁਗਾਦਿ ਸਾਰੇ।

ਨੀਟ 2024 ਦੇ ਪੇਪਰ ਲੀਕ ਮਾਮਲੇ ਦੇ ਮੁੱਖ ਦੋਸ਼ੀ ਨੂੰ ਮਿਲੀ ਕਲੀਨ ਚਿਟ-  ਖ਼ਬਰ

ਕਲੀਨ ਚਿਟ ਨਾ ਦੇ ਕੇ ਅਗਲਿਆਂ ਨੇ ਲੱਖਾਂ ਕਰੋੜਾਂ ਦੇ ਕਾਰੋਬਾਰ ਦਾ ਭੱਠਾ ਬਿਠਾਉਣਾ।

ਪੰਜਾਬ ਕਾਂਗਰਸ ਦੇ ਮਾਮਲੇ ‘ਚ ਰਾਹੁਲ ਗਾਂਧੀ ਸਿੱਧਾ ਦਖ਼ਲ ਕਿਉਂ ਨਹੀਂ ਦੇ ਰਹੇ?- ਇਕ ਸਵਾਲ

ਦਲਾਲੀ ਕੋਲ਼ਿਆਂ ਦੀ, ਮੂੰਹ ਕਾਲ਼ਾ ਨਾ ਕਰਵਾਈਏ।

ਕੈਨੇਡਾ ‘ਚ ਚੋਰੀਆਂ ਕਰਦੇ ਪੰਜਾਬੀਆਂ ਸਮੇਤ 32 ਵਿਅਕਤੀ ਗ੍ਰਿਫ਼ਤਾਰ- ਇਕ ਖ਼ਬਰ

ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਜੇ ਕਰ ਟਰੰਪ ਨੇ ਨਵੇਂ ਟੈਰਿਫ਼ ਲਗਾਏ ਤਾਂ ਕੈਨੇਡਾ ਜਵਾਬ ਦੇਵੇਗਾ- ਪ੍ਰਧਾਨ ਮੰਤਰੀ ਕਾਰਨੀ

ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ।

============================================================

20/07/2026

17 ਜੁਲਾਈ ਨੂੰ ਮੋਦੀ ਦੇ ਦੌਰੇ ਤੋਂ ਪਹਿਲਾਂ ਪੰਜਾਬ ਭਾਜਪਾ 15-16 ਜੁਲਾਈ ਨੂੰ ਚਲਾਏਗੀ ਸਵੱਛਤਾ ਮੁਹਿੰਮ- ਇਕ ਖ਼ਬਰ

ਵਿਹੜੇ ਆਈ ਜੰਞ, ਵਿੰਨ੍ਹੋਂ ਕੁੜੀ ਦੇ ਕੰਨ।

ਅਮਰੀਕਾ ਅਤੇ ਇਰਾਨ ਵਲੋਂ ਹੋਰਮੁਜ਼ ਉੱਪਰ ਆਪਣੇ ਆਪਣੇ ਕਬਜ਼ੇ ਦਾ ਦਾਅਵਾ- ਇਕ ਖ਼ਬਰ

ਵਾਰਿਸਸ਼ਾਹ ਦੋ ਲੜਨ ਮਾਸ਼ੂਕ ਏਥੇ, ਮੇਰੀ ਸੰਗਲੀ ਸ਼ਗਨ ਵਿਚਾਰਦੀ ਏ।

ਭਾਜਪਾ ਨੇ ਉਮਰ ਅਬਦੁੱਲਾ ਨੂੰ ਭੇਜਿਆ ਕਾਨੂੰਨੀ ਨੋਟਿਸ- ਇਕ ਖ਼ਬਰ

ਬਾਂਹ ਮਾਰ ਕੇ ਘੋਟਣਾ ਭੰਨ ‘ਤੀ, ਜੇਠ ਦੀ ਮੈਂ ਗੱਲ ਨਾ ਮੰਨੀ।

ਪ੍ਰਧਾਨ ਮੰਤਰੀ ਨੇ ਪੰਜਾਬ ਦੇ ਹਰੇਕ ਵਰਗ ਨੂੰ ਨਿਰਾਸ਼ ਕੀਤਾ- ਹਰਪਾਲ ਚੀਮਾ

ਉਜੜੀਆਂ ਭਰਜਾਈਆਂ, ਵਲੀ ਜਿਨ੍ਹਾਂ ਦੇ ਜੇਠ।

ਭਾਜਪਾ ਦੀ ਮਦਦ ਕਰਨ ਵਾਲੇ ਸੰਸਦ ਮੈਂਬਰ ਹੋਣਗੇ ‘ਲੋਕਤੰਤਰ ਦੇ ਕਾਤਲ’- ਵਕੀਲ ਕਪਿਲ ਸਿੱਬਲ

ਨਹੀਂ ਕੰਮ ਪਿਆਰਿਉ ਇਹ ਚੰਗਾ, ਮਾਰੀ ਸੱਜਣਾ ‘ਤੇ ਤਲਵਾਰ ਬੇਲੀ।

ਟਰੰਪ ਨੇ ਚੀਨ ਉੱਤੇ ਲਗਾਏ 2020 ਦੀਆਂ ਚੋਣਾਂ ‘ਚ ਦਖ਼ਲਅੰਦਾਜ਼ੀ ਦੇ ਦੋਸ਼- ਇਕ ਖ਼ਬਰ

ਟੁੱਟ ਪੈਣੇ ਦਰਜੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਪਾਕਿਸਤਾਨ ਦੀਆਂ ਅਮਰੀਕਾ-ਇਰਾਨ ਵਿਚਕਾਰ ਸਮਝੌਤੇ ਦੀ ਕੋਸ਼ਿਸ਼ਾਂ ਫੇਲ੍ਹ- ਇਕ ਖ਼ਬਰ

ਮੇਰੀ ਕੱਚੇ ਘੜੇ ਦੀ ਬੇੜੀ, ਜੇ ਰੱਬ ਪਾਰ ਕਰੇ।

ਸੁਖਬੀਰ ਬਾਦਲ ਨੂੰ ਆਪਣਾ ਹੀ ਧਰਮ ਯੁੱਧ ਦਾ ਐਲਾਨ ਭੁੱਲਿਆ- ਬਲਤੇਜ ਪੰਨੂੰ

ਕਿਹੜਾ ਧਰਮ-ਯੁੱਧ? ਖਾਧੀ ਪੀਤੀ ‘ਚ ਕਹਿ ਹੋ ਗਿਆ, ਸੀਰੀਅਸ ਨਾ ਲਿਆ ਕਰੋ ਯਾਰ!

