8 Nov. 2020

ਬੀ.ਜੇ.ਪੀ. ਦੇ ਸਾਬਕਾ ਮੰਤਰੀ ਨੂੰ ਪਿਛਲੇ ਦਰਵਾਜ਼ੇ ਰਾਹੀਂ ਬਾਹਰ ਕੱਢਿਆ- ਇਕ ਖ਼ਬਰ
ਨੀ ਹੁਣ ਮੈਂ ਕੀ ਕਰਾਂ, ਜੱਟ ਆਉਂਦਾ ਪਰੈਣੀ ਕੱਸੀ।

ਦੋਸਤਾਨਾ ਮੈਚ ਖੇਡ ਰਹੇ ਹਨ ਕੈਪਟਨ ਅਤੇ ਮੋਦੀ- ਦਲਜੀਤ ਸਿੰਘ ਚੀਮਾ
ਓਹੀ ਤੇਰੀ ਤੁਣਤੁਣੀ, ਉਹੀਓ ਤੇਰਾ ਰਾਗ।

ਸੁਖਬੀਰ ਦੇ ਹੱਥ ਕਮਾਨ ਆਉਣ ‘ਤੇ ਅਕਾਲੀ ਦਲ ਦਾ ਨਿਘਾਰ ਹੋਇਆ- ਸੁਖਦੇਵ ਸਿੰਘ ਢੀਂਡਸਾ
ਜਦੋਂ ਦੀ ਤੂੰ ਆਈ ਵੈਰਨੇ, ਮੇਰੇ ਪੁੱਤਾਂ ਵਿਚ ਵੈਰ ਪੁਆਏ।

ਐਨ.ਡੀ.ਏ. ਨੇ ਪਹਿਲਾਂ ਬਿਹਾਰੀਆਂ ਦੀਆਂ ਲੋੜਾਂ ਕੀਤੀਆਂ ਪੂਰੀਆਂ ਤੇ ਹੁਣ ਹੋਣਗੀਆਂ ਰੀਝਾਂ- ਭਾਜਪਾ
ਨਿੱਤ ਨਿੱਤ ਨਹੀਂ ਬਾਜ਼ਾਰ ਵਿਚ ਆਉਣਾ, ਨੀ ਬਿੱਲੋ ਖਾ ਲੈ ਨਾਸ਼ਪਾਤੀਆਂ।

ਚੰਡੀਗੜ੍ਹ ਧਰਨੇ ਨਾਲ ‘ਆਪ’ ਦੀ ਭਾਜਪਾ ਨਾਲ ਸਾਂਝ ਹੋਈ ਬੇਨਕਾਬ- ਨਾਗਰਾ
ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਕਾਂਗਰਸੀਆਂ ਤੋਂ ਹਰ ਘਪਲੇ ਦਾ ਹਿਸਾਬ ਲਿਆ ਜਾਵੇਗਾ- ਮਜੀਠੀਆ
ਜਿੱਦਾਂ ਦਾ ਹਿਸਾਬ ਰਾਜੇ ਨੇ ਤੁਹਾਡੇ ਕੋਲੋਂ ਲਿਆ, ਹੈ ਕਿ ਨਾ!

ਪੰਜਾਬ ਦੀ ਸਥਿਤੀ ਵਿਗੜਨ ਦੇਣ ਲਈ ਸੂਬਾ ਸਰਕਾਰ ਜ਼ਿੰਮੇਵਾਰ- ਨੱਢਾ
ਚੁੱਕੀ ਹੋਈ ਲੰਬੜਾਂ ਦੀ, ਨਾਲ਼ ਠਾਣੇਦਾਰ ਦੇ ਖਹਿੰਦੀ।

ਨਿਤੀਸ਼ ਕੁਮਾਰ ਦਾ ਐਲਾਨ- ਇਹ ਮੇਰੀ ਆਖਰੀ ਚੋਣ- ਇਕ ਖ਼ਬਰ
ਜਿੰਨਾ ਨਹਾਤੀ ਓਨਾ ਹੀ ਪੁੰਨ ।

ਪੰਜ ਸਾਲਾਂ ਬਾਅਦ ਵੀ ਪੀੜਿਤ ਇਨਸਾਫ਼ ਦੀ ਉਡੀਕ ਵਿਚ-ਇਕ ਖ਼ਬਰ
ਇੱਥੇ ਤਾਂ ਦਹਾਕੇ ਲੱਗ ਜਾਂਦੇ ਆ, ਪੰਜ ਸਾਲਾਂ ਬਾਅਦ ਹੀ ਕਾਹਲ਼ੇ ਪੈ ਗਏ ਜਨਾਬ ।

ਕੈਪਟਨ ਅਮਰਿੰਦਰ ਸਿੰਘ ਮੋਦੀ ਦੀ ਕੋਠੀ ਅੱਗੇ ਮਰਨ ਵਰਤ ‘ਤੇ ਬੈਠੇ- ਸੁਖਬੀਰ ਬਾਦਲ
ਤੇ ਤੁਸੀਂ ਅੰਦਰ ਬਹਿ ਕੇ ਮੋਦੀ ਸਾਬ ਨਾਲ਼ ਰਸਗੁੱਲੇ ਖਾਵੋਂ, ਹੈ ਨਾ!

ਕੈਪਟਨ ਸਰਕਾਰ ਕਿਸਾਨਾਂ ਨੂੰ ਗੁਮਰਾਹ ਕਰਨਾ ਬੰਦ ਕਰੇ- ਮਦਨ ਮੋਹਨ ਮਿੱਤਲ
ਤੇ ਭਾਜਪਾਈਓ, ਤੁਸੀਂ ਕਿਸਾਨ ਬਿੱਲਾਂ ਬਾਰੇ ਝੂਠ ਬੋਲਣਾ ਬੰਦ ਕਰੋ।

ਹਰਿਆਣਾ ਸਰਕਾਰ ਨੇ ਅਕਤੂਬਰ ‘ਚ ਸੌਦਾ ਸਾਧ ਨੂੰ ਇਕ ਦਿਨ ਦੀ ਦਿਤੀ ਪੈਰੋਲ- ਇਕ ਖ਼ਬਰ
ਮਿੱਤਰਾਂ ਦੇ ਤਿੱਤਰਾਂ ਨੂੰ , ਨੀ ਮੈਂ ਤਲੀਆਂ ‘ਤੇ ਚੋਗ ਚੁਗਾਵਾਂ।

ਪੰਥਕ ਅਕਾਲੀ ਲਹਿਰ ਨੇ ਘੇਰੀ ਸ਼੍ਰੋਮਣੀ ਕਮੇਟੀ- ਇਕ ਖ਼ਬਰ
ਬੱਗੀ ਤਿੱਤਰੀ ਕਮਾਦੋਂ ਨਿੱਕਲੀ, ਉਡਦੀ ਨੂੰ ਬਾਜ ਪੇ ਗਿਆ।

ਕਿਸਾਨਾਂ ਤੇ ਕਿਸਾਨੀ ਨੂੰ ਬਚਾਉਣ ਲਈ ਅਕਾਲੀ ਦਲ ਵਚਨਬੱਧ- ਜਗੀਰ ਕੌਰ
ਗੈਬੀ ਤੋਤੇ ਨੇ, ਮੇਰੀ ਗੁੱਤ ‘ਤੇ ਆਲ੍ਹਣਾ ਪਾਇਆ।

19 OCT. 2020

ਹਾਥਰਸ ਦੇ ਮੁਲਜ਼ਮਾਂ ਨੂੰ ਯੂ.ਪੀ. ਪੁਲਿਸ ਬਚਾਅ ਰਹੀ ਹੈ- ਰਾਹੁਲ ਗਾਂਧੀ
ਬਦੀਆਂ ਨਾ ਕਰ ਵੇ, ਕੈ ਦਿਨ ਦੀ ਜਿੰਦਗਾਨੀ।

ਥਾਣੇਦਾਰ ਪਾਸੋਂ ਜ਼ਰਦਾ ਅਤੇ ਨਸ਼ੇ ਦੀਆਂ ਗੋਲ਼ੀਆਂ ਬਰਾਮਦ- ਇਕ ਖ਼ਬਰ
ਯਾਰੋ ਡਿਊਟੀ ਬੜੀ ਸਖ਼ਤ ਹੁੰਦੀ ਐ, ਥਕਾਵਟ ਲਾਹੁਣ ਲਈ ਕੁਝ ਤਾਂ ਚਾਹੀਦਾ।

ਭਾਜਪਾ ਪੰਜਾਬ ‘ਚ ਸਾਰੀਆਂ ਸੀਟਾਂ ‘ਤੇ ਚੋਣ ਲੜੇਗੀ- ਅਸ਼ਵਨੀ ਕੁਮਾਰ
ਅੱਜ ਕਲ ਸੁਹਣਿਉਂ ਫਤੂਰ ਵਿਚ ਰਹਿੰਦੇ ਓ।

ਅਕਾਲੀ ਦਲ ਬਾਦਲ ਮਹਿਲਾ ਵਿੰਗ ਦੀ ਜ਼ਿਲ੍ਹਾ ਪ੍ਰਧਾਨ ‘ਤੇ ਬਲੈਕਮੇਲਿੰਗ ਦਾ ਕੇਸ ਦਰਜ- ਇਕ ਖ਼ਬਰ   
ਵਾਹ ਬੀਬੀ ਜੀ ਵਾਹ! ਸਿਆਸਤ ਦਾ ਇਹ ਕਿਹੜਾ ਰਾਹ।

ਖੇਤੀ ਸੁਧਾਰ ਬਿੱਲ ਕਿਸਾਨਾਂ ਨੂੰ ਉੱਦਮੀ ਬਣਾਉਣ ‘ਚ ਸਹਾਈ ਹੋਣਗੇ- ਮੋਦੀ
ਕਿਉਂ ਮੋਦੀ ਸਾਬ ! ਦੇਸ਼ ਦੇ ਕਿਸਾਨ ਪਹਿਲਾਂ ਦਲਿੱਦਰੀ ਹਨ?

