07 Oct. 2019

ਹਿੰਦੀ ਭਾਸ਼ਾ ਵਿਵਾਦ ਮਗਰੋਂ ਮੋਦੀ ਵਲੋਂ ਤਾਮਿਲ ਭਾਸ਼ਾ ਦੀਆਂ ਸਿਫ਼ਤਾਂ- ਇਕ ਖ਼ਬਰ
ਗੰਗਾ ਗਏ ਗੰਗਾ ਰਾਮ, ਜਮਨਾ ਗਏ ਜਮਨਾ ਦਾਸ।

ਪ੍ਰਤਾਪ ਸਿੰਘ ਬਾਜਵਾ ਖ਼ਿਲਾਫ਼ ਲਾਮਬੰਦ ਹੋਣ ਲੱਗੇ ਕਾਂਗਰਸੀ ਆਗੂ- ਇਕ ਖ਼ਬਰ
ਗਿੱਟਿਆਂ ਤੋਂ ਛਾਂਗ ਸੁੱਟਣਾ, ਅਸੀਂ ਆਪਣੇ ਬਰੋਬਰ ਕਰਨਾ।

ਸ਼੍ਰੋਮਣੀ ਕਮੇਟੀ ਨਾਲ ਮੱਤਭੇਦ ਨਹੀਂ, ਅਕਾਲੀ ਦਲ ਨਾਲ਼ ਜ਼ਰੂਰ ਹਨ-ਸੁਖਜਿੰਦਰ ਸਿੰਘ ਰੰਧਾਵਾ
ਮੈਨੂੰ ਦਿਉਰ ਤੋਂ ਡਰ ਨਾ ਕੋਈ, ਜੇਠ ਭੈੜਾ ਰਹੇ ਘੂਰਦਾ।

ਬਾਬਾ ਨਾਨਕ ਜੀ ਦੇ ਪ੍ਰਕਾਸ਼ ਪੁਰਬ ਦੇ ਸਮਾਗਮ ਸਮੇਂ ਸਟੇਜ ਉੱਪਰ ਕੋਈ ਕੁਰਸੀ ਨਹੀਂ ਲੱਗੇਗੀ- ਲੌਂਗੋਵਾਲ
ਮੰਨਿਆਂ ਨਹੀਂ ਲੱਗਣਗੀਆਂ ਸਟੇਜ 'ਤੇ ਕੁਰਸੀਆਂ ਪਰ ਧੌਣਾਂ 'ਚ ਅੜੀਆਂ ਹੋਈਆਂ ਦਾ ਕੀ ਕਰੋਗੇ?

ਤਿਹਾੜ ਜੇਲ੍ਹ 'ਚ ਬੰਦ ਚਿਦੰਬਰਮ ਨੇ ਮੋਦੀ ਸਰਕਾਰ ਨੂੰ ਕੀਤਾ ਸਵਾਲ- ਇਕ ਖ਼ਬਰ
ਕਿਉਂ ਕਰਦਾਂ ਏਂ ਬਦੀਆਂ, ਕੈ ਦਿਨ ਦੀ ਜ਼ਿੰਦਗਾਨੀ?

ਸੰਗਤ ਦੀ ਕਚਹਿਰੀ ਵਿਚ ਬਾਦਲਾਂ ਦੇ ਪੋਤੜੇ ਫਰੋਲਾਂਗੇ-ਜੀ.ਕੇ.
ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

ਅਕਾਲੀ ਭਾਜਪਾ ਦਾ ਰਿਸ਼ਤਾ ਚੱਟਾਨ ਦੀ ਤਰ੍ਹਾਂ ਮਜਬੂਤ- ਸ਼ਵੇਤ ਮਲਿਕ
ਪੰਜਾਬ 'ਚ ਚੱਟਾਨ ਤੇ ਹਰਿਆਣੇ 'ਚ ਗੋਹਾ।

ਵੈਸ਼ਨੋ ਦੇਵੀ ਪਹੁੰਚੇ ਨਵਜੋਤ ਸਿੱਧੂ ਨਾਲ ਸ਼ਿਵ ਸੈਨਿਕਾਂ ਨੇ ਕੀਤੀ ਧੱਕਾ-ਮੁੱਕੀ- ਇਕ ਖ਼ਬਰ
ਰਾਹੀਆਂ ਨੇ ਰਾਤ ਕੱਟਣੀ, ਤੇਰੀ ਚੁੱਕ ਨਾ ਮਸੀਤ ਲਿਜਾਣੀ।

ਪੰਜਾਬ ਕਾਂਗਰਸ ਦੇ ਬਹੁਤੇ ਆਗੂ ਭਾਜਪਾ 'ਚ ਆਉਣ ਲਈ ਕਾਹਲ਼ੇ- ਸ਼ਵੇਤ ਮਲਿਕ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਹਰਿਆਣਾ 'ਚ ਅਕਾਲੀ ਦਲ ਨੇ ਬਲਕੌਰ ਸਿੰਘ ਦੇ ਬਦਲੇ ਭਾਜਪਾ ਦੇ ਹਲਕਾ ਇੰਚਾਰਜ ਨੂੰ ਪੱਟ ਲਿਆ-ਇਕ ਖ਼ਬਰ
ਮੁੰਡਾ ਕੱਚੀ ਉਮਰੇ ਕਮਾਲ ਕਰ ਗਿਆ ਨੀਂ, ਸੁੱਤੀ ਪਈ ਦੇ ਸਿਰ੍ਹਾਣੇ ਰੁਮਾਲ ਧਰ ਗਿਆ ਨੀਂ।

ਦੁਨੀਆਂ ਦੀ ਕੋਈ ਤਾਕਤ ਚੀਨ ਨੂੰ ਅੱਗੇ ਵਧਣ ਤੋਂ ਰੋਕ ਨਹੀਂ ਸਕਦੀ-ਜ਼ਿੰਨਪਿੰਗ
ਬੱਚੀਆਂ ਪਾਉਂਦਾ ਰਹਿੰਦਾ, ਨੀਂ ਮੁੰਡਾ ਮੁਟਿਆਰ ਦੀਆਂ।

ਹਰਿਆਣਾ ਵਿਚ ਅਕਾਲੀਆਂ ਨੇ ਇਨੈਲੋ ਨਾਲ਼ ਕੀਤਾ ਗੱਠਜੋੜ- ਇਕ ਖ਼ਬਰ
ਮਰਦੀ ਨੇ ਅੱਕ ਚੱਬਿਆ, ਹਾਰ ਕੇ ਜੇਠ ਨਾਲ਼ ਲਾਈਆਂ।

ਬਾਦਲਾਂ ਦੇ ਫ਼ੈਸਲੇ 'ਤੇ ਕੈਪਟਨ ਸਰਕਾਰ ਨੇ ਫੁੱਲ ਚੜ੍ਹਾਏ-ਇਕ ਖ਼ਬਰ
ਸੱਦੀ ਹੋਈ ਮਿੱਤਰਾਂ ਦੀ, ਨੀਂ ਮੈਂ ਪੈਰ ਜੁੱਤੀ ਨਾ ਪਾਵਾਂ।

ਰਾਹੁਲ ਦੇ ਹਟਣ ਨਾਲ ਯੂਥ ਕਾਂਗਰਸ ਦੀ ਬਹੁਤੀ ਪੁੱਛ ਨਾ ਰਹੀ-ਇਕ ਖ਼ਬਰ
ਚੁੱਕ ਚਾਦਰਾ ਚਰ੍ਹੀ ਵਿਚ ਚਲੀਏ, ਮੱਕੀ ਵਿਚ ਪੱਛ ਲੜਦੇ।

ਪੁਲਿਸ ਦਾ ਮੁਢਲਾ ਫਰਜ਼ ਜੰਨਤਾ ਨੂੰ ਇਨਸਾਫ਼ ਤੇ ਕਾਨੂੰਨੀ ਕਦਰਾਂ ਕੀਮਤਾਂ ਦੀ ਬਰਕਰਾਰੀ-ਪ੍ਰਕਾਸ਼ ਸਿੰਘ ਬਾਦਲ
ਨੌਂ ਸੌ ਚੂਹੇ ਖਾ ਕੇ ਬਿੱਲੀ ਹੱਜ ਨੂੰ ਚੱਲੀ। 

30 September 2019

ਟਰੰਪ ਨੇ ਭਾਰਤ ਪਾਕਿ ਵਿਚੋਲਗੀ ਦੇ ਮੁੱਦੇ 'ਤੇ ਕੱਟਿਆ ਕੂਹਣੀ ਮੋੜ-ਇਕ ਖ਼ਬਰ
ਯਾਰੀ ਲੱਗੀ 'ਤੇ ਲਵਾ 'ਤੇ ਤਖ਼ਤੇ, ਟੁੱਟੀ 'ਤੇ ਚੁਗਾਠ ਪੁੱਟ ਲਈ।

ਪ੍ਰਕਾਸ਼ ਪੁਰਬ ਸਾਂਝੇ ਤੌਰ'ਤੇ ਮਨਾਉਣ ਦੇ ਯਤਨਾਂ ਨੂੰ ਢਾਅ ਲੱਗੀ- ਇਕ ਖ਼ਬਰ
ਮੋੜੀਂ ਮੋੜੀਂ ਵੇ ਗੁਲਜ਼ਾਰੀ, ਭੇਡਾਂ ਦੂਰ ਗਈਆਂ।

ਬਾਦਲਾਂ ਨੂੰ ਬਚਾਉਣ ਲਈ ਕਿਸੇ ਹੱਦ ਤੱਕ ਵੀ ਜਾ ਸਕਦੇ ਹਨ ਕੈਪਟਨ- ਖਹਿਰਾ
ਕਾਲ਼ੀ ਗਾਨੀ ਮਿੱਤਰਾਂ ਦੀ, ਰਾਤੀਂ ਟੁੱਟ ਗਈ ਨੀਂਦ ਨਾ ਆਈ।

