14 Dec. 2020

ਭਾਜਪਾ ਸਰਕਾਰ ਦੀਆਂ ਫੁੱਟਪਾਊ ਤੇ ਭੜਕਾਊ ਚਾਲਾਂ ਨੂੰ ਪਛਾੜਨ ਦਾ ਸੱਦਾ- ਉਗਰਾਹਾਂ ਜਥੇਬੰਦੀ
ਜਾਣਾ ਦਰਬਾਰ ਮੈਂ ਦਲੀਲਾਂ ਧਾਰੀਆਂ, ਦੱਸਦਾਂ ਹਕੀਕਤਾਂ ਤਮਾਮ ਸਾਰੀਆਂ।

ਸ਼ਰਦ ਪਵਾਰ ਤੋਂ ਪੀ.ਐਮ. ਬਣਨ ਦੇ ਮੌਕੇ ਖੁੱਸਣ ਦਾ ਮੁੱਦਾ ਬਣਿਆ ਚਰਚਾ ਦਾ ਵਿਸ਼ਾ- ਇਕ ਖ਼ਬਰ
ਅਬ ਪਛਤਾਏ ਕਿਆ ਹੋਤ, ਜਬ ਚਿੜੀਆਂ ਚੁਗ ਗਈ ਖੇਤ।

ਇਕ ਲੱਖ ਕਿਸਾਨਾਂ ਦਾ ਹੋਰ ਜਥਾ ਦਿੱਲੀ ਪਹੁੰਚਿਆ ਧਰਨੇ ‘ਤੇ- ਇਕ ਖ਼ਬਰ
ਚਲ ਚੱਲੀਏ ਅਠੌਲੇ ਵਾਲੇ ਮੇਲੇ, ਹੋਰ ਛੱਡ ਦੇ ਸਭ ਝਮੇਲੇ।

ਹਰਿਆਣਾ ਸਰਕਾਰ ਨੇ ਕਿਸਾਨਾਂ ਦੇ ਰਾਹ ‘ਚ ਮੁੜ ਅਟਕਾਏ ਪੱਥਰ- ਇਕ ਖ਼ਬਰ
ਲਾਮ ਲੱਦ ਅਸਬਾਬ ਸਭ ਸਾਧ ਚੱਲੇ, ਚੜ੍ਹੇ ਪਰਬਤਾਂ ਦੇ ਉੱਪਰ ਜਾ ਭਾਈ।

ਅੱਖ ‘ਤੇ ਰਬੜ ਦੀ ਬੁਲੇਟ ਵੱਜਣ ਦੇ ਬਾਵਜੂਦ ਨਿਹੰਗ ਸਿੰਘ ਸ਼ੇਰ ਵਾਂਗ ਗਰਜਿਆ- ਇਕ ਖ਼ਬਰ
ਜੱਗਾ ਵੱਢਿਆ ਬੋਹੜ ਦੀ ਛਾਵੇਂ, ਨੌਂ ਮਣ ਰੇਤ ਭਿੱਜ ਗਈ।

ਮੋਦੀ ਨੂੰ ਕੁਰਸੀ ‘ਤੇ ਬਿਠਾਉਣ ਵਾਲੇ ਲੋਕ ਉਤਾਰਨਾ ਵੀ ਜਾਣਦੇ ਹਨ- ਭਾਈ ਬਡਾਲਾ
ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।

ਵਿਆਹ ਦੇ ਦੂਜੇ ਦਿਨ ਹੀ ਵਿਆਹੁਤਾ ਨਕਦੀ ਅਤੇ ਗਹਿਣੇ ਲੈ ਕੇ ਹੋ ਗਈ ਫੁਰਰ..-ਇਕ ਖ਼ਬਰ
ਲੁੱਟ ਕੇ ਲੈ ਗਈ, ਪੱਟ ਕੇ ਲੈ ਗਈ...............................

ਬੇਅਦਬੀ ਕਾਂਡ: ਸੱਤਾ ਤਬਦੀਲੀ ਦੇ ਬਾਅਦ ਵੀ ਕਿਉਂ ਨਹੀਂ ਮਿਲ ਰਿਹਾ ਇਨਸਾਫ਼- ਸੁਖਰਾਜ ਸਿੰਘ
ਸੁਖਰਾਜ ਸਿਆਂ ਚਾਚਾ ਭਤੀਜੇ ਦੇ ਖਿਲਾਫ਼ ਕਿਵੇਂ ਜਾ ਸਕਦੈ!

ਪੰਜਾਬ ਤੇ ਹਰਿਆਣਾ ਦੇ ਸਕੇ ਭਰਾਵਾਂ ਵਾਲੇ ਰਿਸ਼ਤੇ ਉਸਰਨ ‘ਤੇ ਸਾਨੂੰ ਮਾਣ- ਰਾਮੂਵਾਲੀਆ, ਅਖਿਲੇਸ਼
ਰੰਡੀਆਂ ਤਾਂ ਰੰਡ ਕੱਟਦੀਆਂ ਪਰ ਮੁਸ਼ਟੰਡੇ ਨਹੀਂ ਕੱਟਣ ਦਿੰਦੇ।

ਮੋਦੀ ਨੇ ਸਿਆਸੀ ਖੇਤਰ ਦੀ ਨੁਹਾਰ ਬਦਲੀ-ਨਕਵੀ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਮੈਂ ਆਪਣੀ ਪਾਰਟੀ ਤੇ ਕਿਸਾਨਾਂ ਨਾਲ਼ ਖੜ੍ਹਾ ਹਾਂ- ਸੰਨੀ ਦਿਓਲ
ਅੱਧੀ ਤੇਰੀ ਆਂ ਮੁਲਾਹਜ਼ੇਦਾਰਾ, ਅੱਧੀ ਆਂ ਗ਼ਰੀਬ ਜੱਟ ਦੀ।

ਖੇਤੀ ਬਿੱਲ ਰੱਦ ਕਰਨ ਲਈ ਬਾਦਲ ਨੇ ਮੋਦੀ ਨੂੰ ਲਿਖਿਆ ਪੱਤਰ- ਇਕ ਖ਼ਬਰ
ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਦਮਦਮੀ ਟਕਸਾਲ ਵਲੋਂ ਕਿਸਾਨ ਸੰਘਰਸ਼ ਬਾਰੇ ਚੁੱਪੀ ਸਾਧਣਾ ਅਤੀ ਮੰਦਭਾਗਾ- ਤੁੰਗ, ਤਾਲਿਬਪੁਰਾ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਜਦੋਂ ਸਸਤੀ ਅੰਗੇਜ਼ਮੈਂਟ ਰਿੰਗ ਪੁਆਉਣ ਤੋਂ ਮੰਗੇਤਰ ਲੜਕੀ ਨੇ ਕਰ ਦਿੱਤਾ ਇਨਕਾਰ- ਇਕ ਖ਼ਬਰ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਕਿਸਾਨ ਅੰਦੋਲਨ ਦਾ ਹਰਿਆਣਾ ਸਰਕਾਰ ‘ਤੇ ਕੋਈ ਅਸਰ ਨਹੀਂ- ਸਿੱਖਿਆ ਮੰਤਰੀ ਹਰਿਆਣਾ
ਬੇਸ਼ਰਮ ਦੇ ਢੂ.. ‘ਤੇ ਦਰਖ਼ਤ ਉੱਗਿਆ ਕਹਿੰਦਾ ਛਾਵੇਂ ਬੈਠਾਂਗੇ।

08 Dec. 2020

ਅਕਾਲੀ ਦਲ ਦੀ ਸਹਿਮਤੀ ਨਾਲ ਪਾਸ ਹੋਏ ਖੇਤੀ ਕਾਨੂੰਨ-ਜਾਖੜ
ਜਾਖੜ ਸਾਬ, ਕੈਪਟਨ ਤੇ ਮਨਪ੍ਰੀਤ ਸਿੰਘ ਬਾਦਲ ਵੀ ਮੀਟਿੰਗਾਂ ‘ਚ ਜਾਂਦੇ ਰਹੇ ਐ।

ਪੰਜਾਬੀ ਹੋਣ ਦਾ ਫ਼ਰਜ਼ ਨਿਭਾਉਣ ਪੰਜਾਬ ਦੇ ਭਾਜਪਾ ਨੇਤਾ-ਅਮਨ ਅਰੋੜਾ
ਪੁੱਤਰਾ ਬੰਤੀ ਦਿਆ, ਕਦੇ ਪਿੰਡ ਵਲ ਫੇਰਾ ਪਾ ।

ਹਰਿਆਣਾ ਦੇ ਕਿਸਾਨ ਐਸ.ਵਾਈ.ਐੱਲ. ਨਹਿਰ ਦੀ ਉਸਾਰੀ ਦਾ ਮੁੱਦਾ ਵੀ ਨਾਲ਼ ਜੋੜਨ- ਖੇਤੀ ਮੰਤਰੀ ਦਲਾਲ
ਵਿਆਹ ‘ਚ ਬੀਅ ਦਾ ਲੇਖਾ, ਬੱਲੇ ਬਈ ਦਲਾਲ ਜੀ।

ਮੋਗਾ ਦੇ ਐੱਸ.ਐੱਸ.ਪੀ.ਨੇ ਸਿਆਸੀ ਬਦਲੀਆਂ ਵਿਰੁੱਧ ਚੁੱਕਿਆ ਝੰਡਾ- ਇਕ ਖ਼ਬਰ
ਸੁਤੀ ਹੋਈ ਸੋਨ ਚਿੜੀ, ਲੈਣ ਲੱਗੀ ਅੰਗੜਾਈਆਂ।

ਕਿਸਾਨੀ ਮੋਰਚੇ ‘ਚ ਹੋ ਸਕਦੀ ਹੈ ਘੁਸਪੈਠ- ਜਥੇਦਾਰ ਅਕਾਲ ਤਖ਼ਤ
ਖ਼ਬਰਦਾਰ ਰਹਿਣਾ ਬਈ ਚੌਂਕੀ ਜ਼ਾਲਮਾਂ ਦੀ ਆਈ।

ਈ.ਡੀ. ਜਾਂ ਹੋਰ ਕਿਸੇ ਤੋਂ ਮੈ ਨਹੀਂ ਡਰਦਾ- ਕੈਪਟਨ
ਅਮਿਤ ਸ਼ਾਹ ਨਾਲ ਮੁਲਾਕਾਤ ਤੋਂ ਬਾਅਦ ਮਾਰੀ ਬੜ੍ਹਕ ਦਾ ਕੀ ਰਾਜ਼ ਐ ਕੈਪਟਨ ਸਾਬ੍ਹ ?

