ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
03.06.2024 ਅਮਲੋਹ ਦਾ ਸਾਬਕਾ ਕੌਂਸਲ ਪ੍ਰਧਾਨ ਬਾਦਲ ਦਲ ਨੂੰ ਛੱਡ ਕੇ ‘ਆਪ’ ਵਿਚ ਹੋਇਆ ਸ਼ਾਮਲ- ਇਕ ਖ਼ਬਰ
ਕੁਝ ਤੁਰ ਗਏ ਤੇ ਕੁਝ ਤੂੰ ਤੋਰ ‘ਤੇ, ਫੱਟਾ ਲਾ ਲੈ ‘ਖਾਲੀ ਦਲ’ ਦਾ।
ਸੁਖਬੀਰ ਬਾਦਲ ਨੇ ਸੁਮੇਧ ਸੈਣੀ ਨਾਲ ਯਾਰੀ ਨਿਭਾਉਣ ਲਈ ਸਰਬਜੀਤ ਸਿੰਘ ਵਿਰੁੱਧ ਖੜ੍ਹਾ ਕੀਤਾ ਉਮੀਦਵਾਰ- ਮਾਝੀ
ਤੈਨੂੰ ਦੇਖਿਆਂ ਸਬਰ ਨਾ ਆਵੇ, ਯਾਰਾ ਤੇਰਾ ਘੁੱਟ ਭਰ ਲਾਂ।
ਚੋਣ ਪ੍ਰਚਾਰ ਲਈ ਜਾ ਰਹੀ ਪਰਨੀਤ ਕੌਰ ਨੇ ਹਾਦਸਾਗ੍ਰਸਤ ਪਰਵਾਰ ਦੀ ਮਦਦ ਲਈ ਆਪਣਾ ਕਾਫ਼ਲਾ ਰੋਕਿਆ- ਇਕ ਖ਼ਬਰ
ਵੋਟਾਂ ਦੇ ਦਿਨਾਂ ‘ਚ ਹੀ ਅਜਿਹੇ ਚੋਂਚਲੇ ਹੁੰਦੇ ਹਨ, ਅੱਗੇ ਪਿੱਛੇ ਨਹੀਂ।
ਕਿਸਾਨ ਆਪਣੀ ਲੀਡਰੀ ਚਮਕਾਉਣ ਲਈ ਲੋਕਾਂ ਨੂੰ ਤੰਗ ਪ੍ਰੇਸ਼ਾਨ ਕਰ ਰਹੇ ਹਨ- ਤਰਨਜੀਤ ਸਿੰਘ ਸੰਧੂ
ਨੀ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।
ਅੱਛੇ ਦਿਨ ਨਹੀਂ, ਪੁਰਾਣੇ ਦਿਨ ਵਾਪਸ ਲਿਆਏਗੀ ਕਾਂਗਰਸ- ਗੁਰਜੀਤ ਔਜਲਾ
ਕੀ ਗੱਲ ਔਜਲਾ ਸਾਹਿਬ, ਕਿਤੇ ਫੇਰ ਐਮਰਜੰਸੀ ਲਗਾਉਣ ਦਾ ਇਰਾਦਾ ਤਾਂ ਨਹੀਂ!
ਕਾਂਗਰਸ ਨੇ ਦੂਜੇ ਰਾਜਾਂ ਨੂੰ ਪੰਜਾਬ ਦਾ ਪਾਣੀ ਦੇ ਕੇ ਮਾਰੂਥਲ ਵਲ ਧਕੇਲਿਆ- ਸੁਖਬੀਰ ਬਾਦਲ
ਤੁਸੀਂ ਨਹਿਰ ਦੇ ਕੰਢੇ ਦੋ ਦੋ ਫੁੱਟ ਉੱਚੇ ਕਰ ਕੇ ਹਰਿਆਣੇ ਨੂੰ ਵਧੇਰੇ ਪਾਣੀ ਕਿਹੜੀ ਖੁਸ਼ੀ ‘ਚ ਦਿਤਾ ਸੀ?
ਪੰਜਾਬ ਦੀ ‘ਆਪ’ ਸਰਕਾਰ ਨੇ ਸੂਬੇ ਦੇ ਉਦਯੋਗ ਅਤੇ ਖੇਤੀ ਨੂੰ ਤਬਾਹ ਕੀਤਾ- ਮੋਦੀ
ਜਿਹੜੇ ਸਾਡੇ ਹੱਕ ‘ਚ ਖਲੋਏ ਨੇ, ਸਭ ਸਾਨੂੰ ਯਾਦ ਨੇ।
ਪੰਜਾਬ ਦੇ ਚੋਣ ਦੰਗਲ ’ਚੋਂ ਗ਼ਾਇਬ ਰਹੇ ਨਵਜੋਤ ਸਿੰਘ ਸਿੱਧੂ- ਇਕ ਖ਼ਬਰ
ਚਰਖ਼ਾ ਕਿੰਜ ਕੱਤਾਂ, ਮੇਰਾ ਚਿੱਤ ਪੁੰਨੂੰ ਵਲ ਧਾਵੇ।
ਬਹਿਬਲ ਕਲਾਂ ਗੋਲ਼ੀ-ਕਾਂਡ ਕੇਸ ਵੀ ਫਰੀਦਕੋਟ ਤੋਂ ਚੰਡੀਗੜ੍ਹ ਦੀ ਅਦਾਲਤ ‘ਚ ਤਬਦੀਲ- ਇਕ ਖ਼ਬਰ
ਵਾਰਸ ਸ਼ਾਹ ਤੇ ਰਾਂਝਣੇ ਸੋਗ ਹੋਇਆ, ਮਿਲਣ ਰੰਗਪੁਰ ਵਿਚ ਵਧਾਈਆਂ ਵੇ।
ਅਮਰੀਕਾ ਦਾ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਸਾਰੇ 34 ਮਾਮਲਿਆਂ ‘ਚ ਦੋਸ਼ੀ ਕਰਾਰ- ਇਕ ਖ਼ਬਰ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।
ਬਾਈਡਨ ਨੇ ਟਰੰਪ ਨੂੰ ਨਿਆਂ ਪ੍ਰਣਾਲੀ ਦਾ ਸਨਮਾਨ ਕਰਨ ਲਈ ਕਿਹਾ- ਇਕ ਖ਼ਬਰ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।
ਮੋਦੀ ਪਹਿਲੇ ਪ੍ਰਧਾਨ ਮੰਤਰੀ ਹਨ ਜਿਨ੍ਹਾਂ ਨੇ ਨਫ਼ਰਤੀ ਭਾਸ਼ਣਾਂ ਨਾਲ ਅਹੁਦੇ ਦਾ ਮਾਣ ਘਟਾਇਆ- ਡਾ.ਮਨਮੋਹਨ ਸਿੰਘ
ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ, ਜੇ ਮਨ ਰੰਗਿਆ ਨਾ ਜਾਵੇ।
ਭਾਈ ਮਨਜੀਤ ਸਿੰਘ ਨੇ ਬਾਦਲ ਅਕਾਲੀ ਦਲ ਤੋਂ ਦਿਤਾ ਅਸਤੀਫ਼ਾ- ਇਕ ਖ਼ਬਰ
ਲੈ ਚਲ ਮਿੱਤਰਾ ਵੇ, ਮੈਂ ਨਾ ਨਾਨਕੇ ਰਹਿੰਦੀ।
ਪੰਜਾਬ ‘ਚ ਸਿਆਸੀ ਦ੍ਰਿਸ਼ ਤੋਂ ਅਸਲ ਮੁੱਦੇ ਗ਼ਾਇਬ- ਇਕ ਖ਼ਬਰ
ਟੁੱਟ ਪੈਣੇ ਦਰਜੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।
ਰਿਸ਼ੀ ਸੁਨਕ ਦੀ ਪਾਰਟੀ ਦੇ 78 ਸੰਸਦ ਮੈਂਬਰਾਂ ਨੇ 4 ਜੁਲਾਈ ਦੀ ਚੋਣ ਲੜਨ ਤੋਂ ਕੀਤੀ ਤੌਬਾ- ਇਕ ਖ਼ਬਰ
ਜਿੰਨਾ ਨਹਾਤੀ, ਓਨਾ ਈ ਪੁੰਨ।
======================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
28.05.2024
ਕੈਨੇਡਾ ‘ਚ ਭਾਰਤੀ ਵਿਦਿਆਰਥੀਆਂ ਦੇ ਪ੍ਰਦਰਸ਼ਨ ਜਾਰੀ, ਡੀਪੋਰਟੇਸ਼ਨ ਦੀ ਤਲਵਾਰ ਲਟਕੀ।
ਲੱਡੂ ਕਾ ਕੇ ਤੁਰਦੀ ਬਣੀ, ਦਗ਼ਾ ਦੇ ਗਈ ਮਿੱਤਰਾਂ ਨੂੰ।
ਵੋਟਰ ਹੀ ਲੋਕ ਸਭਾ ਦਾ ਭਵਿੱਖ ਤੈਅ ਕਰਦਾ ਹੈ- ਵਾਈਸ ਚਾਂਸਲਰ
ਚਾਂਸਲਰ ਸਾਬ ਲੋਕ ਐਵੇਂ ਹੀ ਈ.ਵੀ.ਐਮ. ‘ਤੇ ਸ਼ੱਕ ਕਰੀ ਜਾਂਦੇ ਐ!
