Chunjhan Ponche

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ


26 ਅਪ੍ਰੈਲ 2021

ਬਰਗਾੜੀ ਕੇਸ ਲਈ ਨੰਦਾ ਵਲੋਂ ਬਾਹਰੋਂ ਲਿਆਂਦੇ ਮਹਿੰਗੇ ਵਕੀਲਾਂ ਬਾਰੇ ਵਾਈਟ ਪੇਪਰ ਜਾਰੀ ਹੋਵੇ- ਬਾਜਵਾ
ਚੋਰਾਂ ਦੇ ਕੱਪੜੇ, ਡਾਂਗਾਂ ਦੇ ਗਜ਼।

ਨਵਜੋਤ ਸਿੱਧੂ ਨੇ ਹੁਣ ਮੁੱਖ ਮੰਤਰੀ ‘ਤੇ ਸੇਧਿਆ ਸਿੱਧਾ ਨਿਸ਼ਾਨਾ- ਇਕ ਖ਼ਬਰ
ਗੰਨਾ ਪੁੱਟ ਕੇ ਸੁਰੈਣਾ ਬੋਲਿਆ, ਜ਼ਿੰਮੀਦਾਰੀ ਐਂ ਭੰਨ ਦਊਂ।

ਨਵੀਂ ਸਿੱਟ ਲੋਕਾਂ ਦੀਆਂ ਅੱਖਾਂ ਪੂੰਝਣ ਤੋਂ ਵੱਧ ਕੁਝ ਨਹੀਂ ਹੋਵੇਗੀ- ਭੋਮਾ
ਅੰਨ੍ਹੀ ਕੁੱਤੀ ਜਲੇਬੀਆਂ ਦੀ ਰਾਖੀ।

ਪਿਛਲੇ ਸਾਲ ਤੋਂ ਵੱਡੀ ਹੈ ਇਸ ਵਾਰ ਕੋਵਿਡ -19 ਦੀ ਚੁਣੌਤੀ- ਮੋਦੀ
ਵਾਹ ਜੀ ਵਾਹ! ਕਮਾਲ ਕਰ ‘ਤੀ ਨਵੀਂ ਗੱਲ ਦੱਸ ਕੇ।

ਪੰਜਾਬ ‘ਚ 2002 ਤੋਂ ਹੁਣ ਤੱਕ ਅਕਾਲੀ ਦਲ ਅਤੇ ਕਾਂਗਰਸ ਦੀ ਸਾਂਝੀ ਸਰਕਾਰ ਚਲ ਰਹੀ ਹੈ- ਹਰਪਾਲ ਚੀਮਾ
ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਜੇ ਸੱਦਾ ਮਿਲਦਾ ਤਾਂ ਮੈਂ ਵੀ ਮੋਦੀ ਵਲੋਂ ਸੱਦੀ ਬੈਠਕ ਵਿਚ ਹਿੱਸਾ ਲੈਂਦੀ- ਮਮਤਾ
ਟੁੱਟ ਪੈਣੇ ਦਰਜੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਕੇਂਦਰ ਸਰਕਾਰ ਦੀ ਟੀਕਾਕਰਨ ਨੀਤੀ ਪੱਖਪਾਤੀ- ਅਮਰਿੰਦਰ ਸਿੰਘ
ਅੰਨ੍ਹਾ ਵੰਡੇ ਰਿਓੜੀਆਂ, ਮੁੜ ਮੁੜ ਆਪਣਿਆਂ ਨੂੰ ਦੇਹ।

ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਨੇ ਐਡਵੋਕੇਟ ਜਨਰਲ ‘ਤੇ ਨਿਸ਼ਾਨਾ ਸਾਧਿਆ- ਇਕ ਖ਼ਬਰ
ਕਾਦਰਯਾਰ ਕਹਿੰਦਾ ਸਲਵਾਨ ਰਾਜਾ, ਪਿੱਛੇ ਕੀ ਕਰਤੂਤ ਕਰ ਆਇਓਂ ਈ।

ਮੰਡੀਆਂ ‘ਚ ਪਈ ਕਣਕ ਮੀਂਹ ‘ਚ ਭਿੱਜੀ- ਇਕ ਖ਼ਬਰ
ਅੱਖੀਂ ਖੋਲ੍ਹ ਗੁਲਾਮ ਰਸੂਲਾ, ਸੱਸੀ ਕੂਕੇ ਲੁੱਟੀ-ਲੁੱਟੀ।

ਸਰਕਾਰ ਦੀਆਂ ਧਮਕੀਆਂ ਦਾ ਕਿਸਾਨੀ ਅੰਦੋਲਨ ‘ਤੇ ਕੋਈ ਅਸਰ ਨਹੀਂ- ਟਿਕੈਤ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਕਨੌੜ ਝੱਲਣੀ।

ਲੋਕ ਰੋ ਰਹੇ ਹਨ ਤੇ ਮੋਦੀ ਰੈਲੀਆਂ ‘ਚ ਹੱਸ ਰਹੇ ਹਨ- ਪ੍ਰਿਯੰਕਾ ਗਾਂਧੀ
ਚਿੜੀਆਂ ਦੀ ਮੌਤ, ਗਵਾਰਾਂ ਦਾ ਹਾਸਾ।

ਸ਼੍ਰੋਮਣੀ ਅਕਾਲੀ ਦਲ ਦੀ ਮਹਿਲਾ ਵਿੰਗ ਦੀ ਜਨਰਲ ਸਕੱਤਰ 1.10 ਕਿੱਲੋ ਹੈਰੋਇਨ ਸਮੇਤ ਗ੍ਰਿਫ਼ਤਾਰ- ਇਕ ਖ਼ਬਰ
ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ , ਜੇ ਮਨ ਰੰਗਿਆ ਨਾ ਜਾਵੇ।

ਬਾਦਲ ਦਲ ਦੇ ਚੋਟੀ ਦੇ ਦੋ ਆਗੂ ਜਲਦੀ ਹੀ ਬ੍ਰਹਮਪੁਰਾ ਤੇ ਢੀਂਡਸਾ ਨਾਲ ਮਿਲ ਸਕਦੇ ਹਨ- ਇਕ ਖ਼ਬਰ
ਚੰਨ ਚੜ੍ਹਿਆ ਟਹਿਕਦੇ ਤਾਰੇ, ਇਕ ਮੰਜੇ ਹੋ ਚਲੀਏ।

ਮਸਲਿਆਂ ਦਾ ਹੱਲ ਕੱਢੋ, ਖੋਖਲੇ ਭਾਸ਼ਨ ਹੀ ਨਾ ਦੇਵੋ- ਰਾਹੁਲ ਗਾਂਧੀ
ਜੇ ਮਾਏਂ ਕੁਝ ਦਿਸਦਾ ਹੋਵੇ, ਥੋੜ੍ਹਾ ਕਰਾਂ ਅੰਦੇਸਾ।

ਪ੍ਰਧਾਨ ਮੰਤਰੀ ਦੇ ਗੁਜਰਾਤ ਮਾਡਲ ਦਾ ਮਤਲਬ ਸਿਰਫ਼ ਮਸ਼ਹੂਰੀ- ਕਾਂਗਰਸ
ਹੋਕਾ ਵੰਙਾਂ ਦਾ, ਕੱਢ ਦਿਖਾਇਆ ਚੱਕੀ ਰਾਹਾ।
 

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

18 ਅਪ੍ਰੈਲ 2021

ਨਿਆਂ ਪਾਲਿਕਾ ਦਾ ਮਜ਼ਾਕ ਉਡਾ ਰਹੇ ਹਨ ਬਾਦਲ ਅਤੇ ਅਮਰਿੰਦਰ- ਹਰਪਾਲ ਚੀਮਾ
ਰਾਂਝੇ ਆਖਿਆ ਸਿਆਲ਼ ਰਲ਼ ਗਏ ਸਾਰੇ, ਤੇ ਹੀਰ ਵੀ ਛੱਡ ਈਮਾਨ ਚੱਲੀ।

ਹਰਿਆਣਾ ਸਰਕਾਰ ਕਿਸਾਨਾਂ ਦੀ ਭਲਾਈ ਲਈ ਹਮੇਸ਼ਾ ਯਤਨਸ਼ੀਲ-ਇਕ ਖ਼ਬਰ
ਕਿਸਾਨਾਂ ਦੀ ਆਮਦਨ ਦੁੱਗਣੀ ਕਰਨ ਤੋਂ ਬਾਅਦ ਹੁਣ ਆਮਦਨ ਤਿੱਗਣੀ ਕੀਤੀ ਜਾਵੇਗੀ।

ਹਾਈ ਕੋਰਟ ਦੇ ਫ਼ੈਸਲੇ ਤੇ ‘ਜਥੇਦਾਰ’ ਅਤੇ ਸ਼੍ਰੋਮਣੀ ਕਮੇਟੀ ਚੁੱਪ ਕਿਉਂ?-ਤਿਰਲੋਚਨ ਸਿੰਘ ਦੁਪਾਲਪੁਰ
ਚੋਰ ਦੀ ਮਾਂ, ਕੋਠੀ ’ਚ ਮੂੰਹ।

ਰੂਸ ਦੇ ਬਦਲਦੇ ਇਰਾਦੇ ਭਾਰਤ ਲਈ ਖ਼ਤਰਨਾਕ-ਇਕ ਖ਼ਬਰ
ਰੋਟੀ ਲੈ ਕੇ ਦਿਓਰ ਦੀ ਚੱਲੀ, ਅੱਗੇ ਜੇਠ ਬੱਕਰਾ ਹਲ਼ ਵਾਹੇ।

ਸੁਖਬੀਰ ਬਾਦਲ ਵਲੋਂ ਦਲਿਤ ਉੱਪ ਮੁੱਖ ਮੰਤਰੀ ਹੀ ਕਿਉਂ, ਮੁੱਖ ਮੰਤਰੀ ਕਿਉਂ ਨਹੀਂ -ਮਨੀਸ਼ ਤਿਵਾੜੀ
ਤਿਵਾੜੀ ਸਾਹਿਬ ਜੀ, ਸੁਖਬੀਰ ਬਾਦਲ ਆਪਣੇ ਆਪੋ ਨੂੰ ਦਾਤਾ ਸਮਝ ਰਿਹੈ।

ਚੋਣ ਕਮਿਸ਼ਨ ਦਾ ਮਮਤਾ ਬੈਨਰਜੀ ਪ੍ਰਤੀ ਪੱਖਪਾਤੀ ਰਵੱਈਆ- ਸ਼ਿਵ ਸੈਨਾ
ਉੱਤੋਂ ਰਾਤ ਹਨ੍ਹੇਰੀ ਨੀਂ, ਇੱਥੇ ਕੋਈ ਨਾ ਤੇਰਾ ਦਰਦੀ।

ਬੇਅਦਬੀ ਮਾਮਲੇ ਦੇ ਸਬੰਧ ਵਿਚ ਪ੍ਰਤਾਪ ਸਿੰਘ ਬਾਜਵਾ ਨੇ ਐਡਵੋਕਟ ਜਨਰਲ ਦਾ ਮੰਗਿਆ ਅਸਤੀਫ਼ਾ- ਇਕ ਖ਼ਬਰ
ਬਾਜਵਾ ਸਾਹਿਬ, ਐਡਵੋਕੇਟ ਜਨਰਲ ਨੇ ਤਾਂ ਮਾਲਕਾਂ ਦਾ ਹੀ ਹੁਕਮ ਬਜਾਇਐ।

