ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
12-04-2026
ਰਾਜਨਾਥ ਸਿੰਘ ਨੇ ਖੇਤੀਬਾੜੀ ਸੁਧਾਰਾਂ ਦੀ ਲੋੜ ‘ਤੇ ਦਿਤਾ ਜ਼ੋਰ- ਇਕ ਖ਼ਬਰ
ਇਹ ਊਠ ਦਾ ਬੁੱਲ੍ਹ ਪਤਾ ਨਹੀਂ ਕਦੋਂ ਡਿਗੇਗਾ।
ਮੀਂਹ ਨਾਲ ਫ਼ਸਲਾਂ ਦੇ ਨੁਕਸਾਨ ਦਾ ਪਤਾ ਲਾਉਣ ਲਈ ਪੰਜਾਬ ਭਾਜਪਾ ਨੇ ਟੀਮਾਂ ਦਾ ਗਠਨ ਕੀਤਾ- ਇਕ ਖ਼ਬਰ
ਭਾਜਪਾ ਜੀ, ਪਹਿਲਾਂ ਹੜ੍ਹਾਂ ਨਾਲ ਹੋਏ ਨੁਕਸਾਨ ਦਾ 1600 ਕਰੋੜ ਤਾਂ ਕੇਂਦਰ ਕੋਲੋਂ ਲੈ ਆਉ।
ਦਿੱਲੀ ਪਹੁੰਚ ਕੇ ਨਿਤੀਸ਼ ਕੁਮਾਰ ਰਾਜ ਸਭਾ ਮੈਂਬਰ ਵਜੋਂ ਸਹੁੰ ਚੁੱਕਣਗੇ- ਇਕ ਖ਼ਬਰ
ਮਰਦੀ ਨੇ ਅੱਕ ਚੱਬਿਆ, ਹਾਰ ਕੇ ਜੇਠ ਨਾਲ ਲਾਈਆਂ।
ਸ੍ਰੀ ਅਕਾਲ ਤਖ਼ਤ ਦੇ ਸਿਧਾਂਤ ਨੂੰ ਢਾਅ ਲਾਉਣ ਲਈ ਸੁਖਬੀਰ ਬਾਦਲ ਆਪਣੇ ਬਾਪ ਤੋਂ ਵੀ ਅੱਗੇ ਲੰਘਿਆ- ਭਾਈ ਮਾਝੀ
ਗੁਰੂ ਜਿਨ੍ਹਾਂ ਦੇ ਟੱਪਣੇ, ਚੇਲੇ ਜਾਣ ਛੜੱਪ।
ਪੱਛਮੀ ਬੰਗਾਲ ਵੋਟਰ ਸੂਚੀ ‘ਚੋਂ 91 ਲੱਖ ਵੋਟਰਾਂ ਦੇ ਨਾਮ ਹਟਾਏ ਗਏ- ਚੋਣ ਕਮਿਸ਼ਨ
ਨਾ ਰਹੇ ਬਾਂਸ, ਨਾ ਬਜੇ ਬੰਸਰੀ।
ਕਾਰੋਬਾਰੀ ਨੂੰ ਧਮਕਾਉਣ ਦੀ ਮੰਤਰੀ ਮੁੰਡੀਆਂ ਬਾਰੇ ਵਾਇਰਲ ਵੀਡੀਓ ਦੀ ਹੋਵੇ ਜਾਂਚ- ਰਵਨੀਤ ਬਿੱਟੂ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।
ਸ਼੍ਰੋਮਣੀ ਕਮੇਟੀ ਦੀ ਸਬ ਕਮੇਟੀ ਨੇ ਫਿਰ ਸਰਕਾਰ ਨੂੰ ਲਿਖੀ ਚਿੱਠੀ- ਇਕ ਖ਼ਬਰ
ਚਿੱਠੀਆਂ ਸਾਹਿਬਾਂ ਜੱਟੀ ਨੇ ਲਿਖ ਮਿਰਜ਼ੇ ਵਲ ਪਾਈਆਂ।
ਮੁੱਖ ਮੰਤਰੀ ਵਲੋਂ ਫ਼ਸਲਾਂ ਦੇ ਹੋਏ ਨੁਕਸਾਨ ਲਈ ਸਪੈਸ਼ਲ ਗਿਰਦਾਵਰੀ ਦੇ ਹੁਕਮ- ਇਕ ਖ਼ਬਰ
ਆਪਣੀਆਂ ਮੁਰਗ਼ੀਆਂ, ਬੱਕਰੀਆਂ ਗਿਣ ਲਉ ਬਈ ਪੰਜਾਬੀਉ, ਮੁਆਵਜ਼ਾ ਆ ਰਿਹੈ।
ਅਕਾਲੀਆਂ ਨੇ ਪੰਜਾਬ ਨੂੰ ਲੁੱਟਣ ਦੀ ਆਦਤ ਨਹੀਂ ਛੱਡੀ- ਭਗਵੰਤ ਮਾਨ
ਵਾਦੜੀਆਂ ਸਜਾਦੜੀਆਂ ਨਿਭਣ ਸਿਰਾਂ ਦੇ ਨਾਲ।
ਮੈਂ ਟਰੰਪ ਅਤੇ ਪੁਤਿਨ ਤੋਂ ਤੰਗ ਆ ਚੁੱਕਿਆ ਹਾਂ- ਸਟਾਰਮਰ
ਪਰ੍ਹੇ ‘ਚ ਆ ਕੇ ਕੈਦੋ ਨੇ ਮੱਗ ਮਾਰੀ, ਗੱਲਾਂ ਵੇਖ ਲਉ ਅੱਲ ਵਲੱਲੀਆਂ ਨੇ।
ਨਾਟੋ ਦੇ ਫ਼ੈਸਲੇ ਨੂੰ ਕਦੇ ਨਹੀਂ ਭੁੱਲਾਂਗਾ- ਟਰੰਪ
ਮੇਰੀ ਚੱਪਣੀ ਵਗਾਹ ਕੇ ਮਾਰੀ, ਛੜਿਆਂ ਦੇ ਗਈ ਅੱਗ ਨੂੰ।
‘ਜਥੇਦਾਰ’ ਸਰਕਾਰ ਦੀ ਥਾਂ ਪੰਥ ਵਲ ਦੇਖਣ- ਦਲ ਖ਼ਾਲਸਾ
ਮੈਂ ਦੁੱਖ ਮਿੱਤਰਾਂ ਕੋਲ ਰੋਵਾਂ, ਕੰਤ ਨਿਆਣੇ ਦਾ।
ਗਿਆਨੀ ਰਘਬੀਰ ਸਿੰਘ ਨੇ ਸੁਖਬੀਰ ਬਾਦਲ ਨੂੰ ਦਿਤੀ ਖੁੱਲ੍ਹੀ ਚੁਣੌਤੀ- ਇਕ ਖ਼ਬਰ
ਨੀਂ ਛੜੇ ਅੱਜ ਭਜਨ ਕੁਰੇ, ਹੋ ਕੇ ਸ਼ਰਾਬੀ ਬੁੱਕਦੇ।
ਡਾ. ਨਵਜੋਤ ਕੌਰ ਸਿੱਧੂ ਨੇ ਬਣਾਈ ‘ ਭਾਰਤੀ ਰਾਸ਼ਟਰਵਾਦੀ ਪਾਰਟੀ’ ਸਿਆਸੀ ਪਾਰਟੀ- ਇਕ ਖ਼ਬਰ
ਮੈਂ ਵੀ ਦਿੰਨੀ ਆਂ, ਪੈਰਾਂ ਤੋਂ ਬੰਦਾ ਚੁੱਕ ਮੁੰਡਿਆ।
ਸੁਖਬੀਰ ਬਾਦਲ ਨੇ ਅੱਠ ਸਵਾਲਾਂ ਦੇ ਜਵਾਬ ਹਾਂ ਵਿਚ ਦਿਤੇ ਤਾਂ ਆਦੇਸ਼ ਸਾਜ਼ਿਸ਼ ਕਿਵੇਂ ਹੋ ਗਿਆ?- ਗਿ.ਹਰਪ੍ਰੀਤ ਸਿੰਘ
ਦੋ ਘੁੱਟ ਪੀ ਕੇ ਦਾਰੂ, ਪੈਰ ‘ਤੇ ਮੁੱਕਰ ਗਿਆ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
07.04.2026
ਅਮਰੀਕਾ ਨੇ ਆਰਮੀ ਚੀਫ਼ ਨੂੰ ਨੌਕਰੀ ਤੋਂ ਹਟਾਇਆ- ਇਕ ਖ਼ਬਰ
ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ ‘ਤੇ।
ਬੇਅਦਬੀ ਮਾਮਲੇ ‘ਤੇ ਕਾਂਗਰਸ ਅਤੇ ‘ਆਪ’ ਨੇ ਸਿਰਫ਼ ਸਿਆਸਤ ਕੀਤੀ- ਸੁਖਬੀਰ ਬਾਦਲ
ਬਾਦਲ ਸਾਬ ਇਹ ਵੀ ਦੱਸ ਦਿਉ ਕਿ ਗੋਲ਼ੀਆਂ ਕੀਹਨੇ ਚਲਾਈਆਂ ਤੇ ਬੇਕਸੂਰ ਬੰਦੇ ਮਾਰੇ।
ਪਹਿਲਾਂ ਮੁਕਰਨ ਤੋਂ ਬਾਅਦ ਹੁਣ ਫੇਰ ਕੈਨੇਡੀਅਨ ਪੁਲਿਸ ਨੇ ਮੰਨ ਲਿਆ ਕਿ ਹਿੰਸਕ ਘਟਨਾਵਾਂ ‘ਚ ਵਿਦੇਸ਼ੀ ਏਜੰਸੀਆਂ ਦਾ ਹੱਥ- ਇਕ ਖ਼ਬਰ
ਮਰ ਜਾਉ ਚਿੜੀਓ, ਜੀ ਪਉ ਚਿੜੀਓ।
ਇਰਾਨ ਨਾ ਮੰਨਿਆ ਤਾਂ ਖਾਰਗ ਟਾਪੂ ਤਬਾਹ ਕਰ ਦਿਆਂਗੇ- ਟਰੰਪ
