26.01.2026

ਅਮਰੀਕਾ ਨੇ ਵਿਸ਼ਵ ਸਿਹਤ ਸੰਗਠਨ ਨਾਲੋਂ ਤੋੜਿਆ ਨਾਤਾ- ਇਕ ਖ਼ਬਰ

ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਟਰੰਪ ਨੇ ਮੋਦੀ ਨੂੰ ਗਾਜ਼ਾ ਲਈ ‘ਬੋਰਡ ਆਫ਼ ਪੀਸ’ ਵਿਚ ਸ਼ਾਮਲ ਹੋਣ ਲਈ ਦਿਤਾ ਸੱਦਾ- ਇਕ ਖ਼ਬਰ

ਮਿੱਤਰਾ ਸੈਰ ਕਰਾਵਾਂ, ਚੜ੍ਹ ਮੇਰੇ ਬੋਤੇ ‘ਤੇ।

ਗਰੀਨਲੈਂਡ ਉੱਤੇ ਅਮਰੀਕਾ ਦਾ ਕੰਟਰੋਲ ਜ਼ਰੂਰੀ- ਟਰੰਪ

ਮੈਨੂੰ ਕੱਲੀ ਨੂੰ ਚੁਬਾਰਾ ਪਾ ਦੇ, ਰੋਹੀ ਵਾਲ਼ਾ ਜੰਡ ਵੱਢ ਕੇ।

ਪੰਜਾਬ ਕਾਂਗਰਸ ਦੀ ਪ੍ਰਧਾਨਗੀ ‘ਚ ਕੋਈ ਬਦਲਾਅ ਨਹੀਂ ਹੋਵੇਗਾ- ਕਾਂਗਰਸ ਹਾਈ ਕਮਾਨ

ਜਿਊਣਾ ਮੌੜ ਵੱਢਿਆ ਨਾ ਜਾਵੇ, ਛਵ੍ਹੀਆਂ ਦੇ ਘੁੰਡ ਮੁੜ ਗਏ।

ਫ਼ਰਾਂਸ ਉੱਪਰ 200 ਫ਼ੀਸਦੀ ਟੈਰਿਫ਼ ਲਗਾਵਾਂਗਾ- ਟਰੰਪ

ਕਾਹਨੂੰ ਮਾਰਦੈਂ ਪਤਲਿਆ ਡਾਕੇ, ਔਖੀ ਹੋ ਜੂ ਕੈਦ ਕੱਟਣੀ।

ਅਰਾਵਲੀ ਵਿਚ ਰੋਕ ਦੇ ਬਾਵਜੂਦ ਗ਼ੈਰਕਾਨੂੰਨੀ ਖਣਨ ਜਾਰੀ- ਸੁਪਰੀਮ ਕੋਰਟ

ਅਸਾਂ ਨਿੱਤ ਦੇ ਸ਼ਰਾਬੀ ਰਹਿਣਾ, ਅੱਧ ਵਿਚ ਕੰਧ ਕੱਢ ਲੈ।

ਕੈਨੇਡੀਅਨ ਪ੍ਰਧਾਨ ਮੰਤਰੀ ਦੇ ਬਿਆਨਾਂ ‘ਤੇ ਭੜਕੇ ਟਰੰਪ, ‘ਬੋਰਡ ਆਫ਼ ਪੀਸ’ ਦਾ ਸੱਦਾ ਵਾਪਸ ਲਿਆ- ਇਕ ਖ਼ਬਰ

ਜਦੋਂ ਸੱਚੀਆਂ ਸੁਣਾਈਆਂ ਨੀਂ, ਬੜਾ ਦੁਖ ਲੱਗਿਆ, ਬੜਾ ਦੁਖ ਲੱਗਿਆ।

ਦਲਜੀਤ ਚੀਮਾ 2 ਦਸੰਬਰ 2024 ਦੇ ਫ਼ੈਸਲਿਆਂ ਨੂੰ ਗ਼ਲਤ ਦੱਸਣ ਦੀ ਹਿਮਾਕਤ ਕਰ ਰਿਹੈ- ਗੁਰਜੀਤ ਸਿੰਘ ਤਲਵੰਡੀ, ਤਜਿੰਦਰ ਸਿੰਘ ਪੰਨੂ

ਗੁਰੂ ਜਿਨ੍ਹਾਂ ਦੇ ਟੱਪਣੇ, ਚੇਲੇ ਜਾਣ ਛੜੱਪ।

ਡੈਨਮਾਰਕ ਦੇ ਲੋਕ ਅਮਰੀਕੀ ਸਾਮਾਨ ਦਾ ਕਰ ਰਹੇ ਹਨ ਬਾਈਕਾਟ- ਇਕ ਖ਼ਬਰ

ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਭਾਜਪਾ ਦੀ ਸੀਨੀਅਰ ਲੀਡਰਸ਼ਿੱਪ ਸ੍ਰੀ ਨਾਭ ਕੰਵਲ ਮਜਾਰਾ ਸਾਹਿਬ ਵਿਖੇ ਮੱਥਾ ਟੇਕਣ ਜਾਵੇਗੀ- ਇਕ ਖ਼ਬਰ

ਮੱਥਾ ਟੇਕਣ ਨਹੀਂ, ਬਲ਼ਦੀ ‘ਤੇ ਤੇਲ ਪਾਉਣ ਜਾਵੇਗੀ।

ਟਰੰਪ ਦੀ ਟੈਰਿਫ਼ ਧਮਕੀ ‘ਤੇ ਬਰਤਾਨੀਆ ਦਾ ਸਖ਼ਤ ਵਿਰੋਧ- ਇਕ ਖ਼ਬਰ

ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ। 

ਮੈਂ ਕਦੇ ਵੀ ਹਾਈ ਕਮਾਨ ਦੇ ਫ਼ੈਸਲਿਆਂ ਵਿਰੁੱਧ ਨਹੀਂ ਗਿਆ- ਸ਼ਸ਼ੀ ਥਰੂਰ

ਕਾਹਨੂੰ ਮਾਰਦੈਂ ਚੰਦਰਿਆ ਛਮਕਾਂ, ਮੈਂ ਕੱਚ ਦੇ ਗਿਲਾਸ ਵਰਗੀ।

ਸੱਤਾ ਦਾ ਕੇਂਦਰੀਕਰਨ ਕਰਨਾ ਚਾਹੁੰਦੀ ਹੈ ਭਾਜਪਾ- ਰਾਹੁਲ ਗਾਂਧੀ

ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਕੀ ਪਾਠਾਂ ਦੀਆਂ ਲੜੀਆਂ ਗੁਰਮਤਿ ਅਨੁਸਾਰ ਠੀਕ ਹਨ?- ਗਲੋਬਲ ਸਿੱਖ ਕੌਂਸਲ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਹਰਿਆਣਾ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਿਚ ਦਾਦੂਵਾਲ ਅਤੇ ਝੀਂਡਾ ਵਿਚ ਵਿਵਾਦ ਛਿੜਿਆ- ਇਕ ਖ਼ਬਰ

ਕੁੰਢੀਆਂ ਦੇ ਸਿੰਙ ਫ਼ਸ ਗਏ, ਕੋਈ ਨਿੱਤਰੂ ਵੜੇਂਵੇਂ ਖਾਣੀ।

======================================================================================

20.01.2026

ਪਿੰਡ ਪੱਧਰ ਤੋਂ ਸੰਵਿਧਾਨਕ ਜਾਗਰੂਕਤਾ ਮੁਹਿੰਮ ਸ਼ੁਰੂ ਕਰੇਗੀ ਪੰਜਾਬ ਕਾਂਗਰਸ- ਇਕ ਖ਼ਬਰ

ਕਾਂਗਰਸ ਪ੍ਰਧਾਨ ਲੋਕਾਂ ਨੂੰ ਪਹਾੜੇ ਵੀ ਯਾਦ ਕਰਵਾਉਣਗੇ।  (ਬਾਰਾਂ ਪਾਂਜੇ ਅਠਤਾਲੀ)

ਹਰਿਆਣਾ ਪੰਜਾਬ ਦੇ ਨਾਲ ਖੜ੍ਹਾ- ਨਾਇਬ ਸਿੰਘ ਸੈਣੀ

ਤਾਂ ਹੀ ਨਿੱਤ ਪੰਜਾਬ ਦੇ ਰਾਹ ‘ਚ ਕੰਡੇ ਬੀਜਦੇ ਹੋ, ਤੁਸੀਂ ਤੇ ਤੁਹਾਡੀ ਕੇਂਦਰ ਸਰਕਾਰ!

ਚਰਨਜੀਤ ਸਿੰਘ ਬਰਾੜ ਨੇ ਪੁਨਰ ਸੁਰਜੀਤ ਅਕਾਲੀ ਦਲ ਤੋਂ ਦਿਤਾ ਅਸਤੀਫ਼ਾ- ਇਕ ਖ਼ਬਰ

ਕੋਹ ਤੁਰੀ ਨਾ ਅਖੇ ਬਾਬਾ ਤ੍ਰਿਹਾਈ।

ਅਕਾਲੀ ਦਲ ਦਿਨੋ ਦਿਨ ਨਿਘਾਰ ਵਲ- ਇਕ ਖ਼ਬਰ

ਕੀਤੀਆਂ ਲੱਧੀ ਦੀਆਂ ਪੇਸ਼ ਦੁੱਲੇ ਦੇ ਆਈਆਂ।

25 ਕਰੋੜ ਲੋਕ ਗ਼ਰੀਬੀ ਰੇਖਾ ਤੋਂ ਬਾਹਰ ਆਏ- ਮੋਦੀ

ਜਿਨ੍ਹਾਂ ਦੇ ਘਰ ਪੰਜ ਕਿੱਲੋ ਰਾਸ਼ਨ ਪਿਆ ਹੋਵੇ ਉਹ ਤਾਂ ਆਪੇ ਗ਼ਰੀਬੀ ਰੇਖਾ ਤੋਂ ਬਾਹਰ ਹੋ ਗਏ।

ਸਪੀਕਰ ਸੰਧਵਾਂ ਨੇ ਮਿਲਾਵਟਖੋਰੀ ਛੱਡਣ ਦੀ ਕੀਤੀ ਅਪੀਲ- ਇਕ ਖ਼ਬਰ

ਸੰਧਵਾਂ ਸਾਬ ਵਾਦੜੀਆਂ ਸਜਾਦੜੀਆਂ ਅਪੀਲਾਂ ਨਾਲ ਨਹੀਂ ਛੱਡਵਾਈਆਂ ਜਾਂਦੀਆਂ।  

ਗਰੀਨਲੈਂਡ ਨੂੰ ਅਮਰੀਕਾ ਦੇ ਹੱਥਾਂ ਵਿਚ ਰੱਖਣ ਤੋਂ ਘੱਟ ਕੁਝ ਵੀ ਮੰਨਜ਼ੂਰ ਨਹੀਂ- ਟਰੰਪ

ਇਕ ਰਾਂਝਣ ਮੈਨੂੰ ਲੋੜੀਦਾ, ਨੀਂ ਮਾਏ ਇਕ ਰਾਂਝਣ ਮੈਨੂੰ ਲੋੜੀਦਾ।

ਸਰਬਜੀਤ ਕੌਰ ਦੀ ਭਾਰਤ ਵਾਪਸੀ ਫਿਲਹਾਲ ਟਲ਼ੀ- ਇਕ ਖ਼ਬਰ

ਅਜੇ ਹਨੀਮੂਨ ਪੂਰਾ ਨਹੀ ਹੋਇਆ ਬਈ!