ਕਾਂਗਰਸ ਛੱਡ ਅਕਾਲੀ ਦਲ ‘ਚ ਸ਼ਾਮਲ ਹੁੰਦਿਆਂ ਹੀ ਹੰਸ ਰਾਜ ਜੋਸਨ ਨੂੰ ਮਿਲੀ ਜਨਰਲ ਸਕੱਤਰੀ- ਇਕ ਖ਼ਬਰ
ਝੱਟ ਮੰਗਣੀ, ਪਟ ਸ਼ਾਦੀ।

ਕੋਰੋਨਾ ਨਾਲ਼ ਨਜਿੱਠਣ ਲਈ ਪ੍ਰਧਾਨ ਮੰਤਰੀ ‘ਰਾਜ ਧਰਮ’ ਦਾ ਪਾਲਣ ਕਰਨ- ਸੂਰਜੇਵਾਲਾ
ਨਾ ਭਾਈ ਨਾ! ਇਸ ਵੇਲੇ ‘ਚੋਣ ਧਰਮ’ ਸਭ ਤੋਂ ਉੱਤਮ ਧਰਮ ਹੈ।  

ਸਰਕਾਰੀ ਸਕੀਮਾਂ ਦੇ 30 ਪ੍ਰਤੀਸ਼ਤ ਫੰਡ ਅਨੁਸੂਚਿਤ ਜਾਤੀਆਂ ਲਈ ਖ਼ਰਚੇ ਜਾਣਗੇ- ਕੈਪਟਨ
ਹੁਣ ਖਿਲਰਣਗੇ ਚੋਗੇ, ਚੋਣਾਂ ਆਈਆਂ ਚੋਣਾਂ ਆਈਆਂ।

ਅਕਾਲੀ ਸਰਕਾਰ ਬਣਨ ‘ਤੇ ਉੱਪ ਮੁੱਖ ਮੰਤਰੀ ਦਲਿਤ ਹੋਵੇਗਾ- ਸੁਖਬੀਰ
ਏਦਾਂ ਦੇ ਲੱਕੜ ਦੇ ਮੁੰਡੇ ਤੇਰਾ ਭਾਪਾ ਕਈ ਲੋਕਾਂ ਨੂੰ ਪਹਿਲਾਂ ਵੀ ਕਈ ਵਾਰੀ ਦੇ ਚੁੱਕਾ ਹੈ।

ਭਾਜਪਾ ਦੀ ਸਰਕਾਰ ਬਣਨ ‘ਤੇ ਉੱਪ ਮੁੱਖ ਮੰਤਰੀ ਦਲਿਤ ਹੋਵੇਗਾ-ਤਰੁਣ ਚੁੱਘ
ਤਾਏ ਦੀ ਧੀ ਚੱਲੀ ਤਾਂ ਮੈਂ ਕਿਉਂ ਰਹਾਂ ਇਕੱਲੀ।

ਜੰਮੂ ਕਸ਼ਮੀਰ ਦਾ ਵਿਸ਼ੇਸ਼ ਦਰਜਾ ਬਹਾਲ ਕਰਵਾਉਣ ਲਈ ਜੱਦੋ-ਜਹਿਦ ਜਾਰੀ ਰੱਖਾਂਗੀ- ਮਹਿਬੂਬਾ
ਬਾਲਣ ਹੱਡੀਆਂ ਦਾ, ਰੋਟੀ ਇਸ਼ਕੇ ਦੀ ਲਾਈ ਹੋਈ ਏ।

ਸਿਡਨੀ ਦੇ ਗੁਰਦੁਆਰੇ ‘ਚ ਚੇਅਰਮੈਨ ਚੁਣਨ ‘ਤੇ ਵਿਵਾਦ- ਇਕ ਖਬਰ
ਕੂੰਡੇ ਟੁੱਟ ਗਏ ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਗੁਜਰਾਤ ’ਚ ਪੰਜਾਬੀ ਕਿਸਾਨ ਦੀ ਸਰ੍ਹੋਂ ਸਾੜੀ, ਮੋਦੀ ਤੋਂ ਸੁਰੱਖਿਆ ਦੀ ਗੁਹਾਰ- ਇਕ ਖ਼ਬਰ
ਭੋਲੇ ਲੋਕ ਉਸੇ ਤੋਂ ਸੁਰੱਖਿਅ ਮੰਗਦੇ ਆ ਜਿਹਨੇ ਇਹਨਾਂ ਵਿਰੁੱਧ ਸੁਪਰੀਮ ਕੋਰਟ ‘ਚ ਕੇਸ ਪਾਇਆ।

ਬੇਅਦਬੀ ਕਾਂਡ ਦੇ ਤਫ਼ਤੀਸ਼ੀ ਅਫ਼ਸਰ ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਵਲੋਂ ਅਸਤੀਫ਼ਾ-ਇਕ ਖ਼ਬਰ
ਢਾਬ ਤੇਰੀ ਦਾ ਗੰਦਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਕੈਪਟਨ ਨੇ ਕੇਂਦਰ ਸਰਕਾਰ ਅੱਗੇ ਗੋਡੇ ਟੇਕੇ- ਸੁਖਬੀਰ ਬਾਦਲ
ਆਪਣੀ ਪੀੜ੍ਹੀ ਹੇਠ ਵੀ ਸੋਟਾ ਫੇਰ ਲਿਆ ਕਰੋ ਕਦੇ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

13 ਅਪ੍ਰੈਲ 2021

ਨਾਰਵੇ ਦੀ ਪ੍ਰਧਾਨ ਮੰਤਰੀ ਨੂੰ ਕੋਵਿਡ-19 ਦੇ ਨਿਯਮਾਂ ਦੀ ਪਾਲਣਾ ਨਾ ਕਰਨ ‘ਤੇ ਪੁਲਿਸ ਨੇ ਕੀਤਾ ਜ਼ੁਰਮਾਨਾ-ਇਕ ਖ਼ਬਰ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲੀ ਕੰਧ ਟੱਪਕੇ।

ਚੀਨ ਦੀ ਚੜ੍ਹਤ ਨੂੰ ਨੱਥ ਪਾਉਣ ਲਈ ਅਮਰੀਕੀ ਸੈਨੇਟ ਨੇ ਲਿਆ ਵੱਡਾ ਫ਼ੈਸਲਾ- ਇਕ ਖ਼ਬਰ
ਘੁੱਗੂਆਂ ਨੂੰ ਤੂੰ ਟੱਕਰੀ, ਤੈਨੂੰ ਟੱਕਰੀ ਬੰਸਰੀ ਵਾਲ਼ਾ।

ਕਿਸਾਨਾਂ ਨੇ ਮੋਦੀ ਸਰਕਾਰ ਦੇ ਭਰਮ ਤੋੜੇ- ਉਗਰਾਹਾਂ
ਬੰਤੋ ਨਾਰ ਬਦਲੇ, ਜੱਗੇ ਜੱਟ ਦੀ ਗੰਡਾਸੀ ਖੜਕੇ।

ਕੁਝ ਸਿਆਸੀ ਆਗੂਆਂ ਦੀ ਸ਼ਹਿ ‘ਤੇ ਚਲ ਰਿਹੈ ਕਿਸਾਨੀ ਅੰਦੋਲਨ- ਲਾਲਪੁਰਾ
ਮੁਰਦਾ ਬੋਲੂ, ਖੱਫਣ ਪਾੜੂ।

ਸਿੱਧੂ ਨੂੰ ‘ਆਪ’ ‘ਚ ਸ਼ਾਮਲ ਹੋਣ ਲਈ ਮੁੜ ਸੱਦਾ- ਇਕ ਖ਼ਬਰ
ਕਦੇ ਆ ਮਿਲ ਵੇ ਹਜ਼ਾਰੇ ਦਿਆ ਚੰਨਾ।

ਰਾਜੇਵਾਲ ਦੀਆਂ ਤਾਰਾਂ ਕੇਜਰੀਵਾਲ ਨਾਲ ਜੁੜੀਆਂ ਹੋਈਆਂ ਹਨ-ਰਵਨੀਤ ਬਿੱਟੂ
ਤਾਰਾਂ ਕਿਧਰੇ ਜੁੜੀਆਂ, ਚੰਗਿਆੜੇ ਕਿਧਰੇ ਨਿਕਲਦੇ ਆ ਬਈ!

ਕਿਸਾਨਾਂ ਨਾਲ ਧੱਕੇ ਦੇ ਰੋਸ ਵਜੋਂ ਸੌ ਪਰਵਾਰਾਂ ਨੇ ਭਾਜਪਾ ਛੱਡੀ- ਇਕ ਖ਼ਬਰ
ਆਹ ਲੈ ਫੜ ਮਾਲਾ ਆਪਣੀ, ਸਾਥੋਂ ਭੁੱਖਿਆਂ ਤੋਂ ਭਗਤੀ ਨਾ ਹੋਵੇ।

‘ਆਪ’ ਨੇ ਅਕਾਲੀ ਦਲ ‘ਤੇ ਨਸ਼ਾ ਕੰਪਨੀਆਂ ਤੋਂ ਫੰਡ ਲੈਣ ਦਾ ਦੋਸ਼ ਲਗਾਇਆ- ਇਕ ਖ਼ਬਰ
ਜੇ ਅਕਾਲੀ ਦਲ ਤੰਬਾਕੂ ਕੰਪਨੀ ਤੋਂ ਫੰਡ ਲੈ ਸਕਦੇ ਤਾਂ ਨਸ਼ਾ ਕੰਪਨੀ ਦਾ ਫੰਡ ਉਹਨਾਂ ਦੇ ਦੰਦੀ ਵੱਢਦਾ।

ਇਕ ਪੈਰ ਨਾਲ਼ ਮੈਂ ਬੰਗਾਲ ਜਿੱਤਾਂਗੀ ਤੇ ਦੋ ਪੈਰਾਂ ਨਾਲ਼ ਦਿੱਲੀ- ਮਮਤਾ
ਧਰਤੀ ਨੂੰ ਕਲੀ ਕਰਾ ਦੇ, ਨੱਚੂੰਗੀ ਸਾਰੀ ਰਾਤ।

ਪੰਜਾਬੀਆਂ ਦੀਆਂ ਨਜ਼ਰਾਂ ‘ਚ ਅਕਾਲੀਆਂ ਦੀ ਸਾਖ ਗੁਆਚੀ- ਕੈਪਟਨ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਉੱਤਰ ਪ੍ਰਦੇਸ਼ ਦੀ ਭਾਜਪਾ ਆਗੂ ਵਲੋਂ ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿਚ ਦਿੱਤਾ ਅਸਤੀਫ਼ਾ- ਇਕ ਖ਼ਬਰ
ਮੇਰੇ ਨਰਮ ਕਾਲਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਦਿੱਲੀ ਗੁਰਦੁਆਰਾ ਚੋਣਾਂ ਦੀ ਪਰਚਾਰ ਸਾਮੱਗਰੀ ‘ਚੋ ਗੁਰਮੁਖੀ ਗਾਇਬ- ਇਕ ਖ਼ਬਰ
ਕੀ ਕਰਨੀ ਅਸਾਂ ਪੰਜਾਬੀ, ਅੱਖ ਸਾਡੀ ਗੋਲਕ ‘ਤੇ।