ਜੇ ਕੋਈ ਹੋਰ ਲੈ ਕੇ ਆਇਆ ਤੇਰੀ ਜੰਞ ਨੀ, ਬਣੂੰ ਜੰਗ ਦਾ ਮੈਦਾਨ ਵੇਖੀਂ ਬੇਲਾ ਝੰਗ ਨੀ।
ਬਰਤਾਨੀਆ ਇਰਾਨ ਵਿਰੁੱਧ ਜੰਗ ‘ਚ ਨਹੀਂ ਪਵੇਗਾ- ਬਰਤਾਨਵੀ ਪ੍ਰਧਾਨ ਮੰਤਰੀ
ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।
ਅਸੀਂ ਕਿਸੇ ਦੀ ਮਦਦ ਨਹੀਂ ਕਰਾਂਗੇ, ਜੀਹਨੂੰ ਤੇਲ ਚਾਹੀਦੈ ਹੋਰਮੁਜ਼ ਸਟਰੇਟ ਥਾਣੀਂ ਆਪ ਲੈ ਕੇ ਆਵੇ- ਟਰੰਪ
ਕਿਤੇ ‘ਕੱਲੀ ਬਹਿ ਕੇ ਸੋਚੀਂ ਨੀ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।
ਗੁਰੂ-ਘਰ ਦੀ ਜਾਇਦਾਦ ਲੁੱਟਣ ਵਾਲੇ ਬਖ਼ਸ਼ੇ ਨਹੀਂ ਜਾਣਗੇ- ਮੁੱਖ ਸਕੱਤਰ ਮੰਨਣ
ਨਾ ਖੰਜਰ ਉਠੇਗਾ ਨਾ ਤਲਵਾਰ ਹੀ ਉਠੇਗੀ, ਯੇਹ ਬਾਜ਼ੂ ਮਿਰੇ ਆਜ਼ਮਾਏ ਹੂਏ ਹੈਂ।
ਰਜਵਾੜਿਆਂ ਦੇ ਕਬਜ਼ੇ ਨੇ ਸਿੱਖ ਸਿਆਸਤ ਅਤੇ ਅਕਾਲੀ ਦਲ ਦਾ ਘਾਣ ਕੀਤਾ- ਗਿ.ਹਰਪ੍ਰੀਤ ਸਿੰਘ
ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰਵਾਰ ਉਨ੍ਹਾਂ ਪੱਛੋਤਾਵਣਾ ਈ।
ਰੁਪਇਆ ਚਾਹੇ ਡਾਲਰ ਦੇ ਮੁਕਾਬਲੇ ਕਮਜ਼ੋਰ ਪਰ ਸਥਿਤੀ ਬਿਲਕੁਲ ਠੀਕ- ਸੀਤਾਰਮਣ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।
2027 ‘ਚ ਪੰਜਾਬ ਦੇ ਲੋਕ ਕਾਂਗਰਸੀਆਂ, ਅਕਾਲੀਆਂ ਤੇ ਭਾਜਪਾਈਆਂ ਦਾ ਸਫ਼ਾਇਆ ਕਰ ਦੇਣਗੇ- ਭਗਵੰਤ ਮਾਨ
ਗਲੀਆਂ ਹੋ ਜਾਣ ਸੁੰਞੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।
ਰਾਘਵ ਚੱਢਾ ਭਾਜਪਾ ਤੋਂ ਏਨਾ ਡਰਦੇ ਕਿਉਂ ਹਨ?- ਆਤਿਸ਼ੀ
ਹੁਣ ਰੱਬ ਡਾਢਾ ਵੀ ਡਰਦਾ, ਠਾਣੇਦਾਰਾਂ ਤੋਂ।
ਪੋਪ ਨੇ ਸਿਆਸਤਦਾਨਾਂ ਦੇ ਜੰਗ ਬਾਰੇ ਦਾਅਵਿਆਂ ਨੂੰ ਕੀਤਾ ਰੱਦ- ਇਕ ਖ਼ਬਰ
ਜੰਗ ਮਸਲੋਂ ਕਾ ਹੱਲ ਕਿਆ ਕਰੇਗੀ, ਜੰਗ ਤੋ ਖੁਦ ਏਕ ਮਸਲਾ ਹੈ।– ਸਾਹਿਰ ਲੁਧਿਆਣਵੀ
ਯੂ.ਏ.ਈ. ਨੇ ਪਾਕਿਸਤਾਨ ਨੂੰ ਦਿਤਾ ਹੋਇਆ 3.5 ਅਰਬ ਡਾਲਰ ਦਾ ਕਰਜ਼ਾ ਵਾਪਸ ਮੰਗਿਆ- ਇਕ ਖ਼ਬਰ
ਯਾਰੀ ਲੱਗੀ ‘ਤੇ ਲੁਆ ‘ਤੇ ਤਖ਼ਤੇ, ਟੁੱਟੀ ‘ਤੇ ਚੁਗਾਠ ਪੁੱਟ ਲਈ।
ਜੰਗ ਦੀ ਲਾਗਤ ਨਾਲ ਟਰੰਪ ਦੀਆਂ ਵਧੀਆਂ ਮੁਸ਼ਕਿਲਾਂ- ਇਕ ਖ਼ਬਰ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।
ਸੁਖਬੀਰ ਬਾਦਲ ਜਿੰਨੀਆਂ ਮਰਜ਼ੀ ਰੈਲੀਆਂ ਕਰ ਲਵੇ ਕਦੇ ਕਾਮਯਾਬ ਨਹੀਂ ਹੋਵੇਗਾ- ਗਿ. ਹਰਪ੍ਰੀਤ ਸਿੰਘ
ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।
ਇਟਲੀ ਨੇ ਅਮਰੀਕਾ ਨੂੰ ਆਪਣਾ ਫੌਜੀ ਅੱਡਾ ਦੇਣ ਤੋਂ ਕੀਤੀ ਨਾਂਹ- ਇਕ ਖ਼ਬਰ
ਦਾਲ਼ ਮੰਗੇ ਛੜਿਆਂ ਤੋਂ, ਨਾ ਸ਼ਰਮ ਗੁਆਂਢਣੇ ਆਵੇ।
=================================================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
29.03.2026
ਸਾਡੇ ਬਦਲੇ ਤੋਂ ਡਰ ਕੇ ਟਰੰਪ ਨੂੰ ਪਿੱਛੇ ਹਟਣਾ ਪਿਆ- ਇਰਾਨ
ਪੀਲਾ ਰੰਗ ਕਿਉਂ ਪੈ ਗਿਆ ਤੇਰਾ, ਭਾਬੋ ਮੈਨੂੰ ਰੋਜ਼ ਪੁੱਛਦੀ।
ਕੇਰਲ ‘ਚ ਚੋਣ ਕਮਿਸ਼ਨ ਦੀ ਚਿੱਠੀ ‘ਤੇ ਭਾਜਪਾ ਦੀ ਮੋਹਰ- ਇਕ ਖ਼ਬਰ
ਨੱਥਾ ਸਿੰਘ ਖੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।
ਜਾਇਦਾਦ ਲਈ ਪਤਨੀ ਨੇ ਆਪਣੇ ਪੁੱਤਰ ਹੱਥੋਂ ਹੀ ਕਰਵਾਇਆ ਪਤੀ ਦਾ ਕਤਲ- ਇਕ ਖ਼ਬਰ
ਚਿੱਟਾ ਹੋ ਗਿਆ ਲਹੂ ਭਰਾਵੋ, ਚਿੱਟਾ ਹੋ ਗਿਆ ਲਹੂ।
20 ਮਿੰਟ ਦੇ ਭਾਸ਼ਨ ‘ਚ ਮੋਦੀ ਜੀ ਆਪਣੀਆਂ ਸਿਫ਼ਤਾਂ ਹੀ ਕਰਦੇ ਰਹੇ- ਜੈ ਰਾਮ ਰਮੇਸ਼
ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜਿਉਣ।
ਸੁਤੰਤਰਤਾ ਸੰਗਰਾਮੀਆਂ ਦੇ ਨਾਮ ‘ਤੇ ਸਾਰੀਆਂ ਸਿਆਸੀ ਪਾਰਟੀਆਂ ਨੇ ਕੀਤੀ ਸਿਆਸਤ- ਫਰੀਡਮ ਫ਼ਾਈਟਰ ਸੰਸਥਾ