ਮੋਦੀ ਨੂੰ ਭਾਰਤ-ਅਮਰੀਕਾ ਵਪਾਰ ਸਮਝੌਤੇ ਵਰਗੇ ਗੰਭੀਰ ਮੁੱਦਿਆਂ ‘ਤੇ ਬੋਲਣਾ ਚਾਹੀਦਾ ਸੀ- ਪਰਗਟ ਸਿੰਘ

ਕਾਦਰਯਾਰ ਕਹਿੰਦਾ ਸਲਵਾਨ ਰਾਜਾ, ਪਿੱਛੇ ਕੀ ਕਰਤੂਤ ਕਰ ਆਇਉਂ ਈ।

ਕਿਸਾਨ-ਮਜ਼ਦੂਰ ਮੋਰਚਾ ਮੋਦੀ ਦੇ ਦੌਰੇ ਦੌਰਾਨ ਜ਼ਿਲ੍ਹਿਆਂ ‘ਚ ਰੋਸ ਮਾਰਚ ਕਰੇਗਾ- ਇਕ ਖ਼ਬਰ

ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ, ਜੱਗ ਚਾਹੇ ਕਰੇ ਨਿੰਦਿਆ।

ਕੇਂਦਰ ਸਰਕਾਰ ਪੰਜਾਬ ਦੇ ਰੁਕੇ ਹੋਏ ਫੰਡ ਜਾਰੀ ਕਰੇ- ਸਿਹਤ ਮੰਤਰੀ ਬਲਬੀਰ ਸਿੰਘ

ਝਾਂਜਰਾਂ ਘੜਾ ਦੇ ਮਿੱਤਰਾ, ਅੱਡੀ ਮਾਰ ਕੇ ਲੰਘੂੰਗੀ ਦਰ ਤੇਰਾ।

ਪੰਜਾਬ ਕਾਂਗਰਸ ਦੇ ਮਸਲੇ ਦੇ ਹੱਲ ਲਈ ਹਾਈ ਕਮਾਂਡ ਦੀ ਮੀਟਿੰਗ ਦੂਜੇ ਦਿਨ ਵੀ ਜਾਰੀ- ਇਕ ਖ਼ਬਰ

ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਬਹਿਬਲ ਕਲਾਂ-ਕੋਟ ਕਪੂਰਾ ਗੋਲੀ ਕਾਂਡ ‘ਚ ਸੁਖਬੀਰ ਬਾਦਲ ਨੂੰ ਸਿੱਟ ਨੇ ਪੇਸ਼ੀ ਲਈ ਸੱਦਿਆ- ਇਕ ਖ਼ਬਰ

ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰਵਾਰ ਉਨ੍ਹਾਂ ਪੱਛੋਤਾਵਣਾ ਈ।

ਨਿਜੀ ਸਕੂਲਾਂ ‘ਤੇ ਲਗਾਈ ਲਗਾਮ ਮਾਪਿਆਂ ਲਈ ਵੱਡੀ ਰਾਹਤ- ਡਿਪਟੀ ਸਪੀਕਰ ਰੋੜੀ

ਤੀਆਂ ਨੂੰ ਲਵਾਉਣ ਵਾਲ਼ਿਆ, ਤੇਰਾ ਹੋਵੇ ਸੁਰਗਾਂ ਵਿਚ ਵਾਸਾ।

ਸੱਚ ਸਾਹਮਣੇ ਲਿਆਉਣ ਲਈ ਲੋਕ ਕਮਿਸ਼ਨ ਦਾ ਗਠਨ ਕੀਤਾ ਜਾਵੇ- ਬੀਬੀ ਪਰਮਜੀਤ ਕੌਰ ਖਾਲੜਾ

ਸ਼ਾਹ ਮੁਹੰਮਦਾ ਇਕ ਸਰਕਾਰ ਬਾਝੋਂ, ਹੋਣ ਪੰਜਾਬ ਦੇ ਵਿਚ ਖੁਆਰੀਆਂ ਜੀ।

-----------------------------------------------------------------------------------------------------------------

13-07-2026

ਬਘੇਲ ਨਾਲ ਮੀਟਿੰਗ ਮਗਰੋਂ ਵੀ ਕਾਂਗਰਸ ‘ਚ ਰੇੜਕਾ ਬਰਕਰਾਰ- ਇਕ ਖ਼ਬਰ

ਸਭੇ ਕੰਨ ਪੜਵਾ ਕੇ ਬੈਠ ਜਾਂਦੇ, ਮੁਸ਼ਕਿਲ ਜੋਗ ਦਾ ਤੋੜ ਚੜ੍ਹਾਉਣ ਬੇਟਾ।

ਅਯਾਤੁੱਲਾ ਅਲੀ ਖ਼ਾਮੇਨੇਈ ਦੇ ਖ਼ੂਨ ਦਾ ਬਦਲਾ ਜ਼ਰੂਰ ਲਵਾਂਗਾ- ਮੁਜਤਬਾ ਖ਼ਾਮੇਨੇਈ

ਵੱਢ ਕੇ ਡੋਗਰ ਨੂੰ, ਪੱਕੇ ਪੁਲ ‘ਤੇ ਗੰਡਾਸੀ ਮਾਂਜੀ।

ਇਜ਼ਰਾਈਲ ਦੇ ਮੁੱਦੇ ਉਤੇ ਮੋਦੀ ਦੀ ਚੁੱਪੀ ‘ਤੇ ਕਾਂਗਰਸ ਦਾ ਤਿੱਖਾ ਹਮਲਾ- ਇਕ ਖ਼ਬਰ

ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

300 ਗ੍ਰਾਮ ਹੈਰੋਇਨ ਅਤੇ ਡਰੱਗ ਮਨੀ ਸਮੇਤ ਪੁਲਿਸ ਸਬ-ਇੰਸਪੈਕਟਰ ਗ੍ਰਿਫ਼ਤਾਰ- ਇਕ ਖ਼ਬਰ

ਉਸ ਖੇਤ ‘ਤੇ ਕੀ ਬਹਾਰ ਆਉਣੀ, ਜਿੱਥੇ ਵਾੜ ਹੀ ਉਸ ਨੂੰ ਖਾਂਵਦੀ ਏ।

ਇਰਾਨ ਨੇ ਹੋਰਮੁਜ਼ ਜਲਡਮਰੂਮੱਧ ‘ਚ ਭਾਰਤੀ ਤੇਲ ਟੈਂਕਰ ਦਾ ਰਸਤਾ ਰੋਕਿਆ- ਇਕ ਖ਼ਬਰ

ਹੱਥ ਸੋਚ ਕੇ ਗੰਦਲ ਨੂੰ ਪਾਈਂ, ਕਿਹੜੀ ਏਂ ਤੂੰ ਸਾਗ ਤੋੜਦੀ।

ਜੰਮੂੰ –ਕਸ਼ਮੀਰ ਨੂੰ ਤੁਰਤ ਪੂਰਨ ਰਾਜ ਦਾ ਦਰਜਾ ਦਿਤਾ ਜਾਵੇ- ਫਾਰੂਕ ਅਬਦੁੱਲਾ

ਸਾਡਾ ਹੱਕ, ਐਥੇ ਰੱਖ।

ਪਾਕਿਸਤਾਨ ਅਤੇ ਅਰਬ ਦੇਸ਼ਾਂ ਨਾਲ ਪੰਜਾਬ ਰਾਹੀਂ ਕਿਉਂ ਨਹੀਂ ਹੋ ਸਕਦਾ ਵਪਾਰ?- ਇਕ ਸਵਾਲ

ਜਿਸ ਬੰਦੇ ਨੂੰ ਤੁਸੀਂ ਭੁੱਖਾ ਮਾਰਨਾ ਚਾਹੁੰਦੇ ਹੋ, ਕੀ ਉਸ ਨੂੰ ਰੋਟੀ ਦਿਉਗੇ?