ਮਮਤਾ ਵਲੋਂ ਕੀਤੀ ਸ਼ਿਕਾਇਤ ਚੋਣ ਕਮਿਸ਼ਨ ਵਲੋਂ ਖ਼ਾਰਜ- ਇਕ ਖ਼ਬਰ
ਭਾਈ ਜੀ ਦੇ ਵਹਿੜਕੇ ਨੇ, ਮੇਰੇ ਛੜ ਸੀਨੇ ‘ਤੇ ਮਾਰੀ।

 ਬਾਦਲਾਂ ਨਾਲ ਕਿਸੇ ਹਾਲਤ ਵਿਚ ਵੀ ਸਮਝੌਤਾ ਨਹੀਂ ਕਰਾਂਗੇ- ਢੀਂਡਸਾ
ਡੇਕ ਦਾ ਗੁਮਾਨ ਕਰਦੀ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।

ਕੇਂਦਰ ਸਰਕਾਰ ਕਿਸਾਨਾਂ ਦੀ ਆਮਦਨ ਦੁੱਗਣੀ ਕਰਨ ਲਈ ਵਚਨਬੱਧ- ਸੋਮ ਪ੍ਰਕਾਸ਼
ਖਾਲੀ ਘੋੜੀ ਹਿਣਕਦੀ, ਉੱਤੇ ਨਾ ਕੋਈ ਅਸਵਾਰ।

ਕਾਂਗਰਸ ਨੇ ਮੁੜ ਚੁੱਕਿਆ ਰਾਫਾਲ ਸੌਦੇ ਦਾ ਮੁੱਦਾ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

4 ਅਪ੍ਰੈਲ 2021

ਮੌਜੂਦਾ ਹਾਲਾਤ ‘ਚ ਭਾਰਤ ਨਾਲ਼ ਕੋਈ ਕਾਰੋਬਾਰ ਨਹੀਂ ਹੋਵੇਗਾ- ਇਮਰਾਨ ਖ਼ਾਨ
ਦੋ ਭਾਈਆਂ ਵਿਚ ਪੈ ਗਈ, ਨਫ਼ਰਤ ਦੀ ਦੀਵਾਰ।

ਕੇਂਦਰ ਨੇ ਪੰਜਾਬ ਦਾ ਮੁੱਲ ਨਹੀਂ ਪਾਇਆ- ਭਗਵੰਤ ਮਾਨ
ਭੱਤੇ ਢੋਏ ਦੀ ਕਦਰ ਨਾ ਪਾਈ, ਡੰਡੀਆਂ ਤੋਂ ਮੁਕਰ ਗਇਓਂ।

ਸਾਡਾ ਪੱਤਰ ਕਿਸਾਨ ਅੰਦੋਲਨ ਨਾਲ਼ ਸਬੰਧਤ ਨਹੀਂ- ਗ੍ਰਹਿ ਮੰਤਰਾਲਾ
ਆਕੜਦੈਂ! ਸਾਨ੍ਹ ਹੁੰਨੇ ਆਂ। ਹੁਣ ਮੋਕ ਮਾਰਦੈਂ! ਗਊ ਦਾ ਜਾਇਆ ਜੁ ਹੋਇਆ।

ਕਿਸਾਨਾਂ ਦੇ ਵਿਰੋਧ ਕਾਰਨ ਭਾਜਪਾ ਆਗੂ ਬਾਜ਼ਾਰ ‘ਚੋਂ ਖਿਸਕਿਆ-ਇਕ ਖ਼ਬਰ
ਚੁੱਪ ਕਰ ਕੇ ਖਿਸਕ ਜਾ ਇਲਮਦੀਨਾ, ਪੱਤ ਆਪਣੀ ਆਪ ਬਚਾਈਏ ਜੀ।

ਸਰਕਾਰ ਬਣਨ ‘ਤੇ ਬਿਜਲੀ ਦਾ ਭਾਅ ਅੱਧਾ ਕਰਾਂਗੇ- ਸੁਖਬੀਰ ਬਾਦਲ
ਇਹ ਉਹੋ ਹੀ ਬੰਦਾ ਜੀਹਨੇ ਬਿਜਲੀ ਕੰਪਨੀਆਂ ਨਾਲ਼ ਮਹਿੰਗੇ ਸੌਦੇ ਕੀਤੇ ਸੀ, ਅੱਗੇ ਲੋਕੋ ਤੁਹਾਡੀ ਮਰਜ਼ੀ।

ਅਸੀਂ ਭਾਜਪਾ ਨਾਲ 30 ਸਾਲ ਪੁਰਾਣੀ ਸਾਂਝ ਦਿਨਾਂ ‘ਚ ਤੋੜ ਦਿਤੀ- ਸੁਖਬੀਰ ਬਾਦਲ
ਤੁਸੀਂ ਨਹੀਂ ਤੋੜੀ ਲੋਕਾਂ ਨੇ ਤੁੜਵਾਈ ਐ ਬਾਦਲ ਸਾਬ।

ਦਸ ਰੁਪਏ ਸਸਤਾ ਹੋਇਆ ਰਸੋਈ ਗੈਸ ਸਲੰਡਰ- ਇਕ ਖ਼ਬਰ
ਊਠ ਤੋਂ ਛਾਨਣੀ ਉਤਾਰ ਦਿੱਤੀ ਬਈ।

ਕੈਪਟਨ ਸਰਕਾਰ ਚਾਰ ਸਾਲਾਂ ਵਿਚ ਮੈਨੀਫ਼ੈਸਟੋ ਵੀ ਲਾਗੂ ਨਹੀਂ ਕਰ ਸਕੀ-ਰਾਕੇਸ਼ ਰਾਠੌਰ
ਮੈਨੀਫੈਸਟੋ ਲਾਗੂ ਕਰਨ ਲਈ ਨਹੀਂ ਹੁੰਦੇ, ਵੋਟਾਂ ਖਿੱਚਣ ਲਈ ਹੁੰਦੇ ਆ ਬਈ ਰਾਠੌਰ ਸਾਬ।

ਪੰਜਾਬ ਨੂੰ ਸਬਕ ਸਿਖਾਉਣ ਦੀਆਂ ਵਿਉਂਤਾਂ ਘੜ ਰਿਹੈ ਕੇਂਦਰ- ਜਾਖੜ
ਅੱਜ ਕੌਣ ਪੁੱਛੇ ਰਾਂਝੇ ਚਾਕ ਤਾਈਂ, ਬੇਗ਼ਮ ਹੀਰ ਤੇ ਸੈਦਾ ਨਵਾਬ ਹੋਇਆ।

ਅਸਾਮ ‘ਚ ਭਾਜਪਾ ਦੇ ਐਮ.ਐਲ.ਏ. ਦੀ ਕਾਰ ‘ਚੋਂ ਫੜੀ ਈ.ਵੀ.ਐਮ. ਮਸ਼ੀਨ- ਇਕ ਖ਼ਬਰ
ਹੀਰੇ ਲੱਭ ਲਈ ਅਸਾਂ ਗੱਲ ਤੇਰੀ, ਤੇਰਾ ਧਰਮ ਤੇ ਨੇਮ ਸਭ ਚੱਲਿਆ ਈ।

ਆਰ.ਪੀ.ਸਿੰਘ ਵਲੋਂ ਦਿਤਾ ਗਿਆ ਬਿਆਨ ਗ਼ੈਰਜ਼ਿੰਮੇਵਾਰੀ ਵਾਲਾ ਤੇ ਨਾਸਮਝੀ ਦਾ ਸਬੂਤ- ਸ਼੍ਰੋਮਣੀ ਕਮੇਟੀ
ਜਦੋਂ ਸੱਚੀਆਂ ਸੁਣਾਈਆਂ ਨੀ, ਬੜਾ ਦੁਖ ਲੱਗਿਆ ਬੜਾ ਦੁਖ ਲੱਗਿਆ।

ਪੜ੍ਹੀਆਂ ਲਿਖੀਆਂ ਕੁੜੀਆਂ ਨੇ ਚੁੱਕਿਆ ਕਣਕ ਦੀ ਵਾਢੀ ਦਾ ਜ਼ਿੰਮਾ- ਇਕ ਖ਼ਬਰ
ਗੁਰੂ ਦਸਮੇਸ਼ ਦੀਆਂ ਜਾਈਆਂ, ਮਾਈ ਭਾਗੋ ਦੀਆਂ ਅਸੀਂ ਵਾਰਸਾਂ।

ਸੂਬਿਆਂ ਨੂੰ ਆਰਥਕ ਤੌਰ ‘ਤੇ ਕਮਜ਼ੋਰ ਕਰ ਰਿਹਾ ਹੈ ਕੇਂਦਰ- ਗਹਿਲੋਤ
ਸਾਨੂੰ ਦੇ ਗਿਆ ਕੱਲਰ ਵਾਲਾ ਖੂੰਜਾ, ਚੰਗੀ ਚੰਗੀ ਆਪ ਲੈ ਗਿਆ।

ਡੇਰਾ ਬਿਆਸ ਮੁਖੀ ਬਾਬਾ ਗੁਰਿੰਦਰ ਸਿੰਘ ਸੰਤ ਦਾਦੂਵਾਲ ਨਾਲ ਮੁਲਾਕਾਤ ਕਰਨ ਪਹੁੰਚੇ- ਇਕ ਖ਼ਬਰ
ਮਿੱਠੇ ਬੇਰ ਸੁਰਗਾਂ ਦਾ ਮੇਵਾ, ਕੋਲ ਬਹਿ ਕੇ ਚੁਗ ਮਿੱਤਰਾ।

ਪੰਜਾਬ ‘ਚ ‘ਆਪ’ ਦੀ ਸਰਕਾਰ ਬਣੀ ਤਾਂ ਬਿਜਲੀ ਹੋਵੇਗੀ ਮੁਫ਼ਤ- ਆਪ ਪਾਰਟੀ
ਲਗਦੈ ਬਾਪੂ ਨੇ ਕਾਰਖ਼ਾਨਾ ਲਾਇਐ ਹੋਇਐ ਬਿਜਲੀ ਬਣਾਉਣ ਦਾ।

ਭਾਜਪਾ ਨੇ ਕਦੇ ਵੀ ਕਿਸਾਨਾਂ ਨੂੰ ਖ਼ਾਲਿਸਤਾਨੀ ਨਹੀਂ ਕਿਹਾ-ਜੀਵਨ ਗੁਪਤਾ
ਐਹ ਤੁਹਾਡਾ ਧੂਤੂ ਮੀਡੀਆ ਤਾਂ ਦਿਨੇ ਰਾਤ ਇਹੀ ਕਹਿੰਦੈ।

ਵਿਸ਼ਵ ਲਿੰਗ ਭੇਦ ਅਨੁਪਾਤ ਰਿਪੋਰਟ : ਭਾਰਤ 28 ਸਥਾਨ ਹੇਠਾਂ ਡਿੱਗਿਆ- ਇਕ ਖ਼ਬਰ
ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਕਿਸੇ ਹਾਲ ਵਿਚ ਵੀ ਵਾਪਸ ਨਹੀਂ ਹੋਣਗੇ ਖੇਤੀ ਬਿੱਲ- ਮਦਨ ਮੋਹਨ ਮਿੱਤਲ
ਚੁੱਕੀ ਹੋਈ ਲੰਬੜਾਂ ਦੀ, ਠਾਣੇਦਾਰ ਦੇ ਬਰਾਬਰ ਬੋਲੇ।

ਸ਼੍ਰੋਮਣੀ ਕਮੇਟੀ ਨੇ ਗੁਰੂ ਤੇਗ਼ ਬਹਾਦਰ ਜੀ ਦੇ ਚਾਰ ਸੌ ਸਾਲਾ ਪ੍ਰੋਗਰਾਮ ਲਈ 14 ਕ੍ਰੋੜ ਰੁਪਏ ਰੱਖੇ- ਇਕ ਖ਼ਬਰ
 14 ਕਰੋੜ ਦੀ ਤਾਂ ਬਾਬਿਓ ਸਟੇਜ ਹੀ ਲੱਗ ਜਾਣੀ ਐ!