ਸ਼ੇਰਾਂ ਦੀਆਂ ਮਾਰਾਂ ‘ਤੇ, ਗਿੱਦੜ ਕਰਨ ਕਲੋਲਾਂ।
ਕਿਸਾਨਾਂ ਲਈ ਪੂਰੀ ਕਰਜ਼ਾ ਮੁਆਫ਼ੀ ਦਾ ਕੋਈ ਪ੍ਰਸਤਾਵ ਨਹੀਂ- ਨਿਰਮਲਾ ਸੀਥਾਰਮਨ
ਛੜੇ ਜੇਠ ਨੂੰ ਲੱਸੀ ਨਹੀਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।
ਜੁਡੀਸ਼ੀਅਲ ਕਮਿਸ਼ਨ ਨੇ ਹਰਿਆਣਾ ਗੁਰਦੁਆਰਾ ਕਮੇਟੀ ਦਾ ਪਾਸ ਕੀਤਾ ਬਜਟ ਰੱਦ ਕਰ ਦਿਤਾ- ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨੀਂ ਚੱਪਣੀ ਵਗਾਹ ਕੇ ਮਾਰੀ।
ਸ਼੍ਰੋਮਣੀ ਕਮੇਟੀ ਦੇ ਬਜਟ ਵਿਚ ਧਰਮ ਪ੍ਰਚਾਰ ਲਈ ਬਜਟ ਵਧਾਇਆ ਜਾਵੇ- ਗੁਰਪ੍ਰਤਾਪ ਸਿੰਘ ਵਡਾਲਾ
ਵਡਾਲਾ ਜੀ ਇੰਜ ਕਹੋ ਕਿ ਧਰਮ ਪ੍ਰਚਾਰ ਦਾ ਬਜਟ ਧਰਮ ਪ੍ਰਚਾਰ ‘ਤੇ ਹੀ ਖ਼ਰਚ ਕੀਤਾ ਜਾਵੇ।
ਸ਼੍ਰੋਮਣੀ ਅਕਾਲੀ ਦਲ ਦੀ ‘ਪੰਜਾਬ ਬਚਾਉ’ ਰੈਲੀ- ਇਕ ਖ਼ਬਰ
ਸੁਖਬੀਰ ਬਾਦਲ ਵਲੋਂ ਪੰਜਾਬ ਨੂੰ ਅਕਾਲੀ ਦਲ ਤੋਂ ਬਚਾਉਣ ਦੀ ਅਪੀਲ।
ਯਮਨ ਦੇ ਹੂਤੀ ਬਾਗ਼ੀ ਵੀ ਇਰਾਨ ਦੇ ਸਮਰਥਨ ‘ਚ ਉਤਰੇ- ਇਕ ਖ਼ਬਰ
ਅਣਦਾੜ੍ਹੀਆ ਸੁੱਕਾ ਨਾ ਲੰਘ ਜਾਵੇ, ਲੜ ਜਾਂ ਭ੍ਰਿੰਡ ਬਣ ਕੇ।
ਯੁੱਧ ਦੇ ਅੰਤ ਦਾ ਫ਼ੈਸਲਾ ਟਰੰਪ ਨਹੀਂ, ਅਸੀਂ ਕਰਾਂਗੇ- ਇਰਾਨ
ਜਿਊਣਾ ਮੌੜ ਵੱਢਿਆ ਨਾ ਜਾਵੇ, ਛਵ੍ਹੀਆਂ ਦੇ ਘੁੰਡ ਮੁੜ ਗਏ।
ਟੀ.ਐਮ.ਸੀ. ਅਤੇ ਭਾਜਪਾ ਦਾ ਮੁਕਾਬਲਾ ਮਹਾਂਭਾਰਤ ਵਰਗਾ ਯੁੱਧ ਹੋਵੇਗਾ- ਮਮਤਾ ਬੈਨਰਜੀ
ਕੁੰਢੀਆਂ ਦੇ ਸਿੰਙ ਫ਼ਸਣੇ, ਕੋਈ ਨਿੱਤਰੂ ਵੜੇਂਵੇਂ ਖਾਣੀ।
ਕੌਮੀ ਪਾਰਟੀਆਂ ਨੂੰ ਮਿਲੇ ਕੁੱਲ ਚੰਦੇ ਨਾਲੋਂ ਭਾਜਪਾ ਨੂੰ ਦਸ ਗੁਣਾ ਵੱਧ ਮਿਲਿਆ- ਇਕ ਖ਼ਬਰ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦੇ ਹੱਕ ਮਾਰ ਕੇ।
ਚੰਨ ਉੱਤੇ ‘ਸਰਦਾਰੀ’ ਲਈ ਚੀਨ ਅਤੇ ਅਮਰੀਕਾ ਵਿਚਾਲੇ ਦੌੜ- ਇਕ ਖ਼ਬਰ
ਬਿੱਲੋ ਦੀਆਂ ਝਾਂਜਰਾਂ ‘ਚ, ਮਿੱਤਰਾਂ ਦੀ ਜਾਨ ਏ।
ਮੁੱਖ ਮੰਤਰੀ ਨੇ ਸਰਕਾਰ ਦੇ ਚਾਰ ਸਾਲ ਦੇ ਦਾਅਵੇ ਵਧਾ ਚੜ੍ਹਾ ਕੇ ਪੇਸ਼ ਕੀਤੇ-ਪਰਤਾਪ ਸਿੰਘ ਬਾਜਵਾ
ਰੱਬ ਤੈਨੂੰ ਰੱਖੇ ਬੱਚਿਆ, ਨਿੱਤ ਝੂਠੀਆਂ ਗਵਾਹੀਆਂ ਦੇਵੇਂ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
24.03.2026
ਇਰਾਨ ਵਿਰੁੱਧ ਨਾਟੋ ਦੀ ਮਦਦ ਦੀ ਜ਼ਰੂਰਤ ਨਹੀਂ, ਅਮਰੀਕਾ ਇਕੱਲਾ ਹੀ ਕਾਫ਼ੀ ਹੈ- ਟਰੰਪ
ਦਾਖੇ ਹੱਥ ਨਾ ਅੱਪੜੇ, ਆਖੇ ਥੂਹ ਕੌੜੀ।
ਦਹਾਕਿਆਂ ਤੋਂ ਸਾਡਾ ਪਾਣੀ ਵਰਤ ਰਹੇ ਰਾਜਸਥਾਨ ਤੋਂ 1.44 ਲੱਖ ਕਰੋੜ ਰੁਪਏ ਵਸੂਲਾਂਗੇ- ਭਗਵੰਤ ਮਾਨ
ਵਿਹੜੇ ਆਈ ਜੰਞ, ਵਿੰਨ੍ਹੋਂ ਕੁੜੀ ਦੇ ਕੰਨ।
ਜਗਦੀਸ਼ ਸਿੰਘ ਝੀਂਡਾ ਅਤੇ ਦਾਦੂਵਾਲ ਦੇ ਹਮਾਇਤੀਆਂ ਵਿਚਕਾਰ ਝੜਪ- ਇਕ ਖ਼ਬਰ
ਅੰਨ੍ਹੇ ਝੋਟੇ, ਅਕਲੋਂ ਖੋਟੇ।
ਨਾਟੋ ਦੇਸ਼ਾਂ ਨੇ ਟਰੰਪ ਦੀ ਜੰਗ ਵਿਚ ਸ਼ਾਮਲ ਹੋਣ ਤੋਂ ਕੀਤੀ ਨਾਂਹ- ਖ਼ਬਰ
ਤੇਰੇ ਨਾਲ਼ ਨਾ ਤਿਲੰਗਿਆ ਜਾਣਾ, ਛੱਡ ਜਾਏਂ ਟੇਸ਼ਣ ‘ਤੇ।
ਦਿੱਲੀ ਵਲੋਂ ਪੰਜਾਬ ਨਾਲ ਕੀਤੇ ਗਏ ਵਿਤਕਰਿਆਂ ਨੂੰ ਦਰੁਸਤ ਕਰਨ ਲਈ ਅਕਾਲੀ ਦਲ ਵਚਨਬੱਧ- ਸੁਖਬੀਰ ਬਾਦਲ
ਐਨੇ ਸਾਲ ਕੁਰਸੀ ‘ਤੇ ਬੈਠ ਕੇ ਤੁਸੀਂ ਪਿਉ ਪੁੱਤ ਕੀ ਝੱਖ ਮਾਰਦੇ ਰਹੇ?
ਇਰਾਨੀ ਜ਼ਮੀਨ ‘ਤੇ ਕਬਜ਼ਾ ਕਰਨ ਦਾ ਇਰਾਦਾ ਨਹੀਂ- ਇਜ਼ਰਾਈਲੀ ਰਾਜਦੂਤ
ਇਰਾਨ ਕੋਈ ਚਾਕਲੇਟ ਐ ਜੋ ਮੂੰਹ ‘ਚ ਪਾ ਲਉਗੇ।
ਆਲੂਆਂ ਦੀ ਖੇਤੀ ਦਾ ਵਾਜਬ ਭਾਅ ਨਾ ਮਿਲਣ ‘ਤੇ ਕਿਸਾਨ ਪ੍ਰੇਸ਼ਾਨ- ਇਕ ਖ਼ਬਰ
ਕਿਸਾਨ ਨੂੰ ਪ੍ਰੇਸ਼ਾਨ ਰੱਖਣਾ ਖੇਤੀ ਨੀਤੀ ਦਾ ਹੀ ਹਿੱਸਾ ਹੈ।
ਰਾਜਸਥਾਨ ਵਲੋਂ ਪਾਣੀਆਂ ਦੀ ਰਾਇਲਟੀ ਦੇਣ ਤੋਂ ਨਾਂਹ, ਪੰਜਾਬ ਜਾਵੇਗਾ ਅਦਾਲਤ- ਭਗਵੰਤ ਮਾਨ
ਪਹਿਲਾਂ ਤੁਹਾਨੂੰ ਅਦਾਲਤਾਂ ‘ਚੋਂ ਕੀ ਮਿਲਿਆ? ਛਿੱਕੂ!
