ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

2018-03-12

ਬਸਪਾ ਨੇ ਕਿਸੇ ਵੀ ਪਾਰਟੀ ਨਾਲ਼ ਗਠਜੋੜ ਨਹੀਂ ਕੀਤਾ-ਮਾਇਆਵਤੀ
ਬਾਪੂ ਗੱਡੀ ਏਥੋ ਮੋੜ ਲੈ, ਮੇਰੇ ਹਾਣ ਦਾ ਮੁੰਡਾ ਨਾ ਕੋਈ।

ਰਾਮ ਮੰਦਰ ਨਾ ਬਣਿਆ ਤਾਂ ਦੇਸ਼ ਸੀਰੀਆ ਬਣ ਜਾਵੇਗਾ- ਸ੍ਰੀ ਸ੍ਰੀ ਰਵੀ ਸ਼ੰਕਰ
ਬਗ਼ਲ ਮੇਂ ਛੁਰੀ, ਮੂੰਹ ਮੇਂ ਰਾਮ ਰਾਮ।

ਮਈ 'ਚ ਹੋ ਸਕਦੀ ਹੈ ਕਿਮ ਜੌਂਗ ਅਤੇ ਟਰੰਪ ਦੀ ਮੁਲਾਕਾਤ- ਇਜਕ ਖ਼ਬਰ
ਐਡੀ ਨਹੀਂ ਸੀ ਗੱਲ ਮਿੱਤਰਾ, ਜਿੱਡੀ ਬਹਿ ਗਿਉਂ ਬਣਾ ਕੇ ਤੂੰ।

ਭਾਜਪਾ ਦਾ ਮੁਕਾਬਲਾ ਕਰਨ ਲਈ 'ਤੀਜੇ ਮੋਰਚੇ' ਲਈ ਫਿਰ ਜ਼ਮੀਨ ਤਿਆਰ ਹੋਣ ਲੱਗੀ- ਇਕ ਖ਼ਬਰ
ਜ਼ਮੀਨ ਤਾਂ ਤਿਆਰ ਹੋ ਜਾਊ ਚੰਗੇ ਢੱਗੇ ਨਹੀਂ ਲੱਭਣੇ ਬਈ।

ਸਿੱਖ ਕੌਮ ਬਾਦਲਾਂ ਨੂੰ ਪੁੱਛੇ ਪਈ ਇਹਨਾਂ ਨੇ 84 ਦੇ ਪੀੜਤ ਪਰਵਾਰਾਂ ਲਈ ਹੁਣ ਤੱਕ ਕੀ ਕੀਤਾ-ਸਿੱਖ ਚਿੰਤਕ
ਅਰਬਾਂ ਖ਼ਰਬਾਂ ਦੇ ਮਾਲਕ ਬਣ ਗਏ ਬਈ, ਇਹ ਘੱਟ ਐ ਕਿਤੇ।

ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਠੋਸ ਪ੍ਰੋਗਰਾਮ ਉਲੀਕੇ ਜਾਣਗੇ-ਜਥੇਦਾਰ
ਹੁਣ ਤਾਈਂ ਖੱਟਾ ਹੀ ਪੀਂਦਾ ਰਿਹੈਂ ਜਥੇਦਾਰਾ।

ਮੇਘਾਲਿਆ 'ਚ ਭਾਜਪਾ ਨੇ ਮੌਕਾਪ੍ਰਸਤ ਗੱਠਜੜ ਕਰ ਕੇ ਸੱਤਾ ਹਥਿਆਈ- ਰਾਹੁਲ
ਜਦ ਭਾਜਪਾ ਮੰਗ ਰਹੀ ਸੀ ਵੋਟਾਂ, ਤੂੰ ਖਾਂਦਾ ਸੀ ਨਾਨੀ ਘਰ ਮਠਿਆਈ।

ਸੋਨੀਆ ਦੀ ਰਸੋਈ ਵਿਚ ਰਿੱਝੇਗੀ ਸਾਂਝੇ ਮੋਰਚੇ ਦੀ ਖਿਚੜੀ- ਇਕ ਖ਼ਬਰ
ਮੋਤੀ ਖਿਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।

ਕਾਂਗਰਸ ਤੋਂ ਬਿਨਾਂ ਤੀਜਾ ਮੋਰਚਾ ਸਫ਼ਲ ਨਹੀਂ ਹੋ ਸਕੇਗਾ- ਮੋਇਲੀ
ਭਾਈਆਂ ਬਾਝ ਨਾ ਮਸਲਸਾਂ ਸੋਂਹਦੀਆਂ ਨੇ ਅਤੇ ਭਾਈਆਂ ਬਾਝ ਬਹਾਰ ਨਾਹੀਂ।