ਸੌਦਾ ਸਾਧ ਨੇ ਪੈਰੋਲ ਤੋਂ ਪਾਬੰਦੀ ਹਟਾਉਣ ਲਈ ਦਾਖ਼ਲ ਕੀਤੀ ਅਰਜ਼ੀ- ਇਕ ਖ਼ਬਰ
ਅੱਜ ਕਿਤੇ ਮੇਰੇ ਯਾਰ ਖੱਟਰ ਤੇ ਅਨਿਲ ਵਿਜ ਹੁੰਦੇ ਤਾਂ ਹਾਈ ਕੋਰਟ ਨਾ ਜਾਣਾ ਪੈਂਦਾ।
ਯੋਗੀ ਅਦਿੱਤਿਆ ਨਾਥ ਨੇ ‘ਰਾਮ ਮੰਦਰ’ ਦੇ ਨਾਮ ‘ਤੇ ਟੰਡਨ ਲਈ ਵੋਟ ਮੰਗੇ- ਇਕ ਖ਼ਬਰ
ਕਾਰੋਬਾਰ ਦਾ ਅਸੂਲ ਐ ਬਈ ਕਿ ਜਿਹੜੀ ਚੀਜ਼ ਵਿਕਦੀ ਹੈ, ਉਹੋ ਹੀ ਵੇਚਣੀ ਹੈ।
ਰੁਜ਼ਗਾਰ ਦੇ ਮੋਰਚੇ ‘ਤੇ ਸਾਡੀ ਸਰਕਾਰ ਦਾ ‘ਟਰੈਕ ਰਿਕਾਰਡ’ ਸਭ ਤੋਂ ਵਧੀਆ- ਮੋਦੀ
ਕਿਉਂਕਿ ਦੋ ਕਰੋੜ ਦੀ ਬਜਾਇ ਅਸੀਂ ਤਿੰਨ ਕਰੋੜ ਲੋਕਾਂ ਨੂੰ ਰੁਜ਼ਗਾਰ ਦਿਤਾ।
ਜਾਖੜ ਨੇ ਮੋਦੀ ਨੂੰ ਪੰਜਾਬ ਦੀ ਨਸਲ ਤੇ ਫ਼ਸਲ ਬਚਾਉਣ ਦੀ ਕੀਤੀ ਅਪੀਲ-ਇਕ ਖ਼ਬਰ
ਉਹ ਫਿਰੇ ਨੱਕ ਵਢਾਉਣ ਨੂੰ, ਉਹ ਫਿਰੇ ਨੱਥ ਘੜਾਉਣ ਨੂੰ।
ਅਕਾਲੀ ਦਲ ਸੱਤਾ ‘ਚ ਆਇਆ ਤਾਂ ਰਾਜਸਥਾਨ ਅਤੇ ਹਰਿਆਣਾ ਨਾਲ ਕੀਤੇ ਪਾਣੀਆਂ ਦੇ ਸਮਝੌਤੇ ਰੱਦ ਕਰਾਂਗੇ- ਸੁਖਬੀਰ ਬਾਦਲ
ਜਦੋਂ ਸੱਤਾ ਦਾ ਆਨੰਦ ਮਾਣਦੇ ਸੀ ਉਦੋਂ ਖੱਟਾ ਪੀਂਦੇ ਰਹੇ, ਕਿਉਂ ਮੂਰਖ ਬਣਾਉਂਦੇ ਹੋ ਲੋਕਾਂ ਨੂੰ।
ਗੁਰੂ ਘਰਾਂ ‘ਤੇ ਆਰ.ਐਸ.ਐਸ. ਦਾ ਕਬਜ਼ਾ, ਸਿੱਖ ਕੌਮ ਲਈ ਘਾਤਕ ਸਿੱਧ ਹੋਵੇਗਾ- ਸੁਖਬੀਰ ਬਾਦਲ
ਸੁਖਬੀਰ ਸਿਆਂ ਆਰ.ਐਸ.ਐਸ. ਨੂੰ ਉਂਗਲੀ ਲਾ ਕੇ ਲਿਆਇਆ ਕੌਣ ਸੀ?
ਇਕੋ ਦਿਨ ਵਿਚ ਤਿੰਨ ਸਾਬਕਾ ਵਿਧਾਇਕਾਂ ਨੇ ਦਲ ਬਦਲੇ- ਇਕ ਖ਼ਬਰ
ਸਾਡਾ ਚਿੜੀਆਂ ਦਾ ਚੰਬਾ ਵੇ, ਕਦੀ ਏਸ ਵਿਹੜੇ ਕਦੀ ਓਸ ਵਿਹੜੇ।
ਪ੍ਰਧਾਨ ਮੰਤਰੀ ਰਿਸ਼ੀ ਸੁਨਕ ਤੇ ਵਿਰੋਧੀ ਪਾਰਟੀਆਂ ਨੇ ਚੋਣ ਪ੍ਰਚਾਰ ਕੀਤਾ ਸ਼ੁਰੂ-ਇਕ ਖ਼ਬਰ
ਕਿਹੜਾ ਚੋਣ ਪ੍ਰਚਾਰ? ਨਾ ਕੋਈ ਢੋਲ ਢਮੱਕਾ, ਨਾ ਰੈਲੀਆਂ ਨਾ ਸ਼ੋਰ ਸ਼ਰਾਬਾ, ਨਾ ਰੌਣਕ ਨਾ ਮੇਲਾ।
ਜੇ ਜਾਖੜ ਸਰਕਾਰ ਚਲਾਉਣ ਦੇ ਕਾਬਲ ਹੁੰਦੇ ਤਾਂ ਪਾਰਟੀ ਮੁੱਖ ਮੰਤਰੀ ਨਾ ਬਣਾ ਦਿੰਦੀ- ਰਾਵਿੰਦਰਪਾਲ ਸਿੰਘ ਪਾਲੀ
ਟੁੰਡੇ ਕਿਸੇ ਦੇ ਨਾਲ਼ ਕੀ ਯੁੱਧ ਕਰਨਾ, ਲੰਗੜੇ ਸਿਖਰ ਪਹਾੜ ਦੇ ਜਾਣ ਨਾਹੀਂ।
ਅਕਾਲੀ ਤੇ ਭਾਜਪਾ ਖੇਡ ਰਹੇ ਹਨ ‘ਫ਼ਰੈਂਡਲੀ ਮੈਚ’- ਗੁਰਮੀਤ ਸਿੰਘ ਖੁੱਡੀਆਂ
ਸਾਹਿਬਾਂ ਪੜ੍ਹਦੀ ਪੱਟੀਆਂ ਤੇ ਮਿਰਜਾ ਪੜ੍ਹੇ ਕੁਰਾਨ।
ਕਿਸਾਨਾਂ ਦੇ ਵਿਰੋਧ ਨੂੰ ਰੋਕਣ ਲਈ ਪੰਜਾਬ ਵਿਚ ਕੇਂਦਰੀ ਸੁਰੱਖਿਆ ਬਲ ਲਗਾਏ ਜਾਣ- ਜਾਖੜ
ਪਿੰਡ ਦਿਆਂ ਮੁੰਡਿਆਂ ਦੀ, ਮੈਂ ਤਾਂ ਰੇਲ ਬਣਾ ਕੇ ਛੱਡੂੰ।
ਸਾਬਕਾ ਮੰਤਰੀ ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ ਦੀ ਅਕਾਲੀ ਦਲ ਬਾਦਲ ’ਚੋਂ ਛੁੱਟੀ- ਇਕ ਖ਼ਬਰ
ਭਾਈ ਜੀ ਦੇ ਵਹਿੜਕੇ ਨੇ, ਮੇਰੇ ਛੜ ਸੀਨੇ ‘ਤੇ ਮਾਰੀ।
=============================================================
ਚੁੰਝਾਂ-ਪ੍ਹੌਂਚੇ (ਨਿਰਮਲ ਸਿੰਘ ਕੰਧਾਲਵੀ)
ਅਕਾਲੀ ਦਲ ਬਾਦਲ ਨੂੰ ਪਾਈ ਵੋਟ ਵੀ ਭਾਜਪਾ ਦੇ ਖਾਤੇ ‘ਚ ਜਾਵੇਗੀ- ਬਾਜਵਾ
ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।
ਹੋਂਦ ਬਚਾਉਣ ਦੀ ਲੜਾਈ ਲੜ ਰਿਹੈ ਅਕਾਲੀ ਦਲ ਬਾਦਲ, ਲੋਕ ਸਭਾ ਚੋਣਾਂ ਵਿਚ ਵੀ ਪਛੜਿਆ- ਇਕ ਖ਼ਬਰ
ਆਪੇ ਫਾਥੜੀਏ, ਤੈਨੂੰ ਕੌਣ ਛੁਡਾਵੇ?
ਬੈਂਸ ਭਰਾਵਾਂ ਨੇ ਰਾਹੁਲ ਗਾਂਧੀ ਦੀ ਮੌਜੂਦਗੀ ‘ਚ ਕਾਂਗਰਸ ਦਾ ਫੜਿਆ ਪੱਲਾ- ਇਕ ਖ਼ਬਰ
ਸਾਡੀ ਬਾਂਹੇ ਨਾ ਛੋੜੀਂ ਜੀ, ਆਖਰ ਫੜਿਆ ਹੈ ਲੜ ਤੇਰਾ।
ਸਾਬਕਾ ਤਾਨਾਸ਼ਾਹ ਅਯੂਬ ਖ਼ਾਨ ਦੀ ਲਾਸ਼ ਨੂੰ ਕਬਰ ‘ਚੋਂ ਕੱਢ ਕੇ ਫਾਂਸੀ ਦਿਤੀ ਜਾਵੇ- ਪਾਕਿ ਰੱਖਿਆ ਮੰਤਰੀ
ਨਹੀਂ ਲੱਭਣੇ ਲਾਲ ਗੁਆਚੇ, ਮਿੱਟੀ ਨਾ ਫ਼ਰੋਲ ਜੋਗੀਆ।
ਹੰਸ ਰਾਜ ਹੰਸ ਵਲੋਂ ਕਿਸਾਨਾਂ ਵਿਰੁੱਧ ਕੀਤੀਆਂ ਭੜਕਾਊ ਟਿੱਪਣੀਆਂ ਦਾ ਮਾਮਲਾ ਮੁੱਖ ਚੋਣ ਕਮਿਸ਼ਨਰ ਕੋਲ ਪਹੁੰਚਿਆ-ਇਕ ਖ਼ਬਰ
ਤੂੰ ਨਹੀਂ ਬੋਲਦੀ ਰਕਾਨੇ ਤੂੰ ਨਹੀਂ ਬੋਲਦੀ, ਤੇਰੇ ‘ਚ ਤੇਰਾ ਯਾਰ ਬੋਲਦਾ।
ਮੈਂ ਪੱਥਰ ਚੱਟ ਕੇ ਮੁੜਿਆਂ, ਹੁਣ ਕਾਂਗਰਸ ਹੀ ਹੋਵੇਗੀ ਮੇਰੀ ਆਖਰੀ ਪਾਰਟੀ- ਸਿਮਰਜੀਤ ਸਿੰਘ ਬੈਂਸ
ਸਿਆਸੀ ਲੀਡਰਾਂ ਦਾ ਨਾ ਕਦੇ ਇਤਬਾਰ ਕਰੀਏ, ਤੱਤੇ ਤਵੇ ‘ਤੇ ਬੈਠ ਭਾਵੇਂ ਖਾਣ ਕਸਮਾਂ।
ਗੁਰਦੁਆਰਾ ਪ੍ਰਬੰਧਾਂ ਉੱਪਰ ਕਬਜ਼ਾ ਕਰਨਾ ਚਾਹੁੰਦੀਆਂ ਹਨ ਸਰਕਾਰਾਂ- ਹਰਜਿੰਦਰ ਸਿੰਘ ਧਾਮੀ
ਕਬਜ਼ਾ ਤਾਂ ਹੋ ਚੁੱਕਿਆ ਹੋਇਐ ਧਾਮੀ ਸਾਹਿਬ। ਯਾਦ ਐ ਮੂਲ਼ ਨਾਨਕਸ਼ਾਹੀ ਕੈਲੰਡਰ ਕਿਸ ਨੇ ਰੱਦ ਕਰਵਾਇਆ ਸੀ?