ਅਕਾਲੀ ਦਲ ਪੁਨਰ ਸੁਰਜੀਤ ਨੇ ਚੋਣ ਨਿਸ਼ਾਨ ‘ਤੱਕੜੀ’ ਉੱਤੇ ਦਾਅਵਾ ਠੋਕਿਆ- ਇਕ ਖ਼ਬਰ
ਮੈਨੂੰ ‘ਕੱਲੀ ਨੂੰ ਚੁਬਾਰਾ ਪਾ ਦੇ, ਰੋਹੀ ਵਾਲ਼ੀ ਜੰਡ ਵੱਢ ਕੇ।
ਸੁਖਬੀਰ ਬਾਦਲ ਦੇ ਸੱਤਾ ‘ਚ ਆਉਣ ਦੇ ਸੁਪਨੇ ਹੁਣ ਕਦੀ ਪੂਰੇ ਨਹੀਂ ਹੋਣਗੇ- ਕੁਲਦੀਪ ਸਿੰਘ ਧਾਲੀਵਾਲ
ਓਏ ਸਹੁਰੀ ਦਿਓ, ਮੈਨੂੰ ਸੁਪਨੇ ‘ਚ ਤਾਂ ਕੁਰਸੀ ‘ਤੇ ਬੈਠ ਲੈਣ ਦਿਉ।
ਟਰੰਪ ਦੀਆਂ ਅੱਖਾਂ ਦੀ ਰੜਕ ਬਣਿਆ ਕਿਊਬਾ- ਇਕ ਖ਼ਬਰ
ਮੇਰਾ ਜੇਠ ਬੜਾ ਟੁੱਟ ਪੈਣਾ, ਕੰਧ ਉੱਤੋਂ ਰਹੇ ਝਾਕਦਾ।
ਨਾਇਬ ਸਿੰਘ ਸੈਣੀ ਨੂੰ ਪਟਿਆਲੇ ‘ਚ ‘ਆਪ’ ਪਾਰਟੀ ਨੇ ਕਾਲ਼ੀਆਂ ਝੰਡੀਆਂ ਵਿਖਾਈਆਂ- ਇਕ ਖ਼ਬਰ
ਐਵੇਂ ਨਾ ਗੇੜੇ ਲਾਈਂ ਵੇ, ਪਿੰਡ ਪਹਿਰਾ ਲਗਦੈ।
ਮੋਦੀ ਨੇ ਇਰਾਨ ਦੇ ਰਾਸ਼ਟਰਪਤੀ ਨੂੰ ਕੀਤਾ ਫ਼ੋਨ- ਇਕ ਖ਼ਬਰ
ਬੜੀ ਦੇਰ ਕਰ ਦੀ, ਮਿਹਰਬਾਂ ਆਤੇ ਆਤੇ।
ਵਾਰੀ ਵਾਰੀ ਰਾਜ ਕਰਨ ਦੇ ਦਿਨ ਗਏ, ਹੁਣ ਲੋਕਾਂ ਦੀ ਵਾਰੀ- ਭਗਵੰਤ ਮਾਨ
ਪੱਤ ਝੜੇ ਪੁਰਾਣੇ ਮਾਹੀ ਵੇ, ਰੁੱਤ ਨਵਿਆਂ ਦੀ ਆਈ ਆ ਢੋਲਾ।
ਭਾਰਤ ਨੇ ਅਮਰੀਕੀ ਪੈਨਲ ਦੀ ‘ਪੱਖਪਾਤੀ’ ਧਾਰਮਕ ਆਜ਼ਾਦੀ ਰਿਪੋਰਟ ਰੱਦ ਕੀਤੀ- ਇਕ ਖ਼ਬਰ
ਪਰੇ ਹਟ ਜਾਹ ਬਲਦ ਸਿੰਙ ਮਾਰੂ, ਨੀ ਸੋਨੇ ਦੇ ਤਵੀਤ ਵਾਲ਼ੀਏ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
17.03.2026
ਵਰਕ ਆਰਡਰ ਜਾਰੀ ਹੋਣ ਦੇ ਬਾਵਜੂਦ ਨਗਰ ਨਿਗਮ ਵਲੋਂ ਸੜਕ ਦਾ ਕੰਮ ਸ਼ੁਰੂ ਨਹੀਂ ਕੀਤਾ ਜਾ ਰਿਹਾ- ਇਕ ਖ਼ਬਰ
ਫ਼ਾਈਲ ਨੂੰ ਪਹੀਏ ਲੱਗਣਗੇ ਫਿਰ ਹੀ ਅਗਾਂਹ ਨੂੰ ਤੁਰੂ।
ਚੋਣਾਂ ਦੇ ਮੌਸਮ ਵਿਚ ਹੀ ਸਾਧ ਰਾਮ ਰਹੀਮ ਨੂੰ ਹਾਈ ਕੋਰਟ ਵਲੋਂ ਕਲੀਨ ਚਿਟ ਕਿਉਂ?-ਇਕ ਸਵਾਲ
ਅੱਗੋਂ ਪਿੱਛੋਂ ਰਗੜ ਕੇ ਗੋਡੇ ’ਤੇ ਲਾਉਣਾ ਸਾਧ ਨੂੰ ਅਗਲਿਆਂ ਨੇ।
ਭਾਰਤ ‘ਚ ਸਾਡੇ ਭਾਈਵਾਲ ‘ਕਹਿਣਾ ਮੰਨਣ ਵਾਲੇ ਹਨ’- ਅਮਰੀਕਾ
ਘੜੇ ਦੀਆਂ ਮੱਛੀਆਂ।
ਘਬਰਾਉਣ ਦੀ ਜ਼ਰੂਰਤ ਨਹੀਂ, ਇਸ ਸੰਕਟ ਵਿਚੋਂ ਵੀ ਨਿਕਲਾਂਗੇ- ਮੋਦੀ
ਚੜ੍ਹ ਜਾ ਬੱਚਾ ਸੂਲੀ, ਰਾਮ ਭਲੀ ਕਰੇਗਾ।
ਰਾਜ ਸਭਾ ਮੈਂਬਰ ਸੰਤ ਸੀਚੇਵਾਲ ਨੇ ਪੰਜਾਬ ਦੇ ਰੁਕੇ ਹੋਏ ਵਿਕਾਸ ਫੰਡ ਜਾਰੀ ਕਰਨ ਦੀ ਕੀਤੀ ਮੰਗ- ਇਕ ਖ਼ਬਰ
ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ, ਟੁੱਟ ਪੈਣੇ ਦਰਜੀ ਨੇ।
ਪੰਜਾਬ ‘ਚ ਅਸੀਂ ਆਪਣੇ ਬਲਬੂਤੇ ‘ਤੇ ਹੀ ਸਤਾਈ ਦੀ ਚੋਣ ਲੜਾਂਗੇ- ਅਮਿਤ ਸ਼ਾਹ
ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।
ਅਮਿਤ ਸ਼ਾਹ ਦਾ ਭਾਸ਼ਨ ਸਿਵਾਇ ਖਾਲੀ ਸਿਆਸੀ ਨਾਹਰਿਆਂ ਦੇ ਕੁਝ ਨਹੀਂ- ਬਾਜਵਾ
ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।
ਸਰਕਾਰ ਦੀਆਂ ਨੀਤੀਆਂ ਕਾਰਨ ਲੋਕ ਕਿੰਨਾ ਕੁ ਬਰਦਾਸ਼ਤ ਕਰਨਗੇ- ਪ੍ਰਿਅੰਕਾ ਗਾਂਧੀ
ਬੀਬੀ, ਸਰਕਾਰ ਜਿੰਨਾ ਚਿਰ ਦਾਲ ਚੌਲ਼ ਦਿੰਦੀ ਰਹੂ।
ਟਰੰਪ ਨੇ 13 ਦਿਨਾਂ ਦੇ ਯੁੱਧ ’ਚ ਫੂਕ ਦਿਤੇ 26 ਅਰਬ ਡਾਲਰ- ਇਕ ਖ਼ਬਰ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲੀ ਕੰਧ ਟੱਪ ਕੇ।
ਸਾਨੂੰ ਡਬਲ ਇੰਜਨ ਦੀ ਲੋੜ ਨਹੀਂ, ਪੰਜਾਬ ਆਪਣੇ ਪੈਰਾਂ ‘ਤੇ ਖੜ੍ਹਾ ਹੋਣਾ ਜਾਣਦੈ- ਭਗਵੰਤ ਮਾਨ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।
ਅਮਿਤ ਸ਼ਾਹ ‘ਜੁਮਲਿਆਂ’ ਦੀ ਬਜਾਇ ਪੰਜਾਬ ਦੇ ਹਿਤਾਂ ਲਈ ਕੁਝ ਕਰ ਕੇ ਜਾਣ-ਅਮਨ ਅਰੋੜਾ
ਉਹ ਫਿਰੇ ਨੱਥ ਘੜਾਉਣ ਨੂੰ, ਉਹ ਫਿਰੇ ਨੱਕ ਵਢਾਉਣ ਨੂੰ।
ਸੁਖਪਾਲ ਖਹਿਰਾ ਨੂੰ ਕਾਂਗਰਸ ਹਾਈ ਕਮਾਂਡ ਪਾਰਟੀ ‘ਚੋਂ ਬਰਖ਼ਾਸਤ ਕਰੇ- ਹਰਪਾਲ ਚੀਮਾ
ਲੂਣਾ ਆਖਦੀ ਰਾਜੇ ਸਲਵਾਨ ਤਾਈਂ, ਛੇਤੀ ਪੂਰਨ ਨੂੰ ਕਰੋ ਹਲਾਲ ਮੀਆਂ।
2027 ‘ਚ ਦੁਬਾਰਾ ਬਣੇਗੀ ‘ਆਪ’ ਦੀ ਸਰਕਾਰ- ਭਗਵੰਤ ਮਾਨ
ਪਾਪ ਪੁੰਨ ਨੀਂ ਜਿੰਦੜੀਏ ਤੇਰੇ, ਤੱਕੜੀ ‘ਤੇ ਤੋਲੇ ਜਾਣਗੇ।
ਭਾਰਤ ਦੁਨੀਆਂ ‘ਚ ਹਥਿਆਰਾਂ ਦਾ ਦੂਜਾ ਵੱਡਾ ਖ਼ਰੀਦਾਰ- ਇਕ ਖ਼ਬਰ
ਢਿੱਡੋਂ ਭੁੱਖੀ ਤੇ ਘੀਸੀ ‘ਤੇ ਜ਼ੋਰ।
ਇਰਾਨ ਦਾ ਨਵਾਂ ਸੁਪਰੀਮ ਲੀਡਰ ਵੀ ਛੇਤੀ ਹੀ ਮਾਰਿਆ ਜਾਵੇਗਾ- ਟਰੰਪ
ਜੀਹਨੇ ਕਾਲ਼ ਪਾਵੇ ਨਾਲ਼ ਬੰਨ੍ਹਿਆ, ਇਕ ਦਿਨ ਹੋਇਆ ਚਲਦਾ।
........................................................................................................................