ਐਸ.ਆਈ.ਟੀਮਾਂ ਰਿਕਾਰਡ ਲੈਣ ਲਈ ਸ਼੍ਰੋਮਣੀ ਕਮੇਟੀ ਦੇ ਦਫ਼ਤਰਾਂ ‘ਚ ਪਹੁੰਚੀਆਂ- ਇਕ ਖ਼ਬਰ

ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ?

ਹਰਿਆਣਾ ਪੰਜਾਬ ਦੇ ਨਾਲ ਖੜ੍ਹਾ- ਨਾਇਬ ਸਿੰਘ ਸੈਣੀ

ਤਾਂ ਹੀ ਨਿੱਤ ਪੰਜਾਬ ਦੇ ਰਾਹ ‘ਚ ਕੰਡੇ ਬੀਜਦੇ ਹੋ, ਤੁਸੀਂ ਤੇ ਤੁਹਾਡੀ ਕੇਂਦਰ ਸਰਕਾਰ!

ਚਰਨਜੀਤ ਸਿੰਘ ਬਰਾੜ ਨੇ ਪੁਨਰ ਸੁਰਜੀਤ ਅਕਾਲੀ ਦਲ ਤੋਂ ਦਿਤਾ ਅਸਤੀਫ਼ਾ- ਇਕ ਖ਼ਬਰ

ਕੋਹ ਤੁਰੀ ਨਾ ਅਖੇ ਬਾਬਾ ਤ੍ਰਿਹਾਈ।

ਬਸਪਾ ਸਾਰੀਆਂ ਚੋਣਾਂ ਇਕੱਲਿਆਂ ਹੀ ਲੜੇਗੀ- ਮਾਇਆਵਤੀ

ਮੇਰੀ ਕੱਤਣੀ ‘ਚ ਪੈਣ ਫ਼ਰਾਟੇ, ਪੂਣੀਆਂ ਦੇ ਸੱਪ ਬਣ ਗਏ।

ਫ਼ਸਲ ਬੀਮਾ ਯੋਜਨਾ ਰਾਹੀਂ ਕਿਸਾਨਾਂ ਦੀ ਸੈਂਕੜੇ ਕਰੋੜ ਰੁਪਇਆਂ ਦੀ ਲੁੱਟ ਕੀਤੀ ਜਾ ਰਹੀ ਹੈ- ਭੂਪਿੰਦਰ ਸਿੰਘ ਹੁੱਡਾ

ਸਾਰੇ ਜੱਟ ਕਰਜ਼ਾਈ ਕੀਤੇ, ਬਾਣੀਆਂ ਨੇ ਅੱਤ ਚੁੱਕ ਲਈ।

ਟਰੰਪ ਵਲੋਂ ਯੂਰਪੀ ਦੇਸ਼ਾਂ ਉੱਪਰ ਨਵੇਂ ਟੈਰਿਫ਼ ਦਾ ਸਖ਼ਤ ਵਿਰੋਧ ਸ਼ੁਰੂ- ਇਕ ਖ਼ਬਰ

ਗੱਲ ਸੋਚ ਕੇ ਕਰੀਂ ਠਾਣੇਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।

ਧਾਰਮਿਕ ਜੋੜ ਮੇਲਿਆਂ ਵੇਲੇ ਸਿਆਸੀ ਕਾਨਫ਼ਰੰਸਾਂ ਬਾਰੇ ਸਪਸ਼ਟੀਕਰਨ ਦੇਣ ਜਥੇਦਾਰ- ਰਾਜਾ ਵੜਿੰਗ

ਜੇ ਤੁਹਾਡੀ ਕਾਨਫ਼ਰੰਸ ਵੀ ਲਗ ਜਾਂਦੀ ਫੇਰ ਕੀਹਨੇ ਸਪਸ਼ਟੀਕਰਨ ਮੰਗਣਾ ਸੀ? ਹੈ ਨਾ ਰਾਜਾ ਸਾਬ!

=============================================================================

15.01.2026

ਮਨਰੇਗਾ ਕਾਨੂੰਨ ‘ਚ ਬਦਲਾਅ ਵਿਰੁੱਧ ਪੰਜਾਬ ਵਿਚ ਖੇਤ ਮਜ਼ਦੂਰ ਸੜਕਾਂ ‘ਤੇ ਉਤਰੇ- ਇਕ ਖ਼ਬਰ

ਉੱਚਾ ਹੋ ਗਿਆ ਅੰਬਰ ਦਾ ਤਾਰਾ, ਜਲ ਵਿਚ ਰੋਣ ਮੱਛੀਆਂ।

ਸੌਦਾ ਸਾਧ ਨੂੰ ਪੈਰੋਲ ਦੇ ਕੇ ਸਿੱਖਾਂ ਦੇ ਜ਼ਖ਼ਮਾਂ ਤੇ ਲੂਣ ਛਿੜਕਿਆ- ਗਿਆਨੀ ਰਾਮ ਸਿੰਘ

ਸੁੱਤੀ ਪਈ ਦੀ ਜ਼ੰਜੀਰੀ ਛਣਕੇ, ਗੱਭਰੂ ਦਾ ਮਚੇ ਕਾਲਜਾ।

ਟਰੰਪ ਨੇ ਖੁਦ ਨੂੰ ਐਲਾਨਿਆ ਵੈਂਨਜ਼ੁਏਲਾ ਦਾ ਕਾਰਜਕਾਰੀ ਰਾਸ਼ਟਰਪਤੀ- ਇਕ ਖ਼ਬਰ

ਜੱਗੇ ਜੱਟ ਦੇ ਕਬੂਤਰ ਚੀਨੇ, ਨਦੀਉਂ ਪਾਰ ਚੁਗਦੇ।

328 ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਅਕਾਲ ਤਖ਼ਤ ਵਲੋਂ ਜਾਂਚ ਵਿਚ ਸਹਿਯੋਗ ਕਰਨ ਦੇ ਸ਼੍ਰੋਮਣੀ ਕਮੇਟੀ ਨੂੰ ਆਦੇਸ਼- ਇਕ ਖ਼ਬਰ

ਗੋਰੇ ਰੰਗ ਨੇ ਸਦਾ ਨਹੀਂ ਰਹਿਣਾ, ਭਰ ਭਰ ਵੰਡ ਮੁੱਠੀਆਂ।

ਬਠਿੰਡਾ ਦੀ ਅਦਾਲਤ ਨੇ ਕੰਗਨਾ ਦੀ ਹਾਜ਼ਰੀ ਮੁਆਫ਼ੀ ਅਰਜ਼ੀ ਕੀਤੀ ਰੱਦ- ਇਕ ਖ਼ਬਰ

ਜੁੱਤੀ ਡਿਗ ਪਈ ਸਿਤਾਰਿਆਂ ਵਾਲੀ, ਨਿੱਜ ਤੇਰੇ ਬੋਤੇ ‘ਤੇ ਚੜ੍ਹੀ।

ਮੋਦੀ ਨੇ ਫ਼ੋਨ ਨਹੀਂ ਕੀਤਾ, ਇਸ ਲਈ ਰੁਕਿਆ ਵਪਾਰਕ ਸਮਝੌਤਾ- ਅਮਰੀਕਾ

ਲੱਡੂ ਮੁੱਕ ਗਏ ਯਾਰਾਨੇ ਟੁੱਟ ਗਏ, ਕੱਚੀ ਯਾਰੀ ਲੱਡੂਆਂ ਦੀ।

ਕਾਂਗਰਸ ਮਨਰੇਗਾ ਮਜ਼ਦੂਰਾਂ ਦੇ ਹੱਕਾਂ ਦੀ ਲੜਾਈ ਲੜੇਗੀ- ਬਘੇਲ, ਵੜਿੰਗ

 ਕੰਨੀ ਨੱਤੀਆਂ ਸੰਧੂਰੀ ਸਿਰ ਸਾਫ਼ਾ, ਉਹ ਮੇਰਾ ਵੀਰ ਕੁੜੀਓ।

ਫਰੀਦਾਬਾਦ ‘ਚ ਐਂਬੂਲੈਂਸ ਅੰਦਰ ਔਰਤ ਨਾਲ ਸਮੂਹਿਕ ਬਲਾਤਕਾਰ- ਪੁਲਿਸ

ਸੁਣਦੇ ਸਾਂ ਕਿ ਐਂਬੂਲੈਂਸਾਂ ਰਾਹੀਂ ਸਮਗਲਿੰਗ ਹੁੰਦੀ ਐ, ਹੁਣ ਬਲਾਤਕਾਰ ਵੀ ਤੌਬਾ, ਤੌਬਾ.....