ਐਫ. ਆਈ.ਆਰ. ‘ਚ ਕਿਸਾਨਾਂ ਦੇ ਨਾਂ ਪਰ ਕਾਂਗਰਸ ਦੇ ਪਿੱਛੇ ਪਈ ਭਾਜਪਾ- ਇਕ ਖ਼ਬਰ
ਡਿਗੀ ਖੋਤੇ ਤੋਂ ਗੁੱਸਾ ਘੁਮਿਆਰ ‘ਤੇ।

ਸਿੱਖ ਆਗੂਆਂ ਨੂੰ ਅੱਗੇ ਲਿਆਉਣ ਲੱਗੀ ਭਾਜਪਾ-ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਲ ਭਾਰੀ ਜੀ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

28 ਮਾਰਚ 2021

ਅਕਾਲੀ-ਭਾਜਪਾ ਤੇ ਕਾਂਗਰਸ ਨਾਲ ਕੋਈ ਸਮਝੌਤਾ ਨਹੀਂ ਕੀਤਾ ਜਾਵੇਗਾ- ਢੀਂਡਸਾ
ਤੇਰੀ ਮੇਰੀ ਮੇਰੀ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਕੇਜਰੀਵਾਲ ਨਾਲ਼ ਲਕਸ਼ਮੀ ਕਾਂਤਾ ਚਾਵਲਾ ਦੀ ਮੁਲਾਕਾਤ ਨੇ ਛੇੜੀ ਚਰਚਾ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਮਲੋਟ ‘ਚ ਕਿਸਾਨਾਂ ਨੇ ਭਾਜਪਾ ਵਿਧਾਇਕ ਅਰੁਣ ਨਾਰੰਗ ਦੇ ਕੱਪੜੇ ਪਾੜ ਦਿੱਤੇ- ਇਕ ਖ਼ਬਰ
ਕੀ ਖੱਟਿਆ ਮੈਂ ਤੇਰੀ ਹੀਰ ਬਣ ਕੇ।

ਮੇਰਾ ਤਜਰਬਾ ਮੇਰੀ ਸਭ ਤੋਂ ਵੱਡੀ ਤਾਕਤ- ਕੈਪਟਨ ਅਮਰਿੰਦਰ ਸਿੰਘ
ਮੇਰੀ ਬੱਕੀ ਤੋਂ ਡਰਨ ਫਰਿਸ਼ਤੇ ਤੇ ਮੈਥੋਂ ਡਰੇ ਖੁਦਾ।

ਭਾਜਪਾ ਆਗੂਆਂ ਵਲੋਂ ਪੰਜਾਬ ਪੁਲਿਸ ਦੀ ਸੁਰੱਖਿਆ ਲੈਣ ਤੋਂ ਨਾਂਹ- ਇਕ ਖ਼ਬਰ
ਕਾਲ਼ੇ ਕੋਲ਼ ਮੰਜਾ ਨਹੀਂ ਡਾਹੁਣਾ, ਲਿਸ਼ਕੇ ਤਾਂ ਪੈ ਜੂ ਬਿਜਲੀ।

ਕਿਸਾਨੀ ਮੁੱਦੇ ‘ਤੇ ਜਿਆਣੀ ਨੇ ਕੇਂਦਰ ਦੀ ਪਿੱਠ ਠੋਕੀ- ਇਕ ਖ਼ਬਰ
ਮੇਰਾ ਕੰਮ ਨਾ ਗਲ਼ੀ ਦੇ ਵਿਚ ਕੋਈ, ਆਵਾਂ ਜਾਵਾਂ ਤੇਰੇ ਬਦਲੇ।

ਮੋਦੀ ਸਰਕਾਰ ਕਿਸਾਨਾਂ ਨੂੰ ਨਾ-ਮਿਲਵਰਤਨ ਲਹਿਰ ਲਈ ਮਜਬੂਰ ਨਾ ਕਰੇ- ਰੁਲਦੂ ਸਿੰਘ
ਤੈਥੋਂ ਤਪ ਨਹੀਂ ਬਾਲਕਾ ਹੋਣਾ, ਜੰਗਲਾਂ ‘ਚ ਸ਼ੇਰ ਬੁੱਕਦੇ।

ਨਵਜੋਤ ਸਿੱਧੂ ਦੀ ਮੁੱਖ ਧਾਰਾ ‘ਚ ਵਾਪਸੀ ਦਾ ਪੇਚ ਫਿਰ ਫਸਿਆ- ਇਕ ਖ਼ਬਰ
ਵੀਰਾ ਕੁਝ ਪੁੰਨ ਕਰ ਦੇ, ਘਟਾ ਆਣ ਕੇ ਬਨੇਰੇ ਕੋਲੋਂ ਮੁੜ ਗਈ,

ਸ਼ਹੀਦਾਂ ਦੀਆਂ ਕੁਰਬਾਨੀਆਂ ਸਦਕਾ ਅਸੀਂ ਆਜ਼ਾਦੀ ਦਾ ਨਿੱਘ ਮਾਣ ਰਹੇ ਹਾਂ- ਚੰਦੂਮਾਜਰਾ
ਪੁੱਤ,ਭਾਈ, ਭਤੀਜਾਵਾਦ ਜਿੱਥੇ, ਗੱਲ ਕਾਹਦੀ ਹੈ ਉੱਥੇ ਆਜ਼ਾਦੀਆਂ ਦੀ।

‘ਮੁਫ਼ਤ ਰਾਸ਼ਨ’ ਦੇ ਝੂਠੇ ਵਾਅਦੇ ਕਰ ਰਹੀ ਹੈ ਭਾਜਪਾ- ਮਮਤਾ ਬੈਨਰਜੀ
ਕਸਮੇਂ ,ਵਾਅਦੇ, ਕਾਲਾ ਧਨ, ਨੌਕਰੀ,  ਜੁਮਲੇ ਹੈਂ ਜੁਮਲੋਂ ਕਾ ਕਿਆ।

ਐਤਕੀਂ ਪ੍ਰਸ਼ਾਂਤ ਕਿਸ਼ੋਰ ਦੇ ‘ਕੁਫ਼ਰ ਦੇ ਨਾਟਕ’ ਦਾ ਮੰਚਨ ਨਹੀਂ ਹੋਣ ਦੇਣਗੇ ਪੰਜਾਬੀ- ਬੀਰ ਦਵਿੰਦਰ ਸਿੰਘ
ਤੇਰੇ ਜੁਮਲੇ ਨਾ ਸਾਨੂੰ ਦਰਕਾਰ ਜੀ, ਹਾਂਡੀ ਕਾਠ ਦੀ ਚੜ੍ਹੇ ਨਾ ਵਾਰ ਵਾਰ ਜੀ।

ਪੰਜਾਬ ਵਿਚ ਕਾਂਗਰਸ ਲਈ ‘ਆਪ’ ਕੋਈ ਖ਼ਤਰਾ ਨਹੀਂ- ਕੈਪਟਨ
ਜੀਹਦੇ ਅੰਦਰ ਇਸ਼ਕ ਦੀ ਰੱਤੀ, ਉਹ ਬਾਝ ਸ਼ਰਾਬੋਂ ਖੀਵੇ ਹੂ।

ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਹਿਸਾਬ ਕਿਤਾਬ ਆਨਲਾਈਨ ਕਰਨ ਤੋਂ ਬਾਦਲ ਕਿਉਂ ਮੁੱਕਰੇ- ਰਮਨਦੀਪ ਸਿੰਘ
ਢੱਕੀ ਰਿੱਝੇ, ਕੋਈ ਨਾ ਬੁੱਝੇ।

ਮਾੜੀਆਂ ਨੀਤੀਆਂ ਕਾਰਨ ਆਜ਼ਾਦੀ ਦੇ 73 ਸਾਲਾਂ ਬਾਅਦ ਵੀ ਭਾਰਤ ‘ਚ ਆਰਥਕ ਪਾੜਾ ਵਧਿਆ-ਇਕ ਰਿਪੋਰਟ
ਚਰਚਿਲ ਤਾਂ 1947 ਵਿਚ ਹੀ ਇਸ ਦੀ ਭਵਿੱਖਬਾਣੀ ਕਰ ਗਿਆ ਸੀ।

ਸ਼ਹੀਦਾਂ ਵਲੋਂ ਦਰਸਾਏ ਮਾਰਗ ‘ਤੇ ਚੱਲਣ ਨੌਜਵਾਨ-ਸੁਖਜਿੰਦਰ ਸਿੰਘ ਰੰਧਾਵਾ
ਜੇ ਨੌਜਵਾਨ ਸੱਚਮੁੱਚ ਤੁਰ ਪਏ ਫੇਰ ਸਿਆਸਤਦਾਨ ਇਹ ਡਾਇਲਾਗ ਬੋਲਣਗੇ, “ ਅਬ ਤੇਰਾ ਕਿਆ ਹੋਗਾ ਕਾਲੀਆ’

ਕੇਂਦਰੀ ਏਜੰਸੀਆਂ ਦੀ ‘ਦੁਰਵਰਤੋਂ’ ਕਰ ਰਹੀ ਹੈ ਮੋਦੀ ਸਰਕਾਰ- ਯੇਚੁਰੀ
ਬਦੀਆਂ ਨਾ ਕਰ ਵੇ, ਕੈ ਦਿਨ ਦੀ ਜ਼ਿੰਦਗਾਨੀ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

22 ਮਾਰਚ 2021

ਬਿਜਲੀ ਚੋਰੀ 1000 ਕਰੋੜ ਸਾਲਾਨਾ ਤੋਂ ਟੱਪੀ। ਪਾਵਰਕਾਮ ਕੁਝ ਨਹੀਂ ਕਰ ਰਿਹਾ- ਇਕ ਖ਼ਬਰ
ਕੀ ਲੋੜ ਐ ਕੁਝ ਕਰਨ ਦੀ ਜਦ ਭੇਡਾਂ ਹੈਗੀਆਂ ਮੁੰਨਣ ਨੂੰ।

