ਸਿੱਖੀਏ! - ਹਰਜਿੰਦਰ ਸਿੰਘ ਗੁਲਪੁਰ

ਬਹੁਤ ਬੂਬਨੇ ਧੂਣੀਆਂ ਤਾਪਦੇ ਨੇ, ਔਖਾ ਬਹੁਤ ਹੈ ਤਪ ਖਿਡਾਰੀਆਂ ਦਾ।
ਨਹੀਂ ਡੁਗਡੁਗੀ ਵਾਲੀ ਹੈ ਖੇਡ ਕੋਈ,ਨਾਹੀਂ ਕੋਈ ਤਮਾਸ਼ਾ ਮਦਾਰੀਆਂ ਦਾ।
ਲਹੂ ਨਾਲ ਪਸੀਨਾ ਨਿਚੋੜ ਦੇਵਣ, ਨਹੀਂ ਫਰਕ ਵਿਆਹੀਆਂ ਕੁਆਰੀਆਂ ਦਾ।
ਫੇਸਬੁੱਕ ਤੇ ਥੋੜ੍ਹੀ ਜਿਹੀ ਘੋਖ ਕਰਕੇ,ਪਤਾ ਲੱਗਦਾ ਰਹਿੰਦਾ ਹੁਸ਼ਿਆਰੀਆਂ ਦਾ।
ਖਿਡਾਰੀ ਦੇਸ਼ ਦੇ ਅੰਬਰ ਦਾ ਚੰਨ ਹੁੰਦੇ, ਚਮਕਣ ਦੇਣਾ ਹੈ ਕੰਮ ਸਰਕਾਰੀਆਂ ਦਾ।
ਇਸ ਤੱਥ ਦਾ ਹਾਕਮ ਨੂੰ ਪਤਾ ਹੈਨੀ,ਫੌਜਾਂ ਜਿੱਤ ਕੇ ਅੰਤ ਨੂੰ ਹਾਰੀਆਂ ਦਾ।
ਵਿਸ਼ਵ ਖੇਡ ਅਖਾੜੇ ਦੇ ਵਿੱਚ ਵੜਨਾ, ਹੁੰਦਾ ਕੰਮ ਨਹੀਂ ਹਾਰੀਆਂ ਸਾਰੀਆਂ ਦਾ।
ਇੱਕੋ ਗੇਮ ਦੀ ਬੈਠ ਗਏ ਪੂਛ ਫੜਕੇ,ਚੇਤਾ ਭੁੱਲਿਆ ਨਹਿਰ ਦੀਆਂ ਤਾਰੀਆਂ ਦਾ।
ਆਓ ! ਸਿੱਖੀਏ "ਭੀੜ" ਤੋਂ ਦੂਰ ਰਹਿਕੇ, ਸਿਰ ਤੇ ਚੱਕਣਾ ਭਾਰ ਦੁਸ਼ਵਾਰੀਆਂ ਦਾ।
ਹਾਕੀ ਅਤੇ  ਕਬੱਡੀ ਦੀ ਖੇਡ ਉੱਤੇ , ਬੜੀ  ਆਸਥਾ ਹੈ  ਪੰਜਾਬੀਆਂ  ਦੀ,
ਤਮਗੇ ਚੁੱਕ ਕੇ ਘਰਾਂ ਨੂੰ ਪਰਤ ਜਾਣਾ, ਅਸਲ ਖੇਡ ਹੈ ਇਹੋ 'ਮੁਰਗਾਬੀਆਂ' ਦੀ।

ਨੋਟ----ਭੀੜ ਤੋਂ ਦੂਰ ਮਤਲਬ ਵਿਅਕਤੀਗਤ ਖੇਡਾਂ ਚ ਹਿੱਸਾ ਲੈਣਾ)
#ਗੁਲਪੁਰ