ਦੋ ਦਸੰਬਰ ਦੇ ਹੁਕਨਾਮਿਆਂ ਤੋਂ ਮੁਕਰਨ ਵਾਲਿਆਂ ਵਿਰੁੱਧ ਪੰਥਕ ਇਕੱਠ ਕਿਉਂ ਨਾ ਕੀਤਾ ਗਿਆ?-ਗਿ. ਹਰਪ੍ਰੀਤ ਸਿੰਘ

ਜਿਸ ਦੀ ਖਾਈਏ ਬਾਜਰੀ, ਉਸ ਦੀ ਭਰੀਏ ਹਾਜ਼ਰੀ।

ਹਾਈ ਕਮਾਨ ‘ਤੇ ਸਵਾਲ ਚੁੱਕਣ ਵਾਲਿਆਂ ਨੂੰ ਬਘੇਲ ਦੀ ਚਿਤਾਵਨੀ- ਇਕ ਖ਼ਬਰ

ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।

ਗ੍ਰੀਨਲੈਂਡ ਵਿਕਾਊ ਨਹੀਂ ਹੈ- ਡੈਨਿਸ਼ ਪ੍ਰਧਾਨ ਮੰਤਰੀ

ਰੰਗ ਮੁਸ਼ਕੀ ਦੇਖ ਕੇ ਮੇਰਾ, ਮੁੰਡਾ ਮਾਰਦਾ ਗੇੜੇ ਤੇ ਗੇੜਾ।

ਪੰਜਾਬ ਕਾਂਗਰਸ 2027 ਦੀਆਂ ਚੋਣਾਂ ਲਈ ਤਿਆਰ- ਭੂਪੇਸ਼ ਪਟੇਲ

ਚਲ ਚੱਲੀਏ ਵਿਸਾਖੀ ਵਾਲੇ ਮੇਲੇ, ਮੁੰਡਾ ਤੇਰਾ ਮੈਂ ਚੁੱਕ ਲਊਂ।

ਇਸ਼ਤਿਹਾਰਾਂ ‘ਤੇ ਕਰੋੜਾਂ ਫੂਕਣ ਵਾਲ਼ੀ ਸਰਕਾਰ ਕੋਲ ਕਰਮਚਾਰੀਆਂ ਲਈ ਖ਼ਜ਼ਾਨਾ ਖ਼ਾਲੀ- ਇਕ ਖ਼ਬਰ

ਮੇਰਾ ਮੋਰਨੀ ਜਿਹੀ ਦਾ ਗਲ਼ ਖਾਲੀ, ਆਪ ਤਾਂ ਜ਼ੰਜੀਰੀ ਰੱਖਦਾ।

ਪੰਜਾਬ ਦੇ ਮੰਤਰੀਆਂ ਅਤੇ ਵਿਧਾਇਕਾਂ ਨੇ ਪੰਜਾਬ ਭਰ ‘ਚ ਕੀਤੀਆਂ ਲੋਕ ਮਿਲਣੀਆਂ- ਇਕ ਖ਼ਬਰ

ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਵਿਦਵਾਨ ਬੁਲਾਰਿਆਂ ਨੇ ਪੰਜਾਬ ਦੇ ਪਾਣੀਆਂ ਦੇ ਵਿਸ਼ੇ ‘ਤੇ ਕੀਤੀ ਭਰਵੀਂ ਵਿਚਾਰ-ਚਰਚਾ- ਇਕ ਖ਼ਬਰ

ਸੱਪ ਤਾਂ ਕਦੋਂ ਦਾ ਲੰਘ ਚੁੱਕਿਐ, ਐਵੇਂ ਜ਼ਮੀਨ ‘ਤੇ ਲਾਠੀਆਂ ਮਾਰੀ ਚਲੋ।

‘ਆਪ’ ਸਰਕਾਰ ਵਾਰ ਵਾਰ ਕਰਜ਼ਾ ਲੈ ਕੇ ਸੂਬੇ ਨੂੰ ਵਿਤੀ ਸੰਕਟ ਵਲ ਧੱਕ ਰਹੀ ਹੈ- ਕੇਵਲ ਸਿੰਘ ਢਿੱਲੋਂ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

06.07.2026

ਸੁਖਜਿੰਦਰ ਰੰਧਾਵਾ ਨੇ ਪੰਜਾਬ ਮੁੱਦਿਆਂ ਸਬੰਧੀ ਅਮਿਤ ਸ਼ਾਹ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਵੇ ਘਰ ਤੇਲਣ ਦੇ ਤੇਰਾ ਚਾਦਰਾ ਖੜਕੇ, ਵੇ ਘਰ ਤੇਲਣ ਦੇ।

ਰਾਮ ਮੰਦਰ ਚੋਰੀ ਤੋਂ ਬਾਅਦ ਬਦਰੀਨਾਥ ਧਾਮ ‘ਚ ਵੀ ਲੱਗੇ ਹੇਰਾ ਫੇਰੀ ਦੇ ਦੋਸ਼- ਇਕ ਖ਼ਬਰ

ਇਕ ਨੂੰ ਕੀ ਰੋਨੀ ਏਂ, ਊਤ ਗਿਆ ਈ ਆਵਾ।

ਮੋਦੀ-ਸ਼ਾਹ ਤੋਂ ਲੋਕ ਤੰਤਰ ਨੂੰ ਸਭ ਤੋਂ ਵੱਡਾ ਖ਼ਤਰਾ- ਇੰਡੀਆ ਬਲਾਕ

ਡਰਿਉ ਲੋਕੋ ਵੇ ਡਰਿਉ, ਲੰਬੜਾਂ ਦੀ ਸੇਪ ਨਾ ਕਰਿਉ।

ਅਮਰੀਕਾ ਤੋਂ ਕਿਉਂ ਮੋਹ ਭੰਗ ਹੋ ਰਿਹਾ ਹੈ ਭਾਰਤੀ ਵਿਦਿਆਰਥੀਆਂ ਦਾ?- ਇਕ ਸਵਾਲ

ਫਰੀਦਾ ਬਾਰਿ ਪਰਾਇਐ ਬੈਸਣਾ ਸਾਈ ਮੁਝੈ ਨ ਦੇਹਿ।

ਕਾਕਰੋਚ ਜਨਤਾ ਪਾਰਟੀ ਨੂੰ ਕਿਸਾਨ ਜਥੇਬੰਦੀਆਂ ਨੇ ਦਿਤਾ ਸਮਰਥਨ- ਇਕ ਖ਼ਬਰ

ਜਦੋਂ ਦੇਖ ਲਿਆ ਵੀਰ ਦਾ ਬੋਤਾ, ਮੱਲ ਵਾਗੂੰ ਪੈਰ ਚੁੱਕਦੀ।

ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਗਿਣਤੀ ਘਟਣ ਕਰ ਕੇ ਗਲਾਸਗੋ ਯੂਨੀਵਰਸਿਟੀ ਘਾਟੇ ‘ਚ- ਇਕ ਖ਼ਬਰ

