ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

16/07/17

ਮੋਦੀ ਸਰਕਾਰ ਵਲੋਂ ਲਾਈ ਜੀ.ਐਸ.ਟੀ. ਨੇ ਗੁਰਧਾਮਾਂ ਨੂੰ ਵੀ ਨਹੀਂ ਬਖ਼ਸ਼ਿਆ- ਮੁੱਖ ਸਕੱਤਰ, ਸ਼੍ਰੋਮਣੀ ਕਮੇਟੀ
ਜੱਗ ਭਾਵੇਂ ਨਿੰਦਿਆ ਕਰੇ, ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ।

ਬਰਤਾਨੀਆ ਵਿਚ ਇਕ 21 ਸਾਲ ਦੇ ਮਰਦ ਨੇ ਬੱਚੇ ਨੂੰ ਜਨਮ ਦਿੱਤਾ-ਇਕ ਖ਼ਬਰ
ਸਹੁੰ ਰੱਬ ਦੀ ਝੂਠ ਨਾ ਬੋਲਾਂ, ਬੱਕਰੀ ਨੂੰ ਊਠ ਜੰਮਿਆਂ।

ਦਹਿਸ਼ਤਗ਼ਰਦੀ ਨੂੰ ਨੱਥ ਨਾ ਪਾਈ ਤਾਂ ਪਾਕਿ ਨੂੰ ਫੰਡ ਨਹੀਂ ਮਿਲੇਗਾ- ਅਮਰੀਕਾ
ਜੇ ਮੁੰਡਿਆ ਤੂੰ ਹਲ਼ ਨਹੀਂ ਵਾਹੁਣਾ, ਰੋਟੀ ਆਊ ਮਿਰਚਾਂ ਦੇ ਨਾਲ਼ ਚੋਬਰਾ।

ਪੰਜਾਬ ਵਿਚ ਹੁਣ ਕੁੜੀਆਂ ਵੀ ਪਰਸ ਖੋਹਣ ਲੱਗੀਆਂ- ਇਕ ਖ਼ਬਰ
ਕੁੜਤੀ 'ਤੇ ਪਾਈਆਂ ਬੂਟੀਆਂ, ਚੱਜ ਨਾ ਵਸਣ ਦੇ ਤੇਰੇ।

ਨਿਤੀਸ਼ ਜੇਕਰ ਲਾਲੂ ਦਾ ਸਾਥ ਛੱਡੇ ਤਾਂ ਬਾਹਰੋਂ ਸਮਰਥਨ ਦੇਣ ਲਈ ਤਿਆਰ ਹਾਂ- ਬਿਹਾਰ ਭਾਜਪਾ
ਕਾਹਨੂੰ ਚੂਪਦੈਂ ਚਰ੍ਹੀ ਦੇ ਟਾਂਡੇ, ਘਰ 'ਚ ਸੰਧੂਰੀ ਅੰਬੀਆਂ।

ਸਿੱਖ ਕਤਲੇਆਮ ਪੀੜਤਾਂ ਨੂੰ ਫ਼ੂਲਕਾ ਦੇ ਅਸਤੀਫ਼ੇ ਦਾ ਕੋਈ ਫ਼ਾਇਦਾ ਨਹੀਂ ਹੋਣਾ- ਸਿਰਸਾ
ਤੁਸੀਂ ਕਤਲੇਆਮ ਪੀੜਤਾਂ ਨੂੰ ਕਿਹੜੇ ਝੂਲਣੇ ਝੁਲਾਅ 'ਤੇ ਬਈ।

ਸਰਕਾਰੀ ਸਕੂਲਾਂ ਦੇ ਬੱਚਿਆਂ ਨੂੰ ਪੜ੍ਹਾਇਆ ਜਾਏਗਾ ਨੈਤਿਕਤਾ ਦਾ ਪਾਠ- ਇਕ ਖ਼ਬਰ
ਪ੍ਰਸ਼ਾਸਨ ਨੂੰ ਤੇ ਸਿਆਸੀ ਲੀਡਰਾਂ ਨੂੰ ਪੜ੍ਹਾਉ ਨੈਤਿਕਤਾ, ਬੱਚੇ ਆਪੇ ਹੀ ਸਿੱਖ ਲੈਣਗੇ।

