ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

13/11/17

ਮੋਦੀ ਵਲੋਂ ਕਰੁਣਾਨਿਧੀ ਨਾਲ਼ ਮੁਲਾਕਾਤ, ਹਾਲ ਚਾਲ ਜਾਣਿਆ- ਇਕ ਖ਼ਬਰ
ਛੜੇ ਲੱਸੀ ਦੇ ਬਹਾਨੇ ਆਉਂਦੇ, ਅੱਖ ਰੱਖਦੇ ਰੰਨਾਂ 'ਤੇ ਮਰ ਜਾਣੇ।

ਹਿਮਾਚਲ ਚੋਂ ਮੋਦੀ ਨੂੰ ਖ਼ਾਲੀ ਹੱਥ ਵਾਪਸ ਭੇਜਾਂਗੇ- ਕੈਪਟਨ
ਨੀਂ ਛੜੇ ਅੱਜ ਭਜਨ ਕੁਰੇ, ਹੋ ਕੇ ਸ਼ਰਾਬੀ ਬੁੱਕਦੇ।

178 ਵਸਤੂਆਂ 'ਤੇ ਜੀ. ਐਸ. ਟੀ. 28 ਤੋਂ ਘਟਾ ਕੇ 18 ਫ਼ੀਸਦੀ ਕੀਤਾ- ਇਕ ਖ਼ਬਰ
ਲੌਟ ਕੇ ਬੁੱਧੂ ਘਰ ਕੋ ਆਏ।

ਅਮਰੀਕ ਸਿੰਘ ਅਜਨਾਲ਼ਾ ਨੇ ਮੰਡ ਅਤੇ ਦਾਦੂਵਾਲ ਨੂੰ ਬੁਲਾਈ ਫ਼ਤਿਹ- ਇਕ ਖ਼ਬਰ
ਮੇਰੀ ਲਗਦੀ ਕਿਸੇ ਨਾ ਦੇਖੀ, ਤੇ ਟੁੱਟਦੀ ਨੂੰ ਜੱਗ ਜਾਣਦਾ।

ਸ਼੍ਰੋਮਣੀ ਕਮੇਟੀ ਪ੍ਰਧਾਨ ਅਚਾਨਕ ਜਥੇਦਾਰ ਨੂੰ ਮਿਲਣ ਸਕੱਤਰੇਤ ਪਹੁੰਚੇ-ਇਕ ਖ਼ਬਰ
ਦਿਲ ਕਰ ਲਈਏ ਹੌਲ਼ੇ ਮਿੱਤਰਾ, ਦੁਖ ਸੁਖ ਦੋਵੇਂ ਫੋਲੀਏ।

ਸੁਖਪਾਲ ਖਹਿਰਾ ਹੀ ਟਿਕ ਸਕਦੇ ਹਨ ਕੈਪਟਨ ਦੇ ਸਾਹਮਣੇ- ਸਿਮਰਜੀਤ ਸਿੰਘ ਬੈਂਸ
ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।

ਨੋਟਬੰਦੀ ਸੰਗਠਿਤ ਲੁੱਟ ਅਤੇ ਕਾਨੂੰਨੀ ਡਾਕਾ- ਮਨਮੋਹਨ ਸਿੰਘ
ਦੁਪਹਿਰੇ ਦੀਵਾ ਬਾਲ਼ ਕੇ, ਲੁੱਟੀ ਇਹਨਾਂ ਨੇ ਦਿੱਲੀ।

ਮੋੋਦੀ ਸਰਕਾਰ ਨੇ ਦੇਸ਼ ਦਾ ਬੇੜਾ ਬਿਠਾਉਣ 'ਚ ਕੋਈ ਕਸਰ ਨਹੀਂ ਛੱਡੀ- ਬਾਜਵਾ
ਮੈਂ ਤਾਂ ਹੋ ਗਈ ਹਕੀਮ ਜੀ, ਅੱਗੇ ਨਾਲੋਂ ਤੰਗ।