ਭਾਜਪਾ ਨੇ ਆਮ ਆਦਮੀ ਪਾਰਟੀ ਨੂੰ ਮਹਿਲਾ ਵਿਰੋਧੀ ਦੱਸਿਆ- ਇਕ ਖ਼ਬਰ
ਦੂਸ਼ਣ ਦੂਜੇ ‘ਤੇ ਭਾਰਤ ਦੇ ਸਿਆਸੀ ਨੇਤਾ ਦੂਜਿਆਂ ‘ਤੇ ਦੂਸ਼ਣ ਲਾਉਣ ਤੋਂ ਪਹਿਲਾਂ ਆਪਣੀ ਪੀੜ੍ਹੀ ਹੇਠ ਸੋਟਾ ਨਹੀਂ ਫੇਰਦੇ।
ਅਕਾਲੀ ਦਲ ਬਾਦਲ ਦੇ ਐਲਾਨਨਾਮੇ ‘ਚ ਪੰਥਕ ਅਤੇ ਖੇਤਰੀ ਮਜ਼ਬੂਤੀ ਦਾ ਸੱਦਾ- ਇਕ ਖ਼ਬਰ
ਜ਼ਰਾ ਪਹਿਲੇ ਐਲਾਨਨਾਮਿਆਂ ਦਾ ਵੀ ਹਿਸਾਬ ਕਿਤਾਬ ਵੀ ਕਰ ਦਿੰਦੇ ਬਾਦਲ ਸਾਬ।
ਨਾਮਜ਼ਦਗੀਆਂ ਦੇ ਅਖ਼ੀਰਲੇ ਦਿਨ ਵੀ ਅਕਾਲੀ ਬਾਦਲ ਨੂੰ ਚੰਡੀਗੜ੍ਹ ਤੋਂ ਕੋਈ ਉਮੀਦਵਾਰ ਨਹੀਂ ਮਿਲਿਆ-ਇਕ ਖ਼ਬਰ
ਨਾ ਕੋਈ ਮਿਲਦਾ ਲਾੜਾ ਸਾਨੂੰ, ਨਾ ਮਿਲਦਾ ਸਰਬਾਲਾ।
ਚੋਣ ਮੈਦਾਨ ਵਿਚ ਅਜਿਹੇ ਉਮੀਦਵਾਰ ਵੀ ਹਨ ਜਿਨ੍ਹਾਂ ਕੋਲ ਨਾ ਘਰ ਤੇ ਨਾ ਕੋਈ ਜਾਇਦਾਦ- ਇਕ ਖ਼ਬਰ
ਇਸੇ ਕਰ ਕੇ ਤਾਂ ਉਹ ਚੋਣ ਲੜ ਰਹੇ ਐ, ਸਮਝਿਆ ਕਰੋ ਗੱਲ ਨੂੰ ਯਾਰ!
ਵੋਟਿੰਗ ਤੋਂ ਪਹਿਲਾਂ ਇਕ ਵਾਰ ਫੇਰ ਸੌਦਾ ਸਾਧ ਜੇਲ੍ਹ ਤੋਂ ਬਾਰ ਆਉਣਾ ਚਾਹੁੰਦਾ ਹੈ- ਇਕ ਖ਼ਬਰ
ਲੋਕੋ ਜਾਗਦੇ ਰਹਿਣਾ, ਗੱਡੀ ਜ਼ਾਲਮਾਂ ਦੀ ਆਈ।
ਲੋਕ ਸਭਾ ਚੋਣਾਂ ਦੇ ਭਰੇ ਮੈਦਾਨ ਨੂੰ ਛੱਡ ਕੇ ਸਿਕੰਦਰ ਸਿੰਘ ਮਲੂਕਾ ਚੁੱਪ-ਚਾਪ ਦੁਬਈ ਚਲੇ ਗਏ- ਇਕ ਖ਼ਬਰ
ਏਥੋਂ ਉਡਦਾ ਭੋਲ਼ਿਆ ਪੰਛੀਆ, ਤੂੰ ਛੁਰੀਆਂ ਹੇਠ ਨਾ ਆ।
ਰਾਜਸੀ ਆਗੂਆਂ ਨੂੰ ਸਰਕਾਰੀ ਖ਼ਰਚ ‘ਤੇ ਸੁਰੱਖਿਆ ਕਿਉਂ ਦਿਤੀ ਜਾਵੇ- ਹਾਈ ਕੋਰਟ
ਸਿਰ ਫੌਜ ਦੇ ਰਿਹਾ ਨਾ ਕੋਈ ਕੁੰਡਾ, ਹੋਇ ਸ਼ੁਤਰ ਜਿਉਂ ਬਾਝ ਮੁਹਾਰ ਮੀਆਂ।
ਭਾਜਪਾ ਸਰਕਾਰ ਨੇ ਗ਼ਰੀਬਾਂ ‘ਤੇ ਟੈਕਸ ਲਗਾ ਕੇ ਅਮੀਰਾਂ ਦੇ 18 ਲੱਖ ਕਰੋੜ ਦੇ ਕਰਜ਼ੇ ਮੁਆਫ਼ ਕੀਤੇ- ਅਭੈ ਚੋਟਾਲਾ
ਤੇਰਾ ਆਵਾਂ ਪੂਰਨ ਮਾਰ ਕੇ, ਛੰਨਾ ਰੱਤ ਦਾ ਲਵਾਂ ਨਿਚੋੜ।
=========================================================================
 http://mediapunjab.com/composition?id=5321){kind=logo}
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
04.03.2024
ਰਵਾਇਤੀ ਪਾਰਟੀਆਂ ਨੂੰ ਇਕ ਸਾਧਾਰਨ ਘਰ ‘ਚੋਂ ਬਣਿਆ ਮੁੱਖ ਮੰਤਰੀ ਹਜ਼ਮ ਨਹੀਂ ਹੋ ਰਿਹਾ-ਭਗਵੰਤ ਮਾਨ
ਉਡ ਕੇ ਚੁੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।
ਮਰੀਅਮ ਨਵਾਜ਼ ਬਣੇਗੀ ਲਹਿੰਦੇ ਪੰਜਾਬ ਦੀ ਪਹਿਲੀ ਔਰਤ ਮੁੱਖ ਮੰਤਰੀ- ਇਕ ਖ਼ਬਰ
ਨੱਚਣ, ਕੁੱਦਣ, ਝੂਟਣ ਪੀਂਘਾਂ, ਵੱਡਿਆਂ ਘਰਾਂ ਦੀਆਂ ਜਾਈਆਂ।
ਭਗਵੰਤ ਮਾਨ ਨੇ ਨਵਜੋਤ ਸਿੱਧੂ ਨੂੰ ਵੇਲਾ ਵਿਹਾਅ ਚੁੱਕਿਆ ਸਿਆਸਤਦਾਨ ਦੱਸਿਆ- ਇਕ ਖ਼ਬਰ
ਪਿੱਪਲ ਦਿਆ ਪੱਤਿਆ ਵੇ, ਕੇਹੀ ਖੜ ਖੜ ਲਾਈ ਆ ਢੋਲਾ।
ਹਿਮਾਚਲ ਪ੍ਰਦੇਸ਼ ਦੀ ਕਾਂਗਰਸ ਸਰਕਾਰ ਖ਼ਤਰੇ ਵਿਚ-ਇਕ ਖ਼ਬਰ
ਤਾਰੀਂ ਦਾਤਾ ਜੀ, ਮੈਨੂੰ ਕੰਗਲੇ ਗ਼ਰੀਬ ਨੂੰ।
ਪੰਜਾਬ ਕਾਂਗਰਸ ਵੀ ਕਿਸਾਨਾਂ ਦੇ ਹੱਕ ਵਿਚ ਅੱਜ ਕਰੇਗੀ ਟਰੈਕਟਰ ਮਾਰਚ- ਇਕ ਖ਼ਬਰ
ਜਿੱਥੇ ਤੇਰੇ ਹਲ ਵਗਦੇ, ਉੱਥੇ ਲੈ ਚਲ ਚਰਖ਼ਾ ਮੇਰਾ।
ਅਕਾਲੀ ਅਤੇ ਕਾਂਗਰਸੀ ਸਰਕਾਰਾਂ ਨੇ ਸਾਜ਼ਿਸ਼ ਅਧੀਨ ਸਰਕਾਰੀ ਸੰਸਥਾਵਾਂ ਤਬਾਹ ਕੀਤੀਆਂ-ਭਗਵੰਤ ਮਾਨ
ਬਾਣੀਆ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।
ਸੁਖਬੀਰ ਬਾਦਲ ਅਤੇ ਸੁਮੇਧ ਸੈਣੀ ਨੇ ਚੋਣਾਂ ‘ਚ ਲਾਭ ਲੈਣ ਲਈ ਰਚੀ ਸੀ ਡੂੰਘੀ ਸਾਜ਼ਿਸ਼- ਐਸ. ਆਈ. ਟੀ.