ਖੇਤੀ ਕਾਨੂੰਨਾਂ ਦਾ ਵਿਰੋਧ ਕਰਨ ਵਾਲੀ ਕੈਪਟਨ ਸਰਕਾਰ ਜੀਓ ਸਿਮ ਲੈਣ ਲਈ ਕਹਿ ਰਹੀ ਹੈ-ਇਕ ਖ਼ਬਰ
ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ, ਤੇਰੀ ਆਈ ਮੈ ਮਰ ਜਾਂ।

ਵਿਸ਼ਵ ਖ਼ੁਸ਼ਹਾਲੀ ਰਿਪੋਰਟ- ਭਾਰਤ ਨੂੰ 149 ਦੇਸ਼ਾਂ ‘ਚੋਂ 139ਵਾਂ ਦਰਜਾ- ਇਕ ਖ਼ਬਰ
ਇਹਨੂੰ ਕਹਿੰਦੇ ਨੇ ਵਿਕਾਸ ਦੀ ਹਨ੍ਹੇਰੀ।

ਬਿਜਲੀ ਦੀ ਮੰਗ ਪੂਰੀ ਕਰਨ ਲਈ ਪੰਜਾਬ ਸਰਕਾਰ ਨੂੰ ਯਾਦ ਆਏ ਸਰਕਾਰੀ ਥਰਮਲ ਪਲਾਂਟ- ਇਕ ਖ਼ਬਰ
ਭੱਜੀਆਂ ਬਾਹਾਂ ਗਲ਼ ਨੂੰ ਆਉਂਦੀਆਂ।

ਪੰਜਾਬ ਵਿਚ ਸਾਰੀਆਂ 117 ਸੀਟਾਂ ‘ਤੇ ਇਕੱਲੇ ਚੋਣ ਲੜਾਂਗੇ- ਮਿੱਤਲ
ਘੜਾ ਚੁੱਕ ਲਉਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਖੇਮਕਰਨ ਦੀ ਸੀਟ ਬਦਲੇ ਕੈਰੋਂ ਪਰਵਾਰ ਦੀ ਬਾਦਲ ਦਲ ਵਿਰੁੱਧ ਬਗ਼ਾਵਤ- ਇਕ ਖ਼ਬਰ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਕੇਂਦਰ ਨੇ ‘ਆਪ’ ਦੀ ‘ਘਰ ਘਰ ਰਾਸ਼ਨ ਯੋਜਨਾ’ ‘ਤੇ ਰੋਕ ਲਗਾਈ- ਇਕ ਖ਼ਬਰ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਹੈਲਮਟ ਨਾ ਪਾਉਣ ‘ਤੇ ਟਰੱਕ ਡਰਾਈਵਰ ਦਾ ਕੱਟਿਆ ਇਕ ਹਜ਼ਾਰ ਰੁਪਏ ਦਾ ਚਾਲਾਨ- ਇਕ ਖ਼ਬਰ
ਮੋਦੀ ਹੈ ਤੋ ਮੁਮਕਿਨ ਹੈ।

ਰਾਜਪਾਲ ਨਾ ਵੀ ਰਿਹਾ ਤਾਂ ਵੀ ਕਿਸਾਨਾਂ ਦੇ ਹੱਕ ‘ਚ ਬੋਲਾਂਗਾ- ਮਲਿਕ
ਖਾਤਰ ਧਰਮ ਦੀ ਸੀਸ ਕੁਰਬਾਨ ਕੀਤੇ, ਲੱਥੀ ਆਸ਼ਕਾਂ ਦੀ ਪੁੱਠੀ ਖੱਲ ਵੀਰਾ।

ਟਰੰਪ ਨੇ ਆਪਣੇ ਸਮਰਥਕਾਂ ਨੂੰ ਕੋਰੋਨਾ ਤੋਂ ਬਚਾਉ ਲਈ ਟੀਕਾ ਲਗਵਾਉਣ ਦੀ ਦਿੱਤੀ ਸਲਾਹ- ਇਕ ਖ਼ਬਰ
ਦੇਰ ਆਇਦ, ਦਰੁਸਤ ਆਇਦ।

ਪੇਸ਼ੀ ਭੁਗਤਣ ਆਇਆ ਲੰਗੜਾ ਦੋਸ਼ੀ ਪੁਲਿਸ ਨੂੰ ਚਕਮਾ ਦੇ ਕੇ ਫ਼ਰਾਰ- ਇਕ ਖ਼ਬਰ
ਬੰਨ੍ਹੇ ਹੋਏ ਦੇ ਗੋਲੀ ਮਾਰ ਸਕਦੇ ਆਂ, ਦੌੜ ਕੇ ਫੜਨਾ ਔਖੈ ਬਈ।

ਕਿਸਾਨ ਆਗੂ ਬੰਗਾਲ ਜਾ ਕੇ ਪੱਥਰਾਂ ਨਾਲ਼ ਸਿਰ ਨਾ ਮਾਰਨ, ਕੋਈ ਫ਼ਾਇਦਾ ਨਹੀਂ ਹੋਣਾ- ਤੋਮਰ
ਕਾਦਰਯਾਰ ਅਨਹੋਣੀਆਂ ਕਰਨ ਜਿਹੜੇ, ਆਖਰਵਾਰ ਉਹਨਾਂ ਪੱਛੋਤਾਵਣਾ ਜੀ।

ਕੈਪਟਨ ਨੇ ਦਿਤਾ ਨਵਜੋਤ ਸਿੱਧੂ ਨੂੰ ਲੰਚ ਦਾ ਸੱਦਾ- ਇਕ ਖ਼ਬਰ
ਚੰਨ ਟਹਿਕਦਾ ਲਿਸ਼ਕਦੇ ਤਾਰੇ, ਇਕ ਮੰਜੇ ਹੋ ਚਲੀਏ।

ਰੇਲਵੇ ਦਾ ਕਦੀ ਵੀ ਨਿਜੀਕਰਨ ਨਹੀਂ ਕੀਤਾ ਜਾਵੇਗਾ- ਰੇਲਵੇ ਮੰਤਰੀ
ਕਰ ਬੈਠਿਓ ਨਾ ਇਤਬਾਰ, ਸਾਡਾ ਜੁਮਲਿਆਂ ਨਾਲ਼ ਪਿਆਰ।

ਅਨੁਸੂਚਿਤ ਜਾਤੀ ਦੇ ਲੋਕਾਂ ਦੀਆਂ ਸਮੱਸਿਆਵਾਂ ਗੰਭੀਰ- ਵਿਜੇ ਸਾਂਪਲਾ
ਤੇ ਤੁਸੀਂ ਛੁਣਛੁਣੇ ਵਜਾਉਂਦੇ ਹੋ?.

ਅਮਰੀਕਾ ਦੇ ਸੂਬੇ ਕਨੈਕਟੀਕੱਟ ‘ਚ ‘ਨਿਸ਼ਾਨ ਸਾਹਿਬ’ ਨੂੰ ਮਾਨਤਾ- ਇਕ ਖ਼ਬਰ
ਪੰਥ ਤੇਰੇ ਦੀਆਂ ਗੂੰਜਾਂ ਦਿਨੋ ਦਿਨ ਪੈਣਗੀਆਂ।

ਕੋਈ ਵੀ ਸਾਜ਼ਿਸ਼ ਮੈਨੂੰ ਪ੍ਰਚਾਰ ਕਰਨ ਤੋਂ ਰੋਕ ਨਹੀਂ ਸਕਦੀ- ਮਮਤਾ
ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

15 ਮਾਰਚ 2021

ਜਦੋਂ ਤੱਕ ਦਮ ਹੈ, ਉਦੋਂ ਤੱਕ ਕਿਸਾਨਾਂ ਲਈ ਲੜਾਂਗੀ- ਪ੍ਰਿਅੰਕਾ ਗਾਂਧੀ
ਵਾਢੀ ਨਾਲ਼ ਕਰੂੰਗੀ ਤੇਰੇ, ਦਾਤੀ ਨੂੰ ਲੁਆ ਦੇ ਘੁੰਗਰੂ।

ਦਿੱਲੀਓਂ ਪਰਤੇ ਭਾਜਪਾ ਪ੍ਰਧਾਨ ਅਸ਼ਵਨੀ ਸ਼ਰਮਾ ਦਾ ‘ਮੂਡ’ ਖ਼ਰਾਬ- ਇਕ ਖ਼ਬਰ
ਅੱਜ ਮੇਰਾ ਮੂਡ ਖ਼ਰਾਬ, ਨਾਲੇ ਕਹਿੰਦੀ ਸਿਰ ਦੁਖਦਾ।

ਭਾਜਪਾ ਨੂੰ ਹਰਾਉਣ ਲਈ ਕਿਤੇ ਵੀ ਜਾਵਾਂਗੇ- ਡੱਲੇਵਾਲ
ਤੇਰੀ ਤੋੜ ਕੇ ਛੱਡਾਂਗੇ ਗਾਨੀ, ਨੀ ਸੋਨੇ ਦੇ ਤਵੀਤ ਵਾਲ਼ੀਏ।

‘ਟਾਈਮ’ ਮੈਗਜ਼ੀਨ ‘ਚ ਮਾਣ ਮਿਲਣ ਮਗਰੋਂ ਤਲਵੰਡੀ ਅਕਲੀਆਂ ਦੀਆਂ ਬੀਬੀਆਂ ਦਾ ਉਤਸ਼ਾਹ ਦੂਣਾ- ਇਕ ਖ਼ਬਰ
ਸੁੱਚਿਆਂ ਰੁਮਾਲਾਂ ਨੂੰ, ਲਾ ਦੇ ਧੰਨ ਕੁਰੇ ਗੋਟਾ।

ਚਾਰ ਮਹੀਨਿਆਂ ਬਾਅਦ ਵੀ ਪੰਜਾਬ ਭਾਜਪਾ ਨੂੰ ਜਨਰਲ ਸਕੱਤਰ ਨਹੀਂ ਮਿਲਿਆ- ਇਕ ਖ਼ਬਰ
ਉਜੜੀਆਂ ਭਰਜਾਈਆ, ਵਲੀ ਜਿਹਨਾਂ ਦੇ ਜੇਠ।

ਜ਼ਿਮਨੀ ਚੋਣਾਂ ‘ਚ ਲੋਕ ਦੇਣਗੇ ਸਰਕਾਰ ਨੂੰ ਜਵਾਬ- ਅਭੈ ਚੌਟਾਲਾ
ਤੈਨੂੰ ਟੱਕਰਾਂਗੇ ਮੈਦਾਨ ਵਿਚ ਸੋਹਣਿਆਂ, ਮੇਲੇ ਮੱਸਿਆ ਦੇ।