ਭਾਜਪਾ ਨੇ ਕਿਸਾਨਾਂ ਦੀ ਪਿੱਠ ‘ਚ ਛੁਰਾ ਮਾਰਿਆ- ਸੁਖਬੀਰ ਬਾਦਲ
ਸੁਣ ਲੈ ਨਿਹਾਲੀਏ ਚੋਰਾਂ ਦੀਆਂ ਗੱਲਾਂ।

ਸਮ੍ਰਿਤੀ ਈਰਾਨੀ ਨੇ ਖੇਤੀ ਬਿੱਲਾਂ ਨੂੰ ਕਿਸਾਨ ਲਈ ਲਾਭਕਾਰੀ ਦੱਸਿਆ- ਇਕ ਖ਼ਬਰ
ਹਿਜ਼਼ ਮਾਸਟਰ’ਜ਼ ਵਾਇਸ।

ਮੋਦੀ ਦੀ ਪੂੰਜੀ ‘ਚ ਪਿਛਲੇ ਸਾਲ ਨਾਲੋਂ ਹੋਇਆ ਵਾਧਾ- ਇਕ ਖ਼ਬਰ
ਚਲੋ ਕਿਸੇ ਦੇ ਤਾਂ ਆਏ ਅੱਛੇ ਦਿਨ।

ਮੋਦੀ ਸਰਕਾਰ ਦੇ ਨਵੇਂ ਖੇਤੀ ਕਾਨੂੰਨਾਂ ਦੇ ਉਘੜਨ ਲੱਗੇ ਪਾਜ- ਇਕ ਖ਼ਬਰ
ਕਾਗਜ਼ ਕੇ ਫੂਲੋਂ ਸੇ ਖੁਸ਼ਬੂ ਕਭੀ ਆ ਨਹੀਂ ਸਕਤੀ।

ਕਿਸਾਨੀ ਬਚਾਉਣ ਲਈ ਅਕਾਲੀ ਦਲ ਹਰ ਕੁਰਬਾਨੀ ਦੇਣ ਲਈ ਤਿਆਰ- ਲੱਖੀ
ਹੁਣ ਪੰਜ ਸੱਤ ਬੱਕਰੇ ਖ਼ਰੀਦ ਲਉ ਕੁਰਬਾਨੀਆਂ ਦੇਣ ਲਈ।

ਐਮ.ਐਸ.ਪੀ. ‘ਤੇ ਸਰਕਾਰੀ ਖ਼ਰੀਦ ਦੇਸ਼ ਦੀ ਖੁਰਾਕ ਸੁਰੱਖਿਆ ਦਾ ਅਹਿਮ ਹਿੱਸਾ-ਮੋਦੀ
ਤੱਤੇ ਤਵੇ ਉੱਤੇ ਭਾਵੇਂ ਬਹਿ ਜਾ ਭਾਵੇਂ ਮੋਦੀਆ, ਅਸੀਂ ਕਰੀਏ ਨਾ ਤੇਰਾ ਇਤਬਾਰ।

ਖੇਤੀ ਕਾਨੂੰਨ ਵਾਪਿਸ ਲੈਣ ਤੱਕ ਸੰਘਰਸ਼ ਜਾਰੀ ਰਹੇਗਾ- ਰਾਹੁਲ ਗਾਂਧੀ
ਰੰਨਾਂ ਵਾਲ਼ੇ ਜੰਗ ਜਿੱਤਦੇ, ਕਿੱਥੈ ਲਿਖਿਆ ਫਰੰਗੀਆ ਦੱਸ ਵੇ।

ਬਾਦਲ ਪਰਵਾਰਾਂ ਦੀਆਂ ਆਸ਼ਾਵਾਂ ‘ਤੇ ਲੌਂਗੋਵਾਲ ਪੂਰਾ ਨਹੀਂ ਉੱਤਰਿਆ-ਇਕ ਖ਼ਬਰ
ਟੈਮ ਹੋ ਗਿਆ ਬਦਲ ਗਏ ਕਾਂਟੇ, ਗੱਡੀ ਆਉਣੀ ਸ਼ੂੰ ਕਰ ਕੇ।

ਅਕਾਲੀ ਦਲ ਬਾਦਲ ਵਲੋਂ ਸੂਬਾ ਤੇ ਕੇਂਦਰ ਸਰਕਾਰ ਵਿਚਾਲੇ ਗੰਢਤੁੱਪ ਦੇ ਦੋਸ਼- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਦੱਬ ਲਈ।

13 OCT. 2020

ਕਿਸਾਨਾਂ ਦੇ ਸੰਘਰਸ਼ ਨੇ ਪੰਜਾਬ ਭਾਜਪਾ ਦੀਆਂ ਆਸਾਂ ‘ਤੇ ਪਾਣੀ ਫੇਰਿਆ-ਇਕ ਖ਼ਬਰ

ਨ੍ਹਾਤੀ ਧੋਤੀ ਰਹਿ ਗਈ, ਉੱਤੇ ਮੱਖੀ ਬਹਿ ਗਈ।

ਖੇਤੀ ਨਾ ਰਹੀ ਤਾਂ ਦੇਸ਼ ਕੀ ਖਾਏਗਾ?- ਮੇਧਾ ਪਾਟੇਕਰ

ਖਾਣ ਲਈ ਝੂਠੇ ਲਾਰਿਆਂ, ਜੁਮਲਿਆਂ ਤੇ ਫ਼ਰੇਬਾਂ ਦੇ ਤਾਂ ਢੇਰ ਲੱਗੇ ਪਏ ਆ ਮੇਧਾ ਜੀ।                 

ਰਾਹੁਲ ਦੇ ਸਮਾਗਮ ਹਰਿਆਣੇ ‘ਚ ਠੀਕ, ਪਰ ਪੰਜਾਬੀ ਭੀੜ ਨਾ ਵੜੇ ਏਥੇ- ਹਰਿਆਣਾ ਸਰਕਾਰ

ਅਸਾਂ ਜੇਠ ਨੂੰ ਲੱਸੀ ਨਹੀਉਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਅਮਰੀਕਾ ‘ਚ ਗੁਰਦੁਆਰੇ ਦੀ ਸਰਬ ਸੰਮਤੀ ਨਾਲ਼ ਹੋਈ ਚੋਣ ‘ਤੇ ਲੌਂਗੋਵਾਲ ਨੇ ਦਿੱਤੀ ਵਧਾਈ- ਇਕ ਖ਼ਬਰ

ਵਧਾਈ ਲੈਣ ਵਾਲਾ ਕੋਈ ਕੰਮ ਆਪ ਵੀ ਕਦੀ ਕਰ ਲਿਆ ਕਰੋ ਗੁਰਮੁਖੋ!

ਲੱਖੋਵਾਲ ਧੜਾ ਅਕਾਲੀ ਦਲ ਬਾਦਲ ਦੇ ਇਸ਼ਾਰੇ ‘ਤੇ ਚਲ ਰਿਹਾ ਹੈ- ਕੈਪਟਨ

ਤੂੰ ਨਹੀਂ ਬੋਲਦੀ ਰਕਾਨੇ ਤੂੰ ਨਹੀਂ ਬੋਲਦੀ, ਤੇਰੇ ‘ਚ ਤੇਰਾ ਯਾਰ ਬੋਲਦਾ।

 ਸਿੱਧੂ ਲਈ ਪਾਰਟੀ ‘ਚ ਅਜੇ ਕੋਈ ਅਹੁੱਦਾ ਖਾਲੀ ਨਹੀਂ-ਹਰੀਸ਼ ਰਾਵਤ

ਵੀਰਾ ਕੁਝ ਪੁੰਨ ਕਰ ਦੇ, ਘਟਾ ਆਣ ਕੇ ਬਨੇਰੇ ਕੋਲੋਂ ਮੁੜ ਗਈ।

ਸਿੱਖਾਂ ਦੇ ਧਾਰਮਕ ਚਿੰਨ੍ਹਾਂ ਦੀ ਬੇਅਦਬੀ ਬਰਦਾਸ਼ਤ ਨਹੀਂ- ਲੌਂਗੋਵਾਲ

ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਅਸੀਂ ਢੀਠ ਬਣ ਕੇ ਬਰਦਾਸ਼ਤ ਕਰ ਸਕਦੇ ਹਾਂ।

ਸੈਸ਼ਨ ਬੁਲਾਵਾਂਗੇ ਪਰ ਠੀਕ ਮੌਕੇ ‘ਤੇ, ਧਮਕੀ ਅੱਗੇ ਝੁਕ ਕੇ ਨਹੀਂ- ਕੈਪਟਨ

ਉੱਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਬਾਦਲਾਂ ਨੂੰ ਝਟਕਾ ਦੇਣ ਲਈ ਭਾਜਪਾ ਨੇ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਕਰਵਾਉਣ ਦਾ ਬਣਾਇਆ ਮਨ- ਇਕ ਖ਼ਬਰ

ਯਾਰੀ ਲੱਗੀ ‘ਤੇ ਲਵਾ ‘ਤੇ ਤਖ਼ਤੇ, ਟੁੱਟੀ ‘ਤੇ ਚੁਗਾਠ ਪੁੱਟ ਲਈ।

ਕਿਸਾਨ ਜਥੇਬੰਦੀਆਂ ਨੇ ਕੇਂਦਰ ਦੀ ਪੇਸ਼ਕਸ਼ ਠੁਕਰਾਈ-ਇਕ ਖ਼ਬਰ

ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਕੇਂਦਰ ਨੇ ਪੰਜਾਬੀ ਨੂੰ ਜਾਣ ਬੁੱਝ ਕੇ ਖੂੰਜੇ ਲਾਇਆ-ਜਥੇਦਾਰ

ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਸੁਖਬੀਰ ਬਾਦਲ ਵਲੋਂ ਕੈਪਟਨ ‘ਤੇ ‘ਫਿਕਸਡ’ ਮੈਚ ਖੇਡਣ ਦਾ ਦੋਸ਼- ਇਕ ਖ਼ਬਰ

ਅੱਜ ਮੇਰੇ ਅਮਲੀ ਦੇ, ਫੀਮ ਰਗ਼ਾਂ ਵਿਚ ਬੋਲੇ।

ਹਰੀਸ਼ ਰਾਵਤ ਨੇ ਜਾਖੜ ਨਾਲ਼ ਆਪਣੇ ਮੱਤਭੇਦਾਂ ਨੂੰ ਨਕਾਰਿਆ- ਇਕ ਖ਼ਬਰ

ਐਵੇਂ ਈ ਰੌਲ਼ਾ ਪੈ ਗਿਆ, ਬਸ ਐਵੇਂ ਹੀ ਰੌਲ਼ਾ ਪੈ ਗਿਆ।

‘ਫਿਕਸਡ’ ਮੈਚ ਅਕਾਲੀ ਦਲ ਹੀ ਖੇਡ ਸਕਦੈ- ਕੈਪਟਨ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਮੋਦੀ ਦੀ ਕੈਬਨਿਟ ਵਿਚ ਹੁਣ ਸਿਰਫ਼ ਭਾਜਪਾ ਦੇ ਪ੍ਰਤੀਨਿਧ ਹੀ ਰਹਿ ਗਏ-ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਹਰੀਸ਼ ਰਾਵਤ ਅਤੇ ਰਾਹੁਲ ਦੀ ਪੰਜਾਬ ਫੇਰੀ ਨੇ ਕਾਂਗਰਸੀ ਖੇਮੇ ‘ਚ ਮਚਾਈ ਹਲਚਲ- ਇਕ ਖ਼ਬਰ

ਕਾਦਰਯਾਰ ਕਹਿੰਦਾ ਸਲਵਾਨ ਰਾਜਾ, ਪਿੱਛੇ ਕੀ ਕਰਤੂਤ ਕਰ ਆਇਓਂ ਈ।

ਬਾਦਲਾਂ ਨੂੰ ਹਰਾਉਣ ਲਈ ਹਮਖ਼ਿਆਲ ਪਾਰਟੀਆਂ ਇਕ ਮੰਚ ‘ਤੇ ਇਕੱਠੀਆਂ ਹੋਣ- ਟਕਸਾਲੀ ਅਕਾਲੀ

ਚੁੱਕ ਚਰਖ਼ਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾਂ।

05 OCT. 2020

ਰਾਹੁਲ ਗਾਂਧੀ ਨੂੰ ਪੰਜਾਬ ਦੇ ਕਿਸਾਨ ਚੋਣਾਂ ਵੇਲੇ ਯਾਦ ਆਏ- ਚੰਦੂਮਾਜਰਾ
ਤੇ ਤੁਹਾਨੂੰ ਅਸਤੀਫ਼ੇ ਕਿਸਾਨਾਂ ਦੇ ਛਿੱਤ.....ਲਾਹੁਣ ਬਾਅਦ ਹੀ ਯਾਦ ਆਏ।

ਰਾਹੁਲ ਗਾਂਧੀ ਦੀ ਮੌਜੂਦਗੀ ‘ਚ ਨਵਜੋਤ ਸਿੱਧੂ ਕੇਂਦਰ ਖ਼ਿਲਾਫ਼ ਗਰਜਿਆ- ਇਕ ਖ਼ਬਰ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲੀਏ।

 ‘ਕਿਸਾਨ ਮਾਰਚ’ (ਅਸਲ ‘ਚ ਬਾਦਲ ਮਾਰਚ) ‘ਤੇ ਪੁਲਿਸ ਵਲੋਂ ਲਾਠੀਚਾਰਜ ਜਮਹੂਰੀਅਤ ਦਾ ਘਾਣ- ਚੰਦੂਮਾਜਰਾ
ਜਦੋਂ ਤੁਹਾਡੀ ਪੁਲਿਸ ਗੋਲ਼ੀਆਂ ਨਾਲ਼ ਬੰਦੇ ਮਾਰਦੀ ਸੀ, ਉਦੋਂ ਨਾ ਜਮਹੂਰੀਅਤ ਚੇਤੇ ਆਈ ਤੁਹਾਨੂੰ।

ਕਿਸਾਨਾਂ ‘ਤੇ ਮੁਸੀਬਤ ਆਈ ਤਾਂ ਅਕਾਲੀ ਦਲ ਨੇ ਮਾਰੀ ਕੁਰਸੀ ਨੂੰ ਲੱਤ- ਹਰਸਿਮਰਤ ਬਾਦਲ
ਬੀਬੀ ਕਿਉਂ ਕੁਫ਼ਰ ਤੋਲੀ ਜਾਨੀ ਐਂ, ਲੋਕ ਸਭ ਕੁਝ ਜਾਣਦੇ ਐ ਹੁਣ।

ਖੇਤੀ ਕਾਨੂੰਨਾਂ ਵਿਰੁੱਧ ਹਰ ਮੁਹਾਜ਼ ‘ਤੇ ਲੜਾਂਗੇ- ਕੈਪਟਨ
ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।

ਪਰਖ ਦੀ ਘੜੀ ਵੇਲੇ 350 ਐਮ.ਪੀ. ਇਕ ਪਾਸੇ ਦੂਸਰੇ ਪਾਸੇ ਮੈਂ ਤੇ ਹਰਸਿਮਰਤ- ਸੁਖਬੀਰ
ਰਹਿਣ ਦੇ, ਰਹਿਣ ਦੇ ਯਾਰ, ਗਪੌੜਾਂ ਦਾ ਸਾਰਾ ਠੇਕਾ ਤੂੰ ਹੀ ਲੈ ਲਿਐ !

ਸੁਖਬੀਰ ਬਾਦਲ ਦੀਆਂ ਗ਼ਲਤੀਆਂ ਕਰ ਕੇ ਅਕਾਲੀ ਵਰਕਰ ਸ਼ਰਮਿੰਦਗੀ ਮਹਿਸੂਸ ਕਰਨ ਲੱਗੇ- ਪ੍ਰਮਿੰਦਰ ਢੀਂਡਸਾ
ਵਰਕਰ ਹੀ ਵਿਚਾਰੇ ਸ਼ਰਮਿੰਦੇ ਹੁੰਦੇ ਐ, ਇਹਨਾਂ ਪੱਥਰਾਂ ‘ਤੇ ਕੋਈ ਅਸਰ ਨਹੀਂ ਹੋਣਾ।

ਅਕਾਲੀ ਦਲ ਨੇ ਕਿਸਾਨਾਂ ਦੀ ਹਿਤੈਸ਼ੀ ਪਾਰਟੀ ਹੋਣ ਕਾਰਨ ਹੀ ਐਨ.ਡੀ.ਏ. ਨਾਲ਼ੋਂ ਨਾਤਾ ਤੋੜਿਆ- ਹਰਸਿਮਰਤ
ਬੀਬੀ ਜੀ ਆਟੇ ‘ਚ ਲੂਣ ਤਾਂ ਗੁੰਨਿਆ ਜਾ ਸਕਦਾ ਪਰ ਤੂੰ ਤਾਂ ਲੂਣ ਹੀ ਗੁੰਨ੍ਹੀਂ ਜਾਨੀ ਏਂ।

ਅਕਾਲੀ ਦਲ ਵਲੋਂ ਸੰਘੀ ਢਾਂਚੇ ਦੀ ਮਜਬੂਤੀ ਲਈ ਕਮੇਟੀ ਕਾਇਮ- ਸੁਖਬੀਰ
ਪਹਿਲਾਂ ਭਾਪੇ ਨੂੰ ਪੁੱਛ ਉਹਨੇ ਅਨੰਦਪੁਰ ਦਾ ਮਤਾ ਕਿਉਂ ਛੱਡਿਆ ਸੀ।

ਬਾਬਰੀ ਮਸਜਿਦ ਕੇਸ ‘ਚ ਸੱਚ ਅਤੇ ਨਿਆਂ ਦੀ ਜਿੱਤ ਹੋਈ- ਭਾਜਪਾ
ਡਿਕਸ਼ਨਰੀਆਂ ਵਾਲਿਉ ਸੱਚ ਤੇ ਨਿਆਂ ਦੇ ਅਰਥ ਬਦਲ ਦਿਉ ਹੁਣ।

ਸੀ.ਬੀ.ਆਈ. ਜੱਜ ਨੇ ਆਪਣੀ ਸੇਵਾ-ਮੁਕਤੀ ਦੇ ਆਖਰੀ ਦਿਨ ਬਾਬਰੀ ਮਸਜਿਦ ਦੇ ਦੋਸ਼ੀ ਬਰੀ ਕੀਤੇ- ਇਕ ਖ਼ਬਰ
ਲੈ ਬਈ ਸੱਜਣਾ, ਸਿੱਧੀ ਸ਼ੂਟ ਵੱਟ ਲੈ ਰਾਜ ਸਭਾ ਵਲ ਨੂੰ, ਸੀਟ ‘ਵਾਜ਼ਾਂ ਮਾਰਦੀ ਐ।