ਔਖੀ ਹੋ ਜਾਊ ਕੈਦ ਕੱਟਣੀ, ਕਾਹਨੂੰ ਮਾਰਦੈਂ ਪਤਲਿਆ ਡਾਕੇ।
ਭਾਰਤ ‘ਚ ‘ਕਿਸਾਨਾਂ ‘ਤੇ ਤਸ਼ੱਦਦ’ ਵਿਰੁੱਧ ਕੈਨੇਡਾ ਦੇ ਸਿੱਖਾਂ ਨੇ ਚੁੱਕੀ ਆਵਾਜ਼-ਇਕ ਖ਼ਬਰ
ਤੈਨੂੰ ਤਾਪ ਚੜ੍ਹੇ ਮੈਂ ਹੂੰਗਾਂ, ਤੇਰੀ ਮੇਰੀ ਇਕ ਜਿੰਦੜੀ।
ਅਕਾਲੀ ਦਲ –ਭਾਜਪਾ ਨੇ ਕਿਸਾਨਾਂ ਦੇ ਮੁੱਦੇ ‘ਤੇ ਚੁੱਪ ਧਾਰੀ- ਇਕ ਖ਼ਬਰ
ਕਿਉਂ ਨਹੀਂ ਬੋਲਦੇ ਦਿਲਾਂ ਦੀ ਘੁੰਡੀ ਖੋਲ੍ਹਦੇ, ਮਨਾਂ ਵਿਚ ਕੀ ਧਾਰਿਆ।
ਭਾਜਪਾ ਨੂੰ ਵੋਟ ਦਿਉ ਨਹੀਂ ਤਾਂ ਨਰਕਾਂ ਨੂੰ ਜਾਉਗੇ- ਭਾਜਪਾ ਐਮ. ਪੀ. ਅਰਵਿੰਦ
ਮੁਰਦਾ ਬੋਲੂ, ਖੱਫਣ ਪਾੜੂ।
ਜਿੰਨੀ ਵਾਰੀ ਸੌਦਾ ਸਾਧ ਨੂੰ ਪੈਰੋਲ ਦਿਤੀ, ਕੀ ਕਿਸੇ ਹੋਰ ਕੈਦੀ ਨੂੰ ਵੀ ਇੰਜ ਪੈਰੋਲ ਦਿਤੀ- ਹਾਈ ਕੋਰਟ
ਐਰੇ ਗੈਰੇ ਨੂੰ ਸ਼ੱਕਰ ਦਾ ਦਾਣਾ, ਭਗਤੇ ਨੂੰ ਖੰਡ ਪਾ ਦਿਉ।
ਸ਼੍ਰੋਮਣੀ ਕਮੇਟੀ ਦੇ ਵਫ਼ਦ ਨੇ ਪੰਜਾਬ ਦੇ ਰਾਜਪਾਲ ਨਾਲ਼ ਕੀਤੀ ਮੁਲਾਕਾਤ- ਇਕ ਖ਼ਬਰ
ਇਕ ਮੰਨ ਲੈ ਬੇਨਤੀ ਸਾਡੀ, ਮਾਨ ਦੀਆਂ ਬੰਨ੍ਹ ਮੁਸ਼ਕਾਂ।
ਨਿਤੀਸ਼ ਕੁਮਾਰ ਨੇ ਮੋਦੀ ਨੂੰ ਭਰੋਸਾ ਦਿਵਾਇਆ ਕਿ ਉਹ ਹਮੇਸ਼ਾ ਐਨ.ਡੀ.ਏ. ਦੇ ਨਾਲ਼ ਰਹੇਗਾ- ਇਕ ਖ਼ਬਰ
ਤੱਤੇ ਤਵੇ ‘ਤੇ ਬਹਿ ਕੇ ਖਾਹ ਕਸਮਾਂ, ਤੇਰਾ ਨਾ ਭਰੋਸਾ ਪਲਟੂ।
ਨਵਜੋਤ ਸਿੱਧੂ ਨੇ ਪ੍ਰਿਯੰਕਾ ਵਾਡਰਾ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ
ਆਸ ਮੁਰਾਦਾਂ ਦੀ ਦੇਵੀਏ ਨੀਂ, ਤੇਰੀ ਸਦਾ ਹੀ ਜੈ।
ਪੰਜਾਬ ਦੇ ਕਿਸਾਨ ਆਗੂਆਂ ‘ਤੇ ਭੜਕੇ ਸੁਨੀਲ ਜਾਖੜ- ਇਕ ਖ਼ਬਰ
ਚਾਰਾਂ ਪਾਸਿਆਂ ਤੋਂ ਜਦ ਕੋਈ ਪੁੱਛ-ਗਿੱਛ ਨਾ ਰਹੇ ਤਾਂ ਕਿਸੇ ‘ਤੇ ਤਾਂ ਨਜ਼ਲਾ ਝੜੂ ਹੀ।
=========================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
20.02.2024
ਇਮਰਾਨ ਖ਼ਾਨ ਦੇ ਹੱਕ ਵਿਚ ਪਾਕਿਸਤਾਨੀ ਸਿੱਖ ਲਾਹੌਰ ‘ਚ ਹੋਏ ਇਕੱਠੇ-ਇਕ ਖ਼ਬਰ
ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।
ਸੰਸਦ ਮੈਂਬਰ ਪ੍ਰਨੀਤ ਕੌਰ ਜਲਦ ਹੀ ਭਾਜਪਾ ‘ਚ ਹੋ ਸਕਦੇ ਹਨ ਸ਼ਾਮਲ-ਇਕ ਖ਼ਬਰ
ਨੀ ਮੈਂ ਉਡ ਜਾਣਾ ਉਸ ਦੇਸ, ਜਿੱਥੇ ਮੇਰਾ ਮਾਹੀ ਵਸਦਾ।
ਹਾਈ ਕੋਰਟ ਨੇ ਦੁਹਰਾਇਆ ਕਿ ਕਿਸਾਨਾਂ ਨੇ ਹਰਿਆਣੇ ਵਿਚੋਂ ਸਿਰਫ਼ ਲੰਘਣਾ ਹੈ, ਮਸਲਾ ਤਾਂ ਦਿੱਲੀ ਨਾਲ ਹੈ-ਇਕ ਖ਼ਬਰ
ਰਾਹੀਆਂ ਨੇ ਰਾਤ ਕੱਟਣੀ, ਤੇਰੀ ਚੁੱਕ ਨਾ ਮਸੀਤ ਲਿਜਾਣੀ।
ਟਰਾਂਸਫਾਰਮਰ ਲਾਉਣ ਬਦਲੇ 40,000 ਰਿਸ਼ਵਤ ਲੈਣ ਵਾਲਾ ਲਾਈਨਮੈਨ ਵਿਜੀਲੈਂਸ ਵਲੋਂ ਗ੍ਰਿਫ਼ਤਾਰ- ਇਕ ਖ਼ਬਰ
ਚਲ ਬਈ ਤੂੰ ਤਾਂ ਜੇਹਲ ਦੀਆਂ ਬੱਤੀਆਂ ਜਗਾ ਜਾ ਕੇ।
ਖੇਤੀ ਕਾਨੂੰਨ ਬਣਵਾਉਣ ਵਿਚ ਹਰਸਿਮਰਤ ਕੌਰ ਬਾਦਲ ਦੀ ਅਹਿਮ ਭੂਮਿਕਾ- ਰਵਨੀਤ ਸਿੰਘ ਬਿੱਟੂ
ਢਿੱਡਲ ਤੇ ਤੁਹਾਡਾ ਸੀਤਾ ਫ਼ਲ ਵਾਲਾ ਵੀ ਨਾਲ ਹੀ ਸੀਗੇ।
ਕਿਸਾਨ ਸਾਵਧਾਨ ਰਹਿਣ! ਗੱਲ ਬਾਤ ਦੇ ਨਾਲ ਨਾਲ ਹੋਰ ਸਖ਼ਤੀ ਦੀ ਤਿਆਰੀ ਵੀ ਹੋ ਰਹੀ ਹੈ- ਇਕ ਸੰਪਾਦਕੀ
ਖ਼ਬਰਦਾਰ ਰਹਿਣਾ ਬਈ ਚੌਕੀ ਜ਼ਾਲਮਾਂ ਦੀ ਆਈ।
ਬਾਦਲ ਪਰਵਾਰ ਨੇ ਪੰਥਕ ਕੁਰਬਾਨੀ ਵਾਲ਼ੇ ਪਰਵਾਰਾਂ ਨੂੰ ਖੁੱਡੇ ਲਾਈਨ ਲਗਾਇਆ- ਹਰਮੀਤ ਸਿੰਘ ਮਹਿਰਾਜ
ਅੰਨ੍ਹਾਂ ਵੰਡੇ ਰਿਉੜੀਆਂ ਮੁੜ ਮੁੜ ਆਪਣਿਆਂ ਨੂੰ ਦੇਵੇ।
ਬਸਪਾ ਨੇ ਅਕਾਲੀ ਦਲ ਨਾਲੋਂ ਗੱਠਜੋੜ ਖ਼ਤਮ ਕੀਤਾ,ਇਕੱਲਿਆਂ ਚੋਣ ਲੜੇਗੀ-ਇਕ ਖ਼ਬਰ
ਤੇਰੀ ਨੀਤ ਬੜੀ ਬਦਨੀਤ ਮੁੰਡਿਆ, ਅਸੀਂ ਫੇਰ ‘ਤੀ ਤੇਰੇ ‘ਤੇ ਲੀਕ ਮੁੰਡਿਆ।
ਭਾਜਪਾ ਸਰਕਾਰਾਂ ਦਾ ਵਤੀਰਾ ਪੰਜਾਬੀਆਂ ‘ਚ ਬੇਗਾਨਗੀ ਦਾ ਭਾਵਨਾ ਪੈਦਾ ਕਰੇਗਾ- ਸੰਯੁਕਤ ਕਿਸਾਨ ਮੋਰਚਾ
ਇਹ ਬੇਗਾਨਗੀ ਤਾਂ 47 ‘ਚ ਹੀ ਅਗਲਿਆਂ ਪੈਦਾ ਕਰ ਦਿਤੀ ਸੀ ਇਹ ਕਹਿ ਕੇ ਕਿ ‘ਹੁਣ ਸਮਾਂ ਬਦਲ ਗਿਐ।”
ਪਟਿਆਲੇ ਦਾ ਪ੍ਰਮੁੱਖ ਅਕਾਲੀ ਆਗੂ ਹਰਪਾਲ ਜੁਨੇਜਾ ਸਾਥੀਆਂ ਸਮੇਤ ‘ਆਪ’ ‘ਚ ਸ਼ਾਮਲ- ਇਕ ਖ਼ਬਰ
ਹੁਣ ਨਿਭਣੀ ਨਹੀਂ ਤੇਰੇ ਨਾਲ਼, ਤੇਰੀ ਸਾਡੀ ਬਸ ਮੁੰਡਿਆ।
ਸੁਖਬੀਰ ਬਾਦਲ ਦੀ ਸ਼ਹਿ ‘ਤੇ ਕੋਟਕਪੂਰਾ ਤੇ ਬਹਿਬਲ ਕਲਾਂ ਗੋਲੀਕਾਂਡ ਵਾਪਰੇ- ਐੱਸ.ਆਈ.ਟੀ.
ਸਮੁੱਚਾ ਸਿੱਖ ਜਗਤ ਤਾਂ ਸ਼ੁਰੂ ਤੋਂ ਹੀ ਇਹ ਕਹਿੰਦਾ ਆ ਰਿਹੈ ਭਾਈ ਪੁਲਿਸ ਵਾਲਿਉ।
ਅਕਾਲੀ ਦਲ ਤੇ ਭਾਜਪਾ ਦੇ ਗੱਠਜੋੜ ਦੀਆਂ ਸੰਭਾਵਨਾਵਾਂ ਪਈਆਂ ਮੱਧਮ- ਇਕ ਖ਼ਬਰ
ਹੁਣ ਜੋਗੀਆ ਕਰੇਂ ਪਖੰਡ ਕੈਸੇ, ਤੰਦੂਏ ਵਾਂਗ ਤਾਰਾਂ ਤੇਰੀਆਂ ਕੱਟੀਆਂ ਨੀ।
ਹਰਿਆਣਾ ਪੁਲਿਸ ਦੀ ਕਾਰਵਾਈ ਤੋਂ ਬਾਅਦ ਸਾਰੀਆਂ ਕਿਸਾਨ ਜਥੇਬੰਦੀਆਂ ਇਕੱਠੀਆਂ ਹੋਣ ਲੱਗੀਆਂ- ਇਕ ਖ਼ਬਰ
ਜਬੈ ਬਾਣ ਲਾਗੈ, ਤਬੈ ਰੋਸ ਜਾਗੇ।
ਸੰਨੀ ਦਿਓਲ ਤੇ ਸ਼ੱਤਰੂਘਨ ਸਿਨਹਾ ਪੰਜ ਸਾਲਾਂ ‘ਚ ਲੋਕ ਸਭਾ ‘ਚ ਇਕ ਸ਼ਬਦ ਨਹੀਂ ਬੋਲੇ-ਇਕ ਖ਼ਬਰ
ਵੱਡੇ ਸਾਬ੍ਹ ਵਲੋਂ ਸ਼ਾਬਾਸ਼ ਵੀ ਮਿਲਦੀ ਹੈ ਮੂੰਹ ਸੁੱਚਾ ਰੱਖਣ ਲਈ।
ਪਾਕਿ ਚੋਣਾਂ ‘ਚ ਧਾਂਦਲੀਆਂ ਦੀ ਜਾਂਚ ਕਰਨ ਲਈ ਉੱਚ ਪੱਧਰੀ ਕਮੇਟੀ ਦਾ ਗਠਨ-ਇਕ ਖ਼ਬਰ
ਕਮੇਟੀ ‘ਚ ਹੋਣ ਵਾਲੀ ਧਾਂਦਲੀ ਦੀ ਜਾਂਚ ਕੌਣ ਕਰੇਗਾ ਬਈ?
