ਕੋਈ ਹੈਗਾ ਏ ਤਾਂ ਦੱਸੋ - ਨਿਰਮਲ ਸਿੰਘ ਕੰਧਾਲਵੀ

ਵਾਰ ਦਿਤਾ ਪਰਵਾਰ, ਕਹਾਇਆ ਪੁੱਤਰਾਂ ਦਾ ਦਾਨੀ
ਕੋਈ ਹੈਗਾ ਏ ਤਾਂ ਦੱਸੋ, ਗੁਰੂ ਦਸਮੇਸ਼ ਜੀ ਦਾ ਸਾਨੀ

ਦੁਖੀ ਆਏ  ਜਾਂ  ਦੁਆਰੇ,  ਗੁਰੂ  ਪਿਤਾ ਇਹ ਉਚਾਰੇ 
ਕੋਈ  ਹੋਵੇ  ਕੁਰਬਾਨ,  ਦੁਖ  ਇਹਨਾਂ  ਦੇ  ਨਿਵਾਰੇ
ਗੁਬਿੰਦ ਰਾਇ ਮੁਸਕਾਇਆ, ਉਹਨੇ ਇੰਜ ਫੁਰਮਾਇਆ
ਮੇਰੀ  ਕਰਿਉ  ਨਾ  ਚਿੰਤਾ,  ਜਾ  ਕੇ  ਦੇਵੋ ਕੁਰਬਾਨੀ
ਵਾਰ ਦਿੱਤਾ ਪਰਵਾਰ,  ਕਹਾਇਆ ਪੁੱਤਰਾਂ ਦਾ ਦਾਨੀ
ਕੋਈ ਹੈਗਾ ਏ ਤਾਂ ਦੱਸੋ,  ਗੁਰੂ ਦਸਮੇਸ਼ ਜੀ ਦਾ ਸਾਨੀ

ਮੱਲਾਂ  ਜੰਗਾਂ  ਵਿਚ  ਮਾਰੇ,  ਆਕੀ  ਰਣ  ‘ਚ ਸੰਘਾਰੇ
ਨਿੱਠ  ਰਚੇ  ਉਹ  ਸਾਹਿਤ, ਕਦੀ  ਕਵੀਆਂ  ਨੂੰ ਤਾਰੇ
ਜਿੱਦਾਂ  ਵਾਹੀ  ਉਹਨੇ  ਤੇਗ਼, ਤੇਵੇਂ ਵਾਹੀ ਉਹਨੇ ਕਾਨੀ
ਵਾਰ  ਦਿਤਾ  ਪਰਵਾਰ, ਕਹਾਇਆ  ਪੁੱਤਰਾਂ ਦਾ ਦਾਨੀ
ਕੋਈ  ਹੈਗਾ  ਏ  ਤਾਂ ਦੱਸੋ, ਗੁਰੂ ਦਸਮੇਸ਼ ਜੀ ਦਾ ਸਾਨੀ

ਹੱਥੀਂ  ਸਾਜ  ਕੇ  ਪਿਆਰੇ,  ਗੁਰ  ਚੇਲਾ  ਉਹ  ਕਹਾਵੇ
‘ਕੱਲਾ  ਲੱਖ ‘ਨਾ  ਲੜਾ ਕੇ,  ਬਾਜ਼  ਚਿੜੀ  ਤੋਂ ਤੁੜਾਵੇ
ਕਰਨਾ  ਜ਼ੁਲਮਾਂ  ਦਾ  ਨਾਸ, ਇਹੋ  ਦਿਲ  ਵਿਚ  ਠਾਣੀ
ਵਾਰ  ਦਿਤਾ  ਪਰਵਾਰ  ਕਹਾਇਆ ਪੁੱਤਰਾਂ  ਦਾ  ਦਾਨੀ
ਕੋਈ  ਹੈਗਾ  ਏ ਤਾਂ  ਦੱਸੋ, ਗੁਰੂ  ਦਸਮੇਸ਼ ਜੀ ਦਾ ਸਾਨੀ