ਦਿੱਲੀ ‘ਚ 10 ਦਸੰਬਰ ਨੂੰ ਨਵੇਂ ਸੰਸਦ ਭਵਨ ਦਾ ਭੂਮੀ ਪੂਜਨ ਕਰਨਗੇ ਮੋਦੀ- ਇਕ ਖ਼ਬਰ
ਰੋਮ ਸੜ ਰਿਹੈ.................................

ਕਿਸਾਨ ਮੋਰਚਾ ਜ਼ਮੀਨ ਦਾ ਹੀ ਨਹੀਂ ਜ਼ਮੀਰਾਂ ਦਾ ਮੋਰਚਾ ਹੈ ਇਹ- ਗੁਰਪ੍ਰੀਤ ਘੁੱਗੀ
ਬਾਬਲ ਧਰਮੀ ਦੀ, ਕੁਲ ਨੂੰ ਦਾਗ਼ ਨਾ ਲਾਈਏ।

ਕੈਨੇਡਾ ਸ਼ਾਂਤੀਪੂਰਨ ਪ੍ਰਦਰਸ਼ਨਾਂ ਦੇ ਅਧਿਕਾਰ ਦਾ ਹਮੇਸ਼ਾ ਸਮਰਥਨ ਕਰੇਗਾ- ਟਰੂਡੋ
ਮੈਨੂੰ ਵੇਖ ਲੈਣ ਦੇ ਮੁੰਡਾ, ਨੀ ਆਹ ਫੜ ਮਾਏਂ ਪੂਣੀਆਂ।

ਕਿਸਾਨ ਅੰਦੋਲਨ ਚਲਦੇ ਖੱਟਰ ਸਰਕਾਰ ਵੀ ਖ਼ਤਰੇ ‘ਚ- ਇਕ ਖ਼ਬਰ
ਨੱਚਾਂ ਮੈਂ ਲੁਧਿਆਣੇ, ਮੇਰੀ ਧਮਕ ਜਲੰਧਰ ਪੈਂਦੀ।

ਕਿਸਾਨਾਂ ਨੂੰ ਖ਼ਾਲਿਸਤਾਨੀ ਕਹਿਣ ਵਾਲ਼ੇ ਮੁਆਫ਼ੀ ਮੰਗਣ- ਲਕਸ਼ਮੀ ਕਾਂਤਾ ਚਾਵਲਾ
ਇਹਨਾਂ ਸੁਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਕੇਂਦਰ ਸਰਕਾਰ ਵਿਰੁੱਧ ਜਿੱਤ ਵਾਲ਼ਾ ਹਾਥੀ ਤਾਂ ਲੰਘ ਗਿਆ ਸਿਰਫ਼ ਪੂਛ ਬਾਕੀ ਹੈ- ਕਿਸਾਨ ਆਗੂ
ਗੂੰਜੇ ਚਰਖ਼ਾ ਬਿਸ਼ਨੀਏ ਤੇਰਾ, ਲੋਕਾਂ ਭਾਣੇ ਮੋਰ ਬੋਲਦਾ।

ਕਿਸਾਨਾਂ ਦੀ ਬਦੌਲਤ ਹੀ ਮੈਂ ਸਭ ਕੁਝ ਹਾਂ- ਪ੍ਰਕਾਸ਼ ਸਿੰਘ ਬਾਦਲ
ਬਿਲਕੁਲ ਠੀਕ, ਕਿਸਾਨਾਂ ਨੂੰ ਵੇਚ ਕੇ ਹੀ ਸਭ ਕੁਝ ਬਣਾਇਆ।

ਮਾਲੇਗਾਉਂ ਧਮਾਕਾ ਕੇਸ: ਵਿਸ਼ੇਸ਼ ਅਦਾਲਤ ‘ਚ ਪੇਸ਼ ਨਹੀਂ ਹੋਈ ਪ੍ਰੱਗਿਆ ਸਿੰਘ ਠਾਕੁਰ-ਇਕ ਖ਼ਬਰ
ਮੈਂ ਡਿਪਟੀ ਦੀ ਸਾਲ਼ੀ, ਕੈਦ ਕਰਾ ਦਊਂਗੀ।
ਖੇਤੀ ਕਾਨੂੰਨ ਵਾਪਸ ਨਾ ਹੋਏ ਤਾਂ ਦੇਸ਼ ਭਰ ’ਚ ਪ੍ਰਦਰਸ਼ਨ ਕਰਾਂਗੇ- ਮਮਤਾ ਬੈਨਰਜੀ
ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜਜੂੰ ਭਰਿੰਡ ਬਣ ਕੇ।

25 Nov. 2020

ਬਾਦਲ ਦਲ ਦੇ ਨੇਤਾਵਾਂ ਨੇ ਆਗਾਮੀ ਚੋਣਾਂ ਲਈ ਆਪਣੇ ਪੁੱਤਰਾਂ ਲਈ ਹਲਕੇ ਰਾਖਵੇਂ ਕੀਤੇ- ਇਕ ਖ਼ਬਰ
ਅੰਨ੍ਹਾਂ ਵੰਡੇ ਸ਼ੀਰਨੀ..................................

ਬਿਹਾਰ ‘ਚ ਅਪਰਾਧਿਕ ਪਿਛੋਕੜ ਵਾਲੇ 1197 ਉਮੀਦਵਾਰਾਂ ਨੇ ਚੋਣ ਲੜੀ- ਇਕ ਖ਼ਬਰ
ਦੇਸ਼ ਨੂੰ ਵਿਸ਼ਵ ਗੁਰੂ ਵੀ ਤਾਂ ਬਣਾਉਣੈਂ ਬਈ!

ਦਿੱਲੀ ਪੁਲਿਸ ਨੇ ਕਿਸਾਨਾਂ ਨੂੰ ਰੈਲੀ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ- ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨੀਂ ਚੱਪਣੀ ਵਗਾਹ ਕੇ ਮਾਰੀ।

ਜਥੇਦਾਰ ਖਿਲਾਫ਼ ਗ਼ਲਤ ਟਿੱਪਣੀ ਬਰਦਾਸ਼ਤ ਨਹੀਂ- ਲੌਂਗੋਵਾਲ
ਜਦੋਂ ਸੱਚੀਆਂ ਸੁਣਾਈਆਂ ਨੀਂ, ਬੜਾ ਦੁਖ ਲੱਗਿਆ ਬੜਾ ਦੁਖ ਲੱਗਿਆ ।

ਬਾਬਾ ਕੁਲਵੰਤ ਸਿੰਘ ਨੇ ਅਕਾਲ ਤਖ਼ਤ ਤੋਂ ਖਿਮਾ ਯਾਚਨਾ ਮੰਗੀ- ਇਕ ਖ਼ਬਰ
ਪਰਿਕਰਮਾ ਦਾ ਚੱਕਰ ਲਾ ਕੇ ਤੂੰ ਵੀ ਚਾਰ ਬਾਟੀਆਂ ਮਾਂਜ ਲਈ ਬਾਬਾ।

ਕਾਂਗਰਸੀ ਆਗੂਆਂ ਨੂੰ ‘ਫਾਈਵ ਸਟਾਰ ਕਲਚਰ’ ਛੱਡਣ ਦੀ ਲੋੜ- ਗੁਲਾਮ ਨਬੀ ਆਜ਼ਾਦ
ਨੀਂ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

ਮੋਦੀ ਸਰਕਾਰ ਨੂੰ ਝੁਕਾ ਕੇ ਹੀ ਦਮ ਲਵਾਂਗੇ- ਉਗਰਾਹਾਂ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।

ਕਿਸਾਨ ਹਿਤੈਸ਼ੀ ਹੈ ਭਾਰਤੀ ਜਨਤਾ ਪਾਰਟੀ- ਜਿਆਣੀ
ਪੈਰੀਂ ਝਾਂਜਰਾਂ ਗਲ਼ੀ ਦੇ ਵਿਚ ਗਾਰਾ, ਘਰ ਤੇਰਾ ਦੂਰ ਮਿੱਤਰਾ।

ਕਾਂਗਰਸ ਦੀ ਅੰਦਰੂਨੀ ਖਿੱਚੋਤਾਣ: ਨਾਰਾਜ਼ ਆਗੂਆਂ ਵਲੋਂ ਵਿਚਾਰਾਂ- ਇਕ ਖ਼ਬਰ
ਸਰਵਣ ਵੀਰ ਬਿਨਾਂ, ਮੇਰੀ ਰੁਲ਼ਦੀ ਵਣਾਂ ਵਿਚ ਗਠੜੀ।

