Jaswinder Jalandhari

ਦੁਖਹਰਨ ਛੰਦ : ਊਧਮ ਸਿੰਘ ਸੁਨਾਮੀ ਸੂਰਾ - ਜਸਵਿੰਦਰ 'ਜਲੰਧਰੀ '

ਬਣ ਕੇ ਗ਼ਦਰੀ 'ਗ਼ਦਰ' ਮਚਾਇਆ,
ਆਢਾ ਨਾਲ ਗੋਰਿਆਂ ਲਾਇਆ,
ਰੱਸਾ ਫਾਂਸੀ ਦਾ ਗਲ ਪਾਇਆ,
ਖਾਤਰ ਦੇਸ਼ ਦੀ ਮਰਦਾ ਹੈ।
ਊਧਮ ਸਿੰਘ ਸੁਨਾਮੀ ਸੂਰਾ,ਮੌਤੋਂ ਮੂਲ਼ ਨਾ ਡਰਦਾ ਹੈ।

ਅੱਖੀਂ ਤੱਕਿਆ ਘੱਲੂਘਾਰਾ,
ਜਲ੍ਹਿਆਂਵਾਲਾ ਬਾਗ਼ ਵਿਚਾਰਾ,
ਹੋਇਆ ਖ਼ੂਨੋਂ ਖ਼ੂਨੀ ਸਾਰਾ,
ਜਿੱਥੇ ਸੱਚ ਪਿਆ ਮਰਦਾ ਹੈ।
ਊਧਮ ਸਿੰਘ ਸੁਨਾਮੀ ਸੂਰਾ,ਦਿਲ ਵਿੱਚ ਗੁੱਸਾ ਭਰਦਾ ਏ।


'ਮੈਕਲ' ਲੈਮਿੰਗਟਨ ਤੇ  , 'ਡਾਨਾ',
ਲ਼ੈ ਕੇ ਨਿਰਦੋਸ਼ਾਂ ਦੀਆਂ ਜਾਨਾਂ,
ਦੱਸਣ ਖ਼ੁਦ ਨੂੰ ਵਾਂਗ ਚੱਟਾਨਾਂ,
ਕੀ ਸਮਝਾਵੇ ਕਾਇਰ ਨੂੰ,
ਊਧਮ ਸਿੰਘ ਸੁਨਾਮੀ ਸੂਰਾ,ਸੋਧਾ ਲਾਵੇ 'ਡਾਇਰ' ਨੂੰ।

ਪੂਰੀ ਕਰ ਕੇ ਖੂਬ ਤਿਆਰੀ,
ਗੋਲ਼ੀ ਹਿੱਕ 'ਚ ਸਿੱਧੀ ਮਾਰੀ,
ਧਰਤੀ ਹੋ 'ਗੀ ਰੱਤੀ ਸਾਰੀ,
ਉੱਤਰ ਦਿਲ ਦਾ ਭਾਰ ਗਿਆ।
ਊਧਮ ਸਿੰਘ ਸੁਨਾਮੀ ਸੂਰਾ, ਮਾਂ ਦਾ ਕਰਜ਼ ਉਤਾਰ ਗਿਆ।

ਜੁਰਮ ਕਬੂਲੇ ਵਿੱਚ ਕਚਹਿਰੀ,
ਕਹਿੰਦਾ ਅੱਖ ਬੜੀ ਸੀ‌ ਗਹਿਰੀ,
ਮੈਕਲ ਬੜਾ ਪੁਰਾਣਾ ਵੈਰੀ,
ਜਿਸਦੀ ਲਾਸ਼ ਵਿਛਾ ਦਿੱਤੀ,
ਊਧਮ ਸਿੰਘ ਸੁਨਾਮੀ ਸੂਰੇ,ਚੁੱਕੀ ਸਹੁੰ ਪੁਗਾ ਦਿੱਤੀ।

ਗਾਥਾ ਸਾਰੇ ਘਰੀਂ ਪੁਚਾਵੋ,
ਵਾਰਾਂ ਨਾਲ ਜੋਸ਼ ਦੇ ਗਾਵੋ,
ਵੱਡੀ ਸੂਰਮਗਤੀ ਭਰਾਵੋ,
ਰੱਖਿਆ ਸਾਂਭ ਚਿੰਗਾਰੀ ਨੂੰ।
ਊਧਮ ਸਿੰਘ ਸੁਨਾਮੀ ਸੂਰਾ,ਮਾਰੇ ਅੱਤਿਆਚਾਰੀ ਨੂੰ।

ਚਲੋ ਭਰਾਵੋ ਆਪਾਂ ਲੜੀਏ, ਜਾਨਵਰਾਂ ਦੇ ਮਸਲੇ 'ਤੇ  - ਜਸਵਿੰਦਰ 'ਜਲੰਧਰੀ'

ਚਲੋ ਭਰਾਵੋ ਆਪਾਂ ਲੜੀਏ, ਜਾਨਵਰਾਂ ਦੇ ਮਸਲੇ 'ਤੇ,
ਸਾਹਾਂ ਦਾ ਕੀ? ਸਾਹ ਵਿਚਾਰੇ, ਆਉਂਦੇ ਜਾਂਦੇ ਰਹਿੰਦੇ ਨੇ।