ਜੇ ਲੋੜ ਲਈ ਤਾਂ ਅਗਲੀਆਂ ਵਿਧਾਨ ਸਭਾ ਚੋਣਾਂ ਵੀ ਲੜਾਂਗਾ- ਕੈਪਟਨ
ਬਈ ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਕਸ਼ਮੀਰ ਮੁੱਦੇ 'ਤੇ ਭਾਰਤ ਨਾਲ਼ ਜੰਗ ਹੋ ਸਕਦੀ ਹੈ-ਇਮਰਾਨ
ਮੌਤੋਂ ਕੀ ਡਰਨਾ, ਬੋਤਾ ਪਾ ਲਿਆ ਚੁੜੇਲਾਂ ਵਾਲ਼ੀ ਸੜਕੇ।

ਹੈਰਾਨ ਹਾਂ ਬਾਦਲਕਿਆਂ ਨੇ ਦਸ ਸਾਲ ਸਰਕਾਰ ਕਿਵੇਂ ਚਲਾਈ-ਕੈਪਟਨ
ਸ਼ੌਂਕ ਗੱਭਰੂਆਂ ਦੇ, ਤੂੰ ਕੀ ਜਾਣਦੀ ਭੇਡੇ।

ਟਰੰਪ ਵਲੋਂ ਮੋਦੀ ਨੂੰ ਭਾਰਤ ਦਾ ਪਿਤਾ ਕਹਿਣ 'ਤੇ ਵਿਵਾਦ-ਇਕ ਖ਼ਬਰ
ਬੋਦੀ ਵਾਲ਼ਾ ਤਾਰਾ ਚੜ੍ਹਿਆ, ਘਰ ਘਰ ਹੋਣ ਵਿਚਾਰਾਂ।

ਦਿੱਲੀ ਤਖ਼ਤ ਅੱਗੇ ਨਹੀਂ ਝੁਕਾਂਗਾ- ਸ਼ਰਦ ਪਵਾਰ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਕਸ਼ਮੀਰ ਬਾਰੇ ਵਿਚੋਲਗੀ ਕਰ ਕੇ ਮੈਂ ਭਾਰਤ ਤੇ ਪਾਕਿ ਦੀ ਮਦਦ ਕਰਨੀ ਚਾਹੁੰਦਾ ਹਾਂ-ਟਰੰਪ
ਇਹ ਤਾਂ ਬਈ ਇੰਜ ਐ ਜਿਵੇਂ ਬਘਿਆੜ ਕਹੇ ਕਿ ਲੇਲਿਆਂ ਦਾ ਜਨਮ ਦਿਨ ਮੈਂ ਮਨਾਉਂ।

ਹਰਿਆਣਾ ਚੋਣਾਂ:ਅਕਾਲੀਆਂ ਤੇ ਭਾਜਪਾ ਦਾ ਗੱਠਜੋੜ ਟੁੱਟਿਆ ਤੜੱਕ ਕਰ ਕੇ- ਇਕ ਖ਼ਬਰ
ਮੇਰੀ ਲਗਦੀ ਕਿਸੇ ਨਾ ਦੇਖੀ ਕਿ ਟੁੱਟਦੀ ਨੂੰ ਜੱਗ ਜਾਣਦਾ।

ਦੇਸ਼ ਆਰਥਕ ਪੱਖੋਂ ਬੇਹਾਲ, ਸਰਕਾਰ ਤਮਾਸ਼ੇ ਵਿਚ ਮਸਤ-ਕਮਿਊਨਿਸਟ ਨੇਤਾ ਯੇਚੁਰੀ
ਸਿਆਲ਼ਾਂ ਦੇ ਵਿਹੜੇ ਨਿੰਮ ਜੋ, ਉਹਦੇ ਪੱਤ ਗਏ ਕੁਮਲਾਅ।

ਪੰਜਾਬ ਸਰਕਾਰ ਨੇ ਵਿਦਿਆਰਥੀਆਂ ਦੇ ਫੰਡ ਦੇ ਵਿਆਜ 'ਤੇ ਰੱਖੀ ਅੱਖ- ਇਕ ਖ਼ਬਰ
ਮੂੰਹ ਦਾ ਮਿੱਠੜਾ ਮੁੰਡਾ, ਦਿਲ 'ਚ ਰੱਖੇ ਬੇਈਮਾਨੀ।

ਭਾਜਪਾ ਨੇ ਗੱਠਜੋੜ ਦਾ ਧਰਮ ਤੋੜਿਆ ਅਤੇ ਵਿਸ਼ਵਾਸਘਾਤ ਕੀਤਾ-ਸੁਖਬੀਰ ਬਾਦਲ
ਲਾ ਕੇ ਦੋਸਤੀਆਂ, ਪਾ ਗਈ ਚੁੱਲ੍ਹੇ ਵਿਚ ਪਾਣੀ।

25 September 2019

ਹਰਿਆਣਾ 'ਚ ਅਕਾਲੀ ਤੇ ਭਾਜਪਾ ਮਿਲ ਕੇ ਚੋਣਾਂ ਲੜਨ- ਪ੍ਰਕਾਸ਼ ਸਿੰਘ ਬਾਦਲ
ਕਹੇ ਬਾਣੀਆ ਥੜ੍ਹੇ 'ਤੋਂ ਪਰੇ ਹੋ ਜਾ, ਜੱਟ ਕਹਿੰਦਾ ਘੱਟ ਤੋਲੀਂ ਨਾ।

ਹਿੰਦੀ ਦਿਵਸ 'ਤੇ ਡਾ. ਤੇਜਵੰਤ ਮਾਨ ਨਾਲ਼ ਬਦਕਲਾਮੀ ਕਰਨ ਵਾਲ਼ੇ ਲੇਖ਼ਕਾਂ ਨੇ ਮੰਗੀ ਮੁਆਫ਼ੀ- ਇਕ ਖ਼ਬਰ
ਬੜ੍ਹਕਾਂ ਮਾਰਦੇ ਓ, ਸਾਨ੍ਹ ਹੁੰਨੇ ਆ।ਹੁਣ ਮੋਕ ਮਾਰਦੇ ਓ, ਗਊ ਦੇ ਜਾਏ ਆਂ।

ਨਰਿੰਦਰ ਮੋਦੀ ਵਰਗਾ ਸਮਰੱਥ ਅਤੇ ਸੂਝਵਾਨ ਪ੍ਰਧਾਨ ਮੰਤਰੀ ਨਹੀਂ ਦੇਖਿਆ-ਪ੍ਰਕਾਸ਼ ਸਿੰਘ ਬਾਦਲ
ਤੁਹਾਡੇ ਵਰਗਾ ਵੀ ਲੂੰਬੜ ਮੁੱਖ ਮੰਤਰੀ ਨਹੀਂ ਦੇਖਿਆ ਬਾਦਲ ਸਾਹਿਬ।

ਵਿਤ ਮੰਤਰੀ ਸੀਤਾਰਮਨ ਵਲੋਂ ਕੰਪਨੀਆਂ ਨੂੰ ਡੇਢ ਲੱਖ ਕਰੋੜ ਰੁਪਏ ਦੀਆਂ ਰਿਆਇਤਾਂ- ਇਕ ਖ਼ਬਰ
ਅੰਨ੍ਹਾ ਵੰਡੇ ਰਿਉੜੀਆਂ.........................

'ਹਾਊਡੀ ਮੋਦੀ' ਪ੍ਰੋਗਰਾਮ ਦੇਸ਼ ਦੀ ਮੰਦੀ ਆਰਥਿਕ ਹਾਲਤ ਨੂੰ ਨਹੀਂ ਲੁਕਾ ਸਕਦਾ-ਰਾਹੁਲ ਗਾਂਧੀ
ਨਿੰਮ ਨਾਲ਼ ਝੂਟਦੀਏ, ਤੋਤਾ ਪੀ ਗਿਆ ਗੁਲਾਬੀ ਰੰਗ ਤੇਰਾ।

ਮਕਬੂਜ਼ਾ ਕਸ਼ਮੀਰ ਦੀ ਹੋਂਦ ਲਈ ਨਹਿਰੂ ਜ਼ਿੰਮੇਵਾਰ- ਅਮਿਤ ਸ਼ਾਹ
ਟੁੱਟ ਪੈਣੇ ਦਰਜੀ ਨੇ, ਫਿੱਟ ਸੂਟ ਨਾ ਸੀਤਾ।

80 ਰੁਪਏ ਕਿੱਲੋ ਤੱਕ ਪੁੱਜਿਆ ਗੰਢਿਆਂ ਦਾ ਭਾਅ-ਇਕ ਖ਼ਬਰ
ਮਾਰ ਲੈ ਪੁੱਠੀਆਂ ਛਾਲ਼ਾਂ, 'ਅੱਛੇ ਦਿਨ' ਆ ਗਏ ਮਿੱਤਰਾ।

ਲਿਬਰਲ ਪਾਰਟੀ ਨੂੰ ਜਗਮੀਤ ਸਿੰਘ ਦੀਆਂ ਸ਼ਰਤਾਂ ਪ੍ਰਵਾਨ- ਇਕ ਖ਼ਬਰ
ਤੇਰੀਆਂ ਮੈਂ ਲੱਖ ਮੰਨੀਆਂ, ਮੇਰੀ ਇਕ ਤੂੰ ਮੰਨੇ ਤਾਂ ਜਾਣਾ।

ਨੌਂ ਲੱਖ ਨੌਕਰੀਆਂ ਦੇਣ ਦੇ ਅੰਕੜੇ ਤੋਂ ਭੱਜਣ ਲੱਗੀ ਪੰਜਾਬ ਸਰਕਾਰ- ਇਕ ਖ਼ਬਰ
ਕਿੱਲੀ ਉੱਤੇ ਟੰਗਿਆ ਰਿਹਾ, ਜੱਗੇ ਜੱਟ ਦਾ ਜਾਂਘੀਆ ਪੱਟ ਦਾ।