ਪੰਜਾਬ ਹਮੇਸ਼ਾ ਹੀ ਦਿੱਲੀ ਦੀਆਂ ਅੱਖਾਂ ‘ਚ ਰੜਕਦਾ ਰਿਹੈ- ਹਰਿੰਦਰ ਚਹਿਲ
ਵਾਰਸ ਸ਼ਾਹ ਹਜ਼ਾਰੇ ਦੇ ਚੌਧਰੀ ਨੇ, ਕਾਮਗਤੀ ਦੀ ਚੁੱਕ ਲਈ ਕਾਰ ਯਾਰੋ।

ਕਿਸਾਨ ਜਥੇਬੰਦੀਆਂ ਨੇ ਰਾਹੁਲ ਦੀ ਪੰਜਾਬ ਫੇਰੀ ‘ਤੇ ਸਵਾਲ ਉਠਾਏ- ਇਕ ਖਬਰ
ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਦਰਜਨਾਂ ਸਿਆਸੀ ਆਗੂ ਮੁਕੇਸ਼ ਅੰਬਾਨੀ ਦੇ ਕਾਰੋਬਾਰਾਂ ਦੇ ਡੀਲਰ-ਇਕ ਖਬਰ
ਲੁਕ ਛਿਪ ਲਾਈਆਂ ਪਰਗਟ ਹੋਈਆਂ, ਵੱਜ ਗਏ ਢੋਲ ਨਗਾਰੇ।

ਤਿੰਨ ਸਾਲ ਪਹਿਲਾਂ ਕਾਂਗਰਸ ‘ਚ ਸ਼ਾਮਲ ਹੋਇਆ ਸਿੱਧੂ ਕਾਂਗਰਸ ਪ੍ਰਧਾਨ ਕਿਵੇਂ ਬਣ ਸਕਦੈ?-ਕੈਪਟਨ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

28 Sep. 2020

ਅਕਾਲੀ ਦਲ ਨੇ ਸ਼੍ਰੋਮਣੀ ਕਮੇਟੀ ਨੂੰ ਖੁੱਲ੍ਹੀ ਛੁੱਟੀ ਦਿਤੀ- ਦਲਜੀਤ ਸਿੰਘ ਚੀਮਾ
ਕਿ ਜਿਸ ਦੀ ਮਰਜ਼ੀ ਦਸਤਾਰ ਉਤਾਰੋ ਤੇ ਡਾਂਗਾਂ ਮਾਰੋ।

ਅਖੀਰ ਐਨ.ਡੀ.ਏ. ‘ਚੋਂ ਬਾਹਰ ਹੋਇਆ ਅਕਾਲੀ ਦਲ- ਇਕ ਖ਼ਬਰ
ਬੜੇ ਬੇਆਬਰੂ ਹੋ ਕਰ ਤੇਰੇ ਕੂਚੇ ਸੇ ਹਮ ਨਿਕਲੇ।

ਸੰਸਦ ਮੈਂਬਰਾਂ ਦੇ ਬੰਗਲਿਆਂ ‘ਚ ਚੋਰੀ ਦੀਆਂ ਵਾਰਦਾਤਾਂ- ਇਕ ਖ਼ਬਰ
ਚੋਰਾਂ ਨੂੰ ਮੋਰ।

ਖੇਤੀ ਬਾੜੀ ਬਿਲ ਵਿਚ ਕਿਸਾਨ ਵਿਰੋਧੀ ਕੁਝ ਵੀ ਨਹੀਂ- ਅਸ਼ਵਨੀ ਕੁਮਾਰ
ਖਵਾਜੇ ਦਾ ਗਵਾਹ ਡੱਡੂ।

‘ਚੱਕਾ ਜਾਮ’ ਪ੍ਰੋਗਰਾਮ ‘ਚ ਪਾਰਟੀ ਦੀ ਢਿੱਲੀ ਕਾਰਗੁਜ਼ਾਰੀ ਤੋਂ ਸੁਖਬੀਰ ਖ਼ਫ਼ਾ- ਇਕ ਖ਼ਬਰ
ਸਦਾ ਨਾ ਬਾਗ਼ੀਂ ਬੁਲਬੁਲ ਬੋਲੇ, ਸਦਾ ਨਾ ਬਾਗ਼ ਬਹਾਰਾਂ।

ਕੈਪਟਨ ਨੂੰ ਕਿਸਾਨਾਂ ਦੀ ਏਨੀ ਹੀ ਫਿਕਰ ਹੈ ਤਾਂ ਆਪਣਾ ਅਸਤੀਫ਼ਾ ਦੇਵੇ- ਬੀਬੀ ਬਾਦਲ
ਤੇਰੇ ਅਸਤੀਫ਼ੇ ਨੇ ਕਿਹੜੀ ਕੰਧ ਢਾਅ ਦਿਤੀ ਬੀਬੀ।

ਭਾਜਪਾ ਨਾਲੋਂ ਵੱਖ ਹੋ ਕੇ ਅਕਾਲੀ ਦਲ ਹੁਣ ਦੁੱਧ ਧੋਤਾ ਨਹੀਂ ਹੋ ਗਿਆ- ਸੁਖਜਿੰਦਰ ਸਿੰਘ ਰੰਧਾਵਾ
ਕਾਲੇ ਕਾਂ ਨਾ ਹੋਵਣ ਬੱਗੇ, ਭਾਵੇਂ ਸੌ ਮਣ ਸਾਬਣ ਲੱਗੇ।

ਕਿਸਾਨਾਂ ਨੂੰ ਇਕੱਲਿਆਂ ਛੱਡ ਕੇ ਭੱਜੇ ਕੈਪਟਨ- ਦਲਜੀਤ ਸਿੰਘ ਚੀਮਾ
ਆਪਣੀ ਪੀੜ੍ਹੀ ਹੇਠ ਵੀ ਸੋਟਾ ਫੇਰ ਲਉ ਬਹਿਰੂਪੀਉ।

ਭਰੋਸਾ ਗੁਆ ਚੁੱਕੇ ਆਗੂਆਂ ਦੀ ਅਗਵਾਈ ਨਹੀਂ ਕਬੂਲਦੇ ਪੰਜਾਬ ਦੇ ਲੋਕ- ਭਗਵੰਤ ਮਾਨ
ਇਹਨਾਂ ਸੋਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਅਕਾਲੀ ਦਲ ਨੇ ਗੱਠਜੋੜ ਤੋੜ ਕੇ ਗ਼ਲਤੀ ਕੀਤੀ-ਮਿੱਤਲ
ਤੋੜ ਕੇ ਛੜੇ ਨਾਲ਼ ਯਾਰੀ, ਫਿਰ ਪਛਤਾਵੇਂਗੀ।

ਪ੍ਰਧਾਨ ਮੰਤਰੀ ਅਤੇ ਭਾਜਪਾ ਅਕਾਲੀ ਦਲ ਦੀ ਰੱਤੀ ਵੀ ਪਰਵਾਹ ਨਹੀਂ ਕਰਦੇ- ਕੈਪਟਨ
ਪੱਕੀ ਇੱਟ ਵਰਗਾ ਬਹੁਮੱਤ ਹੁੰਦਿਆਂ ਉਹਨਾਂ ਅਕਾਲੀਆਂ ਤੋਂ ਛਿੱਕੂ ਲੈਣੈ।

ਫਰੀਕੋਟ ਜ਼ਿਲ੍ਹੇ ਦੀ ਭਾਜਪਾ ਦੇ ਉਪ ਪ੍ਰਧਾਨ ਨੇ ਖੇਤੀ ਬਿੱਲਾਂ ਦੇ ਰੋਸ ਵਜੋਂ ਦਿਤਾ ਅਸਤੀਫ਼ਾ-ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਦੇਸ਼ ਨੂੰ ਰੜਕ ਰਹੀ ਹੈ ਮਨਮੋਹਨ ਸਿੰਘ ਦੀ ਕਮੀ- ਰਾਹੁਲ ਗਾਂਧੀ
ਸਰਵਣ ਵੀਰ ਬਿਨਾਂ, ਮੇਰੀ ਰੁਲ਼ਦੀ ਵਣਾਂ ਵਿਚ ਗੱਠੜੀ।

ਅਕਾਲੀਆਂ ਦੇ ਧਰਨਿਆਂ ਨੂੰ ਸਫ਼ਲ ਬਣਾਉ- ਲੌਂਗੋਵਾਲ
ਕਿਸਾਨਾਂ ਦੇ ਧਰਨੇ ਕਹਿੰਦਿਆਂ ਤੇਰੇ ਮੂੰਹ ‘ਚ ਛਾਲੇ ਪੈਦੇ ਸੀ।

ਸਾਰੇ ਇਕਜੁੱਟ ਹੋਣ ਮੈਂ ਅਗਵਾਈ ਕਰਾਂਗਾ- ਅਮਰਿੰਦਰ ਸਿੰਘ
ਰਹਿਣ ਦੇ ਯਾਰ ਗੱਲ ਕਰਦਿਆਂ ਤਾਂ ਤੈਨੂੰ ਸਾਹ ਚੜ੍ਹ ਜਾਂਦੈ।

15 Sep. 2020

ਸੁਮੇਧ ਸੈਣੀ ਦੀ ਗ੍ਰਿਫ਼ਤਾਰੀ ਨੂੰ ਲੈ ਕੇ ਪ੍ਰਸ਼ਾਸਨ ‘ਤੇ ਟਿਕੀਆਂ ਲੋਕਾਂ ਦੀਆਂ ਨਜ਼ਰਾਂ- ਇਕ ਖ਼ਬਰ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਸੁਖਬੀਰ ਬਾਦਲ ਸਪਸ਼ਟ ਕਰੇ ਕਿ ਖੇਤੀ ਆਰਡੀਨੈਂਸ ਕਿਸਾਨ ਪੱਖੀ ਹਨ ਕਿ ਕਿਸਾਨ ਮਾਰੂ- ਬਾਜਵਾ
ਸੱਪ ਦੇ ਮੂੰਹ ‘ਚ ਕਿਰਲੀ, ਖਾਵੇ ਤਾਂ ਕੋਹੜੀ ਛੱਡੇ ਤਾਂ ਕਲੰਕੀ।