ਮੇਰਾ ਨਰਮ ਕਾਲਜਾ ਖੁੱਸਦਾ, ਡੋਰਾਂ ਸਣੇ ਬਾਜ ਉੱਡਗੇ।

ਸ਼ਰਨ ਮੰਗਣ ਵਾਲਿਆਂ ਲਈ ਅਮਰੀਕਾ ਦੇ ਦਰਵਾਜ਼ੇ ਹੋਏ ਬੰਦ- ਟਰੰਪ ਪ੍ਰਸ਼ਾਸਨ

ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ, ਨਿੰਮ ਦਾ ਤੂੰ ਮਾਣ ਨਾ ਕਰੀਂ।

ਇਰਾਨ ਨੇ ਟਰੰਪ ਦੇ ਮੁਲਾਕਾਤ ਦੇ ਦਾਅਵੇ ਨੂੰ ਨਕਾਰਿਆ- ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਮਹਾਰਾਸ਼ਟਰ ਸਰਕਾਰ ਨੇ ਸਿੱਖ ਆਗੂਆਂ ਤੇ ਮਾਹਰਾਂ ਦੀ ਕਮੇਟੀ ਬਣਾਈ- ਇਕ ਖ਼ਬਰ

ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

23 ਸਿਆਸੀ ਪਾਰਟੀਆਂ ਨੇ ਚੋਣ ਕਮਿਸ਼ਨ ਦੀ ਭੂਮਿਕਾ ਉੱਤੇ ਚੀਫ਼ ਜਸਟਿਸ ਨੂੰ ਲਿਖੀ ਚਿੱਠੀ- ਇਕ ਖ਼ਬਰ

ਜਾਣਾ ਦਰਬਾਰ ਮੈਂ ਦਲੀਲਾਂ ਧਾਰੀਆਂ, ਦੱਸਦਾ ਹਕੀਕਤਾਂ ਤਮਾਮ ਸਾਰੀਆਂ।

ਭਾਜਪਾ ਪੰਜਾਬ ਨੂੰ ਫਿਰ ਇਕ ਨੰਬਰ ‘ਤੇ ਲਿਆਵੇਗੀ- ਕੇਵਲ ਢਿੱਲੋਂ

ਵਿਹੜੇ ਖੇੜਿਆਂ ਦੇ ਤਿਲਕਣਬਾਜ਼ੀਆਂ ਨੇ, ਜ਼ਰਾ ਸੋਚ ਕੇ ਕਦਮ ਟਿਕਾਈਂ ਬੱਚਾ।

ਕਾਂਗਰਸ ਪਾਰਟੀ ਇਕਜੁੱਟ ਹੋ ਕੇ ਇਸ ਨਾਕਾਰਾ ਸਰਕਾਰ ਤੋਂ ਲੋਕਾਂ ਨੂੰ ਮੁਕਤੀ ਦਿਵਾਵੇਗੀ- ਸੰਗਤ ਸਿੰਘ ਗਿਲਜੀਆਂ

ਨਾ ਨੌਂ ਮਣ ਤੇਲ ਹੋਵੇ, ਨਾ ਰਾਧਾ ਨੱਚੇ।

ਇਰਾਨ ਨੇ ਅਮਰੀਕਾ ਨਾਲ ਸ਼ਾਂਤੀ ਵਾਰਤਾ ਅੱਗੇ ਵਧਾਉਣ ਤੋਂ ਕੀਤਾ ਇਨਕਾਰ- ਇਕ ਖ਼ਬਰ

ਕਾਲ਼ੇ ਕੋਲ ਮੰਜਾ ਨਹੀਂ ਡਾਹੁਣਾ, ਲਿਸ਼ਕੇ ਤਾਂ ਪੈ ਜੂ ਬਿਜਲੀ।

ਕਾਂਗਰਸ ਹਾਈ ਕਮਾਂਡ ਵਲੋਂ ਪੰਜਾਬ ਕਾਂਗਰਸ ਦਾ ਸੰਕਟ ਹੱਲ ਕਰਨ ਲਈ ਕੋਸ਼ਿਸ਼ਾਂ ਸ਼ੁਰੂ- ਇਕ ਖ਼ਬਰ

ਨੀ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

ਪੰਜ ਜੁਲਾਈ ਨੂੰ ਪਾਸ ਕਰਵਾਏ ਗਏ ਪੰਥਕ ਮਤਿਆਂ ਦੀ ਸਕਰਿਪਟ ਕਿਸੇ ਹੋਰ ਜਗ੍ਹਾ ਤੋਂ ਆਈ- ਰਵੀਇੰਦਰ ਸਿੰਘ

ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿਕਲੀ, ਮੱਖੀਆਂ ਨੇ ਪੈੜ ਨੱਪ ਲ

28 - 06- 2026

ਬਰਤਾਨਵੀ ਪ੍ਰਧਾਨ ਮੰਤਰੀ ਨੇ ਆਪਣੇ ਅਹੁਦੇ ਤੋਂ ਦਿਤਾ ਅਸਤੀਫ਼ਾ- ਇਕ ਖ਼ਬਰ

ਆਹ ਲੈ ਫੜ ਮਿੱਤਰਾ, ਮੇਰੇ ਬਾਂਕਾਂ ਮੇਚ ਨਾ ਆਈਆਂ।

ਭਾਜਪਾ ਨੇ ਰਾਹੁਲ ਗਾਂਧੀ ਨੂੰ ਦੱਸਿਆ ‘ਸੈਰ-ਸਪਾਟਾ’ ਆਗੂ- ਇਕ ਖ਼ਬਰ

ਵੈਸੇ ਇਹ ਲਕਬ ਇਕ ਹੋਰ ‘ਬੰਦੇ’ ‘ਤੇ ਜ਼ਿਆਦਾ ਢੁੱਕਦਾ ਹੈ।

ਸ੍ਰੀ ਅਕਾਲ ਤਖ਼ਤ ਦੀ ਮਰਯਾਦਾ ਨੂੰ ਢਾਅ ਲਾਉਣ ਲਈ ਜਥੇਦਾਰ ਗੜਗੱਜ ਜ਼ਿੰਮੇਵਾਰ- ਧਰਮੀ ਫੌਜੀ

ਗੋਰੇ ਰੰਗ ਨੂੰ ਕੋਈ ਨਹੀਂ ਪੁੱਛਦਾ, ਮੁੱਲ ਪੈਂਦੇ ਅਕਲਾਂ ਦੇ।
                                                                                                              

ਅਮਰੀਕਾ-ਇਰਾਨ ਸ਼ਾਂਤੀ ਸਮਝੌਤੇ ਲਈ ਸਹਿਮਤ- ਇਕ ਖ਼ਬਰ

ਆਪਾਂ ਭੈਣ ਭਰਾ, ਆ ਜਾ ਆਪਾਂ ਦੋਵੇਂ ਨੱਚੀਏ।

ਪੰਜਾਬ ਦੇ 21 ਜ਼ਿਲ੍ਹਿਆਂ ‘ਚ ਅਮਰੀਕਾ ਨਾਲ ਵਪਾਰ ਸਮਝੌਤੇ ਨੂੰ ਲੈ ਕੇ ਮੋਦੀ-ਟਰੰਪ ਦੇ ਫੂਕੇ ਪੁਤਲੇ- ਇਕ ਖ਼ਬਰ

ਬੋਦੀ ਵਾਲ਼ਾ ਤਾਰਾ ਚੜ੍ਹਿਆ, ਘਰ ਘਰ ਹੋਣ ਵਿਚਾਰਾਂ।

ਰਾਮ ਮੰਦਰ ਚੜ੍ਹਾਵਾ ਚੋਰੀ ਮਾਮਲੇ ‘ਚ ਐੱਸ.ਆਈ.ਟੀ. ਨੇ ਚੰਪਤ ਰਾਏ ਸਮੇਤ 17 ਨੂੰ ਦੋਸ਼ੀ ਮੰਨਿਆਂ- ਇਕ ਖ਼ਬਰ