=============================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
2901.2024
ਜਿੱਥੇ ਔਰਤ ਜੱਜ ਹੀ ਸਰੀਰਕ ਸ਼ੋਸ਼ਣ ਦਾ ਸ਼ਿਕਾਰ ਹੋ ਰਹੀ ਹੋਵੇ ਉੱਥੇ ਨਿਆਂ ਕਿਸ ਤੋਂ ਮੰਗੋਗੇ?ਨੇ- ਹਰਸ਼ਿੰਦਰ ਕੌਰ
ਫ਼ਕਰਦੀਨਾਂ ਤੂੰ ਉੱਥੋਂ ਨਿਆਂ ਭਾਲ਼ੇਂ, ਜਿੱਥੇ ਵਾੜ ਹੀ ਖੇਤ ਨੂੰ ਖਾਂਵਦੀ ਏ।
ਪੰਜਾਬ ‘ਚ ਪਿਛਲੀਆਂ ਸਰਕਾਰਾਂ ਦੌਰਾਨ ਕੀਤੇ ਗਏ ਬਿਜਲੀ ਸਮਝੌਤਿਆਂ ਦੀ ਜਾਂਚ ਸ਼ੁਰੂ- ਇਕ ਖ਼ਬਰ
ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ।
ਸ਼੍ਰੋਮਣੀ ਅਕਾਲੀ ਦਲ ਤੇ ਬਸਪਾ ਦਾ ਗੱਠਜੋੜ ਅਟੱਲ- ਬਸਪਾ ਪ੍ਰਧਾਨ ਗੜ੍ਹੀ
ਸਿਆਸਤ ਲਾਟੂ ਦੇ ਵਾਂਗਰਾਂ ਘੁੰਮਦੀ ਏ, ਏਥੇ ਕੁਝ ਵੀ ਨਹੀਂ ਅਟੱਲ ਹੁੰਦਾ।
ਭਗਵੰਤ ਮਾਨ ਲਾਈਵ ਬਹਿਸ ਕਰੇ ਮੇਰੇ ਨਾਲ, ਜੇ ਮੈਂ ਹਾਰ ਗਿਆ ਤਾਂ ਸਿਆਸਤ ਛੱਡ ਦਿਆਂਗਾ- ਨਵਜੋਤ ਸਿੱਧੂ
ਮੇਰੇ ਵੀਰ ਦਾ ਬਾਗੜੀ ਬੋਤਾ, ਧੂੜਾਂ ਪੱਟਦਾ ਮੇਲੇ ਨੂੰ ਜਾਵੇ।
ਨਵਜੋਤ ਸਿੱਧੂ ਦੀ ਮੋਗਾ ਰੈਲੀ ਕਰਵਾਉਣ ਵਾਲੇ ਦੋ ਕਾਂਗਰਸੀ ਪਾਰਟੀ ‘ਚੋ ਕੱਢੇ-ਇਕ ਖ਼ਬਰ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।
ਜੇ ਸੱਤ ਦਿਨਾਂ ‘ਚ ਬੰਗਾਲ ਦਾ ਬਣਦਾ ਬਕਾਇਆ ਨਾ ਦਿਤਾ ਤਾਂ ਕੇਂਦਰ ਵਿਰੁੱਧ ਅੰਦੋਲਨ ਕਰਾਂਗੇ- ਮਮਤਾ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।
ਨਿਤਿਸ਼ ਕੁਮਾਰ ਨੇ ਭਾਜਪਾ ਨਾਲ਼ ਮਿਲਕੇ ਨਵੀਂ ਸਰਕਾਰ ਬਣਾ ਲਈ- ਇਕ ਖ਼ਬਰ
ਸਭ ਤੱਕਦੇ ਰਹਿ ਗਏ ਜੀ, ਪਲ਼ਟੂ ਨੇ ਮਾਰੀ ਫਿਰ ਪਲ਼ਟੀ।
ਪੰਜਾਬ ਦੀਆਂ 37 ਕਿਸਾਨ ਜਥੇਬੰਦੀਆਂ ਸੰਯੁਕਤ ਕਿਸਾਨ ਮੋਰਚੇ ਹੇਠ ਫਿਰ ਹੋਈਆਂ ਇਕੱਠੀਆਂ- ਇਕ ਖ਼ਬਰ
ਵੇ ਤੀਆਂ ਨੂੰ ਲਵਾਉਣ ਵਾਲਿਆ, ਤੇਰਾ ਹੋਵੇ ਸੁਰਗਾਂ ਵਿਚ ਵਾਸਾ।
ਵਿਜੀਲੈਂਸ ਬਿਊਰੋ ਨੇ ਸਾਬਕਾ ਓ.ਐਸ.ਡੀ. ਨੂੰ ਧਰਮਸੋਤ ਖ਼ਿਲਾਫ਼ ਗਵਾਹ ਬਣਾ ਲਿਆ-ਇਕ ਖ਼ਬਰ
ਘਰ ਕਾ ਭੇਤੀ ਲੰਕਾ ਢਾਏ।
ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਕਰਨ ਵਾਲੇ ਗ੍ਰੋਹ ਦਾ ਪਰਦਾ ਫ਼ਾਸ਼-ਇਕ ਖ਼ਬਰ
ਬਸ ਪਰਦਾ ਫ਼ਾਸ਼ ਹੀ ਹੁੰਦੈ ਅਗਾਂਹ ਕੁਝ ਨਹੀਂ ਹੁੰਦਾ।
ਅਮਰੀਕੀ ਰੱਖਿਆ ਵਿਭਾਗ ਕੋਲ ਯੂਕਰੇਨ ਨੂੰ ਦੇਣ ਲਈ ਹੋਰ ਫੰਡ ਨਹੀਂ ਹਨ- ਅਮਰੀਕੀ ਰੱਖਿਆ ਮੰਤਰੀ
ਲਾਉਣੀ ਸੀ ਜੇ ਕਮਲ਼ੀਏ, ਨਿਭਾਉਣੀ ਕਿਉਂ ਨਾ ਸਿੱਖੀ।
ਮਮਤਾ ਬੈਨਰਜੀ ਨੇ ਪੱਛਮੀ ਬੰਗਾਲ ‘ਚ ਇਕੱਲਿਆਂ ਚੋਣਾਂ ਲੜਨ ਦਾ ਕੀਤਾ ਐਲਾਨ-ਇਕ ਖ਼ਬਰ
ਕਿਤੇ ‘ਕੱਲੀ ਬਹਿ ਕੇ ਸੋਚੀਂ ਨੀ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।
ਬਲਾਚੌਰ ‘ਚ ਵਰਕਰ ਮਿਲਣੀ ਦੌਰਾਨ ਆਪਸੀ ਕਾਟੋ-ਕਲੇਸ਼ ‘ਚ ਉਲਝੇ ਕਾਂਗਰਸੀ ਵਰਕਰ- ਇਕ ਖ਼ਬਰ
ਮੋਤੀ ਖਿਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।
ਕਰੋੜਾਂ ਦੇ ਦਸਵੰਧ ਬਾਰੇ ਸੰਗਤਾਂ ਨੂੰ ਦੱਸਣ ਲਈ ਆਨਲਾਈਨ ਕਿਉਂ ਨਹੀਂ ਕਰ ਰਹੀ ਦਿੱਲੀ ਕਮੇਟੀ- ਰਮਨਦੀਪ ਸਿੰਘ
ਨਜ਼ਰ ਲੱਗ ਨਾ ਮਾਇਆ ਨੂੰ ਜਾਵੇ, ਪਰਦੇ ‘ਚ ਤਾਹੀਂਉਂ ਰੱਖਦੇ।
ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਅਕਾਲੀ ਦਲ ਨੂੰ ਮਜ਼ਬੂਤ ਕਰਨ ਲਈ ਮੀਟਿੰਗਾਂ ਸ਼ੁਰੂ- ਇਕ ਖ਼ਬਰ
ਗਿੱਧਾ ਪਾਉਣੇ ਨੂੰ, ਛੜੇ ਲਿਆਵੋ ਫੜ ਕੇ।
================================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
15.01.2024
ਰਾਜਪਾਲ ਪੁਰੋਹਿਤ ਨੇ ਪੰਜਾਬ ਵਿਧਾਨ ਸਭਾ ‘ਚ ਪਾਸ ਹੋਰ ਤਿੰਨ ਬਿੱਲਾਂ ਨੂੰ ਮੰਨਜ਼ੂਰੀ ਦਿਤੀ- ਇਕ ਖ਼ਬਰ
ਦੁੱਧ ਦਿਤਾ ਬੱਕਰੀ ਨੇ, ਵਿਚ ਮੁੱਠ ਮੀਗਣਾਂ ਦੀ ਪਾ ਕੇ।
ਦਿੱਲੀ ਕਮੇਟੀ ਦੇ ਪ੍ਰਧਾਨ ਦੀ ਕੁਰਸੀ ਪੰਥ ਨਾਲ਼ ਧ੍ਰੋਹ ਕਮਾਉਣ ਲਈ ਨਹੀਂ-ਪਰਮਜੀਤ ਸਿੰਘ ਸਰਨਾ
ਸਰਨਾ ਸਾਹਿਬ, ਤੁਸੀਂ ਵੀ ਤਾਂ ਪੰਥ ਨਾਲ਼ ਧ੍ਰੋਹ ਕਮਾਉਣ ਵਾਲਿਆਂ ਨਾਲ ਮੁੜ ਯਾਰੀ ਪਾਈ ਐ।
ਸੁਲਤਾਨ ਪੁਰ ਲੋਧੀ ‘ਚ ਗੋਲੀ ਚਲਾਉਣ ਲਈ ਪੰਜ ਮੈਂਬਰੀ ਕਮੇਟੀ ਨੇ ਮੁੱਖ ਮੰਤਰੀ ਨੂੰ ਜ਼ਿੰਮੇਵਾਰ ਠਹਿਰਾਇਆ- ਧਾਮੀ