‘ਜੀ ਰਾਮ ਜੀ’ ਕਾਨੂੰਨ ਵਿਚ ਕੋਈ ਕਮੀ ਨਹੀਂ- ਜਾਖੜ

ਸਉਣ ਦੇ ਅੰਨ੍ਹਿਆਂ ਨੂੰ ਸਭ ਕੁਝ ਹਰਾ ਹਰਾ ਹੀ ਦਿਸਦਾ ਹੈ।

ਬਲਾਤਕਾਰਾਂ ਦੇ ਦੋਸ਼ੀ ਸਾਧ ਨੂੰ ਹਰੇਕ ਤੀਜੇ ਦਿਨ ਪੈਰੋਲ ਕਿਵੇਂ ਮਿਲ ਰਹੀ ਹੈ- ਜਥੇਦਾਰ ਪੰਜੋਲੀ

ਸੱਦੀ ਹੋਈ ਮਿੱਤਰਾਂ ਦੀ, ਨੀ ਮੈਂ ਪੈਰ ਜੁੱਤੀ ਨਾ ਪਾਵਾਂ।

ਸੁਖਬੀਰ ਬਾਦਲ ਸਿਰਫ਼ ਗਿੱਦੜਬਾਹਾ ਤੋਂ ਹੀ ਮੇਰੇ ਨਾਲ ਚੋਣ ਲੜ ਕੇ ਦੇਖ ਲਵੇ-ਰਾਜਾ ਵੜਿੰਗ

ਜੇ ਤੂੰ ਚੁੰਘੀਆਂ ਬੂਰੀਆਂ ਤਾਂ ਵਿਚ ਮੈਦਾਨੇ ਆ। 

ਗਰੀਨਲੈਂਡ ਲੈਣ ਲਈ ਕੁਝ ਵੀ ਕਰਾਂਗੇ- ਟਰੰਪ

ਲਾਈ ਲੱਗ ਨਾ ਹੋਵੇ ਘਰ ਵਾਲ਼ਾ, ਚੰਦਰਾ ਗੁਆਂਢ ਬੁਰਾ।

ਹਾਲੇ ਪਾਕਿ ਸਰਕਾਰ ਦੀ ਦੇਖ ਰੇਖ ਵਿਚ ਹੀ ਰਹੇਗੀ ਸਰਬਜੀਤ ਕੌਰ- ਇਕ ਖ਼ਬਰ

ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਪੁਲਿਸ ਪ੍ਰਸ਼ਾਸਨ ਨੂੰ ਨਾ ਸਹਿਯੋਗ ਅਤੇ ਨਾ ਹੀ ਕੋਈ ਰਿਕਾਰਡ ਦਿਤਾ ਜਾਵੇਗਾ- ਸ਼੍ਰੋਮਣੀ ਕਮੇਟੀ

ਮੇਰੀ ਚੱਪਣੀ ਵਗਾਹ ਕੇ ਮਾਰੀ, ਛੜਿਆਂ ਦੇ ਗਈ ਅੱਗ ਨੂੰ।

ਮੋਦੀ ਜੀ ਆਪਣੇ ਗ੍ਰਹਿ ਮੰਤਰੀ ਨੂੰ ਕਾਬੂ ਵਿਚ ਰੱਖੋ- ਮਮਤਾ ਬੈਨਰਜੀ

ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

----------------------------------------------------------------------------------------------------------------------------------

06.01.2026

ਪੰਜਾਬ ਵਿਧਾਨ ਸਭਾ ਦਾ ਵਿਸ਼ੇਸ਼ ਸੈਸ਼ਨ ਰਾਜ ਅਤੇ ਕੇਂਦਰ ‘ਚ ਖਟਾਸ ਪੈਦਾ ਕਰਨ ਦੀ ਕੋਸ਼ਿਸ਼- ਜਾਖੜ

ਜਾਖੜ ਸਾਬ, ਅੱਗੇ ਕਿਹੜਾ ਕੇਂਦਰ ਤੇ ਰਾਜ ਰਲ਼ ਕੇ ਕਿੱਕਲੀ ਪਾਉਂਦੇ ਐ।

ਸਿੱਖ ਚਿੰਤਕ ਪ੍ਰੋ. ਖਿਆਲਾ ਨੇ ਅਕਾਲ ਤਖ਼ਤ ਨੂੰ ਖ਼ਤ ਲਿਖਿਆ ਕਿ ਕੋਹਲੀ ਮਾਮਲੇ ‘ਚ ਸੁਖਬੀਰ ਬਾਦਲ ਦੀ ਜਵਾਬਤਲਬੀ ਕੀਤੀ ਜਾਵੇ- ਇਕ ਖ਼ਬਰ

ਸੋ ਪ੍ਰੋ. ਖਿਆਲਾ ਸਾਬ ਤੁਹਾਡੇ ਮੁਤਾਬਕ ਚੋਰ ਨੂੰ ਮਾਰੋ ਤੇ ਚੋਰ ਦੀ ਮਾਂ ਨੂੰ ਵੀ ਮਾਰੋ।

ਮਨਰੇਗਾ ‘ਚ ਬਦਲਾਅ ਵਿਰੁੱਧ ਪੰਜਾਬ ਵਿਧਾਨ ਸਭਾ ‘ਚ ਪਾਸ ਹੋਇਆ ਮਤਾ- ਇਕ ਖ਼ਬਰ

ਸਾਹਿਬਾਂ ਪੜ੍ਹਦੀ ਪੱਟੀਆ ਤੇ ਮਿਰਜ਼ਾ ਪੜ੍ਹੇ ਕੁਰਾਨ।

ਉਧਾਰ ਦਿਤੇ ਪੈਸੇ ਮੰਗੇ ਤਾਂ ਚਲਾ ਦਿਤੀ ਗੋਲ਼ੀ- ਇਕ ਖ਼ਬਰ

ਦੀਨ ਧਰਮ ਦੀ ਸ਼ਰਮ ਨਾ ਕੋਈ, ਦਗ਼ੇਬਾਜ਼ ਹੋ ਗਈ ਦੁਨੀਆਂ।

ਅਮਰੀਕਾ ਨੇ ਵੈਨੇਜ਼ੁਏਲਾ ਉੱਤੇ ਕੀਤਾ ਹਮਲਾ- ਇਕ ਖ਼ਬਰ

ਬੂਹੇ ਆਣ ਲੱਥੀ ਜੰਝ ਖੇੜਿਆਂ ਦੀ, ਅੰਦਰ ਹੀਰ ਦੀਆਂ ਹੋਣ ਤਿਆਰੀਆਂ ਨੀਂ।

ਪੰਜਾਬ ਅੰਦਰ ‘ਜੀ ਰਾਮ ਜੀ’ ਯੋਜਨਾ ਦੇ ਸਮਰਥਨ ‘ਚ ਮੁਹਿੰਮ ਵਿੱਢਾਂਗੇ- ਜਾਖੜ

ਕੁਰਸੀ ਕਾਇਮ ਰੱਖਣ ਲਈ ਤੁਹਾਨੂੰ ਕੁਝ ਕਰਨਾ ਹੀ ਪੈਣਾ ਜਾਖੜ ਸਾਬ।

ਸਿੱਖ ਸੰਸਥਾ ਦੇ ਪ੍ਰਬੰਧਾਂ ‘ਚ ਸਰਕਾਰ ਨੂੰ ਦਖ਼ਲ ਦੇਣ ਦੀ ਇਜਾਜ਼ਤ ਨਹੀਂ ਦਿਆਂਗੇ- ਧਾਮੀ

ਲੱਤ ਮਾਰੂੰਗੀ ਪੰਜੇਬਾਂ ਵਾਲੀ, ਪਰ੍ਹਾਂ ਹੋ ਜਾ ਚੱਟੂ ਵੱਟਿਆ।

ਸਾਹਿਬਜ਼ਾਦਿਆਂ ਦੀ ਸ਼ਹੀਦੀ ਬਾਰੇ ਮੁਗ਼ਲ ਸ਼ਾਸਕਾਂ ਦੇ ਜ਼ੁਲਮਾਂ ਦਾ ਸੱਚ ਸੁਣ ਕੇ ਯੂ.ਪੀ. ‘ਚ ਮੁਸਲਮਾਨ ਨੌਜਵਾਨਾਂ ਨੇ ਸਿੱਖ ਨੌਜਵਾਨ ਨੂੰ ਕੁੱਟਿਆ- ਇਕ ਖ਼ਬਰ

ਜਦੋਂ ਸੱਚੀਆਂ ਸੁਣਾਈਆਂ ਨੀਂ, ਬੜਾ ਦੁੱਖ ਲੱਗਿਆ ਬੜਾ ਦੁਖ ਲੱਗਿਆ।

ਬਾਦਲ ਪਰਵਾਰ ਦੇ ਆਗਿਆਕਾਰੀ ਬਣੋਗੇ ਤਾਂ ਮੰਜੀ ਸਾਹਿਬ ਤੋਂ ਕਥਾ ਕਰ ਸਕੋਗੇ- ਗਿ.ਅਮਰੀਕ ਸਿੰਘ ਚੰਡੀਗੜ੍ਹ

ਜੇ ਤੂੰ ਖਾਣੀਆਂ ਸੇਵੀਆਂ ਤਾਂ ਮੁੱਛਾਂ ਮੁਨਾ ਕੇ ਆ।

ਆਮ ਆਦਮੀ ਪਾਰਟੀ ਨੇ ਔਰਤਾਂ ਨਾਲ ਕੀਤਾ ਵਾਅਦਾ ਨਹੀਂ ਨਿਭਾਇਆ- ਕਾਂਗਰਸ

ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਮੋਦੀ ਜਲਦ ਦਿਖਾਉਣਗੇ ਕੋਲਕਾਤਾ-ਗੁਹਾਟੀ ਵੰਦੇ ਭਾਰਤ ਸਲੀਪਰ ਟਰੇਨ ਨੂੰ ਹਰੀ ਝੰਡੀ- ਖ਼ਬਰ

ਮੋਦੀ ਸਾਹਿਬ ਕਦੇ ਵਿਚਾਰੇ ਰੇਲ ਮੰਤਰੀ ਨੂੰ ਵੀ ਇਹ ਝੰਡੀ ਫੜ ਕੇ ਦੇਖ ਲੈਣ ਦਿਉ।

ਪੜ੍ਹੇ-ਲਿਖੇ ਲੋਕਾਂ ਦਾ ਦੇਸ਼ ਵਿਰੋਧੀ ਗਤੀ ਵਿਧੀਆਂ ‘ਚ ਸ਼ਾਮਲ ਹੋਣਾ ਚਿੰਤਾਜਨਕ- ਰਾਜਨਾਥ ਸਿੰਘ

ਰਾਜਨਾਥ ਸਿੰਘ ਜੀ ਇਸ ਗੱਲ ਦੀ ਚਿੰਤਾ ਵੀ ਕਰੋ ਕਿ ਪੜ੍ਹੇ ਲਿਖੇ ਲੋਕ ਇਹੋ ਜਿਹੀਆਂ ਗਤੀਵਿਧੀਆਂ ‘ਚ ਕਿਉਂ ਪੈਂਦੇ ਆ।

ਕੋਹਲੀ ਸੁਖਬੀਰ ਦਾ ਚਹੇਤਾ ਹੋਣ ਕਾਰਨ ਹੀ ਸ਼੍ਰੋਮਣੀ ਕਮੇਟੀ ਕਾਨੂੰਨੀ ਕਾਰਵਾਈ ਕਰਨ ਤੋਂ ਭੱਜੀ ਸੀ- ਗਿ.ਹਰਪ੍ਰੀਤ ਸਿੰਘ

ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ।                                                                                

ਭਾਜਪਾ ਨੇ ਮਮਤਾ ਬੈਨਰਜੀ ਉੱਤੇ ਅਮਿਤ ਸ਼ਾਹ ਨੂੰ ਧਮਕੀਆਂ ਦੇਣ ਦਾ ਦੋਸ਼ ਲਗਾਇਆ- ਇਕ ਖ਼ਬਰ

ਕਾਹਨੂੰ ਦੇਨੀਂ ਏਂ ਕੁਪੱਤੀਏ ਗਾਲ਼੍ਹਾਂ, ਛੜੇ ਦਾ ਕਿਹੜਾ ਪੁੱਤ ਮਰ ਜੂ।

ਵਿਧਾਨ ਸਭਾ ਦੇ ਸੈਸ਼ਨ ‘ਚੋਂ ਅਕਾਲੀ ਦਲ ਦੀ ਗ਼ੈਰਹਾਜ਼ਰੀ ‘ਜੀ ਰਾਮ ਜੀ’ ਦੇ ਸਮਰਥਨ ਦਾ ਸੰਕੇਤ- ਇਕ ਖ਼ਬਰ

ਵੇ ਮੈਂ ਮਨ ਮਿਲਦੇ ਦੀ ਹੋਈ, ਤੂੰ ਕਿਹੜਾ ਚੰਦ ਮੁੰਡਿਆ।

=======================================================================================

30.12.2025

ਨਵਜੋਤ ਕੌਰ ਸਿੱਧੂ ਕਾਰਨ ਹੁਣ ਕਾਂਗਰਸ ਤੋਂ ਬਾਅਦ ਹੁਣ ਭਾਜਪਾ ਵਿਚ ਵੀ ਘਮਸਾਣ- ਇਕ ਖ਼ਬਰ

ਲੱਡੂ ਖਾ ਕੇ ਚੁਬਾਰਿਉਂ ਨਿਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਦਿੱਲੀ ‘ਚ ਹੁਣ ਅਧਿਆਪਕ ਕਰਨਗੇ ਆਵਾਰਾ ਕੁੱਤਿਆਂ ਦੀ ਗਿਣਤੀ- ਇਕ ਖ਼ਬਰ

ਨਾਲ ਲਗਦਿਆਂ ਹੀ ਖੱਸੀ ਵੀ ਕਰਵਾ ਲਉ, ਇਕ ਪੰਥ ਦੋ ਕਾਜ।

ਦਸ ਲੱਖ ਦੀ ਗਰਾਂਟ ਖੁਰਦ –ਬੁਰਦ ਕਰਨ ਵਾਲੇ ਪਾਸਟਰਾਂ ਦੀ ਸ਼ਿਕਾਇਤ ਪਹੁੰਚੀ ਡੀ.ਸੀ.ਪਾਸ- ਇਕ ਖ਼ਬਰ

ਭੁੱਖ ਨੰਗ ਦੀ ਕੋਈ ਪ੍ਰਵਾਹ ਨਾਹੀਂ, ਹੁਕਮ ਹੋਵੇ ਤਾਂ ਦੇਗ਼ਾਂ ਨੂੰ ਚੱਟੀਏ ਜੀ।

328 ਸਰੂਪਾਂ ਦੇ ਮਾਮਲੇ ‘ਚ ਸ਼੍ਰੋਮਣੀ ਕਮੇਟੀ ਨੇ ਆਪ ਹੀ ਕਾਨੂੰਨੀ ਕਾਰਵਾਈ ਕਰਨ ਲਈ ਕਿਹਾ ਸੀ- ਭਗਵੰਤ ਮਾਨ

ਹੁਣ ਤੂੰ ਮੁਕਰ ਗਈ, ਜੇਠ ਬੋਲੀਆਂ ਮਾਰੇ।

ਤਖ਼ਤਾਂ ਦੇ ਜਥੇਦਾਰ ਸਿੱਖ ਸਿਧਾਂਤਾਂ ਦੇ ਅਨੁਸਾਰ ਹੀ 328 ਸਰੂਪਾਂ ਦੇ ਮਾਮਲੇ ‘ਚ ਫ਼ੈਸਲਾ ਸੁਣਾਉਣ- ਨਿਆਮੀਵਾਲਾ

ਝੋਟਿਆਂ ਵਾਲੇ ਘਰੋਂ ਲੱਸੀ ਭਾਲ਼ਦੇ ਹੋ ਨਿਆਮੀਵਾਲਾ ਜੀ।

ਇਟਲੀ ‘ਚ ਭਾਰਤੀ ਵਿਅਕਤੀ ਕੋਲੋਂ 54 ਕਿੱਲੋ ਡੋਡੇ, ਅਫ਼ੀਮ ਅਤੇ ਨਕਦੀ ਫੜੀ ਗਈ- ਇਕ ਖ਼ਬਰ

ਵਾਦੜੀਆਂ ਸਜਾਦੜੀਆਂ ਨਿਭਣ ਸਿਰਾਂ ਦੇ ਨਾਲ।

ਪਰਮਜੀਤ ਸਿੰਘ ਸਰਨਾ ਨੇ ਵੀਰ ਬਾਲ ਦਿਵਸ ਨੂੰ ਬਦਲਣ ਦੀ ਮੰਗ ਦਾ ਕੀਤਾ ਸਮਰਥਨ- ਇਕ ਖ਼ਬਰ

ਦੇਖ ਲਉ ਸਰਨਾ ਸਾਹਿਬ ਆਪਣੇ ਮਾਲਕਾਂ ਦੀ ਕੀਤੀ ਦੇ ਉਲਟ ਜਾ ਰਹੇ ਹੋ!

ਅਮਰੀਕਾ ਨੇ ਫਿਰ ਗ੍ਰੀਨਲੈਂਡ ਨੂੰ ਹਥਿਆਉਣ ਦੀ ਆਪਣੀ ਗੱਲ ਦੁਹਰਾਈ- ਇਕ ਖ਼ਬਰ

ਕੋਈ ਟਿਕ ਕੇ ਬੈਠ ਨਾ ਜਾਵੇ, ਅਸੀਂ ਟਿੰਡ ਵਿਚ ਕਾਨਾ ਪਾਈ ਰੱਖਣਾ।

ਚੌਦਾਂ ਸਾਲ ਬੀਤ ਜਾਣ ਬਾਅਦ ਵੀ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਦੀ ਕੋਈ ਸੰਭਾਵਨਾ ਨਜ਼ਰ ਨਹੀਂ ਆਉਂਦੀ- ਇਕ ਖ਼ਬਰ

ਕੁੱਤੀ ਚੋਰਾਂ ਨਾਲ਼ ਰਲ਼ੀ ਹੋਈ ਐ ਭਾਈ।

ਅਮਰੀਕਾ ਨੇ ਚੀਨ ਬਾਰੇ ਭਾਰਤ ਨੂੰ ਦਿਤੀ ਚਿਤਾਵਨੀ- ਇਕ ਖ਼ਬਰ

ਨਾ ਜਾਈਂ ਮਸਤਾਂ ਦੇ ਵਿਹੜੇ, ਮਸਤ ਬਣਾ ਦੇਣਗੇ ਬੀਬਾ।

ਟਰੰਪ ਨੇ ਇਕ ਸਾਲ ‘ਚ 2 ਅਰਬ ਡਾਲਰ ਦਾ ਦਾਨ ਲਿਆ ਤੇ ਬਦਲੇ ‘ਚ ਕਰੋੜਾਂ ਦਾ ਲਾਭ ਵੀ ਦਿਤਾ- ਇਕ ਖ਼ਬਰ

ਇਹਨੂੰ ਕਹਿੰਦੇ ਨੇ, ਇਕ ਹੱਥ ਦੇਵੋ ਇਕ ਹੱਥ ਲਉ।

ਡੇਰਾ ਬਾਬਾ ਨਾਨਕ ਦੇ ਰੇਲਵੇ ਸਟੇਸ਼ਨ ਨੂੰ ਢਾਉਣ ਦੀ ਬਜਾਇ ਵਿਰਾਸਤੀ ਦਰਜਾ ਦੇ ਕੇ ਅਜਾਇਬ ਘਰ ਬਣਾਉ- ਗੁਰਭਜਨ ਗਿੱਲ

ਗਿੱਲ ਸਾਹਿਬ ਬੁਲਡੋਜ਼ਰਾਂ ਵਾਲਿਆਂ ਦੇ ਖਾਨੇ ਨਹੀਂ ਇਹ ਗੱਲ ਪੈਣੀ।

‘ਵੀਰ ਬਾਲ ਦਿਵਸ’ ਵਿਵਾਦ ‘ਤੇ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਕੀਤਾ ਸਰਕਾਰ ਦਾ ਬਚਾਅ- ਇਕ ਖ਼ਬਰ

ਜਿਸ ਦੀ ਖਾਈਏ ਬਾਜਰੀ, ਉਹਦੀ ਭਰੀਏ ਹਾਜ਼ਰੀ।

ਨਵਜੋਤ ਕੌਰ ਸਿੱਧੂ ਨੇ ਹੁਣ ਅਮਿਤ ਸ਼ਾਹ ਦੀਆਂ ਤਾਰੀਫ਼ਾਂ ਦੇ ਪੁਲ ਬੰਨ੍ਹੇ, ਭਾਜਪਾ ‘ਚ ਜਾਣ ਦੀ ਚਰਚਾ- ਇਕ ਖ਼ਬਰ

ਨੀ ਮੈਂ ਜਾਣਾ ਜੋਗੀ ਦੇ ਨਾਲ, ਕੰਨੀਂ ਮੁੰਦਰਾਂ ਪਾ ਕੇ।

ਕੀ ਸਿਆਸਤਦਾਨ ਲੋਕਾਂ ਦੀ ਸੇਵਾ ਲਈ ਹੀ ਰਾਜਨੀਤੀ ‘ਚ ਆਉਂਦੇ ਹਨ?- ਇਕ ਸਵਾਲ

ਇਕ ਲਾ ਕੇ ਸੌ ਨੇ ਬਣਾਉਂਦੇ, ਕਹਾਉਂਦੇ ਸੇਵਾਦਾਰ ਲੋਕਾਂ ਦੇ।

====================================================================================

23.12.2025

ਡਾਲਰ ਅੱਗੇ ਢੇਰ ਹੋਇਆ ਰੁਪਿਆ- ਇਕ ਖ਼ਬਰ

ਤੂੰ ਜਿੱਤਿਆ, ਮੈਂ ਹਾਰੀ।

ਜ਼ੇਲੈਂਸਕੀ ਨੇ ਨਾਟੋ ਦੀ ਮੈਂਬਰਸ਼ਿੱਪ ਲੈਣ ਦੀ ਜ਼ਿਦ ਛੱਡੀ- ਇਕ ਖ਼ਬਰ

ਮੱਛੀ ਮੁੜ ਆਈ ਪੱਥਰ ਚੱਟ ਕੇ।

ਇਜ਼ਰਾਇਲੀ ਅਧਿਕਾਰੀਆਂ ਨੇ ਕੈਨੇਡੀਅਨ ਵਫ਼ਦ ਨੂੰ ਗਾਜ਼ਾ ਪੱਟੀ ‘ਚ ਜਾਣੋਂ ਰੋਕਿਆ- ਇਕ ਖ਼ਬਰ

ਕਿੱਧਰ ਨੂੰ ਮੂੰਹ ਚੁੱਕਿਐ ਬਈ, ਮੁੜੋ ਪਿੱਛੇ!