ਨਿਤੀਸ਼ ਨੂੰ ਸੀਨੀਅਰ ਆਗੂਆਂ ਦੀ ਕਦਰ ਕਰਨੀ ਨਹੀਂ ਆਉਂਦੀ- ਜਯਾ ਜੇਤਲੀ
ਕੋਈ ਸਾਡੇ ਵਰਗਾ ਨਹੀਂ ਲੱਭਣਾ, ਉਂਜ ਆਸ਼ਕ ਜੱਗ 'ਤੇ ਹੋਰ ਬੜੇ।

ਏ.ਟੀ.ਐਮ. ਵਿਚੋਂ ਦੋ ਹਜ਼ਾਰ ਦਾ ਅੱਧ ਛਪਿਆ ਨੋਟ ਨਿੱਕਲਿਆ- ਇਕ ਖ਼ਬਰ
ਅਗਲਿਆਂ ਨੇ ਜੀ.ਐੱਸ.ਟੀ. ਪਹਿਲਾਂ ਹੀ ਕੱਟ ਲਈ।

ਦਸਮ ਪਾਤਸ਼ਾਹ ਦੇ ਅਵਤਾਰ ਦਿਹਾੜੇ ਦੀ ਤਾਰੀਖ਼ ਉਲਝਣ ਦਾ ਖ਼ਦਸ਼ਾ- ਇਕ ਖ਼ਬਰ
ਅਜੇ ਵੀ ਅਸਲੀ ਨਾਨਕਸ਼ਾਹੀ ਕਲ਼ੰਡਰ ਅਪਣਾਅ ਲਉ, ਜ਼ਿਦ ਛੱਡ ਦਿਉ।

ਕਰਜ਼ੇ ਦੀ ਮਾਰ: 30 ਦਿਨਾਂ 'ਚ 57 ਕਿਸਾਨਾਂ ਨੇ ਖ਼ੁਦਕੁਸ਼ੀ ਕੀਤੀ-ਇਕ ਖ਼ਬਰ
ਧੂ ਧੂ ਕਰ ਰੋਮ ਜਲ਼ਦਾ, ਵਜਾਉਣ ਬੰਸਰੀ ਨੀਰੋ।

ਕਿਹੜੇ ਆਗੂ ਸਿਰ ਸਜੇਗਾ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਦਾ ਤਾਜ?- ਇਕ ਸਵਾਲ
ਪਰਚੇ ਅੰਬਰਸਰ ਪੈਣੇ, ਚੰਡੀਗੜ੍ਹ ਹੋਣੇ ਫ਼ੈਸਲੇ।

ਭਾਈ ਅਜਨਾਲਾ ਨੇ ਕਿਸੇ ਵੀ ਪੰਥਕ ਆਗੂ ਦੀ ਗੱਲ ਨਾ ਮੰਨੀ- ਇਕ ਖ਼ਬਰ
ਜੀਣਾ ਮੌੜ ਵੱਢਿਆ ਨਾ ਜਾਵੇ, ਛਵ੍ਹੀਆਂ ਦੇ ਘੁੰਡ ਮੁੜ ਗਏ।

ਦੋ ਦਿਨਾਂ 'ਚ ਹੀ ਟੁੱਟ ਗਿਆ ਮੁਸ਼ੱਰਫ਼ ਦਾ 'ਮਹਾਂਗੱਠਜੋੜ'- ਇਕ ਖ਼ਬਰ
ਕੋਹ ਤੁਰੀ ਨਾ, ਬਾਬਾ ਤ੍ਰਿਹਾਈ।

ਵਿੱਤ ਮੰਤਰੀ ਦੇ ਆਪਣੇ ਹਲਕੇ ਵਿਚ ਹੀ ਫੰਡਾਂ ਦਾ ਘਾਟਾ- ਇਕ ਖ਼ਬਰ
ਨੀਂ ਸਰ ਸੁੱਕ ਗਏ ਨਖ਼ਰੋ, ਮੈਂ ਕਿਥੋਂ ਲਿਆਵਾਂ ਆੜੂ।