ਮਾਲੀ ਸੰਕਟ ਦੇ ਬਾਵਜੂਦ ਦਿੱਲੀ ਕਮੇਟੀ ਥੋਕ ਦੇ ਭਾਅ ਚੇਅਰਮੈਨੀਆਂ ਕਿਉਂ ਵੰਡ ਰਹੀ ਹੈ?- ਜੀ.ਕੇ.
ਜੀ.ਕੇ. ਸਾਬ ਅਲ੍ਹਕ ਵਛੇਰਿਆਂ ਨੂੰ ਖੁੰਡੇ ਨਾਲ ਬੰਨ੍ਹ ਕੇ ਰੱਖਣਾ ਪੈਂਦੈ।

ਕੰਗਨਾ ਰਣੌਤ ਦੇ ਦਫ਼ਤਰ ਨੂੰ ਢਾਉਣ ਵਿਚ ਸੂਬਾ ਸਰਕਾਰ ਦਾ ਕੋਈ ਹੱਥ ਨਹੀਂ- ਸ਼ਰਦ ਪਵਾਰ
ਭਾਈਆ ਪਵਾਰ ਲਗਦੈ ਤੂੰ ਵੀ ਵੱਡੇ ਬਾਦਲ ਦਾ ਜੂਠਾ ਖਾ ਲਿਐ।

ਸ਼੍ਰੋਮਣੀ ਕਮੇਟੀ ਦੇ ਜਨਰਲ ਇਜਲਾਸ ਵਿਚ ਹਰੇਕ ਮੈਂਬਰ ਨੂੰ ਬੋਲਣ ਦਾ ਅਧਿਕਾਰ ਹੋਵੇਗਾ- ਲੌਂਗੋਵਾਲ
ਪਰ ਉਹ ਬੋਲੇਗਾ ਉਹੀ ਜੋ ਉਸ ਨੂੰ ਲਿਖ ਕੇ ਦਿਤਾ ਜਾਵੇਗਾ।

ਕੈਪਟਨ ਦੀ ਲੀਡਰਸ਼ਿੱਪ ‘ਚ ਪੰਜਾਬ ‘ਚ ਤਰੱਕੀ ਦੀ ਰਫ਼ਤਾਰ ਹੋਈ ਸੁਸਤ-ਸੁਖਬੀਰ ਬਾਦਲ
ਤੁਸੀਂ ਹੁਣ ਨੂੰ ਕੈਲੇਫ਼ੋਰਨੀਆਂ ਬਣਾ ਦੇਣਾ ਸੀ।

ਗੁਰੂ ਗ੍ਰੰਥ ਸਾਹਿਬ ਦੇ ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਸਿਆਸਤ ਬੰਦ ਕਰ ਦੇਣੀ ਚਾਹੀਦੀ ਹੈ- ਲੌਂਗੋਵਾਲ
ਤੁਸੀਂ ਭੈੜੀਆਂ ਕਰਤੂਤਾਂ ਬੰਦ ਕਰ ਦਿਉ ਲੋਕ ਸਿਆਸਤ ਕਰਨੀ ਬੰਦ ਕਰ ਦੇਣਗੇ।

ਲੋਕ ਇਨਸਾਫ਼ ਪਾਰਟੀ ਵਲੋਂ ਘੇਰਿਆ ਜਾਵੇਗਾ ਕੈਪਟਨ ਦਾ ਮੋਤੀ ਮਹਿਲ-  ਤਲਵਿੰਦਰ ਸਿੰਘ ਮਾਨ
ਮੋਤੀ ਮਹਿਲ ‘ਚੋਂ ਛਿੱਕੂ ਲੈਣੈ, ਫਾਰਮ ਹਾਊਸ ‘ਤੇ ਜਾਉ ਪਿਆਰਿਓ।

ਪੰਜਾਬ ਸਰਕਾਰ ਨੇ ਨਿਜੀ ਸਕੂਲਾਂ ਨੂੰ ਮਾਨਤਾ ਦੇਣ ਦੀ ਵਿਧੀ ਨੂੰ ਬਣਾਇਆ ਸੁਖਾਲਾ- ਇਕ ਖ਼ਬਰ
ਤਾਂ ਕਿ ਜਿਹੜਾ ਮਰਜ਼ੀ ਲੱਲੀ-ਛੱਲੀ ਸਕੂਲ ਖੋਲ੍ਹ ਕੇ ਮਾਪਿਆਂ ਨੂੰ ਲੁੱਟ ਸਕੇ।

ਕੰਗਨਾ ਦਾ ਬੰਗਲਾ ਢਾਉਣ ਪਿੱਛੇ ਕੋਈ ਲੁਕਵਾਂ ਏਜੰਡਾ ਨਹੀਂ- ਸ਼ਿਵ ਸੈਨਾ
ਐਵੇਂ ਸ਼ੁਗਲ ਸ਼ੁਗਲ ‘ਚ ਮਾਂਜਾ ਫਿਰ ਗਿਆ ਸਾਥੋਂ।

ਸਾਲ ਕੁ ਔਖੇ ਸੌਖੇ ਕੱਟ ਲਉ, ਸੱਤਾ ‘ਚ ਆ ਕੇ ਨਕਸ਼ੇ ਬਦਲ ਦਿਆਂਗੇ-ਸੁਖਬੀਰ ਬਾਦਲ
ਕੁੰਡੀਆਂ ਲਾ ਕੇ ਜਿੰਨੀ ਮਰਜ਼ੀ ਬਿਜਲੀ ਫੂਕਿਓ।

ਸ਼੍ਰੋਮਣੀ ਕਮੇਟੀ ਨੂੰ ਢਾਅ ਲਾਉਣ ਵਾਲੇ ਆਪਣੇ ਮਕਸਦ ‘ਚ ਕਾਮਯਾਬ ਨਹੀਂ ਹੋਣਗੇ- ਲੌਂਗੋਵਾਲ
ਬਰਬਾਦਿ ਗ਼ੁਲਿਸਤਾਂ ਕਰਨੇ ਕੋ ਬਸ ਏਕ ਹੀ ਉੱਲੂ ਕਾਫੀ ਹੈ,
ਹਰ ਸ਼ਾਖ ਪੇ ਉਲੂ ਬੈਠਾ ਹੈ ਅੰਜਾਮੇ- ਗੁਲਿਸਤਾਂ ਕਿਆ ਹੋਗਾ।

ਵਜ਼ੀਫ਼ਾ ਘੁਟਾਲਾ: ਕਾਂਗਰਸ ਹਾਈਕਮਾਂਡ ਨੂੰ ਵੀ ਪੈਸਾ ਮਿਲਿਆ- ਸੁਖਬੀਰ ਬਾਦਲ
ਜਿਹੜੇ ਵਜ਼ੀਫ਼ਾ ਘੁਟਾਲੇ ਤੁਹਾਡੇ ਵੇਲੇ ਹੋਏ, ਉਹਨਾਂ ਦੇ ਪੈਸੇ ਕਿਸ ਨੂੰ ਮਿਲੇ ਸੀ?

ਮੈਂ ਟਰੰਪ ‘ਤੇ ਬਿਲਕੁਲ ਭਰੋਸਾ ਨਹੀਂ ਕਰਦੀ-ਕਮਲਾ ਹੈਰਿਸ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਕੋਝੀ ਸਿਆਸਤ ਕਰਨ ਵਾਲ਼ੇ ਕਾਮਯਾਬ ਨਹੀਂ ਹੋਣਗੇ- ਸ਼ਰਨਜੀਤ ਢਿੱਲੋਂ
ਉਲਟਾ ਚੋਰ ਕੋਤਵਾਲ ਕੋ ਡਾਂਟੇ।

07 Sep. 2020

ਵਜ਼ੀਫ਼ਾ ਘੁਟਾਲਾ: ਹਰਸਿਮਰਤ ਨੇ ਅਮਰਿੰਦਰ ‘ਤੇ ਲਾਏ ਨਿਸ਼ਾਨੇ-ਇਕ ਖ਼ਬਰ
ਜਿੱਥੇ ਮਰਜ਼ੀ ਨਿਸ਼ਾਨੇ ਲਾ, ਹੁਣ ਤੇਰੇ ਦਿਨ ਬੱਲੀਏ।

ਆਪਣੀ ਪਾਰਟੀ ਦੀ ਸਰਕਾਰ ਨੂੰ ਦੂਲੋਂ ਨੇ ਫਿਰ ਘੇਰਿਆ- ਇਕ ਖ਼ਬਰ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲੀਏ।

ਖੇਤੀ ਆਰਡੀਨੈਂਸਾਂ ਦੇ ਹੱਕ ‘ਚ ਬਿਆਨ ਦੇਣ ਲਈ ਬਾਦਲ ਆਪਣੀ ਮਜਬੂਰੀ ਦੱਸੇ- ਜਾਖੜ
ਕੁੰਜੀਆਂ ਦੱਸ ਦਿੰਨੀ ਆਂ, ਮੇਰੇ ਪੁੱਤ ਦੇ ਛਵ੍ਹੀ ਨਾ ਮਾਰੀਂ ।