ਗ਼ਰੀਬਾਂ ਅਤੇ ਸੂਬਿਆਂ ਨੂੰ ਬਰਬਾਦ ਕਰਨਾ ਚਾਹੁੰਦੀ ਹੈ ਭਾਜਪਾ- ਭਗਵੰਤ ਮਾਨ

ਸਾਢੇ ਤਿੰਨ ਹੱਥ ਧਰਤੀ ਤੇਰੀ, ਬਾਹਲੀਆਂ ਜਗੀਰਾਂ ਵਾਲਿਆ।

ਮੋਦੀ ਨੂੰ ਸ਼ੁਰੂ ਤੋਂ ਹੀ ਮਨਰੇਗਾ ਲਈ ਡੂੰਘੀ ਨਫ਼ਰਤ ਸੀ- ਰਾਜਾ ਵੜਿੰਗ

ਹੁਣ ਰੱਬ ਡਾਢਾ ਵੀ ਡਰਿਆ, ਠਾਣੇਦਾਰਾਂ ਤੋਂ।

328 ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਅਦਾਲਤ ਵਲੋਂ ਸਭ ਮੁਲਜ਼ਮਾਂ ਦੀਆਂ ਜ਼ਮਾਨਤਾਂ ਰੱਦ- ਇਕ ਖ਼ਬਰ

ਮੈਂ ਤਾਂ ਹੋ ਗਈ ਹਕੀਮ ਜੀ, ਅੱਗੇ ਨਾਲੋਂ ਤੰਗ।

ਭਾਰਤ ‘ਚ ਬਣੀਆਂ 205 ਦਵਾਈਆਂ ਦੇ ਸੈਂਪਲ ਫੇਲ੍ਹ ਹੋਏ- ਇਕ ਖ਼ਬਰ

ਪਾਪੀ ਬੰਦਿਆਂ ਦੇ, ਬੱਚੜੇ ਕਿਉਂ ਨਹੀਂ ਮਰਦੇ।

‘ਆਪ’ ਨੂੰ ਰੋਕਣ ਲਈ ਅਕਾਲੀਆਂ ਅਤੇ ਕਾਂਗਰਸ ਨੇ ਰਲ਼ ਕੇ ਚੋਣਾਂ ਲੜੀਆਂ- ਤਰੁਣਪ੍ਰੀਤ ਸੌਂਦ

ਦੁਸ਼ਮਣ ਦਾ ਦੁਸ਼ਮਣ ਤੀਜੀ ਪਾਰਟੀ ਦਾ ਦੋਸਤ ਹੁੰਦਾ ਬਈ।

ਬਠਿੰਡਾ ‘ਚ ਚਿੱਟਾ ਵੇਚਣ ਵਾਲਿਆਂ ਨੇ ਲੋਕਾਂ ‘ਤੇ ਹਮਲਾ ਕਰ ਦਿਤਾ- ਇਕ ਖ਼ਬਰ

ਸੁਣ ਲੈ ਨਿਹਾਲੀਏ ਚੋਰਾਂ ਦੀਆਂ ਗੱਲਾਂ।

ਪੰਜਾਬੀਆਂ ਨੇ ਭਗਵੰਤ ਮਾਨ ਸਰਕਾਰ ਦੇ ਕੀਤੇ ਕੰਮਾਂ ‘ਤੇ ਮੋਹਰ ਲਗਾਈ- ਕੁਲਦੀਪ ਸਿੰਘ ਧਾਲੀਵਾਲ

ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜਿਊਣ।

ਸੱਤਾਧਾਰੀ ਪਾਰਟੀ ਦਾ ਕਿਸੇ ਧਰਮ ਨਾਲ ਕੋਈ ਵਾਹ ਵਾਸਤਾ ਨਹੀਂ- ਹਰਜਿੰਦਰ ਸਿੰਘ ਧਾਮੀ

ਬਸ ਤੁਹਾਨੂੰ ਹੀ ਧਰਮ-ਪੁੱਤਰ ਬਣਾ ਕੇ ਰੱਬ ਨੇ ਭੇਜਿਆ ਧਰਤੀ ‘ਤੇ।

ਹਿਜਾਬ ਵਾਲ਼ੀ ਡਾਕਟਰ ਨੇ ਬਿਹਾਰ ਸਰਕਾਰ ਦੀ ਠੁਕਰਾਈ ਨੌਕਰੀ- ਇਕ ਖ਼ਬਰ

ਦੋ ਪੈਰ ਘੱਟ ਤੁਰਨਾ, ਪਰ ਤੁਰਨਾ ਮੜਕ ਦੇ ਨਾਲ।

ਐਮ.ਪੀ. ਅੰਮ੍ਰਿਤਪਾਲ ਸਿੰਘ ਦੇ ਕੇਸ ਦੀ ਸੁਣਵਾਈ ਫਿਰ ਟਲੀ- ਇਕ ਖ਼ਬਰ

ਟਲੀ ਨਹੀਂ ਪਿਆਰਿਓ, ਟਾਲੀ ਗਈ ਕਹੋ।

ਫ਼ੰਡਾਂ ਦੀ ਵੰਡ ਕਰਨ ਲੱਗਿਆਂ ਕੇਂਦਰ ਸੂਬਿਆਂ ਦੇ ਨੁੰਮਾਇੰਦੇ ਸ਼ਾਮਲ ਕਰੇ- ਮੀਤ ਹੇਅਰ

ਮੇਰਾ ਮੋਰਨੀ ਜਿਹੀ ਦਾ ਗਲ਼ ਖਾਲੀ, ਆਪ ਤਾਂ ਜ਼ੰਜੀਰੀ ਰੱਖਦਾ।

ਮੈਂ ਵੀਰ ਸਾਵਰਕਰ ਐਵਾਰਡ ਮੰਨਜ਼ੂਰ ਨਹੀਂ ਕਰਾਂਗਾ- ਸ਼ਸ਼ੀ ਥਰੂਰ

ਤੇਰੇ ਖੁਸ਼ਕ ਮੱਕੀ ਦੇ ਦਾਣੇ, ਮਿੱਤਰਾਂ ਨੇ ਨਹੀਉਂ ਚੱਬਣੇ।

===============================================================

15.12.2025

2014 ਤੋਂ ਪਹਿਲਾਂ ਭਾਰਤੀਆਂ ਨੂੰ ਵਿਦੇਸ਼ਾਂ ‘ਚ ਏਨਾ ਮਾਣ ਸਨਮਾਨ ਨਹੀਂ ਸੀ ਮਿਲਦਾ- ਪਿਯੂਸ਼ ਗੋਇਲ

ਬਿਲਕੁਲ ਠੀਕ 2014 ਤੋਂ ਪਹਿਲਾਂ ਬੇੜੀਆਂ, ਹੱਥਕੜੀਆਂ ‘ਚ ਭਾਰਤੀ ਡੀਪੋਰਟ ਨਹੀਂ ਸਨ ਹੋਏ ਕਦੀ।

ਆਪਣੀ ਕਮਾਈ ਬਾਰੇ ਝੂਠ ਬੋਲਣ ਵਾਲੀ ਪਤਨੀ ਦਾ ਗੁਜ਼ਾਰਾ ਭੱਤਾ ਹਾਈ ਕੋਰਟ ਨੇ ਕੀਤਾ ਰੱਦ- ਇਕ ਖ਼਼ਬਰ

ਨਾਲੇ ਚੋਪੜੀਆਂ ਨਾਲੇ ਦੋ ਦੋ। ਨਹੀਂ, ਬੀਬੀ ਏਦਾਂ ਨਹੀਂ ਕੰਮ ਚੱਲਣਾ।

ਬਾਦਲਾਂ ਨੇ ਮੁੜ ਚੋਣਾਂ ‘ਚ ਪੰਥ ਵਿਰੋਧੀਆਂ ਨੂੰ ਟਿਕਟਾਂ ਦੇ ਕੇ ਪੰਥ ਦਰਦੀਆਂ ਦੇ ਜ਼ਖ਼ਮਾਂ ‘ਤੇ ਲੂਣ ਛਿੜਕਿਆ-