ਪੰਜਾਬ ਨੂੰ ਬਚਾਉਣ ਲਈ ਲੋਕ ਹੱਕਾਂ ਨੂੰ ਬਚਾਉਣਾ ਜ਼ਰੂਰੀ- ਡਾ. ਜੌਹਲ
ਝਾਕਦੀ ਦੀ ਅੱਖ ਪੱਕ ਗਈ, ਕਦੀ ਪਾ ਵਤਨਾਂ ਵਲ ਫੇਰਾ।

ਉਧਾਰ ਲਏ ਜਹਾਜ਼ ਰਾਹੀਂ ਅਮਰੀਕਾ ਪਹੁੰਚੇ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ- ਇਕ ਖ਼ਬਰ
ਬਾਂਕਾਂ ਨਾ ਜੁੜੀਆਂ, ਰੰਨ ਅੱਡੀਆਂ ਕੂਚਦੀ ਮਰ ਗਈ।

ਭਗਵੇਂ ਕੱਪੜੇ ਪਾ ਕੇ ਲੋਕ ਜਬਰ ਜਨਾਹ ਕਰ ਰਹੇ ਹਨ- ਦਿੱਗਵਿਜੈ ਸਿੰਘ
ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ ,ਜੇ ਮਨ ਰੰਗਿਆ ਨਾ ਜਾਵੇ।

ਹਰਿਆਣਾ 'ਚ ਅਕਾਲੀ ਦਲ ਨਾਲ਼ ਗੱਠਜੋੜ ਸਬੰਧੀ ਭਾਜਪਾ ਨੇ ਖ਼ਾਮੋਸ਼ੀ ਧਾਰੀ- ਇਕ ਖ਼ਬਰ
ਕੁਝ ਬੋਲ ਵੇ ਦਿਲਾਂ ਦੀ ਘੁੰਡੀ ਖੋਲ੍ਹ ਵੇ, ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

ਡੀ.ਸੀ. ਨਾਲ ਮਾਮਲੇ 'ਚ ਬੈਂਸ ਨੂੰ ਰਾਹਤ ਨਹੀਂ, ਜ਼ਮਾਨਤ ਦੀ ਅਪੀਲ ਰੱਦ- ਇਕ ਖ਼ਬਰ
ਬੱਚੀਆਂ ਪਾਉਂਦਾ ਰਹਿੰਦਾ ਨੀਂ, ਮੁੰਡਾ ਮੁਟਿਆਰ ਦੀਆਂ।

ਮੋਦੀ ਲਈ ਹਵਾਈ ਲਾਂਘਾ ਖੋਲ੍ਹਣ ਲਈ ਭਾਰਤ ਦੀ ਅਪੀਲ ਪਾਕਿ ਵਲੋਂ ਰੱਦ- ਇਕ ਖ਼ਬਰ
ਹੱਟੀ ਖੋਲ੍ਹ ਹੱਟੀ ਵਾਲਿਆ, ਸਾਡੇ ਛੜੇ ਨੇ ਪਤਾਸੇ ਲੈੇਣੇ।

ਸਿੱਖ ਕੈਦੀਆਂ ਦੀ ਰਿਹਾਈ ਲਈ ਸੁਖਬੀਰ ਬਾਦਲ ਨੇ ਮੋਦੀ ਨੂੰ ਪੱਤਰ ਲਿਖਿਆ- ਇਕ ਖ਼ਬਰ
ਕਿਉਂ ਪਿਛਲੇ ਦਸ ਸਾਲ ਪੈੱਨ 'ਚੋਂ ਸਿਆਹੀ ਮੁੱਕੀ ਹੋਈ ਸੀ।

16 September 2019

ਆਗਾਮੀ ਚੋਣਾਂ ਵਿਚ ਮਨੋਹਰ ਲਾਲ ਖੱਟੜ ਦੀ ਛੁੱਟੀ ਕਰੇਗੀ ਜੰਤਾ- ਕੁਮਾਰੀ ਸ਼ੈਲਜਾ
ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਦੀ ਜ਼ਮਾਨਤ ਪਟੀਸ਼ਨ ਰੱਦ- ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨੀਂ ਚੱਪਣੀ ਵਗਾਹ ਕੇ ਮਾਰੀ।

ਮੈਨੂੰ ਅਰਥਚਾਰੇ ਦੀ ਚਿੰਤਾ, ਰੱਬ ਦੇਸ਼ ਦੀ ਰਾਖੀ ਕਰੇ- ਚਿਦੰਬਰਮ
ਨਿੱਤ ਖ਼ੈਰ ਮੰਗਾਂ ਸੋਹਣਿਆਂ ਮੈਂ ਤੇਰੀ, ਦੁਆ ਨਾ ਕੋਈ ਹੋਰ ਮੰਗਦੀ।

ਅਕਾਲ ਤਖ਼ਤ ਨੂੰ ਕਮਜ਼ੋਰ ਕਰਨ ਦੇ ਯਤਨ 'ਚ ਹੈ ਕੈਪਟਨ ਸਰਕਾਰ- ਹਰਸਿਮਰਤ ਬਾਦਲ
ਅਕਾਲ ਤਖ਼ਤ 'ਚ ਤਾਂ ਬੀਬੀ ਜੀ ਤੁਸੀਂ ਪਹਿਲਾਂ ਹੀ ਕੁਝ ਨਹੀਂ ਛੱਡਿਆ।

ਹੁੱਡਾ ਅਤੇ ਮਾਇਆਵਤੀ ਦੀ ਬੰਦ ਕਮਰਾ ਮੀਟਿੰਗ- ਇਕ ਖ਼ਬਰ
ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਸਿਹਤ ਖ਼ਰਾਬ ਹੋਣ ਕਾਰਨ ਹਨੀਪ੍ਰੀਤ ਅਦਾਲਤ 'ਚ ਹਾਜ਼ਰ ਨਹੀਂ ਹੋ ਸਕੀ- ਇਕ ਖ਼ਬਰ
ਮਾਏਂ ਮੇਰਾ ਢਿੱਡ ਦੁਖ਼ਦਾ, ਨਾਲ਼ੇ ਅੱਜ ਮੇਰਾ ਮੂਡ ਖ਼ਰਾਬ।

ਕੈਂਟਰਬਰੀ ਦੇ ਆਰਚਬਿਸ਼ਪ ਨੇ ਜੱਲ੍ਹਿਆਂਵਾਲ਼ਾ ਬਾਗ਼ ਦੇ ਸਾਕੇ ਲਈ ਮੰਗੀ ਮਾਫ਼ੀ-ਇਕ ਖ਼ਬਰ
ਨਹੀਉਂ ਲੱਭਣੇ ਲਾਲ ਗੁਆਚੇ, ਮਿੱਟੀ ਨਾ ਫ਼ਰੋਲ ਜੋਗੀਆ।

ਪੰਜਾਬ ਸਰਕਾਰ ਵਲੋਂ 550 ਸਾਲਾ ਪ੍ਰਕਾਸ਼ ਉਤਸਵ ਦੇ ਇਸ਼ਤਿਹਾਰ ਅੰਗਰੇਜ਼ੀ ਵਿਚ-ਇਕ ਖ਼ਬਰ
ਪੂਛ ਕੁੱਤੇ ਦੀ ਕਦੇ ਨਾ ਹੋਏ ਸਿੱਧੀ, ਸਾਲ ਬਾਰਾਂ ਚਾਹੇ ਰੱਖੀਏ ਵਿਚ ਨੌਲ਼ਕੇ ਜੀ।

ਕਾਨਪੁਰ ਸਿੱਖ ਕਤਲੇਆਮ ਕੇਸਾਂ ਦੀਆਂ ਅਹਿਮ ਫ਼ਾਈਲਾਂ ਗੁੰਮ-ਇਕ ਖ਼ਬਰ
ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਚੋਣਾਂ ਦਾ ਬਿਗਲ ਵੱਜਦਿਆਂ ਹੀ ਕੈਨੇਡਾ ਦੀ ਸਿਆਸਤ ਭਖਣ ਲੱਗੀ- ਇਕ ਖ਼ਬਰ
ਗਲ਼ੀ ਦੇ ਵਿਚੋਂ ਲੰਘੀ ਹੱਸ ਕੇ, ਪੈੜ ਨੱਪਦੇ ਫਿਰਨ ਪਟਵਾਰੀ।   

ਯੂ.ਕੇ. ਦੇ ਸਾਬਕਾ ਪ੍ਰਧਾਨ ਮੰਤਰੀ ਕੈਮਰਨ ਨੂੰ ਬ੍ਰੈਗਜ਼ਿੱਟ ਰੈਫ਼ਰੈਂਡਮ ਕਰਵਾਉਣ ਦਾ ਅਫ਼ਸੋਸ- ਇਕ ਖ਼ਬਰ
ਟੁੱਟ ਗਈ ਯਾਰੀ ਤੋਂ, ਰਹਿੰਦੀ ਉਮਰ ਦੇ ਹਾਵੇ।

ਸਰਕਾਰ ਨੂੰ ਆਰਥਿਕ ਮੰਦੀ ਦਾ ਅਹਿਸਾਸ ਹੀ ਨਹੀਂ- ਡਾ. ਮਨਮੋਹਨ ਸਿੰਘ
ਕੰਤ ਨਿਆਣੇ ਨੂੰ, ਦੱਸੋ ਕਿਵੇਂ ਸਮਝਾਵਾਂ।