ਅਰੂਸਾ ਦੇ ਵੀਜ਼ੇ ਦੀ ਸਥਿਤੀ ਜਨਤਕ ਕੀਤੀ ਜਾਵੇ- ਭਗਵੰਤ ਮਾਨ
ਮੁੰਡੇ ਤੈਨੂੰ ਰੋਜ਼ ਪੁੱਛਦੇ, ਇਹ ਪੰਜੇਬਾਂ ਵਾਲ਼ੀ ਕੌਣ ਏ।

ਭਾਰਤ ਚੀਨ ਵਿਵਾਦ ਦੌਰਾਨ ਪਾਕਿ ਨਾਜਾਇਜ਼ ਫ਼ਾਇਦਾ ਉਠਾਉਣ ਦੀ ਕੋਸ਼ਿਸ਼ ਨਾ ਕਰੇ- ਫੌਜ ਮੁਖੀ ਰਾਵਤ
ਆਮ ਆਦਮੀ ਪਾਰਟੀ ਦੀ ਰੁਚੀ ਸਿਰਫ਼ ਆਪਣੇ ਸਿਆਸੀ ਏਜੰਡੇ ‘ਚ- ਅਮਰਿੰਦਰ ਸਿੰਘ
ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਪਠਾਨਕੋਟ ‘ਚ ਬੇਰੋਜ਼ਗਾਰ ਨੌਜਵਾਨਾਂ ਨੇ ਸੰਨੀ ਦਿਓਲ ਖ਼ਿਲਾਫ਼ ਕੀਤਾ ਮੁਜ਼ਾਹਰਾ- ਇਕ ਖ਼ਬਰ
ਉਹ ਵੀ ਦਿਨ ਯਾਦ ਕਰੋ ਜਦੋਂ ਸੰਨੀ ਦੇ ਰੋਡ ਸ਼ੋਅ ‘ਚ ਭੰਗੜਾ ਪਾਉਂਦੇ ਸੀ।

ਬਾਦਲਾਂ ਨੂੰ ਕਿਸਾਨੀ ਨਾਲੋਂ ਪਰਵਾਰ ਦੀ ਕੁਰਸੀ ਪਿਆਰੀ- ਜਾਖੜ
ਕਾਲ਼ਾ ਦਿਓਰ ਕੱਜਲ ਦੀ ਧਾਰੀ, ਅੱਖੀਆਂ ‘ਚ ਪਾਈ ਰੱਖਦੀ।

ਬਦ ਤੋਂ ਬਦਤਰ ਹੋਈ ਕਾਨੂੰਨ ਅਵਸਥਾ, ਜੰਗਲ ਰਾਜ ਵਰਗੇ ਹਾਲਾਤ- ‘ਆਪ ਪਾਰਟੀ’
ਕਾਂ ਬਾਗ਼ ਦੇ ਵਿਚ ਕਲੋਲ ਕਰਦੇ, ਕੂੜਾ ਫੋਲਣੇ ਨੂੰ ਇਥੇ ਮੋਰ ਕੀਤੇ।

ਬਿਜਲੀ ਸਮਝੌਤੇ: ਪੰਜਾਬ ਨੂੰ ਅੱਠ ਹਜ਼ਾਰ ਕਰੋੜ ਦਾ ਨਵਾਂ ਝਟਕਾ- ਇਕ ਖ਼ਬਰ
ਸੀਟੀ ਵਿਚ ਆਂਦਰਾਂ ਦੇ ਵੱਜਦੀ, ਕੰਨ ਲਾ ਕੇ ਸੁਣ ਅੜੀਏ।

ਪਾਕਿਸਤਾਨ ਸਰਕਾਰ ਹੁਣ ਭੰਗ ਦੀ ਖੇਤੀ ਕਰੇਗੀ- ਫਵਾਦ ਚੌਧਰੀ
ਥੱਲੇ ਕੂੰਡਾ ਉੱਤੇ ਘੋਟਣਾ, ਦੋਹਾਂ ਦਾ ਰਗੜਾ ਸਹਿੰਦੀ।

ਤਾਕਤ ਦੀ ਦੁਰਵਰਤੋਂ ਨਾਲ ਵਿਚਾਰ ਦਬਾਏ ਜਾਂਦੇ ਹਨ- ਪ੍ਰਸ਼ਾਂਤ ਭੂਸ਼ਨ
ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰਵਾਰ ਉਹਨਾਂ ਪੱਛੋਤਾਵਣਾ ਜੀ।

ਪੁਲਿਸ ਨੇ ਕੈਪਟਨ ਦੀ ਰਿਹਾਇਸ਼ ਵਲ ਜਾਂਦੇ ਮੋਟੀਵੇਟਰਾਂ ਦੇ ‘ਮੌਰ’ ਸੇਕੇ- ਇਕ ਖ਼ਬਰ
ਮੋਟੀਵੇਸ਼ਨ ਵੀ ਤਾਂ ਚੈੱਕ ਕਰਨੀ ਐ ਕਿਸੇ ਤਰ੍ਹਾਂ ਬਈ ।

ਖੇਤੀ ਆਰਡੀਨੈਂਸ ਬਿਲਕੁਲ ਠੀਕ ਹੈ- ਪ੍ਰਕਾਸ਼ ਸਿੰਘ ਬਾਦਲ
ਭਾਈਆ ਏਸ ਉਮਰੇ ਤਾਂ ਕੁਝ ਪੁੰਨ ਖੱਟ ਲੈ ਸੱਚ ਬੋਲ ਕੇ।

ਕੈਪਟਨ ਵਲੋਂ ਕੇਜਰੀਵਾਲ ਨੂੰ ਪੰਜਾਬ ਤੋਂ ਦੂਰ ਰਹਿਣ ਦੀ ਨਸੀਹਤ- ਇਕ ਖਬਰ
ਹੱਥ ਸੋਚ ਕੇ ਗੰਦਲ਼ ਨੂੰ ਪਾਈਂ, ਕਿਹੜੀ ਏਂ ਤੂੰ ਸਾਗ ਤੋੜਦੀ।

30 Aug. 2020

ਹਰਿਆਣੇ ‘ਚ ਬੇਅਦਬੀ ਦੇ ਦੋਸ਼ੀਆਂ ਨੂੰ ਦੁਬਾਰਾ ਜ਼ਮਾਨਤ ਮਿਲਣ ‘ਤੇ ਸਿੱਖ ਹਲਕੇ ਹੈਰਾਨ-ਇਕ ਖ਼ਬਰ
ਹੈਰਾਨੀ ਵਾਲੀ ਕਿਹੜੀ ਗੱਲ ਹੈ ਜੀ, ਰਾਜ ਤਾਂ ਦੇਖੋ ਕੌਣ ਕਰ ਰਹੇ ਐ।

ਮੋਦੀ ਨੇ ਮੋਰਾਂ ਨੂੰ ਦਾਣੇ ਖਿਲਾਉਣ ਦੀ ਆਪਣੀ ਵੀਡੀਓ ਸ਼ੇਅਰ ਕੀਤੀ-ਇਕ ਖ਼ਬਰ
ਨੀਂ ਮੈਂ ਤਲੀਆਂ ਤੇ ਚੋਗ ਚੁਗਾਵਾਂ ਮਿੱਤਰਾਂ ਦੇ ਤਿੱਤਰਾਂ ਨੂੰ।

ਅਦਾਲਤ ਦੀ ਮਾਣਹਾਨੀ: ਪ੍ਰਸ਼ਾਂਤ ਭੂਸ਼ਨ ਨੇ ਮਾਫ਼ੀ ਮੰਗਣ ਤੋਂ ਕੀਤਾ ਇਨਕਾਰ-ਇਕ ਖ਼ਬਰ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ. ਤੇਰੀ ਨਾ ਮੁਥਾਜ ਝੱਲਣੀ।

ਪੰਜਾਬ ਕੋਲ਼ ਪੈਸਾ ਨਹੀਂ, ਕੇਂਦਰ ਕੁਝ ਦੇਣ ਨੂੰ ਤਿਆਰ ਨਹੀਂ, ਕੀ ਕਰੇ ਪੰਜਾਬ?- ਇਕ ਸਵਾਲ
ਚਿੜੀ ਵਿਚਾਰੀ ਕੀ ਕਰੇ, ਠੰਡਾ ਪਾਣੀ ਪੀ ਮਰੇ।

ਲੰਗਾਹ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਚੌਥੀ ਵਾਰ ਕੀਤੀ ਫ਼ਰਿਆਦ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਜਥੇਦਾਰ ਵਲੋਂ ਸ਼੍ਰੋਮਣੀ ਕਮੇਟੀ ਨੂੰ ਆਦੇਸ਼ ਕਿ ਉਹ ਸਰੂਪਾਂ ਦੇ ਮਾਮਲੇ ‘ਚ ਦੋਸ਼ੀਆਂ ਵਿਰੁੱਧ ਕਾਰਵਾਈ ਕਰੇ-ਇਕ ਖ਼ਬਰ
ਵਾਹ ਬਈ ਵਾਹ! ਚੋਰਾਂ ਨੂੰ ਕਿਹਾ ਜਾ ਰਿਹੈ ਕਿ ਚੋਰ ਫੜੋ।

ਪਿੰਡਾਂ ‘ਚ ਅਕਾਲੀ- ਭਾਜਪਾ ਸੰਸਦ ਮੈਂਬਰਾਂ ਤੇ ਵਿਧਾਇਕਾਂ ਦਾ ਦਾਖ਼ਲਾ ਬੰਦ ਕਰਨਗੇ ਕਿਸਾਨ- ਇਕ ਖ਼ਬਰ`
ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।
ਸ਼੍ਰੋਮਣੀ ਕਮੇਟੀ ਨੂੰ ਭੰਗ ਕਰ ਕੇ ਰਿਸੀਵਰ ਲਗਾਉ- ਟਕਸਾਲੀ ਅਕਾਲੀ ਦਲ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਅਰਥਚਾਰੇ ਨੂੰ ਪੈਰਾਂ ਸਿਰ ਕਰਨ ਲਈ ਵਿਆਪਕ ਸੁਧਾਰਾਂ ਦੀ ਲੋੜ- ਆਰ.ਬੀ.ਆਈ.
ਨੀਂ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