ਟਰੰਪ ਨੇ ਚੋਣਾਂ ਵਿਚ ਗੜਬੜੀ ਦੇ ਦੋਸ਼ ਦਾ ਖੰਡਨ ਕਰਨ ਵਾਲੇ ਅਧਿਕਾਰੀ ਨੂੰ ਕੀਤਾ ਬਰਖਾਸਤ-ਇਕ ਖ਼ਬਰ
ਸਹੁਰੀ ਦਿਆ! ਮੇਰੀ ਬਿੱਲੀ ਮੈਨੂੰ ਹੀ ਮਿਆਊਂ।

ਸੂਬਿਆਂ ਦੀ ਮਰਜ਼ੀ ਬਿਗੈਰ ਸੀ.ਬੀ.ਆਈ. ਜਾਂਚ ਨਹੀਂ ਕਰ ਸਕੇਗੀ-ਸੁਪਰੀਮ ਕੋਰਟ
ਦਰਸ਼ਨ ਹੋ ਗਏ ਤੇਰੇ, ਹੁਣ ਤੂੰ ਮੁੜ ਜਾ ਵੇ।

ਪੰਜਾਬ ਭਾਜਪਾ ਆਪਣੇ ਦਮ ਉੱਤੇ ਚੋਣਾਂ ਲੜ ਕੇ ਦੇਖ ਲਵੇ- ਸੁਖਬੀਰ
ਪਰੇ ਹਟ ਜਾ ਬਲਦ ਸਿੰਗ ਮਾਰੂ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।

ਐੱਸ.ਜੀ.ਪੀ.ਸੀ. ਨੂੰ ਦਰਪੇਸ਼ ਚੁਣੌਤੀਆਂ ਲਈ ਇਕ ਸਲਾਹਕਾਰ ਕਮੇਟੀ ਬਣਾਈ ਜਾਵੇਗੀ- ਲੌਂਗੋਵਾਲ
ਹੁਣ ਤਾਈਂ ਬਣਾਈਆਂ ਏਨੀਆਂ ਕਮੇਟੀਆਂ ਦਾ ਹਿਸਾਬ ਤਾਂ ਸੰਗਤਾਂ ਨੂੰ ਦੇਵੋ ਪਹਿਲਾਂ।  

ਕੇਂਦਰ ਨੇ ਬਿਕਰਮ ਮਜੀਠੀਆ ਤੋਂ ਜ਼ੈੱਡ ਸੁਰੱਖਿਆ ਵਾਪਸ ਲਈ-ਇਕ ਖ਼ਬਰ
ਯਾਰੀ ਲੱਗੀ ‘ਤੇ ਲੁਆ ‘ਤੇ ਤਖ਼ਤੇ, ਟੁੱਟੀ ‘ਤੇ ਚੁਗਾਠ ਪੁੱਟ ਲਈ।

ਲੋਕ ਅਕਾਲੀ ਦਲ ਦੀ ਸਰਕਾਰ ਬਣਾਉਣ ਲਈ ਉਤਾਵਲੇ-ਗਰਗ
ਹੌਲੀ ਹੌਲੀ ਨੱਚ, ਜੰਡਿਆਲਾ ਨੇੜੇ ਈ ਆ।

ਟਰੰਪ ਨੇ ਪਹਿਲਾਂ ਦੇ ਮੁਕਾਬਲੇ ਅਮਰੀਕਾ ਨੂੰ ਹੋਰ ਵੱਧ ਵੰਡਿਆ- ਸਿੱਖ ਆਗੂ
ਸਾਰਾ ਪਿੰਡ ਧੜਿਆਂ ਵਿਚ ਵੰਡ ‘ਤਾ, ਜਦੋਂ ਦੀ ਤੂੰ ਆਈ ਸ਼ੂਕਰੇ।

16 Nov. 2020

ਬਿਹਾਰ ਦੀ ਜਿੱਤ ਨੂੰ ਭਾਜਪਾ ਕਿਸਾਨਾਂ ਦੀ ਜਿੱਤ ਆਖ ਰਹੀ ਹੈ- ਇਕ ਖ਼ਬਰ
ਵਧ ਗਈ ਵੇਲ ਦੀ ਤਰ੍ਹਾਂ, ਤੇਰੇ ਘੱਗਰਾ ਮੇਚ ਨਾ ਆਵੇ।

26-27 ਨਵੰਬਰ ਦੀ ਕਿਸਾਨ ਰੈਲੀ ‘ਚ ਕੇਂਦਰ ਸਰਕਾਰ ਵਲੋਂ ਕਰੋਨਾ ਦਾ ਅੜਿੱਕਾ-ਇਕ ਖ਼ਬਰ
ਸਰਕਾਰ ਜੀ, ਬਿਹਾਰ ਦੀਆਂ ਰੈਲੀਆਂ ਵੇਲੇ ਕਰੋਨਾ ਛੁੱਟੀ ਗਿਆ ਹੋਇਆ ਸੀ !

ਨੋਟਬੰਦੀ ਨਾਲ ਕਾਲ਼ੇ ਧਨ ਨੂੰ ਘਟਾਉਣ ਵਿਚ ਮਦਦ ਮਿਲੀ- ਮੋਦੀ
ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ ।

ਭਾਜਪਾ ਨੇਤਾਵਾਂ ਵਲੋਂ ਅਰਨਬ ਗੋਸਵਾਮੀ ਦੇ ਹੱਕ ‘ਚ ਮੁਜ਼ਾਹਰੇ ਦੀ ਕੋਸ਼ਿਸ਼- ਇਕ ਖ਼ਬਰ
ਤੇਰੀ ਆਈ ਮੈਂ ਮਰ ਜਾਂ, ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ।

ਮੋਦੀ ਨੇ ਅਡਵਾਨੀ ਦੇ ਪੈਰ ਛੂਹ ਕੇ ਦਿਤੀ ਜਨਮ ਦਿਨ ਦੀ ਵਧਾਈ- ਇਕ ਖ਼ਬਰ
ਤੇਰੇ ਵਰਗੇ ਨੂੰ, ਗੱਲੀਂ ਰਾਤ ਲੰਘਾਵਾਂ।

ਅਸੀਂ ਦੇਸ਼ ਦੇ ਨਹੀਂ , ਭਾਜਪਾ ਦੇ ਦੁਸ਼ਮਣ ਹਾਂ- ਸ਼ੇਖ਼ ਅਬਦੁੱਲਾ
ਬਈ ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਬਾਦਲ ਅਕਾਲੀ ਦਲ ਆਗੂ ਨੇ ਬਾਦਲਾਂ ‘ਤੇ ਕਿਸਾਨਾਂ ਨਾਲ ਸਿਆਸਤ ਖੇਡਣ ਦੇ ਦੋਸ਼ ਲਾਏ- ਇਕ ਖ਼ਬਰ
ਨੀ ਮੈਂ ਕਿਉਂ ਕਰ ਜਾਵਾਂ ਕਾਅਬੇ ਨੂੰ, ਮੈਂ ਜਾਣਾ ਤਖ਼ਤ ਹਜ਼ਾਰੇ ਨੂੰ।

ਅਣਦੇਖੀ ਦਾ ਸ਼ਿਕਾਰ ਹੋਏ ਕਾਂਗਰਸੀਆਂ ਨੇ ਰਾਵਤ ਕੋਲ਼ ਰੋਏ ਦੁੱਖੜੇ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਬਿਹਾਰ ਤੋਂ ਬਾਅਦ ਹੁਣ ਭਾਜਪਾ ਦੀ ਪੰਜਾਬ ਜਿੱਤਣ ਦੀ ਤਿਆਰੀ ਸ਼ੁਰੂ- ਮਿੱਤਲ
ਕਾਹਨੂੰ ਬੰਨ੍ਹਦੀ ਛੱਪੜੀਏ ਦਾਅਵੇ, ਨਾਲ਼ ਦਰਿਆਵਾਂ ਦੇ ।

ਪੰਜਾਬ ਨੂੰ ਭਾਜਪਾ ਬਿਹਾਰ ਨਾ ਸਮਝੇ- ਰਾਵਤ
ਮੈਨੂੰ ਨਰਮ ਕੁੜੀ ਨਾ ਜਾਣੀਂ, ਲੜ ਜੂੰ ਭਰਿੰਡ ਬਣ ਕੇ।

ਸ਼ਰਾਬ ਦੇ ਸ਼ੌਕੀਨਾਂ ਨੇ ਪੰਜਾਬ ਸਰਕਾਰ ਦਾ ਖ਼ਜ਼ਾਨਾ ਭਰਿਆ- ਇਕ ਖ਼ਬਰ
ਨਦੀਆਂ ਦਾਰੂ ਦੀਆਂ, ਭਰ ਭਰ ਵਹਿੰਦੀਆਂ ਰਹਿਣਗੀਆਂ।

ਟਰੰਪ ਦੇ ਸਮਰਥਕ ਅਤੇ ਵਿਰੋਧੀ ਨਿਊਯਾਰਕ ਵਿਚ ਭਿੜੇ- ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਭਾਜਪਾ ਵਲੋਂ ਕਿਸਾਨਾਂ ਦੀ ਬੇਇਜ਼ਤੀ ਪੰਜਾਬ ਬਰਦਾਸ਼ਤ ਨਹੀਂ ਕਰੇਗਾ- ਭਗਵੰਤ ਮਾਨ   
ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ ।