ਚਲੋ, ਤੁਸੀਂ ਕਬੂਲ ਤਾਂ ਕਰ ਲਿਆ ਕਿ ਬਹਿਬਲ ਕਲਾਂ ਅਤੇ ਕੋਟ ਕਪੂਰੇ ‘ਚ ਵੀ ਗੋਲ਼ੀ ਮੁੱਖ ਮੰਤਰੀ ਦੇ ਹੁਕਮਾਂ ਨਾਲ ਹੀ ਚੱਲੀ ਸੀ।
ਸ਼ੇਖ਼ ਹਸੀਨਾ ਸਮਰਥਕਾਂ ਲਈ ‘ਆਇਰਨ ਲੇਡੀ, ਅਤੇ ਆਲੋਚਕਾਂ ਲਈ ‘ਤਾਨਾਸ਼ਾਹ’ ਇਕ ਖ਼ਬਰ
ਮਾਂਹ ਲਗਦੇ ਨੇ ਕਿਸੇ ਨੂੰ ਸੁਆਦੀ, ਤੇ ਕਈਆਂ ਨੂੰ ਇਹ ਬਾਦੀ ਕਰਦੇ।
ਪ੍ਰਧਾਨ ਬਾਰੇ ਵਿਵਾਦ ਨੂੰ ਲੈ ਕੇ ਕੈਲਗਰੀ ਸਥਿਤ ਗੁਰਦੁਆਰੇ ‘ਚ ਝੜਪ, ਚਾਰ ਜਣੇ ਜ਼ਖ਼ਮੀ- ਇਕ ਖ਼ਬਰ
ਮਾਇਆ ਨਾਗਣੀ ਤੇ ਚੌਧਰ ਦੀ ਭੁੱਖ ਯਾਰੋ, ਤੀਜਾ ਮਸਲਾ ਨਹੀਂ ਗੁਰੂ-ਦਰਬਾਰ ਅੰਦਰ।
ਭਗਵੰਤ ਮਾਨ ਨੇ ਸੁਖਬੀਰ ਬਾਦਲ ਦੇ ਮਾਣਹਾਨੀ ਨੋਟਿਸ ਦੀ ਚੁਣੌਤੀ ਕਬੂਲੀ- ਇਕ ਖ਼ਬਰ
ਜੇ ਮੁੰਡਿਆ ਤੂੰ ਚੁੰਘੀਆਂ ਬੂਰੀਆਂ, ਤਾਂ ਆ ਜਾ ਵਿਚ ਮੈਦਾਨੇ।
ਕਾਂਗਰਸ ਹਾਈ ਕਮਾਂਡ ਨਵਜੋਤ ਸਿੱਧੂ ਦੀਆਂ ਗਤੀਵਿਧੀਆਂ ਤੋਂ ਔਖੀ- ਇਕ ਖ਼ਬਰ
ਜਇਆਵੱਢੀ ਦਾ ਨਹੀਂ ਸੁਣਦਾ ਮੇਰੀ, ਮਨ ਆਈਆਂ ਨਿੱਤ ਕਰਦਾ।
ਜੰਮੂ ਕਸ਼ਮੀਰ ਦੇ ਸਿੱਖ ਬਣਾਉਣਾ ਚਾਹੁੰਦੇ ਹਨ ਬਾਦਲ ਦਲ ਦੀ ਇਕਾਈ- ਇਕ ਖ਼ਬਰ
ਲਿਬੜੀ ਮੱਝ ਹੈ ਸਭ ਨੂੰ ਲਿਬੇੜ ਦਿੰਦੀ, ਭੁੱਲ ਕੇ ਨੇੜ ਨਾ ਇਸ ਦੇ ਜਾਵੀਏ ਜੀ।
ਬਸਪਾ ਪ੍ਰਧਾਨ ਪੰਜਾਬ ਨੇ ਕਿਹਾ ਕਿ ਪਾਰਟੀ ਦਾ ਅਕਾਲੀ ਦਲ ਬਾਦਲ ਨਾਲ ਕੋਈ ਗੱਠਜੋੜ ਨਹੀਂ- ਇਕ ਖ਼ਬਰ
ਘਰੀਂ ਖੇੜਿਆਂ ਦੇ ਨਹੀਂ ਵਸਣਾ ਮੈਂ, ਸਾਡੇ ਨਾਲ਼ ਉਨ੍ਹਾਂ ਦੀ ਖਰਖਸ ਹੋਈ।
ਪੰਜਾਬ ਸਰਕਾਰ ਦੀਆਂ ਪ੍ਰਵਾਸੀ ਪੰਜਾਬੀਆਂ ਨਾਲ਼ ਮਿਲਣੀਆਂ ਸਿਰਫ਼ ਸ਼ੋਸ਼ੇਬਾਜ਼ੀ ਤੱਕ ਸੀਮਤ- ਇਕ ਖ਼ਬਰ
ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।
ਕਾਂਗਰਸੀ ਆਗੂਆਂ ਨੇ ਰਾਮ ਮੰਦਰ ਦੇ ‘ਪ੍ਰਾਣ ਪ੍ਰਤਿਸ਼ਠਾ’ ਸਮਾਰੋਹ ‘ਚ ਜਾਣ ਤੋਂ ਕੀਤੀ ਨਾਂਹ- ਇਕ ਖ਼ਬਰ
ਮੈਂ ਕਿੰਜ ਮੁਕਲਾਵੇ ਜਾਵਾਂ, ਮਿੱਤਰਾਂ ਦਾ ਪਿੰਡ ਛੱਡ ਕੇ।
ਕਾਂਗਰਸੀ ਆਗੂਆਂ ਨੇ ਨਾਭਾ ਜੇਲ੍ਹ ‘ਚ ਬੰਦ ਸੁਖਪਾਲ ਖਹਿਰਾ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ
ਮੁੰਡੇ ਗੱਭਰੂ ਸ਼ੁਕੀਨ ਬਥੇਰੇ, ਤੇਰੇ ਉੱਤੇ ਡੋਰ ਮਿੱਤਰਾ।
ਅਸੀਂ ‘ਇੰਡੀਆ’ ਗੱਠਜੋੜ ਲਈ ਤਿਆਰ, ਪਰ ਕਾਂਗਰਸ ਪੱਛਮੀ ਬੰਗਾਲ ‘ਚ ਆਪਣੀਆਂ ਹੱਦਾਂ ਸਮਝੇ-ਮਮਤਾ
ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਉਂਜ ਤੈਨੂੰ ਜੀ ਆਇਆਂ ਨੂੰ।
ਰਾਜਾ ਵੜਿੰਗ ਨੇ ਨਵਜੋਤ ਸਿੱਧੂ ਨੂੰ ਰੰਗ ਵਿਚ ਭੰਗ ਨਾ ਪਾਉਣ ਲਈ ਕਿਹਾ- ਇਕ ਖ਼ਬਰ
ਗੱਲਾਂ ਤੇਰੀਆਂ ਦੇ ਉੱਠਣ ਮਰੋੜੇ, ਢਿੱਡ ਵਿਚ ਦੇਵਾਂ ਮੁੱਕੀਆਂ।
ਅਸੀਂ ‘ਇਕ ਦੇਸ਼, ਇਕ ਚੋਣ’ ਦੀ ਧਾਰਣਾ ਨਾਲ ਸਹਿਮਤ ਨਹੀਂ- ਮਮਤਾ ਬੈਨਰਜੀ
ਤੇਰੇ ਖੁਸ਼ਕ ਮੱਕੀ ਦੇ ਦਾਣੇ, ਮਿੱਤਰਾਂ ਨੇ ਨਹੀਉਂ ਚੱਬਣੇ।
=================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
08.01.2024
ਸੁਖਬੀਰ ਬਾਦਲ ਨੇ ਮਨਜੀਤ ਸਿੰਘ ਜੀ.ਕੇ. ਨੂੰ ਕੋਰ ਕਮੇਟੀ ਵਿਚ ਸ਼ਾਮਲ ਕੀਤਾ- ਇਕ ਖ਼ਬਰ
ਮਰਦੀ ਨੇ ਅੱਕ ਚੱਬਿਆ, ਹਾਰ ਕੇ ਜੇਠ ਨਾਲ਼ ਲਾਈਆਂ।
ਪਿੰਡ ਕਰਮਸ਼ਾਲਾ ਵਾਸੀਆਂ ਨੇ ਬੇਰੰਗ ਚਿੱਠੀ ਵਾਂਗ ਮੋੜੀ ਵਿਕਾਸ ਭਾਰਤ ਯਾਤਰਾ- ਇਕ ਖ਼ਬਰ
ਅਸਾਂ ਨਹੀਂ ਸਹੁਰੇ ਜਾਣਾ, ਤੂੰ ਲੈ ਜਾ ਗੱਡੀ ਮੋੜ ਕੇ।
ਅਕਾਲੀ ਦਲ 1 ਫਰਵਰੀ ਤੋਂ ਪੰਜਾਬ ਬਚਾਉ ਯਾਤਰਾ ਸ਼ੁਰੂ ਕਰੇਗਾ- ਇਕ ਖ਼ਬਰ
ਬਾਦਲ ਦਲੀਉ, ਲੋਕ ਜਾਣ ਚੁੱਕੇ ਹਨ ਕਿ ਪੰਜਾਬ ਨੂੰ ਕਿਸ ਤੋਂ ਬਚਾਉਣਾ ਹੈ।
ਗੱਠਜੋੜ ਲਈ ਭਾਜਪਾ ਅਜੇ ਅਕਾਲੀ ਦਲ ਨੂੰ ਕੋਈ ਲੜ ਪੱਲਾ ਨਹੀਂ ਫੜਾ ਰਹੀ-ਇਕ ਖ਼ਬਰ
ਜੇ ਮੁੰਡਿਆਂ ਤੂੰ ਖਾਣੀਆਂ ਸੇਵੀਆਂ ਤਾਂ ਮੁੱਛਾਂ ਮੁਨਾ ਕੇ ਆ।
ਅਕਾਲੀ ਦਲ ਦੀ ਪੰਜਾਬ ਬਚਾਉ ਯਾਤਰਾ ‘ਆਪ’ ਪਾਰਟੀ ਦੇ ਝੂਠੇ ਵਾਅਦਿਆਂ ਤੋਂ ਪਰਦਾ ਚੁੱਕੇਗੀ- ਰਾਜੂ ਖੰਨਾ
ਤੇ ਅਕਾਲੀ ਦਲ (ਪੰਜਾਬੀ ਪਾਰਟੀ) ਵਲੋਂ ਲੁੱਟੇ ਗਏ ਪੰਜਾਬ ਦਾ ਹਿਸਾਬ ਮੰਗਣਗੇ ਲੋਕ।
ਝਾਕੀਆਂ ਬਾਰੇ ਝੂਠ ਬੋਲ ਕੇ ਸੁਨੀਲ ਜਾਖੜ ਜੀ ਹੁਣ ਕਿਹੜੇ ਮੂੰਹ ਨਾਲ਼ ਪੰਜਾਬੀਆਂ ‘ਚ ਜਾਉਗੇ- ਭਗਵੰਤ ਮਾਨ
ਪਹਿਲਾ ਕੰਮ ਮੈਂ ਬੜਾ ਹੀ ਖਾਸ ਕੀਤਾ, ਕੋਰਸ ਜੁਮਲਿਆਂ ਦਾ ਦਿੱਲੀਉਂ ਪਾਸ ਕੀਤਾ।