ਅਕਾਲੀ ਦਲ ਅਤੇ ਭਾਜਪਾ 'ਚ ਮੈਂਬਰ ਬਣਾਉਣ ਦੀ ਦੌੜ- ਇਕ ਖ਼ਬਰ
ਦੁੱਧ ਰਿੜਕੇ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲ਼ਾ ਧਾਰ ਕੱਢਦਾ।

ਬੈਂਸ ਨੇ ਵਿਧਾਨ ਸਭਾ ਦੇ ਸਪੀਕਰ ਕੋਲ਼ ਕੀਤੀ ਡੀ.ਸੀ. ਦੀ ਸ਼ਿਕਾਇਤ- ਇਕ ਖ਼ਬਰ
ਤੈਨੂੰ ਨਜ਼ਰ ਨਹੀਂ ਆਉਂਦੀ ਫ਼ਕਰਦੀਨਾਂ, ਬੁਲਬੁਲ ਲੁੱਟ ਕੇ ਬਾਗ਼ ਨੂੰ ਖਾਂਵਦੀ ਏ।

ਸੰਸਦੀ ਰਵਾਇਤਾਂ ਸਿੱਖਣ ਲਈ ਵਿਧਾਇਕਾਂ ਨੂੰ ਵਿਦੇਸ਼ ਭੇਜਿਆ ਜਾਵੇਗਾ- ਇਕ ਖ਼ਬਰ
ਜਿੱਥੋਂ ਮਰਜ਼ੀ ਵੰਙਾਂ ਚੜ੍ਹਵਾ ਲੈ, ਮਿੱਤਰਾਂ ਦਾ ਨਾਂ ਚਲਦਾ।

10 September 2019

ਸਿੱਖ ਕੌਮ ਨਾ ਹੁੰਦੀ ਤਾਂ ਭਾਰਤ ਦਾ ਸਭਿਆਚਾਰ ਸੁਰੱਖਿਅਤ ਨਾ ਹੁੰਦਾ- ਰਾਜਨਾਥ ਸਿੰਘ
ਸਉਣ ਮਹੀਨੇ ਲੁੱਟਦੇ ਬਾਣੀਏ, ਨਵੀਆਂ ਹੱਟੀਆਂ ਪਾ ਕੇ।

ਬੇਅਦਬੀ ਦੇ ਦੋਸ਼ੀਆਂ ਨੂੰ ਬਚਾਉਣ ਲਈ ਬਾਦਲ ਪਰਵਾਰ ਜ਼ਿੰਮੇਵਾਰ- ਰਾਜ ਕੁਮਾਰ ਵੇਰਕਾ
ਨੀਂ ਛੜੇ ਅੱਜ ਭਜਨ ਕੁਰੇ, ਹੋ ਕੇ ਸ਼ਰਾਬੀ ਬੁੱਕਦੇ।

ਭਾਜਪਾ ਪ੍ਰਧਾਨ ਸ਼ਵੇਤ ਮਲਿਕ ਨੇ ਇਕੱਲਿਆਂ ਹੀ ਚੋਣਾਂ ਲੜਨ ਦੇ ਸੰਕੇਤ ਦਿਤੇ-ਇਕ ਖ਼ਬਰ
ਘੜਾ ਚੁੱਕ ਲਊਂ ਪੱਟਾਂ 'ਤੇ ਹੱਥ ਧਰ ਕੇ, ਖ਼ਸਮਾਂ ਨੂੰ ਖਾਣ ਕੁੜੀਆਂ।

ਹਨੀਪ੍ਰੀਤ ਦੀ ਜ਼ਮਾਨਤ ਅਰਜ਼ੀ ਹਾਈ ਕੋਰਟ ਵਲੋਂ ਖ਼ਾਰਜ-ਇਕ ਖ਼ਬਰ
ਮੈਂ ਤਾਂ ਹੋ ਗਈ ਹਕੀਮ ਜੀ ਅੱਗੇ ਨਾਲੋਂ ਤੰਗ।

ਟਰੰਪ ਨੇ ਰੱਦ ਕੀਤੀ ਤਾਲਿਬਾਨ ਨਾਲ਼ ਸ਼ਾਂਤੀ ਵਾਰਤਾ- ਇਕ ਖ਼ਬਰ
ਨਹੀਂ ਨਿਭਣੀ ਦਿਲਦਾਰਾ, ਕਰ ਲੈ ਮੋੜ ਮੁੜਾਈਆਂ।

ਕਿਧਰ ਜਾਣ ਕਾਮੇ: ਆਰਥਕ ਮੰਦੀ ਨੇ ਚਾਹ ਵੇਚਣ ਲਾਏ ਫੋਰਮੈਨ- ਇਕ ਖ਼ਬਰ
ਹੌਸਲਾ ਨਾ ਛੱਡਣ, ਕੀ ਪਤਾ ਕੱਲ੍ਹ ਕਲੋਤਰ ਨੂੰ ਪ੍ਰਧਾਨ ਮੰਤਰੀ ਹੀ ਬਣ ਜਾਣ।

ਮੰਦੀ ਬਾਰੇ ਸਰਕਾਰ ਦੀ ਖ਼ਾਮੋਸ਼ੀ ਖ਼ਤਰਨਾਕ- ਪ੍ਰਿਅੰਕਾ ਗਾਂਧੀ
ਕੁਝ ਬੋਲ ਵੇ ਦਿਲਾਂ ਦ ਘੁੰਡੀ ਖੋਲ੍ਹ ਵੇ ਕਿ ਅੱਧੀ ਰਾਤੋਂ ਰਾਤ ਟੱਪ ਗਈ।

ਭਾਰਤ ਆਤਮ ਰੱਖਿਆ ਲਈ ਬਲ ਦਾ ਪ੍ਰਯੋਗ ਕਰਨ ਤੋਂ ਗੁਰੇਜ਼ ਨਹੀਂ ਕਰੇਗਾ- ਰਾਜਨਾਥ ਸਿੰਘ
ਬੰਤੋ ਨਾਰ ਬਦਲੇ, ਜੱਗੇ ਜੱਟ ਦੀ ਗੰਡਾਸੀ ਖੜਕੇ।

ਬ੍ਰੈਗਜ਼ਿੱਟ ਮੁੱਦਾ: ਬਰਤਾਨਵੀ ਪ੍ਰਧਾਨ ਮੰਤਰੀ ਨੂੰ ਸੰਸਦ ਵਿਚ ਦੂਜਾ ਝਟਕਾ-ਇਕ ਖ਼ਬਰ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਤਿਹਾੜ ਜੇਲ੍ਹ 'ਚ ਹਲਕੇ ਨਾਸ਼ਤੇ ਨਾਲ ਚਿਦੰਬਰਮ ਨੇ ਕੀਤੀ ਦਿਨ ਦੀ ਸ਼ੁਰੂਆਤ- ਇਕ ਖ਼ਬਰ
ਨਰਮ ਸਰੀਰਾਂ ਨੂੰ, ਪੈ ਗਏ ਮਾਮਲੇ ਭਾਰੀ।

ਅਲਕਾ ਲਾਂਬਾ ਮੁੜ ਕਾਂਗਰਸ ਦੀ ਝੋਲ਼ੀ 'ਚ ਪਹੁੰਚ ਗਈ - ਇਕ ਖ਼ਬਰ
ਰੋਹੀ ਵਾਲ਼ੀ ਜੰਡ ਵੱਢ ਕੇ, ਮੈਨੂੰ 'ਕੱਲੀ ਨੂੰ ਚੁਬਾਰਾ ਪਾ ਦੇ।

ਅਰਥਚਾਰੇ ਨੂੰ ਤਬਾਹ ਕਰ ਕੇ ਚੁੱਪ ਬੈਠੀ ਹੈ ਸਰਕਾਰ- ਪ੍ਰਿਯੰਕਾ ਗਾਂਧੀ
ਭਿੱਜ ਗਈਆਂ ਨਣਾਨੇ ਪੂਣੀਆਂ, ਰੰਗਲੇ ਭਿੱਜ ਗਏ ਚਰਖ਼ੇ।

ਸੁਨੀਲ ਜਾਖੜ ਬਣੇ ਰਹਿਣਗੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ- ਸੋਨੀਆ ਗਾਂਧੀ
ਭਗਤੇ ਨੂੰ ਖੰਡ ਪਾ ਦਿਓ, ਐਰ ਗ਼ੈਰ ਨੂੰ ਸ਼ੱਕਰ ਦਾ ਦਾਣਾ।

ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਸਬੰਧੀ ਜਾਂਚ ਸਬ-ਕਮੇਟੀ ਦੀ ਇਕੱਤ੍ਰਤਾ ਭਲਕੇ-ਇਕ ਖ਼ਬਰ
ਉਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਗਊ ਮੂਤਰ ਨਾਲ਼ ਬਣੀਆਂ ਦਵਾਈਆਂ ਨਾਲ਼ ਬੁੱਧੀਮਾਨ ਬੱਚੇ ਪੈਦਾ ਹੋਣਗੇ- ਭਾਜਪਾ ਨੇਤਾ
ਬੱਕਰੀ ਨੂੰ ਊਠ ਜੰਮਿਆਂ, ਸਹੁੰ ਰੱਬ ਦੀ ਝੂਠ ਨਾ ਬੋਲਾਂ।

ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਗੁਰਬਾਣੀ ਦੇ ਗੁਟਕਿਆਂ ਤੇ ਵਪਾਰਕ ਇਸ਼ਤਿਹਾਰ ਛਾਪ ਕੇ ਕੀਤੀ ਨਿਰਾਦਰੀ-ਇਕ ਖ਼ਬਰ
ਵਪਾਰੀਆਂ ਹੱਥ ਗੁਰਦੁਆਰੇ, ਜਿਹਨੀਂ ਸਾਰੇ ਅਸੂਲ ਵਿਸਾਰੇ।