ਸੱਤਾ ਦੀ ਸ਼ਹਿ ਤੋਂ ਬਿਗ਼ੈਰ ਸਰਕਾਰੀ ਖ਼ਜ਼ਾਨੇ ਨੂੰ ਚੂਨਾ ਲਗਉਣਾ ਅਸੰਭਵ- ਹਰਪਾਲ ਚੀਮਾ
ਗਿੱਧੇ ਵਿਚ ਨੱਚਦੀ ਦੀ, ਮੈਂ ਘੁੰਡ ‘ਚੋਂ ਅੱਖ ਪਛਾਣੀ।

ਬਿਹਾਰ ਦੇ ਮੰਤਰੀ ਸ਼ਰਾਬ ਦੇ ਕਾਰੋਬਾਰ ‘ਚ ਸ਼ਾਮਲ- ਤੇਜੱਸਵੀ
ਯਾਰ ਇਹ ਕੋਈ ਨਵੀਂ ਗੱਲ ਐ, ਕੋਈ ਹੋਰ ਘਪਲਾ ਲੱਭੋ ਪਿਆਰਿਓ।

ਜ਼ੈੱਡ ਪਲੱਸ ਸੁਰੱਖਿਆ ਨਾ ਦੇਣ ‘ਤੇ ਡੀ.ਜੀ.ਪੀ.ਨਾਲ ਨਾਰਾਜ਼ ਹਨ ਨਿਹੰਗ ਮੁਖੀ- ਇਕ ਖ਼ਬਰ
ਲੋਕਾਂ ਦੀ ਸੁਰੱਖਿਆ ਕਰਨ ਵਾਲ਼ੇ ਹੋਏ ਖੁਦ ਦੀ ਸੁਰੱਖਿਆ ਦੇ ਮੋਹਤਾਜ।

ਇੰਗਲੈਂਡ ਦੀ ਸੰਸਦ ਵਿਚ ਕਿਸਾਨੀ ਅੰਦੋਲਨ ਦੀ ਗੂੰਜ-ਇਕ ਖ਼ਬਰ
ਤਾਰਾਂ ਖੜਕ ਗਈਆਂ, ਜਦ ਗੂੰਜ ਪਈ ਦਰਵਾਜ਼ੇ।

ਖੇਤੀ ਕਾਨੂੰਨ ਰੱਦ ਕਰਵਾਉਣ ਲਈ ਬਰਾਬਰ ਡਟਣਗੀਆਂ ਕਿਸਾਨ ਬੀਬੀਆਂ-ਇਕ ਖ਼ਬਰ
ਜਿੱਥੇ ਚੱਲੇਂਗਾ ਚੱਲੂੰਗੀ ਨਾਲ਼ ਤੇਰੇ , ਵੇ ਟਿਕਟਾਂ ਦੋ ਲੈ ਲਈਂ।

ਮਮਤਾ ਬੈਨਰਜੀ ਨੇ ਵੋਟਰਾਂ ਦਾ ਭਰੋਸਾ ਤੋੜਿਆ-ਮੋਦੀ
ਤੁਸੀਂ ਜਨਾਬ ਸਾਰੇ ਦੇਸ਼ ਦਾ ਭਰੋਸਾ ਤੋੜਿਆ।

ਜੇ ਸਰਕਾਰ ਸੁਧਾਰਾਂ ਲਈ ਰਾਜ਼ੀ ਹੈ ਤਾਂ ਕੋਈ ਇਹ ਨਾ ਸਮਝੇ ਕਿ ਖੇਤੀ ਕਾਨੂੰਨਾਂ ‘ਚ ਕੋਈ ਕਮੀ ਹੈ- ਤੋਮਰ
ਲਉ ਜੀ, ਤੋਮਰ ਸਾਹਿਬ ਤਾਂ ਤੁਰ ਪਏ ਪਿਛਲ ਖੁਰੀਂ।

ਕਿਸਾਨਾਂ ਦੀ ਆੜ ਹੇਠ ਸਿਆਸੀ ਜ਼ਮੀਨ ਤਿਆਰ ਕੀਤੀ ਜਾ ਰਹੀ ਹੈ-ਦੁਸ਼ਿਅੰਤ ਚੌਟਾਲਾ
ਨੀ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਜੇ ਅਧਿਕਾਰੀ ਤੁਹਾਡਾ ਕੰਮ ਨਹੀਂ ਕਰਦੇ ਤਾਂ ਡਾਂਗਾਂ ਨਾਲ਼ ਕੁੱਟੋ- ਕੇਂਦਰੀ ਮੰਤਰੀ ਗਿਰੀ ਰਾਜ
ਇਹਦੇ ਨਾਲੋਂ ਵਧੀਆ ਰਾਮ ਰਾਜ ਕਿਹੜਾ ਹੋਊ ਬਈ!

ਹਿਮਾਚਲ ਪ੍ਰਦੇਸ਼ ਦੇ ਮੰਤਰੀ ਨੇ ਮੋਦੀ ਨੂੰ ਸ਼ਿਵ ਦਾ ਅਵਤਾਰ ਦੱਸਿਆ- ਇਕ ਖ਼ਬਰ
ਬੱਕਰੀ ਨੂੰ ਊਠ ਜੰਮਿਆਂ, ਸਹੁੰ ਰੱਬ ਦੀ ਝੂਠ ਨਾ ਬੋਲਾਂ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

07 ਮਾਰਚ 2021

ਰਣਨੀਤੀ ਬਣਾਉਣ ਦਾ ਸਮਾਂ ਗਿਆ, ਹੁਣ ਮੈਦਾਨ ‘ਚ ਨਿਤਰਨ ਦਾ ਵੇਲਾ- ਜਾਖੜ
ਖੇ ਖੂਬ ਹੁਸ਼ਿਆਰੀ ਦੇ ਨਾਲ਼ ਯਾਰੋ, ਲੱਗੇ ਕਰਨ ਅਫ਼ਗਾਨ ਤਿਆਰੀ ਯਾਰੋ।

ਅਕਾਲੀ ਵਿਧਾਇਕ ਬਜਟ ਸੈਸ਼ਨ ਲਈ ਮੁਅੱਤਲ-ਇਕ ਖ਼ਬਰ
ਇਹ ਤਾਂ ਭਾਈ ਰਲੀ ਮਿਲੀ ਗੇਮ ਖੇਡੀ ਜਾ ਰਹੀ ਹੈ, ਅਕਾਲੀ ਤਾਂ ਆਪ ਮੁਅੱਤਲ ਹੋਣ ਨੂੰ ਕਾਹਲੇ ਸੀ।  

ਪੰਜ ਸੂਬਿਆਂ ਦੀ ਚੋਣ ਬਾਅਦ ਪੰਜਾਬ ਦਾ ਚੋਣ ਦੰਗਲ ਭਖੇਗਾ- ਇਕ ਖ਼ਬਰ
ਵਿਹੜੇ ਲਾ ਤ੍ਰਿਵੈਣੀ, ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ।

ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ‘ਚ ਫੁੱਟ ਖੁੱਲ੍ਹ ਕੇ ਆਈ ਸਾਹਮਣੇ- ਇਕ ਖ਼ਬਰ
ਕੂੰਡੇ ਟੁੱਟ ਗਏ ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਭਾਰਤ-ਪਾਕਿ ਸਰਹੱਦੀ ਤਲਖੀ ਘਟਾਉਣ-ਅਮਰੀਕਾ
ਰੰਡੀਆਂ ਤਾਂ ਰੰਡ ਕੱਟਦੀਆਂ, ਤੇਰੇ ਵਰਗੇ ਮੁਸ਼ਟੰਡੇ ਨਹੀਂ ਕੱਟਣ ਦਿੰਦੇ।

ਸੁਪਰੀਮ ਕੋਰਟ ਨੇ ਫਿਰ ਕਿਹਾ- ਸਰਕਾਰ ਤੋਂ ਵੱਖਰੀ ਰਾਇ ਰੱਖਣਾ ਦੇਸ਼ ਧ੍ਰੋਹ ਨਹੀਂ- ਇਕ ਖ਼ਬਰ
ਪੰਚਾਂ ਦਾ ਕਿਹਾ ਸਿਰ ਮੱਥੇ, ਪਰਨਾਲ਼ਾ ਉੱਥੇ ਦਾ ਉੱਥੇ।

ਦਿੱਲੀ ਨਗਰ ਨਿਗਮ ਦੀਆਂ ਉੱਪ ਚੋਣਾਂ ‘ਚ ਲੋਕਾਂ ਨੇ ਭਾਜਪਾ ਨੂੰ ਨਕਾਰਿਆ-ਇਕ ਖ਼ਬਰ
ਮੋਤੀ ਖਿਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।

ਤੇਜਸਵੀ ਨੇ ਮਮਤਾ ਨਾਲ਼ ਕੀਤੀ ਮੁਲਾਕਾਤ, ਇਕੱਠੇ ਲੜ ਸਕਦੇ ਹਨ ਚੋਣਾਂ- ਇਕ ਖ਼ਬਰ
ਆ ਜਾ ਆਪਾਂ ਦੋਵੇਂ ਨੱਚੀਏ, ਆਪਾਂ ਭੈਣ ਭਰਾ।

ਕਿਸਾਨਾਂ ਨੂੰ ਬਚਾਉਣ ਲਈ ਹੁਣ ਪੰਜਾਬ ਸਰਕਾਰ ਮੈਦਾਨ ਵਿਚ ਆਵੇ- ਪ੍ਰਤਾਪ ਸਿੰਘ ਬਾਜਵਾ
ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਪੰਜਾਬ ‘ਚ ਹੁਣ ਅਧਿਆਪਕ ਫ਼ੋਨ ਕਰ ਕੇ ਵਿਦਿਆਰਥੀਆਂ ਨੂੰ ਸਵੇਰੇ ਜਗਾਇਆ ਕਰਨਗੇ-ਇਕ ਖ਼ਬਰ
ਜਾਗੋ ਮੋਹਨ ਪਿਆਰੇ, ਤੁਮ੍ਹਾਰਾ ਟੀਚਰ ਪੁਕਾਰੇ।

ਪ੍ਰਧਾਨ ਮੰਤਰੀ ਮੋਦੀ ਨੇ ਲੋਕਾਂ ਨੂੰ ਬੰਦਰਗਾਹਾਂ ‘ਚ ਨਿਵੇਸ਼ ਕਰਨ ਲਈ ਕਿਹਾ-ਇਕ ਖ਼ਬਰ
 ਲਾਉ ਲਾਉ ਭਾਈ ਅਡਾਨੀ ਦੇ ਕਾਰੋਬਾਰ ‘ਚ ਪੈਸਾ ਲਗਾਉ ਤੇ ਮੁਨਾਫ਼ੇ ‘ਚ ਵਾਧਾ ਕਰੋ।

ਸੁਖਰਾਜ ਸਿੰਘ ਨੇ ਸੁਮੇਧ ਸੈਣੀ ਤੇ ਉਮਰਾਨੰਗਲ ਦੀਆਂ ਹੋਈਆਂ ਜ਼ਮਾਨਤਾਂ ਨੂੰ ਲਾਪ੍ਰਵਾਹੀ ਦੱਸਿਆ- ਇਕ ਖ਼ਬਰ
ਇਹ ਲਪਰਵਾਹੀ ਨਹੀਂ ਸਗੋਂ ਪਹਿਲਾਂ ਤੋਂ ਚਲੇ ਆ ਰਹੇ ਛੜਯੰਤਰ ਦਾ ਹੀ ਹਿੱਸਾ ਹੈ।