ਪਾਪ ਪੁੰਨ ਤੇਰੇ ਬੰਦਿਆ, ਤੱਕੜੀ ‘ਤੇ ਤੁਲ ਜਾਣਗੇ।

ਸ਼ਿਵ ਸੈਨਾ ਦੇ ਛੇ ਬਾਗ਼ੀ ਸਾਂਸਦਾਂ ਨੂੰ ਮਿਲੀ ‘ਵਾਈ-ਪਲੱਸ’ ਸੁਰੱਖਿਆ- ਇਕ ਖ਼ਬਰ

ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ।

ਇਜ਼ਰਾਈਲ ਦੀ ਲਿਬਨਾਨ ਤੋਂ ਵਾਪਸੀ ਤੱਕ ਕੋਈ ਸਮਝੌਤਾ ਨਹੀਂ- ਇਰਾਨ

ਲਾਲੀ ਮੇਰੀਆਂ ਅੱਖਾਂ ਵਿਚ ਰੜਕੇ, ਅੱਖ ਮੇਰੇ ਯਾਰ ਦੀ ਦੁਖੇ।

ਊਧਵ ਠਾਕਰੇ ਦੀ ਸੈਨਾ ਬਿਖਰੀ, 6 ਸਾਂਸਦ ਹੋਏ ਬਾਗ਼ੀ- ਇਕ ਖ਼ਬਰ

ਚੁਗ਼ ਲੈ ਕਬੂਤਰ ਬਣ ਕੇ, ਮੋਤੀ ਖਿਲਰ ਗਏ।

ਰਾਜਾ ਵੜਿੰਗ ਨੇ ਐਸ.ਸੀ. ਕਮਿਸ਼ਨ ਅੱਗੇ ਪੇਸ਼ ਹੋਣ ਤੋਂ ਕੀਤਾ ਇਨਕਾਰ- ਇਕ ਖ਼ਬਰ

ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਕਿਸੇ ਵੀ ਕੀਮਤ ‘ਤੇ ਇਰਾਨ ਨੂੰ ਪਰਮਾਣੂੰ ਹਥਿਆਰ ਨਹੀਂ ਰੱਖਣ ਦਿਆਂਗੇ- ਇਜ਼ਰਾਈਲ

ਜਿਊਣਾ ਮੌੜ ਵੱਢਿਆ ਨਾ ਜਾਵੇ, ਛਵ੍ਹੀਆਂ ਦੇ ਘੁੰਡ ਮੁੜ ਗਏ।

ਹਰਿਆਣਾ ਦਾ ਆਈ.ਏ.ਐਸ. ਅਧਿਕਾਰੀ ਪ੍ਰਦੀਪ ਕੁਮਾਰ 590 ਕਰੋੜ ਦੇ ਘਪਲੇ ‘ਚ ਫ਼ਰਾਰ- ਇਕ ਖ਼ਬਰ

ਤੁਸੀਂ ਕੀ ਚਾਹੁੰਦੇ ਹੋ ਕਿ ਉਹ ਘਰੇ ਬੈਠਾ ਫੜਿਆ ਜਾਂਦਾ!

ਸ਼੍ਰੀ ਹਜ਼ੂਰ ਸਾਹਿਬ ਗੁਰਦੁਆਰਾ ਐਕਟ ਰੱਦ ਕਰਨ ਵਿਰੁੱਧ ਗੁਰਮਤਾ ਜਾਰੀ- ਇਕ ਖ਼ਬਰ

ਮੋੜੀਂ ਮੋੜੀਂ ਵੇ ਮੁਲਾਹਜ਼ੇਦਾਰਾ, ਮੱਝੀਆਂ ਹੀਰ ਦੀਆਂ।

ਭਗੌੜੇ ਲੋਕ ਸੰਗਤਾਂ ਨੂੰ ਸ੍ਰੀ ਅਕਾਲ ਤਖ਼ਤ ਦੇ ਹੁਕਮਾਂ ਨੂੰ ਮੰਨਣ ਦੀ ਕਰ ਰਹੇ ਹਨ ਤਾਕੀਦ- ਗਿ. ਹਰਪ੍ਰੀਤ ਸਿੰਘ

ਆਪ ਨਾ ਵੱਸੀ ਸਹੁਰੇ, ਲੋਕਾਂ ਮੱਤੀਂ ਦੇ।

ਰਾਜੇਵਾਲ, ਪੰਧੇਰ ਅਤੇ ਚੜੂਨੀ ਨੇ ਸਾਂਝੇ ਸੰਘਰਸ਼ ਲਈ ਮੁੜ ਹੱਥ ਮਿਲਾਇਆ- ਇਕ ਖ਼ਬਰ

ਝੰਡੇ ਨਿਕਲੇ ਕੂਚ ਦਾ ਹੁਕਮ ਹੋਇਆ, ਚੜ੍ਹੇ ਸੂਰਮੇ ਸਿੰਘ ਦਲੇਰ ਮੀਆਂ।

23.06.2026

ਅਮਰੀਕਾ ਨੂੰ ਭਾਰਤ ਦੀ ਤਰੱਕੀ ਰੜਕਦੀ ਹੈ- ਸੰਤ ਸੀਚੇਵਾਲ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਪ੍ਰੋ. ਦਰਸ਼ਨ ਸਿੰਘ ਵਾਲੀ ਸੀ.ਡੀ. ਦੀ ਜਾਂਚ ਕਿਉਂ ਨਹੀਂ ਸੀ ਕੀਤੀ ਗਈ?

ਕਿਉਂਕਿ ਇਹ ਸੀ.ਡੀ. ਇਕ ਸਾਜ਼ਿਸ਼ ਅਧੀਨ ਬਣਾਈ ਗਈ ਸੀ। 

ਬਿਹਾਰ ‘ਚ ਮਨਰੇਗਾ ਬਕਾਏ ਦਾ ਹੋਵੇਗਾ ਭੁਗਤਾਨ- ਕੇਂਦਰ ਸਰਕਾਰ

ਅਸਾਂ ਜੇਠ ਨੂੰ ਲੱਸੀ ਨਹੀਉਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਪੰਜਾਬ ਕਾਂਗਰਸ ਦੀ ਲੀਡਰਸ਼ਿੱਪ ਦਾ ਫ਼ੈਸਲਾ ਰਾਹੁਲ ਅਤੇ ਖੜਗੇ ਹੱਥ- ਇਕ ਖ਼ਬਰ

ਕੋਈ ਡਰਦੀ ਪੀਹਣ ਨਾ ਜਾਵੇ, ਛੜਿਆਂ ਦੇ ਦੋ ਦੋ ਚੱਕੀਆਂ।

ਟਰੰਪ ਸਾਬ, ਮੇਰੀ ਮਕਬੂਲੀਅਤ ਤੁਹਾਡੀ ਚਿੰਤਾ ਦਾ ਵਿਸ਼ਾ ਨਹੀਂ, ਤੁਸੀਂ ਆਪਣਾ ਫ਼ਿਕਰ ਕਰੋ- ਜੌਰਜੀਆ ਮੇਲੋਨੀ