ਦਿੱਲੀ ਦੇ ਅਖਾਉਤੀ ਅਕਾਲੀ ਆਗੂ ਕੌਮ ਸਿਰ ਸੁਆਹ ਪਾਉਣ ‘ਚ ਰੁਝੇ- ਸਰਬਜੀਤ ਸਿੰਘ ਭੂਟਾਨੀ
ਉਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਭਾਰਤ ‘ਚ ਪਹਿਲੀ ਵਾਰ ਗੰਭੀਰ ਮੰਦੀ- ਆਰ.ਬੀ.ਆਈ.
ਪੱਖੇ ਵਾਂਗੂੰ ਝੂਲਦੀ ਫਿਰੇਂ, ਕੀ ਹੋ ਗਿਆ ਜਵਾਨੀਏ ਤੈਨੂੰ।

8 Nov. 2020

ਬੀ.ਜੇ.ਪੀ. ਦੇ ਸਾਬਕਾ ਮੰਤਰੀ ਨੂੰ ਪਿਛਲੇ ਦਰਵਾਜ਼ੇ ਰਾਹੀਂ ਬਾਹਰ ਕੱਢਿਆ- ਇਕ ਖ਼ਬਰ
ਨੀ ਹੁਣ ਮੈਂ ਕੀ ਕਰਾਂ, ਜੱਟ ਆਉਂਦਾ ਪਰੈਣੀ ਕੱਸੀ।

ਦੋਸਤਾਨਾ ਮੈਚ ਖੇਡ ਰਹੇ ਹਨ ਕੈਪਟਨ ਅਤੇ ਮੋਦੀ- ਦਲਜੀਤ ਸਿੰਘ ਚੀਮਾ
ਓਹੀ ਤੇਰੀ ਤੁਣਤੁਣੀ, ਉਹੀਓ ਤੇਰਾ ਰਾਗ।

ਸੁਖਬੀਰ ਦੇ ਹੱਥ ਕਮਾਨ ਆਉਣ ‘ਤੇ ਅਕਾਲੀ ਦਲ ਦਾ ਨਿਘਾਰ ਹੋਇਆ- ਸੁਖਦੇਵ ਸਿੰਘ ਢੀਂਡਸਾ
ਜਦੋਂ ਦੀ ਤੂੰ ਆਈ ਵੈਰਨੇ, ਮੇਰੇ ਪੁੱਤਾਂ ਵਿਚ ਵੈਰ ਪੁਆਏ।

ਐਨ.ਡੀ.ਏ. ਨੇ ਪਹਿਲਾਂ ਬਿਹਾਰੀਆਂ ਦੀਆਂ ਲੋੜਾਂ ਕੀਤੀਆਂ ਪੂਰੀਆਂ ਤੇ ਹੁਣ ਹੋਣਗੀਆਂ ਰੀਝਾਂ- ਭਾਜਪਾ
ਨਿੱਤ ਨਿੱਤ ਨਹੀਂ ਬਾਜ਼ਾਰ ਵਿਚ ਆਉਣਾ, ਨੀ ਬਿੱਲੋ ਖਾ ਲੈ ਨਾਸ਼ਪਾਤੀਆਂ।

ਚੰਡੀਗੜ੍ਹ ਧਰਨੇ ਨਾਲ ‘ਆਪ’ ਦੀ ਭਾਜਪਾ ਨਾਲ ਸਾਂਝ ਹੋਈ ਬੇਨਕਾਬ- ਨਾਗਰਾ
ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਕਾਂਗਰਸੀਆਂ ਤੋਂ ਹਰ ਘਪਲੇ ਦਾ ਹਿਸਾਬ ਲਿਆ ਜਾਵੇਗਾ- ਮਜੀਠੀਆ
ਜਿੱਦਾਂ ਦਾ ਹਿਸਾਬ ਰਾਜੇ ਨੇ ਤੁਹਾਡੇ ਕੋਲੋਂ ਲਿਆ, ਹੈ ਕਿ ਨਾ!

ਪੰਜਾਬ ਦੀ ਸਥਿਤੀ ਵਿਗੜਨ ਦੇਣ ਲਈ ਸੂਬਾ ਸਰਕਾਰ ਜ਼ਿੰਮੇਵਾਰ- ਨੱਢਾ
ਚੁੱਕੀ ਹੋਈ ਲੰਬੜਾਂ ਦੀ, ਨਾਲ਼ ਠਾਣੇਦਾਰ ਦੇ ਖਹਿੰਦੀ।

ਨਿਤੀਸ਼ ਕੁਮਾਰ ਦਾ ਐਲਾਨ- ਇਹ ਮੇਰੀ ਆਖਰੀ ਚੋਣ- ਇਕ ਖ਼ਬਰ
ਜਿੰਨਾ ਨਹਾਤੀ ਓਨਾ ਹੀ ਪੁੰਨ ।

ਪੰਜ ਸਾਲਾਂ ਬਾਅਦ ਵੀ ਪੀੜਿਤ ਇਨਸਾਫ਼ ਦੀ ਉਡੀਕ ਵਿਚ-ਇਕ ਖ਼ਬਰ
ਇੱਥੇ ਤਾਂ ਦਹਾਕੇ ਲੱਗ ਜਾਂਦੇ ਆ, ਪੰਜ ਸਾਲਾਂ ਬਾਅਦ ਹੀ ਕਾਹਲ਼ੇ ਪੈ ਗਏ ਜਨਾਬ ।

ਕੈਪਟਨ ਅਮਰਿੰਦਰ ਸਿੰਘ ਮੋਦੀ ਦੀ ਕੋਠੀ ਅੱਗੇ ਮਰਨ ਵਰਤ ‘ਤੇ ਬੈਠੇ- ਸੁਖਬੀਰ ਬਾਦਲ
ਤੇ ਤੁਸੀਂ ਅੰਦਰ ਬਹਿ ਕੇ ਮੋਦੀ ਸਾਬ ਨਾਲ਼ ਰਸਗੁੱਲੇ ਖਾਵੋਂ, ਹੈ ਨਾ!

ਕੈਪਟਨ ਸਰਕਾਰ ਕਿਸਾਨਾਂ ਨੂੰ ਗੁਮਰਾਹ ਕਰਨਾ ਬੰਦ ਕਰੇ- ਮਦਨ ਮੋਹਨ ਮਿੱਤਲ
ਤੇ ਭਾਜਪਾਈਓ, ਤੁਸੀਂ ਕਿਸਾਨ ਬਿੱਲਾਂ ਬਾਰੇ ਝੂਠ ਬੋਲਣਾ ਬੰਦ ਕਰੋ।

ਹਰਿਆਣਾ ਸਰਕਾਰ ਨੇ ਅਕਤੂਬਰ ‘ਚ ਸੌਦਾ ਸਾਧ ਨੂੰ ਇਕ ਦਿਨ ਦੀ ਦਿਤੀ ਪੈਰੋਲ- ਇਕ ਖ਼ਬਰ
ਮਿੱਤਰਾਂ ਦੇ ਤਿੱਤਰਾਂ ਨੂੰ , ਨੀ ਮੈਂ ਤਲੀਆਂ ‘ਤੇ ਚੋਗ ਚੁਗਾਵਾਂ।

ਪੰਥਕ ਅਕਾਲੀ ਲਹਿਰ ਨੇ ਘੇਰੀ ਸ਼੍ਰੋਮਣੀ ਕਮੇਟੀ- ਇਕ ਖ਼ਬਰ
ਬੱਗੀ ਤਿੱਤਰੀ ਕਮਾਦੋਂ ਨਿੱਕਲੀ, ਉਡਦੀ ਨੂੰ ਬਾਜ ਪੇ ਗਿਆ।

ਕਿਸਾਨਾਂ ਤੇ ਕਿਸਾਨੀ ਨੂੰ ਬਚਾਉਣ ਲਈ ਅਕਾਲੀ ਦਲ ਵਚਨਬੱਧ- ਜਗੀਰ ਕੌਰ
ਗੈਬੀ ਤੋਤੇ ਨੇ, ਮੇਰੀ ਗੁੱਤ ‘ਤੇ ਆਲ੍ਹਣਾ ਪਾਇਆ।

19 OCT. 2020

ਹਾਥਰਸ ਦੇ ਮੁਲਜ਼ਮਾਂ ਨੂੰ ਯੂ.ਪੀ. ਪੁਲਿਸ ਬਚਾਅ ਰਹੀ ਹੈ- ਰਾਹੁਲ ਗਾਂਧੀ
ਬਦੀਆਂ ਨਾ ਕਰ ਵੇ, ਕੈ ਦਿਨ ਦੀ ਜਿੰਦਗਾਨੀ।

ਥਾਣੇਦਾਰ ਪਾਸੋਂ ਜ਼ਰਦਾ ਅਤੇ ਨਸ਼ੇ ਦੀਆਂ ਗੋਲ਼ੀਆਂ ਬਰਾਮਦ- ਇਕ ਖ਼ਬਰ
ਯਾਰੋ ਡਿਊਟੀ ਬੜੀ ਸਖ਼ਤ ਹੁੰਦੀ ਐ, ਥਕਾਵਟ ਲਾਹੁਣ ਲਈ ਕੁਝ ਤਾਂ ਚਾਹੀਦਾ।

ਭਾਜਪਾ ਪੰਜਾਬ ‘ਚ ਸਾਰੀਆਂ ਸੀਟਾਂ ‘ਤੇ ਚੋਣ ਲੜੇਗੀ- ਅਸ਼ਵਨੀ ਕੁਮਾਰ
ਅੱਜ ਕਲ ਸੁਹਣਿਉਂ ਫਤੂਰ ਵਿਚ ਰਹਿੰਦੇ ਓ।

ਅਕਾਲੀ ਦਲ ਬਾਦਲ ਮਹਿਲਾ ਵਿੰਗ ਦੀ ਜ਼ਿਲ੍ਹਾ ਪ੍ਰਧਾਨ ‘ਤੇ ਬਲੈਕਮੇਲਿੰਗ ਦਾ ਕੇਸ ਦਰਜ- ਇਕ ਖ਼ਬਰ   
ਵਾਹ ਬੀਬੀ ਜੀ ਵਾਹ! ਸਿਆਸਤ ਦਾ ਇਹ ਕਿਹੜਾ ਰਾਹ।

ਖੇਤੀ ਸੁਧਾਰ ਬਿੱਲ ਕਿਸਾਨਾਂ ਨੂੰ ਉੱਦਮੀ ਬਣਾਉਣ ‘ਚ ਸਹਾਈ ਹੋਣਗੇ- ਮੋਦੀ
ਕਿਉਂ ਮੋਦੀ ਸਾਬ ! ਦੇਸ਼ ਦੇ ਕਿਸਾਨ ਪਹਿਲਾਂ ਦਲਿੱਦਰੀ ਹਨ?