ਨਿਆਮੀਵਾਲਾ

ਨਿਆਮੀਵਾਲਾ ਜੀ, ਇਕੋ ਜ਼ਾਤੀ ਦੇ ਪੰਛੀ ਹਮੇਸ਼ਾ ਇਕੱਠੇ ਉਡਦੇ ਐ।

ਲੋਕ ਸਭਾ ‘ਚ ਰਾਹੁਲ ਅਤੇ ਸ਼ਾਹ ਵਿਚਕਾਰ ਹੋਈ ਤਿੱਖੀ ਬਹਿਸ- ਇਕ ਖ਼ਬਰ

ਜਿੱਥੇ ਲੂਣ ਘੋਟਣਾ ਖੜਕੇ, ਉਹ ਘਰ ਛੜਿਆਂ ਦਾ।

ਪਿਉ ਵਲੋਂ ਨਹਿਰ ‘ਚ ਸੁੱਟੀ ਕੁੜੀ ਤਿੰਨ ਮਹੀਨਿਆਂ ਬਾਅਦ ਜ਼ਿੰਦਾ ਵਾਪਸ ਪਰਤੀ- ਇਕ ਖ਼ਬਰ

ਜਾ ਕੋ ਰਾਖੇ ਸਾਂਈਆਂ, ਮਾਰ ਸਕੇ ਨਾ ਕੋਇ।

ਅਨਿਲ ਅੰਬਾਨੀ ਦੇ ਬੇਟੇ ਵਿਰੁੱਧ 228 ਕਰੋੜ ਰੁਪਏ ਦੀ ਬੈਂਕ ਧੋਖਾਧੜੀ ਦਾ ਕੇਸ ਦਰਜ- ਇਕ ਖ਼ਬਰ

ਗੁਰੂ ਜਿਨ੍ਹਾਂ ਦੇ ਟੱਪਣੇ, ਚੇਲੇ ਜਾਣ ਛੜੱਪ।

195 ਸੀਟਾਂ ‘ਤੇ ਜ਼ੀਰੋ ਮੁਕਾਬਲਾ: ਪੰਜਾਬ ਦੇ ਲੋਕਤੰਤਰ ਨੂੰ ਹਾਈਜੈਕ ਕੀਤਾ ਗਿਆ- ਬਾਜਵਾ

ਅਗਲਿਆਂ ਨੇ ਪਹਿਲਾਂ ਹੀ ਦੱਸ ਦਿਤਾ ਸੀ ਕਿ ਉਹ ਸਾਮ, ਦਾਮ, ਦੰਡ, ਭੇਦ ਸਭ ਕੁਝ ਵਰਤਣਗੇ।

ਆਰ.ਟੀ.ਆਈ. ਕਮਿਸ਼ਨ ਨੇ ਪੀ.ਸੀ.ਐੱਸ. ਅਧਿਕਾਰੀ ਦੇ ਭੈੜੇ ਵਤੀਰੇ ‘ਤੇ ਨਾਰਾਜ਼ਗੀ ਪ੍ਰਗਟਾਈ- ਇਕ ਖ਼ਬਰ

ਚੁੱਕੀ ਹੋਈ ਲੰਬੜਾਂ ਦੀ, ਗਾਲ਼ ਬਿਨਾਂ ਨਾ ਬੋਲੇ।

ਤ੍ਰਿਣਮੂਲ ਕਾਂਗਰਸ ਸੰਸਦ ਮੈਂਬਰਾਂ ਨੇ ਚੁੱਪ ਰਹਿ ਕੇ ਸੰਸਦ ਵਿਚ ਰੋਸ ਪ੍ਰਦਰਸ਼ਨ ਕੀਤਾ- ਇਕ ਖ਼ਬਰ

ਤੇਰੇ ਸਾਹਮਣੇ ਬਹਿ ਕੇ ਰੋਣਾ, ਦੁੱਖ ਤੈਨੂੰ ਨਹੀਉਂ ਦੱਸਣਾ।

ਸਭ ਪਾਰਟੀਆਂ ਦੇ ਭ੍ਰਿਸ਼ਟਾਚਾਰ ਦੀ ਜਾਂਚ ਹਾਈਕੋਰਟ ਦੀ ਨਿਗਰਾਨੀ ‘ਚ ਹੋਵੇ- ਜਾਖੜ

ਨਾ ਨੌਂ ਮਣ ਤੇਲ ਹੋਵੇ, ਨਾ ਰਾਧਾ ਨੱਚੇ।

ਪੰਜਾਬ ਸਰਕਾਰ ਵਲੋਂ ਸਿੱਖ ਸੰਸਥਾਵਾਂ ਵਿਚ ਦਖ਼ਲ ਬਰਦਾਸ਼ਤ ਨਹੀਂ- ਧਾਮੀ

ਇਹ ਅਧਿਕਾਰ ਸਿਰਫ਼ ਤੇ ਸਿਰਫ਼ ਇਕੋ ਵਿਅਕਤੀ ਨੂੰ ਹੈ।

ਕ੍ਰਿਪਾਨ ਪਹਿਨੀ ਹੋਣ ਕਾਰਨ ਸਿੱਖ ਵਕੀਲ ਨੂੰ ਤਿਹਾੜ ਜੇਲ੍ਹ ‘ਚ ਕੈਦੀ ਨਾਲ ਮੁਲਾਕਾਤ ਕਰਨ ਤੋਂ ਰੋਕਿਆ- ਇਕ ਖ਼ਬਰ

ਸਿੱਖੋ! ਰੋਵੋ ਨਹਿਰੂ ਦੀ ਜਾਨ ਨੂੰ ਜਿਹੜਾ ਕਹਿੰਦਾ ਸੀ ਕਿ ਭਾਰਤ ‘ਚ ਸਿੱਖ ਆਜ਼ਾਦੀ ਦਾ ਨਿੱਘ ਮਾਨਣਗੇ।

ਲੁਧਿਆਣਾ ‘ਚ ਚੋਰਾਂ ਨੇ ਲਾਸ਼ਾਂ ਦੇ ਗਹਿਣੇ ਅਤੇ ਹੋਰ ਸਾਮਾਨ ਚੋਰੀ ਕੀਤਾ- ਇਕ ਖ਼ਬਰ

ਭੁੱਖ ਨੰਗ ਦੇ ਏਥੇ ਪ੍ਰਵਾਹ ਕੋਈ ਨਹੀਂ, ਹੁਕਮ ਹੋਵੇ ਤਾਂ ਦੇਗ਼ਾਂ ਨੂੰ ਚੱਟੀਏ ਜੀ।

ਰਾਹੁਲ ਹੁਣ ਖੁਦ ਸੁਲਝਾਉਣਗੇ ਪੰਜਾਬ ਕਾਂਗਰਸ ਦਾ ਕਾਟੋ-ਕਲੇਸ਼- ਇਕ ਖ਼ਬਰ

ਖਾਲੀ ਪਏ ਮੱਝੀਆਂ ਦੇ ਵਾੜੇ, ਰਾਂਝੇ ਚਾਕ ਬਿਨਾਂ।

‘ਆਪ’ ਸਰਕਾਰ ਨੇ ਪੰਜਾਬ ਦੇ ਪਿੰਡਾਂ ਲਈ ਕੀਤੇ ਕੰਮਾਂ ਦਾ ਹਿਸਾਬ ਨਹੀਂ ਦਿਤਾ- ਮਨੋਰੰਜਨ ਕਾਲੀਆ

ਮੈਂ ਦੁਖ ਮਿੱਤਰਾਂ ਕੋਲ ਰੋਵਾਂ, ਕੰਤ ਨਿਆਣੇ ਦਾ।

===================================================================

ਅਮਰੀਕਾ ‘ਚ ਵਿਦੇਸ਼ੀਆਂ ਦੇ ਦਾਖ਼ਲੇ ‘ਤੇ ਲਗ ਸਕਦੀ ਹੈ ਪੂਰੀ ਤਰ੍ਹਾਂ ਰੋਕ- ਟਰੰਪ

ਹੱਥ ਸੋਚ ਕੇ ਗੰਦਲ ਨੂੰ ਪਾਈਂ, ਕਿਹੜੀ ਏਂ ਤੂੰ ਸਾਗ ਤੋੜਦੀ।

ਭਾਰਤ – ਰੂਸ ਦੀ ਦੋਸਤੀ ਧਰੂ ਤਾਰੇ ਵਾਂਗ- ਮੋਦੀ

ਇਹ ਧਰੂ ਤਾਰਾ ਕਦੀ ਵਾਸ਼ਿੰਗਟਨ ‘ਚ ਵੀ ਚਮਕਦਾ ਸੀ।

ਰਾਜ ਭਵਨ ਪੰਜਾਬ ਦਾ ਨਾਮ ਲੋਕ ਭਵਨ ਪੰਜਾਬ ਹੋਇਆ- ਇਕ ਖ਼ਬਰ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਪ੍ਰਵਾਸੀਆਂ ਨੂੰ ‘ਕਚਰਾ’ ਕਹਿ ਕੇ ਬੁਰੇ ਫ਼ਸੇ ਟਰੰਪ, ਹਰ ਪਾਸੇ ਹੋ ਰਹੀ ਹੈ ਆਲੋਚਨਾ- ਇਕ ਖ਼ਬਰ

ਮੁਰਦਾ ਬੋਲੂ, ਖੱਫਣ ਪਾੜੂ।

ਭਾਰਤ ਪਹੁੰਚੇ ਪੁਤਿਨ ਨੂੰ ਮੋਦੀ ਨੇ ਪਾਈ ਗਲਵੱਕੜੀ- ਇਕ ਖ਼ਬਰ

ਅਜੇ ਤਾਂ ਟਰੰਪ ਨੂੰ ਪਾਈਆਂ ਜੱਫੀਆਂ ਨੇ ਚਾੜ੍ਹਿਆ ਚੰਦ ਨਹੀਂ ਭੁੱਲਿਆ।

ਤ੍ਰਿਣਮੂਲ ਕਾਂਗਰਸ ਵਿਰੁੱਧ ਲੜਾਈ ਜਾਰੀ ਰੱਖੋ, ਅਗਲੇ ਸਾਲ ਚੋਣਾਂ ਜਿੱਤਾਂਗੇ- ਮੋਦੀ

ਜੈ ਐੱਸ. ਆਈ.ਆਰ, ਜੈ ਈ.ਵੀ.ਐਮ., ਜੈ ਗਿਆਨੇਸ਼ ਕੁਮਾਰ, ਜੈ ਨੋਟਾਂ ਦੀਆਂ ਦੱਥੀਆਂ।

ਪੰਜਾਬ ‘ਚ ਭਾਜਪਾ ਸਾਰੀਆਂ 117 ਸੀਟਾਂ ਆਪਣੇ ਬਲਬੂਤੇ ‘ਤੇ ਲੜੇਗੀ- ਅਸ਼ਵਨੀ ਸ਼ਰਮਾ

‘ਕੱਲੀ ਲੜ ਲਊਂ ਮੁਕੱਦਮਾ ਆਪੇ, ਨਹੀਂ ਕਰਨੀ ਮਿੰਨਤ ਸ਼ਰੀਕਾਂ ਦੀ।

ਵਿਦੇਸ਼ੀ ਪਤਨੀਆਂ ਹੱਥੋਂ ਨੌਜਵਾਨ ਹੋ ਰਹੇ ਨੇ ਧੋਖੇ ਦੇ ਸ਼ਿਕਾਰ- ਇਕ ਖ਼ਬਰ

ਕਦੀ ਬਾਬੇ ਦੀਆਂ, ਕਦੇ ਪੋਤੇ ਦੀਆਂ।

ਬਿੱਟੂ ਨੇ ਸੁਖਜਿੰਦਰ ਰੰਧਾਵਾ ਦੇ ਵੱਡੇ ਗੈਂਗਸਟਰਾਂ ਨਾਲ ਸਬੰਧਾਂ ਦਾ ਦੋਸ਼ ਲਗਾਇਆ- ਇਕ ਖ਼ਬਰ

ਜਦ ਖਾਂਦਾ ਸੀ ਇਕੋ ਥਾਲ਼ੀ, ਵੇ ਉਦੋਂ ਕਿਉਂ ਨਾ ਬੋਲਿਆ?