ਕਿਸਾਨ ਅੰਦੋਲਨ ਬਾਰੇ ਵਿਧਾਨ ਸਭਾ ‘ਚ ਗਵਰਨਰ ਵਲੋਂ ਭਾਸ਼ਨ ਨਾ ਪੜ੍ਹਨਾ ਸ਼ਰਮਨਾਕ-ਹਰਪਾਲ ਚੀਮਾ
ਖੁਸ਼ ਮਾਹੀ ਨੂੰ ਕਰਨ ਦੀ ਮਾਰੀ, ਸੁਰਮਾ ਪਾਈ ਰੱਖਦੀ।

ਹਰਿਆਣਾ ‘ਚ ਭਾਜਪਾ ਤੇ ਜਜਪਾ ਆਗੂਆਂ ਦਾ ਸਿਆਸੀ ਭਵਿੱਖ ਦਾਅ ‘ਤੇ- ਇਕ ਖ਼ਬਰ
ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਜੰਮੂ ਕਸ਼ਮੀਰ ਕਾਂਗਰਸ ਵਲੋਂ ਗੁਲਾਮ ਨਬੀ ਆਜ਼ਾਦ ਖ਼ਿਲਾਫ਼ ਰੋਸ ਮੁਜ਼ਾਹਰਾ- ਇਕ ਖ਼ਬਰ
ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਜਾਂਚ ਏਜੰਸੀਆਂ ਦੇ ਦਫ਼ਤਰਾਂ ‘ਚ ਸੀ.ਸੀ.ਟੀ.ਵੀ. ਕੈਮਰੇ ਨਾ ਲਾਉਣ ‘ਤੇ ਸੁਪਰੀਮ ਕੋਰਟ ਨਾਰਾਜ਼-ਇਕ ਖ਼ਬਰ
ਕਿਉਂ ਬਈ ਕੈਮਰੇ ਲਾ ਕੇ ਆਪਣੇ ਢਿੱਡ ਨੰਗੇ ਕਰ ਲਈਏ ਅਸੀਂ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

28 ਫਰਵਰੀ 2021

ਮਿਲਾਵਟਖੋਰੀ ਕਿਸੇ ਵੀ ਕੀਮਤ ‘ਤੇ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ- ਜਿਲ੍ਹਾ ਸਿਹਤ ਅਫ਼ਸਰ
ਐਵੇਂ ਨਾ ਡਰਿਓ, ਸਭ ਕੁਝ ਬਰਦਾਸ਼ਤ ਹੈ, ਬਸ ਲਿਫ਼ਾਫਾ ਭਾਰਾ ਰੱਖਿਓ।

ਹਮੇਸ਼ਾ ਸੱਚ ਦੀ ਜਿੱਤ ਹੁੰਦੀ ਹੈ, ਸੱਚ ਜ਼ਰੂਰ ਜਿੱਤੇਗਾ- ਨੌਦੀਪ ਕੌਰ
ਵੇਲਾਂ ਧਰਮ ਦੀਆਂ, ਵਿਚ ਦਰਗਾਹ ਦੇ ਹਰੀਆਂ।

ਸਾਨੂੰ ਖੇਤੀ ਕਾਨੂੰਨਾਂ ‘ਚ ਸੋਧਾਂ ਨਹੀਂ ਚਾਹੀਦੀਆਂ, ਕਾਨੂੰਨ ਰੱਦ ਹੋਣੇ ਚਾਹੀਦੇ ਹਨ- ਟਿਕੈਤ
ਮੈਨੂੰ ਸੋਨੇ ਦਾ ਤਵੀਤ ਕਰਾ ਦੇ, ਚਾਂਦੀ ਦਾ ਕੀ ਭਾਰ ਚੁੱਕਣਾ।

ਕਿਸਾਨ ਮੋਰਚਿਆਂ ਵਿਚ ਬੀਬੀਆਂ ਨੇ ਜੋਸ਼ ਭਰਿਆ- ਇਕ ਖ਼ਬਰ
ਚਰਖ਼ੇ ਦੀ ਘੂਕ ਸੁਣ ਕੇ, ਕੰਬਿਆ ਦਿੱਲੀ ਦਰਵਾਜ਼ਾ।

ਸਰਕਾਰ ਵਲੋਂ ਕਿਸਾਨੀ ਅੰਦੋਲਨ ਦੇ ਹੱਕ ’ਚ ਹੋਣ ਕਰ ਕੇ ਗਵਰਨਰ ਲਈ ਔਖਾ ਹੋਵੇਗਾ ਭਾਸ਼ਨ ਪੜ੍ਹਨਾ-ਇਕ ਖ਼ਬਰ
ਪਾ ਲੈ ਤੱਤਿਆਂ ਥੰਮ੍ਹਾਂ ਨੂੰ ਜੱਫੀਆਂ, ਆਪੇ ਤੇਰਾ ਰਾਮ ਰੱਖ ਲਊ।  

ਕਿਸਾਨੀ ਮੋਰਚਾ ਇਤਿਹਾਸਕ ਤੇ ਬੇਮਿਸਾਲ- ਪ੍ਰਕਾਸ਼ ਸਿੰਘ ਬਾਦਲ
ਪਛਾਣੋਂ ਬਈ ਇਹ ਉਹੀ ਬੰਦਾ ਜਿਹੜਾ ਕਾਨੂੰਨਾਂ ਦੇ ਹੱਕ ‘ਚ ਵੀਡੀਓ ਪਾਉਂਦਾ ਸੀ।

ਕੈਪਟਨ ਦੀ ਲੀਡਰਸ਼ਿੱਪ ’ਤੇ ਪਰਗਟ ਸਿੰਘ ਨੇ ਚੁੱਕੀ ਉਂਗਲ- ਇਕ ਖ਼ਬਰ
ਅਸਾਂ ਤੇਰੀ ਤੋਰ ਵੇਖਣੀ, ਲੋਕਾਂ ਦੇਖਣਾ ਵਿਸਾਖੀ ਵਾਲਾ ਮੇਲਾ।

ਕਾਂਗਰਸ ਦਾ ਨਾਰਾਜ਼ ਧੜਾ ਮੁੜ ਸਰਗਰਮ ਹੋਇਆ-ਇਕ ਖ਼ਬਰ
ਇਸ ਘਰ ਕੋ ਆਗ ਲੱਗ ਗਈ ਘਰ ਕੇ ਚਿਰਾਗ਼ ਸੇ।

ਐਨ.ਡੀ.ਏ. ਕਿਸਾਨਾਂ ਦੀ ਖ਼ੁਸ਼ਹਾਲੀ ਅਤੇ ਮਾਣ ਸਨਮਾਨ ਲਈ ਵਚਨਬੱਧ- ਮੋਦੀ
ਕੈਦੋ ਆਣ ਕੇ ਆਖਦਾ ਸਹੁਰਿਓ ਓਏ, ਮੈਥੋਂ ਕੌਣ ਚੰਗੀ ਮੱਤ ਦੇਸੀਆ ਓਏ।

ਪੰਜਾਬ ਵਿਚ ਅਗਲੀ ਸਰਕਾਰ ਅਕਾਲੀ ਦਲ ਦੀ ਹੀ ਬਣੇਗੀ- ਸੁਖਬੀਰ ਬਾਦਲ
ਇਥੇ ਮੱਸਿਆ ਰਾਤ ਹਨੇਰੀ ਨੂੰ, ਕਈ ਕਮਲ਼ੇ ਕਹਿਣ ਦੀਵਾਲੀ।

ਸੈਣੀ ਤੇ ਉਮਰਾਨੰਗਲ ਦੀਆਂ ਜ਼ਮਾਨਤਾਂ ‘ਤੇ ਅਦਾਲਤ ਦਾ ਫ਼ੈਸਲਾ ਰਾਖਵਾਂ- ਇਕ ਖ਼ਬਰ
ਇਸ ਅਦਾਲਤ ‘ਚ ਬੰਦੇ ਬਿਰਖ ਹੋ ਗਏ............................

ਪੁਡੂਚੇਰੀ ਦੀ ਕਾਂਗਰਸ ਸਰਕਾਰ ਜਨਤਾ ਦੀ ਨਹੀਂ ‘ਹਾਈ ਕਮਾਨ’ ਦੀ ਸੇਵਾ ਕਰ ਰਹੀ ਸੀ- ਮੋਦੀ
ਹੁਣ ਗਵਰਨਰ ਸਾਬ ਤੁਹਾਡੀ ਸੇਵਾ ਕਰਨਗੇ, ਜਨਤਾ ਲਈ ਤਾਂ ‘ਬੁੜ੍ਹੀ ਮਰੀ ਕੁੜੀ ਜੰਮ ਪਈ’।

ਹਰਿਆਣਾ ਵਿਚ ਭਾਜਪਾ ਦੀਆਂ ਮੁਸ਼ਕਿਲਾਂ ਵਧੀਆਂ- ਇਕ ਖ਼ਬਰ
ਹਕੀਮ ਜੀ, ਮੈਂ ਤਾਂ ਹੋ ਗਈ ਅੱਗੇ ਨਾਲੋਂ ਤੰਗ।

ਯੂਥ ਕਾਂਗਰਸੀ 23 ਬੋਰੀਆਂ ਭੁੱਕੀ ਸਣੇ ਗ੍ਰਿਫ਼ਤਾਰ-ਇਕ ਖ਼ਬਰ
ਬਈ ਚੋਣਾਂ ਹੁਣ ਕਿਹੜਾ ਬਹੁਤੀ ਦੂਰ ਨੇ, ਹੁਣ ਤੋਂ ਹੀ ਪਬੰਧ ਕਰਨੇ ਪੈਣੇ ਆਂ।

“ ਹੰਕਾਰੀ” ਸਰਕਾਰ  ਕਿਸਾਨਾਂ ਦਾ ਗੁੱਸਾ ਨਹੀਂ ਝੱਲ ਸਕੇਗੀ- ਪ੍ਰਿਯੰਕਾ
ਪੁੰਨ ਪਾਪ ਤੇਰੇ ਬੰਦਿਆ, ਤੱਕੜੀ ‘ਤੇ ਤੁਲ ਜਾਣਗੇ।

ਹਾੜ੍ਹੀ ਸਾਉਣੀ ਦੇ ਆਉਣ ਜਾਣ ਨਾਲ਼ ਲੜਾਈਆਂ ਨਹੀਂ ਰੁਕਦੀਆਂ-ਡਾ.ਦਰਸ਼ਨ ਪਾਲ
ਤੇਗਾਂ ਮਾਰਦਾ ਦਲਾਂ ਨੂੰ ਜਾਵੇ ਚੀਰਦਾ, ਗੋਰਿਆਂ ਦੇ ਘਾਣ ਲੱਥ ਗਏ।