ਮਹਿੰਗੇ ਟਰੈਕਟਰਾਂ ਦੇ ਸ਼ੌਕ ਨੇ ਕਰਜ਼ੇ ਦੇ ਰਾਹ ਪਾਏ ਕਿਸਾਨ- ਇਕ ਖ਼ਬਰ
ਭੱਠ ਪਿਆ ਸੋਨਾ ਜਿਹੜਾ ਕੰਨਾਂ ਨੂੰ ਖਾਵੇ।

ਮੀਰਾ ਕੁਮਾਰ ਦੀ ਹਮਾਇਤ ਕਰਨ ਵਾਲ਼ੀ 'ਆਪ' ਕਾਂਗਰਸ ਦੀ ਹੈ 'ਬੀ' ਟੀਮ- ਸਿਰਸਾ
ਆਪਣੀ ਟੀਮ ਦਾ ਖ਼ੁਲਾਸਾ ਵੀ ਕਰ ਦਿੰਦੇ, ਸਿਰਸਾ ਸਾਹਿਬ।

ਅਧਿਆਪਕਾਂ ਦੀਆਂ ਵੱਡੇ ਪੱਧਰ 'ਤੇ ਹੋਣਗੀਆਂ ਬਦਲੀਆਂ- ਸਿੱਖਿਆ ਮੰਤਰੀ
ਬਦਲੀਆਂ ਰੁਕਵਾਉਣ ਲਈ ਹੁਣ ਅਧਿਆਪਕ ਵਿਚਾਰੇ ਕਰਨਗੇ ਜੇਬਾਂ ਢਿੱਲੀਆਂ ।

ਪੰਜਾਬ ਵਿਚ ਹੁਣ ਚੇਅਰਮੈਨ ਅਤੇ ਵਿਧਾਇਕ ਨੀਂਹ-ਪੱਥਰ ਨਹੀਂ ਰੱਖ ਸਕਣਗੇ- ਇਕ ਖ਼ਬਰ
ਨ੍ਹਾਤੀ ਧੋਤੀ ਰਹਿ ਗਈ, ਉੱਪਰ ਮੱਖੀ ਬਹਿ ਗਈ।

ਪਾਵਰਕੌਮ ਨੇ ਹਲਕਾ ਲੰਬੀ ਦੇ 'ਬਿਜਲੀ ਚੋਰਾਂ' ਦੀ ਬੱਤੀ ਕੀਤੀ ਗੁੱਲ- ਇਕ ਖ਼ਬਰ
ਸੌ ਦਿਨ ਚੋਰ ਦਾ, ਇਕ ਦਿਨ ਸਾਧ ਦਾ।

ਹੁਣ ਆਲੂ ਡੋਬਣ ਲੱਗੇ ਦੁਆਬੇ ਦੇ ਕਿਸਾਨਾਂ ਨੂੰ- ਇਕ ਖ਼ਬਰ
ਕਿੰਜ ਜਾਨ ਬਚਾਏਂਗਾ, ਤੇਰੇ ਮਗਰ ਸ਼ਿਕਾਰੀ ਬਹੁਤੇ।

ਘਰੋਂ ਲੜ ਕੇ ਆਈ ਪਤਨੀ ਨੂੰ ਪੁਲਿਸ ਨੇ ਪਰਵਾਰ ਦੇ ਹਵਾਲੇ ਕੀਤਾ-ਇਕ ਖ਼ਬਰ
ਬੜੀ ਹੈਰਾਨੀ ਦੀ ਗੱਲ ਆ.........ਕੁਛ ਯਕੀਨ ਜਿਹਾ ਨਹੀਂ ਆਉਂਦਾ!