ਦਿੱਲੀ ਦੰਗੇ: ਪੁਲਿਸ ਅਤੇ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਨਾ ਕਰਨ ਦਾ ਦੋਸ਼- ਇਕ ਖ਼ਬਰ
ਗੋਰੇ ਰੰਗ ‘ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਐਂਬੂਲੈਂਸ ਦੇ ਪਹੁੰਚਣ ਲਈ ਛੱਤੀਸਗੜ੍ਹ ਦੇ 15 ਪਿੰਡਾਂ ‘ਚ ਸੜਕ ਹੀ ਨਹੀਂ- ਇਕ ਖ਼ਬਰ
ਕਾਲੇ ਦਾ ਇਕ ਛੱਪੜ ਸੁਣੀਂਦਾ, ਪਾਣੀ ਉਸਦਾ ਖਾਰਾ।

ਕੈਪਟਨ ਸਰਕਾਰ ਪੰਜਾਬ ਦੇ ਖੁਸ਼ਹਾਲ ਰਾਜ ਲਈ ਵਚਨਬੱਧ- ਲਖਬੀਰ ਸਸੰਘ ਬਮਾਲ
ਜੇ ਮਾਏਂ ਕੁਝ ਦਿਸਦਾ ਹੋਵੇ, ਥੋੜ੍ਹਾ ਕਰਾਂ ਅੰਦੇਸਾ।

ਖੇਤੀ ਆਰਡੀਨੈਂਸਾਂ ਬਾਰੇ ਸੁਖਬੀਰ ਦੇ ਬਿਆਨ ਦੇ ਉਲਟ ਸੁਰ ਬੋਲ ਰਹੇ ਹਨ ਚੰਦੂਮਾਜਰਾ- ਇਕ ਖ਼ਬਰ
ਅਜੇ ਮਿਹਰ ਮੁਹੱਬਤਾਂ ਲੋੜਨਾਂ ਏਂ, ਮੇਰੇ ਮਾਰ ਕੇ ਜਿਗਰ ਕਟਾਰ ਵੈਰੀ।

ਸਾਬਕਾ ਡੀ.ਜੀ.ਪੀ. ਸੁਮੇਧ ਸੈਣੀ ਨੂੰ ਨਹੀਂ ਮਿਲੀ ਰਾਹਤ- ਇਕ ਖ਼ਬਰ
ਕਾਲੀ ਤਿਤਰੀ ਕਮਾਦੋਂ ਨਿਕਲੀ, ਉਡਦੀ ਨੂੰ ਬਾਜ਼ ਪੈ ਗਿਆ।

23 Aug. 2020

ਆਪਸੀ ਫੁੱਟ ਕਰ ਕੇ ਪੰਜਾਬ ਕਾਂਗਰਸ ਨਿਰਾਸ਼ਾ ਦੇ ਆਲਮ ‘ਚ- ਇਕ ਖ਼ਬਰ
ਪੂਰਨ ਆਖਦਾ ਗ਼ਮੀ ਦਾ ਤਾਪ ਚੜ੍ਹਿਆ, ਜ਼ਿਮੀਂ ਉੱਤੇ ਨਾ ਲਗਦੇ ਪੈਰ ਮਾਤਾ।

ਪੀ.ਐਮ. ਕੇਅਰ ਫੰਡਾਂ ਨੂੰ ਪੜਚੋਲ ਤੋਂ ਛੁਪਾ ਰਹੀ ਹੈ ਸਰਕਾਰ- ਚਿਦੰਬਰਮ
ਵਾਰਸ ਸ਼ਾਹ ਲੁਕਾਈਏ ਜੱਗ ਕੋਲੋਂ ਭਾਵੇਂ ਆਪਣਾ ਹੀ ਗੁੜ ਖਾਈਏ ਜੀ।

ਇਸ ਵਾਰ ਪ੍ਰਮਿੰਦਰ ਸਿੰਘ ਢੀਂਡਸਾ ਵਿਧਾਨ ਸਭਾ ਸੈਸ਼ਨ ‘ਚ ਭਾਗ ਲੈਣ ਲਈ ਪੂਰੀ ਤਰ੍ਹਾਂ ਤਿਆਰ-ਇਕ ਖ਼ਬਰ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

ਪੰਜਾਬ ਦੇ ਪਾਣੀ ‘ਤੇ ਕਿਸੇ ਵੀ ਹੋਰ ਸੂਬੇ ਦਾ ਕੋਈ ਅਧਿਕਾਰ ਨਹੀਂ- ਢੀਂਡਸਾ
ਸੁੱਤੀ ਪਈ ਨੇ ਲੁਹਾਈਆਂ ਚੂੜੀਆਂ, ਅਜੇ ਵੀ ਘੁਰਾੜੇ ਮਾਰਦੀ।

ਤਸਕਰਾਂ ਨੂੰ ਖੁੱਲ੍ਹ ਦੇਣ ਲਈ ਰਾਤ ਦਾ ਕਰਫਿਊ ਲਾਇਆ- ਆਪ ਪਾਰਟੀ
ਗਲ਼ੀਆਂ ਹੋਵਣ ਸੁੰਨੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਪੰਜਾਬ ਸਰਕਾਰ ਦੀਆਂ ਬੈਠਕਾਂ ਦੀ ਗਿਣਤੀ 42 ਤੋਂ ਘਟ ਕੇ 12 ਰਹਿ ਗਈ- ਇਕ ਖ਼ਬਰ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਓਬਾਮਾ ਨੇ ਕੰਮ ਚੰਗਾ ਨਹੀਂ ਕੀਤਾ ਜਿਸ ਕਰ ਕੇ ਮੈਂ ਰਾਸ਼ਟਰਪਤੀ ਬਣਿਆ- ਟਰੰਪ
ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜੀਣ।

ਅਕਾਲੀ ਦਲ ਬਾਦਲ ਵਲੋਂ ਚੁੱਪ ਚੁਪੀਤੇ ਧਰਨਾ ਚੁੱਕੇ ਜਾਣ ਨੇ ਖੜ੍ਹੇ ਕੀਤੇ ਸਵਾਲ- ਇਕ ਖ਼ਬਰ
ਮਿੱਤਰਾਂ ਨੂੰ ਦਗ਼ਾ ਦੇਣੀਏ, ਕੀੜੇ ਪੈਣਗੇ ਮਰੇਂਗੀ ਸੱਪ ਲੜ ਕੇ।
ਅਕਾਲੀ ਅਤੇ ਭਾਜਪਾ ਨੇ ਇਕ ਦੂਜੇ ਦੇ ਧਰਨਿਆਂ ‘ਚ ਸ਼ਾਮਲ ਨਾ ਹੋਣ ਦੇ ਦਿਤੇ ਸੰਕੇਤ-ਇਕ ਖ਼ਬਰ
ਮੋਤੀ ਖਿੱਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।

ਸਿੱਟ ਦੀ ਜਾਂਚ ‘ਚ ਪ੍ਰਚਾਰਕ ਤੇ ਸਿੱਖ ਜਥੇਬੰਦੀਆਂ ਦੇ ਆਗੂ ਬੇਕਸੂਰ- ਇਕ ਖ਼ਬਰ
ਕੂੜ ਨਿਖੁਟੇ ਨਾਨਕਾ ਓੜਕਿ ਸਚਿ ਰਹੀ।

ਕਾਂਗਰਸੀਆਂ ਵਲੋਂ ਦੂਲੋ ਦੀ ਕੋਠੀ ਦਾ ਘਿਰਾਉ, ਜੰਮ ਕੇ ਕੀਤੀ ਨਾਹਰੇਬਾਜ਼ੀ- ਇਕ ਖ਼ਬਰ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਪ੍ਰਸ਼ਾਂਤ ਭੂਸ਼ਨ ਦੇ ਹੱਕ ‘ਚ ਨਿੱਤਰੇ ਸਮਾਜਕ ਕਾਰਕੁੰਨ- ਇਕ ਖ਼ਬਰ
ਸੁੱਚਿਆਂ ਰੁਮਾਲਾਂ ਨੂੰ, ਲਾ ਦੇ ਧੰਨ ਕੁਰੇ ਗੋਟਾ।

ਨਿਆਂਪਾਲਿਕਾ ਦੀ ਭਰੋਸੇਯੋਗਤਾ ‘ਤੇ ਉੱਠ ਰਹੇ ਹਨ ਸਵਾਲ- ਗਹਿਲੋਤ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਸਾਊਦੀ ਅਰਬ ਨੂੰ ਮਨਾਉਣ ਗਏ ਪਾਕਿ ਫੌਜ ਮੁਖੀ ਬਾਜਵਾ ਤੇ ਹਮੀਦ ਖਾਲੀ ਹੱਥ ਪਰਤੇ- ਇਕ ਖ਼ਬਰ
ਬੜੇ ਬੇਆਬਰੂ ਹੋ ਕਰ ਤੇਰੇ ਕੂਚੇ ਸੇ ਹਮ ਨਿਕਲੇ।