ਪੰਜਾਬ ਦਾ ਵੀ ਆਪਣਾ ਵੱਖਰਾ ਝੰਡਾ ਹੋਣਾ ਚਾਹੀਦ ਹੈ- ਭੂਪਿੰਦਰ ਸਿੰਘ ਸਾਧੂ
ਉਹ ਫਿਰੇ ਨੱਥ ਘੜਾਉਣ ਨੂੰ ਤੇ ਉਹ ਫਿਰੇ ਨੱਕ ਵਢਾਉਣ ਨੂੰ।

ਕੇਰਲ ਵਿਧਾਨ ਸਭਾ 'ਚ ਕਾਂਗਰਸੀ ਵਿਧਾਇਕ ਗ੍ਰਨੇਡ ਲੈ ਕੇ ਪਹੁੰਚ ਗਿਆ- ਇਕ ਖ਼ਬਰ
ਅਸਾਂ ਜੇਠ ਨੂੰ ਲੱਸੀ ਨਹੀਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ (ਸ੍ਰੀ ਸਾਹਿਬ ਨਹੀਂ ਅੰਦਰ ਜਾਣ ਦੇਣੀ)

ਭਗੌੜੇ ਆਰਥਿਕ ਅਪਰਾਧੀਆਂ ਦੀ ਜਾਇਦਾਦ ਜ਼ਬਤ ਕਰਨ ਲਈ ਕਾਨੂੰਨ ਬਣੇਗਾ- ਜੇਤਲੀ
ਜੀ ਹਾਂ! ਅਸੀਂ ਬੁੱਲਡੌਗ ਲਿਆਵਾਂਗੇ ਪਰ ਉਹਦੇ ਦੰਦ ਪਹਿਲਾਂ ਹੀ ਕੱਢ ਦੇਵਾਂਗੇ।

ਪੰਜਾਬ ਦੀ ਵਾਗਡੋਰ ਹੱਥ ਆਵੇ ਤਾਂ ਹਰ ਹਲਕੇ 'ਚ ਭੇਜਾਂਗਾ ਨੋਟਾਂ ਦੇ ਟਰੱਕ- ਸੁਖਬੀਰ ਬਾਦਲ
ਰੁਕਨਦੀਨਾਂ ਜਦ ਮਾਰਨੀ ਗੱਪ ਹੋਵੇ, ਤੋਲ਼ਿਆਂ ਮਾਸ਼ਿਆਂ ਦੇ ਫਿਰ ਤੋਲ ਨਾ ਤੋਲੀਏ ਜੀ।

ਸ਼ੀ ਜਿਨਪਿੰਗ ਬਣੇ ਰਹਿਣਗੇ ਉਮਰ ਭਰ ਚੀਨ ਦੇ ਰਾਸ਼ਟਰਪਤੀ- ਇਕ ਖ਼ਬਰ
ਜੀਣੇ ਮੌੜ ਨੇ ਲੁੱਟੀਆਂ, ਪੀਂਘਾਂ ਲੌਂਗੋਵਾਲ ਦੀਆਂ।

ਸਾਕਾ ਨੀਲਾ ਤਾਰਾ 'ਚ ਬਰਤਾਨੀਆ ਦੀ ਭੂਮਿਕਾ ਵਾਲ਼ੀਆਂ ਫ਼ਾਈਲਾਂ ਜੰਨਤਕ ਹੋਣ- ਢੇਸੀ
ਪਹਾੜਾ ਸਿੰਘ ਸੀ ਯਾਰ ਫਿਰੰਗੀਆਂ ਦਾ, ਸਿੰਘਾਂ ਨਾਲ਼ ਸੀ ਉਸ ਦੀ ਗ਼ੈਰਸਾਲੀ।

47 ਸਾਲ ਚੱਲੇ ਪ੍ਰੇਮ ਤੋਂ ਬਾਅਦ 75 ਸਾਲਾ ਵਿਅਕਤੀ ਨੇ ਲਏ ਫੇਰੇ- ਇਕ ਖ਼ਬਰ
ਬਈ ਮੀਆਂ ਬੀਵੀ ਰਾਜ਼ੀ ਤਾਂ ਕੀ ਕਰੇਗਾ ਕਾਜ਼ੀ।