ਦੋ  ਵਾਰੇ  ਵਿਚ  ਚਮਕੌਰ,  ਦੋ  ਵਾਰ  ਦਿਤੇ  ਸਰਹਿੰਦ
ਲੋਕੀਂ  ਪੁੱਛਣ  ਪਏ  ਸਾਰੇ, ਇਹ ਕੌਣ ਕੀਹਦੇ  ਫਰਜੰਦ
ਮਾਤ  ਗੁਜਰੀ  ਨੇ  ਵਾਰੀ,  ਠੰਢੇ  ਬੁਰਜ   ਜ਼ਿੰਦਗਾਨੀ
ਕੁੱਲ ਦੁਨੀਆਂ  ਇਹ ਆਖੇ,  ਇਹ  ਸ਼ਹੀਦੀਆਂ  ਲਾਸਾਨੀ
ਵਾਰ  ਦਿਤਾ  ਪਰਵਾਰ,  ਕਹਾਇਆ  ਪੁੱਤਰਾਂ  ਦਾ ਦਾਨੀ

ਕਦੀ  ਮਖ਼ਮਲੀ  ਸੇਜਾਂ,  ਕਦੀ  ਟਿੰਡ  ਦਾ  ਸਰ੍ਹਾਣਾ
ਪੈਰ  ਕੰਡਿਆਂ  ਪਰੁੰਨ੍ਹੇ,  ਮਿੱਠਾ  ਮੰਨਦਾ  ਏ  ਭਾਣਾ
ਹੱਥ  ਫੜੀ  ਸ਼ਮਸ਼ੀਰ,  ਅਤੇ  ਬੁੱਲ੍ਹਾਂ  ਉੱਤੇ  ਬਾਣੀ
ਵਾਰ ਦਿਤਾ ਪਰਵਾਰ, ਕਹਾਇਆ ਪੁੱਤਰਾਂ ਦਾ ਦਾਨੀ
ਕੋਈ ਹੈਗਾ ਏ ਤਾਂ ਦੱਸੋ, ਗੁਰੂ ਦਸਮੇਸ਼ ਜੀ ਦਾ ਸਾਨੀ

ਵਿਚ ਚਮਕੌਰ ਜੀਹਨੇ, ਅਜੀਤ ਜੁਝਾਰ ਨਾ ਸੰਭਾਲ਼ੇ
ਢਾਬ ਖਿਦਰਾਣੇ ਵਾਲੀ ਉੱਤੇ,  ਰੰਗ ਅਜਬ ਦਿਖਾਲੇ 
ਸਿਰ ਯੋਧਿਆਂ ਦੇ ਗੋਦੀ,  ਵਹਾਵੇ ਅੱਖਾਂ ਵਿਚੋਂ ਪਾਣੀ
ਵਾਰ ਦਿਤਾ ਪਰਵਾਰ, ਕਹਾਇਆ ਪੁੱਤਰਾਂ ਦਾ ਦਾਨੀ
ਕੋਈ ਹੈਗਾ ਏ ਤਾਂ ਦੱਸੋ, ਗੁਰੂ ਦਸਮੇਸ਼ ਜੀ ਦਾ ਸਾਨੀ

ਘਰ  ਮਿਹਰਾਂ ਦੇ  ਆ ਕੇ,  ਗਲ਼  ਵਿਛੜੇ ਉਹ ਲਾਵੇ
ਮੂੰਹ  ਮੰਗੀਆਂ  ਮੁਰਾਦਾਂ,  ਫਿਰ  ਮਹਾਂ  ਸਿੰਘ  ਪਾਵੇ
ਕਦੀ  ਦੇਖੀ  ਨਾ  ਸੁਣੀ ਸੀ,  ਐਸੀ ਜੱਗ ‘ਤੇ ਕਹਾਣੀ
ਵਾਰ ਦਿਤਾ ਪਰਵਾਰ,  ਕਹਾਇਆ ਪੁੱਤਰਾਂ ਦਾ ਦਾਨੀ
ਕੋਈ ਹੈਗਾ ਏ ਤਾਂ ਦੱਸੋ,  ਗੁਰੂ ਦਸਮੇਸ਼ ਜੀ ਦਾ ਸਾਨੀ
=============================