02 September 2019

ਸੁਆਮੀ ਦੇ ਕਰਤਾਰ ਪੁਰ ਲਾਂਘੇ ਬਾਰੇ ਦਿਤੇ ਬਿਆਨ ਦੀ ਤਿੱਖੀ ਆਲੋਚਨਾ- ਇਕ ਖ਼ਬਰ
ਬਈ ਆਪਾਂ ਫਲੂਹਾ ਸੁੱਟਣਾ ਸੀ, ਸੁੱਟ ਦਿਤਾ। ਕਰੀ ਜਾਉ ਜੋ ਕਰਨਾ।

ਰਿਜ਼ਰਵ ਬੈਂਕ ਦਾ ਪੈਸਾ ਚੋਰੀ ਨਹੀਂ ਕੀਤਾ-ਸੀਤਾਰਮਨ
ਹੰਗਾਮਾ ਹੈ ਕਿਉਂ ਬਰਪਾ ਰਕਮ ਥੋੜ੍ਹੀ ਲੇ ਲੀ ਹੈ, ਡਾਕਾ ਹੀ ਤੋ ਡਾਲਾ, ਚੋਰੀ ਤੋ ਨਹੀਂ ਕੀ ਹੈ।

ਭਾਸ਼ਾ ਵਿਭਾਗ ਪੰਜਾਬ ਨੇ ਚੇਤੇ 'ਚੋਂ ਵਿਸਾਰਿਆ ਪੰਜਾਬੀ ਭਾਸ਼ਾ ਨੂੰ- ਇਕ ਖ਼ਬਰ
ਰੋਂਦੀ ਮਾਂ ਸੁੰਦਰ ਦੀ ਖੜ੍ਹ ਕੇ, ਕਿਹੜਾ ਦੇਵੇ ਧੀਰਾਂ।

ਹਵਾਈ ਅੱਡੇ 'ਤੇ ਲੋਡਰਾਂ ਨੂੰ ਦਸਤਾਰ ਉਤਾਰਨ ਲਈ ਮਜਬੂਰ ਕਰਨ 'ਤੇ ਲੌਂਗੋਵਾਲ ਵਲੋਂ ਨਿੰਦਾ-ਇਕ ਖ਼ਬਰ
ਕਦੀ ਨਿੰਦਾ ਤੋਂ ਅੱਗੇ ਵੀ ਵਧਿਆ ਕਰੋ ਕੌਮ ਦੇ ਪਹਿਰੇਦਾਰੋ।

ਸਰਕਾਰੀ ਕਾਲਜਾਂ ਵਿਚ ਪ੍ਰੋਫੈਸਰਾਂ ਦੀਆਂ 78% ਫ਼ੀਸਦੀ ਆਸਾਮੀਆਂ ਖ਼ਾਲੀ- ਇਕ ਖ਼ਬਰ
ਰਾਂਝਣਾਂ ਹੀਰ ਵੇ ਤੇਰੀ, ਵਿਚ ਖੇੜਿਆਂ ਦੇ ਰੁਲ਼ ਗਈ।

ਮਨੂੰਵਾਦੀਆਂ ਅਤੇ ਉਹਨਾਂ ਦੇ ਏਜੰਟਾਂ ਨੇ ਬਚਾਏ ਬੇਅਦਬੀਆਂ ਦੇ ਦੋਸ਼ੀ-ਖਾਲੜਾ ਮਿਸ਼ਨ
ਚੁੜੇਲਾਂ ਬਣ ਚੁੰਬੜ ਗਈਆਂ, ਮੈਨੂੰ ਸੱਸ ਤੇ ਨਨਾਣ ਚੰਨਾਂ ਦੋਵੇਂ।

ਤਿੰਨ ਦਹਾਕਿਆਂ ਬਾਅਦ ਵੀ ਪਰਨਾਲ਼ਾ ਉੱਤੇ ਦਾ ਉੱਥੇ- ਹੜ੍ਹਾਂ 'ਤੇ ਟਿੱਪਣੀ
ਹੁਣ ਤਾਂ ਪਰਨਾਲ਼ਾ ਚੋ ਕੇ ਸਿਰਾਂ 'ਚ ਪੈਂਦਾ ਬਈ।

ਪੰਜਾਬ ਅਤੇ ਹਰਿਆਣਾ ਕੋਲ ਉਹਨਾਂ ਦੀ ਰਾਜਧਾਨੀ ਹੋਣ ਦੇ ਨਹੀਂ ਹਨ ਕੋਈ ਸਬੂਤ-ਇਕ ਖ਼ਬਰ
ਯਾਨੀ ਕਿ ਦੋਵਾਂ ਬਿੱਲੀਆਂ ਦੀ ਰੋਟੀ ਹੁਣ ਬਾਂਦਰ ਖਾਵੇਗਾ।

ਮੋਦੀ ਦੀ ਸ਼ਲਾਘਾ ਕਰਨ ਲਈ ਕਾਂਗਰਸ ਨੇ ਸ਼ਸ਼ੀ ਥਰੂਰ ਤੋਂ ਸਪਸ਼ਟੀਕਰਨ ਮੰਗਿਆ- ਇਕ ਖ਼ਬਰ
ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਸੌਦਾ ਸਾਧ ਦੀ ਚੇਲੀ ਵਿਪਾਸਨਾ ਅਤਿ-ਲੋੜੀਂਦੇ ਅਪਰਾਧੀਆਂ ਦੀ ਸੂਚੀ 'ਚੋਂ ਬਾਹਰ- ਇਕ ਖ਼ਬਰ
ਕੌਣ ਕੱਤੇ ਮੇਰਾ ਚਰਖ਼ਾ ਨੀਂ ਮਾਏ, ਤ੍ਰਿੰਞਣਾਂ ਦਾ ਸਰਦਾਰ ਨੀਂ ਮਾਏਂ।

ਹਰੇਕ ਕੌਮਾਂਤਰੀ ਮੰਚ 'ਤੇ ਕਸ਼ਮੀਰ ਮਸਲਾ ਉਠਾਵਾਂਗੇ- ਇਮਰਾਨ ਖ਼ਾਨ
ਰਾਂਝਾ ਰਾਂਝਾ ਕਰਦੀ, ਲੱਗ ਕੇ ਨਾਲ਼ ਦੀਵਾਰਾਂ ਦੇ।

ਕਸ਼ਮੀਰ 'ਤੇ ਤੀਜੀ ਧਿਰ ਦੀ ਵਿਚੋਲਗੀ ਪਰਵਾਨ ਨਹੀਂ- ਮੋਦੀ
ਝਗੜਾ ਪੰਜ ਕਨਾਲ਼ਾਂ ਦਾ, ਮੈਨੂੰ ਛੜਾ ਜੇਠ ਤੰਗ ਕਰਦਾ।

ਬਰਗਾੜੀ ਕਾਂਡ ਦੀ ਸਮੁੱਚੀ ਪੜਤਾਲ ਸ਼ੱਕ ਦੇ ਘੇਰੇ 'ਚ ਆਈ- ਇਕ ਖ਼ਬਰ
ਦਾਲ਼ 'ਚ ਕਾਲ਼ਾ ਕਾਲ਼ਾ ਨਹੀਂ, ਸਾਰੀ ਦਾਲ਼ ਹੀ ਕਾਲ਼ੀ ਐ ਬਈ।

ਇਕ ਅਪੀਲ 'ਤੇ ਕਰੋੜਾਂ ਇਕੱਠੇ ਕਰਨ ਵਾਲੇ ਅਕਾਲੀ ਦਲ ਦੀ ਮਾਲੀ ਹਾਲਤ ਮਾੜੀ- ਇਕ ਖ਼ਬਰ
ਮੇਰੇ ਗਲ਼ ਵਿਚ ਖੁੱਲ੍ਹੀਆਂ ਮੀਢੀਆਂ, ਮੇਰਾ ਸਾਲੂ ਹੋਇਆ ਲੰਗਾਰ ਵੇ।

ਮੈਂ ਕਿਸੇ ਰਾਜਸੀ ਪਾਰਟੀ 'ਚ ਸ਼ਾਮਲ ਨਹੀਂ ਹੋ ਰਿਹਾ- ਅਦਾਕਾਰ ਸੰਜੇ ਦੱਤ
ਹੱਥ ਤਾਂ ਤੇਰਾ ਵੀ ਢਾਈ ਕਿੱਲੋ ਤੋਂ ਘੱਟ ਨਹੀਂ ਸੰਜੂ, ਚੁੱਕ ਲੈ ਕੋਈ ਨਲ਼ਕਾ ਨੁਲ਼ਕਾ ਤੂੰ ਵੀ।

ਮੰਤਰਾਲਿਆਂ 'ਚ ਆਪਣੇ ਰਿਸ਼ਤੇਦਾਰਾਂ ਦੀ ਨਿਯੁਕਤੀ ਨਾ ਕਰਨ ਮੰਤਰੀ- ਮੋਦੀ
ਕਰ ਕੇ ਤੇਲੀ ਰੁੱਖਾ ਖਾਈਏ, ਨਹੀਂ ਪੁੱਗਦਾ ਇਹ ਸਾਨੂੰ।

25 August 2019

ਸੁਖਬੀਰ ਬਾਦਲ ਨੇ ਸਿੱਖਾਂ ਵਿਚ ਵੰਡੀਆਂ ਪਾਈਆਂ- ਕੈਪਟਨ
ਨਿੱਤ ਨਵੇਂ ਪੁਆੜੇ ਪਾਉਂਦਾ ਨੀਂ ਮਰ ਜਾਣਾ ਅਮਲੀ।