ਮੇਰੀਆਂ ਟਿੱਪਣੀਆਂ ਮੇਰੇ ਅਸਲ ਵਿਚਾਰ, ਮਾਫ਼ੀ ਨਹੀਂ ਮੰਗਾਂਗਾ- ਪ੍ਰਸ਼ਾਂਤ ਭੂਸ਼ਨ
ਬਾਜ਼ੀ ਮਾਰ ਗਿਆ ਬਠਿੰਡੇ ਵਾਲ਼ਾ ਗੱਭਰੂ, ਬਾਕੀ ਰਹਿ ਗਏ ਹਾਲ ਪੁੱਛਦੇ।
 

17 Aug. 2020

ਬੇਅਦਬੀਆਂ ਕਰਵਾਉਣ ਵਾਲੇ ਪਟਿਆਲੇ ‘ਚ ਧਰਨਾ ਦੇ ਕੇ ਡਰਾਮੇਬਾਜ਼ੀ ਕਰ ਰਹੇ ਹਨ- ਪ੍ਰਮਿੰਦਰ ਢੀਂਡਸਾ
ਨਾਲੇ ਚੋਰ ਨਾਲੇ ਚਤਰ।

ਕਾਂਗਰਸ ਹਾਈ ਕਮਾਂਡ ਨੇ ਬਾਜਵਾ-ਕੈਪਟਨ ਦੀ ਲੜਾਈ ਠੰਢੇ  ਬਸਤੇ ‘ਚ ਪਾਈ- ਇਕ ਖ਼ਬਰ
ਵਾਰਸ ਸ਼ਾਹ ਅਸਾਂ ਮਾਲੂਮ ਕੀਤਾ, ਜੱਟੀ ਜੋਗੀ ਇਕੋ ਹਾਣ ਦੇ ਨੇ।

ਸਮਾਰਟ ਫੋਨ ਖ਼ਰੀਦਣ ਲਈ ਸਰਕਾਰ ਦੀ ਅੱਖ ਆਫ਼ਤ ਰਾਹਤ ਫੰਡ ‘ਤੇ- ਇਕ ਖ਼ਬਰ
ਛੰਨਾ ਵੇਚ ‘ਤਾ, ਕੌਲੀ ਵੇਚ ‘ਤੀ, ਵੇਚਣ ਨੂੰ ਫਿਰਦੈ ਗੜਵੀ ਨੀਂ ਮਰ ਜਾਣਾ ਅਮਲੀ।

ਹਰਿਆਣਾ ਕਮੇਟੀ ਦਾ ਪ੍ਰਧਾਨ ਬਣਨ ‘ਤੇ ਦਾਦੂਵਾਲ ਨੂੰ ਵਧਾਈਆਂ ਦਾ ਸਿਲਸਿਲਾ ਜਾਰੀ- ਇਕ ਖ਼ਬਰ
ਸਿੱਖ ਕੌਮ ਪ੍ਰਧਾਨਾਂ ਨੂੰ ਹਾਥੀ ‘ਤੇ ਬਿਠਾ ਕੇ ਲਿਆਉਂਦੀ ਹੁੰਦੀ ਆ ਤੇ ਖੋਤੇ ‘ਤੇ ਬਿਠਾ ਕੇ ਘਰ ਭੇਜਦੀ ਹੁੰਦੀ ਆ।

ਵਿਆਹ ਕਿਸੇ ਦਾ ਤੇ ਰਗੜੇ ਗਏ ਗਵਾਹ ਤੇ ਗ੍ਰੰਥੀ- ਇਕ ਖ਼ਬਰ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲੀ ਕੰਧ ਟੱਪ ਕੇ।

ਕੈਪਟਨ ਅਕਾਲੀ ਦਲ ਨੂੰ ਵਿਰੋਧੀ ਧਿਰ ਵਜੋਂ ਪੇਸ਼ ਕਰਨ ਦੇ ਯਤਨਾਂ ‘ਚ- ਭਗਵੰਤ ਮਾਨ
ਮਿੱਤਰਾਂ ਦੇ ਫੁਲਕੇ ਨੂੰ, ਨੀਂ ਮੈਂ ਖੰਡ ਦਾ ਪਲੇਥਣ ਲਾਵਾਂ।   

ਸਰਕਾਰ ਸੌਖੇ ਦਿਨਾਂ ਦਾ ਵਸੀਲਾ ਬਣੇ, ਬੇਸ਼ੱਕ ਸਮਾਰਟ ਫੋਨ ਲੈ ਲਵੇ- ਇਕ ਦੁਖੀ ਮਾਂ
ਮਾਤਾ ਜੀ, ਤੁਹਾਡੇ ਦੁੱਖਾਂ ਨਾਲ ਇਹਨਾਂ ਨੂੰ ਕੋਈ ਸਰੋਕਾਰ ਨਹੀਂ, ਵੋਟਾਂ ਤਾਈਂ ਮਤਲਬ ਹੈ।

ਲਾਇਬ੍ਰੇਰੀ ਦਿਵਸ ਮੌਕੇ ਵੀ ਸਰਕਾਰ ਨੇ ਲਾਇਬ੍ਰੇਰੀਆਂ ਦੀ ਸਾਰ ਨਹੀਂ ਲਈ- ਇਕ ਖ਼ਬਰ
ਪੰਜਾਬ ਸਾਰਾ ਹੀ ਨਸ਼ੇੜੀ ਕਰ ਦੇਣਾ, ਪੜ੍ਹਾਕੂਆਂ ਦੀ ਲੋੜ ਕੋਈ ਨਾ।

ਗੁਰੂ ਗ੍ਰੰਥ ਸਾਹਿਬ ਦੇ 267 ਸਰੂਪਾਂ ਦੇ ਖੁਰਦ ਬੁਰਦ ਹੋਣ ਬਾਰੇ ਦਿੱਲੀ ਕਮੇਟੀ ਚੁੱਪ ਕਿਉਂ?- ਜਸਮੀਤ ਸਿੰਘ ਪੀਤਮਪੁਰਾ
ਹਿਜ਼ ਮਾਸਟਰਜ਼ ਵਾਇਸ।

ਪੰਦਰਾਂ ਲੱਖ ਰੁਪਏ ਦੇ ਸਮਾਰਟ ਫੋਨ ਵੰਡਣ ’ਤੇ ਸਰਕਾਰ ਦਾ 25 ਲੱਖ ਰੁਪਇਆ ਖਰਚ ਆਵੇਗਾ- ਇਕ ਖ਼ਬਰ
ਧੇਲੇ ਦੀ ਬੁੱਢੀ, ਟਕਾ ਸਿਰ ਮੁਨਾਈ।

ਜਾਖੜ ਦਾ ਡੇਰਾ ਨਵੀਂ ਦਿੱਲੀ ‘ਚ, ਬਾਜਵਾ ਵੀ ਜਲਦੀ ਹੀ ਪਹੁੰਚ ਰਿਹੈ- ਇਕ ਖ਼ਬਰ
ਤੇਰੇ ਦੁਆਰ ਖੜ੍ਹੇ ਹਮ ਜੋਗੀ, ਮਈਆ ਮਿਹਰ ਕੀ ਨਜ਼ਰ ਕਬ ਹੋਗੀ।

ਦਿੱਲੀ ‘ਚ ਕਰਵਾਏ ਵਿਕਾਸ ਕਾਰਜਾਂ ਦੇ ਸਿਰ ‘ਤੇ ‘ਆਪ’ ਪਾਰਟੀ ਪੰਜਾਬ ‘ਚ ਚੋਣਾਂ ਲੜੇਗੀ- ਬੌਬੀ ਅਟਵਾਲ
ਨੱਚਾਂ ਮੈਂ ਪਟਿਆਲੇ, ਮੇਰੀ ਧਮਕ ਜਲੰਧਰ ਪੈਂਦੀ।

ਬਿਜਲੀ ਚੋਰੀ ‘ਚ ਬਾਦਲ ਦਾ ਹਲਕਾ ਲੰਬੀ ਮੋਹਰੀ ਪਿੰਡ ਬਾਦਲ ਇਲਾਕੇ ‘ਚੋਂ ਮੋਹਰੀ- ਇਕ ਖ਼ਬਰ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਪੰਜਾਬ ‘ਚ ਵਧ ਰਹੇ ਕਰੋਨਾ ਕੇਸਾਂ ਕਰ ਕੇ ਕੈਪਟਨ ਨੇ ਮੋਦੀ ਤੋਂ ਫ਼ਰਾਖ਼ਦਿਲੀ ਵਾਲਾ ਵਿਤੀ ਪੈਕੇਜ ਮੰਗਿਆ- ਇਕ ਖ਼ਬਰ
ਮੈਨੂੰ ਸੋਨੇ ਦਾ ਤਵੀਤ ਕਰਾ ਦੇ, ਚਾਂਦੀ ਦਾ ਕੀ ਭਾਰ ਚੁੱਕਣਾ।

ਮੇਰੀ ਕੋਈ ਮੰਗ ਨਹੀਂ, ਮੈਂ ਬਿਨਾਂ ਸ਼ਰਤ ਵਾਪਸ ਆਇਆ ਹਾਂ- ਸਚਿਨ ਪਾਇਲਟ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਜਿਹਲ ‘ਚ ਬੰਦ ਆਸਾ ਰਾਮ ਨੂੰ ਬਾਹਰੋਂ ਖਾਣਾ ਮੰਗਵਾਉਣ ਦੀ ਇਜਾਜ਼ਤ- ਇਕ ਖ਼ਬਰ
ਜੇ ਅੱਤਵਾਦੀ ਕਸਾਬ ਨੂੰ ਜਿਹਲ ‘ਚ ਬਰਿਆਨੀ ਦਿਤੀ ਜਾ ਸਕਦੀ ਐ, ਆਸਾ ਰਾਮ ਤਾਂ ਫੇਰ ਵੀ ਏਹਨਾਂ ਦਾ ‘ਬਾਪੂ’ ਐ।