ਲੱਤ ਮਾਰੂੰਗੀ ਪੰਜੇਬਾਂ ਵਾਲ਼ੀ, ਪਰ੍ਹਾਂ ਹੋ ਜਾ ਚੱਟੂ ਵੱਟਿਆ।

ਮਹਾਰਾਜਾ ਰਣਜੀਤ ਸਿੰਘ ਦੇ ਸੁਪਨਿਆਂ ਦਾ ਪੰਜਾਬ ਬਣਾਵਾਂਗੇ- ਨਿਤਿਨ ਨਬੀਨ

ਹੋਕਾ ਦੇਣਗੇ ਵੰਙਾਂ ਦਾ, ਕੱਢ ਦਿਖਾਉਣਗੇ ਚੱਕੀਰਾਹੇ।

ਪੰਜਾਬ ਵਿਚ ਅਕਾਲੀਆਂ ਦੀ ਸਰਕਾਰ ਆਉਣ ‘ਤੇ ਹੋਵੇਗੀ ਬੰਦੀ ਸਿੰਘਾਂ ਦੀ ਰਿਹਾਈ- ਪਰਮਜੀਤ ਸਿੰਘ ਸਰਨਾ

ਪਹਿਲੀਆਂ ਅਕਾਲੀ ਸਰਕਾਰਾਂ ਕੀ ਖੱਟਾ ਪੀਂਦੀਆਂ ਰਹੀਆਂ, ਸਰਨਾ ਸਾਹਿਬ?

ਅਕਾਲੀ ਦਲ ਪੁਨਰ ਸੁਰਜੀਤ ਅਤੇ ਤਿੰਨ ਹੋਰ ਅਕਾਲੀ ਦਲ ਹੋਏ ਇਕੱਠੇ- ਇਕ ਖ਼ਬਰ

ਪਰ ਕਿੰਨੇ ਕੁ ਚਿਰ ਲਈ?

ਜਥੇਦਾਰ ਨੂੰ ਅਕਾਲੀ ਦਲ ਦੇ ਸਿਆਸੀ ਮੋਹਰੇ ਵਜੋਂ ਕੰਮ ਨਹੀਂ ਕਰਨਾ ਚਾਹੀਦਾ- ਬਲਤੇਜ ਪੰਨੂੰ

ਮੇਰੇ ਮਾਹੀ ਨੂੰ ਅਕਲ ਜੇ ਆਵੇ, ਮੈਂ ਸੁੱਖ ਲਵਾਂ ਪੰਜ ਮੱਸਿਆ।

ਮੇਰੇ ਬਿਨਾਂ ਇਜ਼ਰਾਈਲ ਦੀ ਹੋਂਦ ਸੰਭਵ ਨਹੀਂ-ਟਰੰਪ

ਤੇਰੀ ਮੇਰੀ ਇਕ ਜਿੰਦੜੀ, ਐਵੇਂ ਦੋ ਕਲਬੂਤ ਬਣਾਏ।

ਕਾਂਗਰਸ ਡੁੱਬਦਾ ਜਹਾਜ਼ ਨਹੀਂ, ਵੱਖ ਹੋਏ ਨੇਤਾ ਫੇਰ ਇਕੱਠੇ ਹੋਣ- ਸੰਜੇ ਰਾਉਤ

ਵੇ ਮੈਂ ਤ੍ਰਿੰਞਣਾਂ ‘ਚ ਬੋਲ ਪਛਾਣਿਆਂ, ਗਲ਼ੀਆਂ ‘ਚ ਫਿਰਦੇ ਦਾ।

ਇਰਾਨ ਨੇ ਸ਼ਰਤਾਂ ਨਾ ਮੰਨੀਆਂ ਤਾਂ ਫੇਰ ਬੰਬਾਰੀ ਕਰਾਂਗੇ- ਟਰੰਪ

ਹੋਰ ਜੇ ਕੋਈ ਲੈ ਆਇਆ ਤੇਰੀ ਜੰਞ ਨੀ, ਜੰਗ ਦਾ ਮੈਦਾਨ ਬਣੂੰ ਬੇਲਾ ਝੰਗ ਨੀ।

ਅਸੀਂ ਦੱਖਣੀ ਲਿਬਨਾਨ ਤੋਂ ਪਿੱਛੇ ਨਹੀਂ ਹਟਾਂਗੇ- ਇਜ਼ਰਾਈਲ

ਪੂਛ ਕੁੱਤੇ ਦੀ ਕਦੇ ਨਾ ਹੋਏ ਸਿੱਧੀ, ਬਾਰਾਂ ਸਾਲ ਵਿਚ ਨੌਲ਼ਕੇ ਰੱਖੀਏ ਜੀ।

ਚੰਡੀਗੜ੍ਹ ਦੇ ਟਕਸਾਲੀ ਆਗੂਆਂ ਨੇ ਅਕਾਲੀ ਦਲ ਪੁਨਰ ਸੁਰਜੀਤ ਦਾ ਪੱਲਾ ਫੜਿਆ- ਇਕ ਖ਼ਬਰ

ਨੀ ਮੈਂ ਜਾਣਾ ਜੋਗੀ ਦੇ ਨਾਲ਼, ਕੰਨੀਂ ਮੁੰਦਰਾਂ ਪਾ ਕੇ।

ਟਰੰਪ ਪ੍ਰਸ਼ਾਸਨ ਦਾ ਵੀਜ਼ਾ ਫ਼ੀਸ ਵਧਾਉਣ ਦਾ ਫ਼ੈਸਲਾ ਅਦਾਲਤ ਵਲੋਂ ਗ਼ੈਰ-ਕਾਨੂੰਨੀ ਕਰਾਰ- ਇਕ ਖ਼ਬਰ

ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

================================================================================

15 -06 -2026

ਪੰਜਾਬ ‘ਚ ਹੁਣ ਪ੍ਰਾਈਵੇਟ ਸਕੂਲ ਸਾਲਾਨਾ ਪੰਜ ਫ਼ੀ ਸਦੀ ਤੋਂ ਵੱਧ ਫ਼ੀਸ ਨਹੀਂ ਵਧਾ ਸਕਣਗੇ- ਪੰਜਾਬ ਸਰਕਾਰ

ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।

 

ਗਿਆਨੀ ਰਘਬੀਰ ਸਿੰਘ ਨੇ ਅਕਾਲੀ ਦਲ ਬਾਦਲ ਦੀ ਲੀਡਰਸ਼ਿੱਪ ਨੂੰ ਕੀਤਾ ਬੇਨਕਾਬ- ਬਲਤੇਜ ਪੰਨੂੰ

 ਹਲਾ ਲਾਲਾ ਹਲਾ ਲਾਲਾ ਹੋ ਗਈ ਮਿੱਤਰਾ, ਜਦੋਂ ਚੁੱਕਿਆ ਘੜੇ ਤੋਂ ਕੌਲਾ।

ਪੰਜਾਬ ਭਾਜਪਾ ਦੇ ਜਨਰਲ ਸਕੱਤਰ ਜਗਮੋਹਨ ਸਿੰਘ ਰਾਜੂ ਨੇ ਆਪਣੇ ਅਹੁਦੇ ਤੋਂ ਦਿਤਾ ਅਸਤੀਫ਼ਾ- ਇਕ ਖ਼ਬਰ