ਪਾਕਿਸਤਾਨ ‘ਚ ਇਮਰਾਨ ਖਾਨ ਦਾ ਨਾਮਜ਼ਦਗੀ ਪੱਤਰ ਰੱਦ- ਇਕ ਖ਼ਬਰ
ਮਾਪੇ ਤੈਨੂੰ ਘੱਟ ਰੋਣਗੇ, ਬਹੁਤੇ ਰੋਣਗੇ ਦਿਲਾਂ ਦੇ ਜਾਨੀ।
ਸ਼ੀ ਤੇ ਬਾਈਡੇਨ ਨੇ ਚੀਨ-ਅਮਰੀਕਾ ਦੇ ਸਬੰਧਾਂ ਦੀ 45ਵੀਂ ਵਰ੍ਹੇਗੰਢ ‘ਤੇ ਦਿਤੀ ਇਕ ਦੂਜੇ ਨੂੰ ਵਧਾਈ- ਇਕ ਖ਼ਬਰ
ਜਿਹੜੇ ਮਿੱਠੀਆਂ ਜ਼ੁਬਾਨਾਂ ਵਾਲ਼ੇ, ਮਤਲਬ ਕੱਢ ਲੈਣਗੇ।
ਪਤਿਤ ਵੋਟਰਾਂ ਦੀਆਂ ਵੋਟਾਂ ਬਣਨ ‘ਤੇ ਹਰਿਆਣਾ ਦੀ ਗੁਰਦੁਆਰਾ ਕਮੇਟੀ ਚੁੱਪ- ਸੁਖਵਿੰਦਰ ਸਿੰਘ ਖ਼ਾਲਸਾ
ਚੋਰੀ ਹੋਣੋਂ ਕੌਣ ਫਿਰ ਰੋਕ ਸਕਦਾ, ਚੋਰਾਂ ਨਾਲ਼ ਜਦ ਕੁੱਤੀ ਰਲ਼ ਜਾਵੇ।
ਈ.ਡੀ. ਦੇ ਤੀਜੇ ਸੰਮਨ ‘ਤੇ ਵੀ ਪੇਸ਼ ਨਹੀਂ ਹੋਏ ਕੇਜਰੀਵਾਲ- ਇਕ ਖ਼ਬਰ
ਸੁੱਤੀ ਨਾ ਜਗਾਈਂ ਮਿੱਤਰਾ, ਸਾਨੂੰ ਲੱਡੂਆਂ ਤੋਂ ਨੀਂਦ ਪਿਆਰੀ।
ਭਾਈ ਕਾਉਂਕੇ ਮਾਮਲੇ ‘ਚ ਜਿਹੜੇ ਅੱਜ ਬਾਹਾਂ ਉਲਾਰ ਰਹੇ ਹਨ, ਉਦੋਂ ਜਿਉਂਦੇ ਸਨ- ਗਿਆਨੀ ਹਰਪ੍ਰੀਤ ਸਿੰਘ
ਲਾਲ ਸਿੰਘ ਤੇਜ ਸਿੰਘ ਜੀ, ਕਰ ਗਏ ਨੇ ਗ਼ਦਾਰੀ ਭਾਰੀ।
ਮੋਦੀ ਸਰਕਾਰ ਦੀ ‘ਵਿਤੀ ਕੇਂਦਰਤ’ ਨੀਤੀ ਰਾਜਾਂ ਦੇ ਸੰਘੀ ਢਾਂਚੇ ਨੂੰ ਖ਼ਤਰਾ- ਇਕ ਖ਼ਬਰ
ਚੰਗੀ ਚੰਗੀ ਆਪ ਲੈ ਗਿਆ, ਸਾਨੂੰ ਦੇ ਗਿਆ ਕੱਲਰ ਵਾਲਾ ਪਾਸਾ।
ਭਾਜਪਾ ਬਾਦਲ ਅਕਾਲੀ ਦਲ ਨਾਲ਼ ਗੱਠਜੋੜ ਕਰਨ ਦੇ ਹੱਕ ਵਿਚ ਨਹੀਂ- ਇਕ ਖ਼ਬਰ
ਰੜਕੇ, ਰੜਕੇ, ਰੜਕੇ ਵੇ, ਮੱਘਾ ਭੰਨਿਆਂ ਜੇਠ ਨਾਲ ਲੜ ਕੇ ਵੇ।
ਜਥੇਦਾਰ ਕਾਉਂਕੇ ਦੇ ਕਤਲ ਦਾ ਇਨਸਾਫ਼ ਸਿੱਖ ਕੌਮ ਨੂੰ ਮਿਲਣਾ ਚਾਹੀਦਾ ਹੈ- ਹਰਮਨਜੀਤ ਸਿੰਘ
ਇਸ ਅਦਾਲਤ ‘ਚ ਬੰਦੇ ਬਿਰਖ ਹੋ ਗਏ....................
ਕਾਉਂਕੇ ਦੇ ਕਾਤਲਾਂ ਦੀ ਪੁਸ਼ਤਪਨਾਹੀ ਕਰਨ ਦੇ ਦੋਸ਼ ‘ਚ ਜਥੇਦਾਰ ਅਕਾਲੀ ਦਲ ਦੇ ਪ੍ਰਧਾਨ ਨੂੰ ਤਨਖਾਹ ਲਾਉਣ- ਪੰਜੋਲੀ
ਨੌਕਰ ਵੀ ਕਦੇ ਮਾਲਕਾਂ ‘ਤੇ ਹੁਕਮ ਚਲਾਉਂਦਾ ਦੇਖਿਆ, ਪੰਜੋਲੀ ਸਾਹਿਬ।
====================================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
18.12.2023
ਸੰਜੈ ਰਾਉਤ ਨੇ 2024 ਦੀਆਂ ਆਮ ਚੋਣਾਂ ਲਈ ਕਾਂਗਰਸ ਨੂੰ ਕੀਤਾ ਚੌਕਸ- ਇਕ ਖ਼ਬਰ
ਖ਼ਬਰਦਾਰ ਰਹਿਣਾ ਬਈ, ਚੌਂਕੀ ਜ਼ਾਲਮਾਂ ਦੀ ਆਈ।
ਪਾਖੰਡੀਆਂ ਦੇ ਦਰਾਂ ਉੱਤੇ ਧੱਕੇ ਖਾਣ ਨਾਲੋਂ ਗੁਰੂ ਗ੍ਰੰਥ ਸਾਹਿਬ ਨਾਲ ਜੁੜੋ- ਭਾਈ ਮਾਝੀ
ਦਰ ਦਰ ਦੇ ਫਿਰਨੇ ਨਾਲੋਂ, ਇਕ ਦਰ ਦਾ ਹੋ ਕੇ ਬਹਿ ਜਾ।
ਆਲੂ-ਪਿਆਜ਼ ਵਿਕਰੇਤਾ ਰੋਜ਼ਾਨਾ ਕਰਦੇ ਹਨ ਕਰੋੜਾਂ ਰੁਪਏ ਦੀ ਸੇਲਜ਼ ਟੈਕਸ ਦੀ ਚੋਰੀ- ਇਕ ਖ਼ਬਰ
24 ਦੀਆਂ ਚੋਣਾਂ ਵੀ ਤਾਂ ਸਿਰ ‘ਤੇ ਹਨ, ਫੰਡ ਵੀ ਚਾਹੀਦੇ ਹਨ ਬਈ।
ਸੁਰਜੀਤ ਸਿੰਘ ਰੱਖੜਾ ਨੇ ਭਾਜਪਾ ਨਾਲ ਅਕਾਲੀ ਦਲ ਦੀ ਗੁਪਤ ਗੱਲਬਾਤ ਦਾ ਭਾਂਡਾ ਭੰਨਿਆ- ਇਕ ਖ਼ਬਰ
ਲੁਕ ਛਿਪ ਲਾਈਆਂ ਪ੍ਰਗਟ ਹੋਈਆਂ, ਵੱਜ ਗਏ ਢੋਲ ਨਗਾਰੇ।
ਭ੍ਰਿਸ਼ਟਾਚਾਰ ਨੂੰ ਲੈ ਕੇ ਭਾਜਪਾ ਤੇ ਕਾਂਗਰਸ ਨੇ ਇਕ ਦੂਜੇ ‘ਤੇ ਤੋਹਮਤਾਂ ਲਾਈਆਂ- ਇਕ ਖ਼ਬਰ
ਭੂਆ ਭਤੀਜੀ ਲੜੀਆਂ, ਵਿਚ ਦਰਵਾਜ਼ੇ ਦੇ।
ਪਾਕਿਸਤਾਨ ‘ਚ ਅੱਤਵਾਦੀ ਹਮਲੇ ‘ਚ ਗਈ 25 ਲੋਕਾਂ ਦੀ ਜਾਨ, 27 ਜ਼ਖ਼ਮੀ- ਇਕ ਖ਼ਬਰ
ਇਸ ਘਰ ਕੋ ਆਗ ਲਗ ਗਈ ਘਰ ਕੇ ਚਿਰਾਗ਼ ਸੇ।
ਜਬਰਜਨਾਹ ਮਾਮਲੇ ‘ਚ ਭਾਜਪਾ ਵਿਧਾਇਕ ਨੂੰ 25 ਸਾਲ ਦੀ ਕੈਦ- ਇਕ ਖ਼ਬਰ
ਵਾਹ ਵਿਧਾਇਕ ਜੀ ਵਾਹ, ਬਣਨਾ ਲੋਕ ਸੇਵਕ ਤੇ ਕੰਮ ਕਰਨੇ ਆਹ।
ਪੰਜਾਬ ਦੇ ਲੋਕ ਬਾਦਲ ਪਰਵਾਰ ਨੂੰ ਕੀਤੇ ਬੱਜਰ ਗੁਨਾਹਾਂ ਲਈ ਕਦੇ ਵੀ ਮਾਫ਼ ਨਹੀਂ ਕਰਨਗੇ- ਭਗਵੰਤ ਮਾਨ
ਇਹਨਾਂ ਸੁਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।
ਕਾਂਗਰਸ ਨੂੰ ਨੁਕਸਾਨ ਪਹੁੰਚਾਉਣ ਦੇ ਰੌਂਅ ਵਿਚ ‘ਆਪ’- ਬਾਜਵਾ
ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।
ਭਾਜਪਾ ਨੇ ਮਹਿੰਗਾਈ ਅਤੇ ਬੇਰੁਜ਼ਗਾਰੀ ਬਿਨਾਂ ਕੁਝ ਨਹੀਂ ਦਿਤਾ- ਮਨੀਸ਼ ਤਿਵਾੜੀ
ਭੁਸ ਪਾ ਕੇ ਲੱਡੂਆਂ ਦਾ, ਤੈਨੂੰ ਪੁੱਟ ਲਿਆ ਪਟਵਾਰੀ ਨੇ।
ਭਾਜਪਾ ਨਾਲ ਗੱਠਜੋੜ ਲਈ ਰਾਹ ਪੱਧਰਾ ਕਰਨ ਵਾਸਤੇ ਸੁਖਬੀਰ ਨੇ ਮਾਫ਼ੀ ਦਾ ਡਰਾਮਾ ਖੇਡਿਆ- ਪਰਤਾਪ ਸਿੰਘ ਬਾਜਵਾ
ਮਹੀਂਵਾਲ ਨੂੰ ਮਿਲਣ ਦੀ ਮਾਰੀ, ਤਰਦੀ ਕੱਚਿਆਂ ‘ਤੇ।
