ਟੱਪੇ - ਮਹਿੰਦਰ ਸਿੰਘ ਮਾਨ

ਦਰਿਆ ਵਿੱਚ ਪਾਣੀ ਨਹੀਂ,
ਕਾਹਤੋਂ ਮਾਇਆ ਕੱਠੀ ਕਰਦਾ ਤੂੰ
ਇਹ ਤੇਰੇ ਨਾਲ ਤਾਂ ਜਾਣੀ ਨਹੀਂ।
ਦਾਣੇ ਭੱਠੀ ਵਾਲੀ ਭੁੰਨ ਰਹੀ,
ਉਸ ਨੂੰ ਛੇਤੀ ਭੁੱਲਦੀ ਨਹੀਂ
ਮਾੜੀ ਗੱਲ ਕਿਸੇ ਨੂੰ ਕਹੀ।
ਕੋਈ ਰਾਹ 'ਚ ਟੂਣਾ ਕਰ ਗਿਆ,
ਬੰਦੇ 'ਚ ਗੁਣ ਹੋਣੇ ਚਾਹੀਦੇ
ਰੰਗਾਂ 'ਚ ਕੁੱਝ ਨਹੀਂ ਪਿਆ।
ਟੱਬ ਵਿੱਚ ਪਾਣੀ ਏ,
ਕੋਈ ਕਿਸੇ ਦੀ ਗੱਲ ਨਾ ਸੁਣੇ
ਹਰ ਘਰ ਦੀ ਇਹੋ ਕਹਾਣੀ ਏ।
ਨਵੇਂ ਪੱਤੇ ਲੱਗ ਗਏ ਰੁੱਖਾਂ ਨੂੰ,
ਕਦੇ ਸਮਝੇ ਨਾ ਦੁੱਖ ਆਪਣੇ
ਅਮੀਰ ,ਗਰੀਬ ਦੇ ਦੁੱਖਾਂ ਨੂੰ।
ਸਾਧੂ ਗੇਟ ਦੇ ਬਾਹਰ ਖੜ੍ਹਾ,
ਹਾਕਮ ਬੜਾ ਖੁਸ਼ ਹੋਵੇ
ਲੋਕਾਂ ਨੂੰ ਆਪਸ 'ਚ ਲੜਾ।
ਸਾਧੂ ਦੇ ਗਲ਼ 'ਚ ਮਾਲਾ ਏ,
ਸੰਭਲ ਜਾ ਹੁਣ ਵੀ ਬੰਦਿਆ
ਧਰਤੀ ਹੇਠਲਾ ਪਾਣੀ ਮੁੱਕਣ ਵਾਲਾ ਏ।
ਸਾਡੇ ਖੇਤਾਂ ਵਿੱਚ ਡੇਕਾਂ ਨੇ,
ਇੱਕ, ਦੋ ਬੱਚਿਆਂ ਪਿੱਛੋਂ
ਪੰਜਾਬੀਆਂ ਨੇ ਲਾਈਆਂ ਬਰੇਕਾਂ ਨੇ।

ਮਹਿੰਦਰ ਸਿੰਘ ਮਾਨ
ਕੈਨਾਲ ਰੋਡ
ਸਾਮ੍ਹਣੇ ਅੰਗਦ ਸਿੰਘ ਐੱਮ ਐੱਲ ਏ ਹਾਊਸ
ਨਵਾਂ ਸ਼ਹਿਰ-144514
ਫੋਨ  9915803554