ਭਾਜਪਾ ਨੇ ਕਿਸਾਨਾਂ ਦੀ ਪਿੱਠ ‘ਚ ਛੁਰਾ ਮਾਰਿਆ- ਸੁਖਬੀਰ ਬਾਦਲ
ਸੁਣ ਲੈ ਨਿਹਾਲੀਏ ਚੋਰਾਂ ਦੀਆਂ ਗੱਲਾਂ।

ਸਮ੍ਰਿਤੀ ਈਰਾਨੀ ਨੇ ਖੇਤੀ ਬਿੱਲਾਂ ਨੂੰ ਕਿਸਾਨ ਲਈ ਲਾਭਕਾਰੀ ਦੱਸਿਆ- ਇਕ ਖ਼ਬਰ
ਹਿਜ਼਼ ਮਾਸਟਰ’ਜ਼ ਵਾਇਸ।

ਮੋਦੀ ਦੀ ਪੂੰਜੀ ‘ਚ ਪਿਛਲੇ ਸਾਲ ਨਾਲੋਂ ਹੋਇਆ ਵਾਧਾ- ਇਕ ਖ਼ਬਰ
ਚਲੋ ਕਿਸੇ ਦੇ ਤਾਂ ਆਏ ਅੱਛੇ ਦਿਨ।

ਮੋਦੀ ਸਰਕਾਰ ਦੇ ਨਵੇਂ ਖੇਤੀ ਕਾਨੂੰਨਾਂ ਦੇ ਉਘੜਨ ਲੱਗੇ ਪਾਜ- ਇਕ ਖ਼ਬਰ
ਕਾਗਜ਼ ਕੇ ਫੂਲੋਂ ਸੇ ਖੁਸ਼ਬੂ ਕਭੀ ਆ ਨਹੀਂ ਸਕਤੀ।

ਕਿਸਾਨੀ ਬਚਾਉਣ ਲਈ ਅਕਾਲੀ ਦਲ ਹਰ ਕੁਰਬਾਨੀ ਦੇਣ ਲਈ ਤਿਆਰ- ਲੱਖੀ
ਹੁਣ ਪੰਜ ਸੱਤ ਬੱਕਰੇ ਖ਼ਰੀਦ ਲਉ ਕੁਰਬਾਨੀਆਂ ਦੇਣ ਲਈ।

ਐਮ.ਐਸ.ਪੀ. ‘ਤੇ ਸਰਕਾਰੀ ਖ਼ਰੀਦ ਦੇਸ਼ ਦੀ ਖੁਰਾਕ ਸੁਰੱਖਿਆ ਦਾ ਅਹਿਮ ਹਿੱਸਾ-ਮੋਦੀ
ਤੱਤੇ ਤਵੇ ਉੱਤੇ ਭਾਵੇਂ ਬਹਿ ਜਾ ਭਾਵੇਂ ਮੋਦੀਆ, ਅਸੀਂ ਕਰੀਏ ਨਾ ਤੇਰਾ ਇਤਬਾਰ।

ਖੇਤੀ ਕਾਨੂੰਨ ਵਾਪਿਸ ਲੈਣ ਤੱਕ ਸੰਘਰਸ਼ ਜਾਰੀ ਰਹੇਗਾ- ਰਾਹੁਲ ਗਾਂਧੀ
ਰੰਨਾਂ ਵਾਲ਼ੇ ਜੰਗ ਜਿੱਤਦੇ, ਕਿੱਥੈ ਲਿਖਿਆ ਫਰੰਗੀਆ ਦੱਸ ਵੇ।

ਬਾਦਲ ਪਰਵਾਰਾਂ ਦੀਆਂ ਆਸ਼ਾਵਾਂ ‘ਤੇ ਲੌਂਗੋਵਾਲ ਪੂਰਾ ਨਹੀਂ ਉੱਤਰਿਆ-ਇਕ ਖ਼ਬਰ
ਟੈਮ ਹੋ ਗਿਆ ਬਦਲ ਗਏ ਕਾਂਟੇ, ਗੱਡੀ ਆਉਣੀ ਸ਼ੂੰ ਕਰ ਕੇ।

ਅਕਾਲੀ ਦਲ ਬਾਦਲ ਵਲੋਂ ਸੂਬਾ ਤੇ ਕੇਂਦਰ ਸਰਕਾਰ ਵਿਚਾਲੇ ਗੰਢਤੁੱਪ ਦੇ ਦੋਸ਼- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਦੱਬ ਲਈ।

13 OCT. 2020

ਕਿਸਾਨਾਂ ਦੇ ਸੰਘਰਸ਼ ਨੇ ਪੰਜਾਬ ਭਾਜਪਾ ਦੀਆਂ ਆਸਾਂ ‘ਤੇ ਪਾਣੀ ਫੇਰਿਆ-ਇਕ ਖ਼ਬਰ

ਨ੍ਹਾਤੀ ਧੋਤੀ ਰਹਿ ਗਈ, ਉੱਤੇ ਮੱਖੀ ਬਹਿ ਗਈ।

ਖੇਤੀ ਨਾ ਰਹੀ ਤਾਂ ਦੇਸ਼ ਕੀ ਖਾਏਗਾ?- ਮੇਧਾ ਪਾਟੇਕਰ

ਖਾਣ ਲਈ ਝੂਠੇ ਲਾਰਿਆਂ, ਜੁਮਲਿਆਂ ਤੇ ਫ਼ਰੇਬਾਂ ਦੇ ਤਾਂ ਢੇਰ ਲੱਗੇ ਪਏ ਆ ਮੇਧਾ ਜੀ।                 

ਰਾਹੁਲ ਦੇ ਸਮਾਗਮ ਹਰਿਆਣੇ ‘ਚ ਠੀਕ, ਪਰ ਪੰਜਾਬੀ ਭੀੜ ਨਾ ਵੜੇ ਏਥੇ- ਹਰਿਆਣਾ ਸਰਕਾਰ

ਅਸਾਂ ਜੇਠ ਨੂੰ ਲੱਸੀ ਨਹੀਉਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।

ਅਮਰੀਕਾ ‘ਚ ਗੁਰਦੁਆਰੇ ਦੀ ਸਰਬ ਸੰਮਤੀ ਨਾਲ਼ ਹੋਈ ਚੋਣ ‘ਤੇ ਲੌਂਗੋਵਾਲ ਨੇ ਦਿੱਤੀ ਵਧਾਈ- ਇਕ ਖ਼ਬਰ

ਵਧਾਈ ਲੈਣ ਵਾਲਾ ਕੋਈ ਕੰਮ ਆਪ ਵੀ ਕਦੀ ਕਰ ਲਿਆ ਕਰੋ ਗੁਰਮੁਖੋ!

ਲੱਖੋਵਾਲ ਧੜਾ ਅਕਾਲੀ ਦਲ ਬਾਦਲ ਦੇ ਇਸ਼ਾਰੇ ‘ਤੇ ਚਲ ਰਿਹਾ ਹੈ- ਕੈਪਟਨ

ਤੂੰ ਨਹੀਂ ਬੋਲਦੀ ਰਕਾਨੇ ਤੂੰ ਨਹੀਂ ਬੋਲਦੀ, ਤੇਰੇ ‘ਚ ਤੇਰਾ ਯਾਰ ਬੋਲਦਾ।

 ਸਿੱਧੂ ਲਈ ਪਾਰਟੀ ‘ਚ ਅਜੇ ਕੋਈ ਅਹੁੱਦਾ ਖਾਲੀ ਨਹੀਂ-ਹਰੀਸ਼ ਰਾਵਤ

ਵੀਰਾ ਕੁਝ ਪੁੰਨ ਕਰ ਦੇ, ਘਟਾ ਆਣ ਕੇ ਬਨੇਰੇ ਕੋਲੋਂ ਮੁੜ ਗਈ।

ਸਿੱਖਾਂ ਦੇ ਧਾਰਮਕ ਚਿੰਨ੍ਹਾਂ ਦੀ ਬੇਅਦਬੀ ਬਰਦਾਸ਼ਤ ਨਹੀਂ- ਲੌਂਗੋਵਾਲ

ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਅਸੀਂ ਢੀਠ ਬਣ ਕੇ ਬਰਦਾਸ਼ਤ ਕਰ ਸਕਦੇ ਹਾਂ।