ਗੁਜਰਾਤ ‘ਚ ‘ਆਪ’ ਵਿਧਾਇਕ ਗੋਪਾਲ ਇਟਾਲੀਆ ਉੱਤੇ ਜੁੱਤੀ ਸੁੱਟੀ- ਇਕ ਖ਼ਬਰ

ਲਉ ਜੀ, 2027 ਦੇ ‘ਟੂਰਨਾਮੈਂਟ’ ਲਈ ਪ੍ਰੈਕਟਿਸਾਂ ਹੋ ਗਈਆਂ ਸ਼ੁਰੂ।

ਉੱਤਰਾਖੰਡ ਦੇ ਕਾਂਗਰਸੀ ਆਗੂ ਨੇ ਸਿੱਖਾਂ ਨੂੰ ਫੇਰ 12 ਵੱਜਣ ਦੀ ਟਿਚਕਰ ਕੀਤੀ- ਇਕ ਖ਼ਬਰ

ਉੱਤਰਾਖੰਡ ਦੇ ਸਿੱਖੋ ਕੋਈ ਜਣਾ ਇਹਨੂੰ 12 ਵਜੇ ਦਾ ਇਤਿਹਾਸ ਸੁਣਾ ਕੇ ਇਹਦਾ ਭੂਤ ਉਤਾਰੋ ਬਈ।

‘ਆਪ’ ਸਰਕਾਰ ਸ਼ਾਂਤੀਪੂਰਬਕ ਚੋਣਾਂ ਕਰਵਾਏਗੀ- ਕੁਲਦੀਪ ਧਾਲੀਵਾਲ

ਦਸਤਾਰਾਂ ਦੀ ਬੇਅਦਬੀ ਨਾਲ ਸ਼ਾਂਤੀ ਕਿਵੇਂ ਆਉਂਦੀ ਐ ਧਾਲੀਵਾਲ ਸਾਬ?

ਕਾਂਗਰਸ ਨਵਜੋਤ ਸਿੱਧੂ ਨੂੰ ਮੁੱਖ ਮੰਤਰੀ ਚਿਹਰਾ ਬਣਾਏ ਉਹ ਫੇਰ ਹੀ ਸਿਆਸਤ ‘ਚ ਆਊ- ਨਵਜੋਤ ਕੌਰ ਸਿੱਧੂ

ਧਰਤੀ ਨੂੰ ਕਲੀ ਕਰਾ ਦੇ, ਨੱਚੂੰਗੀ ਸਾਰੀ ਰਾਤ।

ਅਮਿਤ ਸ਼ਾਹ ਨੇ ਐੱਸ.ਆਈ.ਆਰ. ਦੇ ਬਹਾਨੇ ਬੰਗਾਲ ‘ਚ ਰਾਸ਼ਟਰਪਤੀ ਰਾਜ ਲਾਗੂ ਕਰਨ ਦੀ ਚਲੀ ਚਾਲ- ਮਮਤਾ ਬੈਨਰਜੀ

ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਕੈਪਟਨ ਅਮਰਿੰਦਰ ਸਿੰਘ ਵਲੋਂ ਅਕਾਲੀ-ਭਾਜਪਾ ਗੱਠਜੋੜ ਦੇ ਸੁਝਾਉ ਦਾ ਭਾਜਪਾ ਵਲੋਂ ਇਨਕਾਰ- ਇਕ ਖ਼ਬਰ

ਲੱਤ ਮਾਰੂੰਗੀ ਪੰਜੇਬਾਂ ਵਾਲ਼ੀ, ਪਰ੍ਹਾਂ ਹੋ ਜਾ ਚੱਟੂ ਵੱਟਿਆ।

ਡਾਲਰ ਦੇ ਭਾਰ ਹੇਠ ਦੱਬ ਰਿਹਾ ਰੁਪਿਆ, 90 ਰੁਪਏ ਤੋਂ ਪਾਰ- ਇਕ ਖ਼ਬਰ

ਤੋਤਾ ਪੀ ਗਿਆ ਗੁਲਾਬੀ ਰੰਗ ਤੇਰਾ, ਨਿੰਮ ਨਾਲ ਝੂਟਦੀਏ।

=====================================================================

01.12.2025

62 ਸਾਲ ਦੀ ਉਮਰ ‘ਚ ਆਸਟਰੇਲੀਅਨ ਪ੍ਰਧਾਨ ਮੰਤਰੀ ਨੇ ਆਪਣਾ ਘਰ ਵਸਾਇਆ- ਇਕ ਖ਼ਬਰ

ਦਿਲ ਜਵਾਨ ਹੋਣਾ ਚਾਹੀਦਾ, ਉਮਰਾਂ ‘ਚ ਕੀ ਰੱਖਿਆ।

ਪੰਥਕ ਸੰਸਥਾਵਾਂ ਦੀ ਰਾਖੀ ਲਈ ਪੰਥ ਇਕੱਠਾ ਹੋਵੇ- ਸੁਖਬੀਰ ਬਾਦਲ

ਪਰ ਪੰਥ ਮੇਰੇ ਮਗਰ ਹੀ ਇਕੱਠਾ ਹੋਵੇ ਤਾਂ ਕਿ ਇਸ ਨੂੰ ਉੱਥੇ ਡੋਬਾਂ ਜਿੱਥੋਂ ਮੁੜ ਕੇ ਨਿਕਲ ਨਾ ਸਕੇ।

ਅਕਾਲੀ ਦਲ-ਭਾਜਪਾ ਦੀਆਂ ਵਿਚਾਰਧਾਰਾਵਾਂ ਇਕ ਦੂਜੇ ਦੀਆਂ ਵਿਰੋਧੀ, ਗੱਠਜੋੜ ਕਿਵੇਂ ਹੋਵੇਗਾ?- ਪਰਗਟ ਸਿੰਘ

ਪਰਗਟ ਸਿੰਘ ਜੀ ਤੁਹਾਨੂ ਭੁਲੇਖਾ ਹੈ, ਇਨ੍ਹਾਂ ਦੀਆਂ ਵਿਚਾਰਧਾਰਾਵਾਂ ਇਕੋ ਹੀ ਹਨ।

ਜਿੱਤ ਤੋਂ ਬਾਅਦ ਪੰਜਾਬ ਯੂਨੀਵਰਸਿਟੀ ਬਚਾਉ ਮੋਰਚੇ ਦਾ ਅੰਦੋਲਨ ਸਮਾਪਤ- ਇਕ ਖ਼ਬਰ

ਆਈ ਆ ਮੋਰਚਾ ਜਿੱਤ ਕੇ, ਗੁਰੂ ਜੀ ਤੇਰੀ ਫੌਜ ਰੰਗਲੀ।

ਕੇਂਦਰੀ ਬਿਜਲੀ ਸੋਧ ਬਿੱਲ ਬਾਰੇ ਪੰਜਾਬ ਸਰਕਾਰ ਆਪਣਾ ਸਟੈਂਡ ਸਪਸ਼ਟ ਕਰੇ- ਪੰਧੇਰ

ਮੂੰਹ ਐਧਰ ਕਰ ਸੋਹਣਿਆਂ ਵੇ, ਕਿਉਂ ਨਜ਼ਰਾਂ ਚੁਰਾਉਨਾਂ ਏਂ।

ਮੈਨੂੰ ਚੁਣੌਤੀ ਦਿਤੀ ਤਾਂ ਦੇਸ਼ ਭਰ ਵਿਚ ਭਾਜਪਾ ਦੀ ਨੀਂਹ ਹਿਲਾ ਦੇਵਾਂਗੀ- ਮਮਤਾ ਚੈਟਰਜੀ

ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਮੋਹਾਲੀ ਵਿਚ ਯੂਥ ਕਾਂਗਰਸ ਪੰਜਾਬ ਨੇ ਭਾਜਪਾ ਵਿਰੁੱਧ ਕੱਢੀ ਲਲਕਾਰ ਰੈਲੀ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਨੀ ਦਾਰੂ ਪੀ ਕੇ ਮਿੱਤਰਾਂ ਨੇ।

ਐੱਸ.ਆਈ.ਆਰ. ਪਿੱਛੇ ਅਸਲ ਇਰਾਦਾ ਹੈ ਐੱਨ. ਆਰ. ਸੀ.- ਮਮਤਾ ਬੈਨਰਜੀ

ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਕਿਸਾਨਾਂ ਵਲੋਂ ਕੇਂਦਰ ਨੂੰ ਤਿੱਖੇ ਸੰਘਰਸ਼ ਦੀ ਚਿਤਾਵਨੀ- ਇਕ ਖ਼ਬਰ

ਪਰੇ ਹਟ ਜਾ ਬਲਦ ਸਿੰਙ ਮਾਰੂ, ਨੀ ਸੋਨੇ ਦੇ ਤਵੀਤ ਵਾਲ਼ੀਏ।

ਜੀ-20 ਸੰਮੇਲਨ ਲਈ ਸਾਊਥ ਅਮਰੀਕਾ ਨੂੰ ਸੱਦਾ ਨਹੀਂ ਦੇਵਾਂਗੇ- ਟਰੰਪ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਟਰੰਪ ਨੇ ਜੋਅ ਬਾਇਡਨ ਵਲੋਂ ਪਾਸ ਕੀਤੇ ਸਾਰੇ ਹੁਕਮ ਕੀਤੇ ਰੱਦ- ਇਕ ਖ਼ਬਰ