‘ਆਪ’ ਨਾਲ ਗੱਠਜੋੜ ਨੂੰ ਲੈ ਕੇ ਪੰਜਾਬ ਕਾਂਗਰਸ ਵਿਚ ਮੱਤਭੇਦ ਬਰਕਰਾਰ- ਇਕ ਖ਼ਬਰ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।
ਪੰਜਾਬ ਦੇ ਪਾਣੀਆਂ ਦੀ ਰਾਖੀ ਲਈ ਇਕਜੁੱਟ ਹੋਣ ਦਾ ਸੱਦਾ- ਆਜ਼ਾਦ ਕਿਸਾਨ ਸੰਘਰਸ਼ ਕਮੇਟੀ
ਵੰਝਲੀ ਰਾਂਝੇ ਦੀ , ਹੀਰ ਹੀਰ ਪਈ ਕੂਕੇ।
ਮਹਿੰਗਾਈ ਕਾਰਨ ਕੈਨੇਡਾ ਛੱਡਣ ਲਈ ਮਜਬੂਰ ਹੋਣ ਲੱਗੇ ਲੋਕ- ਇਕ ਖ਼ਬਰ
ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।
ਨਸ਼ਾ ਤਸਕਰੀ ਮਾਮਲੇ ‘ਚ ਮਜੀਠੀਆ ਦੀਆਂ ਮੁਸ਼ਕਿਲਾਂ ਵਧੀਆਂ- ਇਕ ਖ਼ਬਰ
ਵੈਰੀ ਤੇਰੇ ਐਬ ਬੰਦਿਆ, ਹੁੰਦਾ ਰੱਬ ਨਹੀਂ ਕਿਸੇ ਦਾ ਵੈਰੀ।
================================================
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
11.12.2023
ਵਿਧਾਨ ਸਭਾਵਾਂ ਦੇ ਚੋਣ ਨਤੀਜਿਆਂ ‘ਤੇ ਕਾਂਗਰਸ ਨੇ ਕੀਤੀ ਸਮੀਖਿਆ ਬੈਠਕ- ਇਕ ਖ਼ਬਰ
ਇਕ ਦੂਜੇ ਨੂੰ ਛੜੇ ਪਏ ਪੁੱਛਦੇ, ਕੌਣ ਕੌਣ ਹੋਈਆਂ ਰੰਡੀਆਂ।
ਕੈਪਟਨ ਅਮਰਿੰਦਰ ਸਿੰਘ ਚੋਣ ਨਤੀਜਿਆਂ ਤੋਂ ਬਾਗ਼ੋ-ਬਾਗ਼- ਇਕ ਖ਼ਬਰ
ਕੋਈ ਸ਼ਹਿਰੀ ਬਾਬੂ ਕੋਈ ਲਹਿਰੀ ਬਾਬੂ, ਕਬ ਬਾਂਧ ਗਿਆ ਘੁੰਗਰੂ, ਮੈਂ ਛਮ ਛਮ ਨੱਚਦੀ ਫਿਰਾਂ।
‘ਆਪ ਪਾਰਟੀ’ ਨੂੰ ਚੌਹਾਂ ਸਟੇਟਾਂ ਵਿਚ ਇਕ ਵੀ ਸੀਟ ਨਹੀਂ ਮਿਲੀ- ਇਕ ਖ਼ਬਰ
ਨਾ ਖੁਦਾ ਹੀ ਮਿਲਾ ਨਾ ਵਿਸਾਲੇ-ਸਨਮ, ਨਾ ਇਧਰ ਕੇ ਰਹੇ ਨਾ ਉਧਰ ਕੇ ਰਹੇ।
ਭਾਈ ਰਾਜੋਆਣਾ ਨੂੰ ਮਿਲਣ ਪਹੁੰਚੇ ਅਕਾਲੀ ਦਲ ਦੇ ਵਫ਼ਦ ਨੂੰ ਪ੍ਰਸ਼ਾਸਨ ਨੇ ਵਾਪਸ ਮੋੜਿਆ- ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨੀਂ ਚੱਪਣੀ ਵਗਾਹ ਕੇ ਮਾਰੀ।
ਬੰਦੀਆਂ ਦੇ ਨਾਮ ‘ਤੇ ਅਕਾਲੀ ਦਲ ਬਾਦਲ ਸ਼੍ਰੋਮਣੀ ਕਮੇਟੀ ਨੂੰ ਆਪਣੀ ਸਿਆਸਤ ਲਈ ਵਰਤ ਰਿਹਾ ਹੈ- ਦਿੱਲੀ ਕਮੇਟੀ
ਕਿਉਂ ਨਾ ਵਰਤੇ ਬਈ ! ਅਜੇ ਪੱਚੀ ਦੇ ਪੱਚੀ ਸਾਲ ਉਂਜ ਹੀ ਪਏ ਹਨ।
ਅਕਾਲੀ ਦਲ ਨੇ ‘ਆਪ’ ਵਲੋਂ ਚੁੱਕੇ ਕਰਜ਼ਿਆਂ ਦੀ ਨਿਰਪੱਖ ਜਾਂਚ ਮੰਗੀ- ਇਕ ਖ਼ਬਰ
ਮੇਰਾ ਲੌਂਗ ਤੇਰੀ ਹਿੱਕ ਸਾੜੇ, ਸੱਸੇ ਆਪਣੇ ਤੂੰ ਦਿਨ ਭੁੱਲ ਗਈ।
ਦੇਸ਼ ਦੀ ਆਰਥਕ ਸਥਿਤੀ ‘ਤੇ ਰਾਘਵ ਚੱਢਾ ਨੇ ਸਰਕਾਰ ਨੂੰ ਘੇਰਿਆ-ਇਕ ਖ਼ਬਰ
ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।
ਭਾਈ ਰਾਜੋਆਣਾ ਮਸਲੇ ਲਈ ਬਣੀ ਪੰਜ ਮੈਂਬਰੀ ਕਮੇਟੀ ਵੀ ਵਿਵਾਦਾਂ ‘ਚ ਘਿਰੀ- ਇਕ ਖ਼ਬਰ
ਤੇਰੀ ਹਰ ਮੱਸਿਆ ਬਦਨਾਮੀ, ਨੀ ਸੋਨੇ ਦੇ ਤਵੀਤ ਵਾਲ਼ੀਏ।
ਕਈ ਵਾਰੀ ਕੁਝ ਗੱਲਾਂ ਨੂੰ ਅਣਕਹਿਆ ਹੀ ਛੱਡ ਦੇਣਾ ਬਿਹਤਰ ਹੁੰਦਾ ਹੈ- ਜਸਟਿਸ ਕੌਲ
ਗੱਲਾਂ ਤੇਰੀਆਂ ਦੇ ਉੱਠਣ ਮਰੋੜੇ, ਢਿੱਡ ਵਿਚ ਦੇਵਾਂ ਮੁੱਕੀਆਂ।
ਡਾਇਰੈਕਟਰ ਟ੍ਰਾਂਸਪੋਰਟ ‘ਤੇ ਨਿਜੀ ਬੱਸ ਆਪਰੇਟਰਾਂ ਨੂੰ ਲਾਭ ਪਹੁੰਚਾਉਣ ਦਾ ਦੋਸ਼- ਇਕ ਖ਼ਬਰ
ਗੋਰੇ ਰੰਗ ਨੇ ਸਦਾ ਨਹੀਂ ਰਹਿਣਾ, ਭਰ ਭਰ ਵੰਡ ਮੁੱਠੀਆਂ।
ਅਮਰੀਕੀ ਸੰਸਦ ਮੈਂਬਰਾਂ ਨੇ ਭਾਰਤ ਦੀ ਕੀਤੀ ਆਲੋਚਨਾ-ਇਕ ਖ਼ਬਰ
ਗੋਰੇ ਰੰਗ ‘ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।
ਲੋਕਾਂ ਦਾ ਫਤਵਾ ਮੰਨਜ਼ੂਰ, ਵਿਚਾਰਧਾਰਾ ਦੀ ਲੜਾਈ ਜਾਰੀ ਰਹੇਗੀ- ਰਾਹੁਲ ਗਾਂਧੀ
ਹੱਥ ਪਕੜ ਜੁੱਤੀ ਮੋਢੇ ਮਾਰ ਬੁੱਕਲ਼, ਰਾਂਝਾ ਹੋ ਤੁਰਿਆ ਵਾਰਸ ਸ਼ਾਹ ਜੇਹਾ।
ਲੋਕ ਸਭਾ ਚੋਣਾਂ ਨੇੜੇ ਦੇਖਦਿਆਂ ਭਾਜਪਾ ਵਫ਼ਦ ਵਲੋਂ ਰਾਧਾ ਸੁਆਮੀ ਮੁਖੀ ਨਾਲ਼ ਮੁਲਾਕਾਤ- ਇਕ ਖ਼ਬਰ
ਮਿੱਠੇ ਯਾਰ ਦੇ ਬਰੋਬਰ ਬਹਿ ਕੇ, ਮਿੱਠੇ ਮਿੱਠੇ ਬੇਰ ਚੁਗੀਏ।
ਕੈਨੇਡਾ ਸਰਕਾਰ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ‘ਤੇ ਕੱਸਿਆ ਸ਼ਿਕੰਜਾ- ਇਕ ਖ਼ਬਰ
ਸਉਣ ਦਿਆ ਬੱਦਲਾ ਵੇ, ਹੀਰ ਭਿਉਂ ‘ਤੀ ਮਜਾਜਾਂ ਵਾਲ਼ੀ।
ਦਿੱਲੀ ਦੇ ਮੁੱਖ ਸਕੱਤਰ ਨੂੰ ਰਾਜ ਸਰਕਾਰ ਦੀਆਂ ਹਦਾਇਤਾਂ ਦਾ ਪਾਲਣ ਕਰਨਾ ਹੋਵੇਗਾ- ਸੁਪਰੀਮ ਕੋਰਟ
ਆ ਜਾ ਢੋਲਣਾ ਲੁਹਾਰ ਮੁੰਡਾ ਬਣ ਕੇ, ਤੱਕਲੇ ਨੂੰ ਵਲ਼਼ ਪੈ ਗਿਆ।
=================================================================