ਸੈਸ਼ਨ ਬੁਲਾਵਾਂਗੇ ਪਰ ਠੀਕ ਮੌਕੇ ‘ਤੇ, ਧਮਕੀ ਅੱਗੇ ਝੁਕ ਕੇ ਨਹੀਂ- ਕੈਪਟਨ

ਉੱਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਬਾਦਲਾਂ ਨੂੰ ਝਟਕਾ ਦੇਣ ਲਈ ਭਾਜਪਾ ਨੇ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਕਰਵਾਉਣ ਦਾ ਬਣਾਇਆ ਮਨ- ਇਕ ਖ਼ਬਰ

ਯਾਰੀ ਲੱਗੀ ‘ਤੇ ਲਵਾ ‘ਤੇ ਤਖ਼ਤੇ, ਟੁੱਟੀ ‘ਤੇ ਚੁਗਾਠ ਪੁੱਟ ਲਈ।

ਕਿਸਾਨ ਜਥੇਬੰਦੀਆਂ ਨੇ ਕੇਂਦਰ ਦੀ ਪੇਸ਼ਕਸ਼ ਠੁਕਰਾਈ-ਇਕ ਖ਼ਬਰ

ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਕੇਂਦਰ ਨੇ ਪੰਜਾਬੀ ਨੂੰ ਜਾਣ ਬੁੱਝ ਕੇ ਖੂੰਜੇ ਲਾਇਆ-ਜਥੇਦਾਰ

ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਸੁਖਬੀਰ ਬਾਦਲ ਵਲੋਂ ਕੈਪਟਨ ‘ਤੇ ‘ਫਿਕਸਡ’ ਮੈਚ ਖੇਡਣ ਦਾ ਦੋਸ਼- ਇਕ ਖ਼ਬਰ

ਅੱਜ ਮੇਰੇ ਅਮਲੀ ਦੇ, ਫੀਮ ਰਗ਼ਾਂ ਵਿਚ ਬੋਲੇ।

ਹਰੀਸ਼ ਰਾਵਤ ਨੇ ਜਾਖੜ ਨਾਲ਼ ਆਪਣੇ ਮੱਤਭੇਦਾਂ ਨੂੰ ਨਕਾਰਿਆ- ਇਕ ਖ਼ਬਰ

ਐਵੇਂ ਈ ਰੌਲ਼ਾ ਪੈ ਗਿਆ, ਬਸ ਐਵੇਂ ਹੀ ਰੌਲ਼ਾ ਪੈ ਗਿਆ।

‘ਫਿਕਸਡ’ ਮੈਚ ਅਕਾਲੀ ਦਲ ਹੀ ਖੇਡ ਸਕਦੈ- ਕੈਪਟਨ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਮੋਦੀ ਦੀ ਕੈਬਨਿਟ ਵਿਚ ਹੁਣ ਸਿਰਫ਼ ਭਾਜਪਾ ਦੇ ਪ੍ਰਤੀਨਿਧ ਹੀ ਰਹਿ ਗਏ-ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਹਰੀਸ਼ ਰਾਵਤ ਅਤੇ ਰਾਹੁਲ ਦੀ ਪੰਜਾਬ ਫੇਰੀ ਨੇ ਕਾਂਗਰਸੀ ਖੇਮੇ ‘ਚ ਮਚਾਈ ਹਲਚਲ- ਇਕ ਖ਼ਬਰ

ਕਾਦਰਯਾਰ ਕਹਿੰਦਾ ਸਲਵਾਨ ਰਾਜਾ, ਪਿੱਛੇ ਕੀ ਕਰਤੂਤ ਕਰ ਆਇਓਂ ਈ।

ਬਾਦਲਾਂ ਨੂੰ ਹਰਾਉਣ ਲਈ ਹਮਖ਼ਿਆਲ ਪਾਰਟੀਆਂ ਇਕ ਮੰਚ ‘ਤੇ ਇਕੱਠੀਆਂ ਹੋਣ- ਟਕਸਾਲੀ ਅਕਾਲੀ

ਚੁੱਕ ਚਰਖ਼ਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾਂ।

05 OCT. 2020

ਰਾਹੁਲ ਗਾਂਧੀ ਨੂੰ ਪੰਜਾਬ ਦੇ ਕਿਸਾਨ ਚੋਣਾਂ ਵੇਲੇ ਯਾਦ ਆਏ- ਚੰਦੂਮਾਜਰਾ
ਤੇ ਤੁਹਾਨੂੰ ਅਸਤੀਫ਼ੇ ਕਿਸਾਨਾਂ ਦੇ ਛਿੱਤ.....ਲਾਹੁਣ ਬਾਅਦ ਹੀ ਯਾਦ ਆਏ।

ਰਾਹੁਲ ਗਾਂਧੀ ਦੀ ਮੌਜੂਦਗੀ ‘ਚ ਨਵਜੋਤ ਸਿੱਧੂ ਕੇਂਦਰ ਖ਼ਿਲਾਫ਼ ਗਰਜਿਆ- ਇਕ ਖ਼ਬਰ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲੀਏ।

 ‘ਕਿਸਾਨ ਮਾਰਚ’ (ਅਸਲ ‘ਚ ਬਾਦਲ ਮਾਰਚ) ‘ਤੇ ਪੁਲਿਸ ਵਲੋਂ ਲਾਠੀਚਾਰਜ ਜਮਹੂਰੀਅਤ ਦਾ ਘਾਣ- ਚੰਦੂਮਾਜਰਾ
ਜਦੋਂ ਤੁਹਾਡੀ ਪੁਲਿਸ ਗੋਲ਼ੀਆਂ ਨਾਲ਼ ਬੰਦੇ ਮਾਰਦੀ ਸੀ, ਉਦੋਂ ਨਾ ਜਮਹੂਰੀਅਤ ਚੇਤੇ ਆਈ ਤੁਹਾਨੂੰ।

ਕਿਸਾਨਾਂ ‘ਤੇ ਮੁਸੀਬਤ ਆਈ ਤਾਂ ਅਕਾਲੀ ਦਲ ਨੇ ਮਾਰੀ ਕੁਰਸੀ ਨੂੰ ਲੱਤ- ਹਰਸਿਮਰਤ ਬਾਦਲ
ਬੀਬੀ ਕਿਉਂ ਕੁਫ਼ਰ ਤੋਲੀ ਜਾਨੀ ਐਂ, ਲੋਕ ਸਭ ਕੁਝ ਜਾਣਦੇ ਐ ਹੁਣ।

ਖੇਤੀ ਕਾਨੂੰਨਾਂ ਵਿਰੁੱਧ ਹਰ ਮੁਹਾਜ਼ ‘ਤੇ ਲੜਾਂਗੇ- ਕੈਪਟਨ
ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।

ਪਰਖ ਦੀ ਘੜੀ ਵੇਲੇ 350 ਐਮ.ਪੀ. ਇਕ ਪਾਸੇ ਦੂਸਰੇ ਪਾਸੇ ਮੈਂ ਤੇ ਹਰਸਿਮਰਤ- ਸੁਖਬੀਰ
ਰਹਿਣ ਦੇ, ਰਹਿਣ ਦੇ ਯਾਰ, ਗਪੌੜਾਂ ਦਾ ਸਾਰਾ ਠੇਕਾ ਤੂੰ ਹੀ ਲੈ ਲਿਐ !

ਸੁਖਬੀਰ ਬਾਦਲ ਦੀਆਂ ਗ਼ਲਤੀਆਂ ਕਰ ਕੇ ਅਕਾਲੀ ਵਰਕਰ ਸ਼ਰਮਿੰਦਗੀ ਮਹਿਸੂਸ ਕਰਨ ਲੱਗੇ- ਪ੍ਰਮਿੰਦਰ ਢੀਂਡਸਾ
ਵਰਕਰ ਹੀ ਵਿਚਾਰੇ ਸ਼ਰਮਿੰਦੇ ਹੁੰਦੇ ਐ, ਇਹਨਾਂ ਪੱਥਰਾਂ ‘ਤੇ ਕੋਈ ਅਸਰ ਨਹੀਂ ਹੋਣਾ।

ਅਕਾਲੀ ਦਲ ਨੇ ਕਿਸਾਨਾਂ ਦੀ ਹਿਤੈਸ਼ੀ ਪਾਰਟੀ ਹੋਣ ਕਾਰਨ ਹੀ ਐਨ.ਡੀ.ਏ. ਨਾਲ਼ੋਂ ਨਾਤਾ ਤੋੜਿਆ- ਹਰਸਿਮਰਤ
ਬੀਬੀ ਜੀ ਆਟੇ ‘ਚ ਲੂਣ ਤਾਂ ਗੁੰਨਿਆ ਜਾ ਸਕਦਾ ਪਰ ਤੂੰ ਤਾਂ ਲੂਣ ਹੀ ਗੁੰਨ੍ਹੀਂ ਜਾਨੀ ਏਂ।

ਅਕਾਲੀ ਦਲ ਵਲੋਂ ਸੰਘੀ ਢਾਂਚੇ ਦੀ ਮਜਬੂਤੀ ਲਈ ਕਮੇਟੀ ਕਾਇਮ- ਸੁਖਬੀਰ
ਪਹਿਲਾਂ ਭਾਪੇ ਨੂੰ ਪੁੱਛ ਉਹਨੇ ਅਨੰਦਪੁਰ ਦਾ ਮਤਾ ਕਿਉਂ ਛੱਡਿਆ ਸੀ।