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
ਰਾਜਨੀਤੀ ਹੁਣ ਪਹਿਲਾਂ ਵਰਗੀ ਨਹੀਂ ਰਹੀ, ਸੰਤਾਂ ਦੀ ਸੇਵਾ ਕਰਨਾ ਚਾਹੁੰਦੀ ਹਾਂ- ਨਵਜੋਤ ਕੌਰ ਸਿੱਧੂ
ਜ਼ਰੂਰ ਕਰੋ ਜੀ, ਸੰਤ ਵੀ ਸੋਹਣੀ ਸੇਵਾ ਕਰਦੇ ਐ।
ਪੰਜਾਬ ਕੇਸਰੀ ਗਰੁੱਪ ਨੇ ਤਿੰਨ ਸਾਲਾਂ ‘ਚ 65 ਕਰੋੜ ਤੋਂ ਵੱਧ ਦਾ ਘਪਲਾ ਕੀਤਾ- ਟੈਕਸ ਵਿਭਾਗ
ਬਗ਼ਲ ਮੇਂ ਛੁਰੀ, ਮੂੰਹ ਮੇਂ ਰਾਮ ਰਾਮ।
ਮੋਦੀ ਨੇ ਕੀਤੀ ਸਪੀਕਰ ਓਮ ਬਿਰਲਾ ਦੀ ਤਾਰੀਫ਼- ਇਕ ਖ਼ਬਰ
ਮੇਰੇ ਭੁੱਖ ਨਾ ਕਲੇਜਿਉਂ ਜਾਵੇ, ਮਿੱਤਰਾਂ ਦੇ ਮਿਲਣੇ ਦੀ।
ਇਰਾਨ ਦੇ ਰਾਸ਼ਟਰਪਤੀ ਨੇ ਗੁਆਂਢੀ ਦੇਸ਼ਾਂ ‘ਤੇ ਹਮਲਿਆਂ ਲਈ ਮੰਗੀ ਮੁਆਫ਼ੀ- ਇਕ ਖ਼ਬਰ
ਜੇਠਾ ਮੈਨੂੰ ਮਾਫ਼ ਕਰੀਂ, ਭੁੱਲ ਗਈ ਮੈਂ ਘੁੰਡ ਕੱਢਣਾ।
ਪੰਜਾਬ ਨੇ ਮਾਲੀਆ ਵਿਕਾਸ ਵਿਚ ਦੇਸ਼ ਦੇ ਪਹਿਲੇ ਤਿੰਨ ਸੂਬਿਆਂ ‘ਚ ਨਾਮ ਦਰਜ ਕਰਵਾਇਆ- ਵਿਤ ਮੰਤਰੀ ਚੀਮਾ
ਤੁਹਾਨੂੰ ਕੀ ਮਿਲਦਾ ਵਿਚੋਂ? ਬਾਬਾ ਜੀ ਦਾ ਠੁੱਲੂ।
ਅਮਰੀਕਾ ਨੂੰ ਆਪਣੇ ਫੌਜੀ ਅੱਡੇ ਦੇਣ ਤੋਂ ਸਪੇਨ ਨੇ ਕੀਤੀ ਨਾਂਹ- ਇਕ ਖ਼ਬਰ
ਤੇਰੇ ਲੱਡੂਆਂ ਤੋਂ ਨੀਂਦ ਪਿਆਰੀ, ਸੁੱਤੀ ਨਾ ਜਗਾਈਂ ਮਿੱਤਰਾ।
ਲੰਬੇ ਸਮੇਂ ਤੱਕ ਮੁੱਖ ਮੰਤਰੀ ਰਹਿਣ ਦਾ ਮੇਰਾ ਕਾਰਜਕਾਲ ਖ਼ਤਮ ਹੋਇਆ- ਨਿਤੀਸ਼ ਕੁਮਾਰ
ਚਾਰੇ ਕੰਨੀਆਂ ਮੇਰੀਆਂ ਵੇਖ ਖਾਲੀ, ਅਸੀਂ ਨਾਲ਼ ਨਹੀਂ ਕੁਝ ਲੈ ਚੱਲੇ।
ਅਮਰੀਕਾ-ਭਾਰਤ ਵਪਾਰ ਸਮਝੌਤੇ ਨੂੰ ਲੈ ਕੇ ਕਰਨਾਲ ਵਿਚ ਭਾਰਤੀ ਕਿਸਾਨ ਯੂਨੀਅਨ ਦੀ ਗਰਜ- ਇਕ ਖ਼ਬਰ
ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।
ਇਰਾਨ ਦੇ ਉੱਚ ਸੁਰੱਖਿਆ ਅਧਿਕਾਰੀ ਨੇ ਅਮਰੀਕਾ ਨਾਲ਼ ਗੱਲਬਾਤ ਤੋਂ ਕੀਤਾ ਇਨਕਾਰ- ਇਕ ਖ਼ਬਰ
ਲੱਤ ਮਾਰੂੰਗੀ ਪੰਜੇਬਾਂ ਵਾਲ਼ੀ, ਪਰ੍ਹਾਂ ਹੋ ਜਾ ਚੱਟੂ ਵੱਟਿਆ।
ਅਕਾਲੀ ਸਰਕਾਰ ਬਣਨ ‘ਤੇ ਪਿੰਡਾਂ ਨੂੰ ਦਿਤੀਆਂ ਜਾਣਗੀਆਂ ਸ਼ਹਿਰਾਂ ਵਰਗੀਆਂ ਸਹੂਲਤਾਂ- ਸੁਖਬੀਰ ਬਾਦਲ
ਜਿਹੜੇ ਮਿੱਠੀਆਂ ਜ਼ੁਬਾਨਾਂ ਵਾਲ਼ੇ, ਮਤਲਬ ਕੱਢ ਲੈਣਗੇ।
ਸੌਦਾ ਸਾਧ ਨੂੰ ਬਰੀ ਕਰਨ ਦਾ ਫ਼ੈਸਲਾ ਹੈਰਾਨੀਜਨਕ- ਗਿਆਨੀ ਰਘਬੀਰ ਸਿੰਘ
ਗਿਆਨੀ ਜੀ, ਇਹਦੇ ‘ਚ ਹੈਰਾਨੀ ਵਾਲ਼ੀ ਕਿਹੜੀ ਗੱਲ ਐ?
ਜੰਗ ਦਾ ਸੇਕ ਪਹੁੰਚਿਆ ਭਾਰਤੀ ਰਸੋਈ ਤੱਕ, ਗੈਸ ਸਿਲੰਡਰ ਹੋਇਆ ਮਹਿੰਗਾ- ਇਕ ਖ਼ਬਰ
ਉੱਚਾ ਹੋ ਗਿਆ ਅੰਬਰ ਦਾ ਤਾਰਾ, ਜਲ ਵਿਚ ਰੋਈਆਂ ਮੱਛੀਆਂ।
ਜ਼ਮੀਨੀ ਹਕੀਕਤ ਤੋਂ ਕੋਰਾ ਸੁਖਬੀਰ ਬਾਦਲ ਹਵਾਈ ਕਿਲ੍ਹੇ ਬਣਾ ਰਿਹਾ ਹੈ- ਭਗਵੰਤ ਮਾਨ
ਤੇਰੇ ਨਾਲ ਨਾ ਤਲੰਗਿਆ ਜਾਣਾ, ਛੱਡ ਜਾਏਂ ਟੇਸ਼ਣ ‘ਤੇ।
ਗੁਰਦੁਆਰਾ ਅੰਬ ਸਾਹਿਬ ਜ਼ਮੀਨ ਘਪਲੇ ਬਾਰੇ ਪੜਤਾਲੀਆ ਕਮੇਟੀ ਦੀ ਮੀਟਿੰਗ ਹੋਈ- ਇਕ ਖ਼ਬਰ
ਇਸ ਮੀਟਿੰਗ ਵਿਚ ਕੰਮ ‘ਤੇ ਮਿੱਟੀ ਪਾਉਣ ਸਬੰਧੀ ਵਿਚਾਰਾਂ ਹੋਈਆਂ।
ਪੰਜਾਬ ਦੀ ਵਿਤੀ ਸਥਿਤੀ ‘ਤੇ ਵ੍ਹਾਈਟ ਪੇਪਰ ਜਾਰੀ ਕਰੇ ਪੰਜਾਬ ਸਰਕਾਰ- ਰਾਜਾ ਵੜਿੰਗ
ਪਤਲੋ ਦੀ ਗਰਦਨ ‘ਤੇ, ਸੱਪ ਫੂਕਰਾਂ ਮਾਰੇ।
ਚੁੰਝਾਂ-ਪ੍ਹੌਂਚੇ - Nirmal Singh Kandhalvi
02.03.2026
ਐਪਸਟੀਨ ਨਾਲ਼ ਸਬੰਧਾਂ ਬਾਰੇ ਟਰੰਪ ਤੋਂ ਪੁੱਛੇ ਜਾਣ ਸਵਾਲ- ਹਿਲੇਰੀ ਕਲਿੰਟਨ
ਵੇ ਕੌਣ ਸੀ ਤੇਰੇ ਨਾਲ, ਦੱਸ ਕਿੱਥੇ ਗਿਆ ਸੈਂ।
ਸ਼ੇਖ਼ ਹਸੀਨਾ ਨੇ ਕੀਤੀ ਵਤਨ ਵਾਪਸੀ ਦੀ ਤਿਆਰੀ- ਇਕ ਖ਼ਬਰ
ਲਗਦੈ ਕੋਈ ਖਿਚੜੀ ਪੱਕ ਗਈ ਐ ਅੰਦਰੋ-ਅੰਦਰੀ।
ਆਬਕਾਰੀ ਮਾਮਲੇ ‘ਚ ਕੇਜਰੀਵਾਲ, ਸਿਸੋਦੀਆ ਤੇ 21 ਹੋਰ ਵਿਅਕਤੀ ਬਰੀ- ਇਕ ਖ਼ਬਰ
ਚਲੋ 27 ਦੀਆਂ ਚੋਣਾਂ ਲਈ ਕੁਝ ਮਸਾਲਾ ਤਾਂ ਮਿਲਿਆ ਬਈ।
ਸ਼੍ਰੋਮਣੀ ਕਮੇਟੀ ਮੁਕਤ ਕਰਵਾਉਣ ਲਈ ਪੰਥ ਪ੍ਰਸਤ ਧਿਰਾਂ ਇਕ ਮੰਚ ‘ਤੇ ਇਕੱਠੀਆਂ ਹੋਣ- ਗੁਰਵਤਨ ਸਿੰਘ ਮੁਲਤਾਨੀ
ਨਾ ਨੌਂ ਮਣ ਤੇਲ ਹੋਵੇ ਨਾ ਰਾਧਾ ਨੱਚੇ।
ਕਰਜ਼ੇ ਦਾ ਵਿਆਜ਼ ਦੇਣ ਲਈ ਕੋਲ ਪੈਸੇ ਨਹੀਂ ਤੇ ਨਵੇਂ ਐਲਾਨਾਂ ਲਈ ਪੈਸਾ ਕਿੱਥੋਂ ਆਵੇਗਾ?- ਰਾਜਾ ਵੜਿੰਗ
ਪੱਲੇ ਨਹੀਂ ਧੇਲਾ, ਤੇ ਕਰਦੀ ਮੇਲਾ ਮੇਲਾ।
‘ਮੇਰੀ ਰਸੋਈ’ ਯੋਜਨਾ ਸਿਰਫ਼ ਇਕ ਚੋਣ ਜੁਮਲਾ- ਮਨੋਰੰਜਨ ਕਾਲੀਆ
ਕਾਲੀਆ ਸਾਹਿਬ ਜ਼ਰਾ ਧਿਆਨ ਕਰੋ ਇਹ ਜੁਮਲਿਆਂ ਦੀ ਪਿਰਤ ਕੀਹਨੇ ਸ਼ੁਰੂ ਕੀਤੀ ਸੀ।
ਹਰਿਆਣਾ ਸਰਕਾਰ ਇਕ ਇਕ ਪੈਸੇ ਦਾ ਹਿਸਾਬ ਰੱਖਦੀ ਹੈ- ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ
ਸੈਣੀ ਸਾਹਿਬ ਜੇ ਤੁਸੀਂ ਹਿਸਾਬ ਨਾ ਵੀ ਰੱਖੋਂ ਤਾਂ ਤੁਹਾਨੂੰ ਪੁੱਛਣਾ ਕੀਹਨੇ ਐਂ!
ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਨੂੰ ਝਟਕਾ, ਗਰੀਨ ਪਾਰਟੀ ਨੇ ਜਿੱਤੀ ਸੰਸਦੀ ਸੀਟ- ਇਕ ਖ਼ਬਰ
ਕੀਹਨੇ ਖਿੱਚ ਲਈ ਮੇਰੀ ਪਤੰਗ ਵਾਲੀ ਡੋਰ।
ਪਾਸਟਰ ਨਰੂਲਾ ਦਾ ਚਮਤਕਾਰੀ ਇਲਾਜ ਦਾ ਦਾਅਵਾ ਹਾਈ ਕੋਰਟ ‘ਚ ਫ਼ਸਿਆ, ਨੋਟਿਸ ਜਾਰੀ- ਇਕ ਖ਼ਬਰ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।
ਪਾਕਿ- ਅਫ਼ਗਾਨਿਸਤਾਨ ਵਿਚਕਾਰ ਖੁੱਲ੍ਹੀ ਜੰਗ ਸ਼ੁਰੂ- ਇਕ ਖ਼ਬਰ
ਸਾਡੀ ਸਰਕਾਰ ਆਉਣ ‘ਤੇ ਗੈਂਗਸਟਰਾਂ ਤੇ ਨਸ਼ਾ ਤਸਕਰਾਂ ਨੂੰ ਅੱਤਿਵਾਦੀ ਐਲਾਨਿਆ ਜਾਵੇਗਾ- ਸੁਖਬੀਰ ਬਾਦਲ
ਅੱਜ ਮੇਰੇ ਅਮਲੀ ਦੇ, ਫੀਮ ਰਗ਼ਾਂ ਵਿਚ ਬੋਲੇ।
ਅਮਰੀਕੀ ਦਬਾਅ ਹੇਠ ਪ੍ਰਧਾਨ ਮੰਤਰੀ ਮੋਦੀ ਨੇ ਕੀਤਾ ਵਪਾਰ ਸਮਝੌਤਾ- ਰਾਹੁਲ ਗਾਂਧੀ
ਗੱਭਰੂ ਨੇ ਬਾਂਹ ਫੜ ਲਈ, ਮੈਨੂੰ ਕੱਚੀਆਂ ਤ੍ਰੇਲੀਆਂ ਆਈਆਂ।
ਪੰਜਾਬ ‘ਚ ਧਰਮ ਪ੍ਰੀਵਰਤਨ ਹੋ ਰਿਹੈ- ਅਮਿਤ ਸ਼ਾਹ
ਸਿੱਖ ਤਾਂ ਆਟੇ ਦੀ ਤੌਣ ਵਾਂਗ ਨੇ, ਬਾਹਰ ਕਾਂ ਪੈਂਦੇ ਹਨ ਤੇ ਅੰਦਰ ਚੂਹੇ ਟੁੱਕਦੇ ਨੇ।
ਭਾਰਤ ਵਿਚ ਹੁਣ ਸਿਮ ਕਾਰਡ ਬਿਨਾਂ ਵਟਸਐਪ ਨਹੀਂ ਚੱਲੇਗਾ- ਇਕ ਖ਼ਬਰ
ਲਉ ਜੀ ਅਗਲਿਆਂ ਨੇ ਬੰਨ੍ਹ ਦਿਤਾ ਗੱਡੇ ਨਾਲ ਕੱਟਾ!
ਖਰੜ ਵਿਚ ਪਹਾੜ ਅਤੇ ਜੰਗਲ ਕੱਟ ਕੇ ਗ਼ੈਰ-ਕਾਨੂੰਨੀ ਪਲਾਟ ਅਤੇ ਫ਼ਾਰਮ ਹਾਊਸ ਵੇਚ ਰਿਹੈ ਭੂ-ਮਾਫ਼ੀਆ- ਇਕ ਖ਼ਬਰ
ਚੋਰਾਂ ਦੇ ਕੱਪੜੇ ਤੇ ਲਾਠੀਆਂ ਦੇ ਗਜ਼।
===========================================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
24.02.2026
‘ਆਪ’ ਸਰਕਾਰ ਅਫ਼ਸਰਸ਼ਾਹੀ ਦਾ ਕਰ ਰਹੀ ਹੈ ਸਿਆਸੀਕਰਣ- ਸੁਨੀਲ ਜਾਖੜ
ਜਾਖੜ ਸਾਹਿਬ ਜ਼ਰਾ ਉੱਪਰ ਵਲ ਵੀ ਨਜ਼ਰ ਮਾਰ ਲੈਣੀ ਸੀ।
ਏ.ਆਈ. ਦਾ ਪ੍ਰਯੋਗ ਵਧਣ ਕਾਰਨ ਘਟ ਰਹੀਆਂ ਨੇ ਦਾਖ਼ਲਾ ਪੱਧਰ ਦੀਆਂ ਨੌਕਰੀਆਂ- ਇਕ ਰਿਪੋਰਟ
ਆਪੇ ਫਾਥੜੀਏ ਤੈਨੂੰ ਕੌਣ ਛੁਡਾਵੇ।
ਗਿਆਨੀ ਰਘਬੀਰ ਸਿੰਘ ਨੇ ਬਾਦਲਾਂ ਦੇ ਪਰਖਚੇ ਉਡਾਏ ਤੇ ਸਰਬੱਤ ਖ਼ਾਲਸਾ ਬੁਲਾਉਣ ਦੀ ਗੱਲ ਕੀਤੀ- ਇਕ ਖ਼ਬਰ
ਤਾਲੋਂ ਘੁੱਥੀ ਡੂੰਮਣੀ ਬੋਲੇ ਆਲ ਪਤਾਲ।
ਰੈਲੀਆਂ ਤੇ ਯਾਤਰਾਵਾਂ ਨਾਲ ਨਸ਼ਾ ਖ਼ਤਮ ਨਹੀਂ ਹੋ ਸਕਦਾ- ਰਾਜਾ ਵੜਿੰਗ
ਤੱਤੇ ਪਾਣੀਆਂ ਨਾਲ ਅੱਗਾਂ ਨਹੀਂ ਬੁਝਦੀਆਂ।
27 ਦੀਆਂ ਚੋਣਾਂ ਲਈ ਸਿਆਸੀ ਧਿਰਾਂ ਦੀਆਂ ਲੱਖਾਂ ਪਰਵਾਸੀ ਮਜ਼ਦੂਰਾਂ ਉਤੇ ਨਜ਼ਰਾਂ ਸਵੱਲੀਆਂ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।
ਸੱਤਾ ‘ਚ ਆਉਂਦਿਆਂ ਹੀ ਪੰਜਾਬ ਵਿਚ ਗੈਂਗਸਟਰ ਖ਼ਤਮ ਕਰਾਂਗੇ- ਨਾਇਬ ਸੈਣੀ
ਸੱਦੀ ਨਾ ਬੁਲਾਈ, ਮੈਂ ਲਾੜੇ ਦੀ ਤਾਈ।
ਡਾ. ਨਵਜੋਤ ਕੌਰ ਸਿੱਧੂ ਸੰਭਾਲਣਗੇ ਨਵੀਂ ਪਾਰਟੀ ਦੀ ਕਮਾਂਡ- ਇਕ ਖ਼ਬਰ
ਨਾਂ ਦੱਸ ਜਾ ਮੁਟਿਆਰੇ, ਘਰ ਤੇਰਾ ਲੱਭ ਲਾਂਗੇ।
1947 ਦੀ ਵੰਡ ਪਿੱਛੋਂ ਅੱਜ ਵੀ ਦਿੱਲੀ ਵਿਚ ਪੰਜਾਬੀ ਭਾਸ਼ਾ ਨੂੰ ਉਸ ਦਾ ਬਣਦਾ ਹੱਕ ਨਹੀਂ ਮਿਲਿਆ- ਇਕ ਖ਼ਬਰ
ਓ ਭਾਈ, ਜਿੱਥੇ ਰਾਜ- ਭਾਸ਼ਾ ਦਾ ਦਰਜਾ ਮਿਲਿਆ ਹੋਇਐ, ਉੱਥੇ ਆ ਕੇ ਹਾਲ ਦੇਖ ਲੈ।
ਸ਼੍ਰੋਮਣੀ ਕਮੇਟੀ ‘ਚ ਫ਼ੈਲੇ ਭ੍ਰਿਸ਼ਟਾਚਾਰ ਲਈ ਬਾਦਲ ਪਰਵਾਰ ਜ਼ਿੰਮੇਵਾਰ- ਗਿਆਨੀ ਰਘਬੀਰ ਸਿੰਘ
ਬੋਤਲ ਦਾਰੂ ਦੀ, ਜੱਟ ਚਾੜ੍ਹ ਗਿਆ ਖੁੰਢਾਂ ‘ਤੇ ਬਹਿ ਕੇ।
ਅਮਰੀਕੀ ਸੁਪਰੀਮ ਕੋਰਟ ਨੇ ਟਰੰਪ ਨੂੰ ਟੈਰਿਫ਼ ਦਾ ਲਗਾਇਆ ‘ਕਰੰਟ’- ਇਕ ਖ਼ਬਰ
ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲਾ ਤਿਲਕ ਗਿਆ।
ਸੁਖਬੀਰ ਦੇ ਕਹਿਣ ‘ਤੇ ਗੁਰਦੁਆਰਿਆਂ ਦੀਆਂ ਜ਼ਮੀਨਾਂ ਵੇਚੀਆਂ ਜਾ ਰਹੀਆਂ ਹਨ- ਗਿਆਨੀ ਹਰਪ੍ਰੀਤ ਸਿੰਘ
ਦੇਖੋ ਨੀ ਅਮਲੀ ਵੇਚ ਰਿਹਾ, ਘਰ ਦੇ ਤਵੇ ਪਰਾਤਾਂ।