ਜ਼ਹਿਰ ਫੱਕ ਕੇ ਜ਼ਹਿਰ ਉਗਲੀਏ, ਜ਼ਹਿਰ ਘੋਲੀਏ ਵਿੱਚ ਹਵਾ,
ਬੱਧੀਜੀਵੀ,ਗਿਆਨੀ ਧਿਆਨੀ, ਬੁੜ-ਬੁੜਾਉਂਦੇ ਰਹਿੰਦੇ ਨੇ।

ਤਾਜ ਬਣਾਇਆ ਕਿਸ ਬੰਦੇ ਨੇ, ਇਹ ਚਰਚਾ 'ਗੰਭੀਰ' ਬੜੀ,
ਕੱਚੇ ਕੋਠੇ ਨਾਲ਼ ਹੜ੍ਹਾਂ ਦੇ, ਵਹਿੰਦੇ ਢਹਿੰਦੇ ਰਹਿੰਦੇ ਨੇ।

ਚਲੋ ਫੂਕੀਏ,ਅੱਗਾਂ ਲਾਈਏ,ਨਾੜੀ ਕਦੇ ਪਰਾਲ਼ੀ ਨੂੰ,
ਨਾਲ ਧੂੰਏਂ ਦੇ ਕੋਈ ਨਾ ਮਰਦਾ, ਐਂਵੇਂ  ਕਹਿੰਦੇ ਰਹਿੰਦੇ ਨੇ।

ਪੀੜ ਪਰਾਈ ਕੀ ਕਰਨੀ ਏ, ਗਰਜਾਂ ਵੱਡੀਆਂ ਫ਼ਰਜਾਂ ਤੋਂ,
ਕਰਜੇ ਦਾ ਕੀ ਸਿਰ ਮਜ਼ਲੂਮਾਂ ,ਚੜ੍ਹਦੇ ਲਹਿੰਦੇ ਰਹਿੰਦੇ ਨੇ।

ਸਿੱਖ ਲਿਆ ਹੈ ਦਾਬੇ ਪਾਉਣਾ,ਰੋਅਬ ਝਾੜਨਾ ਲੋਕਾਂ 'ਤੇ,
ਸਾਡੇ ਮੁੰਡੇ ਨਾਲ ਲੀਡਰਾਂ ਉੱਠਦੇ ਬਹਿੰਦੇ ਰਹਿੰਦੇ ਨੇ।
           
 ਜਸਵਿੰਦਰ 'ਜਲੰਧਰੀ'
  98768-07218

12 Jan. 2019

ਪਲਾਂ ਵਿੱਚ ਸਦੀ ਦਾ ਹਿਸਾਬ ਕਰ ਲੈਂਦੇ ਹਾਂ  - ਜਸਵਿੰਦਰ 'ਜਲੰਧਰੀ'

ਪਲਾਂ ਵਿੱਚ ਸਦੀ ਦਾ ਹਿਸਾਬ ਕਰ ਲੈਂਦੇ ਹਾਂ,
ਦੁੱਖ ਦੇਣੀ ਯਾਦ ਨੂੰ ਵੀ ਯਾਦ ਕਰ ਲੈਂਦੇ ਹਾਂ।

ਸੁੰਨੇ-ਸੁੰਨੇ ਰਾਹਾਂ ਵਿੱਚ ਨਜ਼ਰਾਂ ਦਾ ਪਹਿਰਾ ਦੇ,
ਆਪਣੀਆਂ ਨੀਂਦਰਾਂ ਖ਼ਰਾਬ ਕਰ ਲੈਂਦੇ ਹਾਂ।

ਪਤਾ ਵੀ ਏ ਮੜ੍ਹੀਏ ਮਸਾਣੋਂ ਨਾ ਕੋਈ ਮੁੜਦਾ,
ਐਂਵੇਂ ਬੱਸ ਸਜਦਾ- ਸਲਾਮ ਕਰ ਲੈਂਦੇ ਹਾਂ।

ਜਾਣਦੇ ਹਾਂ ਨਾਨਕਾ ਸਿਆਣੀ ਹੋ ਗੀ ਦੁਨੀਆ,
ਪੱਟਾਂ ਉੱਤੇ ਬੇਸੁਰੀ ਰਬਾਬ ਧਰ ਲੈਂਦੇ ਹਾਂ।

ਅੱਧੀਆਂ ਅਧੂ੍ਰਰੀਆਂ ਨਾ ਹੋਈਆਂ ਕਦੇ ਪੂਰੀਆਂ,
ਸੱਧਰਾਂ ਦਾ ਕੱਲਿਆਂ ਸ਼ਰਾਧ ਕਰ ਲੈਂਦੇ ਹਾਂ।

ਸੋਹਣੀ ਦੇ ਖ਼ਿਆਲਾਂ ਦਾ ਦੀਦਾਰ ਲੈਣ ਵਾਸਤੇ,
ਰਾਵੀ ਤੇ ਬਿਆਸ ਨੂੰ ਚਨਾਬ ਕਰ ਲੈਂਦੇ ਹਾਂ।

  
 ਜਸਵਿੰਦਰ 'ਜਲੰਧਰੀ'
  98768-07218