ਤੇਰੇ ਖ਼ੁਸ਼ਕ ਮੱਕੀ ਦੇ ਦਾਣੇ, ਮਿੱਤਰਾਂ ਨੇ ਨਹੀਉਂ ਚੱਬਣੇ।

ਸਮਾਜ ਦਾ ਹਰ ਵਰਗ ਭਾਜਪਾ ਸਰਕਾਰ ਤੋਂ ਨਾਰਾਜ਼- ਦੀਪੇਂਦਰ ਹੁੱਡਾ 

ਸੋਨੇ ਦੇ ਤਵੀਤ ਵਾਲ਼ੀਏ, ਤੇਰੀ ਹਰ ਮੱਸਿਆ ਬਦਨਾਮੀ।

ਕੇਂਦਰ ਦੀਆਂ ਨੀਤੀਆਂ ਵਿਰੁੱਧ ਕਿਸਾਨਾਂ ਨੇ ਕੀਤਾ ਪ੍ਰਦਰਸ਼ਨ- ਇਕ ਖ਼ਬਰ

ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਕੇਵਲ ਸਿੰਘ ਢਿੱਲੋਂ ਲਈ ਭਾਜਪਾ ਦੀ ਪ੍ਰਧਾਨਗੀ ਦਾ ਤਾਜ ਸੂਲ਼ਾਂ ਦੀ ਸੇਜ- ਉਜਾਗਰ ਸਿੰਘ ਪੱਤਰਕਾਰ

ਚੜ੍ਹ ਜਾ ਬੱਚਾ ਸੂਲੀ ਰਾਮ ਭਲੀ ਕਰੇਗਾ।

ਮਮਤਾ ਬੈਨਰਜੀ ਨੇ ਦਿੱਲੀ ਵਿਚ ਸੋਨੀਆ ਗਾਂਧੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਭੱਜੀਆਂ ਬਾਹਾਂ ਗਲ਼ ਨੂੰ ਆਈਆਂ।

ਪੰਜਾਬ ਦੇ ਹਰ ਕਿਸਾਨ ‘ਤੇ ਔਸਤਨ 2.93 ਲੱਖ ਦਾ ਕਰਜ਼ਾ- ਇਕ ਖ਼ਬਰ

ਕਾਦਰਯਾਰ ਜੇ ਕੋਲ਼ ਗਵਾਹ ਹੁੰਦੇ, ਕਹਿੰਦੇ ਖੋਲ੍ਹ ਹਕੀਕਤ ਸਾਰੀ।

ਵਿਦੇਸ਼ੀ ਨਿਵੇਸ਼ਕਾਂ ਨੇ ਜੂਨ ਦੇ ਪਹਿਲੇ ਹਫ਼ਤੇ ਭਾਰਤੀ ਬਾਜ਼ਾਰ ‘ਚੋਂ 43000 ਕਰੋੜ ਰੁਪਏ ਕੱਢੇ- ਇਕ ਖ਼ਬਰ

ਚਲ ਉੜ ਜਾ ਰੇ ਪੰਛੀ ਕਿ ਅਬ ਯੇਹ ਦੇਸ਼ ਹੂਆ ਬੇਗਾਨਾ।

ਗਿਆਨੀ ਰਘਬੀਰ ਸਿੰਘ ਵਲੋਂ ਸਿੱਟ ਅੱਗੇ ਬਿਆਨ ਦਰਜ ਕਰਵਾਉਣਾ ਗ਼ਲਤ- ਗਿਆਨੀ ਹਰਪ੍ਰੀਤ ਸਿੰਘ

ਗਿ. ਹਰਪ੍ਰੀਤ ਸਿੰਘ ਜੀ ਕੀ ਗਿ. ਰਘਬੀਰ ਸਿੰਘ 2 ਦਸੰਬਰ 2024 ਨੂੰ ਹੋਈ ਕਾਰਵਾਈ ਤੋਂ ਮੁੱਕਰ ਜਾਂਦੇ?

ਮੈਂ ਸਿੱਟ ਨੂੰ ਬਿਆਨ ਦੇਣ ਨਹੀਂ ਗਿਆ, ਅਧਿਕਾਰੀ ਖ਼ੁਦ ਮੇਰੇ ਕੋਲ ਆਏ- ਗਿਆਨੀ ਰਘਬੀਰ ਸਿੰਘ

ਮੈਂ ਕੋਈ ਝੂਠ ਬੋਲਿਆ, ਮੈਂ ਕੋਈ ਕੁਫ਼ਰ ਤੋਲਿਆ, ਕੋਈ ਨਾ ਬਈ ਕੋਈ ਨਾ।

ਭਾਜਪਾ ਨੂੰ ਛੋਟਾ ਭਰਾ ਸਮਝਣ ਦੀ ਭੁੱਲ ਨਾ ਕਰੇ ਕੋਈ- ਹਰਦੀਪ ਪੁਰੀ

ਧੀਏ ਗੱਲ ਸੁਣ, ਨੂੰਹੇਂ ਕੰਨ ਕਰ।

ਬੀ.ਬੀ.ਐਮ.ਬੀ. ਦੀ ਚੇਤਾਵਨੀ ਨੂੰ ਗੰਭੀਰਤਾ ਨਾਲ਼ ਲਵੇ ਪੰਜਾਬ ਸਰਕਾਰ- ਸੁਖਜਿੰਦਰ ਸਿੰਘ ਰੰਧਾਵਾ

ਇਨ੍ਹਾਂ ਦੇ ਕੋਲ ਹੈ ਕੀ, ਚੇਤਾਵਨੀ ਨੂੰ ਗੰਭੀਰਤਾ ਨਾਲ ਲੈ ਕੇ ਕਰਨਗੇ ਕੀ?