ਗਊਸ਼ਾਲਾਵਾਂ ਦੇ ਅੰਦਰ ਜਾਣ ਲਈ ਤਰਸਣ ਬਾਹਰ ਖੜ੍ਹੇ ਸਾਨ੍ਹ- ਇਕ ਖ਼ਬਰ
ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਨਰੇਗਾ ਕਰਮਚਾਰੀਆਂ ਦੇ ਮੁਜ਼ਾਹਰੇ 'ਚ ਆਵਾਰਾ ਸਾਨ੍ਹ ਆ ਵੜੇ- ਇਕ ਖ਼ਬਰ
ਗਊਸ਼ਾਲਾਵਾਂ 'ਚ ਵੜਨ ਨਹੀਂ ਦਿੰਦੇ, ਮੁਜ਼ਾਹਰਿਆਂ 'ਚ ਦੁੱਖ ਰੋਈਦਾ।

ਪੰਜਾਬ ਨੂੰ ਹੜ੍ਹ ਪੀੜਤ ਸੂਬਿਆਂ ਦੀ ਸੂਚੀ ਵਿਚ ਸ਼ਾਮਲ ਕਰੇ ਕੇਂਦਰ- ਕੈਪਟਨ
ਮੈਨੂੰ ਪਾਰ ਲੰਘਾ ਵੇ ਘੜਿਆ, ਮਿੰਨਤਾਂ ਤੇਰੀਆਂ ਕਰਦੀ।

ਸਾਨੂੰ ਚੀਨ ਦੀ ਲੋੜ ਨਹੀਂ, ਅਸੀਂ ਉਹਨਾਂ ਤੋਂ ਬਿਨਾਂ ਹੀ ਬੇਹਤਰ ਹਾਂ- ਟਰੰਪ
ਚੁੱਕ ਚਰਖ਼ਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾਂ।

ਭਾਰਤ ਨਾਲ਼ ਗੱਲਬਾਤ ਦੀ ਆਸ ਨਹੀਂ-ਇਮਰਾਨ ਖ਼ਾਨ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਜੀ-7 ਸੰਮੇਲਨ ਤੋਂ ਪਹਿਲਾਂ ਹੀ ਡੋਨਲਡ ਟਰੰਪ ਦਾ ਮੂਡ ਵਿਗੜਿਆ- ਇਕ ਖ਼ਬਰ
ਦੋ ਘੁੱਟ ਪੀ ਕੇ ਦਾਰੂ, ਨੀਂ ਪੈਰ 'ਤੇ ਮੁੱਕਰ ਗਿਆ।

ਭਾਜਪਾ ਤੇ ਅਕਾਲੀਆਂ ਦੇ ਰਲ਼ ਕੇ ਵਿਧਾਨ ਸਭਾ ਦੀਆਂ ਚੋਣਾਂ ਲੜਨ ਦੇ ਆਸਾਰ ਮੁੱਕੇ- ਇਕ ਖ਼ਬਰ
ਅੱਖਾਂ ਗਹਿਰੀਆਂ ਤੇ ਮੁੱਖ ਕੁਮਲਾਏ, ਜਿਹਨਾਂ ਦੇ ਰਾਤੀਂ ਯਾਰ ਵਿਛੜੇ।

ਚੀਨ ਨੇ ਟਰੂਡੋ 'ਤੇ ਦੁਵੱਲੇ ਸਬੰਧ ਖ਼ਰਾਬ ਕਰਨ ਦੇ ਦੋਸ਼ ਲਗਾਏ- ਇਕ ਖ਼ਬਰ
ਮੁੰਡਾ ਜੱਟਾਂ ਦਾ ਬੜਾ ਟੁੱਟ ਪੈਣਾ, ਦੋਹੀਂ ਪਾਸੀਂ ਅੱਖ ਮਾਰਦਾ।

ਰਾਖਵੇਂਕਰਨ 'ਤੇ ਬਹਿਸ ਪਿੱਛੇ ਸੰਘ ਦੇ 'ਮਾੜੇ ਇਰਾਦੇ'-ਪ੍ਰਿਅੰਕਾ ਗਾਂਧੀ   
ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਫ਼ਿਲਹਾਲ ਕਰਤਾਰ ਪੁਰ ਲਾਂਘਾ ਨਹੀਂ ਖੋਲ੍ਹਣਾ ਚਾਹੀਦਾ- ਸੁਬਰਾਮਨੀਅਮ ਸੁਆਮੀ
ਤੂੰ ਨਹੀਂ ਬੋਲਦੀ ਰਕਾਨੇ, ਤੂੰ ਨਹੀਂ ਬੋਲਦੀ ਤੇਰੇ 'ਚ ਤੇਰਾ ਯਾਰ ਬੋਲਦਾ।

ਪਰਤਾਪ ਸਿੰਘ ਬਾਜਵਾ ਨੇ ਪ੍ਰਧਾਨ ਮੰਤਰੀ ਨੂੰ ਪੰਜਾਬ ਨੂੰ ਫੰਡ ਦੇਣ ਦੀ ਅਪੀਲ ਕੀਤੀ-ਇਕ ਖ਼ਬਰ
ਕਦੇ ਸ਼ਾਹਾਂ ਦੀ ਸਰਦਾਰ, ਅੱਜ ਗਲ਼ੀਆਂ 'ਚ ਫਿਰੇ ਮੰਗਦੀ।

ਵਿਰੋਧੀ ਪਾਰਟੀਆਂ ਦਾ ਵਫ਼ਦ ਜੰਮੂ ਕਸ਼ਮੀਰ ਤੋਂ ਬੇਰੰਗ ਵਾਪਸ ਭੇਜਿਆ- ਇਕ ਖ਼ਬਰ
ਪਾਰ ਪੱਤਣੋਂ ਯਾਰ ਨੂੰ ਮਿਲਣਾ, ਪਾਰ ਲੰਘਾ ਦੇ ਘੜਿਆ।

ਬਰਗਾੜੀ ਬੇਅਦਬੀ ਮਾਮਲੇ 'ਚ ਅੜਿੱਕੇ ਡਾਹ ਰਿਹਾ ਹੈ ਅਕਾਲੀ ਦਲ- ਕੈਪਟਨ
ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਪੰਜ ਦਰਜਨ ਕਾਂਗਰਸੀ ਆਗੂਆਂ ਨੂੰ ਸਰਕਾਰੀ ਅਹੁੱਦੇ ਦੇਣ ਨੂੰ ਪ੍ਰਵਾਨਗੀ- ਇਕ ਖ਼ਬਰ
ਭਰ ਲਉ ਝੋਲ਼ੀਆਂ ਮਿੱਤਰੋ, ਮੀਂਹ ਲੱਡੂਆਂ ਦਾ ਪੈਂਦਾ।

ਪੰਜਾਬ 'ਚ ਹੜ੍ਹ ਬੀ.ਬੀ.ਐਮ.ਬੀ. ਦੀ ਨਾਲਾਇਕੀ ਨਾਲ਼ ਆਇਆ- ਸੁਖਪਾਲ ਖਹਿਰਾ
ਤੂੰ ਮੰਨ ਜਾਂ ਨਾ ਮੰਨ ਮਿੱਤਰਾ, ਗੜਬੜ ਹੋ ਗਈ ਲਗਦੀ ਆ।    

13 August 2019

ਸਿਰਸਾ ਸਾਧ ਦੀ ਪੈਰੋਲ ਲਈ ਹਾਈ ਕੋਰਟ 'ਚ ਰਿੱਟ- ਇਕ ਖ਼ਬਰ
ਤੇਰੇ ਵਿਚ ਸਾਰਾ ਬੰਦਿਆ ਕਸੂਰ ਸੀ, ਬੀਜ ਕੇ ਤੇ ਅੱਕ ਭਾਲ਼ਦਾ ਖ਼ਜੂਰ ਜੀ।

ਬਾਗ਼ੀ ਵਿਧਾਇਕਾਂ ਤੇ ਮੰਤਰੀਆਂ ਵਲੋਂ ਨਵਜੋਤ ਸਿੰਘ ਸਿੱਧੂ ਨਾਲ਼ ਗੁਪਤ ਮੀਟਿੰਗਾਂ- ਇਕ ਖ਼ਬਰ
ਟਿੱਲੇ ਜਾਇ ਕੇ ਜੋਗੀ ਦੇ ਹੱਥ ਜੋੜੇ, ਸਾਨੂੰ ਆਪਣਾ ਕਰੋ ਫ਼ਕੀਰ ਮੀਆਂ।

ਬੇਅਦਬੀ ਮਾਮਲਿਆਂ ਦੀ ਜਾਂਚ ਸੁਖਬੀਰ ਦੇ ਦਬਾਅ ਪਿੱਛੋਂ ਭਾਜਪਾ ਨੇ ਬੰਦ ਕਰਵਾਈ- ਕੈਪਟਨ
ਦਿੱਲੀ ਆਖੇ ਦਿਉਰ ਕੁਆਰੇ ਦਾ, ਮੈਂ ਆਖਾ ਨਾ ਮੋੜਾਂ।

ਜੰਮੂ ਕਸ਼ਮੀਰ ਜਾਵਾਂਗੇ, ਰਾਜਪਾਲ ਦੇ ਜਹਾਜ਼ ਦੀ ਜ਼ਰੂਰਤ ਨਹੀਂ-ਰਾਹੁਲ ਗਾਂਧੀ
ਹੀਰ ਖੇੜਿਆਂ ਨਾਲ਼ ਨਾ ਟੁਰੇ ਮੂਲ਼ੇ, ਪਿਆ ਪਿੰਡ ਦੇ ਵਿਚ ਇਹ ਸ਼ੋਰ ਮੀਆਂ।

ਸੱਤਾਧਾਰੀ ਵੱਡੇ ਲੋਕਾਂ ਦੀ ਥਾਂ ਗ਼ਰੀਬ ਲੋਕਾਂ ਲਈ ਨੀਤੀਆਂ ਘੜਨ- ਇਕ ਪੱਤਰਕਾਰ
ਕਮਾਲ ਕਰਦੇ ਹੋ ਇਹ ਕੀ ਮੰਗਿਆ ਹੈ, ਮਾਸ ਇੱਲਾਂ ਦੇ ਆਲ੍ਹਣੇ 'ਚੋਂ ਭਾਲ਼ਦੇ ਹੋ।