ਘੁੰਡ ਕੱਢਣਾ ਮੜਕ ਨਾਲ ਤੁਰਨਾ, ਸਹੁਰੀਂ ਜਾ ਕੇ ਦੋ ਦੋ ਪਿੱਟਣੇ।

ਪੰਜਾਬ ਸਿਰ ਕਰਜ਼ੇ ਦੀ ਪੰਡ ਦਿਨੋਂ ਦਿਨ ਭਾਰੀ ਹੋ ਰਹੀ ਹੈ- ਪਰਗਟ ਸਿੰਘ

ਕੱਚਾ ਬਾਜਰਾ ਤਿਲਾਂ ਦੀ ਮੁੱਠ ਗਰਮੀ, ਨਾ ਚੱਬ ਚੋਬਰੀਏ।

ਤੀਜੀ ਦੁਨੀਆਂ ਦੇ ਸਾਰੇ ਦੇਸ਼ਾਂ ਤੋਂ ਪਰਵਾਸ ਨੂੰ ਪੱਕੇ ਤੌਰ ‘ਤੇ ਰੋਕਿਆ ਜਾਵੇਗਾ- ਟਰੰਪ

ਨਿੰਮ ਦਾ ਤੂੰ ਮਾਣ ਨਾ ਕਰੀਂ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

ਪੂਰਾ ਪੰਜਾਬ ਪੁੱਛ ਰਿਹੈ ਭਗਵੰਤ ਮਾਨ ਜੀ ਮਨਰੇਗਾ ਦਾ ਪੈਸਾ ਕਿੱਥੇ ਗਿਆ?- ਅਸ਼ਵਨੀ ਸ਼ਰਮਾ

ਗੋਰੇ ਰੰਗ ‘ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

 ਟਰੰਪ ਵਲੋਂ ਮਮਦਾਨੀ ਦਾ ਵ੍ਹਾਈਟ ਹਾਊਸ ਵਿਚ ਨਿੱਘਾ ਸਵਾਗਤ- ਇਕ ਖ਼ਬਰ

ਮਿੱਠੇ ਬੇਰ ਸੁਰਗਾਂ ਦਾ ਮੇਵਾ, ਕੋਲ਼ ਬਹਿ ਕੇ ਚੁਗ਼ ਮਿੱਤਰਾ।

=============================================================

ਭਾਰਤ ਨੂੰ ਮੁੜ ਵਿਸ਼ਵ ਗੁਰੂ ਬਣਨ ਲਈ ਮਹਾਰਿਸ਼ੀ ਦਯਾ ਨੰਦ ਦੀਆਂ ਸਿਖਿਆਵਾਂ ‘ਤੇ ਚਲਣ ਦੀ ਲੋੜ- ਮੁੱਖ ਮੰਤਰੀ ਸੈਣੀ

ਭਾਰਤ ਤਾਂ ਵਿਸ਼ਵ ਗੁਰੂ ਬਣਿਆ ਪਿਐ ਗਿਆਰਾਂ ਸਾਲਾਂ ਤੋਂ , ਸੈਣੀ ਸਾਬ ਆਪਣਾ ਪੱਤਾ ਨਾ ਕਟਵਾ ਲਿਉ  ਕਿਤੇ।

ਅਮਰੀਕਾ ‘ਚ ਸ਼ੱਟ ਡਾਊਨ ਕਾਰਨ 4 ਕਰੋੜ ਲੋਕਾਂ ਦਾ ਰਾਸ਼ਨ ਬੰਦ- ਇਕ ਖ਼ਬਰ

ਕੋਈ ਮਰੇ ਕੋਈ ਜੀਵੇ, ਸੁਥਰਾ ਘੋਲ਼ ਪਤਾਸੇ ਪੀਵੇ।

ਵੰਸ਼ਵਾਦ ਦੀ ਸਿਆਸਤ ਭਾਰਤੀ ਲੋਕਤੰਤਰ ਲਈ ਗੰਭੀਰ ਖ਼ਤਰਾ- ਸ਼ਸ਼ੀ ਥਰੂਰ

ਪੱਲਾ ਮਾਰ ਕੇ ਬੁਝਾ ਗਈ ਦੀਵਾ, ਅੱਖ ਨਾਲ ਗੱਲ ਕਰ ਗਈ।

ਪੰਜਾਬ ਸਰਕਾਰ ਲੋਕਾਂ ਦੀ ਜਾਨ-ਮਾਲ ਦੀ ਰਾਖੀ ਕਰਨ ਤੋਂ ਨਾਕਾਮ- ਵੜਿੰਗ                                                                                                    

ਤੁਹਾਡੇ ਵੇਲੇ ਵੀ ਇਹੋ ਕੁੱਤੀ-ਚੀਕਾ ਪੈਂਦਾ ਸੀ ਵੜਿੰਗ ਸਾਬ।

ਜੇ.ਐੱਨ.ਯੂ. ਵਿਦਿਆਰਥੀ ਚੋਣਾਂ: ਚਾਰੇ ਸੀਟਾਂ ‘ਤੇ ਖੱਬੇ ਪੱਖੀ ਕਾਬਜ਼- ਇਕ ਖ਼ਬਰ

ਲਗਦੈ ਇਨ੍ਹਾਂ ਚੋਣਾਂ ‘ਚ ਈ.ਵੀ.ਐਮ. ਮਸ਼ੀਨਾਂ ਨਹੀਂ ਵਰਤੀਆਂ ਗਈਆਂ।

ਪੰਜਾਬ ਦੇ ਵਿਧਾਇਕਾਂ ਦੀ ਤਨਖ਼ਾਹ ਅਤੇ ਭੱਤੇ ਵਧਾਉਣ ਦੀ ਤਿਆਰੀ- ਇਕ ਖ਼ਬਰ

ਮੇਰੀ ਸੱਸ ਨੇ ਬਾਣੀਆਂ ਕੀਤਾ, ਲੱਡੂਆਂ ਦੀ ਮੌਜ ਲੱਗ ਗਈ।

ਮਮਦਾਨੀ ਦੇ ਮੇਅਰ ਬਣਨ ਨਾਲ ਅੱਠ ਲੱਖ ਲੋਕ ਸ਼ਹਿਰ ਛੱਡਣ ਲਈ ਤਿਆਰ- ਇਕ ਖ਼ਬਰ

ਚਲ ਉੜ ਜਾ ਰੇ ਪੰਛੀ, ਅਬ ਯੇਹ ਦੇਸ਼ ਹੂਆ ਬੇਗਾਨਾ।

ਗੁਰੂ ਤੇਗ਼ ਬਹਾਦਰ ਜੀ ਪੂਰੇ ਵਿਸ਼ਵ ਦੇ ਮਨੁੱਖੀ ਅਧਿਕਾਰਾਂ ਦੇ ਪਹਿਲੇ ਮਹਾਂਨਾਇਕ- ਮੁੱਖ ਮੰਤਰੀ ਸੈਣੀ

ਸੈਣੀ ਸਾਹਿਬ ਇਹ ਗੱਲ ਆਪਣੇ ਭਾਜਪਾ ਦੇ ਸਾਥੀਆਂ ਨੂੰ ਵੀ ਕਹੋ ਕਿ ਉਹ ਆਪਣੇ ਬਿਆਨਾਂ ‘ਚ ਸੋਧ ਕਰਨ।

ਵਿਆਹੁਤਾ ਨੇ ਕੈਨੇਡਾ ਪਹੁੰਚਦਿਆਂ ਹੀ ਕੀਤਾ ਪਤੀ ਦਾ ਨੰਬਰ ਬਲੌਕ- ਇਕ ਖ਼ਬਰ

ਕੀੜੇ ਪੈਣਗੇ ਮਰੇਂਗੀ ਸੱਪ ਲੜ ਕੇ, ਮਿੱਤਰਾਂ ਨੂੰ ਦਗ਼ਾ ਦੇਣੀਏਂ।

ਮੋਟੇ ਤੇ ਬਿਮਾਰ ਲੋਕਾਂ ਨੂੰ ਨਹੀਂ ਮਿਲੇਗਾ ਅਮਰੀਕਾ ਦਾ ਵੀਜ਼ਾ- ਟਰੰਪ

ਮੁੰਡਾ ਸੁੱਕ ਗਿਆ ਚੰਨਣ ਦਾ ਬੂਟਾ, ਤੇਰੇ ਪਿੱਛੇ ਗੋਰੀਏ ਰੰਨੇ।

ਜ਼ੋਹਰਾਨ ਮਮਦਾਨੀ ਦੀ ਜਿੱਤ ਨੇ ਸ਼ਹਿਰ ਦੇ ਅਰਬਪਤੀਆਂ ਦੀਆਂ ਮੁਸ਼ਕਿਲਾਂ ਵਧਾਈਆਂ- ਇਕ ਖ਼ਬਰ

ਗੋਰੇ ਰੰਗ ਤੋਂ ਬਦਲ ਗਿਆ ਕਾਲ਼ਾ, ਕੀ ਗ਼ਮ ਖਾ ਗਿਆ ਮਿੱਤਰਾ।

ਟਰੰਪ ਨੇ ਜੀ-20 ਸੰਮੇਲਨ ਦਾ ਕੀਤਾ ਬਾਈਕਾਟ- ਇਕ ਖ਼ਬਰ

ਤੇਰੇ ਖੁਸ਼ਕ ਮੱਕੀ ਦੇ ਦਾਣੇ, ਮਿੱਤਰਾਂ ਨੇ ਨਹੀਂਉਂ ਚੱਬਣੇ।

ਪੰਜਾਬ ਕਾਂਗਰਸ ਸ਼ੁਰੂ ਤੋਂ ਹੀ ਰਹੀ ਦਲਿਤਾਂ ਦੀ ਦੁਸ਼ਮਣ- ਐਡਵੋਕੇਟ ਭੁੱਟਾ

ਨਾ ਮੇਰਾ ਧਰਮ ਰਿਹਾ, ਨਾ ਘੁੱਗ ਕੇ ਵਸੀ ਘਰ ਤੇਰੇ।

ਭਾਰਤ ਰੂਸ ਤੋਂ ਕੱਚੇ ਤੇਲ ਦੀ ਸਿੱਧੀ ਆਯਾਤ ‘ਤੇ ਦਸੰਬਰ ਤੋਂ ਕਰੇਗਾ ਕਟੌਤੀ- ਇਕ ਖ਼ਬਰ

ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲ਼ਾ ਤਿਲਕ ਗਿਆ।

ਕਾਨੂੰਨੀ ਭਾਸ਼ਾ ਸਰਲ ਅਤੇ ਸਥਾਨਕ ਹੋਣੀ ਚਹੀਦੀ ਹੈ- ਮੋਦੀ

ਬਗਲ ਮੇਂ ਛੁਰੀ, ਮੂੰਹ ਮੇਂ ਰਾਮ ਰਾਮ।

ਭਾਰਤ ਦੇ ਸਿਖਰਲੇ 1 ਫ਼ੀ ਸਦੀ ਅਮੀਰਾਂ ਦੀ ਦੌਲਤ ‘ਚ ਹੋਇਆ 62 ਫ਼ੀ ਸਦੀ ਵਾਧਾ- ਇਕ ਖ਼ਬਰ

ਚੱਪਾ ਕੁ ਚੰਨ ਮੁੱਠ ਕੁ ਤਾਰੇ, ਸਾਡਾ ਮੱਲ ਬੈਠੇ ਆਸਮਾਨ।

================================================================