ਅਸੀਂ ਲੜਾਂਗੇ ਤੇ ਅੱਗੇ ਵਧਾਂਗੇ- ਇੰਡੀਆ ਗੱਠਜੋੜ

ਜਿੱਥੇ ਚੱਲੇਂਗਾ ਚੱਲੂੰਗੀ ਨਾਲ ਤੇਰੇ, ਟਿਕਟਾਂ ਦੋ ਲੈ  ਲਈਂ।

ਧਾਰਮਕ ਸਥਾਨਾਂ ਦੇ ਮੁਫ਼ਤ ਦਰਸ਼ਨ ਕਰਵਾਏਗੀ ਪੰਜਾਬ ਸਰਕਾਰ- ਕੇਜਰੀਵਾਲ

ਨਿੱਤ ਨਿੱਤ ਨਹੀਂ ਬਜ਼ਾਰ ਵਿਚ ਆਉਣਾ, ਨੀਂ ਬਿੱਲੋ ਖਾ ਲੈ ਨਾਸ਼ਪਾਤੀਆਂ।

08.06.2026

ਬਿਕਰਮ ਮਜੀਠੀਆ ਦੀ ਗ੍ਰਿਫ਼ਤਾਰੀ ਲਈ 12 ਟੀਮਾਂ ਦਾ ਗਠਨ- ਇਕ ਖ਼ਬਰ

ਵੱਢਿਆ ਗੰਡਾਸਿਆਂ ਦੇ ਨਾਲ਼, ਚੰਦੜਾਂ ਨੇ ਮਿਰਜ਼ੇ ਨੂੰ।

ਪੰਜਾਬ ਕਾਂਗਰਸ ਪੂਰੀ ਤਰ੍ਹਾਂ ਇਕਜੁੱਟ- ਰਾਜਾ ਵੜਿੰਗ

ਵੜਿੰਗ ਸਾਬ, ਇਹ ਕੋਈ ਦੱਸਣ ਦੀ ਗੱਲ ਐ। ਘਰ ਦੇ ਭਾਗ ਡਿਉਢੀ ਤੋਂ ਹੀ ਦਿਸ ਜਾਂਦੇ ਐ।

ਪੁਲਿਸ ਦੀ ਮੰਨਜ਼ੂਰੀ ਤੋਂ ਬਿਨਾਂ ਵੀ ਧਰਨੇ ‘ਤੇ ਬੈਠੇਗੀ ਤ੍ਰਿਣਮੂਲ ਕਾਂਗਰਸ- ਮਮਤਾ ਬੈਨਰਜੀ

ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭ੍ਰਿੰਡ ਬਣ ਕੇ।

ਇਰਾਨ- ਅਮਰੀਕਾ ਪ੍ਰਮਾਣੂੰ ਸਮਝੌਤੇ ‘ਚ ਪਾਕਿਸਤਾਨ ਬਣੇਗਾ ਜ਼ਾਮਨ- ਇਕ ਖ਼ਬਰ

ਗੱਡੀ ਜੋੜ ਕੇ ਆਈਂ ਵੇ ਵੀਰਾ, ਕਰੂਏ ਦੇ ਵਰਤਾਂ ਨੂੰ।

ਜੰਗਬੰਦੀ ਦੇ ਦਾਅਵਿਆਂ ਵਿਚਾਲੇ ਇਜ਼ਰਾਇਲ ਵਲੋਂ ਲਿਬਨਾਨ ‘ਤੇ ਵੱਡਾ ਹਮਲਾ- ਇਕ ਖ਼ਬਰ

ਕਾਹਨੂੰ ਪਾਲ਼ਿਆ ਕੁਲੱਛਣਾ ਬੋਤਾ, ਚੜ੍ਹਦੀ ਦੇ ਵੱਢੇ ਦੰਦੀਆਂ।

ਜੂਨ 84 ਦੇ ਫੌਜੀ ਹਮਲੇ ਦੀ ਜਾਂਚ ਕਰਵਾਏ ਮੋਦੀ ਸਰਕਾਰ- ਗੁਰਚਰਨ ਸਿੰਘ ਬੱਬਰ

ਬੱਬਰ ਸਾਹਿਬ ਅਡਵਾਨੀ ਦੀ ਕਿਤਾਬ ਨਹੀਂ ਪੜ੍ਹੀ ਤੁਸੀਂ? ਨਹੀਂ ਪੜ੍ਹੀ ਤਾਂ ਪੜ੍ਹੋ।

ਭਾਰਤ ਨੇ ਸਾਡੇ ਕੋਲੋਂ ਬਹੁਤ ਫ਼ਾਇਦਾ ਉਠਾਇਆ, ਹੁਣ ਹੋਰ ਨਹੀਂ- ਟਰੰਪ

ਲੈ ਜਾਣਗੇ ਜਿਨ੍ਹਾਂ ਨੇ ਦੰਮ ਖਰਚੇ, ਫੋਕੇ ਦਾਅਵੇ ਮਿੱਤਰਾਂ ਦੇ।

ਲੰਡਨ ‘ਚ ਸੀ.ਜੇ.ਆਈ. ਸੂਰਿਆਕਾਂਤ ਦੇ ਪ੍ਰੋਗਰਾਮ ‘ਚ ਹੋਇਆ ਹੰਗਾਮਾ- ਇਕ ਖ਼ਬਰ

ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਅਮਰੀਕੀ ਸੰਸਦ ਵਿਚ ਇਰਾਨ ਨਾਲ ਜੰਗ ਰੋਕਣ ਲਈ ਮਤਾ ਪਾਸ, ਟਰੰਪ ਨੂੰ ਝਟਕਾ- ਇਕ ਖ਼ਬਰ

ਗੋਰੇ ਰੰਗ ‘ਤੇ ਝਰੀਟਾਂ ਆਈਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਕੈਪਟਨ ਅਮਰਿੰਦਰ ਸਿੰਘ ‘ਘਰ ਵਾਪਸੀ’ ਨਹੀਂ ਕਰ ਰਹੇ- ਇਕ ਖ਼ਬਰ

ਐਵੇਂ ਰੌਲ਼ਾ ਪੈ ਗਿਆ, ਬਈ ਐਵੇਂ ਰੌਲਾ ਪੈ ਗਿਆ।

ਮਮਤਾ ਬੈਨਰਜੀ ਦੇ 20 ਸੰਸਦ ਮੈਂਬਰਾਂ ਦੇ ਭਾਜਪਾ ‘ਚ ਜਾਣ ਦੀ ਚਰਚਾ- ਇਕ ਖ਼ਬਰ

ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਹਿਮਾਚਲ ਤੋਂ ਆਉਣ ਵਾਲੇ ਵਾਹਨਾਂ ਉੱਪਰ ਨਿਹੰਗ ਸਿੰਘਾਂ ਨੇ ਲਗਾਇਆ ਖ਼ਾਲਸਾ ਟੈਕਸ- ਇਕ ਖ਼ਬਰ

ਬੋਤਾ ਸਿੰਘ ਤੇ ਗਰਜਾ ਸਿੰਘ ਜੀ, ਡਟ ਗਏ ਪਿੱਠਾਂ ਜੋੜ ਕੇ।

ਮਮਤਾ ਬੈਨਰਜੀ ਨੂੰ ਤਕੜਾ ਝਟਕਾ, ਵਿਰੋਧੀ ਧੜੇ ਨੂੰ ਮਿਲੀ ਮਾਨਤਾ- ਇਕ ਖ਼ਬਰ

ਅੱਗ ਲਾ ਗਈ ਝਾਂਜਰਾਂ ਵਾਲ਼ੀ, ਲੈਣ ਆਈ ਪਾਣੀ ਦਾ ਛੰਨਾ।

ਮਹਾਰਾਜਾ ਰਣਜੀਤ ਸਿੰਘ ਦੇ ਨਾਂ ‘ਤੇ ਭਾਜਪਾ ਹਮਦਰਦੀ ਹਾਸਲ ਨਹੀਂ ਕਰ ਸਕਦੀ- ਸੁਖਜਿੰਦਰ ਸਿੰਘ ਰੰਧਾਵਾ

ਸਭੇ ਕੰਨ ਪੜਵਾ ਕੇ ਬੈਠ ਜਾਂਦੇ, ਮੁਸ਼ਕਲ ਜੋਗ ਦਾ ਹੁੰਦਾ ਚੜ੍ਹਾਉਣ ਬੇਟਾ।

ਲਿਬਨਾਨ ‘ਤੇ ਇਜ਼ਰਾਇਲੀ ਹਮਲੇ ਤੋਂ ਟਰੰਪ ਨਾਰਾਜ਼- ਇਕ ਖ਼ਬਰ

ਕੋਈ ਕਰੇ ਨਾ ਯਕੀਨ ਹੁਣ ਤੇਰਾ, ਝੂਠਿਆ ਦੋਜ਼ਕੀਆ।

=====================================================================