ਪੰਜਾਬ ਵਿਚ ਆਈਲੈਟਸ ਦੀ ਹਨ੍ਹੇਰੀ ਨੇ ਕਾਲਜਾਂ ਵਿਚ ਸੁੰਨ ਵਰਤਾਈ- ਇਕ ਖ਼ਬਰ
ਗੈਬੀ ਤੋਤੇ ਨੇ, ਮੇਰੀ ਗੁੱਤ 'ਤੇ ਆਲ੍ਹਣਾ ਪਾਇਆ।

ਸਰੀ, ਕੈਨੇਡਾ ਵਿਖੇ ਕਾਮਾਗਾਟਾ ਮਾਰੂ ਸੜਕ ਦਾ ਰਸਮੀਂ ਉਦਘਾਟਨ- ਇਕ ਖ਼ਬਰ
ਖਾਤਰ ਦੇਸ਼ ਦੀ ਸੀਸ ਕੁਰਬਾਨ ਕੀਤੇ, ਲੱਥੀ ਆਸ਼ਕਾਂ ਦੀ ਪੁੱਠੀ ਖੱਲ ਵੀਰਾ।

ਜਾਅਲੀ ਪਾਸਪੋਰਟ ਨਾਲ਼ 22 ਸਾਲ ਯੂ.ਕੇ.ਰਿਹਾ ਬੰਦਾ ਚੋਰੀ ਕਰਦਾ ਫੜਿਆ ਗਿਆ-ਇਕ ਖ਼ਬਰ
ਪਹਿਨ ਪਚਰ ਕੇ ਚੜ੍ਹ ਗਈ ਪੀਂਘ 'ਤੇ, ਡਿਗ ਪੀ ਹੁਲਾਰਾ ਖਾ ਕੇ।

ਜਹਾਜ਼ ਵਿਚ ਅੱਖਾਂ ਤੱਤੀਆਂ ਕਰਨ ਵਾਲੇ ਪਤੀ ਦਾ ਪਤਨੀ ਵਲੋਂ ਕੁਟਾਪਾ- ਇਕ ਖ਼ਬਰ
ਕਾਹਦੇ ਪਿੱਛੇ ਹੋ ਗਿਉਂ ਸ਼ੁਦਾਈ ਪਾਗਲਾ, ਸ਼ੈਅ ਹੁੰਦੀ ਹੁਸਨ ਪਰਾਈ ਪਾਗਲਾ।

ਚੰਡੀਗੜ੍ਹ ਦੇ ਇਕ ਹੋਟਲ 'ਚ ਦੋ ਕੇਲਿਆਂ ਦਾ ਬਿੱਲ 442 ਰੁਪਏ- ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਕੇਲਿਆਂ ਦਾ ਬਿੱਲ ਵੇਖ ਕੇ।

18 ਸਾਲਾਂ ਤੋਂ ਅਫ਼ਗਾਨਿਸਤਾਨ 'ਚ ਚਲ ਰਹੀ ਲੜਾਈ ਦਾ ਹੱਲ ਚਾਹੁੰਦੈ ਅਮਰੀਕਾ-ਇਕ ਖ਼ਬਰ
ਮੈਂ ਤਾਂ ਮਾਰਿਆ ਵੇਖਦਾ ਮੁਲਕ ਸਾਰਾ, ਵਾਂਗ ਮੋਏ ਕੁੱਤੇ ਧੂਹ ਸੁੱਟਿਆ ਹਾਂ।

ਸਕਾਟਲੈਂਡ 'ਚ ਫਿਰ ਉਠੀ ਯੂ.ਕੇ. ਤੋਂ ਵੱਖ ਹੋਣ ਦੀ ਮੰਗ- ਇਕ ਖ਼ਬਰ
ਬਾਪੂ ਵੇ ਅੱਡ ਹੁੰਨੀ ਆਂ।

06 August 2019

ਕਾਰਗਿਲ ਬਾਰੇ ਫ਼ਿਲਮ 'ਚੋਂ ਸਿੱਖ ਰੈਜਮੈਂਟ ਦੇ ਰੋਲ ਨੂੰ ਕਿਉਂ ਅਣਗੌਲਿਆਂ ਕੀਤਾ ਗਿਆ?- ਮਨਜੀਤ ਸਿੰਘ ਜੀ.ਕੇ.
ਖਾਣ ਪੀਣ ਨੂੰ ਬਾਂਦਰੀ, ਧੌਣ ਭਨਾਉਣ ਨੂੰ ਜੁੰਮਾਂ।

ਇਕ ਹਫ਼ਤੇ 'ਚ ਜਿੱਤ ਸਕਦੇ ਹਾਂ ਅਫ਼ਗਾਨ ਜੰਗ- ਟਰੰਪ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਵਿਰੋਧੀ ਧਿਰ ਦੀ ਫੁੱਟ ਕਾਰਨ ਸਰਕਾਰ ਅਹਿਮ ਮੁੱਦਿਆਂ 'ਤੇ ਬਚ ਨਿਕਲੀ-ਇਕ ਖ਼ਬਰ   
ਕੋਇਲਾਂ ਕੂਕਦੀਆਂ, ਖਾਹ ਬਾਗ਼ਾਂ ਦੇ ਮੇਵੇ।

ਨਗਰ ਕੀਰਤਨ ਨੂੰ ਮਿਲ ਰਹੇ ਭਰਵੇਂ ਹੁੰਗਾਰੇ ਕਾਰਨ ਪ੍ਰਬੰਧਕ ਬਾਗੋਬਾਗ਼- ਇਕ ਖ਼ਬਰ
ਸਾਡੀ ਮਿਹਨਤ ਰੰਗ ਲਿਆਈ, ਨੱਕੋ ਨੱਕ ਹੋਈਆਂ ਗੋਲਕਾਂ।

ਕੈਪਟਨ ਆਪਣੇ ਢਾਈ ਸਾਲਾਂ ਦੀ ਇਕ ਵੀ ਪ੍ਰਾਪਤੀ ਗਿਣਾਉਣ- ਬੈਂਸ
ਅੰਨ੍ਹੀ ਕੁੱਤੀ, ਜਲੇਬੀਆਂ ਦੀ ਰਾਖੀ।

ਪੰਜਾਬ ਦੇ ਸਰਕਾਰੀ ਸਕੂਲ ਲੈਕਚਰਾਰਾਂ ਤੋਂ ਵਾਂਝੇ- ਇਕ ਖ਼ਬਰ
ਚਰਖ਼ੇ ਦੀ ਘੂਕ ਨਾ ਸੁਣੇ, ਸੁੰਞੇ ਪਏ ਨੇ ਤ੍ਰਿੰਞਣਾਂ ਦੇ ਵਿਹੜੇ।

'ਆਪ' ਵਿਧਾਇਕਾ ਅਲਕਾ ਲਾਂਬਾ ਵਲੋਂ ਜਲਦੀ ਹੀ ਪਾਰਟੀ ਛੱਡਣ ਦੇ ਸੰਕੇਤ- ਇਕ ਖ਼ਬਰ
ਜਿੰਨਾਂ ਨਹਾਤੀ, ਓਨਾ ਹੀ ਪੁੰਨ।

ਬਾਦਲ ਕੈਪਟਨ ਦੇ 'ਫ਼ਰੈਂਡਲੀ ਮੈਚ' 'ਤੇ ਕਾਂਗਰਸੀ ਮੰਤਰੀਆਂ ਤੇ ਵਿਧਾਇਕਾਂ ਨੇ ਵੀ ਲਗਾਈ ਮੋਹਰ- ਭਗਵੰਤ ਮਾਨ
ਜੇਕਰ ਸੂਲੀ ਤੋਂ ਬਚ ਰਹੀ ਜਿੰਦ ਤੇਰੀ, ਬਨਵਾਸ ਜ਼ਰੂਰ ਤੂੰ ਪਾਵਸੇਂ ਵੇ।

ਦਾਦਿਆਂ ਵਲੋਂ ਦਾਇਰ ਕੇਸਾਂ ਦੇ ਫ਼ੈਸਲੇ ਉਡੀਕ ਰਹੇ ਹਨ ਪੋਤੇ- ਇਕ ਖ਼ਬਰ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉਤੋਂ ਬੂਰ ਹਟਾਵਾਂ।

ਚੰਡੀਗੜ੍ਹ 'ਚ ਡੈਪੂਟੇਸ਼ਨ ਦਾ ਮੁੱਦਾ: ਭਾਜਪਾ ਤੇ ਅਕਾਲੀ ਦਲ 'ਚ ਖੜਕੀ-ਇਕ ਖ਼ਬਰ
ਕਾਲਾ ਘੱਗਰਾ ਸੰਦੂਕ ਵਿਚ ਮੇਰਾ, ਦੇਖ ਦੇਖ ਰੋਵੇਂਗਾ ਜੱਟਾ।

ਭਾਰਤ ਨੇ ਸੰਯੁਕਤ ਰਾਸ਼ਟਰ ਦੀ ਰਿਪੋਰਟ 'ਤੇ ਨਾਖ਼ੁਸ਼ੀ ਪ੍ਰਗਟਾਈ- ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਏਸ਼ੀਆ ਵਿਚ ਨਵੀਆਂ ਮਿਜ਼ਾਈਲਾਂ ਤਾਇਨਾਤ ਕਰਨ ਦਾ ਇੱਛੁਕ ਹੈ ਅਮਰੀਕਾ- ਅਮਰੀਕਨ ਰੱਖਿਆ ਮੰਤਰੀ
ਵਾਰਸ ਸ਼ਾਹ ਹੈ ਚੁਗਲ ਦੀ ਸ਼ਕਲ ਕੈਦੋ, ਇਹ ਮੂਲ਼ ਹੈ ਸਭ ਬਖੇੜਿਆਂ ਦਾ।