ਪੁਲਿਸ ਜਬਰ ਨਾਲ਼ ਸਾਡਾ ਮਨੋਬਲ ਡਿਗਣ ਵਾਲਾ ਨਹੀਂ- ਕਿਸਾਨ ਨੇਤਾ
ਤੋਰ ਸ਼ੁਕੀਨਣ ਦੀ, ਤੂੰ ਕੀ ਜਾਣਦੀ ਭੇਡੇ।

ਕਾਰਪੋਰੇਟਾਂ ਨਾਲ ਵਫ਼ਾਦਾਰੀ ਸਦਕਾ ਖੇਤੀ ਕਾਨੂੰਨ ਨਾ ਰੱਦ ਕਰਨ ‘ਤੇ ਅੜੀ ਸਰਕਾਰ- ਉਗਰਾਹਾਂ
ਐਰੇ ਗੈਰੇ ਨੂੰ ਸ਼ੱਕਰ ਦਾ ਦਾਣਾ, ਭਗਤੇ ਨੂੰ ਖੰਡ ਪਾ ਦਿਓ।

ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ

22 ਫਰਵਰੀ 2021

ਕੇਂਦਰ ਦੱਸੇ ਕਿ ਘੱਟ ਗਿਣਤੀ ਕਮਿਸ਼ਨ ‘ਚ ਸੱਤਾਂ ‘ਚੋਂ ਛੇ ਆਸਾਮੀਆਂ ਖਾਲੀ ਕਿਉਂ ਹਨ?- ਹਾਈ ਕੋਰਟ
ਹਾਈ ਕੋਰਟ ਜੀ!  ਕੇਂਦਰ ਮੁਤਾਬਕ ਇਸ ਦੇਸ਼ ‘ਚ ਕੋਈ ਘੱਟ ਗਿਣਤੀ ਹੈ ਹੀ ਨਹੀਂ।

ਨੁਕਤਾ-ਦਰ-ਨੁਕਤਾ ਖੇਤੀ ਕਾਨੂੰਨਾਂ ‘ਤੇ ਗੱਲਬਾਤ ਕਰਨ ਲਈ ਸਰਕਾਰ ਤਿਆਰ-ਤੋਮਰ
ਤੋਮਰ ਜੀ! ਕਿਉਂ ਭੁੱਲ ਗਏ ਕਿ ਕਿਸਾਨ ਲੀਡਰਾਂ ਨੇ ਨੁਕਤਾ-ਦਰ-ਨੁਕਤਾ ਹੀ ਤੁਹਾਡੀਆਂ ਗੋਡਣੀਆਂ ਲੁਆਈਆਂ ਸਨ।

ਕੇਂਦਰ ਤੇ ਪੰਜਾਬ ਦੀਆਂ ਸਰਕਾਰਾਂ ਨੇ ਕਿਸਾਨਾਂ ਦੀ ਪਿੱਠ ਵਿਚ ਛੁਰਾ ਮਾਰਿਆ- ਸੁਖਬੀਰ ਬਾਦਲ
ਬਾਦਲ ਸਾਹਿਬ ਇਹ ਨਾ ਭੁੱਲੋ ਕਿ ਸਰਕਾਰਾਂ ਵਿਚ ਤੁਸੀਂ ਵੀ ਰਹੇ ਹੋ।

ਨਨਕਾਣਾ ਸਾਹਿਬ ਜਥਾ ਭੇਜਣ ਬਾਰੇ ਕੇਂਦਰ ਨੇ ਨਾ ਭਰਿਆ ਹੁੰਗਾਰਾ- ਇਕ ਖ਼ਬਰ
ਉਹ ਫਿਰੇ ਨੱਕ ਵਢਾਉਣ ਨੂੰ, ਤੇ ਉਹ ਫਿਰੇ ਨੱਥ ਘੜਾਉਣ ਨੂੰ।

ਕੇਂਦਰ ਸਰਕਾਰ ਦਾ ਸਿੱਖ ਵਿਰੋਧੀ ਚਿਹਰਾ ਨਜ਼ਰ ਆਇਆ- ਬਡੂੰਗਰ
ਬੜੀ ਦੇਰ ਲਗਾ ਦਿੱਤੀ ਚਿਹਰਾ ਪਛਾਨਣ ਵਿਚ, ਬਡੂੰਗਰ ਸਾਹਿਬ।

ਦੇਸ਼ ‘ਚ ਭਾਜਪਾ ਦੀ ਟੱਕਰ ਦੀ ਕੋਈ ਪਾਰਟੀ ਨਹੀਂ- ਨੱਢਾ
ਗਲ਼ੀਆਂ ਹੋ ਜਾਣ ਸੁੰਨੀਆਂ ਤੇ ਵਿਚ ਮਿਰਜ਼ਾ ਯਾਰ ਫਿਰੇ।

ਟਰੰਪ ਦਾ ਹੁਣ ਰਿਪਬਲੀਕਨ ਪਾਰਟੀ ’ਚ ਕੋਈ ਭਵਿੱਖ ਨਹੀਂ ਰਿਹਾ-ਨਿੱਕੀ ਹੈਲੇ
ਕਦੇ ਟੱਕਰੇਂ ਤਾਂ ਹਾਲ ਸੁਣਾਵਾਂ, ਮੇਰੇ ਨਾਲ਼ ਜੋ ਬੀਤਦੀ।

ਕੰਮ ਕਰ ਕੇ ਆਪਣੇ ਸੰਵਿਧਾਨਕ ਅਤੇ ਨੈਤਿਕ ਫਰਜ਼ ਨਿਭਾਏ- ਕਿਰਨ ਬੇਦੀ
ਮੁੱਖ ਮੰਤਰੀ ਤਾਂ ਹੋਰ ਹੀ ਰੋਣੇ ਰੋ ਕੇ ਗਿਐ, ਬੀਬੀ ਜੀ।

ਬੀਬੀ ਜਗੀਰ ਕੌਰ ਨੇ ਨੌਜਵਾਨਾਂ ਨੂੰ ਸੱਚ ਦੇ ਰਾਹ ‘ਤੇ ਤੁਰਨ ਲਈ ਪ੍ਰੇਰਿਆ- ਇਕ ਖ਼ਬਰ
ਨੌ ਸੌ ਚੂਹਾ ਖਾ ਕੇ ਬਿੱਲੀ ਹੱਜ ਨੂੰ ਚੱਲੀ।

ਬੰਗਾਲ ਵਿਚ ਸੱਤਾ ‘ਚ ਆਏ ਤਾਂ ਭ੍ਰਿਸ਼ਟਾਚਾਰ ਖ਼ਤਮ ਕਰਾਂਗੇ-ਸ਼ਾਹ
ਲਉ ਜੀ ਹੋਰ ਸੁਣ ਲਉ।

ਪੰਜਾਬ ਭਾਜਪਾ ‘ਚ ਅੰਦਰੂਨੀ ਕਲੇਸ਼ ਸ਼ੁਰੂ-ਇਕ ਖ਼ਬਰ
ਕੂੰਡੇ ਟੁੱਟ ਗਏ ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਕਿਸਾਨ ਅੰਦੋਲਨ ਦੇ ਹੱਕ ਵਿਚ ਖਲੋਣਾ ਜੇ ਦੇਸ਼-ਧ੍ਰੋਹ ਹੈ ਤਾਂ ਮੈਂ ਜੇਲ੍ਹ ‘ਚ ਹੀ ਠੀਕ ਹਾਂ- ਦਿਸ਼ਾ ਰਵੀ
ਮੈਨੂੰ ਨਰਕ ਕੁੜੀ ਨਾ ਜਾਣੀ, ਲੜ ਜੂੰ ਭ੍ਰਿੰਡ ਬਣ ਕੇ।

ਅਮਰੀਕਨ ਕਿਸਾਨ ਸੰਗਠਨ ਭਾਰਤੀ ਕਿਸਾਨਾਂ ਦੀ ਪਿੱਠ ‘ਤੇ ਆਏ- ਇਕ ਖ਼ਬਰ
ਚਰਖ਼ੇ ਦੀ ਘੂਕ ਸੁਣ ਕੇ, ਜੋਗੀ ਉੱਤਰ ਪਹਾੜੋਂ ਆਏ।  

85 ਸਾਲ ਦੇ ਬਜ਼ੁਰਗ ਨੇ ਕੇਂਦਰ ਨੂੰ ਵੰਗਾਰਦਿਆਂ ਕਿਹਾ, ਸੰਘਰਸ਼ ਹੀ ਜਿੱਤ ਦਾ ਰਾਹ- ਇਕ ਖ਼ਬਰ
ਜੇ ਕੋਈ ਹੋਰ ਲੈ ਆਇਆ ਤੇਰੀ ਜੰਝ ਨੀਂ, ਬਣੂ ਜੰਗ ਦਾ ਮੈਦਾਨ ਬੇਲਾ ਝੰਗ ਨੀਂ।

ਚਪੜਾਸੀ ਦੀ 13 ਆਸਾਮੀਆਂ ਲਈ 27 ਹਜ਼ਾਰ ਤੋਂ ਵੱਧ ਅਰਜ਼ੀਆਂ ਆਈਆਂ-ਇਕ ਖ਼ਬਰ
ਦੋ ਕਰੋੜ ਨੌਕਰੀਆਂ ਦੀ ਪਹਿਲੀ ਕਿਸ਼ਤ।

ਕਾਰ ‘ਚ ਕੋਕੀਨ ਲੈ ਕੇ ਜਾ ਰਹੀ ਯੂਥ ਭਾਜਪਾ ਦੀ ਆਗੂ ਗ੍ਰਿਫ਼ਤਾਰ- ਇਕ ਖ਼ਬਰ
ਫੜ ਰੂਪ ਦਾ ਤੀਰ ਕਮਾਨ, ਵੇਚਦੇ ਫਿਰਦੇ ਓ ਈਮਾਨ।

ਪੰਜਾਬ ਦੇ ਨਰੋਏ ਭਵਿੱਖ ਲਈ ਨਵੇਂ ਸਿਆਸੀ ਗੱਠਜੋੜ ਦੀ ਅਹਿਮ ਲੋੜ- ਪ੍ਰਮਿੰਦਰ ਢੀਂਡਸਾ
ਪੱਤ ਝੜੇ ਪੁਰਾਣੇ ਮਾਹੀ ਵੇ, ਰੁੱਤ ਨਵਿਆਂ ਦੀ ਆਈ ਆ ਢੋਲਾ।

ਭਾਜਪਾ ਆਪਣੇ ਦਮ ਉੱਤੇ ਅਸੈਂਬਲੀ ਚੋਣਾਂ ਲੜੇਗੀ- ਅਸ਼ਵਨੀ ਸ਼ਰਮਾ
ਰੱਸੀ ਜਲ਼ ਗਈ ਪਰ ਵੱਟ ਨਹੀਂ ਗਿਆ।

ਪੰਜਾਬ ਵਿਚ ਭਾਜਪਾ ਦੀ ਹਾਰ ਦਾ ਤੇ ਕਿਸਾਨ ਅੰਦੋਲਨ ਦਾ ਕੋਈ ਸਬੰਧ ਨਹੀਂ- ਤੋਮਰ
ਕੰਤ ਨਿਆਣੇ ਦਾ, ਖਾ ਗਿਆ ਹੱਡਾਂ ਨੂੰ ਝੋਰਾ।