ਅਕਾਲੀ ਦਲ ਅਤੇ ਭਾਜਪਾ ਵਿਚਕਾਰ ਅਜੇ ਕੋਈ ਚੋਣ ਸਮਝੌਤਾ ਨਹੀਂ- ਇਕ ਖ਼ਬਰ
ਤੇਰੀ ਮੇਰੀ ਇਉਂ ਲੱਗ ਜਾਏ, ਜਿਵੇਂ ਗੁੱਤ ਦੀ ਪਰਾਂਦੇ ਨਾਲ ਯਾਰੀ।
ਸਾਡੀ ਸਰਕਾਰ ਆਉਣ ਤੇ ਅਸੀਂ ਬੁਢਾਪਾ ਪੈਂਨਸ਼ਨ 3100 ਕਰ ਦਿਆਂਗੇ- ਸੁਖਬੀਰ ਬਾਦਲ
ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।
ਯੂਰਪੀ ਦੇਸ਼ ਆਪਣੀ ਰੱਖਿਆ ਲਈ ਖ਼ੁਦਮੁਖਤਿਆਰੀ ਦਾ ਰਾਹ ਚੁਣਨ- ਬਰਤਾਨਵੀ ਪ੍ਰਧਾਨ ਮੰਤਰੀ
ਆਪਣ ਹਥੀ ਆਪਣਾ ਆਪੇ ਹੀ ਕਾਜੁ ਸਵਾਰੀਐ। (ਗੁਰੂ ਗ੍ਰੰਥ ਸਾਹਿਬ- 474)
ਬੰਗਲਾ ਦੇਸ਼ ਗੁਆਂਢੀ ਦੇਸ਼ਾਂ ਨਾਲ ਸਨਮਾਨਜਨਕ ਰਿਸ਼ਤੇ ਚਾਹੁੰਦਾ ਹੈ- ਪ੍ਰਧਾਨ ਮੰਤਰੀ ਰਹਿਮਾਨ
ਦੋ ਪੈਰ ਘੱਟ ਤੁਰਨਾ ਪਰ ਤੁਰਨਾ ਮੜਕ ਦੇ ਨਾਲ਼।
===========================================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
16.02.2026
ਰਾਹੁਲ ਗਾਂਧੀ ‘ਤੇ ਭੜਕੀ ਨਵਜੋਤ ਕੌਰ ਸਿੱਧੂ, ਉਸ ਨੂੰ ਪੱਪੂ ਕਿਹਾ- ਇਕ ਖ਼ਬਰ
ਚੁੱਕੀ ਹੋਈ ਲੰਬੜਾਂ ਦੀ, ਗਾਲ਼ ਬਿਨਾਂ ਨਾ ਬੋਲੇ।
ਅਮਰੀਕਾ ਨੇ ਐਚ 1 ਬੀ ਵੀਜ਼ਿਆਂ ਉੱਪਰ ਲਾਈਆਂ ਸਖ਼ਤ ਪਾਬੰਦੀਆਂ- ਇਕ ਖ਼ਬਰ
ਐਵੇਂ ਨਾ ਵੱਢਿਆ ਜਾਈਂ ਵੇ, ਪਿੰਡ ਪਹਿਰਾ ਲਗਦੈ।
ਦਸ ਸਾਲਾਂ ਵਿਚ ਦੇਸ਼ ਭਰ ਦੇ 93000 ਤੋਂ ਵੱਧ ਸਕੂਲਾਂ ਨੂੰ ਲੱਗੇ ਤਾਲੇ- ਇਕ ਸਰਕਾਰੀ ਰਿਪੋਰਟ
ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।
ਨਵੀਂ ਸਿਆਸੀ ਸਟੇਜ ਦੀ ਭਾਲ ਵਿਚ ਨਵਜੋਤ ਸਿੰਘ ਸਿੱਧੂ- ਇਕ ਖ਼ਬਰ
ਚਲ ਉੜ ਜਾ ਰੇ ਪੰਛੀ ਕਿ ਅਬ ਯੇਹ ਦੇਸ਼ ਹੂਆ ਬੇਗਾਨਾ।
ਮੇਰੀ ਟਿੱਪਣੀ ਕਿਸੇ ਜਾਤੀ ਵਿਸ਼ੇਸ਼ ਜਾਂ ਕਿਸੇ ਭਾਈਚਾਰੇ ਵਿਰੁੱਧ ਨਹੀਂ ਸੀ- ਬਾਜਵਾ
ਆਕੜਦੈਂ! ਅਸੀਂ ਸਾਨ੍ਹ ਹੁੰਨੇ ਆਂ! ਹੁਣ ਮੋਕ ਕਿਉਂ ਮਾਰਦੈਂ! ਗਊ ਦਾ ਜਾਇਆ ਜੁ ਹੋਇਆ!
ਰਾਹੁਲ ਤੇ ਕਾਂਗਰਸ ਨੂੰ ਸਿਆਸਤ ਤੋਂ ਹਟਾਉਣ ਦਾ ਸਮਾਂ ਆ ਗਿਆ ਹੈ- ਭਾਜਪਾ
ਗ਼ਲੀਆਂ ਹੋ ਜਾਣ ਸੁੰਞੀਆਂ ਤੇ ਵਿਚ ਮਿਰਜ਼ਾ ਯਾਰ ਫਿਰੇ।
ਐਲ.ਜੀ. ਵਲੋਂ ਦਿੱਲੀ ਗੁਰਦੁਆਰਾ ਕਮੇਟੀ ਦਾ ਕਾਰਜਕਾਲ 250 ਦਿਨਾਂ ਲਈ ਵਧਾਉਣਾ ਗੁਰਦੁਆਰਾ ਐਕਟ ਦੀ ਉਲੰਘਣਾ- ਇਕ ਖ਼ਬਰ
ਮਿੱਠੇ ਯਾਰ ਦੇ ਬਰੋਬਰ ਬਹਿ ਕੇ, ਮਿੱਠੇ ਮਿੱਠੇ ਬੇਰ ਚੁਗੀਏ।
ਹਰਨਾਮ ਸਿੰਘ ਧੁੰਮਾ ਵਲੋਂ ਭੂਮੀ ਪੂਜਨ ਦੀ ਸਿੱਖ ਯੂਥ ਫੈਡਰੇਸ਼ਨ ਨੇ ਕੀਤੀ ਨਿਖੇਧੀ- ਇਕ ਖ਼ਬਰ
ਕਰੀ ਜਾਉ ਨਿਖੇਧੀ ਜਿੰਨੀ ਮਰਜ਼ੀ, ਅਗਲਾ ਟਿੱਚ ਕਰ ਕੇ ਨਹੀਂ ਜਾਣਦਾ।
ਅਮਰੀਕਾ ਨੇ ਹਮੇਸ਼ਾ ਸਾਨੂੰ ਇਸਤੇਮਾਲ ਕੀਤਾ- ਪਾਕਿਸਤਾਨ ਰੱਖਿਆ ਮੰਤਰੀ ਖਵਾਜਾ ਆਸਿਫ਼
ਪਾਟੀ ਲੀਰ ਪੁਰਾਣੀ ਵਾਙੂੰ, ਟੰਗ ਗਿਆ ਵਿਚ ਕਿੱਕਰਾਂ।
ਕੈਨੇਡਾ ‘ਚ 250 ਕਿਲੋਗ੍ਰਾਮ ਡਰੱਗਜ਼ ਨਾਲ ਪੰਜਾਬੀ ਟਰੱਕ ਡਰਾਈਵਰ ਗ੍ਰਿਫ਼ਤਾਰ- ਇਕ ਖ਼ਬਰ
ਸ਼ਾਬਾਸ਼ ਪੁੱਤਰੋ ਕਰ ਦਿਉ ਪੰਜਾਬ ਦਾ ਨਾਮ ਰੌਸ਼ਨ ਸਾਰੇ ਕੈਨੇਡਾ ‘ਚ।
19 ਫ਼ਰਵਰੀ ਦੀ ਸ਼੍ਰੋਮਣੀ ਕਮੇਟੀ ਦੀ ਅੰਤ੍ਰਿੰਗ ਕਮੇਟੀ ਦੀ ਮੀਟਿੰਗ ਵਿਚ ਪੰਥਕ ਮਸਲੇ ਵਿਚਾਰੇ ਜਾਣਗੇ- ਇਕ ਖ਼ਬਰ
ਕਿ ਸ਼੍ਰੋਮਣੀ ਕਮੇਟੀ ਦੀ ਹੋਰ ਕਿਹੜੀ ਕਿਹੜੀ ਜ਼ਮੀਨ ਕੌਡੀਆਂ ਦੇ ਭਾਅ ਵੇਚੀ ਜਾ ਸਕਦੀ ਹੈ।
ਕੈਪਟਨ ਅਮਰਿੰਦਰ ਸਿੰਘ ਲਈ ਕਾਂਗਰਸ ਦੇ ਦਰਵਾਜ਼ੇ ਖੁੱਲ੍ਹੇ- ਭੂਪੇਸ਼ ਪਟੇਲ
ਤੈਨੂੰ ਚੰਦ ਦੇ ਬਹਾਨੇ ਦੇਖਾਂ, ਕੋਠੇ ਉੱਤੇ ਆ ਜਾ ਮਿੱਤਰਾ।
ਸਿੱਖ ਜਥੇ ਦੇ ਬਹਾਨੇ ਪਾਕਿਸਤਾਨ ਗਈ ਹੋਈ ਸਰਬਜੀਤ ਕੌਰ ਹੁਣ ਪੱਕੇ ਤੌਰ ‘ਤੇ ਪਾਕਿਸਤਾਨ ਹੀ ਰਹੇਗੀ- ਇਕ ਖ਼ਬਰ
ਚੁੰਨੀ ਰੰਗ ਦੇ ਲਲਾਰੀਆ ਮੇਰੀ, ਮਿੱਤਰਾਂ ਦੇ ਰੰਗ ਵਰਗੀ।
ਕੇਰਲ ਵਿਧਾਨ ਸਭਾ ਵਿਚ ‘ਵੀ ਬੀ-ਜੀ ਰਾਮ ਜੀ’ ਸਕੀਮ ਵਾਪਸ ਲੈਣ ਦੀ ਮੰਗ ਵਾਲਾ ਮਤਾ ਪੇਸ਼- ਇਕ ਖ਼ਬਰ