ਆਪਣੇ ਹੀ ਵਿਧਾਇਕਾਂ ਤੇ ਮੰਤਰੀਆਂ ਦੀ ਨਾਰਾਜ਼ਗੀ ਤੋਂ ਕੈਪਟਨ 'ਚਿੰਤਤ'- ਇਕ ਖ਼ਬਰ
ਸੱਪ ਤੋਂ ਨਾ ਡਰਦੀ ਸ਼ੀਂਹ ਤੋਂ ਨਾ ਡਰਦੀ, ਡਰਦੀ ਸੱਪ ਦੀ ਵਰਮੀ ਤੋਂ।

ਮਹਿਬੂਬਾ ਮੁਫ਼ਤੀ 'ਤੇ ਸ਼ਿਕੰਜਾ: ਬੈਂਕ ਵਿਚ ਨਿਯੁਕਤੀਆਂ ਦੇ ਮਾਮਲੇ 'ਤੇ ਭੇਜਿਆ ਨੋਟਿਸ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਪੰਜਾਬ ਵਿਚ ਉਭਰਨ ਲੱਗਾ ਹੈ 'ਆਪ' ਵਰਗਾ ਤੀਜਾ ਸਿਆਸੀ ਮੰਚ- ਇਕ ਖ਼ਬਰ
ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ, ਵਿਹੜੇ ਲਾ ਤ੍ਰਿਵੈਣੀ।

ਜੱਲ੍ਹਿਆਂਵਾਲਾ ਬਾਗ਼ ਟਰਸਟ ਬੋਰਡ 'ਚੋਂ ਕਾਂਗਰਸ ਪਾਰਟੀ ਨੂੰ ਬਾਹਰ ਕਰਨਾ ਮੰਦਭਾਗਾ- ਮੁਨੀਸ਼ ਤਿਵਾੜੀ
ਨੀਂ ਤੂੰ ਮੰਦਾ ਕੀਤਾ ਈ ਸਾਹਿਬਾਂ, ਮੇਰਾ ਤਰਕਸ਼ ਟੰਗਿਆ ਜੰਡ।

30 July 2019

ਮਿਲਾਵਟੀ ਅਤੇ ਗਲਤ ਬਰਾਂਡ ਦੇ ਭੋਜਨ ਨਮੂਨਿਆਂ 'ਚ ਪੰਜਾਬ ਸਭ ਤੋਂ ਅੱਗੇ- ਇਕ ਖ਼ਬਰ
ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਸੰਨ 2022 ਤੱਕ ਕਿਸਾਨਾਂ ਦੀ ਆਮਦਨ ਦੁੱਗਣੀ ਹੋਣ 'ਤੇ ਸਰਕਾਰ ਨੂੰ ਵੀ ਸ਼ੱਕ- ਇਕ ਖ਼ਬਰ 
ਕਸਮੇਂ, ਵਾਅਦੇ, ਜੁਮਲੇ, ਸ਼ੁਮਲੇ, ਬਾਤੇਂ ਹੈਂ ਬਾਤੋਂ ਕਾ ਕਿਆ।

ਅਫ਼ਸਰੋ ! ਬਾਜ਼ ਆ ਜਾਉ, ਨਹੀਂ ਤਾਂ ਸਖ਼ਤ ਐਕਸ਼ਨ ਲਵਾਂਗੀ- ਮਨੀਸ਼ਾ ਗੁਲਾਟੀ
ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਕੋਠੀ ਦੇ ਬੰਦ ਕਮਰਿਆਂ 'ਚ ਨਵਜੋਤ ਸਿੱਧੂ ਅਗਲੀ ਰਣਨੀਤੀ ਘੜਨ 'ਚ ਰੁਝੇ-ਇਕ ਖ਼ਬਰ
ਕੁੱਲੀ ਨੀਂ ਫ਼ਕੀਰ ਦੀ ਵਿਚੋਂ ਅੱਲਾ ਹੂ ਦਾ ਆਵਾਜ਼ਾ ਆਵੇ।

ਸ਼੍ਰੋਮਣੀ ਕਮੇਟੀ ਵਾਲ਼ੇ ਟਿੱਚ ਜਾਣਦੇ ਹਨ 'ਜਥੇਦਾਰ' ਦੇ 'ਇਲਾਹੀ' ਆਦੇਸ਼ਾਂ ਨੂੰ- ਇਕ ਖ਼ਬਰ
ਸਾਡੀ ਬਿੱਲੀ, ਸਾਨੂੰ ਹੀ ਮਿਆਊਂ?

ਇਮਰਾਨ ਖ਼ਾਨ ਅਮਰੀਕਾ ਨਾਲ਼ ਸਬੰਧਾਂ ਦੇ ਸੁਧਾਰ ਦੇ ਮਕਸਦ ਨਾਲ਼ ਟਰੰਪ ਨਾਲ਼ ਕਰਨਗੇ ਮੁਲਾਕਾਤ- ਇਕ ਖ਼ਬਰ
ਹੋ ਬੂਹੇ ਮੱਲ ਬੈਠੇ, ਭਗਤ ਮਈਆ ਜੀ ਦਰ ਤੇਰੇ 'ਤੇ।

ਟਰੰਪ ਵਲੋਂ ਕਸ਼ਮੀਰ ਮਸਲੇ ਲਈ ਵਿਚੋਲਗੀ ਦੀ ਪੇਸ਼ਕਸ਼-ਇਕ ਖ਼ਬਰ
ਸੱਦੀ ਨਾ ਬੁਲਾਈ, ਮੈਂ ਲਾੜੇ ਦੀ ਤਾਈ।

ਸਿੱਖ ਜਥੇਬੰਦੀਆਂ ਵਲੋਂ ਸਾਂਝਾ ਮੁਹਾਜ਼ ਉਸਾਰਨ ਲਈ ਇਕ ਹੋਰ ਹੰਭਲਾ- ਇਕ ਖ਼ਬਰ
ਝੰਡੇ ਨਿੱਕਲੇ ਕੂਚ ਦਾ ਹੁਕਮ ਹੋਇਆ, ਚੜ੍ਹੇ ਸੂਰਮੇ ਸਿੰਘ ਦਲੇਰ ਮੀਆਂ।

ਪ੍ਰਧਾਨ ਮੰਤਰੀ ਮੋਦੀ ਦੇਸ਼ ਨੂੰ ਦੱਸਣ ਕਿ ਟਰੰਪ ਨਾਲ਼ ਕੀ ਗੱਲ ਹੋਈ ਸੀ?- ਰਾਹੁਲ ਗਾਂਧੀ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਦਰਬਾਰਾ ਗੁਰੂ ਅਤੇ ਇਜ਼ਹਾਰ ਆਲਮ ਬਾਰੇ ਅਕਾਲੀ ਦਲ ਆਪਣਾ ਸਟੈਂਡ ਸਪਸ਼ਟ ਕਰੇ-ਆਪ ਪਾਰਟੀ
ਕੱਚੀਆਂ ਕਲੀਆਂ ਦਾ, ਕੌਣ ਭਰੂ ਹਰਜਾਨਾ।

ਬਾਦਲਾਂ ਵਾਂਗ ਹੀ ਨਾਕਾਮ ਰਹੀ ਕੈਪਟਨ ਸਰਕਾਰ- ਹਰਪਾਲ ਚੀਮਾ
ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਮੁਲਕ ਵਿਚਲੇ ਕਾਲ਼ੇ ਧਨ ਬਾਰੇ ਕੋਈ ਅੰਦਾਜ਼ਾ ਨਹੀਂ- ਵਿੱਤ ਰਾਜ ਮੰਤਰੀ ਅਨੁਰਾਗ ਠਾਕੁਰ
ਰੋਟੀ ਮੇਰਾ ਯਾਰ ਖਾ  ਗਿਆ, ਦਾਣੇ ਚੱਬ ਲਾ ਪਤੀਲੇ ਦਿਆ ਢੱਕਣਾ।

ਕਾਂਗਰਸ ਕਿਸੇ ਵੀ ਕੀਮਤ 'ਤੇ ਛੱਡਾਂਗਾ ਨਹੀਂ- ਸਿੱਧੂ
ਭਗਤੀ ਤੇਰੀ ਪੂਰਨਾ, ਕੱਚੇ ਧਾਗੇ ਦਾ ਸੰਗਲ ਬਣ ਜਾਵੇ।

ਸੁਪਰੀਮ ਕੋਰਟ ਵਲੋਂ 34 ਦੋਸ਼ੀਆਂ ਨੂੰ ਬਰੀ ਕਰਨ 'ਤੇ ਸਮੁੱਚਾ ਅਕਾਲੀ ਦਲ ਬਾਦਲ ਚੁੱਪ ਕਿਉਂ?-ਸਰਨਾ
ਕਬਰਾਂ ਨਾ ਪੁੱਟ ਵੇ, ਨਹੀਂ ਲੱਭਣੀ ਪਰਤਾਪੀ।

ਵਿਜੀਲੈਂਸ ਬਿਊਰੋ ਭ੍ਰਿਸ਼ਟਾਚਾਰ ਦੇ ਖ਼ਾਤਮੇ ਲਈ ਦ੍ਰਿੜ੍ਹ-ਡੀ.ਐੱਸ.ਪੀ.
ਟੁੰਡੀਲਾਟ ਨੇ ਚੁੱਕਿਆ ਆਣ ਬੀੜਾ, ਹਮ ਸਿੰਘ ਸੇ ਜਾਇ ਕੇ ਲੜੇਗਾ ਜੀ।