ਬਾਬਰੀ ਮਸਜਿਦ ਕੇਸ ‘ਚ ਸੱਚ ਅਤੇ ਨਿਆਂ ਦੀ ਜਿੱਤ ਹੋਈ- ਭਾਜਪਾ
ਡਿਕਸ਼ਨਰੀਆਂ ਵਾਲਿਉ ਸੱਚ ਤੇ ਨਿਆਂ ਦੇ ਅਰਥ ਬਦਲ ਦਿਉ ਹੁਣ।

ਸੀ.ਬੀ.ਆਈ. ਜੱਜ ਨੇ ਆਪਣੀ ਸੇਵਾ-ਮੁਕਤੀ ਦੇ ਆਖਰੀ ਦਿਨ ਬਾਬਰੀ ਮਸਜਿਦ ਦੇ ਦੋਸ਼ੀ ਬਰੀ ਕੀਤੇ- ਇਕ ਖ਼ਬਰ
ਲੈ ਬਈ ਸੱਜਣਾ, ਸਿੱਧੀ ਸ਼ੂਟ ਵੱਟ ਲੈ ਰਾਜ ਸਭਾ ਵਲ ਨੂੰ, ਸੀਟ ‘ਵਾਜ਼ਾਂ ਮਾਰਦੀ ਐ।

ਪੰਜਾਬ ਹਮੇਸ਼ਾ ਹੀ ਦਿੱਲੀ ਦੀਆਂ ਅੱਖਾਂ ‘ਚ ਰੜਕਦਾ ਰਿਹੈ- ਹਰਿੰਦਰ ਚਹਿਲ
ਵਾਰਸ ਸ਼ਾਹ ਹਜ਼ਾਰੇ ਦੇ ਚੌਧਰੀ ਨੇ, ਕਾਮਗਤੀ ਦੀ ਚੁੱਕ ਲਈ ਕਾਰ ਯਾਰੋ।

ਕਿਸਾਨ ਜਥੇਬੰਦੀਆਂ ਨੇ ਰਾਹੁਲ ਦੀ ਪੰਜਾਬ ਫੇਰੀ ‘ਤੇ ਸਵਾਲ ਉਠਾਏ- ਇਕ ਖਬਰ
ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਦਰਜਨਾਂ ਸਿਆਸੀ ਆਗੂ ਮੁਕੇਸ਼ ਅੰਬਾਨੀ ਦੇ ਕਾਰੋਬਾਰਾਂ ਦੇ ਡੀਲਰ-ਇਕ ਖਬਰ
ਲੁਕ ਛਿਪ ਲਾਈਆਂ ਪਰਗਟ ਹੋਈਆਂ, ਵੱਜ ਗਏ ਢੋਲ ਨਗਾਰੇ।

ਤਿੰਨ ਸਾਲ ਪਹਿਲਾਂ ਕਾਂਗਰਸ ‘ਚ ਸ਼ਾਮਲ ਹੋਇਆ ਸਿੱਧੂ ਕਾਂਗਰਸ ਪ੍ਰਧਾਨ ਕਿਵੇਂ ਬਣ ਸਕਦੈ?-ਕੈਪਟਨ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

28 Sep. 2020

ਅਕਾਲੀ ਦਲ ਨੇ ਸ਼੍ਰੋਮਣੀ ਕਮੇਟੀ ਨੂੰ ਖੁੱਲ੍ਹੀ ਛੁੱਟੀ ਦਿਤੀ- ਦਲਜੀਤ ਸਿੰਘ ਚੀਮਾ
ਕਿ ਜਿਸ ਦੀ ਮਰਜ਼ੀ ਦਸਤਾਰ ਉਤਾਰੋ ਤੇ ਡਾਂਗਾਂ ਮਾਰੋ।

ਅਖੀਰ ਐਨ.ਡੀ.ਏ. ‘ਚੋਂ ਬਾਹਰ ਹੋਇਆ ਅਕਾਲੀ ਦਲ- ਇਕ ਖ਼ਬਰ
ਬੜੇ ਬੇਆਬਰੂ ਹੋ ਕਰ ਤੇਰੇ ਕੂਚੇ ਸੇ ਹਮ ਨਿਕਲੇ।

ਸੰਸਦ ਮੈਂਬਰਾਂ ਦੇ ਬੰਗਲਿਆਂ ‘ਚ ਚੋਰੀ ਦੀਆਂ ਵਾਰਦਾਤਾਂ- ਇਕ ਖ਼ਬਰ
ਚੋਰਾਂ ਨੂੰ ਮੋਰ।

ਖੇਤੀ ਬਾੜੀ ਬਿਲ ਵਿਚ ਕਿਸਾਨ ਵਿਰੋਧੀ ਕੁਝ ਵੀ ਨਹੀਂ- ਅਸ਼ਵਨੀ ਕੁਮਾਰ
ਖਵਾਜੇ ਦਾ ਗਵਾਹ ਡੱਡੂ।

‘ਚੱਕਾ ਜਾਮ’ ਪ੍ਰੋਗਰਾਮ ‘ਚ ਪਾਰਟੀ ਦੀ ਢਿੱਲੀ ਕਾਰਗੁਜ਼ਾਰੀ ਤੋਂ ਸੁਖਬੀਰ ਖ਼ਫ਼ਾ- ਇਕ ਖ਼ਬਰ
ਸਦਾ ਨਾ ਬਾਗ਼ੀਂ ਬੁਲਬੁਲ ਬੋਲੇ, ਸਦਾ ਨਾ ਬਾਗ਼ ਬਹਾਰਾਂ।

ਕੈਪਟਨ ਨੂੰ ਕਿਸਾਨਾਂ ਦੀ ਏਨੀ ਹੀ ਫਿਕਰ ਹੈ ਤਾਂ ਆਪਣਾ ਅਸਤੀਫ਼ਾ ਦੇਵੇ- ਬੀਬੀ ਬਾਦਲ
ਤੇਰੇ ਅਸਤੀਫ਼ੇ ਨੇ ਕਿਹੜੀ ਕੰਧ ਢਾਅ ਦਿਤੀ ਬੀਬੀ।

ਭਾਜਪਾ ਨਾਲੋਂ ਵੱਖ ਹੋ ਕੇ ਅਕਾਲੀ ਦਲ ਹੁਣ ਦੁੱਧ ਧੋਤਾ ਨਹੀਂ ਹੋ ਗਿਆ- ਸੁਖਜਿੰਦਰ ਸਿੰਘ ਰੰਧਾਵਾ
ਕਾਲੇ ਕਾਂ ਨਾ ਹੋਵਣ ਬੱਗੇ, ਭਾਵੇਂ ਸੌ ਮਣ ਸਾਬਣ ਲੱਗੇ।

ਕਿਸਾਨਾਂ ਨੂੰ ਇਕੱਲਿਆਂ ਛੱਡ ਕੇ ਭੱਜੇ ਕੈਪਟਨ- ਦਲਜੀਤ ਸਿੰਘ ਚੀਮਾ
ਆਪਣੀ ਪੀੜ੍ਹੀ ਹੇਠ ਵੀ ਸੋਟਾ ਫੇਰ ਲਉ ਬਹਿਰੂਪੀਉ।

ਭਰੋਸਾ ਗੁਆ ਚੁੱਕੇ ਆਗੂਆਂ ਦੀ ਅਗਵਾਈ ਨਹੀਂ ਕਬੂਲਦੇ ਪੰਜਾਬ ਦੇ ਲੋਕ- ਭਗਵੰਤ ਮਾਨ
ਇਹਨਾਂ ਸੋਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਅਕਾਲੀ ਦਲ ਨੇ ਗੱਠਜੋੜ ਤੋੜ ਕੇ ਗ਼ਲਤੀ ਕੀਤੀ-ਮਿੱਤਲ
ਤੋੜ ਕੇ ਛੜੇ ਨਾਲ਼ ਯਾਰੀ, ਫਿਰ ਪਛਤਾਵੇਂਗੀ।

ਪ੍ਰਧਾਨ ਮੰਤਰੀ ਅਤੇ ਭਾਜਪਾ ਅਕਾਲੀ ਦਲ ਦੀ ਰੱਤੀ ਵੀ ਪਰਵਾਹ ਨਹੀਂ ਕਰਦੇ- ਕੈਪਟਨ
ਪੱਕੀ ਇੱਟ ਵਰਗਾ ਬਹੁਮੱਤ ਹੁੰਦਿਆਂ ਉਹਨਾਂ ਅਕਾਲੀਆਂ ਤੋਂ ਛਿੱਕੂ ਲੈਣੈ।

ਫਰੀਕੋਟ ਜ਼ਿਲ੍ਹੇ ਦੀ ਭਾਜਪਾ ਦੇ ਉਪ ਪ੍ਰਧਾਨ ਨੇ ਖੇਤੀ ਬਿੱਲਾਂ ਦੇ ਰੋਸ ਵਜੋਂ ਦਿਤਾ ਅਸਤੀਫ਼ਾ-ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਦੇਸ਼ ਨੂੰ ਰੜਕ ਰਹੀ ਹੈ ਮਨਮੋਹਨ ਸਿੰਘ ਦੀ ਕਮੀ- ਰਾਹੁਲ ਗਾਂਧੀ
ਸਰਵਣ ਵੀਰ ਬਿਨਾਂ, ਮੇਰੀ ਰੁਲ਼ਦੀ ਵਣਾਂ ਵਿਚ ਗੱਠੜੀ।