ਤੇਰੇ ਖੁਸ਼ਕ ਮੱਕੀ ਦੇ ਦਾਣੇ, ਮਿੱਤਰਾਂ ਨੇ ਨਹੀਉਂ ਚੱਬਣੇ।
ਭਾਰਤ-ਅਮਰੀਕਾ ਵਪਾਰ ਸਮਝੌਤੇ ਨੂੰ ਲੈ ਕੇ ਭਗਵੰਤ ਮਾਨ ਦੀ ਚੁੱਪੀ ‘ਤੇ ਪਰਗਟ ਸਿੰਘ ਨੇ ਚੁੱਕੇ ਸਵਾਲ- ਇਕ ਖ਼ਬਰ
ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।
==============================================================================
ਚੁੰਝਾਂ-ਪ੍ਹੌਂਚੇ
ਸਰਕਾਰੀ ਸਕੂਲਾਂ ‘ਚ ਭਰੋਸਾ ਕਾਇਮ ਕਰਨਾ ਸਮੇਂ ਦੀ ਮੁੱਖ ਲੋੜ- ਰਾਜਿੰਦਰ ਗੁਪਤਾ
ਅਧਿਆਪਕ, ਸਿਆਸਤਦਾਨ ਅਤੇ ਵੱਡੇ ਅਫ਼ਸਰ ਆਪਣੇ ਬੱਚੇ ਉੱਥੇ ਦਾਖ਼ਲ ਕਰਵਾਉਣ, ਭਰੋਸਾ ਤਾਂ ਸਕੂਲਾਂ ਵਲ ਭੱਜਿਆ ਆਏਗਾ।
ਜਿਨ੍ਹਾਂ ਨੂੰ ਬੱਲਾ ਫੜਨਾ ਨਹੀਂ ਆਉਂਦਾ, ਉਹ ਕ੍ਰਿਕਟ ਐਸੋਸੀਏਸ਼ਨਾਂ ਵਿਚ- ਸੁਪਰੀਮ ਕੋਰਟ
ਸੁਪਰੀਮ ਕੋਰਟ ਜੀ ਕਿੱਥੇ ਛਿੱਕਾ ਮਾਰ ਦਿਤਾ, ਹੁਣ ਬਚ ਕੇ ਰਹਿਓ।
ਕੁਰਬਾਨੀਆਂ ਦੇਣ ‘ਚ ਪੰਜਾਬ ਹਮੇਸ਼ਾ ਮੋਹਰੀ ਰਿਹਾ- ਭਗਵੰਤ ਮਾਨ
ਖਾਣ ਪੀਣ ਨੂੰ ਬਾਂਦਰੀ ਤੇ ਧੌਣ ਭੰਨਾਉਣ ਨੂੰ ਜੁੰਮਾ।
‘ਆਪ’ ਅਤੇ ਕਾਂਗਰਸ ਦੋਵੇਂ ਕੇਂਦਰ ਦੇ ਬਜਟ ਦੀ ਮੂਲ ਭਾਵਨਾ ਨੂੰ ਸਮਝਣ ਦੇ ਅਸਮਰੱਥ- ਜਾਖੜ
ਇਸ ਬਜਟ ਦੀ ਮੂਲ ਭਾਵਨਾ ਦੀ ਸਮਝ ਭਾਜਪਾ ‘ਚ ਜਾਣ ਨਾਲ ਹੀ ਆਉਂਦੀ ਹੈ।
ਰਾਹੁਲ ਗਾਂਧੀ ਦੇ ਬਿਆਨ ਉੱਤੇ ਲੋਕ ਸਭਾ ‘ਚ ਹੰਗਾਮਾ- ਇਕ ਖ਼ਬਰ
ਹੰਗਾਮਾ ਹੈ ਕਿਉਂ ਬਰਪਾ, ਕੁਛ ਗ਼ਲਤ ਨਹੀਂ ਬੋਲਾ ਹੈ।
ਸ੍ਰੀ ਦਰਬਾਰ ਸਾਹਿਬ ਦੇ ਮੁਲਾਜ਼ਮਾਂ ਦੀ ਵਰਦੀ ਬਦਲੀ- ਇਕ ਖ਼ਬਰ
ਇਕੱਲੀ ਵਰਦੀ ਨਹੀਂ, ਇਨ੍ਹਾਂ ਦੀ ਬੋਲ-ਬਾਣੀ ਸੁਧਾਰਨ ਲਈ ਸਿਖਲਾਈ ਵੀ ਦੇਵੋ।
ਪੰਜਾਬ ਕਾਂਗਰਸ ਸਪਸ਼ਟ ਕਰੇ ਕਿ ਉਹ ਨਸ਼ਾ ਵਿਰੋਧੀ ਮੁਹਿੰਮ ਦੇ ਹੱਕ ਵਿਚ ਹੈ ਜਾਂ ਵਿਰੁੱਧ- ਬਲਤੇਜ ਪੰਨੂੰ
ਦਿਨੇ ਹੱਕ ਵਿਚ ਅਤੇ ਰਾਤ ਨੂੰ ਵਿਰੁੱਧ।
ਕਾਂਗਰਸ ਨੇ ਡਾ. ਨਵਜੋਤ ਕੌਰ ਸਿੱਧੂ ਨੂੰ ਪਾਰਟੀ ‘ਚੋਂ ਬਾਹਰ ਦਾ ਰਸਤਾ ਵਿਖਾਇਆ- ਇਕ ਖ਼ਬਰ
ਨਿੰਮ ਦਾ ਤੂੰ ਮਾਣ ਨਾ ਕਰੀਂ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।
ਹੁਣ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਦਸਿਆ ਜਾਖੜ ਨੂੰ ਗ਼ਦਾਰ ਤੇ ਮੌਕਾਪ੍ਰਸਤ- ਇਕ ਖ਼ਬਰ
ਗੱਲ ਕੰਮ ਦੀ ਨਾ ਕਰਦੇ ਕੋਈ, ਰੰਨਾਂ ਵਾਂਗ ਮਿਹਣੇ ਮਾਰਦੇ।
ਭਾਰਤ ਦੇ ਸੰਸਦ ਮੈਂਬਰਾਂ ਦੀ ਜਾਇਦਾਦ ਵਿਚ ਛੜੱਪੇਮਾਰ 110 ਫ਼ੀਸਦੀ ਦਾ ਵਾਧਾ- ਇਕ ਖ਼ਬਰ
ਤੇਲੀ ਕਰੀਏ ਤੇ ਰੁੱਖਾ ਖਾਈਏ, ਇਹ ਨਹੀਂ ਪੁੱਗਦਾ ਸਾਨੂੰ।
ਵਿਰੋਧੀ ਧਿਰ ਦੇ ਹੰਗਾਮੇ ਕਾਰਨ ਪ੍ਰਧਾਨ ਮੰਤਰੀ ਮੋਦੀ ਦਾ ਭਾਸ਼ਨ ਮੁਲਤਵੀ- ਇਕ ਖ਼ਬਰ
ਭਲਾ ਹੋਇਆ ਮੇਰਾ ਚਰਖ਼ਾ ਟੁੱਟਾ, ਜਿੰਦ ਅਜਾਬੋਂ ਛੁੱਟੀ।
ਖਿਲਰੀ ਸਿੱਖ ਲੀਡਰਸ਼ਿੱਪ ਕਾਰਨ ਪੰਥ ਵਿਰੋਧੀ ਪੰਜਾਬ ‘ਤੇ ਰੱਖ ਰਹੇ ਹਨ ਮੈਲ਼ੀ ਅੱਖ- ਇਕ ਖ਼ਬਰ
ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।
ਭਾਜਪਾ ਯੂਰੀਆ ਥੈਲਿਆਂ ਦਾ ਭਾਰ ਘਟਾ ਕੇ ਕਿਸਾਨਾਂ ਨੂੰ ਲੁੱਟ ਰਹੀ ਹੈ- ਭੂਪਿੰਦਰ ਸਿੰਘ ਹੁੱਡਾ
ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।
ਸੀਚੇਵਾਲ ਵਲੋਂ ‘ਚੋਣ ਮੈਨੀਫੈਸਟੋ’ ਨੂੰ ਕਾਨੂੰਨੀ ਮਾਨਤਾ ਦੇਣ ਲਈ ਸੋਧ ਬਿੱਲ ਰਾਜ ਸਭਾ ‘ਚ ਪੇਸ਼- ਇਕ ਖ਼ਬਰ
ਸੀਚੇਵਾਲ ਜੀ ਅੱਖੀਂ ਦੇਖ ਕੇ ਮੱਖੀ ਕਿਸੇ ਨੇ ਨਹੀਂ ਨਿਗ਼ਲਣੀ।
ਸੁਖਬੀਰ ਬਾਦਲ ਦੇ ਪ੍ਰਧਾਨ ਰਹਿੰਦਿਆਂ ਅਕਾਲੀ ਦਲ ਨਾਲ ਕੋਈ ਸਮਝੌਤਾ ਨਹੀਂ ਹੋਵੇਗਾ- ਗਿਆਨੀ ਹਰਪ੍ਰੀਤ ਸਿੰਘ
ਕਾਲ਼ੇ ਕੋਲ਼ ਮੰਜਾ ਨਹੀਂ ਡਾਹੁਣਾ, ਲਿਸ਼ਕੇ ਤਾਂ ਪੈ ਜੂ ਬਿਜਲੀ।
===============================================================================
