ਵਿਦਾ - ਵਿਨੋਦ ਫ਼ਕੀਰਾ ,ਸਟੇਟ ਐਵਾਰਡੀ,

ਆਗਿਆ ਦੇ ਨੀ ਮਾਏਂ ਮੈਨੂੰ ਮੇਰੀਏ, ਇਸ ਦੁਨੀਆ ਤੋਂ ਵਿਦਾ ਹੋ ਚੱਲੀਏ।
ਸਾਰ ਲਵੇ ਨਾ ਕੋਈ ਕਿਸੇ ਦੀ ਸਭ ਮਤਲੱਬ ਖੋਰੀ ਇੱਥੇ ਹੋਏ,
ਦਿਲ ਦੀਆਂ ਮੁੱਕੀਆਂ ਸਾਝਾਂ ਇੱਥੇ ਜ਼ਮੀਰ ਗਏ ਨੇ ਸਭਦੇ ਮੋਏ,
ਹਵੱਸ ਚ ਅੰਨੇ ਹੋਏ ਫਿਰਦੇ ਇੱਥੇ ਬਾਲੜੀਆਂ ਤੇ ਕਹਿਰ ਕਮਾਏ,
ਕਾਮਵਾਸਨਾ'ਚ ਦੇ ਵੱਸ ਵਿੱਚ ਹੋ ਕੇ ਆਪਣਿਆਂ ਦੇ ਹੀ ਕਤਲ ਕਰਾਏ,
ਆਗਿਆ ਦੇ ਨੀ ਮਾਏਂ ਮੈਨੂੰ ਮੇਰੀਏ, ਇਸ ਦੁਨੀਆ ਤੋਂ ਵਿਦਾ ਹੋ ਚੱਲੀਏ।

ਸਪਰੇਆਂ ਨਾਲ ਕਰਕੇ ਖੇਤੀ ਭਾਂਤ ਭਾਂਤ ਦੇ ਸਭ ਨੂੰ ਰੋਗ ਲਗਾਏ,
ਖੁਰਾਕਾਂ ਵਿੱਚ ਹੋਈ ਮਿਲਾਵਟ ਕਿੰਝ ਕੋਈ ਸਿਹਤ ਹੁਣ ਬਣਾਏ,
ਬਾਬਰ ਵਰਗੇ ਹੋਏ ਹਕੀਮ ਅਰਾਮ ਦੀ ਕਿਰਨ ਨਾ ਨਜ਼ਰੀ ਆਏ,
ਸੋਨੇ ਵਰਗੀ ਖਾ ਗਏ ਜਵਾਨੀ ਪਤਾ ਨਹੀਂ ਕਿੱਥੋਂ ਇਹ ਨਸ਼ੇ ਨੇ ਆਏ।
ਆਗਿਆ ਦੇ ਨੀ ਮਾਏਂ ਮੈਨੂੰ ਮੇਰੀਏ, ਇਸ ਦੁਨੀਆ ਤੋਂ ਵਿਦਾ ਹੋ ਚੱਲੀਏ।

ਦਵਾ ਦਾਰੂ ਲਈ ਤਰਸਦਾ ਵੇਖਿਆ ਜਿਸ ਨੇ ਪੁੱਤਾਂ ਨੂੰ ਸੀ ਲਾਡ ਲਡਾਏ,
ਕਸਰ ਕੋਈ ਨਾ ਛੱਡੀ ਉਸ ਨੇ ਬੱਚੇ ਸੀ ਖੂਬ਼ ਪੜ੍ਹਾਏ ਤੇ ਵਿਦੇਸ਼ਾਂ'ਚ ਸੈਟ ਕਰਾਏ,
ਅੱਜ ਕਰਤਾਰਾ ਦੋ ਟੁੱਕਾਂ ਲਈ ਤਰਸਦਾ ਵੇਖਿਆ ਵਿਦੇਸ਼ੋ ਪੁੱਤਰਾਂ ਦੇ ਫੋਨ ਸੀ ਆਏ,
ਆਖੇ ਮਿੰਨਤ 'ਫ਼ਕੀਰਾ' ਤੇਰੀ ਜੇ ਕਿਧਰੇ ਬਾਪੂ ਨੂੰ ਵਿਰਧ ਆਸ਼ਰਮ' ਚ ਛੱਡ ਆਏ,
ਆਗਿਆ ਦੇ ਨੀ ਮਾਏਂ ਮੈਨੂੰ ਮੇਰੀਏ, ਇਸ ਦੁਨੀਆ ਤੋਂ ਵਿਦਾ ਹੋ ਚੱਲੀਏ।

ਕੀ ਲੈਣਾ ਐਸੀ ਖ਼ੁਦਗਰਜ ਦੁਨੀਆ ਤੋਂ ਮੈਨੂੰ ਕੁੱਝ ਵੀ ਸਮਝ ਨਾ ਆਏ,
ਦਿਲ ਨਾ ਮੰਨੇ ਮੈਂ ਚਾਰ ਪੁੱਤਰਾਂ ਦੇ ਬਾਪੂ ਨੂੰ ਕਿੱਦਾਂ ਆਸਰਮ'ਚ ਛੱਡ ਆਏ,
ਆਖਣ ਅੱਗੋਂ ਫੈਮਲੀਆਂ ਸਾਡੀਆਂ ਸੈੱਟ ਨੇ ਪਰ ਬਾਪੂ ਨੂੰ ਵਿਦੇਸ਼ ਰਾਸ ਨਾ ਆਏ,
ਭਰੇ ਹੋਏ ਮੰਨ ਨਾਲ ਮੈਂ ਪੁੱਛਿਆ ਇਹ ਵੀ ਦੱਸੋ ਬਾਪੂ ਨੂੰ ਆਖ਼ਰੀ ਲਾਂਬੂ ਕੌਣ ਲਗਾਏ।
ਆਗਿਆ ਦੇ ਨੀ ਮਾਏਂ ਮੈਨੂੰ ਮੇਰੀਏ, ਇਸ ਦੁਨੀਆ ਤੋਂ ਵਿਦਾ ਹੋ ਚੱਲੀਏ।

ਵਿਨੋਦ ਫ਼ਕੀਰਾ ,ਸਟੇਟ ਐਵਾਰਡੀ,
ਆਰੀਆ ਨਗਰ, ਕਰਤਾਰਪੁਰ,
ਜਲੰਧਰ।
ਮੋ.098721 97326
vinodfaqira8@gmial.com