ਅਕਾਲੀਆਂ ਦੇ ਧਰਨਿਆਂ ਨੂੰ ਸਫ਼ਲ ਬਣਾਉ- ਲੌਂਗੋਵਾਲ
ਕਿਸਾਨਾਂ ਦੇ ਧਰਨੇ ਕਹਿੰਦਿਆਂ ਤੇਰੇ ਮੂੰਹ ‘ਚ ਛਾਲੇ ਪੈਦੇ ਸੀ।

ਸਾਰੇ ਇਕਜੁੱਟ ਹੋਣ ਮੈਂ ਅਗਵਾਈ ਕਰਾਂਗਾ- ਅਮਰਿੰਦਰ ਸਿੰਘ
ਰਹਿਣ ਦੇ ਯਾਰ ਗੱਲ ਕਰਦਿਆਂ ਤਾਂ ਤੈਨੂੰ ਸਾਹ ਚੜ੍ਹ ਜਾਂਦੈ।

15 Sep. 2020

ਸੁਮੇਧ ਸੈਣੀ ਦੀ ਗ੍ਰਿਫ਼ਤਾਰੀ ਨੂੰ ਲੈ ਕੇ ਪ੍ਰਸ਼ਾਸਨ ‘ਤੇ ਟਿਕੀਆਂ ਲੋਕਾਂ ਦੀਆਂ ਨਜ਼ਰਾਂ- ਇਕ ਖ਼ਬਰ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਸੁਖਬੀਰ ਬਾਦਲ ਸਪਸ਼ਟ ਕਰੇ ਕਿ ਖੇਤੀ ਆਰਡੀਨੈਂਸ ਕਿਸਾਨ ਪੱਖੀ ਹਨ ਕਿ ਕਿਸਾਨ ਮਾਰੂ- ਬਾਜਵਾ
ਸੱਪ ਦੇ ਮੂੰਹ ‘ਚ ਕਿਰਲੀ, ਖਾਵੇ ਤਾਂ ਕੋਹੜੀ ਛੱਡੇ ਤਾਂ ਕਲੰਕੀ।

ਮਾਲੀ ਸੰਕਟ ਦੇ ਬਾਵਜੂਦ ਦਿੱਲੀ ਕਮੇਟੀ ਥੋਕ ਦੇ ਭਾਅ ਚੇਅਰਮੈਨੀਆਂ ਕਿਉਂ ਵੰਡ ਰਹੀ ਹੈ?- ਜੀ.ਕੇ.
ਜੀ.ਕੇ. ਸਾਬ ਅਲ੍ਹਕ ਵਛੇਰਿਆਂ ਨੂੰ ਖੁੰਡੇ ਨਾਲ ਬੰਨ੍ਹ ਕੇ ਰੱਖਣਾ ਪੈਂਦੈ।

ਕੰਗਨਾ ਰਣੌਤ ਦੇ ਦਫ਼ਤਰ ਨੂੰ ਢਾਉਣ ਵਿਚ ਸੂਬਾ ਸਰਕਾਰ ਦਾ ਕੋਈ ਹੱਥ ਨਹੀਂ- ਸ਼ਰਦ ਪਵਾਰ
ਭਾਈਆ ਪਵਾਰ ਲਗਦੈ ਤੂੰ ਵੀ ਵੱਡੇ ਬਾਦਲ ਦਾ ਜੂਠਾ ਖਾ ਲਿਐ।

ਸ਼੍ਰੋਮਣੀ ਕਮੇਟੀ ਦੇ ਜਨਰਲ ਇਜਲਾਸ ਵਿਚ ਹਰੇਕ ਮੈਂਬਰ ਨੂੰ ਬੋਲਣ ਦਾ ਅਧਿਕਾਰ ਹੋਵੇਗਾ- ਲੌਂਗੋਵਾਲ
ਪਰ ਉਹ ਬੋਲੇਗਾ ਉਹੀ ਜੋ ਉਸ ਨੂੰ ਲਿਖ ਕੇ ਦਿਤਾ ਜਾਵੇਗਾ।

ਕੈਪਟਨ ਦੀ ਲੀਡਰਸ਼ਿੱਪ ‘ਚ ਪੰਜਾਬ ‘ਚ ਤਰੱਕੀ ਦੀ ਰਫ਼ਤਾਰ ਹੋਈ ਸੁਸਤ-ਸੁਖਬੀਰ ਬਾਦਲ
ਤੁਸੀਂ ਹੁਣ ਨੂੰ ਕੈਲੇਫ਼ੋਰਨੀਆਂ ਬਣਾ ਦੇਣਾ ਸੀ।

ਗੁਰੂ ਗ੍ਰੰਥ ਸਾਹਿਬ ਦੇ ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਸਿਆਸਤ ਬੰਦ ਕਰ ਦੇਣੀ ਚਾਹੀਦੀ ਹੈ- ਲੌਂਗੋਵਾਲ
ਤੁਸੀਂ ਭੈੜੀਆਂ ਕਰਤੂਤਾਂ ਬੰਦ ਕਰ ਦਿਉ ਲੋਕ ਸਿਆਸਤ ਕਰਨੀ ਬੰਦ ਕਰ ਦੇਣਗੇ।

ਲੋਕ ਇਨਸਾਫ਼ ਪਾਰਟੀ ਵਲੋਂ ਘੇਰਿਆ ਜਾਵੇਗਾ ਕੈਪਟਨ ਦਾ ਮੋਤੀ ਮਹਿਲ-  ਤਲਵਿੰਦਰ ਸਿੰਘ ਮਾਨ
ਮੋਤੀ ਮਹਿਲ ‘ਚੋਂ ਛਿੱਕੂ ਲੈਣੈ, ਫਾਰਮ ਹਾਊਸ ‘ਤੇ ਜਾਉ ਪਿਆਰਿਓ।

ਪੰਜਾਬ ਸਰਕਾਰ ਨੇ ਨਿਜੀ ਸਕੂਲਾਂ ਨੂੰ ਮਾਨਤਾ ਦੇਣ ਦੀ ਵਿਧੀ ਨੂੰ ਬਣਾਇਆ ਸੁਖਾਲਾ- ਇਕ ਖ਼ਬਰ
ਤਾਂ ਕਿ ਜਿਹੜਾ ਮਰਜ਼ੀ ਲੱਲੀ-ਛੱਲੀ ਸਕੂਲ ਖੋਲ੍ਹ ਕੇ ਮਾਪਿਆਂ ਨੂੰ ਲੁੱਟ ਸਕੇ।

ਕੰਗਨਾ ਦਾ ਬੰਗਲਾ ਢਾਉਣ ਪਿੱਛੇ ਕੋਈ ਲੁਕਵਾਂ ਏਜੰਡਾ ਨਹੀਂ- ਸ਼ਿਵ ਸੈਨਾ
ਐਵੇਂ ਸ਼ੁਗਲ ਸ਼ੁਗਲ ‘ਚ ਮਾਂਜਾ ਫਿਰ ਗਿਆ ਸਾਥੋਂ।

ਸਾਲ ਕੁ ਔਖੇ ਸੌਖੇ ਕੱਟ ਲਉ, ਸੱਤਾ ‘ਚ ਆ ਕੇ ਨਕਸ਼ੇ ਬਦਲ ਦਿਆਂਗੇ-ਸੁਖਬੀਰ ਬਾਦਲ
ਕੁੰਡੀਆਂ ਲਾ ਕੇ ਜਿੰਨੀ ਮਰਜ਼ੀ ਬਿਜਲੀ ਫੂਕਿਓ।

ਸ਼੍ਰੋਮਣੀ ਕਮੇਟੀ ਨੂੰ ਢਾਅ ਲਾਉਣ ਵਾਲੇ ਆਪਣੇ ਮਕਸਦ ‘ਚ ਕਾਮਯਾਬ ਨਹੀਂ ਹੋਣਗੇ- ਲੌਂਗੋਵਾਲ
ਬਰਬਾਦਿ ਗ਼ੁਲਿਸਤਾਂ ਕਰਨੇ ਕੋ ਬਸ ਏਕ ਹੀ ਉੱਲੂ ਕਾਫੀ ਹੈ,
ਹਰ ਸ਼ਾਖ ਪੇ ਉਲੂ ਬੈਠਾ ਹੈ ਅੰਜਾਮੇ- ਗੁਲਿਸਤਾਂ ਕਿਆ ਹੋਗਾ।

ਵਜ਼ੀਫ਼ਾ ਘੁਟਾਲਾ: ਕਾਂਗਰਸ ਹਾਈਕਮਾਂਡ ਨੂੰ ਵੀ ਪੈਸਾ ਮਿਲਿਆ- ਸੁਖਬੀਰ ਬਾਦਲ
ਜਿਹੜੇ ਵਜ਼ੀਫ਼ਾ ਘੁਟਾਲੇ ਤੁਹਾਡੇ ਵੇਲੇ ਹੋਏ, ਉਹਨਾਂ ਦੇ ਪੈਸੇ ਕਿਸ ਨੂੰ ਮਿਲੇ ਸੀ?

ਮੈਂ ਟਰੰਪ ‘ਤੇ ਬਿਲਕੁਲ ਭਰੋਸਾ ਨਹੀਂ ਕਰਦੀ-ਕਮਲਾ ਹੈਰਿਸ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਕੋਝੀ ਸਿਆਸਤ ਕਰਨ ਵਾਲ਼ੇ ਕਾਮਯਾਬ ਨਹੀਂ ਹੋਣਗੇ- ਸ਼ਰਨਜੀਤ ਢਿੱਲੋਂ
ਉਲਟਾ ਚੋਰ ਕੋਤਵਾਲ ਕੋ ਡਾਂਟੇ।